الـسـلامُ عـلـيـكـم🌻🌼
هشاشة قلب
الــبــارت_2_
الكاتبه_العباديه
alabadyia_09
"فــي ذُهـنـي زهــراتٌ صـغــيـرة
ترقص كـأنهـا كلماتٌ في فـمٍ أخـرس."
~~~~~~~~~~~~~~~~~~~~~~~~~~~~~~~
ثُرى
إجه إسماعيل عليه واخذني تمشينا للشارع علمود نصعد بالفورتات ورجعنا للبيت لگيت امي محضره الغدا وتقوى گاعده تفتح بالخضره وتطلع الذابل منهه.. سلمت ورحت بدلت واجيت يمهن اساعدهن طلعت المواعين وغسلتهن وغسلت الرگي وشيفته.
سألت تقوى
- اكلج تقوى اليوم شعجب ممداومه؟؟
وجهه محتقن حيل وضاايجه وبس تتصفن كالت بدون مبالاه
- هيج عجبني اجرب الغياب
- يا.. يعني مو إجازه غياب؟؟
دنگت وجرت حسره
- إي غياب وماعدنا إمتحان كله تملعب
- اروح وياج لحفلة التخرج
- ممم افكر اخذج لو لا
طفرت يمهه واتوسل بيهه
- عليج الله اروح وياج فدوه بلييزز
- يلا اخذج خطيه خل اعيشج اجواء مو متعجبه بالكليه مالتكم .. والله كريم عود لان بعد هواي للتخرج
- فدوه رحتلج المهم اروح عسى ما ابقى سنه منتظره
اجت مروه من الدوام والسنه سادس وتعبانه وبس تتذمر والولد هم اجو بس نهى للآن ماكو !!
حتى موبايل ماعدهه نتصل بيهه !!
امي ظلت قلقانه وماذكّرت الولد لان يتغدون وناسينهه عبالهم اجت ونامت مثل عادتهه. بس أمي وجهه أصفر وكلساع تباوع للباب.
تغدينا وبس القلق على وجوهنا امي كالت ربع ساعه بس ينامون الولد اطلع ادور عليهه.
انتظرناهم ينامون وحضرت لاامي عبايتهه وجواريبهه.
توهه امي لبست تريد تروح تدور عليهه ودخلت نهى وجهه أحمرر وتلهث .. شالهه مخربط وخدهه بيه طبع أصابع !!
إختلسنا كلنا گمنا ركضنالهه امي ظلت تدگ على خدودهه وهيَ تبچي ومنهاره وايديهه ترتجف بعنف ..
- ولج احچيلي شبيجج
بس تشهگ وتبچي ومبينه مصدومه !! كلنا ظلينا نبچي لبچيهن هيَ وامي ..
امي تضرب بيهه وتكلهه احچي وهيَ سكته وبس تشهگ.. لما امي داخت وتخربطت هيَ ظلت تنوح وتدگ وترررجف.. ركضت جبت مي وعطر شممناهه وسويت لبن مالح ع السريع شربناهه يلا شويه كدررت تصحى.
كالتلهه
- نهى اذا هاي جيتچ وماوياج شرفج ف جيبيلچ سچينه وتعالي اغرسيها بگلبي كلشي ولا هاي اموت والله
نهى شهكت بصوت عالي وحضنت امي وتبوس بيهه بكل مكان وتشمهه وتبوس بإيدهه كلنه خفنه من حركتهه هاي. خو اني مابقى بيه قطرة دم .. تبوس بأمي وهي تردد
نهى.. والله شرفي محد لامسه ماما ماسوالي شي والله بشنو احلفلج وتصدگيني ماخليته يطخ شرفي وولا وصللي
- چا شبيچ يمه؟؟
- انصدمت لان اول مره امر بهيج موقف
- سولفيلي الموقف
دنگت وظلت تبچي.. امي هزتهه حيل
- نههههههى سولفيلي خل اشوف شصاير
فلتت شالهه ونزعته !! وكأنما تگوللنه هـٰذا الصاير. !!
طلعت رقبتها صايره بنفسجي وكلهه طبعات أسنان مال عض وآثار مُقززه !!
آني شهگت وحطيت ايدي على حلگي من شفت المنظر خفت حيل وبس ابچي واخواتي هم نفس الشي..
امي تظاهرت القوه وگالتلهه
- متأكده بس هذا الصار؟؟
- اي اي والله بس هذا
- ومنو هذا السوه بيج هيج؟؟؟
دنگت وتشهگ
- هددني بس احچي يفضحني
- صخاااام ليش شمسويه وياه؟؟؟؟
- ماما والله ممسويه شي بس لان راد يتقدملي وگتله مابقى بس سنتين واتخرج وبعدهه اتقدم وهوَ تخبل وهجم عليه يگلي بعد مااتحمل.
- تعرفيه؟؟
بجت وغطت وجهه بإيديهه الناعمه.
- ماما فدوه لاتستجوبيني اني اسولف كلشي لثريا وهيَ تسولفلج والله أستحي
- اخخخ يگلبي اخخخخ لو مامتأكده من تربيتج شنو جان ماصدگت بحچيچ
- لا والله كل كلمه حچيتهه صحيح
هزت راسهه بقبول وصوتهه مخنوگ والعبره تتكسر بحنجرتها.
- ادري ادري
طلعت امي واخذت البنات وياهه علمود ماتستحي تحچيلي.. دوم أسرار اخواتي عندي بس مروه ماتحچي كتومه بينما تقوى ونهى كلش اني وياهن واكثر شي ويه نهى.
اول ماطلعن حضنتني حيل حسيت ضلوعي تكسرن وتشهگ وتبچي
- ثريا آه گلبي يوجعني
- اسم الله عليج اذا هالموضوع يزعجج لتسولفيلي خليهه بعدين
- لا لا اريد احچي اريح گلبي راح اموت
- سولفيلي
- شلون احچي واني ضامه عنج صار سنتين !!
- شنو شنو سنتين؟؟؟؟؟؟
- اي سنتين ثريا اني اول مره بحياتي اضم عليج وهوَ هذا الموضوع !!
- ليش؟؟؟ يايوم سولفتيلي وحچيت المفروض تحچيلي حتى انصحج
- غلطت غلطت
- سولفيلي.
- اي اسمعي
نهى.. اول يوم داومت بالكليه ظلينا نفتر اني وصديقاتي لان هنَه نفسهن الي بالاعدادي ماتفارقنا بالكليه ف چانت عندي صديقتي موج اجتنه نقل بالخامس إعدادي من بغداد بس انتقلوا للناصريه علمود اخوهه طلع إسمه هنا ف تعلقت بيهه كلش وكلشي اسولفلهه صح مو من مستوانه بس ماحسستني بشي ابد ..
طيبه وخلوقه لبسهه كله مستور رغم راقي الى ابعد درجه يعني تناسب شخصيتي حيل.
ظلت تسولفلي اسرارها واسولفلهه لان ماچان عندي اسرار بس حياتنه اليوميه.
هيَ تحب إبن خالتهه مرتضى وهوَ يحب ابن عمته تكدرين تكولين حب من طرف واحد.
دائماً تاخذ نصائحي وتصبيري الهه لان كلساع تريد تروح تعترفله واني اگلهه لا سمعة اخوانج اهم.
بيوم من الأيام عزمتنا على طلعه بالمطعم يعني شلتنا كلهه وامي تدري واهلي كلهم يعرفوهه وافقت أمي لان تثق بيهه وبأخلاقهه وصار سنين اني وياهه.
طلعنا من الكليه وويانه مجموعة بنات.
وگفنا وإتصلت موج بأبن إخوهه شويه ووگفت سياره ستاركس فخمه وتلمع من النظافه.. إنتبهت للسايق ملامح رجوليه بارزه شعر ناعم وبشره حنطاويه .. لحيه سوداء وشوارب خفيفه ..رموش كثيفه قصيره ..وذقنه المربعه المشقوقه .. ووجهه المزدان بغمازتين على كل جانب.. عينيه الجريئتين الحانيتين وتكوين عضلي كتمثال أدونيس مرتدي تيشيرت ملتصق على جسمه زايده إثاره ..
التفت شافني صافنه بيه رفع حاجبه وخزرني .. يبو شصار بيه متت من المستحه رأساً نزلت راسي وصرت وره ظهر موج الظاهر نسيت نفسي وسرحت بخيالي وعيوني مركزه بيه.
مد راسه من الجامه وصاح لموج
- لج موجه يلا ماتصعدون
- اي جايين بس خل تجي طحيله
( قصدها صديقتنه طيبه)
- هههه شهالمصطلح تعلمتي تحجين جنوبي
- اي يابه اربع سنين مو قليلات
- ديلا صعدوا.
صعدت موج بالمقدمه ولزگت بيه الا أصعد يمهه واني استحي من هذا شلون بيه كتلهه لا مااريد.
كوه شلعت روحي منهه وصعدت وره صار كرسيي وره كرسيه. اني اباوع من الجامه بس اكعد يمهه اصفن
كعدت من صفنتي على صوت موج كالت
- اعرفكم إبن أخويه الكبير.. وليد.. سوواني عمه واني بعدي بشبابي
الهوىٰ صار يحمل رائحة رجوله من تكلم بصوته الرخيم ..
وليد.. هههه اني شعليه روحي حاسبي اخوچ ومرته لعبوا طوبه
- يا.. هههه ولا تگعد بس الا من ارجع اگوله عليك
- گولي
ظلت السياره تمشي بينه وكلساع احسه مركز عليه بالمرايه الجانبيه.. اتحسسه بطرف عيني بس ماارفعهه.
طول الطريق ظليت هاديه لما من ردنا ننزل صفن بالمرايه واجت عيني بعينه.. مباشرةً نزلت ع السريع ومرتبكه على مستحيه من الفشله هسه يگول كتلت روحهه عليه بس اني صفنت بيه متفاجئه بشخصيته..
كعدنا بالمطعم والاكبر من هذا حضرة جنابه نزل ويانه يعني بالمختصر خربت العزيمه لان استحي آكل مقابيل رجال.
لگمتي الآكلهه العصفور ياكل اكبر منهه.ولازم شويه نتظاهر بالرقه والانوثه.
خو البنات طاحن ميتات عبالك ماكو اكل .. يعلفن وماكو احترگ گلبي ردت اعيط بيهن بس اخخخ من هذا ابو حاجب.
هوَ هم ياكل إعتيادي بس كلساع يرفع نظره عليه وترني حيل.
خلصت اول وحده ورحت غسلت ورجعت لمكاني.
كملن البنات ورجعنا.. إفتر بيهن كلهن كل وحده بباب بيتهه . طيبه بيتهم يم موج ف نزلن سويه وبقيت بس آني !!
لزگت بموج وتوسلتلهه ماابقى وحدي وياه وجانت اجابتهه..قابل ياكلج.
طول الطريق افرك بأصابعي وادعي يمر هاليوم بسلامه.
رفع نظره بالمرايه عليه وگال
- شبيج خايفه تره مراح اخطفج
حجيت بصعوبه
- آآءء.. لا لا بس تأخرت وخاف اهلي يحاسبوني
- اها.
سكت شويه ورجع كال
- إنتِ شنو إسمج؟؟؟
ردت اگله ليش ولاتتدخل بس كلت النوب يعصب وشو وين ياخذني.
- نهىٰ
- عاشت الاسامي
سكتت.
- عاد كولي انتَ العايش
كلت بهمس
- انتَ العايش !
ضحك بصوت عالي وهمس بصوت سمعته
- شگد فطير لخاطر الله هههههه
وصلني لباب بيتنا حسب وصفي اله وقبل لاانزل كال
- عود إسألي مو تگطعين !!
ياا شبيه هذا اشو سريع التفاعل. هوَ إنتَ شوكت عرفتني شوكت عرفتك شوكت سألت عنك حتى مااگطع دطير.. ولو منين يجيب جناحات ويطير.
ثاني يوم بالكليه كاعدين كلنه وويانه موج ووحده تشرح للثانيه مسائل.
حسيت شخص واگف يمنه رفعت راسي ولگيته كاشخ لابس قاط رسمي وطاگ النضاره الشمسيه والساعه الرجاليه والشعر مشسوره ورافعه والعطر ينشم على بُعد عشر أمتار ..
سلم والبنات ردن اني سلمت بس همس يعني ماسمعني.
مد راسه لجهتي وكال
- ع الاقل ردوا السلام
سكتت.. شكد لزئا هذا البشر.
ظل يسولف ويضحك وي البنات وهنه مامصدگات صاك وإجاهن للحلگ.
كال بتلعثم
- آآءء.. نهى ممكن خمس دقايق من وقتج !!
رفعت راسي مستغربه هذا يحجي وياي؟؟
اي اي اكيد وياي محد غيري اسمهه نهى .
كتله بحزم
- لا مو ممكن جاي اقره عندي إمتحان بعد شويه
إنحرج وإبتسم إبتسامه كاذبه وأشر لموج
موج.. روحي شوفي شيريد
التفتت عليهه وخزرتهه خليتهه تنلصم وتدنگ وگفت وكلت بصوت قريب للهمس
- مع الأسف
مشيت بعيد عنهم وظليت اغلي من الحرگه شنو معنى هذا التصرف يعني تدري بإبن إخوهه ومطابگته عليه !!
اكيد متفقين أثنينهم.
سمعت صوته يصيح وراي
- نهى نهى بس لحظه
التفتت وضغطت أسناني حيل
- الكليه منا روووح
- رايح بس حبيت اكلج تره موجه ماتدري بيه والله العظيم بس هسه من شافت نظراتي الج فهمت واني ممسوي شي رايدج وجاي اسألچ اذا تقدم توافقين لو لا؟؟
- مااوافق ولا اي شي وموج حسابي وياهه بعدين معليك انتَ
خليته ورحت للقاعه ومشاعري مضطربه للحظه تندمت لان هنته بهالطريقه اكدر ارفض بطريقه حلوه بس طلعت هيج ماادري يمكن لان عبالي متفقين هوَ وموج وع الاساس غدرت بيه صديقتي.
واذا هيج يريدني ليش مايجي لااهلي وموج تعرفنا مو يجي يسألني وبعدين انطيني رقمج نتعارف وبعدين يلعب عليه بس هوَ حلو اوف شو گمت افكر بيه حتى الدرس نسيته.
خلصت امتحان وطلعت لكيت موج منتظره بباب القاعه اول ماكملت ركضت عليه
موج.. نهى خل افهمج والله العظيم مامتفقين ولاببالنا شي من غمزلي وأشر عليج اني عرفته جاي علمودج وخصوصاً من حچه وياج عرفت شيريد منج
- مااصدگ وگلبي يلعب خليني فتره اسولف وي مخي وبعدين اقرر اصدكج لو لا
- لازم حضرتج بنت العبادي
- له له أصير بنت اخوه
- لا صدك نهى مااتحمل زعلج
- اعذريني مااكدر هسه كلبي ملجوم منج
دنكت وراحت .. ياا شبيهه هاي شنو مايحقللي اتعزز لو مااستاهل.
رحت للكافتريا اكلت لفه ووكفت بلعومي تذكرت موج كل مره ناكل سويه.
اخذت لفتين سفري وطلعت ادور عليهه.
امشي وأهبت وطايره طيور لما لمحت ظهرهه ركضت كعدت يمهه وضربتهه على ظهرهه بقوة إيدي وكتلهه بصوت عالي
- تعالي ولج اللفه وكفت بزردومي علمودج حقيره
التفتت والگاهه مو موج بس لابسه مثل لون ملابسهه ... لااااا ماهذا؟؟؟؟ ياگاع انشگي وبلعيني.
كالت البنيه بعياط
- ظهري خسفتيه شببييج ليش هيج تضربيني؟؟
- اسفه اسفه والله عبالي صديقتي
- اذا هيج تعاملين صديقتج ف الله يساعدهه عليج
- ياا.
راحت البنت واني واكفه بمكاني واسب بيهه بگلبي. كله من وراج يموج مال انطيج صميم اليصمج ويطمج مو مال لفه.
التفيت ورجعت ولاحظت بنهاية الحديقه بنيه تشبه موج بس لا مو هيَ والنوب اتفشل.
رحت تقربت منهه بس البنيه مدنگه وإيديهه على وجهه كأنما تبجي !
وگفت يمهه صافنه اي هاي موج
- احممممم احمممم
رفعت راسهه عيونهه حمر ومورمات من البجي وهيَ ملامحهه ناعمه وحلوه بسرعه يبين بيهه البجي وخشمهه يحومر مو مثلي حتى لو اشبعه ترگص مايصير احمر.
شافتني وزادت بجي .. كعدت يمهه ولزمتهه من متنهه
- موج شبيج ؟؟؟
- كله من وراج !!
- شنو شنو شعليه اني شكو شصاير اهلج بيهم شي مرتضى محاچيچ؟؟
- ليش زعلانه عليه؟؟
- احم احم اتعزز وبكيفي
- وماكلتي صديقتي شلون تنام بالليل؟
- بس لا تبجين عليه؟؟؟
رجفت شفتهه وبجت
- اي
هيَ كالت اي واني اريد اسكت ماكو شبعت ضحك ماادري ليش . مسحت دموعهه وضربتني بجنطتهه ووكفت
- عاذرتج ماعندج إحساس
- ههههههه وج هذا اللطم كله عليه ايبااخ هنيالي عمي
- جمعتلج إحساس بعلاگه تردينه هسه انطيجياه لو بعدين؟؟
- هههه لا بعدين بس ماصدك تبجين علمودي
- ولي ماابجي عليج بعد
كمت وسحبتهه حضنتهه وابوس بيهه
- فدوه لله شكد احبج
- هههه والله معليه بوليد صدكتيني لو لا
- مصدكتج من البدايه بس احب اتعزز شويه
- خيولي حقير كلشي ولا يخربني وياج
- بس والله صاك خرب
- هوَ عائلتنه كلهه صاكين (وتغمزلي)
إقبلي بيه خل اصير عمتج عليج الله
- انجبي وانلصمي
مر إسبوع ووصلتني رساله قريتها مكتوب بيهه
- نهى اليوم راح نجي اني وأمي نخطبج شئتي أم أبيتي
.. وليد
قريتها وصفطتها خليتهه بجنطتي وكتبت وحده جديده وخليتهه بالمكان الي لگيت بيه الرساله
- لاتجي وتتعب نفسك بس أمك تتفشل خطيه إحتمال چبيره بالعمر والنوب من تتفشل بعد ماتخطبلك مدى عمرك ف لتدز ولا شي كلهه محاولات فاشله وللعلم أهلي ميجبروني.
حطيتهه بنفس المكان ومتأكده جاي يراقبني.
خليت ومشيت .. ظل إسبوع يوميه يدز رسائل غزل واني اقره ومااجاوب التعجبني احطهه بجنطتي والماتعجبني اخليهه بمكانهه اليحطه بيه ع المصطبه النكعد عليهه اني وموج جوه الشجره.
تعودت على رسائله .. اول ماادوام اروح اركض اقراهن.
اليوم رحت متحمسه وطايره اريد اقره الرساله لگيت ماكو شي !
دورت بالگاع ومنا ومنا ماكو !
ليش ماكو رساله اليوم شنو التغير معقوله مل مني ؟!
ثاني يوم هم نفس الشي اروح ادور وماكو !
تعودت على رسائله وعبالك مفتقده شي بلياه. كمت اطلع الرسائل الاخذتهم واصفن عليهن وافكر ببالي ليش ماكو هالايام.
ظل إسبوع ماكو رسائل واني ماامل يوميه ادور بنفس المكان.
الا أن رحت ادور وبكل لهفه عسى ولعل الگه شي منه ع الاقل يطمن گلبي عليه ومايخليني بهالتوتر خاف صاير عليه شي !
ظليت ادور ودنگت جوه المصطبه وعلى جانبيهه وسمعت صوت رجالي وراي فززني
- عليمن تدورين؟؟؟؟
جمدت بمكاني وخايفه التفتت والگاه هوَ واتفشل هسه شيگول !!
التفتت مُرغمه ولگيته لازم الرساله بإيد والأيد الثانيه مصبوبه ومعلگه برگبته ! من شفتهه گلبي انعصر واحس دمعت عيوني.
رفع الرساله بإيده وكال
- أمل صغير ماانطيتيني وهسه تدورين على رسالتي ليششش؟؟
دنكت وگوه نطقت الكلمه
- شبيهه إيدك؟؟
- يهمج ايدي انتِ لو يهمج ماسويتي هيج بيه !
ظليت مدنگه
- نهى اني مستعد انتظرج طول العمر بس انطيني امل ولو صغير
- إسمعني اني رفضتك مو قصوراً بيك لا .. الله شاهد عليه رفضتك لان اولاً انتَ مو من مستوانا وخاف بعد يومين تعيرني وهاي حچاية امي وثانياً اني منتظره اكمل كليه واتخرج يلا افكر بالزواج لان هسه لاغيه الفكره من بالي نهائياً.
- مستعد انتظرچ اربع سنين شتكولين
- بس ماكو اتصالات وهيج
- لا هيَ نفسهه بس هاي الرساله لان ماعندج موبايل ومن ننخطب اشتريلج عود
- ان شاء الله
- ومن تطلعون للمطعم اني اوصلكم واشوفج
رفعت حاجبي
- ها صارت بيهه مطعم؟؟
- ههههه غير انتن قطيتني بروحتجن للمطعم.
بقينا على الرساله يحطهه ويروح واني عليه بس آخذهه ومرات عود ارد عليه بشعر بسيط اني مألفته تعلقت بيه حيل وهوَ هم وأبد ماحاول يتقرب عليه لو يشوه سمعتي حبه طاهر ونقي..محد يدري بس موج وعرفت من صرت بالمرحله الثانيه وظلت تحجي عليه لان سنه كامله وماگايلتلهه.
بيوم من الأيام تمرضت وماكدرت اروح للجامعه ف غبت إسبوع كامل مادوامت وظلت المحاضرات تتراكم عليه من داومت كلشي ماكو ولاطگه حتى إمتحان أجلته ماگدرت أمتحن..
موج.. تعالي وياي لبيتنا اليوم نسوي حفله صغيره لرسل انخطبت وراح اسويلهه حفله على حسابي وهم استنسخلج المحاضرات وانطيج عندي ملابس جديدات
نهى.. زين بيش الساعه الحفله؟؟
موج.. بالـ2.. مانلحگ تروحين لااهلج ف اطلعي وياي واني اتصل باسماعيل واذا ماكو ادزله رساله .
دائماً موج تستنسخلي ملازم لان عدهم طابعه واستنساخ ف موفره عليه مصاريف الاستنساخات وتدري بحالتنه مااكدر وهم تنطيني ملابس..
بالعاده اي لبسه تشتريها ماتعجبهه تنطيهه الي بس اني عزة نفسي متقبل ف اجمعلهه يومياتي وبنهاية الشهر انطيهه مبلغ قليل للملابس وهيَ دائماً من اسألهه ع السعر تخفضه حيل اذا سعره الفستان بـ50 تگول بـ10 !
واني ادري بيهه هيج تسوي وعاتبتهه بس تكول لان لبسته مرتين واحنه اخوات مابيناتنه ملابس وشي واني هم اخذ من محل اسماعيل مكياجات وانطيهه ولو مو ماركه بس تاخذهن ماتردني..
إجه السايق مالتهه واني وياهه رحنه لبيتهم دائماً اجي عليهه وتجي عليه عادي بس هالمره ماادري أعمامهه عدهم لان بيتهم بعيد عن اهل موج ف ماتوقعت ابدد.. وهم إحنه 5 بنات
وصلنا ودخلنا للمطبخ لگينه الخدامه تشتغل بنكلاديشيه جايبيهه وياهم من بغداد لان يأمنون بيهه وخوش تنظف.
سلمنا عليهه ودخلنا للصاله كالت
- انزعن شالاتجن محد هنا
نزعت شالي لان محد ببيتهم اخوانهه عازلين كل واحد بيته حتى المامتزوج بيته وحده وبأرقى منطقه بيتهم بيه بس امهه .. وابوهه يداوم قاضي ببغداد يجيهم مره كل شهر.
رحنا لغرفتهه استنسخت الملازم وظلت تطلع بالملابس ونگدر اني وياهه علما البنات يحضرن الطاوله.
أنطتني فستان لونه أزبري غامق صدره صاير مثلث يوصل لبداية البطن وحمالاته بيهن عرض ومن وره هم مثلث بحيث نص الظهر مكشوف.
والباقي تور بس مبطن يوصل للركبه.
موج.. إلبسيه بشرفج خل اشوفه عليج
- لا وين البسه عود بالبيت اقيسه هسه استحي البسه مقابيل البنات
- عليج الله البسيه هنه كلهن صديقاتنه قابل غريبات .. وعلي يفلشش هسه تطلعين صاروخ وانتِ جسمج يجنن تكسريهن
- ههه حمستيني
- دالبسي وخل نتمكيج نتونس شويه
- بس خابرتي اسماعيل؟؟
- اي اتصلت وماكو ف دزيتله رساله
- هاي هيه هوَ يشوفهه
لبست الفستان وحطتلي مكياج بلونه وهيَ هم لبست فستان مثله بس لون ذهبي.
صفنت بيه وكالت
- عوزج بس ورده بشعرج تطلعين فول ستايل
- هوَ اني فول ستايل هههه
- رايحه اجيبلجياهه طلققه
- لج تعاي وين رايحه
ركضت بسرعه وسدت الباب. بقيت وحدي اباوع على نفسي بالمرايه واتأمل بجمالي المطمور. جابتلي ورده واكسسوارات .. لبسناهن وطلعنه سوينه حفله بسيطه وضحكنا وسولفنه وراحن البنات وصلهن السايق مالتهه بقيت بس اني هيَ توصلني .
موج.. تعالي انطيج الشغلات حتى نوصلج
- ديلا بسرعه تأخرت
رحنا للغرفه وطلعت الملازم والملابس
موج.. خل اروح اجيب الموبايل نگص صور
- لا لج اخاف من الصور
- بس اني وياج قابل شخص غريب لو متثقين بيه
- اني وياج واحد
راحت تجيب الموبايل مالتهه واني ظليت اعدل بمكياجي.
شويه وانفتح الباب بهدوء . تقربت ع المرايه اباوع على نفسي وكلت
- يلا ولج وين وليتي مو گتلج تأخرت
صدع بإذني صوت رجالي خشن وبيه لمسه من الخدر .
- شنو هاي طالعه تجننين اكو احلى من هيج بعد ؟؟
الخوف دب بجسمي وصرت ارجف لان كل اثنين ثالثهم الشيطان.
التتفتت عليه والخوف مالي جسمي. واني اشوف جلده متقرّح بغرائزه البدائيه تفوح رائحتهه لتندثر ..
يتبع...
توقعاتكم
alabadyia_09
عـبـرات الـعـبـادي🌻🌼
النشر يومي الساعه ١١ بالليل