#ليتني_استطيع_فعلها
/////بقلم زينب ماجد/////
الحلقة_2
وصلت البيت، فتحت الباب فتت بشحاطة امجد، تلكتني ماما:
:- لج شنو هاي برا برا كلج طين، من وين لج هذة الشحاطة اللي بكبر راسج
-مالت امجد
-جنتي عند مهى ؟
- اي
-و اخوج هنا كاتله الجوع معرفتي تسويله اكل لو بس فالحه بالدياحة
-والله هو ابنج مو ابني اذا تريدين انتي استقري بالبيت و داري اني شنو ؟ و بعدين سويتله و ما قبل ياكل يطبه مرض شسويله
-انت شنو هالسان الصاير عندج ؟ مو اكصه و اشمره للجلاب والله
-وبطريقج شمريني كلي بلكت اخلص منج و من رجلج الخنزير
-دياااار مو اجي اكص راسج ديار
... عفتها و فتت كعدت بالغرفه مالتنه..
الغرفة صغيرة حيل يا دوب بيها كنتور ابو البابين بس، حتى تلفزيون ما عدنا، و نفرش دواشك بالكاع، حشك اني و اخويه، واختي الصغيره من جهة اسامه تنام، و مرات يم ماما.
كاعده بفراشي و متلفلفة بالبطانيه، ماكو صوبه، صافنه بالحايط ..
عرض بمخيلتي ابن عم مهى (خالد): شلون حلو و انيق حرامات متزوج وحده مثل ضحى قلبها اسود.
يكول عني حلوه !
ابتسمت.. كمت للمرايا المعلكه بالحايط، فليت شعري و اباوع بنفسي: صدك اني حلوة ؟
باوعت التشوهات البركبتي و اتذكرت كلام مرته المسمومه، اخذت نفس و باوعت على نفسي: راح اثبتلها هذه المشوهه شنو
...انفتح الباب فاتت ماما
-خير شو اليوم فالين الشعفة كبال المرايا شكو
لفيت شعري:- ماكو شي عجبني
رجعت لفراشي
-لا ترجعين كومي سوي عشا
-الثلاجة فارغه ! جبتي مسواك وياج ؟
-لا ليش فارغه
-هو انت داريه عن البيت شيء ، بس اوامر كومي و اكعدي
-بلا طولة السان و كومي شوفي شنو موجود و سوي بلكي باجر اكدر اتسوك
-و هذا الخنزير عود ليش ما يتسوك بس شغلته يتأمر ؟
-معليج بيه، كومي
كمت بأستنفار و اني اشمر من اديه، و اتمتم ويا روحي بالغلط و الوم على حظي
عدنا بس طماطة گليت و سويت جاي، كملت الصينية باوعت خبز ماكو
-شنو مجايبه وياج صمون ؟
-لا ليش خبز ماكو
خليت ايدي على وجهي بتذمر و رجعت باوعتلها: بربج ؟
-ما صار شي روحي لمهى جيبي ٣ كرص خبز كليلها من نخبز اجيبلكم
-شنو اروح اطلب، انطيني الف اروح اجيب صمون
- ما عندي روحي گتلچ
-اوووه من انعل الساعة السودة الجابتني عدكم
فتحت الباب جريت البوتين اريد البس، صار بوجهي ابوي
-ها وين رايحه
-اجيب خبز
-من مهى ؟
-اي
-و كليلها خالج يسلم عليج يريد خيار هم
-بابا عيب حتى خيار اطلب منهم
- امشي لج لا اكسر راسج، تعرف العيب بنت *****
فات مني و هو يفشر عليه و على امي، هزيت ايدي و مشيت لبيت مهى، طلبت منها
انطتني ٥ كرص خبز و الاكل الباقي بالثلاجه من العزيمه كله شالته و كالت :- اخذي ترا اذا يبقى عدنا ينذب حرامات
خليتلياه بجدر، طلبت علاكه اخلي الجدر بيه، ما عدهم علاكة جبيرة اضطريت اشيل الجدر على جتفي و امشي ..
جان الباب مال الكراج مفتوح على حيله من الهوى، و بيت عمهم كبالهم، شفت خالد طلع، ع السريع نزلت الجدر و خليته يم الباب..
تقرب ديفوت لبيت عمه، شافني كباله:- ها رجعتي
-اي دا ارجع شحاطة امجد
-وين بيتكم انتم ؟
-بالفرع الثاني
-و اهلج يقبلون بنيه بهالعمر تطلع بهالليل ترجع شحاطة !
بلعت ريگي و دا اطلع، كال :- انتظري بس ينزل امجد نوصلج ابطريقنا
-لا اني اروح هذا ببتنا قريب
-ادري قريب بس كلت انتظري
حجاها و ركز عيونه بعيوني، بساع درت وجهي، و نبضات گلبي صارت طبل من الخوف مدري الانحراج
...يربي اذا هو وصلني شلون اشيل جدرية الاكل الزايد والله فشله، شيكول علينا ناكل فضالة بيت عمه
نزل امجد مبدل، الضاهر اكو لعبة ديروحون يشوفوها بالكوفي، باوعني امجد :- ها ديور ؟
خالد:- انوصلها بطريقنا امشي
-اي يلا
مشوني و اني عيني على جدرية الاكل و بودي ابجي من القهر
- ااا صدك ديار شحاطتي الاخذتيها مجبتيها وياج ؟
انلصمت معرفت شحجي اتخربطت اوضاعي، و خالد واكف بالباب، باوع بطرف عينه عليه و عرف بجذبتي : يلا امجد راح نتأخر
-اي يلا ، ديار اخذي جدريتكم، مو انطتجياها مهى
-اا لا لا مو الي ما اريدها
-بكيفج
خالد:- صعديها بالسيارة
- كلت مو النا
اتجاهل كلامي و صعد كدام الستيرن يسوق، و امجد يمه و اني ورا كعدت..
وصلنا باب بيتنا نزلت، جان صوت امي طالع و هي تصرخ نزلو خالد و امجد ع السريع، راد.يفوت خالد لزمه امجد
-لا تدخل يمعود تلكاها مشاكل عائلية
-لك دسمع المره شلون دا تصرخ اليكول محتركه خل ندخل
-دوكف يمعود هي هاي هيج صوتها و المنطقة متعودة على صياحهم .. ابوهم سكير
انحرجت كدامهم بشكل مو طبيعي، مشيت كدامهم فتحت الباب، و صريخ امي زاد، اتقرب خالد حط ايده على ظهري و فات دك باب الهول و صاح :- يااااابة اهل البيت
طلع ابويه:- منو انت
-العفو اني ابن عم امجد بس وص...... قاطعه ابويه و هو يصرخ بيه :- دزيتج على خيار طلعتي تكو**** بنت ******
ضربني راشدي و لزمني من شعري راد يفوتني، لزموه خالد و امجد يتصايخون وياه و يهدوه، اني ركضت للغرفه ع السريع وقفلت الباب، ابجي
و اسمع خالد و امجد يحجون وياه، اخر شيء طردهم من البيت و رجع ع الغرفه الاني بيها يضرب ع الباب قوي و يفشر عليه و يريد الخيار
واكفه ورا الباب ابجي و لازمه السركي لا يطك و يفوت عليه، و ما اجاوبه و امي بغرفتها تبجي..
مل من الصياح و الغلط عافني و راح للاستقبال، كعد يشرب.. مشيت لفراشي التفيت و حطيت راسي و اني ابجي ما اعرف من الفشله كدامهم لو من خوف ابويه لو على مأساتهم، مليت من حياتي كلها و ما اعرف بيا طريقة اخلص منها او من اهلي..
لثاني يوم الفجر، طلعت، ابويه على نفس حاله سكران و نايم بالأستقبال ...
رحت لغرفة امي، ندهتها كعدت
-كعدي لا بس نايمة يلا كعدي
-شرايدة انت اللخ
- مليت منه لازم اسممه و اموته بعد ما اتحمل، يضربني كدام خالد و امجد
- دكومي من خلقتي كومي مالي خلكج
عافتني و كامت
رحت للمطبخ شفت الجدر العفته عد بيت امجد، موجود، رحت ورا امي للحمام ... : هذا الجدر منو جايبه ؟
-شمدريني غير انت عايفته بالباب دخلته بالليل
صفنت: يعني هم جابوه !
تنهدت، طلعت امي، تخصرتلها :-شبيه هذا الخنزير هايج علينه البارحه؟
-يعني شبيه غير يريد فلوس مني اكوله ما عندي يهد عليه بالسجينه، لا شغله و لا عمله غير شابع عرگ و نوم و عايفكم براسي
-هسه انت على اساس شلون شايلتنه فوك راسج
-ولي من وجهي دا اشوف ولي
باوعت وراها بخزرة :- قسم عليه يجي اليوم اللي انتقم بيه منكم كلكم و ادفنكم بأديه
...بدلت اني و اخويه كالعادة و طلعنا للامتحان، و اني يا دوب حافظه منه شيء، اتذكر للتحضيرات اليوميه لان البارحه مقريت هوايه
بالطريق، صادفنه سلمان المخبل، معروف بالمنطقه سويج، مو فاقد عقله و انما تصرفاته مو متوازنه
شفت بيده موبايل خطرت ابالي فكرة فصحت :- يااااا اسامه نسيت الخمسميه مالتي جوه المخده ! ارجع جيبهم ع السريع فدوه
-لااااا ديار ما بيه حيل
-عفيه والله جوعانة عاد اكل لفة فلافل ارجع جيبهم فدوه، ديلا يا اسامه بساع بساع
دفعته و هو يتمطمط منا و منا لحد ما فعلا رجع .. تقربت من سلمان:- هلا سلمان صباح الخير
-هلا بالوصخه
- لا يا وصخ، اسمع سلمان، جايتتك بشغله مهمه و ما الي غيرك
-شكو؟
-انت تعرف اكو واحد ارهابي بمنطقتنا ؟
فتح عيونه و كال :- اااخ صدك ؟
-اي، و اذا ما خبرنا عليه احتمال العصر يفجرنا، و اذا حجينا راح يتهمونه نعرفه و يسجنونه و يضربونه
- اي صدك، يعني شنسوي هسه ؟
-لازم نخبر عليه بدون ميعرفونا منو احنه
-منين ؟
-من موبايلك هذا، اني اعرف رقم الشرطه نخابرهم و نبلغ ..
ايدني بالكلام القنعته بيه، و هو متحمس و متعصب لان ارهابي بالمنطقه و يريد يخبر عليه، علمته شنو يحجي و شيخابر ..
خابرهم و بلغهم، و انطيته المكان مال البيت المحله و الزقاق .. اجه اسامه رحت وياه، و هو يسألني :- شبيه سلمان ؟
-ما اعرف يكول اكو ارهابي بمنطقتنا
-صدك ؟
-شمدريني اصدك هذا السويج
... رحت امتحنت و اجاباتي جانو نص بنص، طلعت لمدرسة اسامه، اخذته و رحنا للبيت، شفت اكو دوريات بالفرع و بالتحديد اباب بيتنا وسلمان وياهم يحجي و يضخم بالموضوع لا ويكلهم اني شفته بعيني
بقينا نباوع من بعيد اني و اسامه
-شنو ذوله ليش الشرطه ابابنا ؟
-ما اعرف، اكولك خل نروح لبيت مهى و ندز امجد يجي يشوف شكو، اني اخاف
-يلا
.. رحنا لبيت مهى و سولفتلها انو: اكو شرطه اباب بيتنا و هوسه بالمنطقه و خفنا نفوت للبيت
هي خابرت امجد ع السريع و گالتله، و عمها هم طلع من بيته و راح لمنطقتنا، اني صبيت ماعون تمن و فاصوليه من اللي طابخته مهى و صعدت بغرفتها كعدت اكل
شويه و اجا امجد و ابوه، و مهى تسال بيهم بلهفه :- شكو و شصاير
امجد:- والله ما افتهنا على اساس مبلغين على اسماعيل و كايلين عنه ارهابي مدري شنو، فايتين عليه للبيت لاكينه نايم و كدامه ابطالة العرگ، ماخذينا و طالعين و دايفتشون بالبيت، خابرنا هسه على اخوته و على مرته ديجون يشوفون شنو الوضع
مهى لطمت على خدها و هي تصيح :- سوده بوجهي يا خالو هالمكرود منيله ارهابي دخيلك الهي توكف
اني واكفه على صفحه، ساكته بلا حس، و اسامه يمي يبجي و يسألني: صدك بابا ارهابي ؟
للظهر اجت امي هم لطمت و صرخت و بجت، و اخذتها عمتي و عمامي و راحو
الفهمته بعد ما اجو، حابسين بابا و مانعين احد يشوفه و حققوا ويا امي و سألوها، و لليل يلا رجعوا، امي كالت : ابقو هنا لا ترجعون منا لما نشوف وين توصل الامور
فرشتلنا مهى بالاستقبال حتى انام، تمددنا و امي راحت جابت كتبنا و ملابس النا وراحت لبيت عمي حتى من الصبح تطلع وياه..
كعدنه بفراشاتنا نقره قبل النوم...
شويه و سمعت صوت اللي اسمه خالد هو و مرته بالهول، صفنت و اني استمع لكلامهم، يسولفوله على سالفة ابوية، تركت الكتاب من ايدي و كمت للهول
دخلت اباوع بيهم، و كعدت يم مهى، خالد صافن بامجد و هو يسولفله، و دايخ بالسالفه، التفت عليه و هو يكول :- هاا ؟
مجاوبته كعدت، اجا اسامه كعد يمي
رجع سأل خالد:- هسه ذوله وين يبقون ؟
امجد:- يمنا ، يم بيت عمي وين ما يرتاحون قابل هم غربه
اندار عليه:- هو البارحه ليش يضرب بأمج ؟
-لأن ما تنطي فلوس
ندستني مهى :- لا تحجين عن مشاكل اهلج
و خالد مستمر يحجي: شنو من بشر هذا، لا الحلو صدك و يطلع ارهابي الا.... قاطعته مهى
-لا خالد على بختك هو صحيح يشرب و عصبي بس ماكو اطيب من گلب خالي
-ان شاءالله خير، شنكول بعد
اني ما نزلت عيني من خالد، ما اعرف ليش كأني ما شايفه، من يصير كدامي ابقى اباوع بيه على ملامحه شلون يحجي، ادقق بملابسه بشمرة ايده و هو يحجي
انتبهت على مرته، تباوع عليه شلون اباوع على ازوجها و تخزر بيه، درت لأسامه كلتله:- كوم خل نروح نكمل قراية
كعدنا نقرأ، فاتت علينه ضحى مرت خالد، تقربت مني: اسمعي لج عينج اذا حطيتيها على رجلي بعد لو باوعتيله افكس عينج افتهمتي، خلقتج نعال لاستيك وبلا مستحه تبصبصين برجلي ال****
اسامه:- عيب عليج هسه اروح اصيح عمو امجد عليج
جرت و دفعته عليه و هي تكوله :- ابعد مني انت
و طلعت
اني منطقت و لا حرف، سألني اسامه :- هاي شبيها ؟
-خليها تولي خل نكمل دراسه
فاتت يمنا مهى و هي جايبتلنا، برتقال مشيف بماعون و خلته كبالنا و كعدت :- ها درستو
-كاعد ندرس
اسامة:- مهى هاي مريه رادت تضرب ديار
التفتتلي :-منو هاي؟
-مرت ابن عمج خالد
-يوووه بس لا غيرانه منج على خالد ؟
-جان يحجي و باوعتله اجت تكلي افكس عينج
-هاي الغيرة مالتها اخبال على خالد، لو مر الهوى عليه عاركته
-هو يحبها ؟
-يموت عليها اساسا ماخذها على حب و سنتين يعارك عليها يلا اخذها، عنده منها ٢ بنات، و كاتله روحها تريد تجيبله ولد، و هسه هي حامل، يلا معليج بيها كملي دراستج و هاي جبتلكم برتقال تاكلون، يلا
عافتنا و گامت
بقيت صافنه افكر بكلامها و ابالي افكار غير شكل
ثاني يوم داومنا، و امتحنت، لما طلعت صادفني سلمان، اجاني يركض و هو يصيح :- ديار طلع ابوج ارهابي اني شفته بنفسي بيده قاذفه همزين كلتيلي عليه الا اخليهم يعدمونه
-اششش نص صوتك لا تفضحنا، اسمع لا تكول اني كتلك لان يضربوني
-لا لا ما كلت، بس هو ارهابي ارهابي ديار ، ابطنه مفخخه يريد يفجرنا يسوينا نار نار
-اي اي، بس لا تحجي معليك لا يلزموك
-لا اني دليت الشرطه و اخذوني البارحه بس ابوي راح جابني و اليوم هم ابلغ عنه
خالد:- دياااار
دا احجي ويا سلمان و اجاني صوت خالد من وراي، جمدت بمكاني، التفتت عليه و هو يخزر بسلمان، تقرب من عدنا و كاله : ها سلمان شكو
هذا سولفله عن ابويه و ان هو ارهابي و بلغ عنه، و ذاك حامي يسولف و يجذب و يعضم بالامور .. خالد هز راسه و حط ايده على جتفه و كاله : سلمان امشي منا و اذا شفتك بعد هنا وجهك افلشه افتهمت يلا منا
ذاك خاف كام يباوع بطرف عين تراجع و راح، التفتت: يعني انت يا ديار
-ااا لا مو اني
-وبعدج تنكرين
- لا ما انكر بس خالد لا تكول لاحد
-حرام ابوج يروح بيها
-عساه بس لا تكول انت معليك
التفتلي متفأجئ بوجه عصبي صاح بيه:- انت شنو من بشر بابا، ابوج هذا لو ضربج و يكسر راسج كلمه ما تحجين
-اي بس انت معليك
-لا تردين بعين وكحه نزلي عينج ديااار
دنكت و حجيت :- لا تحجي لاحد
-خايفه ؟
سكتت، اندار راد يمشي لزمت ايده :- خالد بس احجي وياك
باوع لايدي لان لزمته، نزلتها :- نكدر نحجي شويه
-بخصوص شنو
-اشرحلك الموقف اللي خلاني ابلاغ على ابويه، لان مو مثل ما انت متخيل
-امشي للبيت
-لا بالبيت الكل يشوف و يصير حجي، بغير مكان احسن
-اخوج وينه ؟
-راح لصديقه يدرس وياه
-زين لعد انتظري اجيب سيارتي و اجي
هو مشى، و اني وكفت بالفياي انتظره، رجع بسيارته، صعدت، سألني:- امج ميضل بالها لو تأخرتي ؟
-محد راح يهتم لو متت اصلا
رفع حواجبه و هو يباوعلي، مد ايده شغل السياره و ساق، ساكت ما حجه، لان بالمنطقه راد بس نطلع حتى نحجي، هناك وكف سيارته و كال اصبري هنا شويه و اجي، نزل لمحل ادوات احتياطيه ما اعرف شنو جان يريد منها بوكتها..
باوعت لموبايله، زوجته تتصل عليه، باوعت عليه هو فات للمحل، قفلت الجامات و حركت السويج طفيت السيارة و رققت صوتي و رديت :- الووو
تخبلت من سمعتني صوت بنيه، صرخت بيه:- منو انت و شيسوي موبايل رجلي عندج
تنعوصت:- اوي عفيه لا تصرخين هشكل زرفتيها لأذني ما اتحمل
-ولج يالكح.... شعدج ويااااااا رجلي كووولي خالد وييين
: موبايل حبيبي و ارد عليه انت منو يمج اووي
كامت تفشر عليه بصوت عالي، رديتها: اوي عفيه دوختيني ما اتحمل، روحي اجا لا تزعجينا بعد اوووكي ..
قفلت الخط و غلقت الجهاز نهائي و خليته
-وشوفي هذه المشوهه اللي وجهه نعال لاستيك شنو راح تسوي بيج
مسحت على شعري منا و منا خاف مكوش، شويه و اجا هو صعد غراض بصندوك السيارة و رد صعد
:- اي ديار ليش محد يهتملج
-امي تشتغل كل وقتها و ابويه ميحبنه
-ماكو احد ميحب جهاله، و عصبيته ما تعني ان هو ميحبكم
- هو اللي حركني و شوهني و خلاني مسخره للكل
سكت، التفت : ليش حركج ؟
-وكتها جان عمري خمس اسنين لما حركني، برأيك ليش اب يحرك بنته بعمر ال٥ سنوات
-معقوله ؟!! اتوقعت تشوهج حادث باي طريقة كانت، بس ابوج ما معقول
-لما جابت امي اول بنت، حيل كرهه و جان يكتلها هوايه لان ما يحب البنات، و لما حبلت و جابت الثانيه، شالها بالليل و امي نايمه وحطها بعلاكه و راح شمرها بالزباله اللي بالساحه
-ماتت ؟!!
- ما لكتها امي دورت عليها هوايه بالزباله و ماكو، و بابا هددها بس تبلغ عنه لو تحجي يكتل اختي الجبيرة، و سكتت ما بغت عنه
و لما حبلت مره لخ و جابتني، هم شالني منها بالليل و حطني بعلاكه و شمرني مثل اختي الاولى بالزباله، بس امي فازه و منتبه و متعاركه وياه مدليها مكاني ، راحت جابتني و اجت و كل ليله و اني طفله يحاول يكتلني
-هذا مو انسان طبيعي، شلون عايشين وياه
-سكير ولما يسكر يتحول لخنزير
-وليش حركج ؟
-ما اعرف كتلك جنت صغيره
- و اختج الجبيره وينها ؟
-ماتت
-شلون
للحظه حسيت راسي اشتعل و صراخها صار براسي و هي تصيح (دياااااااار) اختنكت و كمت كوه اتنفس و عركت، كمت افرك بوجهي واني اكوله :- ما اعرف ما اعرف
خفف سياقة السيارة و هو يباوعلي، حاولت ارجع طبيعيه كدامه و ما ابينله شيء اخر، فتح بطل مي فاتر جان بالسيارة و انطانياه، شربت ...
راد يغير الموضوع، سألني :- يا صف انت ؟
-ثالث متوسط
و اخوج ؟
- ثالث ابتدائي
- الله اكبر من ظلم البشر، معقوله اب يسوي هيج ابناته، لج عندي بنات اذا مو كل ليله اشمهم قبل ما انام و اخذهم بحظني ما ارتاح، شنو طينته هذا ، الله الله
وصلني لمحل، كال:- انزلي نحجي جوا، عندي غراض دا اريد اركبهم
جر الموبايل حطه بجيبه بلا ميشوفه، نزلنا، فتح باب المحل ليفوك و فتح الباب اللاخ من كزاز، ودخلنا محل بيه غرفتين، فتنا للغرفه الثانيه
اكو بيها الات تصوير و هو كعد يركب بيهن:- محل شنو هذا ؟
-محل تصوير، تعرفين جنت عايش بسوريا و قررت ارجع اعيش هنا، فاجرت محل تصوير و اشتغل بمجالي افضل
-انت شنو شغلتك
-اشتغل مصور اعلامي، بس شغل ماكو كلت افتح محل ، عوفيني من عندي ارجعيلي لسالفتج، لهالسبب يعني ورطتي ابوج بهالسالفه ؟
هزيت راسي بمعنى (اي )
-تعرفين ابوج راح يروح بيها من صدك لان و على حظه، اخباريات عند الشرطه عن ارهابي بالدوره بأسم اسماعيل و اجا اسم ابوج ويا اسمه و هسه هو عند الامريكان، بالقل هو الله احد لو طلع
-عادي
يركب بهذا العمود مال التصوير و اني حجيت هيج، التفتلي ورجع دنك يركز و يهز براسه مراضي بكلمتي
-شوفي هو من حقج تكرهي، بس مو لازم تكونين عدائيه، مو ضروري نأذي كل انسان يأذينا، اكو الله و ياخذ بحقنا و الا نكون مجرمين
-الله يطول لما ياخذ الحق ، و لو يحبني ما جان رضى بوضعي، جان طيبني او انتقم من كل انسان يضحك عليه فاخذه اني و ما اعتمد على ربي
-استغفري الله، حرام شنو هالكلام... الله يمهل ولا يهمل، و لا تقللين ثقتج بنفسج معليج بالناس، وجهج حلو مناقصج شيء و الطب اطور، اكو عمليات تجميل ترجعج مثل اول و احلى
-و منين اجيب و هو حتى مصرف ما ينطيني اخذ من امي
-اسعي انت و اتجاهلي الناس و رجعي نفسج
-شلون
- هاي الشلون يمج، تشتغلين، تفلحين بدراستج بكيفج، بس هذا طبعج لازم تبدلي
-مو بايدي من احد يتمسخر على وضعي لازم انتقم منه
وكف و هو يشتغل، اجا من مكانه و تخصر :- و كم واحد انتقمتي منهم ؟
-هوايه
-مثل ؟
- وحده بالمدرسه تضحك عليه دوم، رحت خليت رساله بسيارة ابوها و كتبتله( بتك ما اداوم، تطلع ويا واحد للشقه و تروح وياه )
صرخ :- لا يربج و شصار بيها البنيه
-ما اجت بعد للمدرسه و خلصت منها
بقى فاتح عيونه و حلكه منذهل :- وغيرها ؟
- جيرانا ابنها يتعارك و يا اسامه يضربه، و من اطلع اضرب ابنها، تهد عليه و تغلط و تكلي المشوهه العوبه
-و شسويتي ؟
-كتبت لرجلها مرتك من تطلع اطبب زلم لبيتك، ضبها لا تشدلك گرن
-يربج ولج شنو كل شغلج بالشرف ديار هالانتقام يهجم بيوت، ولج هاي حوبتهم تدمر حياتج، انت شنو من بشر
- محد كايل الهم يضحكون عليه
- هذا مو تبرير انت انسانه مريضه، و جريمه يخلوج عايشه بين البشر المفروض بمصح عقلي تتعالجين
-دنكت ما رديت
-لا تمثلين دول التزعل، لو مو تزعلين افعالج ما ينسكت عنها
-اريد اروح
اخذت كتابي و هميت للباب
-اصبري اكمل شغلي
فتحت الباب و طلعت، اجا ورايا لزمني: كلت اصبري
صرخت بوجهه :-اني مو مريضه
- اي مو مريضه بس بدون هالامور و سوالف الانتقام، اهدي و اكعدي يلا دا اشوف اريد.اكمل شغلي
-خالد
كلت اسمه و مكملت، كعدت ع الكرسي ابجي، اجا يمي :- اشششش لج اني اشوفج قويه تبجين ليش، امسحي هالدموع يلا و تعالي كملي شغلي ويايه
يلا دا اشوف ، شو
-وين ما اروح يسمعوني كلام اني مو حلوه، يعبون عليه، محد يعيش احساسي و يحس شكد اتعذب و انقهر
-تعرفين اللي يسخر منج شكد الله راح يعذبه اكثر من العذاب اللي اتحسي بالف مره ؟
-شوكت
-لما يجي دورهم، النبي ايوب اتمرض بمرض و خلى الناس تشمره خارج المدينه، و هو سيد قومه و اخذ اولاده و ماله و كل شيء يملك و عاش بأردئ حال و صبر، ولما صبر الله عوضه و انتقم من كل اللي اذوه ورجع اولاده و امواله كلها و عاش بخير
هي الدنيا هيج، امتحان
اوعديني متأذين احد بعد ولا تنتقمين
هزيت راسي... : كومي يلا ساعديني
اخذ ايدي ومشاني للغرفه، اباوع لايده و هو لازم ايدي ، وكفن كدام الة التصوير و كال: الزميلي منا
لزمت و اني بين اركز بالاله و بين اباوع بوجهه و ملامحه، مدنك و ابتسم، رفع عيونه :- معجبه بيه مو ؟
تركت الاله من ايدي بسرعه و وخرت، ضحك
- خل نروح
-بس اكمل شغلي
سكت ورجع حجه : مجاوبتيني ؟
حجاها و هو يمد راسه برفعة حاجب و يضحك
- ما اريد ائذي نفسي
-ليش ؟!
-اعرف محد راح يحبني، فحتى لو حبيت امحيه بداخلي و اسكت
-القصد ان مراح تحبني لان اني مو حلوة مو ؟
-خل نروح
تقرب مني: لا تفكرين هالتفكير ابد، خلي ثقه بنفسج و كولي اني حلوة حتى لو احد حجه عليج لتهتمين و خليج واثقه انت احلى
رفعتله عيني :-اثق و اني مو هيج ؟
بقى يباوع بوجهي، ارتبك و كال يلا عوفي اجي العصر اكمل، امشي خل نرجع
ديحجي، و اهتز المحل بصوت انفجار كلش قوي: يا ستار يا ربي، دخيلك اللهي، امشي اطلعي خل نروح دشوف
اخذ موبايله شافه:- اووو هذا موبايل طافي شحن، يالله شلون بلوه
راد يفتح قفل الباب، عطلت اليده بأيد، اووو اوكفي اوكفي بس اجيب الدرنفسي دا ارتبه
راح جاب وكف يضب بالأيد مال الباب ورتبه، و طلعنا، و صلنا لراس الشارع كتله: نزلني ليشوفونا سوا، و امانه لتكول لاحد جنت وياي تره ابويه ما يرحم
-هو وين ابوج اذا زحلكتي
-العار كلشي ميصير بيه
-ههههههههه ماشي ماشي انزلي ما اكول
مشى هو كدامي بسيارته للبيت، و اني مشيت وراه، فتت للفرع شفت هوسه هو طبك بعصبيه يسأل ..
كمت اركض احاول اتقرب اشوف شكو ..
رجع صعد بسيارته و انطلق هو و اخوه ، بيت عمهم كلهم طالعين بالباب و الجو مختبص، تقربت لبيت عمهم ، فتت من بينهم، مهى واكفه بالباب، سألتها :- شكو
-ولج حمزه اتصوب بالانفجار و شايلي للمستشفى و مرت خالد هسه نزفت و هي حامل و هم نقلوها للمستشفى و هذا خالد مدري وين ماتو من وراه، يتصلون بيه و مغلق امه فرفحت عبالها راح بالانفجار مات
-و هسه مرت خالد وين ؟
-مدري خطيه حالها يقهر نزفت و اتخربطت و شالوها للمستشفى
فتت للبيت :- هه و لسه مشفتي شيء يا ضحى الخير جايج ليكدام .....يتبع
☆☆☆☆☆☆☆
تم تغيير الاسم من (الموءودة) الى (ليتني استطيع فعلها) لاسباب ان في قصه بهذا الاسم، فغيرت افضل من القال و القلت ..
البطله مريضه نفسية، و انتم داخل قصة مرض نفسي لازم تراعون هذا الشيء و تعرفوه،..
يا ترى ما يمكن لانسان مريض نفسي ان يفعل بعد ؟
تابعوا لتعرفوا ....
احبكم