Kinuha ni Richard ang pulsuhan ni Amy subalit tinabig lang nito ang kanyang kamay. Larawan ng pighati ang nakaukit sa kanyang mga mata habang nanghihingi ng pabor sa pagkakataon.
"Uuwi na tayo, sa ayaw o sa gusto mo."
"Richard, wala na tayong uuwian." Tumalikod si Amy upang bumalik sa casang pinanggalingan. "At higit sa lahat, wala nang tayo. Pag-aari na ako ng iba bago ka pa dumating sa buhay ko, sana isipin mo iyan!"
Kinagat ni Richard ang labi at hinigit ang braso ni Amy upang katagpuin ang nanunubig na mata ng minamahal. "Pag-aari ka ng iba?" Tumawa nang mapait ang lalaki. "Pero asawa na kita." Marahas niyang inilapit ang kabiyak upang harapin siya nito. "Asawa kita, narinig mo?" Tiningnan niya nang deretso, mata sa mata, si Amy nang may poot at pagmamakaawa. "Asawa kita at akin ka na! Wala akong pakialam kung sinong demonyo pa ang nagmamay-ari sa iyo noon pero akin ka na ngayon! Simula nang ikasal tayo, kadikit na ng pangalan mo ang apelyido ko! At hangga't pangalan ko ang ginagamit mo! Akin ka lang hanggang sa araw ng kamatayan mo!"
"Bakla! Naloloka ako!"
Punyeta. Sino ba 'yang maingay na 'yan?
Kaya nga ako nagkulong dito sa toilet cubicle e para tahimik ang mundo ko at nakakapag-type ako ng entry ko nang matiwasay 'tapos may maingay?
"'Te, bunganga mo, 'te!" saway pa ng isa. Letse, sino ba 'tong mga 'to? Me-memo-han ko talaga 'to.
"Baks! Nag-backout daw si Boss Niz as judge doon sa writing contest ni Sir GT!"
Itutuloy ko na sana ang pagta-type ko sa phone kaso narinig ko ang pangalan ko.
"Kinalaman mo roon, 'te?"
"Baks, kinuha akong judge ni Boss Karen! Kaloka!"
"'La! Sana all."
"Anong 'Sana all' ka diyan? 'Te, sabi niya, sasali raw si Boss Niz. Anonymous entry niya, uy! Hanapin daw namin. Putang ina, bakla, baka i-bash ako n'on sa FB kapag hindi ko napili ang entry niya!"
"Gagi, 'te, good luck hahaha!"
"'Ina mo, baks, magre-resign ako kapag binash niya talaga ako, sinasabi ko sa 'yo."
"Grabe, resign agad, 'te? GG?"
"Wala pa akong nababasang gawa ni Boss Niz, bakla! Nagsusulat ba siya? Akala ko, editor lang siya."
"'Te, writer 'yon dati. May copy nga ako ng libro niya."
"Hindi nga? Hindi ko alam! Pabasa nga. Kinakabahan talaga ako, bakla. Bigay mo agad bukas, ha! Bukas din kasi siya magpapasa. 'Tapos kapag—"
Hindi ko na pinatapos ang sinasabi niya at lumabas na ako sa cubicle kung nasaan ako nakatago. Tiningnan ko ang nag-uusap. Mga specialist pala ni Boss Armie. Kulang na lang, humiwalay ang panga ng isa pagkakita sa akin habang masama ang tingin ko sa kanya.
"Pakilakasan, ha? Hindi pa rinig ng buong Metro Manila," sermon ko sabay irap sa kanila.
Ayoko talaga ng tsismisan sa restroom bilang disturbance ng current action dahil sobrang gasgas ng eavesdropping-sa-restroom scene para mag-reveal ng something shocking. Pero bakit naman kasi talaga ang daming tsismisang nabubuo sa restroom? May scientific explanation ba rito sa phenomenon na ito?
Pagtapak ko ulit sa floor ng office, ang ganda na ng sinag ng sunset sa glass window 'tapos ang lamig pa gawa ng hangin at air con. Yung office namin, parang nagta-transform bilang dating area. Rooftop garden feels. Siguro, kung hindi nakuha ng Dream Catchers itong skyview, malamang na SB o kaya Coffee Bean ang kukuha nito dahil sa ambience.
Wala akong dalang kahit anong gamit kaya dinaanan ko na lang si Boss Ayen sa post niya para magpaalam na uuwi na. Sinabihan lang niya ako ng "Ingat pauwi" 'tapos dumeretso na ako sa desk ng team ko.
"Mag-update kayo sa email ng status ng changes kanina, ha?" paalala ko pa kina Yeng.
"Yes, Ate Niz. Ingat."
"Ingat din pag-uwi," sabi ko, at di-sinasadyang madako ang tingin kay GT.
Nginitian na naman niya ako. At ang nakakainis, kulang na lang, magkaroon ng flashing neon lights sa noo niya na nagsasabing, "Aw, tampo ka pa rin?"
Ang laki ng respeto ko kay Gregory Troye, pero dito sa Vincent na 'to, wala talaga akong amor. Ang lakas ng saltik sa utak, naiirita ako.
Umalis na ako sa office at dumeretso sa sakayan. Mahirap sumakay ng van sa Rotonda every four in the afternoon hanggang seven in the evening kasi rush hour. At ito na naman ako't lalaban sa traffic. Quarter to six na at malamang, nine pa ako makakauwi nito sa bahay. Sana lang may mag-offer na ihatid-sundo ako sa Rotonda daily. Si Justin naman kasi, hindi ko alam kung paano sasabihan ang trabaho ko nang hindi magdadaldal sa ina ko. Isa ring nakakainis. Mas loyal pa siya kay Mommy kaysa sa akin.
May nagbaba ng pasahero sa terminal ng Rotonda kaya agad ang pakikipagbalyahan ko sa mga naghahabol din sa biyahe. Kapag ganito, nagiging mandirigma talaga ako nang wala sa oras. Doon ako pumuwesto sa backseat ng 18-seater van. Nakakaloka kasi ang liit ng braso ko 'tapos pahahatakin pa ako ng pagkalaki-laking pinto bilang part-time door manager ni Kuya Driver. Dapat talaga hiniram ko na lang ang motor ni Kuya Pat. O kaya nag-board na lang ako malapit sa Mayon street.
Matapos magbayad, kinuha ko agad ang phone ko. Naka-airplane mode ako kanina para walang istorbo sa buhay. Pagbukas ko, meron akong 44 unread messages na sunod-sunod na nag-vibrate at pinuno ang screen.
Message ng 8080.
Message ng 4438.
Message ng online banking.
Message ni Daddy.
Message ng telecom.
Message ng alerts.
Message ni Mommy.
Message ng online shops.
Inbox ng single?
Pero bago ang lahat ng 'yan, nakita ko muna ang message galing kay Justin na huli ko nang binuksan. Saving the worst for last.
Justin:
Love san ka
Love
Loooooove
Eunice Riodova San Miguel wer na u d2 na me
Loooove misyu
Love ngaun lng dumating cake na pnagawa q pra ky mama last bday nia
nagus2han nia decoration.. fave niya rin.. choco 2.. dko masend photo blocked mko eh..
Love i luv u
Galit kpa
San ka
Sunduin kta
Eunice
Love call aq
Ptay ba fone mo
Bat nka off loc mo
San kna love
Love answer the phone
Love buhay kpa ba
Nag aalala nko
Rereport na kmi sa pulis
Tumawag agad ako sa kanya. Sinagot niya sa ikatlong ring 'tapos pinatay ko rin agad bago ako nag-text.
Eunice: Buhay pa 'ko. Nasa QC lang ako. OA mo. Biyahe na 'ko pauwi.
Nakapag-reply siya agad.
Justin:
Knabahan tlaga q kala q nasalvage kna
Bat dka ngreply
San k galing
San ka ngaun sunduin kta
Wag mona ulitin 2 ahh
Knabahan tlaga q puta
Ay sorry sa cuss
Pro kac
Wag mo na tagla uliting 2
*tlaga
O, e di, naramdaman mo rin ang naramdaman kong tarantado ka.
Ma-unblock na nga 'to. Hmp!
♥♥♥