معقوله المقدمه 201 تعليق ،،،،والحلقه الاوله 89 بس علقو نبي تفاعل 💔
#المتملك
الحلقه 2
أماتَ الحبُّ عشاقاً
وحُبكِ انتِ أحياني
و لو خيّرت في وطنٍ
لقلتُ هواكِ أوطاني
و لو أنساكِ يا عمري
حنايا القلب.. تنساني
إذا ما ضعتُ فى درب ٍ
ففي عينيكِ .. عنواني
وعيت الصبح على يد تلعب بشعري
خ سوزان: صباح الورد على احلئ بنوته
نا: ابتسمت وبحتت في عيونها كأنها تراجي فيا نحكي وخايفه نرد نفس الاول،،،، صباح النور خالتي
خ سوزان: هي انزلي افطري معانا واليوم بناخذك نشرو حوايج جديدة
نا: فش داعي والله مانبش نتعبك
خ سوزان: صغرت عيونها وبصوت واطي انقولك حاجه
نا: بهمس شن
خ سوزان: انا لي شهر ما شريت حاجه جديدة يرضيك
نا: ضحكت ولي اول مرة نضحك بعد الحادث، ، لا ما يرضيني حاضر نمشو
خ سوزان:تضحك هي صبي سلم بنيتي
صبيت ودرت روتيني وصليت ولبست بلوزة قهويه وكريت وشاح بيج بزيتي ونزلت
عز الدين: مقعمز على راس الطاوله، ،، اوووو روان شكله اليوم سمح من اوله تعالي قعمزي افتحي نيتي
نا: بسته من راسه وقعمزت من اليسار وخالتي من يمين
عز الدين: شن رايك نسجلك في الجامعه ي بنيتي خير ما اضيع عليك سنه
نا: حطيت التوست من يدي، لا ي خالو مانش جاهزة مازال
خ سوزان: لا ياروان شن حكينا نحن لازم نستمرو ح يكون طريقك صعب بس لازم تكوني قويه
عز الدين: شن كنت تقري باي تخصص
نا: بغصه كنت بكليه الصيدله
عز الدين: تخصص سمح بكرا باذن الله نسجلك
نا: اسمحلي ي خالو بس نا بنغير وبلعت ريقي ب ب بنخش قانون
عز الدين: بس قطعت عليه سوزان
خ سوزان: خلي البنت ع راحتها ي راجل
عز الدين: قانون قانون و اول ماتتخرجي ح نطرد المحامي اسماعيل اصلا كبر وخرف ونحطك محاميتي
نا وخالتي ضحكنا على كلامه
وعدينا نا وخالتي لسوق
نا: هذي سمحه
سوزان: ووواك اسود ليش اسود حطي من يدك تعالي نشوفو هذي
نا: خالتو اصفر لالاا
سوزان: ي حليلي وانتي بيضه يطلع عليك سمح ،، تعالي نخشو هنا نجبلك شوي ميك اب
نا: لا مانبش ومانحبش اصلا
سوزان: بحتت فيه يييياي شن هذا
نا: حطيت يدي على وجي شن في
سوزان: صغرت عيونها شفايفك مقشرة وطالعلك هلات لازم نشرو كريمات ومرطبات هي هي ومشت
نا: هزيت راسي وابتسمت،،، ومشيت ورها
وتقريبا شرتلي نص المول وكل حاجه ذوق مش متفاجئة الصراحه لاني نعرف من هي خالتي سوزان وشن ذوقها
قعمزنا بالكافي
نا: خالتي عمي مش ح يخليني بحالي والهدوء هذا مخوفني
سوزان: من قالك ساكت كل يوم يكلم عز الدين ،،،،،وشربت ميه وحطتها
روان انتي كبيرة وعاقله ولازم تفهمي عمك وعمتك يبوك ع شأن فلوسك
نا: ضحكت بغصه عارفه يا خالتي عارفه ياخذو كل حاجه مانبي شي ايسيبوني ف حالي بس
سوزان: لا يا بنيتي انتي تحكي هكي تبي تعب بوك كله يمشيلهم على البارد المستريح لا يا روان
نا: نزلت دموعي ونا شن بندير مش ح نعرف نتصرف
سوزان: مسكت يدي نا وخالك معاك ومش ح نسيبوك وماحد ح يقدر يقرب منك
وجت القهوة والكريب
نا: بحتت في كريب، ، بغضه مريم كانت تحبه كيف بناكله توا وهي تحت التراب بالكي خاطرها فيه ي خالتي بالكي جعانه توا ولا عطشانه،، بابا بابا ي خالتي مريض قلب يبي دواء يبي يدفا كويس، يحب يشرب القهوة في وقت هدا ماما نفسي ماتحبش الظلام، ونا قاعدة هنا ولا على بالي و بناكل وبنشرب
سوزان: مسحت دموعها وجت قعمزت جنبي، ،هم توا عند اللي احسن مني ومنك عند اللي خلقهم وانتي لازم تقوي عشانهم عشان ترفعي راس بوك عشان ادير حاجه تفرحي امك او اختك مش صح
نا: هزيت راسي
سوزان: هي توا افتحي فمك وقعدت اطعميني،,, وقعدنا نهدرزو وكل شوي تحاول اضحكني
خ سوزان :مش مصدقه بعد كم ساعه ح يوصل عمر مرايفتله
نا: ابتسمتلها ساعه كم طيارته
سوزان: يوصل ساعه 9
نا: عندة عويل ماه
سوزان: عيل واحد توا تشوفيه كربوج يهبل امه دزتله صورته امس بس مش متعود علينا لان عدة وهو عمرة 3 سنين
نا: توا يتعود ويتعلم امه تقربلكم !!
سوزان: بحزن اهاا تقريبا بنت خوة لعز الدين مانخبش عليك يا بنيتي زواج ابني من بنت عمه كانت غلطه بس يلا الحمدالله على كل حال
نا: سكتت
سوزان: هي صبي نردو بنشوف رقيه شن دارت العشاء ما تسيبش بروحه هدي
رقيه: تشتغل عندهم من7 سنين
روحت وسقمت الدبش كله في الدولاب
وقعمزت في داري نصلي ونقرا قران نعوض عن ايامي اللي ما صليت فيها،،،، بعدها ادوشت طلعت بالديشمبر بنلبس فتحت الدولاب وطلعت بلوزة سودة في نفس الوقت خشت خالتو
سوزان: روان شن اللي في يدك البسي الاصفر احلئ
نا: خ
سوزان:هي سلم بنيتي
نا: هزيت راسي وخشيت لبست جينز وبلوزة صفرة بالدنتيل و مشطت شعري رفعته فوق كعكه نزل منها خصل
سمعت صوت دوشه تحت قعمزت حبيت نخليهم على راحتهم
سوزان: يا كبدي يا روحي وتبوس فيه من صدرة وكتوفه طبعا مش واصله لوجه
عمر: يبوس فيها من راسها،، وحضنها خلاص خلاص بكاء اني رديت
ايات: هاي عميمي كيفك وكيف صحتك
سوزان: خيرات يا بنيتي خشو خشو وحضنت مالك ولدهم تبوس فيه
عمر: باس راس بوة شن الاخبار
عز الدين: الاخبار عندك نورتو حوشكم تفضلو
على الرغم من حنيه عز الدين غير أن العلاقه بينه وبين عمر رسميه والشي هذا من طرف عمر
مقعمزين في صالون
سوزان: هي تعالو للعشاء تفضلو
ايات: رقيه رقيه
رقيه: جت تجري تفضلي مدام
ايات: طعمي كوكي جوا
سوزان: ليش يا بنتي خليه معانا على صفرة ولدك كبير مش صغير
ايات: لا يا عميمه كوكي مازال طفل وماشي على نظام معين هي ي رقيه
رقيه: بحتت في سوازن
سوزان: هزتلها راسها
عز الدين: شن امور الشغل
عمر: الحمدالله تمام وجا بيقعمز
عز الدين: قعمز غادي هنا مكان بنيتي
عمر: رفع حاجبه بتعجب بنيتك؟
سوزان: احمم ممكن تسمعوني شوي عمر ايات نحن عندنا ضيفه وتقدرو تقولو مش ضيفه من اليوم اللي جت فيه وقعدت نفسن بنتنا واكثر،، توا تتعرفو عليها بس قبل ما تنزل ياريت ماحد يزعجها بكلمه يااااريت
ايات: بخبث اووو ومن هذي اللي عمي قالها عنها بنيته وانتي تحكي هكي شوقتيني نعرفها
عمر: ابتسم على جنب بهزوة وهز راسه وقعمز في كرسيه
عز الدين: ضحك على ولدة اللي يذكرة بروحه ايام كان شاب ،، ومدله اصبعه مزلت ما تغيرت مزلت تكسر كلامي وعنيد
عمر: رفعله حواجبه تربيتك ورفع ايديا هذا مكاني دبر لبنيتك مكان اخر
نا جاتني رقيه وقالتلي يراجو فيك على عشاء
نزلت وألقيت خالي على راس الصفرة وعلى يمينه خالتي وجنبها وحدة بشعرها الكيري الاصفر وخشمها المرفوع بتكبر وسمرة ،،،،،،،،وعلى يسار ساس قصدي راجل بس هذا أضخم راجل شفته ،،،عيونه اللي مش مفهوم شن لونهم اخضرعلى رصاصي ولا حواجبه كانه حد ماسك ورقه وقلم وراسمهن من غلظهن وجمالهن وفكه وخشمه الحاد ولحيه الخفيفه وشعر المرتب ،هذي لوحه فنيه ولا شن !!!!
سوزان: تعالي يا بنيتي
نا: بصوت واطي مساء الخير
وقعمزت جنبه
نا: بأبتسامه الحمدالله على سلامه
ايات: تبحت فيه وساكته وتبحتت في سوازن تبي تعرف من هذي
سوزان: عمر ،ايات هذي روان ، روان هذا ابني ومرته
عمر: يشرب ميه وبكل برود ولا كنه في وحدة انزلت توا ،،،،همم تشرفنا
ايات: اااااه ومن هذي وليش جايه هنا
نا: فركت ايديا في بعضهن ونزلت راسي
عز الدين: مديلي الخبزة يا ايااات
ايات: رعشت من صوت عمها ومدتله الخبزة وسكتت
نا: رفعت راسي القيت اللي جنبي يببحت فيه وفي ايديا ومرفع حاجبه فطنت لروحي فكيت اايديا من بعض
عز الدين: هذي روان يونس && بنت المرحوم المحامي يونس ي عمر اللي من خمس سنين مسكلنا قضيه الارض ومافش غيرة كسبها
عمر: اممم تسند على كرسي فرك حاجبه بأبهمامه وكنه يحاول يربط الاحداث اااه المحامي يونس اللي قطع عليه
عز الدين: هو بذاته
عمر صاح كان برا ليبيا بس كان متابع اخبرها اول بأول وعندة بصفحته على فيس بوك كل اللي يشتغلو معه ومع بوة عز الدين فكان عارف من الفيس ان المحامي يونس توفا اصلا الفيس انقلب عليه وكيف مات البوستات وقفت من فترة بسيطه ،،
عكس ايات اللي كانت كل صفحاتها ازياء وموضة وتجميل فكانت زي الاطرش بالزفه
ايات : شبكت ايديها في بعضهن على طاوله، باه وين هلها توا
نا: بلعت ريقي للمرة الألف ، وابتسمت بغصه صبيت
سوزان: بحتت فيها بحقد وين يا بنيتي قعمزي
نا: بابتسامه بنجيب ميه بس رقيه كالعادة نستها وخشيت لكوجينه ،،،، مسحت دموعي اللي نزلت وطلعت نعبي ميه
سوزان: كنك يا ايات ماعش عرفتي تسكتي هلها ماتو في حادث خلاص تريحتي
ايات: اها وهي جت بتعيش معانا توا !!!!!!
عز الدين: حط الكاشيك، اها في اي اعتراض!!!!! ومش ح تتطلع من هنا الا لم تزوج او نموت نا ساعتها ديرو اللي تبيوه
سوزان: بعيد الشر
عمر: غمزله شن ي حويج شكلك عينك منها ،الحقي روحك يا سوزان
عزالدين: مزلت مش متربي انت بس شن نقول على واحد كمل حياته برا شن بيطلع يعني
عمر: يضحك ويأكل بس نا سمعت ان بنته ماتت
سوزان: الله يرحمه عندة بنتين الصغيرة اللي ماتت رحمه الله عليها
ايات: بعقلها ما ناقصني غير وحدة يتيمه على اخر عمري
جيت وجبت الميه وقعمزت كليت مجامله ومش قادرة نتحرك حسيته ملصق فيه
ايات: رقيه رقيه كنك انطرشتي
رقيه: جت تجري وداهشه تفضلي مدام ايات
ايات: غيري لكوكي و رقديه بدارة
رقيه: حاضر نلم الصفرة قبل ونرقدة
ايات: بابتسامه صفرة رقديه قبل بعدها شوفي شغلك، ،وصبت نا نستاذنكم نعسانه غرفتي جاهزة ماه
رقيه: هزت راسها
نا: صبيت عدي ي رقيه توا نلمها نا الصفرة
رقيه: جت تجري لا تريحي
نا: ولو الفيلا كبيرة والشغل كله على راسك خليني نساعدك شوي
عز الدين: خليها يا رقيه، فهمت ان يبيني نشتغل ونلهي روحي
صبا عز الدين وسوزان وعمر لصالون
عمر :سلح الجاكيت ورفع أكمام سوريته وقعمز ،،، فهمونا
عز الدين: يقلب بالتليفزيون شن نفهمك
عمر: على بنت هذي شن قصتها جديات بتعيش هنا
سوزان: كنك يا ولدي قلبك قاسي هكي شن نعزقها يعني
عمر: بعقله زح كنك يا سوزان جيبتلي كتله من الجمال وتبيها تعيش معايا،،،،،، لا ما قتلك اعزقيها بس نا ما نشتغل ونتعب باش نربي اطفال افتحيلي مدرسه هنا وخلاص
عز الدين: ريحلي روحك عندها فلوس تعيشها ملكه غير انت قلتها طفله صغيرة كيف بنسيبها مش ح تعرف تمشي امورها
عمر: مشا يدة بشعرة ، ،خلاص توجعلش راسي اللي تشوفه ديرة
عز الدين: شن رايك في طارق يا سوزان
سوزان: ونعمه الشاب مؤدب ومحترم ويعرف ربه بس ليش تسأل
عز الدين: شن رايك فيه ل روان
عمر:دغري باندفاع 2019 راه ومزلت تزوج الناس بطريقه هذي
عز الدين: هشش شن عرفك انت وبالنسبه لروان مش ح نلقا لها خير من ولد خيتي وهكي نطمن عليها
سوزان: ليش لا بس خلينا نأجلو الموضوع شوي البنت امس غير حكت
عز الدين: هز راسه
عمر: بفضول كيف امس غير حكت، ،وماعرفش روحه ليش يسأل وجا الفضول هذا على عكس طبعه
سوزان: بعد الحادث قعدت 3 شهور ماتحكش امس غير انطقت
نا: جيت ، خالتي كملت بنطلع نرقد تصبحو على خير
سوزان: عبست هكي على نأشف
نا: ابتسمت وجيت بستها من خدها
عز الدين: عوينها طبعا خالتك مش نا العجوز المسكين
نا: ضحكت وجيت بسته من خدة وراسه ،،،ونست عيون الشخص ال3 اللي شوي وتتطلع
عمر:صبا، نا في المكتب عندي شغل بنكمله
سوزان: تمام يا ولدي بس ما تعبش روحك
ومشا معايا ولي اول مرة نحس روحي قصيرة بكل قدام حد
طلعت على دروج وهو كمل طريقه
خشيت لبست بجامه قطنيه بيضه فيها ورد وطلقت شعري صليت العشاء
ورقدت خطر في بالي موبايل لازم نشري موبايل جديد بنكلم امنه صاحبتي ،،،،،،
وجت في عقلي اغنيه هلا بريحه هلي تميت اندندن ونغني ودموعي ماوقفتش مسكت لعبه مريم حضنتها ونبوس فيها نتخيل فيها مريم وراقدة معايا لم كانت تجيني تقولي خايفه بنرقد معاك ،،،سمعت صوت بابا يقولي مسحي دموعك يا بنيتي تحرقلش قلبي وسمعت صوت ماما تقولي دفي روحك وطفي المكيف توا تمرضي ،،، قعدت نتقلب ونسمع في اصواتهم ونبكي لعند ما صبيت بحتت في ساعه القيتها 2 ونص
مسكت العبه وفتحت الباب وما اهتميت لشكلي وشعري المطلوق لتحت ظهري ومشفشف من كثر ما تقلبت،،،، مريت على دار خالتي وخالي مردود نصها مش مسكرة ابتسمت ربي يخليكم لي يارب
ونزلت من الدروج و جيت بنخش لكوجينه حطيت يدي على فمي ورديت لساس
عمر: مصبي يدير قهوة ولابس بجامه قطنيه رصاصيه تيشرت اسود
نا: ووواك كنه العملاق هذا واعي لتوا
عمر: تعالي كنك واقفه
نا: بحتت يمين ويسار من وين طلع الصوت هذا وبحتت فيه مازال نفس ما هو عطيني ظهرة كيف شافني ،،،،،،برم وماسك مق قهوة وجاني
عمر: بحت فيه من فوق لوطه، ،وبعد فترة سكوت،،بصوت يخوف كنك واعيه شن عندك
نا: رفعت راسي، ها يأنسون
عمر: رفع حاجبه شن
نا: ما ماعرفتش نرقد بندير يأنسون
عمر: شرب من المق اها وبحت في لعبه اللي في يدي ضحك بهزوة
نا : بحتت في يدي عصرتها ودمعت عيوني، كنك تتضحك
عمر: بحت في عيوني،,,,,,,,,,,,,,,,