الجزء الأخر للحلقة الاخيرة ❤️
روايــة #صغار_العم
العارف : والله لو تحلقه ماني مسامحك ؛ خلي شعر الولد ف حاله فاش ضايقك
عصام : طول يا بوي و بدي ينزل على عيونه
العارف : خليه انى هكي نبيه
____________________________
احمد مع امه ف المطبخ : يا ماما هما خمسين جني بس
ازهار : كان بوك قال باهي ع الرحلة نعطيك عادي
احمد : بابا قالي باهي و لتوا ماعطانيش فلوس
روان : كذاااب انت ماقلتلاش 😒
و خش عماد
ازهار سمعت صوته : هونا بوك جي برا نق على راسه انى اعييت
احمد مشي لبوه : بابا
عماد خاش لداره : شن تبي
احمد : المدرسة بيرفعونا لرحلة و يبو فلوس
عماد : وين الرحلة
احمد : لغريان
عماد : و قداش يبو فلوس
احمد تردد : مش عارف يا خمسين يا ستين
عماد فنص فيه : و كان نتصل بالمدرسة و تطلع كذاب ؟؟؟
احمد خاف : اربعين اربعين والله الا يبو اربعين
عماد سكت و عطاه اربعين
احمد ضحك و مشي قامهم مع المية 😁
__________________________
07:00 م
وصلو هناء و يوسف لحوش العارف و خشو الجنان
لقو العيلة ملتمين : السلام عليكم
ردو عليهم : و عليكم السلام
هناء شادة بنتها و تضحك : حني جيناااا
حلومة تشوفلهم و فرحانة : انستونا
هناء ضحكت : الله يأنسك
و قعدو يسلمو عليهم
العارف : هاتيها أميرة عندي
هناء مدتهاله
روان : اسمها ميرا يا اجديده مش أميرة
العارف لاهي فيها و ماردش
يوسف قعمز : وين امي
ازهار : طلعت هي و بوك ماليهمش هلبا
يوسف : و محمود كيف حاله توا ؟
ازهار : الحمد لله .. رجله هي اللي متعباته مش قادر يتحرك بيها
العارف شبحلهم
يوسف : مازال العملية اها
ازهار : المفروض الاسبوعين الجايات لو حصلو الدكتور و دارو معاه موعد
حلومة : فجيوة فيكم بتدفعو هلبا
ازهار : لو كان نبيع اللي عندي كله لازم يدير العملية و ترجع رجله زي قبل
يوسف : لو ماحصلتوش دكتور الأردن عندي معارف في بريطانيا كان هذا نشوفو واحد من غادي
سنابل تسمع فيه و ساكتة ..
ازهار : بريطانيا اغلى اكيد
يوسف : مادخلكم بشي انتو غر شوفو دكتور الأردن و بعدين ساهل
ازهار : ان شاء الله خير
نجاة كانت تتكلم ف التليفون
سكراته و قعمزت : هديكا مدايرة النكد
هناء : مني سلسبيل ؟
نجاة : من غيرها .. عندها محضر قريب مهاب و عزوزتها تبي تلبسها البدلة الكبيرة و هي سكرت راسها ماتبيش
مرام ضحكت : باهي مش بالسيف خلوها براحتها
نجاة شبحتلها : لا هي تعجبك لما كترت معاها الدوة قالتلها مانيش ماشية بكل و اهي جاية هني
اصيل كان فاتح النت و ساكت ؛ سمعها شبحلها : قصدك جاية حرجانة !!!!
كلهم شبحو لنجاة
نجاة : شن حرجانة جاية بتهدرز و تغير جوها
حلومة : شدي بنتك و عقليها يا نجاة عيب تعاند عزوزتها
يوسف وقف : محمود فوق ولا ؟
ازهار : ايه اركبله تلقى معاه محمد
نزل محمد من فوق : السلام عليكم
ردو عليه العيلة : و عليكم السلام
سلم على يوسف و هناء و قعمز جنب سنابل و ماباش يشوفلها
يوسف : تعالى افتحلي بابكم بنشوف محمود
محمد : خليته مفتوح تفضل
يوسف : يزيد فضلك ... و ركب
محمد شبح لروان : صبيلي قهوة
سنابل تشوفله و ساكتة و هو عاقد حواجبه و مايبيش يشوفلها
مرام شادة ولدها يزن توكل فيه : هناء حجزتي الصالة ولا مازال ؟
هناء : ايه من امس
يزن ولد عصام يشوف للعارف و يمدله ف ايديه يبي يجيه
العارف شاد ميرا شبحله : قعمز عند امك توا مش فاضي بيك
سنابل ضحكت : غار منها شكله
العارف مد ميرا لسنابل و خداه عنده
_____________________
يوسف خش لحوش عماد : محمود ؟؟
محمود من داره : ايواا
يوسف خشله : السلام عليكم
محمود كان متكي قعمز : و عليكم السلام
يوسف : خليك مستريح
محمود سكت
يوسف يشوفله : كيف حالك
محمود : شوفة عينك
يوسف : لازم تطلع من الدار و تغير جوك باش تتحسن نفسيتك
محمود : نقعد هني ولا نقعمز في كروسة و يبدو شافقين عليا
يوسف : انت مش مشلول باش تقعمز ف كروسة .. انزل على رجل وحدة و امشي بالقيلات
محمود هز راسه بمعنى لا : انى هادي نهايتي التركينة و الفراش طول عمري
يوسف حط ايده على كتفه : اطلع من الحالة اللي انت فيها و احمد ربي على كل شي ..
الحمد لله اللي جاتك هكي عملية تركيب بلاتين مش اكتر .. فيه غيرك ينشل و في اللي رجليه ينبترو و فيه اللي يموت طول
محمود ساكت
يوسف : ماتنكرش نعمة الصحة اللي ربي عاطيهالك باش ماتفقدهاش غيرك مش لاقيها ..
ان شاء الله ادير عمليتك و ترجع زي قبل و احسن
محمود يسمع فيه و ساكت
يوسف : حتى لو لا قدر الله ماصارش من السفر للأردن
و خبط صدره : انى مستعد نسفرك لبريطانيا و نشوفو احسن دكتور و نتكفل بيك من مجاميعه
محمود انحرج و ماعرفش شن يرد عليه
يوسف : انت قاعد صغير و في اول عمرك ؛ تفائل خير و اطلع من الحالة اللي انت فيها باش حتى تساعد روحك ع العلاج
محمود شبحله و عيونه دمعو
يوسف قام حواجبه : رد بالك تبكي
محمود رشف خشمه : قعمز نبيك في موضوع
يوسف قعمز بحداه : نعم
محمود سكت شويه ونزل راسه : نبيك تسامحني
يوسف استغرب : نسامحك فاش ؟
محمود متضايق : سامحني لاني السبب في اللي صارلك
يوسف سكت
محمود شبحله
يوسف : كيف انت السبب ؟ كنت في العرس يومها ؟
محمود : بنكون معاك صريح لاني معش قادر ندس عليك
و بدي يحكيله ...
يوسف انصدم و وقف
محمود يشبحله : عارف انك مستحيل تسامحني و ان اللي انى فيه توا نستاهله و نستاهل اكثر
يوسف مصدوم : انى مش موضوعي الرصاصة موضوعي كيف فكرت تقتل مهاب ؟؟؟؟
محمود متضايق : انى نادم هلبا و مش عارف كيف تصرفت هكي .. لو يرجع بيا الزمان و الله مانديره ولا حانفكر
يوسف : لو جت فيه و مات شن بينفعك الندم بعدين ؟؟ و شن ذنب سلسبيل يموت راجلها في ليلة عرسهم !!
محمود دموعه نزلو : وقتها ماكنتش نفكر في شي الا اني نفركس العرس باش ماياخدهاش ، لكن توا والله الا نادم و قريب نموت من تأنيب الضمير و لما شفتك انت اللي انضربت معاش فهمت شن صارلي لقيت روحي راكب السيارة و نعيط لين درت الحادث
يوسف سكت ؛ وقف ع الروشن و مازال مصدوم
محمود : عارف ان مهاب مايستاهلش و ان اللي داره لمحمد مفروض نشوفله بيه طول عمري لكن وقتها مافكرتش فيه
يوسف شبحله و مازال ساكت
محمود يبكي : يوم اللي سمعت بيك طلعت من العناية ماتتوقعش شن صار فيا من كتر فرحتي لان لو لا قدر الله متت بسببي و ترملت هناء راني قتلت روحي طول بدون مانتردد
يوسف يشوفله و متضايق عليه
محمود يبكي : و اهو ربي يعاقب فيا توا و انى اللي نزيد نعاقب في روحي و مانبيش نطلع .. نقعد زي الكلب هني لاني نستاهل
يوسف وقف جنبه يمسحله في دموعه : اسكت ماتبكيش اسكت
محمود مسح دموعه و رشف خشمه
يوسف شده من ايده : نوض معاي نوض
محمود : وين ؟
يوسف : لازم تنزل و تطلع من هني ياسرك هم و غم
محمود : لالا خليني
يوسف يجبد فيه : تي نوض بلا دلع زايد
محمود : مادامك مش مسامحني مانيش نايض
يوسف : مسامحك و مش شاد ف قلبي شي عليك غر نوض يا راجل هيا
محمود سكت
يوسف ايوقف فيه : شد روحك
و مدله القيلات
محمود شدهم و بدي يمشي بيهم
يوسف ضحك : مشنا منظرك مش طالع عليك البكي
محمود ضحك و مسح وجهه
و نزلو مع بعضهم ..
_____
سلسبيل : يا امّيمه تفرض في رايها هلبا و انى الجو هذا مايمشيش معاي
حلومة : احترميها عيب ؛ سايري و خودي بخاطرها هي فرحانة بيك لانك قاعدة عروسة و تبي توريك لناسها
سلسبيل : ناسها شافوني في العرس
حلومة تكنطت : امالا تو نوريك كان الصدرة مالبستيهاش ف اسبوع هناء
سلسبيل ضحكت : اصلاً ناوية بنلبسها ف الاسبوع غر اليوم ماخاطريش فيها
حلومة شبحت لنجاة : ديري لبنتك حل و ادبيها مع امتاعينها خير مايضحكو علينا
نجاة شبحت لسلسبيل و سكتت
طلعو يوسف و محمود
العيلة شافو محمود نزل فرحو
ازهار : و اخيراً طلعت ؟؟
محمود ابتسم
سلسبيل شافاته تلخبطت و ماعرفتش تتصرف
ناضت سلمت عليه : الحمد لله على سلامتك
محمود : الله يسلمك
و قعمز ع الكرسي بين يوسف و محمد
سلسبيل سكتت و قعمزت
محمد وشوش محمود : خلي جوك مليح و اهدأ
محمود شبحله : اصلاً نحيتها من راسي و نادم قريب ناكل الجيفة بسببها قريب ضيعت روحي و ضيعت عيلة يوسف
محمد : كويس
و شبح لسنابل لقاها تشوفله
اصيل يشوف لمحمود : آنستنا يا سي
محمود ضحك : الله يآنسك
و قعدو يهدرزو كلهم ❤️
_
سنابل مدت ميرا لهناء و صبت لمحمود شاهي و مدتله كيكة
و بعدين مدت لمحمد
محمد من غير ما يشوفلها : مانبيش
سنابل : الكيكة هادي تحبها انت
محمد تلفت يهدرز مع يوسف و ماردش عليها
سنابل حطت المترد و اتضايقت ان محمد مش معبرها و خشت لمطبخ حلومة
محمد كسر عينه عليها وهي ماشية زبطها زعلت
بعد شوية ناض و لحقها ؛ لقاها تبكي
سنابل شبحتله و جت تبي تطلع
محمد سكر عليها الطريق : وين
سنابل لفتت راسها و مابتش ترد عليه
محمد حط ايده على ذقنها و لفت وجهها ليه
سنابل تشوفله و عيونها مدمعات
محمد حط صبعه تحت عينها : مش تفاهمنا ان معش فيه دموع
سنابل : لما معش تزعلني تو معش تشوفهم
محمد عقد حواجبه : و لما انتي تسمعي الكلام معش نزعلك
سنابل : انى مادرتش حاجة تعفلقك انت اللي مولي متسبل
محمد يعد بصوابعه : واحد لبس مستور ف الجامعة .. تنين مكياج مافيش .. ثلاثة ممنوع تتكلمي مع ذكر .. أربعة اتمي محاضرتك للحوش طول
سنابل سكتت
محمد : اديري شن طالب منك تمشي علاقتنا عسل
سنابل هزت راسها و سكتت
محمد سكت و قعد يشوفلها
سنابل : باهي حول من طريقي نبي نطلع
محمد قرب من وجهها : مازال مش توا
سنابل وخرت : معش تقرب
محمد زاد قرب : اححح من هالجمال اللي متعبني اححح
سنابل فنصت فيه و ضحكت : وخر
محمد مقرب منها : علاش
سنابل قامت حواجبها و رمشت عيونها بسرعة : اقرا الفاتحة قبل
محمد : احيه ع الشبحة معش اديريها
سنابل : و علااااش ؟
محمد شدها من خصرها : تو نقولك علاش
سنابل ادف فيه و توخر : خلاص عرفت حوووول
محمد مقربها ليه و يوشوش : لا ماعرفتيش
سنابل دفاته و طلعت تجري من باب الجنان : راك تلحقني
محمد ضحك و ركب لحوشهم
________________________
11:00 م
هناء واقفة في مطبخها تمسح في اماعين عشي يوسف و ترد فيهم في الدولاب
خشلها يوسف : وينك ياهنو
هناء شبحتله : اهو كملت شوية و جاية
و تلفتت تقيم ف الطواسي
جي يوسف من وراها و حضنها : سيبي اللي ف ايدك لاحقة عليهم
هناء تلفتتله : باهي حبيبي راجي لحظة بس
يوسف : لا مانراجيش
و قامها ف غمره
هناء ضحكت : لااا جرحك يتعبك هكي
يوسف خش بيها للدار : فداك روحي حبيبتي مش جرحي
هناء باساته ف خده : انحبك اني
يوسف ...
و سمعو صوت ميرا تبكي
يوسف تكنطا : اييي علينا
هناء ضحكت : اميرتك تنادي عليا اكيد جاعت
يوسف نزلها من غمره و سكت
هناء مشت لميرا ف سريرها : جاية يا عمري جاااية
و قامتها
يوسف نحّا التيشرت متعه و لوحه ع السرير متعفلق
هناء شادة ميرا ؛ شبحتله و ضحكت
يوسف : ديريلها حل را هذا مش راي
و خش الحمام
________________________
مهاب يعارك ف سلسبيل : عاجبك هكي خليتي امي تاخد منك موقف و تتعفلق على سبب تافه ؟؟
سلسبيل تبكي : علاش تفرضو في آرائكم عليا انى اليوم مانبيش نلبسها الصدرة ماعنديش ليها جهد
مهاب : سلسبيل ! فيه من حاجات لازم تكبري عقلك فيهم مش مستاهل الموضوع انك تسكري راسك عليه
سلسبيل : انى جو العزايز مانحباش فهمها ان تنقص منه شوية لما نقول مانقدرش نلبسها معناها تاعبة و بجديات مانقدرش
مهاب تكنطا و فنص فيها : ماتغطليش ف الكلام خيرلك
سلسبيل قعدت تبكي لين حست روحها بترجع
مشت تجري للحمام
مهاب لحقها : خيرك ؟؟
سلسبيل ترجع مش قادرة ترد عليه
مهاب قرب منها يغسلها في وجهها و يتأفأف : معقولة لين ترجعي ؟؟ مش لِـ هالدرجة الزفت
سلسبيل وقفت تسمح في وجهها : حول مافيا شي
طلعت من الحمام و مشت لدارها
مهاب متكنطي : استغفر الله العظيم 😤
يقول ف عقله .. ( لازم نسايرها و نهديها خير ماتكبرها )
و لحقها ف الدار
قعمز ع السرير و شدها من ايدها وقفها قدامه : اهدي شوية حبيبتي
سلسبيل سكتت
مهاب : قوليلي شن اللي متعبك اليوم
سلسبيل مكشرة وجهها و مدمعة : من اللي نضت ساعة سبعة الصبح حاسة روحي مرهقة و عندي دوخة ..؛ و قعدت نضم و ندير ف الغدي و بعدين طلعت للجامعة و هذا كله و ساكتة
مهاب يشوفلها : علاش ماقلتيليش انك مريضة
سلسبيل مسحت دمعتها : باش ماتقولش هادي تتدلع من اولها
مهاب ضحك
سلسبيل انحرجت : معش تضحك
مهاب شدها من ايده و قعمزها على رجله : و توا كيف حاسة روحك احسن ؟
سلسبيل اتكت على كتفه : بعد مارجعت حسيت روحي استريحت
مهاب بصوت واطي : لو غدوا حسيتي روحك مازلتي تاعبة لازم نرفع نعاينك
سلسبيل غمضت عيونها : به
مهاب شبحلها و وخرها من عليه : نوضي نوضي
سلسبيل شبحتله : خيرك
مهاب : نبيك في موضوع
سلسبيل : موضوع شني
مهاب وقفها و وقف : ننزل نجيب تليفوني ناسيه ف السيارة و نجي
سلسبيل سكتت و قعدت تشوفله
مهاب يهمسلها : الروب الاحمر الشفاف الله الله
سلسبيل ضحكت : انت هذا فاش فالح
مهاب ضحك ؛ باسها تحت وذنها و طلع
________________________
تاني يوم 🌹
10:00 ص
نزلت سنابل من حوشهم تجري لابسة سروال جينز و بلوزة بيضاء قصيرة و وشاح وردي مزخرف
فتحت السيارة و ولعتها تسخن فيها
قعدت تشوف للرواشن و خايفة : يارب ماينزلش يارب
محمد طلع من حوشهم ووقف ف الدروج يتصل بيها .. ( عارف موعد محاضراتها )
سنابل شافت تليفونها مابتش ترد : وااك علاش نايض توا 😒
محمد سكر تليفونه و نزل
طلع الجنان لقاها في القراج
عقد حواجبه و جاها يطق ع المرش
سنابل انخلعت و شبحتله
محمد فتح عليها الباب : علاش ماترديش ؟؟!
سنابل ابتسمت : صباح الخير
محمد : وين ماشية !!
سنابل : ماك عارف للجامعة وين غيرها يعني !
محمد سكت و قعد يشوف لـ لبستها
سنابل : خيرك ؟
محمد : انزلي
سنابل : علاش ؟؟
محمد : اللبس اهوا مش متع جامعة ؛ اركبي توا البسي حاجة طويلة و انزلي
سنابل تكنطت
محمد يفنص فيها : تسمعي فيا ولااا
سنابل تأفأفت و نزلت من السيارة
محمد يشوفلها : امسحي اللي ف وجهك و تلقيني نراجي فيك ؛ انى اللي بنرفعك
سنابل شبحتله و ركبت
محمد سكر السيارة و طلع الشارع
بعد شوية نزلت سنابل لابسة بلوزة و سروال و دجاكة طويلة شوية
محمد واقف جنب سيارته يراجي
شافها فنص فيها : هذا شنو اللي لابستيه ؟؟
سنابل : واسعات و محتشمات !!
محمد عض لسانه و سكت
و ركب السيارة
سنابل تكنطت : بيبدا في النفخ ع الصبح
و ركبت السيارة : نقص منه الجو اللي ادير فيه مولي هلبا ره
محمد طلع بالسيارة بسرعة : جامعة الشياطين اهيا مش مرتاح لأمهااا
سنابل : و ماك تقرا في جامعة حتى انت ولا كان ادير في مشروعك و بتتخرج معناها بتبدا تلبز عليا
محمد شبحلها و كيف بيتكلم لقاها مدايرة روج
قعد يمسح فيه بِ ايده : هذا شن قلت على امه !!!
سنابل تكنطت : علاش هكي !!!
محمد درس ع جنب و شبحلها : امسحيه توا
سنابل طلعت وايبس و قعدت تمسح ف اللي تلبز
محمد يعيط : امسحيه كله اللي ف وجهك
سنابل انخضت و شبحتله : نبي نروح
محمد : امسحيه قتلك 😡
سنابل بدت تبكي : و انى قلت نبي نروح
محمد طلع بالسيارة بسرعة و سطرب
لف و رجع للحوش
سنابل نزلت من السيارة حامقة : كان مازال ريت وجهي
و خشت تجري
محمد لحقها ف الدروج و شدها من ايدها : شن قلتي ؟؟؟ .. عاودي شن قلتي !!
سنابل : اي ايدي 😭
محمد رخاها : لآخر مرة اديري الجو هدا معاي ؛ ف الجديد نقولك كلمة تسمعيها طول فاهمة ولا !
سنابل : انت تغيرت عليا هلبا من لما انخطبنا ؛ قبل ماكنتش هكي
محمد : لان قبل مافيش جامعة ال ***** و الجو ال **** المختلط
سنابل فنصت فيه : انت كيف تسب قدامي ؟؟؟
محمد : لانك تفصلي ف امي بتسكير الدماغ اللي اديري فيه .. اسمعي الكلام النم و ماتحرقيليش دمي خير مانقرا فيك فاتحة و نتم موضوعنا توا ولا ندير عرس لا نمي
سنابل سكتت و ركبت لحوشهم
محمد زاد تعفلق و طلع الشارع يتمتم بروحه
_____________________
طلعت حلومة للجنان : هذا مني الي يصيح ؟؟
مالقت حد خشت
شبحت للدروج لقت محمود نازل ينقز على رجل وحدة و شاد القيلات
حلومة تنهدت : بالشوية على رجيلتك يا محمود
محمود داهش : تي عادي هي تملها خلاص ماعندي علاش بنساعدها
حلومة : معش تفاول على روحك يا وليدي ..؛ ان شاء الله ادير عمليتك و ترجع زي قبل و احسن
محمود سكت و خش معاها للحوش
لقو العارف مقعمز ف الدار
محمود حط القيلات و قعمز معاه داهش : صباح الخير
العارف شبحله : صباح الخير .. كيف حال رجلك اليوم
محمود : زي ماهي
العارف سكت و قعد يشوفله
متأثر و واجعه حفيده
محمود : معش يصير منها قعدت غر ديكور
حلومة : بعيد السو عليك .. تو ان شاء الله تسافر و تعالجها و تروح زي الحصان غر خلي معنوياتك مرتفعة
محمود هز راسه و سكت
العارف : قداش قالولك تكلف ف الأردن ؟
محمود شبحله : مش عارف بالزبط لكن هلبا دولارات يا جدي
العارف سكت
حلومة : فطرت ولا نحطلك تفطر
محمود : صحيتي كيف واكل ؛ غر قلت ننزل نغير جوي معاكم
حلومة ابتسمت : مرحبتين بيك
العارف يشوفله و ساكت
___________________________
04:30 م
نجاة تلبس في وشاحها : انزلي سخني السيارة مابين نزلت
سنابل تلبس في سبيدروها : و النبي ماتعطليش
خدت المفتاح و نزلت تجري
طلعت للجنان لقت محمد مقعمز
شبحتله ع الجنب و سكتت
محمد يشوفلها : وين ماشية ؟
سنابل : طالعة مع ماما 😒
محمد : قلت وين ماقلتش مع مني
سنابل : بناخدو قفاطين للسبوع
محمد يتكلم بصبعه : لا تاخديه مكشوف ولا قصير وصيتك
سنابل حمقت و جاته : انت زي اللي بديت تستانس !!
محمد فنص فيها : يجيب ربي و نلقاه مكشوف ولا قصير والله الا مانشركه بالمقص
سنابل مصدومة : خيرك هكي مولي ؟!!!!
محمد : الجو القديم اللي كنتي اديري فيه كله بنحيهولك
سنابل متعفلقة : اصلاً انت مش حاتشوفه و تو نخليه عند هناء لين نلبسه
محمد هز راسه : انى وصيتك و خلاص ؛ نسمع بيك درتي مافي راسك بتشوفي شي مش حايعجبك
و نزلت نجاة : قاعدة هني ؟؟؟؟ مش قتلك سخني السيارة ؟؟؟
__________________________
بعد مرور اسبوعين 🌹
09:00 ص
محمود ف الجنان هو و عماد يسلموا ع العيلة لانهم مسافرين للأردن
ازهار تبكي و متنكدة
محمود ضبطها : معادش تبكي يا امي .. انتي هكي تزيدي فيا
ازهار : والله المفروض مشيت معاك و مانخليك بروحك
محمود شبحلها : تي شن عيل صغير باش تمشي معاي ؟
ازهار ابتسمت : راجل .. راجل و سيد التريس
محمود ضحك و باسها ف جبهتها : ربي يخليك لينا
ازهار : تمشي و تجيني بالسلامة يارب
محمود : ان شاء الله
و تلفت يسلم على حلومة
حلومة تبكي : ربي معاك
_
احمد متضبط بوه : جيبلي معاك حاجة مليحة مش تنساني
عماد ضحك : ان شاء الله
طلع العارف للجنان شاد ظرف
قرب من محمود و مدهوله : خليهم معاك بالك تستحقلهم
محمود استغرب و فتح الظرف ؛ لقاهم قريب عشرة رباطي دولارات و يورو
انصدم : هذا شنو يا جدي !!
العارف : خودهم مني تلقاهم .. الفايدة في صحتك ياولدي الباقي كله وسخ دنيا
محمود تأثر بكلام جده و باس على راسه : ربي يحفظك و يدومك لينا
العارف خبطله على كتفه بالشوية : تمشي و ترجع بالسلامة
خش محمد : تي هيا يا بوي وقت !!
عماد شبحله : هي
خدي الشنطة و طلع هو و محمود : في أمان الله
حلومة : مربوحة و توصلو بالسلامة
و بزعت وراهم امية 💦
ازهار قعمزت تبكي و روان واقفة بحداها و ساكتة
____________
ركب محمود للسيارة و مد خمسة رباطي يورو لمحمد
محمد استغرب : هادو شني ؟؟
محمود : قيمهم بسرعة ماتخليش بوي يشوفهم
و تلفت لقي عماد يحط ف الشنطة ف الكوفينو
محمد حط الفلوس ف القجر : متع شني
محمود وراه الظرف : جدك عطاني فلوس نحيت منهم نبيك اتدسهم لين نروح
محمد انصدم : جدي عطاك يورو ؟؟
محمود ضحك : مش يورو بس حتى دولار
محمد مصدوم
محمود : مش انت بس اللي بيبنيلك
محمد ضحك : اما يبنيلي مازال مادار شي كله بعرقي و عرق بوي
محمود : مادامه خبط صدره والله ما مولي ف كلمته
محمد ضحك و مازال مصدوم : والله الا الدنيا بخير
محمود : بوك جي اسكت و رزرز ع اللي عطيتهملك
عماد ركب السيارة : هي توكل
________________________
و تم باقي اليوم و العيلة لاهيين ف اسبوع هناء و مبسوطين 🌹
الا ازهار امهبية و متنكدة على خاطر محمود سافر و هي مش معاه
09:30 م
خشت هناء للصالة لابسة بدلة صغيرة تتدرج هي و ميرا ❤️
سعاد واقفة قريبة عليها و مبتسمة فرحانة متع شوفوني انى عزوزتها 😂
نجاة تشوفلها و حارقة دمها : مش تقعمز تنطمر ف مكانها البلي الاحرف لازم ترتشق 😡
سنابل : فوتيها يا ماما عادي
نجاة : ماهي طالعة ف التصوير فسدت الخشة متع اختك
سنابل : حي ميرا تبكي
نجاة : ايبسي ف مكانك لين اختك تكمل تدريجتها
سنابل تضحك و تأشر على ميرا : غر شوفيها يا ماما تقولي يوسف متعفلق 😂
__________
سلسبيل لبست الصدرة و نحتها ف الصالة ماقدرتش تتحملها ؛ اتصلت بمهاب جي روح بيها
مهاب يسوق و يشوفلها : نروح بيك تغسلي وجهك و تعايني ليك ايام مريضة و تعاندي
سلسبيل ساكتة و مغمضة عيونها
مهاب : تسمعي فيا ؟
سلسبيل شبحتله : مهاااب ؟
مهاب : نعم ياعيوني
سلسبيل : انى حامل
مهاب تفاجأ و شد فرينو : شنو ؟؟
سلسبيل خافت : بالشوية
مهاب شبحلها : عاودي شن قلتي
سلسبيل : انت ماتبيش ولا 😢
مهاب : متأكدة حامل ؟
سلسبيل هزت راسها بمعنى ايه : رفعتني سنابل حللت عند عمتي امس و قالتلي إني حامل
مهاب فرحان ؛ شد ايدها و باسها : الف مبروك علينا حبيبتي تنوضيلي بالسلامة
سلسبيل متفاجأة : يعني انت مش متعفلق ؟
مهاب يضحك : علاش بنتعفلق ؟؟
سلسبيل : كنت نحسابك ماتبيش صغار لانك ولا مرة دويت عليهم
مهاب : انتي خليتيني اليوم اسعد واحد ف الدنيا ❤️
سلسبيل ضحكت : الحمد لله
و سكتو شوية و هما يشوفو لبعضهم
سلسبيل ضحكت : مهاب ؟؟ خيرك ؟؟
مهاب ضحك : مش عارف
عدل تقعميزته و طلع بالسيارة بسرعة : علاش داسة عليا من امس و ماقلتيليش
سلسبيل : كنت نفكر كيف بنقولك و خايفة
مهاب ضحك و شد ايدها يبوس فيها و يسوق
__________________________
نجاة اتدور في سلسبيل مالقتهاش
جت لسنابل : شوفي اختك وينها باش تصورو مع هناء بالقفطان
سنابل : لبساته !
نجاة : ايه و هيا خفو روحكم
سنابل : سلسبيل تعبت و روحت
نجاة فنصت فيها : خيرها ؟؟؟
سنابل : داخت من الصدرة و كلمت راجلها جاها
نجاة تأثرت : وحمها صعب مسكينة انحرمت من السبوع
سنابل سكتت
و جت بحداها روان : هناء تنادي عليك
سنابل شبحتلها : اسمعي كان محمد سألك على قفطاني قوليله طويل و كله مستور باهي !!
روان قعدت تشوف للقفطان : وينه المستور ؟
سنابل ضحكت : قوليله هكي و خلاص
روان ضحكت : به
و مشو يصوروا مع هناء 💕
__________________________
12:30 ص
سنابل تتكلم ف التليفون : محمد خيرك مولي نكدي ؟
محمد : قتلك توا تطلعيلي ف الدروج نشوف القفطان
سنابل : مانقدرش نطلع بابا و اصيل قاعدين
محمد : امالا ابعتي صورته
سنابل : قصدك تكذب فيا ؟؟
محمد : نبي نشوفه
سنابل : قتلك طويل و مستور ؛ حتى من كمامه طوال
محمد : شوية و نكلمك
سنابل تبكي بالكذب : عارفاتك شن بدير .. بتنادي روان و بتسألها ولا 😭
محمد : ايه لان عارف جوك كيف ف تسكير الدماغ
سنابل علّت صوتها : انى تعبت هكي تعبت ؛ كل يوم مطلعلي مشكلة من العدم باش تعاركني عليها 😭 .. قولي كان مليت مني و تبي تسيبني حطهالي عربية
محمد تعفلق : تي شن تاخدي و تلبزي النم ؟!
سنابل : تصرفاتك هكي اتدل ؛ انت تغيرت هلبا مش نفس الشخص الهادي الرومانسي اللي حبيته
محمد سكت
سنابل سكتت و قعدت تراجي فيه شن يقول
محمد : انى ماتغيرتش عليك قاعد نحبك زي قبل و اكتر
سنابل : لالا انت تقنع فيا بالعاني توا
محمد : غر يروحو محمود و بوي بالسلامة و بنتم موضوعنا
سنابل : كيف بتمه ؟
محمد : بنحدد موعد العرس
سنابل : و الحوش اللي مش واتي ؟
محمد : تو يوتا
و سكتو شوية
محمد : سنابل
سنابل : شني 😒
محمد تنهد : انزليلي ف الجنان
سنابل : تي مانقدرش
محمد : زيدي ساعة و انزلي
سنابل سكتت و قعدت تفكر
محمد علّا صوته : هااا شنو ؟؟؟
سنابل : باهي مش حانردك
محمد : تمام نراجي فيك
و سكرو الخط
محمد ينادي : روااااان !!!
_
غيرت سنابل قفطانها و قعدت تراجي لين اماليها رقدوا و نزلتله ❤️
___________________________
هناء واقفة ع المراية تفك ف التسريحة متعها
و يوسف واقف وراها ف عتبة الدار يشوفلها
هناء : حبيبي بدل ماتتفرج عليا تعالى ساعدني
يوسف جاها يفكلها : حاطة عرم حشوات علاش انتي شعرك مش محتاج
هناء : باش تطلع التسريحة احلى
يوسف هز راسه و سكت
هناء شعرها انفتح و قعدت تحرك فيه : اخيراااا
يوسف فتحلها سوستة القفطان و باسها ف كتفها
هناء شبحتله ف المراية و ابتسمت
يوسف لف ايده عليها و راسه ف كتفها : اني اللي بنقول و اخيراً
و سمعو ميرا تبكي 😂
يوسف قام راسه : خيرها قاصدتني اهيا !!!
هناء ضحكت : غايرين من بعضكم
و كيف بتمشيلها ..
يوسف شدها من ايدها : خليك خليك
و مشي هو شدها قعد يهز بيها لين رجعت على نومها
هناء تشوفلها : بالك جعانة يا يوسف
يوسف شبحلها : لالا شبعانة و ماشاء الله عليها
حطها بالشوية و جي لهناء ...
__________________________
بعد مرور شهرين 🌹
07:00 م
العيلة كلهم ملتمين في مربوعة حوش العارف فرحانين برجعة محمود 💜
العمام و ولاد العم يهدرزو مع العارف و يشربوا في قهوتهم
و الكناين يهدرزو مع حلومة و سعاد شادة ميرا تلّعب فيها
جي بحداها يزن ولد عصام يشوفلها
و فجأة يضربها على وجهها
ميرا انخلعت و بدت تبكي 😭
سعاد : ليه عليك تضرب فيهااا
هناء خافت و جتها تجري : ووه عليا بنيتيييي
و خدتها تسكت فيها : خلاص يا مامي خلاص
نجاة : الا بنيتنا مانبو حد يمسها ايواااه
جت مرام تضرب ف يزن على ايديه و يزن بدي يبكي
حلومة : علاش تضربي فيه اصغيّر
مرام شداته ف غمرها يعيط و قعمزت بيه : يضرب فيها هلبا كل مايشوفها
يوسف يشوف لِـ يزن : من توا تناشب اووه
عصام : خليه يضرب عرفنا من بنّاسبو من توا
يوسف : ههههههههه زعما ؟؟
عصام ضحك
العارف سمعهم تلفت : توقع ما تلوح شي
__
سلسبيل مقعمزة و ساكتة متعبها الوحم و وجهها مايتفسرش اتصلت بمهاب جاها و روحت
__
محمود شبح ليوسف : يوسف !
يوسف شبحله : ايوا ؟
محمود جي بحداه يدوي بالشوية : نبيك في موضوع و ان شاء الله تفيدني فيه
يوسف : كان نقدر عليه والله ماتخمم
محمود : عندي عُملة و نبي نطير بيها لأوروبا فيها كيف تتوسطلي ع التأشيرة ؟
يوسف سكت و قعد يفكر
محمود : حد من معارفك !
يوسف : ع البريطانية صعب توا مسكرين ع الليبيين لكن ع المالطية تحصل و بعدين من غادي تقدر تطلع
محمود ضحك : اطلع طول
يوسف : لكن شن بدير غادي
محمود : بنعيش 😎
يوسف ضحك : كان تبي تعيش ف بريطانيا مستعد نضمنلك خدمة و سكن و قراية
محمود علّا صوته : و ساكت يا معلم ؟؟؟ تي ليا سنين نراجي فيها الفرصة هادي
يوسف : نشوفو موضوع التأشيرة و بعدين ساهل
_____
محمد غمز سنابل و ناضو هو وياها للمطبخ
هناء : عمتي غريبة ماجتش
روان وشوشتها : صاير معاها موضوع اطلع طول
هناء لفتت بنتها الجهة التانية و شبحت لروان : شن صار
روان : بنتها احتمال تتطلق
هناء انصدمت : اقسمي
روان : والله .. سمعتها تدوي لِـ امّيمه امس
هناء : علاش خيرها ؟؟
روان : مش متفاهمة مع راجلها و عزوزتها كل يوم تاكل ف الطرايح
هناء تأثرت : يا ناااري
روان : تستاهل هذا اللي داراته فيكم شوفي ربي شن بعتلها
هناء : مهما كان ماتتشمتيش
روان سكتت
هناء : و توا شن بيصير فيها زعما
روان : هي حرجانة عند عمتي و بوها مايبيهاش تتطلق اشبح شن يصير
هناء : كان تتطلق ترتاح ع الأقل ماعندهاش صغار
روان : باش تجيك انتي و يوسف !! فكينا منها و خليها بعيدة ف الجبل
هناء ضحكت : لالا خلاص تملها العيلة كلهم كرهوها و حتى هي معش جت .. انى معاش ريتها من لما اجديده روح من الحج
روان : افتكيتي من وجهها
هناء : اي والله
روان : و شوفي شن سمعت تاني
هناء تشوقت : شنو
روان : قالو راجلها علق عليها تاخد في حبوب منع حمل هذا علاش كبرت بينهم
هناء انصدمت : و الله ؟
روان : والله 😃
هناء : انتي خطيرة يا بنت مافيش شي يفوتك
روان ضحكت : كيف عاد عيب 😉
و جتها مكالمة ناضت لدار عصام سابقا تتكلم 😂
____________________
اصيل كان ف شارع المدار يشري ف تليفون جديد
ركب لسيارته و اتصل بحبيبته رغد ..
رغد ردت : وينك أصولي لتوا ؟
اصيل طلع بسيارته : جاي جاي دقيقتين و نكون عندك
رغد : اوكى
سكر أصيل الخط و بعد شوية وصل للكافي
خش و قعمز معاها
رغد ابتسمت : وين حبيبي لتوا
اصيل حط كيسة التليفون ع الطاولة : عطلني هذا
رغد شبحت للكيسة : شنو هذا 😍
اصيل فتح الكيسة : تليفون ايفون
رغد ضحكت و قعدت تشوف فيه : يهبل
اصيل مدهولها : ان شاء الله يعجبك ؟
رغد : يجنن حبيبي احلى نوع هذا
اصيل ابتسم : عيونك الحلوات
رغد ابتسمت و سكتت
اصيل : مليت من السامسونج قلت نغير ع الايفون
رغد انصدمت و انحرجت : قصدك ليك هو
اصيل : ايه .. لمن تحسابيه
رغد بإبتسامة مجاملة : نحسابه لأمك 😊 لان عيد الام قريب
اصيل ضحك : لالا امي تليفونها خير من اللي عندي
رغد تسحن في روحها : امالا علاش قلتلي ان شاء الله عجبك ؟
اصيل : يعجب فيا ذوقك و قلت لو ماعجبكش نغيره
رغد سكتت و تسحن ف روحها .. ( خزي عليه محقره حطني في موقف بايخ )
اصيل : شن تبي نطلبو حبيبتي ؟
رغد وقفت : مانبي شي بنروح
اصيل وقف : مسرع انى كيف وصلت
رغد : و انى من بكري نراجي .. هي سلام
و طلعت من الكافي متكنطية
اصيل لم مفاتيحه و تليفوناته و طلع
____________________________
بعد مرور فترة من الزمن 🌹
محمود حقق حلمه و سافر لبريطانيا و استقر غادي ..
و سنابل و محمد تزوجوا و استقروا في حوش بروحهم و جايهم بيبي ف الطريق ❤️
__
01:30 م
سنابل مقعمزة ف سريرها و حاطة ايدها على بطنها : حمودي ؟؟ ... محمد !!
محمد ف الصالون يتكلم مع محمود ف التليفون و مايسمعش فيها
سنابل علت صوتها : محمد ؟؟ ... و صيحت : محمدددددددد !!!!!
جاها محمد مخلوع : خيرك ؟؟
سنابل : خاطري في دلاعة 😍
محمد : دلاعة ؟؟
سنابل : ايييييه 😍
و توصف بيديها : تكون مقصوصة ابراج ابراج و لونها حمراء 🍉
و نقعمز ف الجنان ناكلها ؛ احححح تهبلللل 😋
محمد تكنطا : قصدك العياط هذا كله على خاطر دلاعة ؟؟
سنابل : تقعد في خاطري كان ماكليتهاش حبيبي 😔 و هكي تصعب عليا الجياب
محمد : خلعتيني الزفت نحسابك بتجيبي
سنابل سكتت
محمد : و حني ماشيين لحوش جدي تو ناخدوها ف طريقنا
سنابل مدتله ايدها : وقفني
محمد شدها و وقفها : وين وشاحك
سنابل : اهوا بحداي تو نلبسه
خداته و حطاته على شعرها
محمد : المكياج فكينا منه
سنابل : كنتور بس ؛ مولية خشموشة في جرة ولدك 😔
محمد تأفأف و فتح الدولاب يطلع في سوريته : صبرني يارب
سنابل زعلت : يصبرك على شنو ؟؟ هذا اول بيبي هكي امالا كان عندك تلاثة اربعة شن قلت
محمد شبحلها : ماقصدي شي خيرك واتية ؟
سنابل بدت تبكي : انى اعصابي مش متحملة و انت تزيد فيا بعصبيتك
محمد قرب منها و باسها : اسف حبيبتي مش قصدي نزعلك ، غر ضغط الشغل هو اللي معصبني انتي عارفة
سنابل : حتى انت راعيني شوية انى حامل و قريب نجيب يعني مش طايقة حتى روحي 😢
محمد قعمزها ع السرير و قعمز على ركابه قدامها : باهي ياعمري اسف سامحيني
و باسها في بطنها
سنابل تشوفله و تبكي
محمد شبحلها : خلاص حبيبتي امسحي دموعك و خلينا نمشو
سنابل مسحت دمعتها و وقفت
محمد وقف يبطم ف سوريته : البسي عباية فوق حوايجك ماتطلعيش ببطنك هكي
سنابل علت صوتها : باهي نعرف من غير ماتقولي
محمد تكنطا و سكت .. ( استغفر الله العظيم )
لبست سنابل عبايتها و طلعو مع بعض جنب الباب
سنابل : مدلي سبيدروي اريحلي
محمد طلعه و طبس يلبسها فيه و يربطلها في الخيط
و لبس كندرته و طلعوا ..
___
و هما خاطمين من قدام محل الخضرة محمد درس
سنابل زهت في عينها الفاكهة : جيب من كل شي كيلو 😍
محمد شبحلها و سكت
سنابل شبحتله : حتى نص كيلو 😅
محمد ضحك و نزل شرالها الدلاعة و جميع انواع الفاكهة اللي في المحل و سنابل مبسوطة هلبا 😁
_________________________
02:00 م
مقعمزين صغار العم في جنان العارف و يشووا 🍢
ازهار طلعت شادة سلاطة ف ايدها : روان تعالي خودي مني
روان تمروح ع الشواء : شوفيني شن ندير هاتيها انتي
اصيل يشوي : خودي الوساع تمروحي فيه على وجهي الزح
روان : باهي 😡
ازهار سكتت و جت حطت السلاطة ع الطاولة
محمد : اووه سلاطة روسية محمود يحبها هلبا
ازهار تنكدت : غر كان يروحلي بس مستعدة نديرهاله كل يوم
روان شبحتلها
محمد : سيوره يروح
ازهار : ليه اكتر من عام و نص كان خاطره راهو جي ؛ لكن هو نسي امه و بوه في جرة بريطانيا اللي ذهبتله شيرته
محمد غمز يوسف و ضحكو
يوسف : اكيد بيدير زيارة ماتزعليش روحك
ازهار سكتت و خشت للمطبخ مع سلفاتها
سنابل مقعمزة ع الكرسي و حاطة ايدها على بطنها تاكل فِ الفاكهة : حمودي تعالى شوية
هناء شبحتلها و ضحكت : تحشمي قدام يوسف
سنابل نحت ايدها
و محمد جاها : نعم
سنابل تأشر بصبعها : هديكا اللحمة اللي ع اليسار جت في خاطري لأن وليدنا شمها .. جيبهالي
محمد شبح للشواء : مازال ماطابش
سنابل شبحتله : باهي خلي عينك عليها خير ماياخدها اصيل لانه هامع
محمد ضحك و مشي جنب يوسف
______
بعد ساعة 🌹
إلتموا العمام و نساوينهم في الجنان و بدو يتغدوا عَ الطاولة
هناء شادة ميرا و توكل فيها
ميرا ادف فيها و تبي تنزل
هناء رختها : خليك بحداي ميمي
ميرا مشت تلعب على العارف و تناشب فيه من رجله
العارف شبحلها : اهلا بالغالية بنت الغالية
و قامها في غمره
ميرا ضحكت
شبحتله حلومة : ارخيها و تغدا يا حاج
العارف شاد ميرا و يلعب فيها
جاه يزن ولد عصام و بدي يضرب ف ميرا : حولييييي 😡 ديدا متاعي انييييي
ميرا تبكي : اااه 😭
هناء ضحكت و وقفت : امبهدلها بنتي امبهدلهاااا
و خدتها من العارف
مرام : اعييت من الضرب ديما محشمني
عصام : اربطيه ف رجلك باش يقعمز
نجاة : بنتك مدلعة هلبا يا هناء المفروض تسترجل شوية باش تحارب الأشاوس اللي عندنا
ازهار ضحكت : و حتى سنابل بتجيبلنا وليد عاد
سنابل ابتسمت و حطت ايدها على بطنها
وشوشت محمد : البطاطا اللي ف ايدك نبيها
محمد شبحلها
سنابل : جت في خاطري حبيبي
محمد ضحك و وكلهالها
سلسبيل ضحكت : حئهم ؛ عويلة ! نسيبكم قريب يوصل ره
اسماعيل شبحلها : مهاب جاي !
سلسبيل : ايه
اسماعيل : و خيرك ماقلتيش راهو راجيناه
سلسبيل : توا بعتلي مسج و قال انه جاي
احمد فمه معبي ماكلة : لما يجي تو نفتحله
ناضت نجاة : تو انحيله انى خليك انتي شادة ولدك خير مايبدا يمرد و نجرو في جرته
سلسبيل : به
سعاد تشبحلها و ساكتة .. ( يالطيف قداش ترعشي على نساباتك 😒 )
اصيل شبح لروان لقاها شادة تليفونها و تكتب : شن اديري ؟؟
روان شبحتله : تكلم فيا ؟
اصيل : ايه
روان : فاتحة النت
اصيل فنص فيها : سكري البلي و بلا تمهتيك
روان ضحكت ع الجنب : تمرجل على وحدة تانية مش عليا
اصيل علّا صوته : عاودي شن قلتي ؟؟؟؟؟
كلهم شبحولهم
العارف : خيركم ؟؟
روان شبحتله : من اللي سنابل تزوجت بدي يديرلي في الجو لان ماعنداش على من يكسد
العارف : ياسرو انت وياها بلا جو مفرخ
اصيل و روان سكتو
محمد شبح لأصيل : هيا أبرا خيرلك مش كان العمارة فضت تاخد راحتك
أصيل شبحله : مصح وجهك
محمد : وصيتك
أحمد : انى قاعد انى 😠
البنات ضحكو
اصيل : اما مصح وجوهكم يا كلاب
تكنطا و ناض بيطلع
روان تشوفله و تدوي بروحها : ماناقصني الا هالصايع النسونجي
حلومة : خيرك طالع يا اصيل ؟؟
اصيل طلع و ماردش
يوسف يوشوش ف هناء : هيا انوضو حني ؟
هناء شبحتله : علاش
يوسف : سادك من الصبح هني 😉
هناء ضحكت و شبحت للعيلة
يوسف : هيا بيبي مرايف عليك
هناء : باهي راجيني نوتي ميرا و نمشو
يوسف : خليها مع اممممك اما ميرا و هي ديما واقفتلي في كل شي
هناء ضحكت بصوت عالي : و احلى لقطة لما نلقوها مقعمزة تضحك
يوسف ضحك : انى سابقك للسيارة
هناء : تمام به
يوسف وقف : هي انستو بعضكم
السنوسي شبحله : مازال بكري
يوسف : عندنا مشوار
هناء وقفت و شبحت لنجاة : ماما خلي ميرا عندك لبعدين تو نجيها
نجاة : به
سعاد : خليها حتى عندي برو مربوحة
هناء ابتسمت و مشت توتي في روحها
بعد شوية طلعت : هي بالسلامة
ردو عليها العيلة : بالسلامة
__
يوسف فتح باب الشارع لقو مهاب كيف درس و نزل
يوسف ضحك : تي وين تأخير ؟
مهاب : ماكنتش حاط في بالي الجي كان عندي مشوار و تكنسل ف اخر لحظة
هناء : كيف حالك مهاب
مهاب شبحلها : اهلين هناء الحمد الله
يوسف : هي تفضل يراجو فيك
مهاب شبحله : وانت وين ؟
يوسف : هو هداكا حني
مهاب ضحك : مية مية
طلعو يوسف و هناء
و مهاب خش : السلام عليكم
ردو عليه العيلة : و عليكم السلام
و ناضو يسلمو عليه
عماد : تفضل آنستنا
مهاب قعمز جنب سلسبيل و بدي يتغدا معاهم
_
محمد فنص ف روان : البسي وشاح 😡
روان جبدت وشاح و حطاته على شعرها
احمد ناض و طلع الشارع
طه ولد سلسبيل لما شاف مهاب قعد يبكي و يبي يجيه
مهاب ضحك و خداه : تعالى هني يا بابا
و قعد يبوس فيه
سلسبيل شبحتله : و اخيراً جيت
مهاب شبحلها : راهو ماناش معطلين ساعة و بالك
سلسبيل : مسرع انت غر تغدا
مهاب : باهي هاني قاعد قلت مش معطلين بس
سلسبيل : باهي و انت ديما مستعجل
العارف يشوف لمهاب : كيف حال الحاج و باقي العيلة يا مهاب !
مهاب يهمس لسلسبيل : مستعجل عليك يا قليبي
سلسبيل : اجديده يكلم فيك 😳
مهاب شبح للعارف : شن قلت يا عمي ؟؟
فجأة خش احمد يعيط : محمود جيييييييي
ازهار قلبها دق و وقفت : شنووو ؟؟
احمد يصيح : والله الا محمود الله
محمد ضحك و وقف : عطل مفروض واصل من بكري
العيلة كلهم انصدمو و وقفو
خش محمود مربي لحيته و لابس نظارات شمسية و يضحك : السلام عليكم
العيلة فرحوا و جوه كلهم يسلمو عليه و يرحبوا بيه
ازهار اتضبط فيه و تبكي : الحمد لله على سلامتك الحمد لله اللي روحتلي
محمود يضحك : الله يسلمك
روان : احلى مفاجأاااة 😍
محمد غمز محمود : وين ال ... ؟؟؟
محمود اشرله بِ ايده بمعنى شوية بس
و يسلم ع الباقي
سنابل شبحت لمحمد : كنت عارف انه جاي ؟
محمد شبحلها : ايه
_
مهاب وشوش سلسبيل : انى طالع و نخليكم انتو تاخدو راحتكم
سلسبيل : امتى تجيني ؟
مهاب : نص ساعة نلقاك واتية
سلسبيل تساويله ف رقبة سوريته : تمام به
جت اللقطة ف عين محمود بس ماهتمش
مهاب سلم عليهم و طلع
طه بدي يبكي يبي بوه
سلسبيل تسكت فيه : خلاص اسكت بابا شوية و يجي
عماد : خيرك ماقلتش انك جاي راهو جيناك ؟؟؟
محمود : قلت مفاجأة احلى
ازهار تبكي : احلى مفاجأة والله
وقعدت تبوس فيه
محمود يضحك : مازال فيه معاي ضيف
العيلة استغربوا : منو ؟؟
محمود : دقيقة بس
طلع للسيارة و خش
جايب معاه صاحبته اجنبية
العيلة انصدموا و قعدو يشوفو 👀
العمام و العارف يشوفو و ساكتين
ازهار رعشت : هادي منو ؟!
الأجنبية مبتسمة : هاي
محمود : هادي صديقتي
ازهار من الصدمة أغمى عليها و طاحت
العيلة تفركسوا و بدو يفيقوا فيها
الأجنبية خافت و وخرت
محمود يفيق ف امه : امي ؟؟ امي !!!!
ازهار ناضت تبكي : ووه عليا مشي جابلي فرخة صايعة و جييييي وك عليا و كيتي كيااااااااا
محمد : اسكتي يام شن تقولي
ازهار تصيح : طلعوووهاااااا مانبيش نشوفهاااا خدت ولدي مني الشيطانة هادي طلعوهااا
الأجنبية حست انها مش مرغوب فيها و انحرجت
قعدت واقفة بعيدة و تشوفلهم
محمد مد مفتاح حوشه لمحمود : خودها و برا لحوشي اطلع
محمود تكنطا و طلع هو و صاحبته
العمام و العارف يتمتو بروحهم و متعفلقين
** و عماد يسب و يلعن ف محمود **
سنابل حطت ايدها على بطنها : محمد انى مريضة
محمد شبحلها : خيرك ؟
سنابل : نحس في روحي بنجيب
محمد : فكينا منها الدسكة اهيا و انتي بدت عندك زي المضاد نسمع فيها ثلاثة مرات في اليوم
سنابل تتوجع : موقف محمود رعشني و نحس في بطني تلوي فيا
شبحتلها نجاة حست بيها و جتها : خيرك ؟؟
سنابل : لالا شي
نجاة تلفتت لقت ميرا تقطع ف الغرس و تاكل فيه
تعفلقت ومشتلها تجري : عينك عليها يا سعااااااد 😡
سعاد انخلعت و شبحتلها
__
محمد يشوف لسنابل : باهي اطلعي نروحو
سنابل تتوجع : ارفعني للمستشفى مادام عمتي مناوبة
محمد : يعني بتجيبي رسمي !!
و شبح لنجاة
سنابل شدت ف ايده : اطلع و فكني من ماما تو ادير العار في المستشفى
محمد شبحلها و طلع هو وياها
ركبو السيارة و سنابل بدي الوجاع يزيد : استعجل يا محممدددد
محمد طلع بالسيارة متوتر : خيرك حبيبتي فاش تحسي
سنابل تبكي : حاجات مش مفهومة 😭😭
محمد يشبحلها : كيف مش مفهومة !!
سنابل تعيط : وجاع يقطع ف بعضضضضه 😭😭😭
محمد انصدم : شن تقولي انتي ؟
سنابل تعصبت : مانعرفش نوصفففففه
محمد سكت و فتح تليفونه يتصل بعمته ..
_______________________
سلسبيل شبحت لنجاة : ماما ؟؟ سنابل حسيتها طلعت مريضة ؛ توقعيها ماشية للمستشفى ره
نجاة شادة ميرا انصدمت : امتى صاااار ؟؟
سلسبيل : توا كيف طلعت
نجاة مدت ميرا لسعاد : شديها مني
و شبحت لإسماعيل : اسماعيييييييل !!!
_______________________
خش محمد بسنابل المستشفى و لقو امال تراجي فيهم
سنابل تعيط : عمتيييي 😭
امال خدتها و دخلتها لغرفة الولادة
محمد قعد واقف ف الممر و متوتر
قعمز ع الكرسي يهز ف رجله و يفكر
______
سنابل تعيط : مانبيش نجييييييييب 😭😭
امال : افتحي رجليك باش نساعدك
سنابل مسكرة رجليها و تعيط : مانبيش نجيب لا لالا لااااااا 😫😩
امال تعفلقت : سنابل ؟؟؟
سنابل : مانقدرش يا عمتي مانقدرش 😭
امال : ماتخافيش مش حار بالشوية عليك
سنابل تحرك ف راسها بمعنى لا و منهارة : لا لا لاااااااا
نبي محمدددد 😭 ... يا محممدددد تعالالي بنمووووت 😭
امال : اسكتي اسكتي
الممرضات يضحكو 😂
سنابل تكنطت و بدت تضرب فيهم تيروات : اسكتو يا كلباااات 😭😭
امال مصدومة و تشد فيها : اهدي يا بنتي اهدي 😳
سنابل منهارة : محممددددددد 😭😭😭
امال رختها و طلعت لمحمد داهشة
محمد شافها جاها بسرعة : جابت ؟؟
امال : اما جابت يا احميده مرتك خاشة فينا كاراتيه
محمد انصدم : شنو 😳
امال شداته من ايده و دخلاته : خش تبيك
محمد خش لقاها مسكرة رجليها و تعيط
محمد : سنابل ؟؟!!
سنابل شبحتله و شدت فيه : تعالى ديرلي حل بنموت 😭
محمد شدها و يمسحلها على شعرها : اهدي حبيبتي اهدي
سنابل تشوفله و تبكي : ولدك بيطيح مني و انى مانبيش نجيبه افهممممم 😭😭
امال : مش باهي اللي اديري فيه يا سنابل يهديك ربي اسمعي مني و افتحي رجليك
سنابل : نبي عملية نبي عمليييييييية 😩
محمد : باهي حاضر غر اهدي
و شبح لأمال : ديريلها عملية و خلاص يا عمتي
امال : انى غر تخليني نكشف عليها قبل مرات ماتحتاجش
سنابل تحرك ف راسها بمعنى لا و تبكي
محمد شدها من وجهها : اهدي و ارخي روحك حبيبتي ماتتوتريش
سنابل تشوفله و تبكي بالعبرة : الوجاع بس حار امالا الجياب كييييييييف 😭
محمد متضايق عليها : ديري حل يا عمتي
امال تعفلقت و شبحت للممرضات : شدوهالي
كيف الممرضات جايات محمد تكنطا و وخرهم : شن تقولي يا عمتي ؟؟؟ شن نعجة هي !!! كان هي ماتبيش مافيش وحدة تقربها
امال : مرتك تتدلع عليا ماهيش اول ولا اخر وحدة تجيب
و شبحت لسنابل : هيا خليك هادية زي وخياتك يجيبو بالساهل و ماشاء الله عليهم
محمد تحشم و دار روحه ماسمعهاش
شبح لسنابل : باهي خليها تكشف عليك بس باش اتدخلك لعملية
سنابل : به
امال : عملية صعبة راهي مش ساهلة خليك ع الطبيعي خيرلك
سنابل : لالالا العملية مانحس شي مش زي الطبيعي
امال : بعدين بتتعبي هلبا و البونتوات بيتعبوك
محمد وشوشها : تتذكري بونتوات حاجبك كيف حارات ؟
سنابل خافت و عيطت : معش نبي نجييييييييييييييب 😩😩😭
امال : و العملية بتخلي بطنك مشرتعة و مكان الخياطة بيقعد
سنابل شبحت لمحمد و شدت فيه : محمدددد 😢 انت علاش درت فيا هكي يا محمد 😭 ؟؟؟
امال ضحكت
محمد تحشم : اسكتي
سنابل تعيط و تخبش فيه ف صدره : كله منك يا محمد مخليني نتعذب في جرة شهواتك
محمد انصدم و حط ايده على فمها : تي اسكتي النم اسكتييي
سنابل من الوجاع عضاته ف ايده
محمد توجع و جبد ايده : سنابللللل !!!
سنابل : ااااااااه 😩😩
امال فتحتلها رجليها بالغصب و بدت تكشف عليها 😂
سنابل تبكي : ماتمسينيش 😭
امال علت صوتها : حي عليك انتي بادية تجيبي
سنابل عيطت و شدت ف محمد تاني : لااااااااااا 😩
محمد متوتر : خودي نفس حبيبتي
سنابل شبحتله : شن تقول ؟؟؟
محمد : هكي يديرو ف المسلسلات مش عارف
سنابل تعيط و تجيب : اسكت اسكتتتت اسككككتتتتتت ... وووه عليا ووووووه
امال تولد فيها : ايوا ماشاء الله عليك .. اقوا سنابل اقوا بنتي
سنابل متعصبة : شن هو اللي اقوااا !!!!
ااااااه ياماماااا 😩
محمد يشوفلها و مستاجع عليها
سنابل شدت فيه و تبكي : محمد !!
محمد : نعم
سنابل : احميده اشبحلي ؟
محمد يشوفلها : نعم حبيبتي
سنابل : انت بتتغير عليا بعد مانجيب ؟؟
محمد شادها من وجهها : لا حبيبتي مش حانتغير عليك
سنابل تبكي : احلف وقول والله 😭
محمد : والله ماني متغير عليك و حانحبك اكتر من توا .. انتي بتقعدي مرتي و حبيبتي و ام صغاري
سنابل تجيب و تعيط
محمد لفت وجهه للجهة التانية و معش قدر يتحمل
سنابل تعيط : يا محمممممممدددددد
محمد شبحلها
سنابل شبحتله : اول و اخر مرة تقولي تبي صغار بعد هذا مافيش راهووو 😭
محمد متوتر : مافيش مافيش عارف .. عارف .. خلاص توبة
سنابل : توبة ياربي والله ماعاد نعاودوهاااااا
امال شبحتلها : زيدي اقوا يا سنابل
سنابل تجيب : هذا اخر العداد يا عمتي خلااااااااص
امال ضحكت و سنابل جابت الوليد ❤️
امال شداته يبكي : الله يبارك
محمد شافه ضحك وقلبه دق 💓
سنابل سكتت و دهشت
امال مدتهولهم : سمو بالله
محمد خداه منها و يرعش : سنابل شوفي وليدنا محلاه
سنابل داهشة و دوب ماتتكلم : فوتني تواااا
امال ضحكت
محمد : شوفيه حبيبتي
سنابل شبحتله ؛ عيونها دمعو و قلبها دق
محمد : الحمد لله على سلامتك
و باسها ف جبهتها 💖
__________________________
نجاة واقفة برا تراجي هي و بناتها و ازهار و مرام
طلع محمد سوريته بطمها مشركات و صدره دم
ازهار انصدمت : خيرك !!!
محمد فرحان : جبنا وليد
كح و تلخبط : قصدي انزاد عليا ولد
كلهم ضحكو و بدو يباركوله ❤️
__________________________
بعد مرور اسبوع 🌹
العيلة ملتمين في حوش العارف و ذابحين العقيقة
مقعمزين كلهم في طاولة الجنان و يهدرزو و يضحكو
سنابل شادة ولدها ياسين و ساكتة
جي بحداها محمد : شن يدير البرنس
سنابل شبحتله و ابتسمت : كيف رقد
محمد : اليوم ليك اسبوع خلاص لازم نروحوا
سنابل : ايه عارفة حتى انى استاحشت حوشي
محمد يهمسلها : حوشك بس ؟
سنابل ضحكت
خشت مرام كانت ف حوش اماليها
جت سلمت على سنابل : بطول عمره العسول
و طبست عليه تبوس فيه
سنابل : سلمك
مرام شبحتلها : عقبال بنية ان شاء الله
سنابل : لالالا ان شاء الله فيك
مرام ضحكت : ان شاء الله
و قعمزت بحداها
هناء شادة بنتها و تهدرز مع امها و نساوين عمامها
ميرا تفك في روحها تبي تنزل و تمشي ليوسف
هناء رختها : بري اسحنيه شوية
يوسف مقعمز جنب هناء
ميرا مشتله و شدها ف غمره و هو يهدرز مع العارف
يوسف : فهمتني كيف ؟ قلت نخليها توا فاضية نديرلها سور و نحفرلها بير و نبنيها بعد وقت مازال مش متضايق
العارف : حتى هذا راي ؛ المهم عندك على شن تولي
يوسف : و انت قلتها يا جدي
ميرا شبحتله و قالت : جدي
يوسف ضحك : عاوديها
ميرا ضحكت : جدييي
العارف : قولي حوش جدي
ميرا : اوش جدي
و تأشر بصبعها ع الحوش
العارف ضحك : ماشاء الله تفهم بدت
يوسف : هاذي تعرف حاجات لين تنصدم فيها
و شبحلها : حوش جدييي
ميرا تضحك و ترد وراه
يوسف شبح للحوش و تنهد : حوش جدك يابنيتي
فيه العم و فيه العمة
و ليك فيه الخال و فيه الخالة
فيه كبرنا و فيه ربينا
فيه ضحكنا و فيه بكينا
فيه جديده و فيه امّيمه
و فيه عيون تعز علينا
حوش جدك ياوديده
فيه ساس كبير
و فيه الفل مع الياسمين
حوش جدك يابنيه
فيه و فيه و ياما فيه
و مانقدر حقه نوفيه ❤️
و باسها ف خدها
العارف مد ايديه و خداها منه
شافها يزن ولد عصام عنده جاها يجري يجبد فيها من شعرها
ميرا تبكي 😭
يوسف شبحله و شدله ايديه : نفد صبري عليك يا يزن راهو 😤
و شبح لعصام : تعالى دير حل لولدك
عصام شبحله و ضحك : مكبد هذا ماعندي مانديله
يوسف و هناء شبحو لبعض و زرتهم الضحكة ❤️
___
محمود يهدرز مع اصيل : تسقدت من تاني يوم
اصيل : بالله عليك ؟؟ كيف كنت بنقولك علاش ماجبلتيش فردة معاك
محمود ضحك : تي هي وحدة و شوف العار الي صار على خاطرها
اصيل : امتى مولي بريطانيا
محمود حك لحيته : بعد اسبوع
أصيل : مليح بكل
جي احمد بحداهم : بنكمل الاعدادي و بنجيك يا محمود
محمود شبحله و ضحك : تعالى ايه
احمد : باش حتى انى نروح بوحدة مليحة زي مادرت 😍
محمود عطاه عنفقة : طارت من تاني يوم يا معلم
اصيل شبح لنجاة لقاها شادة طه ولد سلسبيل
ضحك : يا حناااااي 😃
حلومة شبحتله : نعم ؟
اصيل : لا انتي امّيمه نقصد ع اللي جنبك
نجاة فنصت فيه و حمقت : قتلك معاش تقولها ولا !!
اصيل ضحك : هاذي الحقيقة انتي حنه توا
نجاة مش عاجبها الكلام شبحت للجهة التانية و ماردتش عليه
طلعت سلسبيل من الحوش
نجاة فنصت فيها : وينك مسيبة ولدك من بكري ؟
سلسبيل خداته منها : كنت ف الحمام
روان وقفت و فتحت تليفونها : هي خلونا ناخدو صورة جماعية 😍
كلهم ساووا روحهم و شبحولها
وقفت روان فوق كرسي و خدت سيلفي 📷❤️
شبحت الصورة : وواك يا اجديده انت طلعت مطبس ع الراديو 😔
العارف شبحلها و علّا صوت الراديو على اغنية يابيت العيلة يا عالي ❤️
يا بيت العيلة يا عالي
يا عاااالي
يا مظلل بالحب
يللي فيك اجتمعوا عيالي
بالروح و بالقلب
....
فيك التمينا و عرفنا
معنى الحب سنين
عشنا في ظلك بعواطفنا
ديما فرحانين
....
جامع كلمتنا .. يا عالي
سر سعادتنا .. يا عالي
امفرح عيلتنا .. يا عالي
و فيك القلب اطراب
....
نرجع نلقى فيك الراحة
بعد تعب نهار
العيلة في ظلك مرتاحة
فيه ود مع الجار
....
احنا احبابك .. يا عالي
كبرنا في اجنابك .. يا عالي
و عشنا ع الحلوة و المرة
جامعنا بالحب
يابيت العيلة ياعالي .. يا عالي ؛ يا مظلل بالحب ❤️
النهاية 🌹
لن أسمح بنقل الرواية دون ذكر المصدر ‼️
_________________________
نعتذر جدا ع التأخيرو ان شاء الله تكون النهاية عجبتكم و كانت كيف ما انتو تبوها 💕
شكرا هلبا على تعليقاتكم سواء ان كانت نقد او مدح 😘
_________
و توا نبي كل من قري الحلقة يدير لايك و يكتب رايه فيها باش نعرف كم شخص تابع الرواية 💋❤️
Masarra Osama ✨