في الغرفة نوم تاع سمر و عماد .... ناعسة سمر كيقلب فيا الدكتور و حداها عماد شاد ايديها و مرة مرة كيشوف في ايسون ممتيقش عينيه ... في الحقيقة كلشي كان كيشوف فيها بولع .. و خايفين منها و مخفاوش على هذا النضرات كل من ايسون و مالك اللي بدا كيشك انهم هاذو عائلتها ...
الدكتور كيجمع حوايجو :متخافوش ماشي شي حاجة كتخلع عادي للوحدة في الفترة ديالها تعيش هادشي
عماد : مفهمتش ؟؟
الدكتور : اه يمكن ما فراسكمش الانسة حاملة
عماد تصدم من بعد فرح اما عجوزتها ( زهرة ) بدات كتزغرت و كلشي فرح حتى من مالك اللي شاف في ايسون بفرح كيشوف ختو كبرات و تزوجات و ها هو غادي يولي خال وخا مدوزش معاها اي فترة من حياتها في هادشي يكفي انه عارفها بخير و على خير .... خرجوا كلشي و بقا غار عماد و سمر ....
عماد شاد ايدين سمر كيضحك :انا فرحان بزاااااف و اخيرا غادي نولي اب
سمر شافت الفرحة في عينيه كتافات تبتاسم و هو يعنقها عماد و بقات هي كتفكر كيفاش طرى ليها هذ الخطأ كانت واخدة احتياطاتها كتفكر في احلامها و طموحاتها و انها تزادت مسؤولية و للحضة بدات كتفكر دير الكورطاج .....
عماد بعد سمر عليه : لا لا خاص نبعد عليك يقد يتخنق البيبي ياك ؟ياك و عرفتي شنو نتي مخاصكش توقفي خاصك تبقاي قاعدة باش البيبي يبقا في كرشك و نجيب ليك تاكلي كل ساعة
سمر كتمازح : اه اه وخاص نمشي للمستشفى كل ساعة و خاص ندير السمطة باش يبقى البيبي في كرشي
عماد :عندك الحق مفكرتش في هادشي خاص دابا نمشي نجيب السمطة
يالله بغا يمشي و جراتو سمر للعندها كضحك و حطات ايدين عماد في كرشها : متخافش راه في امان مغادي يحتاج للوالو غار مراقبة طبية و انتضام في الاكل بلا ما تخاف صافي ( قلبات ملامحها ) واش هاديك غيتى و لا جاب ليا الله ؟
عماد : انا براسي مفهمتش سمعتو قال ليها الرجل اللي معاها ايسون
سمر : قلت ليكم باقا عايشة و متيقتونيش رديتوني هبيلة
عماد كيفكر : تقد تكون شي وحدة كتشبه ليها
سمر : اشمن شبه راه بزاااف حتى من الصوت و العينين و نفس الشوفات ( بخوف ) انا خايفة لا تكون جات تنتاقم
عماد شد ايديها و باسها : متخافيش انا معاك مغاديش نخليها تقيسك و غادي نعرف اش باغا مننا
.............
في الصالون ...... قاعدة ايسون و مالك و بابات عماد اللي كيشوف في ايسون بعدم تصديق ... نزاعجات ايسون من نضاراتو نفس الشيء بخصوص مالك اللي حس بالغيرة و قاعد كيخنزر فيه ..... في حين زهرة في الكوزينة كتصايب احسن الاوكلات على قبل سمر ..... مالك شد ايدين ايسون و بتاسم و بادلاتو ايسون و بقا كيفكر مالك
فلاش باك **********
مني خرج الطبيب من سمر مشا مالك هضر معاه
مالك : قوليا واش هي لاباس ؟ عادي تسخف
الطبيب: اه معلوم عادي تسخف خاصة هي في فترة الوحم
مالك : بغيت نسولك ؟
الطبيب : تفضل
مالك : شي واحد فقد الذاكرة كلية باش يرجعها خاص نقولوها للمريضة
الطبيب : ماشي اختصاصي و لكن المعلومات اللي عارفة انه خاص المريض ميعرفش كلشي باش ميتعرضش للصدمة تأثر ليه في القلب او انه خلايا العقل متقبلش الامور و تموت و هاكا المريض يكون في خطر الموت من الاحسن انه تبع مع دكتور خاص مجموعة من الحصص تخليها ترجع كل جوء من حياتها بشوية و ايضا بعدوها حسن من حياتو السابقة .. سمح ليا دابا
مشا الطبيب و مالك حس بخطر اللي فيه ايسون
عودة الباك *********
نزل عماد و هو كيشوف بتخنزير في ايسون خايف لا تكون راجعة تنتاقم ... لاحظ مالك تخنزيراتو و هو يمشي عندو معصب و هضر بصوت رجولي
مالك : خاص نهضر معاك
مشاو بجوج بيهم و شي ما حامل شيء 😂😂
... في الجردة ( الحديقة )
مالك دايرة ايديه في جيبو : مغانطولش معاك في الهضرة مخفاوش علية نضراتك ليها و حتى السخفة و الشوفات اللي كتشوفوهم فيها ... شكون نتوما ؟
عماد قرب للمالك كيشوف فيه بتحدي ؛ نتوما للي لاش جايين و دخلتو للحياتنا شكون نتا و لا عرفتي شنو سير نتا و هاديك اللي جبتي معاك ...
مالك ضحك ضحكة استهزاء و هو يعطي ببونية للعماد حتى طاح في الارض : كابينتك سدها مذكرش سميتها على فمك ... ( ضحك بجهد ) بالمناسبة خاصك تعود باش تشوفني سمر هي ختي ختي انااااااااااا
عماد سمع هضرتو و هو يمشي عطا ببونية للمالك و بقاو مني منك كيضاربو حتى ضرب مالك عماد و هو يطيح و تكاه مالك على الارض وبقاو على البونيات ... حتى خرجو كلشي و هي تمشي سمر فرقات مالك على خوها ... اللي بعد مني حس بملماسها
سمر : اشنو واقع ؟؟
عماد معصب : هاذا مريض قاليك باللي نتي ختو فين كنتي اسيدي يالله بانت ليك ختك
سمر تغرغرو عينيها و هي كتشوف بمالك في صدمة و ايسون تدخلات شدات في ايدين مالك جراتو
ايسون: خاصك تهذن وليتي كتعصب على نقشة
مالك : ذاك الحمار معرفتش فين كان عينيها مني تزوجات بيه
عماد كيغوت : يالله اسي شرح ليا علاش جاي هنا و لا ياكما نتا كتخطط مع اللي حذاك ( شافت فيه ايسون بتعجب و هو يتدخل مالك )
مالك جبد دوك 2 سنسلات اللي شافتم سمر شهقات بتعجب : من بعد ما وليديا توفاو مشينا انا و ختي للخيرية و كان ديك الساعة بابا صايب لينا 2 سنسلات انا و ختي ... دوزت عام عشت في الحغرة و انا نفضل الشارع و لكن لا هزيت معايا ختي مكاينش منين نصرف عليها ... بقيت هكاك حتا تبناني واحد الراجل خدام عندو و دابا وليت بأعمالي الخاصة . بالصدفة طاحت ليك السنسلة في المطعم و ايسون ( ورك على السمية ) شافتها و ( بنضرات حب ) عرفتك باللي راك ختي خاصة من السيرة الذاتية تاعك ( قرب للعندها و مسح دموعها ) متصوريش 30 عام كنقلب عليك توحشتك بزااف ( عنقاتو سمر كتبكي بالفرحة خاصة كانت متوحشة للحضن اخر من غير تاع حبيبها و الاهم انها عرفات انه واليديها متخلاوش عليها ...هاد المنضر اثر في ايسون اللي تغرغرو عينيها في حين زهرة معجبهاش الحال خافتو لا يكون شي مكحط مزلوط ( الفلوس اللي عندو معندكش نتي ابنيتي 😂😂😂 ) ... دخلوا للصالون .... سمر قاعدة حدا مالك كتشوف فيه بفرح و كيعاود ليها على حياتو و هي نفس الشيء ... في حين سمر كتشوف بعماد مرة مرة و كتحس بشي حاجة في قلبها ..... ..
عماد : من الاحسن نديرو اختبار الاديين
مالك : لا بغيتو نتوما تأكدو ما عنديش مشكيل المهم انا تأكدت بطروقي الخاصة
زهرة كتمسكن : وليدي فين خدام ؟
مالك : فاللي قسم الله ( غووول 😂😂 ) خاص نمشي ( ناضت ايسون و شدات في ايديه ) المهم لا محتاجة ليا انا هنا ( باس سمر من جبهتها ) بسلامة
مشاو خرجو و عماد عيط على مالك
عماد : غدا تحليل الاديين
مشاو ركبو في طموبيل اللي غار شافوها حلو فمهم حتا للسماء ...
السيارة
ركبو بجوج بيهم و نطالق مالك بسرعة
في السيارة
ايسون : مزيان اللي شفتي ختك هنيتي حمل تقيل على قلبك و الاهم بانت ليا ختك مرتاحة و لكن مفهمتش اش دوك الشوفات كيشوفوا فيا بحال راني شبح
مالك ورك على ايديها و هو سايق : متفكريش في هادشي صافي غار كيبان ليك ......
مشاو للفندق .... ايسون دوشات و لبسات بيجامتها يالله خرجات بان ليها مالك كيتسناها ... قرب منها و هي بدات كتحس بالتوتر حتا حسات بيه ضورها و عنقها من ضهرها و باسها في عنقها حتى تبورشات ....
مالك كيستنشق ريحتها بهوس : امممم حبيبتي مدوشة بالفريز
ايسون : اه كيعجبني
مالك : حتا انا كيعجبني
ايسون : الفريز ؟
مالك : تت اللي دايراه ... ( ضورها للعندو و باسها بوسة خفيفة من شفايفها ) كنعشقك عارفة هادشي
ايسون كتحاول تجنبو : اه اه اه
مالك شد وجهها للعندو و شاف في عينيها بأدمان :وخا يطرى اللي يطرى نتي ديالي و الاهم خاص نتزوجوا
ايسون بصدمة : الزواج ؟؟؟ مالك عارفني فاقدة الذاكرة كيفاش غادي نقد نبني مستقبل و انا معرفاش الماضي ؟؟
مالك شدها من كتافها بغضب : بلا ما تبقاي ضوري في عينيك ( قرب وجهها للوجهو كيلوح نفسو سخون عليها ) و الله و ما كنتي ليا متكوني للحد ما سوقي لا في ماضي لا في قلا** فهمتي و ديري في بالك من هنا للشهر غادي نتزوجو
ايسون : كنبغيك اه كنعترف بهادشي و لكن دير في بالك منخليكش تحكم فيا فهمتي و لا تسيطر علية ( بعظات منو ) مقدش نزيد معاك خطوة الا لا عرفت الماضي ديالي ... ( خرجات ايسون للبالكو و مالك ضرب بطبلة حداه و خرج وازن 100 )
في الصباح ...
فاق مالك كيوجد في راسو ... لبس حوايجو .... و ركب في طموبيلتو توجه للعند سمر بلا ما يفطر عاد ماراشقاش ليه ايهضر معاها بسبب النقاش تاع البارح ....
كي وصل .. حلات ليه الخدامة و هو يدخل و لقاهم كيفطرو
زهرة كتحط الزيت للسمر اللي مكتحملهاش : خاصك ضروري تاكليها راه غادي تنفعك
سمر : وخا اخالتي ( شافت في مالك بفرح ) خوياا ( و هي طير مشات عنقاتو و عماد تعصب و مشا للعندو )
عماد : جيتي على قبل داكشي ؟
مالك : اه المهم لا ساليتي فطورك يالله نمشيو
مشاو بثلاتة بيهم
... ركب عماد و سمر في طموبيل ... و مشاو للمستشفى ...
دغيا دخلوا بلا ما يشدو الصف ( النفوذ ابيبي ) و هما ياخدو شعرة من كل واحد فيهم
عماد : واش النتيجة غادي تكونوا متأكدين منها ؟
الممرضة :منقدش ناخد الدم بسباب انها حاملة و لكن الشعر يقد يأكد النتيجة متخافش
_________________
كنت باغا نحط ساعة تخربقت من الدخول المدرسي خاصة جيت للبلاصة جديدة الخبار في راسكم بغاو يضوروني بيناتهم تفووو على غنس كيداير 😂😂😂
ارائكم حول القصة ضروري و متنساوش الفوت راه مكيعرفوش شكون فواتا لا كنتو خايفين شي واحد يعرف عندكم اهتمام بالقصة