روايــة #صغار_العم
الــحـلـقــة الــرابــعـة و الـعــشــرون 🌸
و مـاقـبْـل الأَخــيــرَة ‼️
يوسف طلع الجنان بيفتح لمهاب
لقي محمود حركله حواجبه
فتح الباب لقي مهاب واقف يراجي : ها خونا ؟
مهاب شاد ورد و بوكس حلويات
_
محمود يشوفله من داخل و ساكت
خشو مهاب و يوسف
يوسف : تعالى سلم على نسيبنا الجديد
محمود انصدم و برمت بيه الدنيا
مهاب جاه و سلم عليه
محمود يسلم و ساكت و مصدوم
طلع للشارع متضايق و قلبه مغصوص
شاف لايده مجروحة خنقاته العبرة و عيونه دمعو
قعد يتمشى في الشارع و يفكر ..
رشف خشمه و عض فمه : يا انى يا هو
__________________
مهاب خش لصالون حوش سلسبيل مع يوسف و قعمزو
______
هناء مع سلسبيل في الدار : علاش تبكي ؟
سلسبيل تمسح في دموعها : مانبكيش
هناء تشوفلها
سلسبيل رشفت خشمها : اصيل جي ؟
هناء : طلع من بكري قال يقعد معاك يوسف لما مهاب يخش
سلسبيل : احسن
هناء تشوفلها و ساكتة
سلسبيل وقفت ع المراية ادير في بودرا باش اتدرق مكان الدموع
هناء : قوليلي علاش تبكي ؟ ..؛ مهاب و جي يخطب فيك شن تبي تاني
سلسبيل غمضت عيونها : هناء خلاص
هناء سكتت
سلسبيل عدلت مكياجها و شبحتلها : تمام وجهي ؟
هناء : حلو
سلسبيل ابتسمت
هناء : اما انتو جو عليكم ؛ مدايرين مقابلة شرعية على اساس ماتعرفوش بعض يعني 😏
سلسبيل ضحكت : باش بابا و اصيل مايشكوش
هناء : اكيد بابا مورقلك من الكلمة اللي قلتيها لماما
سلسبيل : بالسيف ياوخيتي كان ماقلتش هكي راهي مستحيل وافقت
خشت عليهم نجاة : مازال ؟؟
سلسبيل شبحتلها : شوية و نطلع
نجاة : مادام امه ماجتش انى بننزل لوطا فيا ماقعدت
سلسبيل فرحت : باهي انزلي
نجاة فنصت فيها : تلبسي وشاح على شعرك تطلعيله هكي نهارك اسود
سلسبيل : حاضر ماما 🌚
هناء ضحكت
نجاة طلعت من الدار و نزلت
هناء شبحت لسلسبيل : يوسف مش حايخليك تطلعي هكي
سلسبيل : لالا تو نلخبطه
هناء : كانك قدرتي
سلسبيل : باهي اللي ماجتش ام مهاب مبرد دمها
هناء فنصت فيها : من توا هكي 😳
سلسبيل : والله هذا الحق ؛ يوم اللي جتنا طول الوقت تفنص فيا من فوق لتحت لين وترتني مش ناقصة ترا
هناء ضحكت : نمشي نوتي الضيافة و انتي اطلعي لعريسك شحورتيه
سلسبيل خدت نفس و ضحكت : به
__
يوسف طلع من الصالون يدور في سلسبيل
خش للمطبخ لقي هناء اتطيب في القهوة
جي من وراها نفخلها شعرها بالشوية
هناء انخلعت و شبحتله
يوسف يهمسلها : وينها اللي تناشب و تهرب ؟
هناء ضحكت و وخرت : اوسيفه عندنا ضيف مش وقت تناشيب
يوسف شبح للباب : امك وين
هناء : نزلت لوطا
يوسف حك لحيته و ضحك
هناء : خليني نحط الضيافة و بعدين نهدرزو باهي ؟؟
يوسف قرب منها : لا مش باهي
هناء وخرت ع الطاولة : يوسف فكنا من تهورك مش وقته
يوسف قرب اكتر و هناء اتكت بمرافقها ع الطاولة و هي توخر ف راسها منه
يوسف واقف قدامها و مطبس عليها : علاش توخري
هناء قلبها يدق : لو سلسبيل تخش علينا شن موقفنا !!
يوسف حاط ايديه ع الطاولة و مقرب منها : موقفنا موقف رومانسي يا بيبي
هناء ادف فيه : عرسنا قريب خليك عاقل هالفترة بس
يوسف شدلها ايديها
هناء : يوسففف !
يوسف ....
فجأة سمعو صوت القهوة ☕️ فاجت ع الغاز
هناء دفاته و وقفت : شوف شن صار هي
يوسف ضحك : يقولو فآل كويس
هناء تمسح في الغاز و تضحك : ان شاء الله
خشت سلسبيل : يوسف ! مادامك هني تعالى معاي
يوسف شبحلها و استغرب : هذا شني ؟
سلسبيل فاتحة شعرها : شني
يوسف : وين حجابك
سلسبيل : في المقابلات الشرعية عادي البنت تطلع بلا حجاب
يوسف : بلا تخاريف زايدة مفيش حاجة هكي في القرآن
سلسبيل : وراس امك فكنا
يوسف فنص فيها : امشي البسيه بلا نقاش
سلسبيل : خود بخاطري زي ما انى ديما ناخد بخاطرك 😔
يوسف و هو طالع من المطبخ : ماتخشيش بلاه
سلسبيل تكنطت
هناء غمزتها : البسيه و خلاص ؛ و لما يطلع من الصالون نحيه
سلسبيل : زعما يطلع ؟
هناء : انى فهمته ان لما يحط القهوة يطلع هكي العادات
سلسبيل ضحكت : دكيتيها ف العادات 😂
هناء ضحكت : هيا بري
___________
يوسف خش لمهاب و قعمز معاه
مهاب شبحله : انوض نروح ولا كيف ؟
يوسف ضحك : شوية و جاية
مهاب : بالها واسع يا سي ؛ الوضع هذا مايمشيش معاي
يوسف : غر تقول هكي و بعدين حتى انت بالك بيتوسع
خشت سلسبيل قلبها يدق : السلام عليكم
يوسف و مهاب شبحولها : و عليكم السلام
سلسبيل ابتسمت و قعمزت
يوسف كح و وقف : دقيقة نجي
مهاب : خليهم دقيقتين
يوسف ضحك و طلع
خش لهناء لقاها تحط في الحلو
هناء شبحتله و مدتله السفرة : ارفعها و تعالى
يوسف حطها ع الطاولة و شدها من خصرها : خليني ناخد جرعة عسل قبل
هناء ضحكت و نحتله ايديه : القهوة تبرد هكي و مهاب من بكري مقعمز عيب
يوسف سكت ؛ خدي القهوة و طلع
خش الصالون لقاهم يضحكو
يوسف : ربي يدوم
مهاب شبحله : اجمعين
يوسف حط القهوة ع الطاولة و قعمز
سلسبيل تكنطت و فتحت تليفونها تبعت ف مسج لهناء .. ( شديه يا هناء 😑 )
يوسف شبح لمهاب : خود قهوة خيرك متخزرط
مهاب : توا ناخد مانيش براني
سلسبيل تبتسم و ساكتة
_
هناء قرت المسج وقفت جنب الباب : يوسف ؟؟
يوسف سمعها طلع : خيرك ؟
هناء جبداته من ايده و قعمزاته ع الكنبة : قعمز هني نبيك شوية
يوسف : هو شوية و طالع بعدين نقعمزو
هناء شداته و قعدت تلهي فيه
___________________________
سنابل و محمد في المربوعة
سنابل سمعت صوت نجاة خافت : ماما شكلها نزلت 😰
محمد : و كان نزلت !
سنابل خايفة : لو تشوفني معاك اكيد بتذبحني
محمد : الباب مسكر كيف بتشوفك
سنابل فتحت الباب و محمد سكره نفس الوقت : مش تواا
سنابل تسكر على صبعها عيطت : ااااه 😩
محمد انخلع و حط ايده على فمها : اششش
سنابل شادة صبعها و تبكي : سكرته عليا 😭
محمد شد ايدها : وريني ترا
سنابل تبكي : احييي
محمد : اما صبع ؟
سنابل ورتهوله : هذا 😢
محمد نفخ عليه و باسهولها : امشي يا أحّا يا شينة
سنابل تشوفله و ساكتة
محمد شبحلها : مشي الدِدّي ؟
سنابل حركت راسها بمعنى ايه
محمد ضحك و مسحلها دمعتها ...
__________________
سلسبيل منحية حجابها و مخلية شعرها مفتوح
مهاب شدلها خصلتها : ماشاء الله الشعيرات
سلسبيل ابتسمت : عجبوك
مهاب : عجبوني من يوم ريتك بالفراشية
سلسبيل ضحكت : و بان عليك ؟
مهاب : طبعا ، هو الشعر هما العوينات هو الروج الأحمر
و ضحك : خشت بعضها
سلسبيل ضحكت و تحشمت
مهاب يشوف لعيونها و يغازل فيها : عيون سود من البمبوك عليا طلوا .. زين المكاحل يضربوا و يولوا
سلسبيل سكتت و قلبها يدق
مهاب ابتسم و عيونه قلوب
سلسبيل تحشمت : ناخدو سيلفي ؟
مهاب : تمام به
قربت بحداه و فتحت الكاميرا
مهاب عدل تقعميزته و شبح للكاميرا
سلسبيل صورت 📷 : احلى سيلفي ❤️
________________________
سنابل تعافر ف محمد : حمودي خلينا نطلعوا خلاص
محمد شادها من ورا ظهرها و مقربها ليه : لا مازال
سنابل حاطة ايديها على كتافه و توشوش : افرض يجي حد على غفلة و بيخششوه هني كيف نديرو بعدين !
محمد : ندكك فيا و نقوللهم مش وقت خشوشكم
سنابل ضحكت : لازم نطلعو حبيبي
محمد قرب من وجهها و يهمسلها : مازال ماشبعتش منك يا عمري خلينا نزيدو نص ساعة
سنابل ادف فيه من وجهه : محمدددد !!! فكنا منها الحركات هادي تعرفني مانحبش هكي
محمد ..
سنابل عافراته و طلعت
محمد تكنطا و لحقها
سنابل خشت بسرعة للدار اللي فيها حلومة قلبها يدق
شبحتلها نجاة استغربت : خيرك خاشة هكي ؟
سنابل تلخبطت : خيرني
حلومة تشوفلها
نجاة : ساوي شعرك و حوايجك
سنابل شبحت لروحها لقت بطمة بلوزتها مفتوحة و سلسلتها هاربة ورا رقبتها و خصلاته حايسات لانها عافرت محمد
وجهها انقلب و بدت تساوي في روحها
خش وراها محمد : السلام عليكم
حلومة : و عليكم السلام
نجاة عقدت حواجبها ؛ قعدت تشوفلهم و ضربها الخنس
محمد شبح لسنابل تساوي ف روحها زراته الضحكة
شبح لحلومة و عقد حواجبه : جدي وين ؟
حلومة : طلع هو و عمك السنوسي
محمد هز راسه و طلع
سنابل قعمزت جنب حلومة قلبها يدق
نجاة تشبحلها و تسحن ف روحها تتحلف فيها بيدها بمعنى تو نوريك 👌 و تفنص فيها
سنابل خافت و شبحت لحلومة : اميمة باتي عندنا اليوم
حلومة شبحتلها : تعرفيني رجيلاتي من الدروج مانقدرش ..؛ اقعدي انتي الليلة ع الأقل تونسيني
سنابل فرحت : حاضرررر 😍 بشرط ترقدي معاي
حلومة ضحكت : والله مانقدره المندار
نجاة تفنص في سنابل : ترقدي فوق مافيش بيتان لوطا ولا تفكري
حلومة شبحتلها : لواه ماتبيهاش تقعد ؟
نجاة : تقعد غر ساهرة ع النت و الدوة الفارغة ماتديرلك تمرة قِلتها خير
حلومة : والله ماك كاسرة بخاطري قلت بتقعد يعني بتقعد
نجاة سكتت و تفنص ف سنابل
سنابل ضحكت و طلعتلها لسانها 😛
حلومة تشرب في الشاهي : نزل خطيب بنتك ولا مازال
نجاة شبحتلها : شكله مازال كان هدا نزلو
حلومة : ان شاء الله مقعمزة معاه بروحهااااا ؟؟؟!!!
نجاة : لالا مش بروحها
حلومة : قعد معاه اصيل ولا اسماعيل
نجاة : اسماعيل في المصحة و اصيل طلع قال مادامه صاحب يوسف يقعد معاه هو
حلومة : اه باهي كان معاه اوسيفه
_____________________
سلسبيل شادة الورد : شكرًا علاش متعب روحك
مهاب : مافيش حاجة من قيمتك
سلسبيل ابتسمت
مهاب : خيرك متحشمة اليوم ؟ ماكأنكش نفسها اللي تدوي معاي ف التليفون
سلسبيل : ماهو اول لقاء رسمي لينا
مهاب ضحك : ندوو في المهم توا ؟
سلسبيل : في شنو بالزبط
مهاب : قرايتك كيف يصير فيها
سلسبيل سكتت شوية و قالت : مدابيا العرس يكون في الصيف الجاي باش نكون مكملة الثانوية
مهاب سكت و قعد يفكر
سلسبيل : شن رايك انت
مهاب : تمام به ، هكي أفضل ليا وليك
سلسبيل : و بعدين تو نخش لجامعة خاصة باش نكمل بسرعة
مهاب : فاش بتقري
سلسبيل ضحكت : مافكرتش
مهاب : مشيتي للمدرسة اليوم ؟
سلسبيل : لالا ، اليوم اول يوم كان مافيش قراية
مهاب : لكن في الجديد معادش تغيبي السنة هادي صعبة
سلسبيل ابتسمت : اكيد حبيبي
مهاب وقف : الأسبوع الجاي بيجي بوي يتم موضوع الفضان و تو كل شي نوضحوه قدام عيلتك
سلسبيل وقفت : ان شاء الله
مهاب : تبي شي غاليتي قبل مانروح ؟
سلسبيل : خليك شوية
مهاب : مرة تانية ان شاء الله
سلسبيل ابتسمت
مهاب : شوفيلي الطريق
سلسبيل حطت الوشاح على شعرها : حاضر هي
مهاب شدها من ايدها : لحظة
سلسبيل : نعم
مهاب : ياريت تتحجبي قدام ولاد العيلة ؛ يعني حتى قدام يوسف البسي حجاب
سلسبيل سكتت
مهاب : مانبيش نفرض عليك لكن نتمنى انك تاخدي بخاطري و تحترمي رغبتي
سلسبيل بلعت ريقها و ابتسمت : ان شاء الله
مهاب حط ايده على خدها : شوفيلي الطريق
سلسبيل قلبها دق و طلعت بسرعة
لقت يوسف مقعمز مع هناء شبحولها هما الزوز
سلسبيل : مهاب يبي يطلع
هناء : باهي و يطلع طريق الباب مستخطية علينا
يوسف وقف : تو نشوفه انى
و مشاله ف الصالون
هناء شبحت لسلسبيل : شن صار 😍
سلسبيل ضحكت : خدينا سيلفي ✌️😂
__________________________
محمود عند صاحبه مراد قدام الحوش متضايق و ساكت
مراد : اصبر شوية مرات يصير اي شي و يتفركس موضوعها
محمود : مانرتاحش لين نطربقه ؛ هذا الحل الوحيد
مراد : مش راي ؛ تحساب لو بتقتله هي بتاخدك و بترضى بيك ؟؟ .. بالعكس حاتشوفك مجرم و انت حاتنحبس عمرك كله
محمود مقعمز و مطبس راسه : نحبها و نبيها و مستعد نموت على خاطرها
مراد : نقولك راي ؟
محمود شبحله
مراد : عندك الفرصة من توا لعرسها انك تأتر فيها و تكسب قلبها ؛ مرات تشد معاك و تفسخ منه
محمود : كيف ؟
مراد : اخلق مواضيع باش تنحمىٰ فيك و تحبك
محمود سكت و قعد يفكر
__________________________
01:30 ص
سنابل بايتة بروحها في حوش حلومة و تتكلم ف التليفون و هي في فراشها
سنابل : بنمشو الصبح مع ماما و بتروح بينا هناء ، لان ماما عندها حصة وحدة بس و بتطلع
محمد : تو نتفاهم مع هناء و نجيكم انى
سنابل ضحكت : ياريت
فجأة تخش عليها نجاة في الظلام و توقف قدامها
سنابل انخلعت و لوحت التليفون على طول ايدها : هيييييييييييييه 😲
نجاة جت شدتها من شعرها : اوقفي 😠
سنابل تعيط : اي شعرييييييي
نجاة توشوش و حامقة : اركبي قدامي تحركي
سنابل خدت تليفونها و نجاة تكر فيها للدروج
سنابل تتوجع : خيرك ؟؟؟؟
نجاة : اركبي يا فرخة الربي .. تتصيعيلي مع محمد ؟؟؟
سنابل انصدمت : امتى ؟؟؟ والله ماصارت
نجاة تكر فيها و تقرص فيها : الليلة بندوي مع بوك يدير فيك حل
سنابل خافت : لا بالله عليك ماتقوليله هو بيخطبني
نجاة فتحت الباب و دخلتها : بري اكدبي على حد تاني
سنابل توشوش : و حق ربي يا ماماااا
نجاة تفنص فيها : خشي لدارك تحركي
طلع اصيل من الحمام لقاهم : خيركم ؟
سنابل خافت و قلبها دق
نجاة شبحتله و سكتت
اصيل عقد حواجبه : خيرها الحلوفة شن دارت ؟؟
سنابل مشت تجري لدارها و سكرت الباب
اصيل يشوف لأمه : خيرها !!!
نجاة : قتلي بنبات لوطا باش نونس امّيمه لقيتها فاتحة النت و تتضحك
اصيل كيف بيخشلها : تو نوريها المسخة
نجاة شداته : خش ارقد و بلا دوشة بوك تو ينوض
اصيل : تو نوريها الكلبة ابصر مع من تتمهتك عارف
نجاة : انى قتلك فاتحة النت مش تتكلم
اصيل يعافر فيها : انى نعرف تمهتيك النتايات شن هو حولييييي
نجاة ضرباته على كتفه : سكر فمك يعطيك بكشة تو تسمعك سعاد تقول مانعرفش نربي
اصيل سكت
نجاة متعفلقة : خش ارقد يعطيك مرقد
اصيل عض فمه و خش لداره
_____________
سلسبيل تتكلم مع مهاب : شوية بس اختي تبيني
مهاب : اوكى شوفيها و تو نعاودلك
سلسبيل : تمام به
سنابل : سكري التليفون و اشبحيلي !!!
سلسبيل سكرت الخط و شبحتلها : ايوه
سنابل قعمزت بحداها ترعش : ماما بتقول لبابا على محمد
سلسبيل : مليح بكل
سنابل : شن هو المليح
و شرين تليفونها لقاته محمد ردت : الو
سلسبيل تلفتت للحيط و اتصلت بمهاب
سنابل تتكلم : محمد 😭
محمد : شن صار ؟
سنابل تبكي : ماما عرفتني كنت معاك امبكري و قالت بتقول لبابا
محمد انصدم و سكت
سنابل : انى كيف بندير توا ؟ اكيد بيضربني و موقفك انت مش حلو بكل
محمد ساكت ؛ غمض عيونه و تعصب
سنابل : علاش ساكت ؟ تكلم !
محمد : بوي هو اللي يماطل مش عارف علاش
سنابل : المهم انى حكيتلك شن صار و لو صارت فيا حاجة انت عندك علم
_________________________
يوسف واقف ف بلكونته يتصل بهناء
و هناء راقدة ماتردش عليه
سكر تليفون و قعد يدخن
بعد شوية سمع صوت بوه ينادي : يوسف ؟؟
يوسف طفي دخانه و مشاله
وقف قدام الدار : نعم ؟
السنوسي : خش
يوسف خش : ايوه
لقي سعاد مريضة و تبكي
انخلع و قرب منها : خيرك شن فيك ؟؟
سعاد تتوجع : نحس بألـممم
يوسف يشوف للأدوية : اما هو المسكن ؟
سعاد : مانعرفششش ..؛ هناء هي اللي تعرفه
يوسف قعد يشوف ف الأدوية يدور فيه
السنوسي : كلمها تجي تعطيهولها
يوسف : هناء راقدة توا
سعاد تتوجع و تبكي : نوضهاااا .. مفيش حد يقدر يريحني زيهااا
يوسف شبحلها وسكت
السنوسي : نوض طق عليها
يوسف طلع باكو دواء : هذا مكتوب عليه مسكن اكيد هو
و فتحه يعطيها فيه : قيمي راسك شوية
سعاد قامت راسها و خدت منه الدواء
يوسف : ان شاء الله بالشفاء
سعاد غمضت عيونها و مازالت تتألم
السنوسي يشوفلها : بالك تمشيتي هلبا اليوم
سعاد مغمضة عيونها : ايه .. الدكتور هو اللي قال لازم نتحرك
يوسف يمسحلها على شعرها : بعيد السو عليك يا امي ؛ ياريته فيا ولا فيك
سعاد شبحتله : بعيد السو عليك انت ربي يحفظلك صحيحتك
_________________________
تاني يوم 🌹
04:00 م
اسماعيل طلع من حوشه تلاقى مع عصام في الدروج
عصام شبحله : كيف الحال
اسماعيل : الحمد لله .. نازل للحاج ؟
عصام : ايه ، قال يبي يجتمع بينا
اسماعيل نزل معاه : حتى انى بعتلي ان شاء الله خير
عصام : ان شاء الله
و خشو لحوش العارف
لقوه مقعمز ف المربوعة يراجي فيهم
عصام و اسماعيل : السلام عليكم
العارف و محمد : و عليكم السلام
العارف وشوش محمد : خلاص اطلع انت
محمد ناض و طلع للشارع متوتر
لقي محمود مقعمز يدخن شبحله و سكت
محمود شبحله و لوح الدخان من ايده
محمد ساكت
محمود قرب منه : خيرك
محمد متوتر : كلمت جدي على موضوع سنابل و توا بيطلبها من عمي قدامهم كلهم
محمود ضحك و فرح : مبروك مبروووك
محمد : اما مبروك و مازال ماصار شي
محمود : تي موضوعك تام ف الشور يا برو شن تقول
محمد متوتر : ان شاء الله ان شاء الله
و ف اللحظة هادي اصيل جي و درس سيارته قدام الحوش
شاف ولاد عمه واقفين : محمود شن الجو
محمود : تمام شن الأمور
اصيل دارله لايك بيده و خش الحوش بدون مايكلم محمد
محمد مادارلاش اي اهتمام لان باله مش معاه
محمود شبحله : شكلكم مش ف الأبيض !!
محمد : فوته مش موضوعي توا
ركب سيارته و طلع
__________________________
اسماعيل و عصام مقعمزين مع العارف
عصام : شن سبب هالجمعة ؟ ان شاء الله خير !
العارف : اصبر يجو باقي خوتك قبل
اسماعيل : شغلتنا يا حاج ؟
العارف : مافيه الا الخير
_______________________
هناء مع سعاد اتديرلها في مساج لظهرها : هذا حايساعدك هلبا
سعاد : حسيته هوّن عليا غير الوجاع متع امس تعبني بس
هناء : لانك تمشيتي هلبا ، معليشي هذا يدل على انك بتبري ان شاء الله
سعاد : ان شاء الله
هناء مسحت ايديها و ساوت حوايج سعاد
سعاد تتقلب و داهشة : صحيتي سلم بنيتي
هناء وقفت : سلمك ؛ ان شاء الله بالشفي
خش السنوسي : تبو حاجة قبل ماننزل ؟
هناء شبحتله و شبحت لسعاد
سعاد : طالع انت ؟
السنوسي : نازل للحاج قال مداير اجتماع
سعاد و هناء استغربو
سعاد : ان شاء الله خير كان مابيودع !
هناء شبحتلها : بعيد السو عليه
وشبحت لعمها : زعما شن فيه
السنوسي : الله اعلم ..؛ لو استحقيتو شي انى لوطا
و طلع من الحوش
سعاد : هنيوه بالله طويسة امية
هناء : حاضر هي
ساوتلها مخدتها و مشت تجيبلها ف الميه
سعاد فرحانة بمعاملة هناء ليها
و اتضايقت من روحها لانها كانت ماتعاملش فيها كويس و مالقت غيرها في وعكتها
فاقررت انها تصفي قلبها تجاهها و تعاملها كيف بنتها و تكسبها
(( كـل طـيـحـة تـقـويـك و تـعـرّفـك مـن نـاسـك
و كـل غـلـطـة تـوريـك سـاسـك مـن راسـك ))
_______________________________
عماد يلبس ف كندرته جنب الباب
معاه احمد : علاش ماتبينيش ننزل ؟
عماد : مش لازم تمد وجهك كل يوم لوطا ، برا شوف شن عندك قراية
احمد : ماعندي شي مازال ماقريناش
عماد شبح لأزهار : شديه ماتخليشي ينزل
احمد تكنطا : علاش هكي الزح !
عماد انصدم و شده من وذنه : مازال تعاود كلام الشوارع هوا نفرمك يا كلب فاهم ولاااا 😡
احمد خاف : باهي اسف اسف والله ماعاد نعاودها
عماد رخاه و نزل
احمد شاد وذنه و يتوجع
ازهار مقعمزة و ساكتة
روان بحداها توشوش : إحساسي انه يبيهم على خاطر محمد
ازهار شبحتلها : ان شاء الله مايكسروش بخاطره
روان : انتي علاش قعدتي تماطلي و ماحكيتيش لبابا
ازهار : بوك حكيتله و ماباش يوافق لانه ديما يهزأ ع الناس اللي يزوجوا في صغارهم بكري قبل مايتخرجو
روان : تي هو يبي يخطبها بس خيركم !!
ازهار : شن بديريله هي هكي عقليته
__________________________
يوسف فتح باب حوشهم و خش مدخل معاه شكاير
خش للمطبخ لقي هناء : اهلا بست الحسن و الجمال
هناء شبحتله و ابتسمت : اهلا بيك
يوسف حط الشكاير ع الطاولة : كيف حالك اليوم
هناء : الحمد لله شوفة عينك
يوسف قرب منها
هناء وخرت و فنصت فيه : يوسف !!!
يوسف ضحك
هناء : نحطلك غذاك ؟ ..؛ انت اليوم عطلت هلبا اكيد مازال مش متغذي
يوسف : تمام به .. نخش نشوف امي و نجي
__________________________
سنابل و سلسبيل في دارهم و مسكرين الباب
سنابل قلبها يدق : قلبي يدق و بطني تلوي فيا 😖
سلسبيل تضحك : هذا احميده متعك
سنابل : يارب يصير اللي نبيه ..؛ تعرفي لو يقولو لا ممكن ننتحر
سلسبيل : مادام اجديده هو اللي بيتكلم موضوعكم تام خلاص
سنابل : يارب يارب
سلسبيل : شن رايك ننزلو و نتسنطو عليهم من تحت الروشن
سنابل : هي 😍
و فتحو باب الدار و طلعو
كيف بيفتحو باب الحوش و بينزلو ..
خش اصيل
وقفو ف مكانهم
اصيل عقد حواجبه : وين ماشيات
سلسبيل : بننزلو لحوش امّيمه
اصيل : انتي عادي عندك التصريح خلاص
و شبح لسنابل : و انتي مافيش نزول
سنابل عوجت فمها : و علاش ؟!
اصيل : هكي و خلاص
سنابل : نبي ننزل شن الجو اللي ادير فيه هوا ؟؟
سلسبيل تأشرلها من وراه بمعنى اسكتي
سنابل شبحتلها و سكتت
اصيل شبح لسلسبيل : بري انزلي هي
سلسبيل فتحت الباب و نزلت
سنابل جاها مسج فتحاته تشوف فيه
أصيل شبحلها و فك منها التليفون
سنابل انخلعت : هاااااااات 😩
اصيل خش بيه لداره و سكر الباب بالمفتاح
و سنابل قعدت برا تخبط و تعيط عليه
__
اصيل قعمز ع السرير و بدي يشوف ؛ لقي المسج من ليبيانا طلع منه و فتح على مسجات محمد يقرا فيهم
تعفلق و خش ع الفايبر يشوف في المحادثات
_______________
سنابل خافت و طقت على نجاة في الحمام : مامااا 😭
نجاة : ايوا
سنابل تبكي : افتحي بسرعة
نجاة بعد شوية فتحت : خيرك ؟
سنابل تبكي : أصيل خدي تليفوني يفتش فيه اكيد عرف بمحمد يا مامااااا 😭
نجاة كيف بتتكلم ..
اصيل فتح داره و طلع حامق : وينها المسخة ؟؟؟ 😡
سنابل خافت ؛ هربت لدارها و سكرت الباب
اصيل لحقها يفتح في الباب : افتحي يا ***** يلعن *****
سنابل تبكي : والله ماني فاتحاته
اصيل يعيط : تلعبو من وراااااي !!! تحبو و تتمعشقو يا ******
جاته نجاة : نقص صوتك يعطيك بكشة
اصيل شبحلها و حامق : اللي كنت حاسبه صاحبي و خوي الكبير يكلم ف اختي يا امييييي ... يضحك عليهاااااا
نجاة تهدي فيه : انى نعرف و عندي علم والله مايضحك عليها
أصيل يحرك ف راسه بمعنى لا
نجاة : والله الا يبيها و مكلم عمك انه يخطبهاله
اصيل يعيط : كيف مايقوليش كييييفففف ؟؟؟ .. مش حاسبيني في الحوش ؟؟؟ طرطور معاكم انى !!!
نجاة خدت منه التليفون وتسكرله ف فمه : اسكت اسكت تو يسمعوك
سنابل في دارها تسمع فيه و ترعش من البكي
اصيل يعيط : كنت شاك فيه الكلب و هاني نازله
فتح الحوش و نزل يجري
نجاة لحقاته : تعالى يا اصيل هذا ولد عمك !!!
اصيل نزل و ماردش عليها
طلع الشارع لقي محمد مهناش
خش لحوش جده ..
طبس من باب المربوعة لقي العمام مقعمزين مع العارف
العارف : اليوم جمعتكم باش ندوي في موضوع يخص أحفادي الزوز محمد و سنابل
اصيل تحمس و خش قعمز
اسماعيل : خيرهم ؟ متعاركين ولا شنو ؟!
اصيل مازال حامق : تبي نحطلك كل شي اني ؟؟؟؟
العارف شبحله و فنص فيه : اششششش
السنوسي شبح لأصيل : لما جدك يتكلم انت تسكت
اصيل سكت
العارف : اليوم جاني الولد دوي معاي و قالي ياجدي صاير موضوع و مافيش غيرك يقدر يحلهولي ..؛ قلتله ان شاء الله خير !! قالي نبي نخطب سنابل بنت عمي اسماعيل لكن اماليا مش موافقين
اسماعيل انصدم : شنو !!!
اصيل انطفى و العمام سكتوا
عصام ضحك : باه ؟
العارف : ماحد يقاطعني لين نكمل كلامي
عصام : تمام
العارف شبح لعماد : قولي ! علاش قلت لولدك لا ؟
كلهم شبحو لعماد
عماد تلخبط : هئحم ؛ انى مارفضتش الموضوع كليا يا حاج ..؛ اولا الولد مش متخرج و تانياً مازال ماعنده شي ؛ يعني لا باني حوشه ولا مكون نفسه .. كيف تبيني نوافق اني نخطبله ؟ باش تبيني نتكلم !
العارف : هو قالي بيخطب و لبين تخرج و كون روحه بيتزوج
عماد : لالا مش كيف
العارف شبح لإسماعيل : خلونا نشوفو راي بو البنت
اسماعيل سكت وشبح لأصيل
السنوسي : لو انى في مكانك يا اسماعيل نعطيها و عيوني مغمضات انت عارف ان محمد من خيرة الناس .. الولد ولدنا و مانلقو خير منه
عماد ابتسم
اسماعيل شبحله : اكيد الكلام هذا مافيه شك ، لكن الموضوع صدمني لدرجة إني ماعرفتش شن نرد
عصام : خلونا نشوفو راي البنت قبل 😃
العارف خبط العكوز ع اللوطّا : البنت موافقة و تبيه
العمام شبحوله و صارت لحظة سكوت
العارف : يعني لو ماكنتش نعرف راي البنت كنت حانتصرف بدون علمها ؟!!
السنوسي ضحك : انت تام الموضوع يا حاج من يقدر يخالفك الرأي
عصام : شكله بو العريس هو اللي بيعفس
عماد : انى قلت اللي عندي و لو اسماعيل راضي انى ماعنديش مشكلة
اسماعيل شبحله : و محمد قداش يبي باش يتم اموره ؟
عماد : اقل شي سنتين ، لكن مانعطيكش كلمة الله اعلم شن يصير من ظروف و يتغير الحال
العارف خبط صدره : من الناحية هادي عندي ، من هني لعامين لو الولد ماقدرش يتم بروحه انى نكفله
العمام انصدموا
اصيل ف عقله .. ( ماك مش ضامن روحك تعيش عامين تانيات هذا علاش تخبط ف صدرك 😏 )
و بدو العمام يقولوله : ربي يكتر من خيرك .. و ربي يزيدك و من هالكلام
العارف : الله سلمكم
عماد : ان شاء الله حتى انى مش حانقصر معاه
عصام شبح للعارف : شنو امالا معزة خاصة ؟ الكلمة هادي حتى لولادك ماقلتهاش !
العارف : مادامني تهنيت على هنيوه معليشي لو ساعدت الباقي
اصيل عدل تقعميزته : احم احم ، حتى الباقي يبو يتزوجوا يا حاج
اسماعيل فنص فيه : بلا تسهويك يا ولد !
اصيل سكت
عماد شبح لإسماعيل : توا نتفاهموا ف المهم ؟
اسماعيل شبحله : اما مهم ؟
عماد : مهر البنت و المقدم و المؤخر
اسماعيل ضحك : مابيناتناش الحاجات هادي ياعماد
السنوسي : لا من حقك زي مافضينا في هناء نفضوا في سنابل
العارف : خلاص و انتو قلتوها ! اللي طلبته ف هناء نطلبه ف سنابل
العمام ضحكو
___________
سلسبيل تسمع فيهم من تحت الروشن ف الجنان و تسجل فيهم لسنابل 📱🔴
___________________________
سنابل ف حوشهم خاشة طالعة ع الحمام من بطنها
نجاة : زيدي اسحني روحك زيدي
سنابل : يا ماما نبي ننزل
نجاة : مافيش نزول لين نشوفو شن يصير
سنابل قعمزت معاها و تتأفأف
خشت سلسبيل تجري للحوش : مبروك مبروك 😍😍
سنابل قلبها دق بسرعة : شن صار ؟؟
نجاة ساكتة
سلسبيل : اجديده قامها بيكم و وافقو 💃
سنابل فرحت و بدت تبكي
سلسبيل ضحكت و ضبطتها : علاش تبكي يا قردة ؟؟؟
سنابل تبكي و ساكتة
نجاة ضحكت و قربت منها : الف مبروك .. هذا محمد و خطبك علاش الدموع
سنابل شبحتلها و ضبطتها : مش عارفة علاش نبكي
و سمعو صوت حلومة تزغرط
سلسبيل ناضت تجري : انى بننزل نديرو شوط دربوكة
سنابل شبحت لامها و مدمعة : ماما نحس ف شعور غريب 😢
نجاة ضحكت و نزلت هي وياها
__
و نزلو العيلة كلهم فرحانين لمحمد و سنابل و الكل مبسوطين
الا سعاد قاعدة راقدة في سريرها ماتقدرش تنوض
تسمع في صوت الفرحة و مش قادرة تنزل
__________________________________________________________
(( و مرو أيام و شهور 🌹
و هناء تجهز لعرسها هي و يوسف ؛ و هما الزوز في غاية الانبساط
اما محمود قعد يحاول مع سلسبيل مراراً و تكراراً انه يكسب قلبها بس كانت ديما تتفادى فيه و كل ماتشوفه تنسحب من قدامه ))
__
11:00 ص
هناء واقفة على مراية دارها تلبس في كبوطها
اتصل بيها يوسف ردت : الو
يوسف : ايوه هنو
هناء : اهلين حبيبي
يوسف : شكلك طلعتي
هناء : توا كيف نازلة
يوسف : زي ماوصيتك ماتمشيش بروحك ارفعي معاك وحدة من خواتك
هناء : اطمن ماشيات معاي الزوز
يوسف : تمام به ، و ردي بالك تجري بالسيارة البرا مطر مرات تزلق بيك
هناء ضحكت : شن اول مرة نسوق في الشتي ؟
يوسف : نوصيك و خلاص .. عرسنا الاسبوع هذا مانبيش يصير شي يلغيه
هناء : ان شاء الله مايصير الا الخير
يوسف : ان شاء الله .. اول ماتروحي اعطيني علم
هناء : حاضر
يوسف : و الضحك بصوت عالي ممنوع
هناء ضحكت : حاضررر
خشت عليها سنابل : هياااا
هناء شبحتلها : اسبقوني شوية و ننزل
طلعت سنابل من الدار و نزلت للسيارة هي و سلسبيل
يوسف : نخليك انى توا و نهدرزو بعدين !
هناء : اسمع اسمع
يوسف : نعم ياعيوني
هناء : نحبك
يوسف ضحك : و انتي الحب كله ياقلبي
هناء ضحكت : سلام
يوسف : ف أمان الله
خدت هناء شنطتها و نزلت لحوش حلومة
_______
سلسبيل و سنابل في السيارة فاتحات المسجل و يصورو سناب
سنابل سكرت السناب و اتصلت بمحمد ماردش
استغربت و قعدت تعاودله
محمد في الجامعة يصور ف شيتات مش حاس بتليفونه
سنابل سكرت التليفون و سكتت
وقف عليها محمود من الروشن و طق ع المرش ✊
سلسبيل تلخبطت و دارت روحها لاهية ف التليفون
سنابل فتحت المرش : ايوه
محمود : وين ماشيات ع الصبح و هاربات من المدرسة
سنابل ضحكت : إلى مركز العناية بالبشرة
محمود ضحك : تي بلا جو انتو مش مستحقات
سنابل : لالا لازم
محمود شبح لسلسبيل لقاها مش معبراته كالعادة
سنابل : شن جو الجامعة ؟ مشت معاك !
محمود شبحلها : لتوا باهي لكن شكلي مش حانكمل
سنابل : علاش ؟
محمود : هكي و خلاص
و شاف صاحبه مراد كيف جايه
محمود : هي تشاو توا
سنابل : تشاو
محمود مشي لمراد
و سنابل سكرت المرش و تنهدت : يوجع القلب
سلسبيل : تو يجي يوم و يلقى اللي تحبه و تعوضه
سنابل شبحتلها و فنصت فيها
________
محمود ركب مع مراد
مراد : مازال ماصار شي ؟
محمود : مازال
و خدي طرف كلينكس : راجي باش نمشو وراهم
مراد : لآمتى بتقعد هكي يا راجل كل ماتطلع تمشي وراها ؟ تي فوتها خلاص
محمود شبحله : مش هذا كلامك قبل شهور !
مراد : البنت مكبدة عليه واضح الشي
محمود سكت
______________________
هناء عند حلومة : هادم بطاقات مني اللي قاعدات
حلومة : زايدات
هناء حطتهم ع الطاولة : امممم
حلومة : غر اعزمي بنية عمتك عيب حتى قدام الناس
هناء تبي تغير الموضوع : اجديده شكله مهناش ! كنت نبي نشوفه قبل مانطلع
حلومة : اكيد على خشة من الصبح بكري طالع
خشت مرام حاطة ايدها ورا ظهرها و مرزنة
شبحتلها هناء ضحكت : شديلي روحك هاليومين بس
مرام تاعبة : ان شاء الله خير تعرفي
حلومة تشوفلها : المفروض تقعدي عندي لين تجيبي و فكيك من الدروج هو اللي متعبك
مرام قعمزت ع الكرسي داهشة
هناء : انى طالعة سلامات
حلومة : في حفظ الله
هناء طلعت للسيارة و ركبت
سنابل متلفتة لسلسبيل : لي امتى بتقعدي هكي تعاملي فيه
سلسبيل لاهية ف التليفون و ماتردش عليها
هناء شبحتلهم : خيركم
سنابل أشرت على محمود ف سيارة مراد : شوفيه لتوا قاعد يتبع فيها
هناء شبحتله و سكتت
سنابل : شن فيها لو رضت بيه و كنا ولينا صغار عم في بعضنا
هناء شبحتلها : هو صح واجعني لكن القلب و مايريد
سلسبيل ساكتة
سنابل : محمود تعرفه من زمان مش زي مهاب عرفاته لما كبرت
هناء : تو انتي تقدري تحبي حد غير محمد ؟
سنابل : مانقدرش لكن هني يختلف الموضوع
هناء طلعت بالسيارة : معاش تضغطي عليها هي حرة
سنابل سكتت
سلسبيل : قوّو المسجل
_
محمود : هي اطلع
مراد طلع بالسيارة و قعدو يلحقو فيهم
___________________________
وصل العارف للحوش و خش المطبخ : حاجة !! ... حاجة ؟؟؟
جاته حلومة ف المطبخ : جيت يا حاج ؟
العارف مدلها شكارة رمان : شدي مني
حلومة خدتها منه : سلمك جياب
خشت مرام بتشرب اميه : عمي كيف حالك اليوم
العارف : الحمد لله ف نعمة
مرام ابتسمت و خدت الطاسة بتشرب
قعد العارف يشوفلها و ساكت
مرام حطت الطاسة : ماشاء الله الرمان منظره يسهف
حلومة : قعمزي تو نحطلك منه اتذوقيه
مرام : هاتي عليك تو نديره انى
حلومة : والله ماصارت انتي تعبانة اليوم قعمزي ارتاحي
العارف يشوفلها : بطنك نازلة شكلك معش مطولة
مرام انصدمت و شبحت لحلومة
حلومة تكنطت : حااااج ممكن نسيت شيشمة الجنان مفتوحة اطلع سكرها
العارف طلع للجنان
مرام منحرجة : قوليله معش يدوي معاي هكي والله يوم تاني تلقوني ميتة 😢
حلومة متكنطية : هذا من يومه يحب يتدخل في حاجات مش ليه مانقدرش نغيره توا ف كبره
مرام شدت المية تاني تشرب فيها و ترعش
____________________________
02:30 م
طلعو البنات من المركز و ركبو السيارة
هناء طلعت بالسيارة : عطلنا هلبا
سلسبيل : و راس هناء اخطمي بيا ناخد البروش
هناء : اطلعي العشية مع ماما خوديه
سنابل : اياح ماما مش حاترفعنا ماسد غايبين اليوم على خاطر المركز مش حاتطلعنا العشية
هناء : باهي اما محل ؟؟
__________
مراد وراهم بالسيارة هو و محمود : مليت انى يا برو
محمود : شكلهم مروحين اصبرلك شوية
مراد سكت
محمود : خليك وراهم من بعيد معش تقرب
__________
بعد شوية وصلو البنات للمحل و درسو ف الجهة المقابلة
هناء : ماتعطلوش
سلسبيل و سنابل : باهي
و نزلو مع بعض
هناء سكرت عليها الرواشن و البطم و قعدت تراجي
اتصل بيها يوسف ردت : الو
يوسف : وينكم لتوا ؟
هناء : شوية و جايين غر عطلنا في المركز
يوسف تعفلق : تعرفيني مانحبش الدوران في القوايل ولاااا
هناء : باهي خمسة دقايق و نكونو في الحوش
_________
مراد مدرس وراها : تعرف لو بيطلعو بمشوار تاني انى بنروح طول
محمود : باهي غر اسكت
_
بعد شوية طلعو البنات من المحل بيقصو الطريق
فجأة يجيهم واحد طويل و عريض و اسمر من وراهم ؛ يشد سلسبيل من ايديها و بدي يكر فيها
البنات انخلعو و بدو يعيطو
الأسمر يكر ف سلسبيل و يعكف ف رجليها رافعها لسيارته
سلسبيل طاحو منها شنطتها و كيسة البروش و تعيط
و سنابل تضرب فيه لكن مش قادراته
يشوفهم مراد ينخلع و يضرب محمود بمرفقه : شوف شوف !!
محمود تلفت : هاه
انخلع و نزلهم يجري هو و مراد
هناء مش حاسة بيهم لانها مسكرة الرواشن و لاهية مع يوسف ف التليفون و هو يعارك فيها ع التعطيل
____
محمود يجري هو و مراد و بأعلى صوته : ارخيها يا ******
سلسبيل شبحتله : محموووووود 😭
الأسمر لما شاف محمود و مراد خاف ؛ رخاها و ركب يجري لسيارته و هرب
مراد ولّا يجري لسيارته : تو نلحقه ال *****
محمود شد سلسبيل من ايدها و يشوفلها : انتي كويسة ؟
سلسبيل شدت فيه تبكي و ترعش مش قادرة توقف
محمود شادها : تعالي معاي
سلسبيل تبكي و دوب ماتتكلم : مش قادررررة
سنابل قصت الطريق تجري و فجأة واحد يشد عليها فرينو
محمود عيط : هاااااااه
سنابل زادت رعشت و مشت لهناء
هناء لما سمعت صوت السيك تلفتت ؛ شافتها تبكي استغربت ؛ فتحت البطم و هي تتكلم ف التليفون : باهي يا يوسف حاضر مروحة توا
سكرت الخط و شبحت لسنابل : خيرك ؟ اختك وين ؟
سنابل ارتخت ع الكرسي و معاش قدرت تتحرك ولا تتكلم من الرعشة
هناء انشغلت : اختك وين !!!!
سنابل ساكتة و تبكي بلا صوت
هناء تلفتت للمحل لقت محمود شاد سلسبيل من ايدها و جايبها للسيارة
استغربت و نزلتلهم : خيركم شن فيه !!
سلسبيل ضبطتها : ااااااه 😭
هناء مخلوعة : خيركم ؟؟ تكلمو قلبي بيوقف !
و شبحت لمحمود
محمود : كان فيه واحد بيخطفها و انى لحقتها ف اخر لحظة
هناء انصدمت : هيييييه 😱
و شبحت لسلسبيل : كيف صار ؟؟؟
محمود : خلينا نروحو و ندوو ف الحوش
هناء مصدومة و قلبها يدق
ركب محمود ف مكانها بيسوق : هيا اركبو
ركبو معاه البنات راعشات و طلعو
محمود يسوق ؛ فتح تليفونه و اتصل بمراد ..
مراد رد : ايوا
محمود : شن صار معاك !
مراد : طار في رمشة عين ال ****
محمود تكنطا : تي والله الا مانجيبه الكلب لو كان ندور عليه شارع شارع
________________________
يوسف واقف ف الجنان يراجي في هناء و متعفلق
بعد شوية خشو عليه وجوههم ماتتفسرش
شبح لهناء : اخر مرة تطلعي الوقت هدا
محمود شاد سلسبيل و مدخلها
و سنابل شادة ف هناء
يوسف استغرب : شن فيه ؟
_______________________
09:30 م
سنابل و سلسبيل راقدات ف دارهم مازالو راعشات
سنابل تليفونها يشرين ؛ محمد يتصل لكن مش حاسة بيه
__
هناء مع يوسف ف الدروج : حني مانبوش ندوو قدام بابا و ماما باش مايديرولناش مشكلة و ننحرمو من الطلوع
يوسف : و تقوليلي فيها بكل صراحة !!
هناء سكتت
يوسف : تي قسماً بالله و القرآن ماعاد طالعتيها بالسيارة سواء معاك خواتك ولا بروحك
هناء انصدمت : يوسف ! اكيد اللي تقول فيه مستحيل انى من يومي نسوق و مش حانبطل سواقة
يوسف فنص فيها : انى حلفت و قسمت ؛ عاجبك اللي صار اليوم ؟؟ تبي نراجي دورك باش يقيموك ؟؟؟ ؛ اهاا ؟ ..؛ احمدي ربي انكم روحتو بالسلامة مش مازال تناقشي فيا
هناء : لكن انى مانقدرش نستغنى ع السواقة و خدمتي مانقدرش نربط بيا حد باش نمشيلها
يوسف : ولا انى نقدر نستغنى عليك ، من اليوم السيارة بتنسيها نهائي و الراديو بتنحيه من راسك
هناء تكنطت : يوسف انت شن تقول ؟؟
يوسف : اللي سمعتيه ؛ انى مانراجيش لين تطرأ فيه حاجة و بعدين نتكلم
هناء سكتت
ركب محمد : السلام عليكم
يوسف شبحله : و عليكم السلام
محمد شبح لهناء : خيرها سنابل ماتردش
هناء : خليتها راقدة
محمد : من فيه الداخل ؟
هناء : ماما و بابا
محمد تكنطا و سكت
هناء : خش
محمد : لالا مرة تانية ان شاء الله
و ركب لحوشهم
يوسف شبح لهناء : خيره متكنطي
هناء شبحتله : سمع بسنابل متأخر و هي حرجت
______________________
11:00 م
مرام بادية فيها لية الجياب و تبكي : نوض ارفعني نوض 😭
عصام يشبحلها : متأكدة بتجيبي ؟ تخافي نضربوه تيرو ع الفاضي
مرام تعيط : بوك فاول عليا معناها بنجييييييييب 😭
عصام انخلع و وقف : باهي غر اهدي حبيبتي و ماتشهدريش علينا العمارة
مرام تبكي : بننحرم من العرس 😭
__________________________
سلسبيل شرين تليفونها لقاته مهاب
فتحت الخط و قعدت ساكتة
مهاب : ايوه
سلسبيل سمعت صوته بدت تبكي
مهاب : الو ؟
سلسبيل : مهاب 😭
مهاب : الحمد لله على سلامتك يا عمري هذا وين عرفت من يوسف
سلسبيل تبكي
مهاب : اهدي حبيبتي و معش تفكري فيه
سلسبيل تبكي : لتوا شكله بين عيوني و ماقدرتش نرقد و انى نتخايل فيه
مهاب : و راس عيونك الا مانجيبه ؛ خديت النعتة من يوسف و غدوا الصبح بنمشي نشوف الكاميرات
سلسبيل تبكي : لما يكر فيا حسيت روحي ماشية للموت 😭
مهاب مضايق : اششش بعيد السو عليك يا قلبي .. الحمد لله على سلامتك
شوفي روحك توا وين و مع مني ! يعني خلاص شي فات انسيه و ماتفكريش فيه حبيبتي
خش عليها محمود انتظار ماركزتش عليه
و محمود اول ماطلع عنده انتظار اضايق و سكر طول
سلسبيل مازالت تبكي و مهاب قعد يحكي معاها لين هدت و رقدت
________________________
محمد يزربز ف داره يبي يوصل في سنابل مش قادر
فتح تليفونه و اتصل بهناء ..
هناء ردت : الو
محمد : مازال ماناضتش ؟
هناء : لالا ؛ جتها ع النوم و خلاص
محمد : من اللي روحت و انى نتصل بيها ماتردش .. بري خشيلها ولا ديريلي راي
هناء : باهي حاضر خمسة دقايق و نكلمك
محمد : تمام نراجي فيك
هناء سكرت الخط و طلعت من دارها ؛ لقت نجاة و اسماعيل يتفرجو ع التلفزيون
نجاة شبحتلها : منين جتهم راقدات بكري الليلة ؟
هناء : ممكن تعبو من نوضة الصبح
اسماعيل : اليوم مشيتهولهم الغياب لكن ف الجديد معش يفكرو
نجاة : ايه عارفة عندهم يوم الحفلة بس يغيبو فيه
هناء انسحبت من بحداهم ومشت لسنابل
سنابل غامة روحها و راقدة
هناء عرتلها وجهها : سنابل ؟؟ ..؛ سنابل ؟!!
سنابل انخضت و قعمزت : هاااا
هناء شدتها : بالشوية
سنابل شافتها اطمنت و حطت ايدها على وجهها : خلعتيني
هناء : محمد من بكري يتصل بيك و يدور فيك
سنابل شافت تليفونها لقت هلبا مكالمات منه
داراته وضع طيران و اتكت
هناء تشوفلها : كلميه
سنابل شبحتلها : وقت اللي احتجتله مادورنيش ماعندي علاش بنرد عليه
هناء : تي ماكانش يعرف !!
سنابل : علاش ماعاودليش لما شاف مكالماتي الصبح ؟؟ خليه يتعذب شوية
هناء : عيب عليك هو مايعرفش ؛ و الله لو شفتيه لما سمع قريب هبل
سنابل سكتت
هناء : غر كلميه و اسمعي منه اكيد عنده عذر
سنابل ساكتة
هناء طلعت و مشت لدارها
سنابل فتحت تليفونها و اتصلت بمحمد ..
محمد رد : اه يا قلبي
سنابل بدت تبكي
محمد اضايق : سلامتك ياعمري من الشر
سنابل : علاش لما كلمتك مارديتش عليا
محمد : سامحيني ياعيوني كنت مضغوط ف المحاضرات و روحت العشية
سنابل تبكي : تقدر تبعتلي مسج و تقولي لكن انت مش مدايرلي اهتمام و فايتني
محمد : خلاص يابيبي معش تلوميني على شي انى مش قاصده ؛ يعني لو كنت عارف اكيد جيتك جري
سنابل تبكي
محمد : بطلي بكي يا عمري معاش تزيدي تقطعيلي قلبي بدموعك
سنابل : لو انخطفت او ضربتني السيارة اللي شدت عليا فرينو بتلوم روحك بعدين انك ماكلمتنيش ؟ ولا بتقول ماليكش ذنب ؟؟
محمد غمض عيونه و سكت
سنابل تبكي : اكيد كنت حاتقول انى مانندريش عليها و مقدر و مكتوب
محمد كيف بيتكلم ...
سنابل قاطعاته : انى بنسكر توا تاعبة و نبي نرقد
محمد : لا مازال ؛ مش حاتسكري و انتي زعلانة
سنابل : تشاااو
سكرت الخط و دارت تليفونها وضع طيران
محمد عاودلها عطاه مقفل ؛ تكنطا و لوح التليفون بحداه
سنابل تبكي : تو يشوف كان مازال شاف وجهي
________________________________
بعد مرور خمسة أيام 🌹
(( في ليلة الحنة 💃))
مركبين خيمة ف الشارع و مدايرين سهرية بالزمزامات
عازمين العيلة و الجيران و الأحباب و قايمين الجو
____
محمد مقعمز مع الشباب و ولاد العيلة و جوه مش مليح
جي مهاب : السلام عليكم
ردو عليه : و عليكم السلام
يوسف : ها عديل آنست
مهاب ضحك و قعمز معاه : الله يآنسك
و قعدو يهدرزو
محمود يشوفله و حاقد عليه
ناض ركب موطوه و طلع
اصيل مقعمز مع محمد
جاه احمد وشوشه : برا قعمز مع نسايبك
اصيل ضحك و عطاه عنفقة : سادني خوك حتى هو نسيب
احمد ضحك
محمد مازال متضايق ؛ ناض ركب ف سيارته و اتصل بسنابل ..
سنابل تشوف في مكالماته و ماتبيش ترد عليه مازالت زعلانة منه
محمد تكنطا و اتصل بروان ..
بعد شوية روان ردت : الو
محمد .....
_______________________
هناء تحني فيها الحناية في الحنة العرايسية الهندية و فرحانة ❤️
يغنولها الزمزامات و هي تضحك
و لايدين عليها صاحباتها و العيلة و يزغرطولها ❤️
جت روان توشوش في سنابل : قالك محمد كان ماتجينيش توا ورا الحوش الا مانخشلك ف الخيمة
سنابل : فوتيه غر يقول هكي
روان : راهو نقز من تالي و يراجي فيك
سنابل انصدمت و شبحتلها : احلفي ؟!!!
روان ضحكت : والله
سنابل خدت الفرو متعها و خشت تجري للجنان ماشيتله ورا الحوش
لابسة قفطان قصير و كلوش لونه اسود صدره مستور و ظهره مكشوف للنص
لقت محمد واقف فوق السور يراجي فيها
انصدمت و حطت ايدها على فمها : هييييييه 😲
محمد واقف لابس كبوط اسود و لاف شال رصاصي على رقبته : بتسامحيني ولا لا ؟؟؟
سنابل مسكرة الفرو متعها بيدها و تشوفله فوق : محمد انزل 😳
محمد علّا صوته : مانيش نازل لين ترضي عليا يا حبي
سنابل : انزل بلا فضايح تو يشوفك حد
محمد يعلي ف صوته : نهون عليك خمسة ايام تخليني زي اليتيم من غيرك ؟؟؟
سنابل سكتت و قعدت تشوفله
محمد : ردي عليا يا حبي
سنابل ترعش : محمد انزل انى صقعت
محمد حط ايديه على قلبه و بدي يغنيلها : لا ، لا تغيبي
لا تزيدي ف تعذيبي
بُعدك شقاني
تعبت يا قليبي
سنابل حطت ايدها على فمها و ضحكت
محمد يغني : مجنون انا ف حبك
نحلم بقُربك
يا شوقي و حنيني
يا شوقي و حنيني
انتي كل حياتي
انتي أملي و نصيبي
ياعيني لا تغيبي
ولا تزيدي ف تعذيبي
مانريد انا غيرك
يا حلمي و سنيني
سنابل تضحك و تشوف وراها : خلاص اسكت 🙊
محمد سكت و نقز قدامها
سنابل خافت : لااااا نقز ف الشاااارع 😳
محمد شد ايدها و باسها ف كفها : اسف يا عمري حقك عليا
سنابل سكتت و قلبها يدق
محمد : اسف لأني هملتك هداكا اليوم و صدقيني ياعيوني الا من ضغط القراية لا غير
سنابل حطت ايدها على خده و تغنيله بصوت واطي :
ممنوع تهملني .. لازم حسك ع طوووول عم بتحبني
مابيرضيني الحب العادي .. ع طول بدي حس زيادي
قد ما أخد بدي اكتر .. و معي رَح تتعب
أنا مريضة اهتمام مابدي إشفى
أنا يلي احساسا نقطة ضعفا
أنا مريضة اهتمام مابدي إشفى
أنا يلي احساسا نقطة ضعفا
خلاصة الكلام ؛ مريضة إهتمام 💓
محمد قام خصلتها من ع وجهها و حضنها
سنابل حضناته و قنطت عليه
محمد شدها من يدها و يكر فيها معاه
سنابل : الكعب مانقدرش نجري بيه 😳
محمد شبحلها : نحيه
سنابل نحت كندرتها و مشو ورا الحوش من الجهة التانية
__________________
سلسبيل ادور في سنابل مالقتهاش
جت لروان : ماريتيش سنابل ؟
روان : عندها موعد غرامي
سلسبيل ضحكت : نبيها ضروري نتصل بيها ماتردش
روان : بريلها ورا الحوش
سلسبيل : سايريني نتحشم بروحي
روان : عادي به 😍
و خشو مع بعض
سلسبيل : توا وقت مواعيدهم !!
روان : شكلهم كانو متعاركين
سلسبيل : باهي مش وقته توا ف الحنة ؛ انى خليت عندها الكاميرا ف شنطتها نبي نصور بيها هناء
روان : امالا المصورة شن قاعدة اتدير
سلسبيل : تبيلك باش يطلعو الصور
و شبحت كندرة سنابل ملوحة : هذا شنو ؟
روان شبحت تحتها : شنو ؟
سلسبيل : فيه سندريلا هاربة 😂
روان شدتها من ايدها : ارجعي ارجعي فكينا
ضحكو و رجعو للخيمة
___________________________
(( يوم الحفلة ❤️ ))
07:30 م
هناء روحت من المزين و لبست فيلوها في دارها
طلعت لقت يوسف يراجي فيها باش يوصلها هو للصالة
قلبها دق بسرعة و ابتسمتله
يوسف كان حاط ايده في جيب سرواله ؛ نحاها و قعد مركز ف هناء
سلسبيل وراها تساويلها ف الديل
هناء تشوف ليوسف و ساكتة
يوسف ابتسم و قرب منها باسها ف جبهتها
هناء شبحتله : شن رايك
يوسف قلبه يدق : سبحان من صورك ..؛ مش عارف نعبر
هناء ضحكت
حط يوسف ايده على راسها و قعد يقرا عليها ف المعوذات
هناء سكتت مرتبكة
يوسف شد ايدها و باسها : نورتي حياتي يا حياتي
هناء ابتسمت و شبحت لسلسبيل
يوسف : هي نمشو ؟
هناء : ايه
سلسبيل خدت الكاب تلبسها فيه : اجديده قال خشيله قبل ماتطلعي
هناء : ايه عارفة
سلسبيل : باهي انى مع مني بنركب كلهم سبقونا ف الصالة
يوسف : معانا والله ماتفكري شوفيلك حد تاني
سلسبيل ضحكت : تو نكلم اصيل يجيني
و فتحو الباب لقو عصام و مرام كيف بيطقو عليهم
هناء ضحكت : اهلاااا
عصام و مرام ضحكو : الف مبروك
هناء فرحت : الله يبارك فيكم ؛ خشو
يوسف : خشو خلونا نصورو مع بعض
عصام و مرام خشو معاهم
مرام : ماقدرتش مانشوفكش قلت لازم ننزل و نباركلك
هناء ضحكت و نحت الكاب : فرحت بيكم هلبا
مرام تشوفلها : طالعة تجنني بسم الله ماشاء الله
هناء : عيونك الحلوات
عصام يشوفلها : اصلاً تريس عيلتنا مايعرفوش يختارو الا الحاجة الصح
يوسف ضحك
سلسبيل ضحكت : وين الكتكوت الصغيرون ؟ نبوه يصور معانا
مرام : كيف رقد عند ماما فوق
هناء : حي جبتوه صور معاي حتى هو
عصام : ماخطرش علينا
سلسبيل فتحت تليفونها : معليشي في عرسي انى تو يصور
و فتحت عصاة السيلفي تصور بيها : هيا اشبحولي هني 😬
وقفو هناء و يوسف جنب بعض ؛ مرام وقفت جنب هناء و عصام جنب يوسف و سلسبيل قدامهم
ابتسموا مع بعض و صوروا ❤️
_
بعدها نزلو يوسف و هناء للعارف لقوه مقعمز يراجي فيهم
يوسف : السلام عليكم
العارف شبحله : و عليكم السلام
يوسف سلم عليه و باس راسه
العارف : ان شاء الله مبارك عليك و عقبال البكاري
يوسف ضحك : الله يبارك فيك
العارف شبح لهناء و وقفلها
هناء قربت منه و ابتسمت
العارف نحا من عليها الكاب : بسم الله ماشاء الله
هناء ابتسمت و تحشمت
العارف عيونه دمعو : ان شاء الله مبارك عليكم يا بنتي
هناء تأثرت و دمعت : الله يبارك فيك
العارف دموعه نزلو : الحوش بيفضا عليا من بعدك يا هنيوه
هناء : ماتخلينيش نبكي يا اجديده 😢
سلسبيل ويوسف يضحكو
يوسف : امتى ماتبيها تجيك دير تليفون بس و خمسة دقايق تكون عندك
العارف رشف خشمه و مدلها هديتها
هناء : شنو هذا ؟
العارف : هدية عرسك
هناء خدتها منك : شكرًا هلبا علاش متعب روحك
العارف : افتحيها و شوفيها
هناء فتحتها لقتها طاقم ذهب
تفاجأت و شبحتله : اجديداااا !! والله هلبا عليا هكي
سلسبيل : اووووه 😍 مبروك مبروك
العارف : مافيش حاجة من قيمتك تلبسيه بالهني
هناء باست على راسه : ربي يحفظك ليا و يطول في عمرك
العارف طبطب على ظهرها و ضحك
هناء شبحت ليوسف : نبي نلبسه توا
يوسف تحشم قدام العارف ماقدرش يمسها
العارف شبحله : لبسهولها
يوسف كح و نحالها الطاقم اللي لابساته و لبسها طاقم العارف
هناء ضحكت و حطت ايدها عليه : عجبني هلبا شكرًا
العارف ابتسم وشبح ليوسف : خود مرتك و توكل ياولدي
يوسف : حاضر هي
العارف : راهي هنيوه أمانة عندك حافظ عليها زي عيونك
يوسف ضحك : و اغلى من عيوني يا جدي ماتوصيش
العارف ابتسم
يوسف شبح لهناء : هي
هناء شدت ف ايده و طلعو : في أمان الله اجديده
العارف يشوفلهم : ف حفظ الله
طلعت سلسبيل معاهم للقراج باش تساعد هناء في الركوب للسيارة
__________________________
نجاة ف الصالة ؛ مقعمزة في الاستقبال هي و سعاد و يشوفو لبعضهم بنظرات مسمومة
ازهار جت لنجاة : زعما شن صار ف الحار من بيجيبه
نجاة : التوصيل منهم هما واخدين حقه
ازهار : اه باهي قبل بنقولك يمشي واحد من الولاد خير مايتأخرو
نجاة : لالا الشركة اللي واخدين منهم عندكم الكلمة كلمة حاجتهم توصل ف الموعد
سعاد تسمع فيها و ساكتة .. ( عليك تزعبين .. من امتى معمل الحار نقولوله شركة 😏 )
__________________________
يوسف و هناء في طريقهم للصالة ؛ فجأة يوسف يغير طريقه
هناء استغربت : وين ماشي
يوسف شبحلها : لشقتنا يا عمري 😉😘
هناء انصدمت : لاااا اكيد تبصر
يوسف : انتي مرتي و اللي نديره فيك حلال عادي
هناء خافت : و الحفلة ؟!!!
يوسف : تي اما حفلة ! مادام حبيبك معاك طز ف الكل
هناء شدت فيه : يوسف فكني من الرعايش 😢
يوسف ضحك : رعايش شني انى راجلك مش خاطفك
هناء : و العرس لمن مدايرينه ؟
يوسف : خليهم يبرطعو و يهيجو فيه و حني نمشولهم غدوا ف المحضر
هناء تبكي : يوسف علاش هكي 😭؟؟
يوسف يضحك
هناء علت صوتها : توا ترفعني للحفلة !!
يوسف يبوس ف ايدها : انى ماصدقت جي هاليوم تبيني نصبر لبعدين ؟
هناء : وراس يوسف ارفعني للحفلة بلا ماتضحك علينا الناس يقولو عروسة هاربة
يوسف ضحك بصوت عالي : يقولو اللي بيقولوه مادرتيش حاجة حرام
هناء : يوسففففف 😭
يوسف يضحك ؛ لف و رجع
هناء سكتت و قعدت تمسح ف دموعها
يوسف : كانت بتكون مغامرة حلوة نعيشوها لكن انتي ماتبيش
هناء : علاش هكي ترعش فيا مش وقت تسهويكك
يوسف يضحك
______________________________
تاني يوم 🌹
11:00 ص
هناء طلعت من الدوش لابسة روب الحمام و شعرها مبلول
لقت يوسف مازال راقد ؛ وقفت بحداه تناشب فيه من شعره
يوسف شبحلها و ابتسم
هناء ابتسمت : صباحك ورد و فل و لوز
يوسف شد ايدها و باسها : صباحي عسل معسل بالحلاوة اللي قدامي
هناء تخربشله ف لحيته : هيا نوض نبيك شوية
يوسف جبدها من ايدها و لوحها بحداه
(( رومانسي هلبا سلامته مانقدرش نتعمق ف التفاصيل اكثر 😂 ))
__________________________
العيلة كلهم بايتين عند حلومة و مقعمزين يفطرو
الا نجاة مقعمزة معاهم و ماتاكلش
شبحتلها ازهار : نجاة كولي حويجة و انتي الفترة هادي ضاعفة هلبا
نجاة شبحتلها : طلعة هناء من عندي تقولي من خطفلي كبدي و الحوش مجاوب عليا
شبحتلها سلسبيل : مازال دوري حي عليك
حلومة ضحكت
سنابل : بتخلوني بروحي 😭 انى لتوا مأترة فيا هناء و نحس في روحي مش حانتأقلم
روان : امالا انى شن نقول اللي بتفضى عليا العمارة من بعدكم كلكم حتى من محمد معاكم 😔
حلومة : معاك محمود و خيره حتى هو
روان : نحس فيه بيسافر
ازهار شبحتلها : من قالك ؟
سلسبيل سكتت و ركزت معاها
روان : ماقالي حد لكن من زمان يقول يبي يسافر
ازهار : يسافر عينه و الله مايفكر
نجاة دمعت و تنهدت : اه يا هنيوه غيبتك موعرها
سعاد شبحتلها : حتى انى نفس الشي طلعة اوسيفه من الحوش خلتني مهبية و بكيت عليه لين دموعي جفو
نجاة شبحتلها ع الجنب : و ولدك ماهو طول عمره متغرب و انتي قاعدة بروحك !!! شن جاك جديد الشعور هذا ؟؟ ع الأقل قاعد في البلاد و بتشوفيه ديما
سعاد فنصت فيها : و خيره مش كبدي حتى هو اووه ؟! 😡
نجاة علت صوتها : عارفينه كبدك لكن غيبته و طلعته مش زي هناء
البنات ضحكو
حلومة : صلو ع النبي صبح
ردو عليها : عليه الصلاة و السلام
حلومة : راكم بديتو نسابة معش سلفات بس
سلسبيل خدت مالقي المية و رفعاته للمطبخ تعبي فيه
خش محمود من باب الجنان شافها تلخبط
سلسبيل شبحتله ارتبكت ..؛ كيف بتطلع ..
محمود قرب و شدها من ايدها : دقيقة
سلسبيل شبحتله و خدت نفس : نعم ؟
محمود مكشر وجهه : مبسوطة في حياتك ؟
سلسبيل سكتت
محمود : علاش ماعطيتيش لروحك فرصة انك تحبيني !
سلسبيل فكت ايدها : محمود ! انى مخطوبة توا
و قامت ايدها توريله ف الدبلة
محمود مضايق : معش تعذبيني بحركاتك
سلسبيل نزلت ايدها : انت مش قادر تستوعب ان خلاص انخطبت و إني مش ليك ؟
محمود : مازال مش مستوعب ؛ نشوف فيك ليا انى و بس مستحيل نخليه ياخدك
و طلع للجنان
سلسبيل قعمزت ف الطاولة متضايقة و مكشرة
________________________
بعد مرور عدة أشهر 🌹
( تحديداً في نهاية الصيف )
هناء و يوسف راكبين لشقتهم
هناء داهشة : اعييت ياريت لو فيه اسانسير
يوسف خدي منها شنطتها : تبي نقيمك ؟
هناء ضحكت : لا حبيبي مش للدرجة هادي
يوسف : الدكتورة قالت لازم ترتاحي و ماتعبيش روحك
هناء حطت ايدها على بطنها : مانرتاحش لين نجيب
يوسف فتح باب شقتهم : هانت خلاص معاش مازالك الا شهر و ان شاء الله تجيبي و تنوضيلي بالسلامة انتي و البرنسيسة
هناء خشت : ان شاء الله
يوسف سكر الباب و نحّا كندرته
هناء نحت وشاحها و قعمزت ع الكنبة تمروح بيدها ؛ خدت ريموت المكيف من فوق الطاولة و فتحاته
يوسف قعمز بحداها : خيرك قعمزتي هني
هناء : نبي نبرد
يوسف فتح التلفزيون وسكت
هناء شبحتله و وقفت : نوتيلك غذاك و نجي
يوسف : دقيقة دقيقة
هناء شبحتله : نعم
يوسف شدها من ايدها : ارتاحي بيبي مانبي شي
هناء : انت مش متغذي لتوا
يوسف : تو نطلع نجيب جاهز
و قعمزها بحداه : اهم حاجة راحتك حبيبتي ، راحتك عندي بالدنيا كلها
هناء ضحكت و عيطت : ااه
يوسف انخلع : خيرك
هناء ضحكت : بنتك تحركت خلعتني
يوسف ضحك و حط ايده على بطنها : وين بالزبط
هناء شدت على ايده و قعدت تحرك فيها مكان حركة البيبي
يوسف حس بيها قلبه دق و ضحك
هناء تشوفله : راجي مازال في حركة تانية
يوسف : قصدك تبدي عارفتيها كيف بتتحرك ؟
هناء ضحكت : طبعا
يوسف يبوس فيها ف بطنها : ربي ينوضكم ليا بالسلامة و نفرح بشوفتها أميرتي الصغيرونة
هناء حاطة ايدها على شعره : يارب
يوسف شبحلها : به شن بنسموها ؟ هي قريب تجينا و لتوا ماخترناش اسم
هناء : مش حاطة اسم معين في بالي
يوسف : حتى انى مش عارف
هناء سكتت
يوسف سكت شوية و قال : ميرا !
هناء : حلو
يوسف : لو ماعجبكش نشوفو غيره ماتجاملينيش
هناء : لا بالعكس ياروحي عجبني هلبا
يوسف ابتسم و باسها ف خدها
_________________________
06:30 م
سلسبيل صابغة شعرها كستنائي و تشوف فيه ع المراية و فرحانة
سنابل واقفة بحداها : طلع عليك مش عادي جت النية ندير زيك
سلسبيل : ديريه و اخلعي نجاة 😍
سنابل ضحكت : باش تخلعلي رقبتي
سلسبيل قعمزت ع السرير : بروڤة الفيلو خايفة منها تعرفي
سنابل : علاش
سلسبيل : مش عارفة ؛ نحس في روحي ضعفت عليه
سنابل : انتي صح ضعفتي لكن مش لدرجة مايجيكش
و شرين تليفونها
سلسبيل : مني ؟
سنابل : ختشيبيييي 😌
سلسبيل : ياختشييي
سنابل طلعت من الدار و خشت لدار هناء تتكلم
بدت مكانها المفضل للحب بعد ماهناء تزوجت
سنابل : الو
محمد : اهلين يا قليبي
سنابل اتكت ع السرير و فتحت شعرها تلعب بيه : اهلين بيك يا روحي
_
سلسبيل فتحت تليفونها و اتصلت بهناء ..
هناء ردت : الو
سلسبيل : اهلا
هناء : اهلا بيك ؛ كيف حالكم
سلسبيل : تمام كيف حالكم انتو
هناء اتكت ف سريرها : الحمد لله ، اليوم مشيت لموعدي الدكتورة قتلي تبي الراحة
سلسبيل : امالا ارتاحي مش لازمك الحركة
هناء : ايه و هو هذا ، شن جوك ؟
سلسبيل : مليح صبغت شعري 😍
هناء ضحكت : الله ؟ نبي نشوووف
سلسبيل : تعالي باتي عندنا اليوم
هناء : ماظنيتش يوسف يخليني
سلسبيل : بحداك هو ؟
هناء : ايه
سلسبيل : افتحي السبيكر
هناء فتحتاته و ضحكت
سلسبيل تصيح : يوسف !!!
يوسف : ايوه
سلسبيل : ممكن تجيبلنا اختنا الليلة تبات عندنا ؟
يوسف : ماعنديش مرا تبات برا حوشها
هناء ضحكت
سلسبيل تكنطت : علاش خديتها و حرمتنا منها في مرة وحدة هكي ؟
يوسف : تبيها تعاليلها انتي
سلسبيل سكتت
هناء سكرت السبيكر : اليوم انى والله تاعبة خلي غدوا الصبح تو نجي
سلسبيل : خلي عندك كلمة بس
هناء : اكيد اكيد ..؛ غدوا بيديرو المقروض ولا ؟
يوسف شبحلها
سلسبيل : ايه
هناء : خلاص تو نجي
سلسبيل : اوكى .. باي
هناء : سلام
و سكرت الخط
يوسف : مقروض شني ؟
هناء : متع العرس
يوسف : امالا عابية بتمشي و بتديري معاهم !
هناء : عادي شن فيها
يوسف حرك راسه بمعنى لا : معش تنزلي على روحك و تتعبي يا هنو اسمعي الكلام
هناء : المقروض مافيشي تعب كله بالتقعميز
يوسف قرب منها و حضنها : و التقعميز مش تعب على ظهرك ؟ اقعدي في حويشك مرتاحة ف سريرك مالك و مال الشقى ؟
هناء : باهي بالشوية بطني
يوسف وخر من عليها : ننسا فيها البرنسيسة و هي واقفتلي في كل حاجة
هناء ضحكت : تحمل شن بنديرلك
يوسف قرب منها : نتحمل علاش لا 😘
هناء : يوسف ماعنديش ليك جهد
يوسف يهمسلها : عندك غر للمقروض ؟
هناء تضحك
يوسف ...
______________________
تاني يوم 🌹
04:00 م
العيلة ملتمين عند حلومة يديرو في المقروض و الغريبة للسهرية
نجاة تشوف لنقشة المقروض و متعفلقة : انقشو باهي خيره هكي شكله !!!
ازهار : المناقش شكلهم مايصلحوش
نجاة : ياريتني خديته واتي و ريحت روحي
سعاد بصوت واطي : لا يعجبك عجب ولا صيام في رجب 😒
خش محمود : السلام عليكم
شبحوله و ردو عليه : و عليكم السلام
محمود شاف الحوسة اتضايق و طلع
مرام شادة ولدها يزن يعيط و تهز بيه : خلاص يا مامي اسكت
خشت هناء للدار : السلام عليكم
شبحولها و ردو عليها السلام
نجاة : هنيوه شن حالك اليوم يمي
هناء مبتسمة : الحمد لله كويسة
سلمت عليهم و قعمزت تهدرز معاهم
___________________
سلسبيل شادة روان اديرلها في فتلة
روان تتوجع : بالشوية
سلسبيل شادة الخيط : كان تبيني انظفلك وجهك اسكتي
روان تتأفأف : بسرعة قبل ماتجي ماما
__
سنابل مقعمزة ع كوفينو السيارة ف القراج و محمد واقف قدامها
محمد : قصدك بنلبسو الدبلة ف الصالة ؟
سنابل : ايه ، مناسبة وحدة نخلوها شن رايك
محمد : مش عارف نشاور امي قبل
سنابل : اكيد مش حاتقول شي و تعجبها الفكرة خير مانديرو بيان و مصاريف زايدة
محمد سكت و قعد يفكر
خش يوسف من الشارع سنابل تحشمت منه و نزلت بسرعة من السيارة
يوسف شبحلها : فيه حد براني الداخل ؟
سنابل حركت راسها بمعنى لا
يوسف سكت و خش
_
هناء تنقش في المقروض : وين البنات ماريتش فيهم وحدة
حلومة : توا كانو احدانا
هناء لودت سفرة المقروض باش تكمل نقش
جت اللقطة ف عين يوسف عيط عليها من برا الدار : هنااااء !!!
هناء انخلعت و شبحتله : نعم
يوسف : قتلك ماتمسيش الرزين ولااا
هناء : باهي انى حركتها في مكانها بس ماقمتهاش
يوسف فنص فيها و سكت
العيلة يشبحولها
نجاة : خيركم !
هناء سكتت
ناضت و مشتله برا الدار : خيرك عيطت عليا قدامهم ؟
يوسف : لانك ماتسمعيش في الكلام و خليتيني نتعصب عليك
هناء سكتت
يوسف : استغفر الله العظيم .. اسف هنو
هناء : تقدر تكلمني بالشوية مش ضروري تحشمني قدامهم
يوسف حط ايده على خدها : اسف ياعمري انى تعصبت .. والله هذا كله من خوفي عليك
هناء سكتت
يوسف خداها من ايدها و خش هو وياها لحلومة
______________________
بعد مرور اسبوع 🌹
سلسبيل مقعمزة في المزين و جاهزة تراجي في اصيل يجيها
شرين تليفونها لقاته محمود
خافت و قلبها دق بسرعة
قعد محمود يتصل هلبا مرات و هي ماتردش عليه
بعتلها مسج .. ( ردي عليا و خليني ندوي معاك هالمرة بس ؛ و نوعدك انها تكون اخر مرة )
سلسبيل قعدت تقرا ف المسج و تفكر
محمود عاود يتصل ..
سلسبيل خدت نفس و ردت : الو
محمود صوته مخنوق : علاش درتي فيا هكي ؟
سلسبيل دمعت : محمود لو بتدوي نفس الكلام خليني نسكر خير
محمود سكت و عيونه رقرقت دمعتهم
سلسبيل شدت بكيتها : انت جيتني متأخر بعد مهاب
محمود مدمعات عيونه : يعني لو سبقته كنتي حاتوافقي عليا و تكوني معاي ؟
سلسبيل سكتت و دموعها نزلو
محمود علّا صوته : ردي علياااا
سلسبيل تبكي
محمود دمعوه نزلو : علاش درتي فيا هكي يا سلسبيل ؟ .. انى تغيرت و نضجت بعد ماحبيتك
سلسبيل رمشت عيونها بسرعة : انى لازم نسكر توا اصيل قريب يجيني
محمود رشف خشمه : وضعي مش سليم و عالم بيا العليم
سلسبيل تبكي : محمود اسكت و ماتخلينيش نندم
هي تبكي و هو يبكي 💔
محمود : ماتروحيش معاه
سلسبيل : شنو ؟
محمود : انتي قولي باهي بس و انى نجيك توا نروح بيك للحوش
سلسبيل : انت شن تقول ؟
محمود : روحي للحوش اللي كبرنا فيه .. للحوش اللي فتحنا فيه عيوننا مع بعضنا
سلسبيل تبكي
محمود : يهون عليك الحوش اللي تربيتي و فتحتي عيونك فيه ؟ ولا لمة العيلة و حضن امك تخليهم ؟
سلسبيل سكتت
محمود : مش هذا كلامك اللي قلتيه ليا وقت كنت بنسافر !!!
سلسبيل ساكتة
محمود : وقتها ماسافرتش لاني خديت بخاطرك بس ؛ ماهُنتيش عليا نسافر و نخليك متضايقة عليا
سلسبيل تنهدت : الموضوع يفرق يامحمود
محمود يعيط : لا مايفرقش .. انتي تبي تحرقيلي قلبي بللي اديري فييييه .. تبيني نشوفك معاه ديما و نتقطع بالعرق طول عمري
سلسبيل تسمع فيه و تبكي
محمود يكح و داهش : سلسبيل ! .. انتي غر قولي باهي و راس عيونك مانكون الا عندك و نروح بيك
سلسبيل تبكي : اني على ذمة راجل تاني توا مانقدرش ندير الهبال اللي تقول فيه
محمود : انتي مازال مامشيتيلاش عندي أمل انك تكوني ليا
سلسبيل : محمود نحي الأفكار هادي من راسك لاني مش من نصيبك .. ان شاء الله تلقى بنت الحلال اللي تحبك و تسعدك و تعوضك على كل شي
( سكرت عليه الخط و انهارت بالبكي )
محمود كسر تليفونه ع الستاك و قعد يعيط
(( لـو كـان دمـع الـعـيـن يـرد الــغالـي نـبـكـي عـلـيـك سـنـيـن يـا غـالـيّـا
لـكـن مـقـدر مـن الـلّـه الـعـالـي انـت نـصـيـب الـغـيـر مـاكـش لـيـا 💔 ))
__
سلسبيل تبكي جتها المزينة مستغربة : خيرك يا عروسة فيك شي ؟؟
سلسبيل شبحتلها : عدليلي مكياجي لو سمحتي
المزينة خدتها من ايدها و دخلتها حجرة العروسة : قعمزي و اهدي شوية
سلسبيل قعمزت ع الكرسي و مازالت تبكي واجعها محمود
المزينة تشوفلها : نجيبلك عصير او اي حاجة تشربيها ؟؟
سلسبيل حركت راسها بمعنى لا : عدليلي مكياجي بس خوي قريب يجيني
المزينة بدت تمسحلها و تعاود
___________________________
يوسف درس السيارة قدام الصالة : راجي هنو ماتنزليش
نزل و فتحلها الباب : هاتي ايدك و انزلي بالشوية عليك
هناء شدت ف ايده و نزلت
يوسف يركب فيها ف الدرجات و يقيملها ف عبايتها : ردي بالك تعتري
هناء : ماتخافش شادة روحي
يوسف رخاها و هي خشت الداخل داهشة
لاقتها سنابل : شن صاير فيك
هناء داهشة : شدي مني شنطتي خليني نساوي روحي
سنابل خدت منها الشنطة ووقفت معاها ع المراية
هناء تشوفلها : صار من محمد بيخش ولا ؟
سنابل : طبعا 😍 اليوم خطوبتنا
هناء ضحكت : عصفورين بحجرة احلى حاجة
_______________________
مرام واقفة ف الحمام تتصل بعصام ..
عصام رد : ايوه
مرام : اها عصومي شن صاير في يزن
عصام : اهو نلود بيه في السيارة ماباش يسكت الا هكي
مرام : باهي و اخيراً سكت ؛ لو شد في الصحيح و قعد يعيط جيبهولي و خلاص
عصام : مايهمكش فيه استمتعي بوقتك انى معاه
مرام : لالا نعرفه حايتعبك و مش حايسكت
عصام : خاطرك تتبهدلي ولا مرايفة عليه
مرام ضحكت : مرايفة عليه
عصام علّا صوته : الله يرحم ياماتك يا عصام
مرام تضحك : خيرك غرت من ولدك
عصام : خلاص توا خليك مستمتعة بوقتك و بعدين نتفاهمو فيه الموضوع
مرام ضحكت : تمام به
__________________________
09:00 م
محمد وصل الصالة و اتصل بأزهار ..
ازهار ردت : الو
محمد : انى وصلت
ازهار : خليك هي ؛ شوية و تجيك سنابل اتدخلك
محمد : تمام به
سكر الخط و قعد يراجي
جاته سنابل تجري و وقفت ورا الباب : محمد ؟؟
محمد قرب من الباب : ايوه
سنابل : خش خش
محمد خش لقاها لابسة قفطان ماكسي احمر
قعد يشوفلها من فوق لتحت و عيونه قلوب 😍
سنابل ضحكت : قول رايك يا حلوة ياحلوة مفيش غير حلوة 😂
محمد ضحك : احلى من القمر
سنابل خداته من ايده و خشو الصالة مع بعض
قصوا التورته و لبسوا الدبل و هكي انخطبو رسمي 😍💍💘
_________________________
12:30 ص
طلعت سلسبيل من حفلتها و ركبها مهاب ف السيارة
لقاته فاتح المكيف و اغنية All of me
قلبها دق و ابتسمت
مهاب سكر عليها الباب و ركب معاها يضحك
سلسبيل شبحتله : عطلتك حتى اليوم وله
مهاب : عادي المهم توا معاي ياعمري
_
و بدو السيارات وراه ايبيبو و يطلعوا ماشين للدخول في حوش اماليه
______
هناء مع يوسف ف السيارة
يوسف : مش كان مشينا لحوشنا ياهنو ؟ شن تبي ف المشية معاها توا ؟
هناء : هادي اختي يايوسف لازم نكون معاها
يوسف : عارف اختك لكن انتي تاعبة المفروض توا مروح بيك الحوش مش ماشيين معاهم
هناء شبحتله : و انت ماتبيش تحضر تدريجة صاحبك ؟
يوسف شد ايدها : وجودي مع مرتي في حوشي اهم
هناء : كلها على بعضها نص ساعة ؛ نحطوها و نروحو
يوسف باس ايدها : مستاحشك هلبا نراجي ف العرس امتى يتم باش تقعديلي ديما في الحوش
هناء ضحكت : و اهو تم و قاعدتلك
_____________________
سلسبيل مع مهاب في السيارة فرحانة و تصور هي وياه
فجأة تجي سيارة اتضايقها من الجنب
ركزت ف السواق لقاته محمود بسيارة مراد ؛ انصدمت و جسمها صقع
محمود فتح الروشن شوية بحيث خلّا عيونه يبانو و شبحلها بنظرة حب و حزن و قهر 💔
سلسبيل قلبها دق و اتضايقت عليه
مهاب شبحه : هذا مني !
سلسبيل سكتت شوية و قالت : محمود ولد عمي
مهاب : نكرهه الجو هوا متع لما يبدو يضايقو ديما يسببو في حوادث و بالذات في الأعراس
سلسبيل سكتت و تنكدت
محمود عفس ع البنزينة بالقوة و سبقهم 🔥
سلسبيل تشوفله و ساكتة
_________________________
بعد شوية وصلو السيارات لحوش العرس و بدو ينزلو النساوين
_
هناء : يوسف رد بالك تضرب بالرصاص تعرفني مانحباش
يوسف : حاضر ولا يهمك
هناء : وصيتك يا يوسف بالله عليك
يوسف : حاضر يا بيبي ؛ اصلا ماجبتاش معاي
هناء اطمنت : باهي الحمد لله
يوسف : راجيني نفتحلك الباب
و نزل يفتحلها فيه
هناء مدتله ايدها و نزلت
يوسف شادها يمشي فيها لفم الخيمة : لما بنروحو ماتطلعيش لين تكلميني
هناء : حاضر به
و خشت الداخل
_________
بدو الشباب يديرو ف الألعاب النارية و مهاب يتدرج مع أصحابه و ناسه
___________________
محمود واقف بعيد و مدرق ورا شجرة ؛ شاد مسدس و يقنص على مهاب
كل مابيضغط ع الزناد يجي حد قدامه لين توتر
شاف محمد خوه معاهم نزل السلاح من ايده
___
سلسبيل مقعمزة ف الكوشة و متوترة
جايين معاها من عيلتها امال و هناء و مرام و سعاد و زوز من خالاتها
جابولهم حوش العريس رزاطة و عبمبر يضيفو فيهم و هناء مابتش تاخد
شبحتلها سعاد : خودي منها
هناء : لالا مانبيش كان هدا نرجع حاشاك
سعاد : لا ياهنيوه مش على كيفك بعدين يجي في خاطرك
خدتلها طرف عبمبرة و عطتهالها
هناء مكشرة : باهي مانردهاش عليك
_____________________
لما مهاب قرب من الخيمة
محمود تعصب و شد السلاح تاني
بدو الرجالة يقرو في المعوذات و محمود بدي يصب عرق
قعد يقنص على مهاب و هو خاش و ضغط ع الزناد
و فجأة و بقدرة قادر مهاب يخوا الرصاصة و تجي في يوسف
يوسف جمد في مكانه من حرقتها و معش تحرك
مهاب خش للخيمة و بدت النوبة و تضرب و صحابه يصلو ف الرصاص
محمود قعد يشوف و مش فاهم شي
يوسف بدت حركته بطيئة ؛ شدت عصام من ايده و طاح
عصام انخلع و طبس عليه : يوسف ؟؟ يوسف !!!!!
محمود انصدم و شد راسه
فجأة محمد يلمحه من بعيد
محمود ركب السيارة و طلع بسرعة 🔥
محمد شبح لعصام لقاه مطبس على يوسف و كلهم يشوفو فيه
و يوسف طايح ع الارض و غارق بدمه
محمد مشي يجري لسيارته بيلحق محمود
_____________
هناء واقفة و شادة قلبها : نبي نروووح
سعاد شبحتلها : خيرك ؟!!
هناء مدمعة : انى الرصاص مانحباش خلونا نروحو احسن
مرام : اصبري شوية اكيد بيكلمونا
هناء خدت نفس وطلعت تليفونها : بنكلم يوسف نبي نروح
مرام : غر اصبري تركب سلسبيل لحوشها و نطلعو
هناء سكتت و قلبها مش مرتاح
____________
يوسف قاموه صحابه و عصام للسيارة ماشيين بيه للمستشفى بدون مايحسسو مهاب
اصيل واقف شاد راسه و مش فاهم شي
جاه خاله : كلم اختك تطلع تحرررك
__________________________
عصام شاد يوسف ف حجره و ايديه دم : تحمل يا يوسف تحمل
يوسف فتح عيونه و يتكلم داهش : هناء .. هناء يا عصام حطوها في عيونكم ... ردو بالكم عليها
عصام قنط ع الجرح و داهش : اسكت و ماتعبش روحك بالكلام اسكت
__________________
محمود يجري بالسيارة و منهار : لا يارب لااااا ... لا يارب لاااااا ... الا يوسف لا يارب لا لا لا لالا
محمد يجري وراه و يغيرله ف الضي و يكلكس : اوقف يا محموووووود .... اوقفففففف
محمود يجري و مش حاس بيه و هو منهار و مصدوم
فجأة يلقى روحه خاش في الطريق العكسية و تقابله سيارة جاية
محمد يشوف فيه و يعيط : محمووووود !!! اوقف يا محمووودددد
و شاد ع الكلاكس
محمود من سرعته يخش في السيارة و يصير حادث شنيع
محمد يشوف فيه و يعيط : لاااااااا !!!!!!
يـتـبـــع ... 💗
__________________
لن أسمح بنقل الرواية دون ذكر المصدر ‼️