مساء الخير والعافية عليكم احبتي المتابعين راح انشرلكم البارت مو كامل لان ما لحكت اكمله وما ردت اخليكم تنتظرون
فهسة نزلت الي كملته وبعدين انزللكم تكملة البارت من اخلص كتابته
#الكاتبة_نهى_الحسون
#قضية_الشمل
نور
كنت واكفة يم الكاونتر اطحن كم عشبة لخالة زهرة بالطاحونة
وخالة زهرة مبسطة بالكاع المواد والاعشاب داير مدايرها
توزن الكميات وتسوي الوصفات
جانت تشتغل وتسولف وياية على كل الي سمعته من اخبار
عن اخوانها واولادهم ونسوانهم وعن جبرانها صاحباتها
مرات اضحك ومرات ينكسر خاطري على احوال بعضهم
كانت خالة زهرة مسمترة بالكلام
.. ولو تشوفين صاحبتي شلون اتعاركت هي وجنتها بالجدورة تكولين دجاجات وانا صرت بنصهن اهدي بيهن عشتوا عود انا
دازيين علية مصلح اجتماعي اهديهن
اسكت صاحبتي تعيط جنتها
ونوب اسكت جنتها تعيط صاحبتي حيرني بزماني
اخذت الجدر من ايد صاحبتي تريد تهد على جنتها وتحطه براسها
كلتلها.. خية فطيمة ما عرفتج هاي من شوكت انتي صايرة هيج شرانية
خالة تحجي واني اضحك وانا اتخيل خالة ام مهيمن الدبدوبة قصيرة
واكفة بنصهن حاجوز
شافتني وانا اضحك كملت كلامها وكالت
.. اي ضحكي شعليج بعدج ما سامعة شي
.. ليش هو شنو بقى ما سويتيه
.. خلي اكملج شنو سوت خالتج زهرة
وكفت بنصهن وعطت بيهن والجدر بعده بيدي
وكلتلهن صلن على محمد اذكرن الله
هو انا كلتلهن هيج اشو هذني زادن ما نقصن بعياطهن
ونوب انا اعرف بصويحبتي فقيرة زايعة روحها بس لسان
وهاي جنتها خبيثة راضعة وية ابليس
بس تكمز وكلبي كام يفور منها
تالي كدرت اهدي صاحبتي
وكلت لجنتها يالله كافي بطلي مشاكل
هاي عمتج ام رجلج مرة جبيرة ومريضة وانت بنت اصول اعتبريها مثل امج
وهاي تشوفيها سكتت انتي هم كافي سكتي وهدي اللعب
رجلج راح يجي تعبان من الشغل خطية يرجع ويشوفجن تتعاركن
صاحبتي حطت شيلتها على حلكها وكعدت تندب حظها وتلحن بموالها هاي گدرتها
.. يمة يامن تعب يامن شگى يامن على الحاضر لگة
انا شسويت حگ ارباي اريده.
يوليدي صحت الغوث من مرتك الجسره
تردلي كل حجايه احجيها بعشره
واكولن مااشتكي لابني واقهره
رحت عليها اواسيها
.. خية بسج كافي مردتي گلبي
انا ما عولت اسكت صاحبتي
اشو هاي جنتها نفشت ريشها كامت علينا
.. عوفيها ما راح تسكت
هي متعودة تناكرني النهار كله
ومن وراها صارت عندي ميت عله
كعدي اتمسكني وسوي روحج مظلومة مثل الحية تكرص وتضم راسها
ما ينلام بيج ابنج الصغير من يشرد منج وذبج علينا علة على گلبي
يمة انا هي تحجي وانا گلبي يفور عليها
جنت واكفة بنصهن ولازمة الجدر بيدي واعاين على صاحبتي منتظرتها تطيح حظ جنتها
صاحبتي كامت على حيلها وكالت
.. حسبي الله عليج ونعم الوكيل
جوابها لجنتها ما برد گلبي
نترت بصويحبتي وكلتلها. .. ولج فطيمة مو هيج
ولج هاج اخذي الجدر وزرعي براسها ونعلي ابو حظها
صاحبتي كالت.. خليها تولي هاي نچرة يجي رجلها وانا اعلمه
جنتها باوعت علية وكالت .. انتي خليج محضر خير لا تشتغلين وسواس الخناس
عاد انا زهرة عالوا بيك يالمنك تجي العيلة انا منا شلون گلبي محمل عليها وهي حجت وياي هيج
لزمت الجدر وحطيته براس جنتها وخربت الاول والتالي
ونوب انگلبت العركة من فطيمة وجنتها وصارت بيني وبين جنتها وفطيمة تهدي بينا
بس والله ارتاحيت وفوخت گلبي بعطوبها هلستهم هلس
اااااااخ اتمنيتها كون هاي جنتي الا اخليها تمشي على الصراط المستقيم
ما ادري اضحك على فطرة خالة زهرة مدري انقهر على صاحبتها المرة المغلوب على امرها
سألتها .. لعد وين ابنها ما يسوي حل لمرته
.. والله يخالة ابنها ملتهي بالعيشة هم يالله يلحك على مرته الافة
.. زين وابنها الصغير وين راح وعافها خطية
جاوبتني .. هذا خطية انضم للحشد وسافر
.. ياااااا خطية
خالة زهرة كملت كلامها .. والله ثلثين شبابنا رايحين للموصل
ياهو الي اسأل عنه يكلي افلان سافر للموصل
وعلى طاري السفر وية الحشد
.. البارحة سمعت بالصدفة من مهيمن يحجي وية الحجي ابو حيدر بالنقال عن ابنه عناد يگلج حتى هذا متعارك وية ابوه وامه
ومسافر للموصل يودي مساعدات وصارله ثلاث ايام هناك
بهت وجهي من كلام خالة زهرة
ياربي ما اعرف شصار بية احس گلبي يتسابق وية نبضاته
شنو عناد سافر للموصل ياربي دخيلك
انا منا كل يوم الليل كله اشوف احلام وكوابيس عن جلال
كل مرة اشوفه جاي يتعذب لو مرة الكاه يرمي على مهيمن
وية ناس يخوفون افز من نومي والرعب ساكن بصدري
ماكفاني الي انا بي يجي خبر عناد ويكمل علية
جانت خالة تحجي منطلقة وحور دخلت هي وكتابها للمطبخ وكعدت يمنا. عيونها حمر وخشمها شوكت ما اشوفه مورم مبين عليها كانت تبجي بس تتحجج بالحساسية كدام امها
شكلها حتى خالة زهرة حاسة بحزن بتها على جلال بس خالة فضلت تتغاضى عنها ما تريد تتطرق لهيج موقف حساس
بعدها دخلت ريم وهي حاطة لزكة عاى كصتها وكل شوية تسوي كمادات ثلجية عالمكان وگابلت المرايا وكعدت تتفحص بأثر العنجورة الي صارت كدمة زركة
ام مهيمن شافتها وكالت.. ولج خالة ريمة بسج كافي رحمي روحج
ترة هي عنجورة
ريم طلعت كمادة الثلج وحطتها على مكان الاثر وكالت
.. لاخالة. شلون اعرفها دشوفيها جنها گرن
وعندي كلية ما اكدر اداوم وانا هذا شكلي
ام مهيمن هزت ايدها متعجبة وكالت.. لا تكليلي انتي صارلج يومين غايبة علمود العنجورة
جاوبتها بصوتها المنعوص وكالت .. اكيد يعني بعد الحادثة الي صارت مستحيل ادوام مو زين على حالتي الصحية والنفسية
هذا شبه ارتجاج بالدماغ وفقدت الوعي بوقتها
والمفروض ما استهان بي
باربي جانت تحجي وام مهيمن فاتحة حلكها متعجبة
كلتلها.. خايبة يخالة صرنا ودرنا وعدى علينا اشكال والوان الالم
ماسوينا سوايتج.
حور جاوبت امها وكالت.. يمة عوفي كناري جهاز حساس ضد اللمس بسرعة يعطل (ميد ان چاينا )صنع في الصين
قطع كلامنا صوت نقال خالة زهرة وكان المتصل اخوها حسن
هي بيها طبع كله تحجي بحاكية ما تحب تحط النقال على اذنها
ردت عليه واتبادلوا السلام وبعدها اخوها كال
.. خوية زهرة انتي بالبيت لو طالعة
جاوبته .. انا بالبيت ليش خوية تسأل شنو راح تجينا
جاوبها.. لا والله مو انا الي اريد اجي
ابو سجاد يريدج بموضوع وكلي انطيها خبر اريد اروحلها للبيت واتأكدلي موجودة بالبيت لو طالعة
جاوبته .. اي گوله موجودة بالبيت هلة بيه خلي يجي
خوية ما عرفت شنو هو الموضوع الي رايدني بي
.. خلي هو من يجي يحجيلج احسن لان الكلام طويل مو مال نقال
بعدها سلم عليها
وخلصت المكالمة والتفتت على حور وكلتلها
.. يمة حور گومي على حيلج سوي جاي بسرعة خالج ابو سجاد على جية
اباوع لحور گلبت عيونها بضجر
ورفعت كتابها ودفنت وجهة بي وكالت.. هسة بس اخلص هذا الكتاب الي بيدي واكوم اسويله جاي
امها باوعت على الكتاب وكالت .. حييييييل تردين خالج ينتظرج تخلصين قراءة كتابج ولج حويرة على هاي الحسبة
معناها خالج راح يشرب جايه بفاتحتي من وراج انتي وكتابج
شوكت ما اجيج الكاج زارعة راسج بي
انتي تنقرضين والكتاب يكبر حجمه.
ما اعرف منو بيكم يتغذى على الثاني بالعلم انتي لو الكتاب
خالة زهرة تحجي وية حور وانا كلتلها عوفيها خالة انا اكوم اسوي جاي
دارت علية وكالت.. لا والله اشو الا هي تكوم تسوي جاي شنو هي فوگ راسها ريشة
كل خير ما بيها ست الدكتورة لاتشيل ولا تحط
بس تاكل وتمسح ايدها بالحايط
ونوب ما تستحي ماتكول خطية خلي امد ايدي وياهم بالشغل واساعد البنية على ابو هي تدرس طب ماخذتنا حاصل فاصل
حورجاوبتها.. يمة الله يخليج هسة هي البنية مشتكيتلج
.. ولج صدك ما تستحين يعني هي شنو البنية ابتلت على عمرها
كلتلها.. لا خالة والله واصلاً شغل البيت ما يتعب وانا ماعندي شي
فارغة خليها هي تدرس الله يساعدها
دك الجرس وانقطع حديثنا
وخالة راحت تفتح الباب لأبو سجاد ودخلته للهول
رحت حطيت قوري الجاي على النار
وبعدها اخذتله بطل مي من الثلاجة حتى اقدمله علما يخلص تحضير الجاي
دخلت للهول وسلمت عليه رد السلام من ورة خشمه حتى خالة
زهرة انتبهت عليه
انطيته المي وگالي .. ما اريد اشرب سم انعم الله عليكم
اخوانج ما قصروا سمموني
ام مهيمن عگدت حواجبها وباوعتله بحذر وسألته
.. شنو ليش هذا الحجي الي يضوج الخلگ
شنو شبيهم اخوانها شمسويلك
ابو سجاد نزل بالحجي وكال .. ترضيها خوية زهرة
البارحة ابنج فشلني وراح مي وجهي بالديوان كدام الناس
.. ليش شسوالك مهيمن
جاوبها.. البارحة طلبت منه ايد حويرة منه لأبني سجاد كدام الناس
وكم شيخ من جماعة اخوي حسن كانوا موجودين بالديوان
.. اي ومهيمن شنو گال
. گلي حوراء مخطوبة لأخوه جلال قربان
لا وجان يحجيها وهو مفتخر يفضل هذا جلال الداعشي على ابني سجاد
كان كلام ابو سجاد بالنسية النا مفاجئة ماعدنا علم بيها
ام مهيمن نظرات الصدمة على وجهها من ورة كلام اخوها
وابو سجاد انتبه عليها وسألها .. الظاهر ما عندج علم بالموضوع
شكله مهيمن نسى يگلج بسوايته
جاوبته وكالت .. هو مهيمن ياهو الشايفه هو النهار كله برة البيت
ما يلفي الا بتالي الليل ويكعدلي بالحديقة حتى مرات الكاه نايم غافي بمكانه بعد وين الكاه ويحجيلي
هم يحجون واني الدنيا ما سايعتني من الفرحة على موافقة مهيمن
معقولة مهيمن قرر يوافق يزوج حور لجلال.
زين شلون وشوكت وشنو الي غير رأيه وقرر يوافق على جلال
اتوقعت بعد كل هاي المواقف
الي صارت وياه من خطف وتعذيب على ايد داعش
ان علاقة مهيمن وجلال بعد حلم ترجع
واحتركت جميع الجسور بين مهيمن وجلال
وخاف قبل بس كان رافض يزوجه حور هالمرة مو بعيد يحرم شوفته حتى علينا
لكن اعلان مهيمن قلب كل الموازين واتأكدت بهاي اللحظة
ان اكو شي صاير بين مهيمن وجلال بفترة اختفاء مهيمن
خلة مهيمن هيج يغير رأيه بي
وفعلاً انا لاحظت هو من رجع لليوم ماجاب سيرة جلال
لابزين ولا بشين
الكل فسر تجنب مهيمن عن الكلام بجلال
وان سبب سكوته خجل وتهرب من سواية اخوه
بس تصرفات مهيمن تبين العكس
الظاهر هذا الشي الصار بينهم قوى علاقتهم وخلاها تصير احسن
جنت واكفة على اعصابي كوة لازمة روحي لا اضحك واروح اركض ابشر حور
حاولت انسحب من يمهم بس استوقفني كلام خالة زهرة
وية اخوها
..احلفج بالله تقبليها على مهيمن يفشلني كدام الوادم ويرفض سجاد ابني موعيب عليه يجذب ويگول حور مخطوبة لجلال
جاوبته بكل هدوء .. والله يا ابو سجاد مهيمن ماجذب
صحيح كلامه فعلاً جلال قبل لا يسافر طلب حوراء من مهيمن
.. واحنا ليش ما عدنا علم ليش محد كال منكم
.. جنا مأجلين كل شي لحد ما يرجع الولد من سفرته
كام ابو سجاد من مكانه ونتر بيها ووكال
.. ولج زهرة لاتخبليني يعني انتي مقتنعة بحجي ابنج
يعني عادي عندج تزوجين بتج لواحد ارهابي
نهضت من مكانها ورى اخوها وكالت بأصرار
.. انا واثقة من اختيار مهيمن لان
هاي اخته وماكو واحد احرص منه على اخته فهو اعرف بمصلحتها وين ووية منو
فأكيد راح اوافق على قراره وانا مغمضة
لان وليدي هو نفسه ابو بيتي وعمره ما خذلني شال حملنا و مسؤوليتنا انا واخته
وما بيوم طلعت منه العيبة
ابو سجاد زمخ بيها .. والله عمي صدك انتي وابنج مخابيل ماعندكم عقل يعني ترفضين
ابني سجااااااااد ابن الدواوين المتعام الدارس ابن الاصول
وتفضلون عليه واحد ما ينعرف اصله من فصله ارهابي انگس ما خلق الله
بس تعرفين شنو انتوا هذا مستواكم خريج السجون الارهابي بالله كوليلي مهيمن من يعزم الناس شنو يكللهم زوجت اختي لارهابي وصخ خريج سجون
بالله اريد اشوف اليوم الي تعرسين لبتج والناس تأشر عليكم
هاي اصلا اذا سوالها عرس مثل الخلگ والعالم ارهابي مطلوب للحكومة وين تلكينه وتزوجينه
جان يحجي بتشمت والله گلبي حقد عليه وطلعت من الهول ما اتحملت اسمع بعد اكثر
اكيد يحجي هيج من غيرته وحقده
بس ما علينا اهم شي مهيمن وافق على طلب جلال لحور
ابتسمت
حور وينها خلي اروح ابشرها
لكيت رجلية ماخذتني يم حور بالمطبخ لكيتها جاي تصب بالجاي
شافتني وشالت الصينية. وكالت .. هاي هي خلصت اكيد امي دزتج وراي حتى تستعجليني علمود الجاي
جانت تحجي وانا الحلگ مشكوك من الفرحة
.. لج حور عندي الج خبر هسة اذا عرفتي يمكن يغمى عليج
من الفرحة
حور اقتربت مني وسألتني بفضول .. شنو .. شنو بس كوليلي منين
سمعتي بالخبر المفرح
.. من خالج ابو سجاد
عفست وجها وكالت.. اهووو مادام الخبر المفرح منه
ما اريده هذا ما يجي منه غير بس دوخت الراس هو وابنه
ابتسمت وكلتلها .. يعني خبر اعلان موافقة مهيمن بخطوبتج لجلال
تشوفيها دوخة راس ؟؟؟
شهكت ووكعت الصينية منها بالكاع وصار طشارهم ماله والي
كلش وية طلعت ابو سجاد من البيت دخلت خاله زهرة وشافت
منظر الاستكاين والجاي
ونزلت على حور بالحجي وطلعت حرگة كلام اخوها براس حور
الحلو بالموضوع
ام مهيمن ترزل وحور توزع ابتسامات
عبالك جاي تهنيها مو ترزلها
.. ولج حويرة عليمن تضحكين فرحانة على صخام وجهج
حور جاوبتها ولهانة .. يمة فرحانة لان الواحد مو كل يوم توكع منه هيج صينية ستكاين
خالة زهرة بقت مصفصفة احتارت شتجاوبها وكالت
.. خايبة توخرين من كدامي لا اجي امسح بيج الكاع
مهيمن
بعدما كملت اموري واتطوعت للحشد الشعبي
اتصلت على الضابط علي وانطيته خبر
بقدومي للموصل
كلي .. تعال يمعود احنا بحاجة كل واحد عنده غيرة على ارضه يجي يقاتل ويانا كمل امورك وتعال
رحت للمحل لكيت طالب مبسط هناك اريد اكمل مراجعة السجلات والديون وياه قبل لا اسافر وافهمه شنو يسوي
لو عناد هنا جان ما يحتاج اكعد اعلم طالب هو يعرف بسياق الشغل
بس هو وين مرت اربعة ايام وهو ماكو بيني وبينه بس اتصالات وبالگوة احصله
وعلى طاري عناد دخل الحجي ابو حيدر للمحل وسلم
علية وكال .. شنو قضيتكم لاتنشافون ولا نسمع عنكم خبر
يعني ما تجي الا علمود الشغل تكمل حساباتك وياي وتروح
.. اعذرنا حجي حقك علية والله الدنيا مدوختني ما تنطيني مجال اخذ نفسي
.. الله يساعدك
كعد يمي بالنص ساعة يسأل عن احوالي واحوال جلال
ابو حيدر الوحيد يعرف بسالفة جلال لان بعد ما وصله الكلام والاشاعات
اجاني بالليل لوحده وسألني
وكال .. تعال گلي اخوك بشنو متورط وليش انا اخر من يعلم
احجيلي يابعد عمك انتوا امانة الغالي بلكي الحك اسوي شي ابرر غلطة اخوك للناس
اعين محامي شاطر اي شي المهم ما يبقى مطلوب للحكومة فهمني شنو الموضوع بالضبط
حاولت اتهرب من اجابته وكلتله .. حجي ملثما سمعت انا هم حالي حالك سمعت نفس الكلام والاشاعات الي انت سمعتها
.. شلون ما تكلولي عالصار شنو شوكت اخوك لحگ يمشي بالطريق الاعوج ووين لكة الدواعش وصار عميل الهم
شنو يعني معقولة انت مصدگ هذا الحجي
ترة الموضوع محير انت ما سألت نفسك
شنو الشي الي يخلي واحد شاب
مثل جلال الله فاتحها عليه من كل شي جاه ومال. وجمال وشباب
شنو الي يخليه يعوف كل هذا ويروح يشتغل وية داعش
ترة والله شغلة ما يشيلها العقل
بلحظتها باوع علية بأستنكار وكال .. لاتكلي عبر عليك اتهامهم لجلال وصدگت بحجيهم
هزيت راسي برفض
يعني حتى الحجي ابو حيدر كدر يعرف بجلال مستحيل يمشي بهيج درب وگبل كذب الخبر
وبليلتها اضطريت احجيله عن سالفة جلال كلها واخذت منه وعد
الكلام الي سمعه بخصوص جلال يبقى سر بيني وبينه حفاظا على حياة جلال وسلامته
سألني وعيونه بيهم لمعة فخر .. اكولك وهذا عنيد
عنده علم بسالفة جلال لو لا
جاوبته وانا بعدني ما اعرف عناد شلون عرف بجلال ضابط
.. اصلاً عناد طلع يعرف بالموضوع قبلنا كلنا بس ما اعرف شلون ومنين عرف
انتبهت من صفنتي على ابو حيدر كعد كدامي وكال
.. اكلك بوية ما تشوفلنا هذا صاحبك ابو راس اليابس وتگعد تعقله
والله ملينا تصدك امه صارلها يومين ساكنة المستشفى كلبها يوجعها
اتخربطت علينا كله من وراه
اتذكرت موقف عناد وضوجته من كلمة كله من وراك
كلتله .. عمي اخذها مني نصيحة اذا تردون تشوفون عناد يرجعلكم ويتزوج ويستقر بحياته بطلوا من كلمة كله من وراك
لا تكعدون بالطالعة والنازلة تسمعونه هاي الحجاية
صدگني اذا عفتوه براحته هو من وحده راح يجيكم ويكوللكم اريد اتزوج تعالوا خطبولي
غمض عيونه بتعب وكال .. والله احنا نحجي وياه هيج من زود حرصنا عليه
كنا نسولف وجان يدك نقال الحجي ابو حيدر وكان المتصل
حيدر
فجأة كام الحجي .. يصيح بصوت فرحان
.. ولك حويدر احلف صدك عناد رجع بالسلامة
سكت يسمع الكلام من حيدر وبعدها انهى الاتصال وباوع علية بلهفة
وكال.. وجهك خير علية
صاحبك رجع سالم من الموصل الف الحمدلله
سلم علية بسرعة وراح بلهفة يريد يشوف ابنه
رجعت كعدت على الكرسي براحة على رجوع عناد سالم
وجريت حسرة وانا اندعي ربي يفرجها على اخوي يرده الي سالم
صارت شوفته اعز امنياتي
خلصت شغلي وية طالب ورتبت جميع امور واتفقت وياه باجر يفرغ نفسه حتى نروح لصاحب خالي حسن الي يبيع بالاسلحة اريد اشتري سلاح
وصلت للبيت ولكيت امي طالعة من البيت وحور جاي تدرس
سألتها كالت امي راحت لبيت خالي حسن
والبنات ريم ونور فوك صاعدات
رحت صعدت فوك لغرفتي حتى احلل ملابسي
وصلت يم باب غرفتي ولفت انتباهي صوت ريم تبجي
وكلام غير مفهوم
اتجهت على مصدر الصوت الي كان بالمخزن
اخذني الفضول اشوف شنو شبيهم بس لايكون صاير شي عليهن
اجيت ادخل بس استوقفني كلام ريم
جانت تبجي وتحجي وية نور اسمعها تكوللها
.. نور الله يخليج كافي بجي لاتصعبين علية الامور انا لازم اسافر
نور جاوبتها.. ريم لخاطر العشرة احنا محتاجينج
ريم جاوبتها .. نور حبيبتي اذا صدك تحبيني المفروض ما ترضيلي
الاهانة
بعد اتهامات مهيمن اطلع اكبر غبية اذا قبلت على روحي
ابقى اعيش هنا ببيته وانا ادري بي يشوفني بعين الصغيرة ويتوقع مني
اخرب اخلاق اخته بأخلاقي الطايشة الي جبتهم وياي من الخارج
شنو نور نسيتي حجي مهيمن احلفج بالله لو انتي بمكاني
ترضينها على نفسج احد يعيرج بحياتج الي عشتيها بالخارج
اي مهيمن كانت هاي مهمته يحجي وينتقد تصرفاتي
بالطالعة والنازلة وبكل تصرف يبدر مني بتلقائية ينسبه لحياتي بالخارج اريد اعرف اكو واحد كايله الي يسكنون بالخارج
طايشين واخلاقهم فلتانة
كلام ريم رجعني بالزمن
يذكرني باكبر هفوة غبية ارتكبتها بحياتي بحق ريم
ما اعرف شصار بحالي من جابت سيرة السفر
غمضت عيوني بصبر مصيبة جلال شدهتني نستني حتى اسمي
وخلتني اغفل عن الصار
انا ما ناسي سوايتي بريم بس بكل ضني بعد الصار بينا من مصايب والشدايد كدرت تنسينا مشاكلنا وتجمعنا سوية
اتوقعت كلبها ما ينطيها تعوفنا ولغت سالفة سفرها
بس اثاري جرح الي بالكلب يبقى ينزف اذا بقى متروك محد يضمده
وانا شكلي اتعديت حدودي وقاطع حبل الوصل بيني وبينها
ما مخلي خط رجعة او شي يشفعلي يمها
جنت واكف استمع لصوت بجيها
وفاجئتني نور من طلعت من الغرفة وصارت بوجهي
وشافتني وما حجت شي بس نظرات عيونها بيهم ادانة ولوم
مشت وعافتني وراحت دخلت لغرفتي ورحت وراها
بس دخلت هي سدت الباب وكالت
.. انت شنو سالفتك يا اخي اتحرك اتصرف
ريم راح تسافر كله بسببك
اتصلت على المحامي ابو سيف
وهسة خلصت الاجراءات وماعندها شي يمنعها من السفر
روح احجي وياها اعتذرلها ليش احس بيك كلبك صاير صخر
ما عندك احساس ولا تعرف شنو الاعتذار والتكفير عن الذنب
جاوبتها.. شنو ترديني اسوي على گولتج
اذا اخوج الحجارة حط ايده على شي كون يكسره
.. يعني حضرتك تعرف بس تكسر الگلب
متعرف شلون تجبره روح احجي وياها اعتذر منها
انطيتها ظهري وطلعت من الغرفة وكلت
.. انا اعرف شلون اخذلها حقها من عندي
وارجعلها كرامتها
يتبع
اتمنى لكم قراءة ممتعة
اختكم نهى الحسون