#الكاتبة_نهى_الحسون
#قضية_الشمل
مساء الانوار والسرور عليكم جميعاً 🌹🌹🌹
بما ان اليوم خميس عطلتي بس هاليوم راح انزللكم بارت
لان الايام الجاية راح نتوقف طول الاسبوع القادم
لان عدي التزامات بخصوص عاشوراء ومحرم
شكرا لتفهمكم مقدما
شمر العدة بالكاع وصدر صوت عالي كمزت منه
اتقدم عليها بتهديد
.. يعني حضرتج متخافين مني
بلعت ريگي حسيت بتهديد
وليش اخاف منك اني اعرف بروحي ماعندي شي اخاف منه ولا انت تكدر تسوي لي شي يهدد امني
رفع حاجبه ودنك عالبنكة الموجودة عالارض وشالها
جان يتحرك وعيونه على شفايفي
وترجع تباوع لعيوني كانت نظراته بيهم مغزى
ما كدرت اتحمل استفزازه ورفعت صبعي بتوعد وعطت بي معترضة
.. لا تباوع علية بهاي الطريقة مهيمن انتبه لنظراتك
رفع حاجبه وكال .. يعني شلون ترديني اباوعلج
.. مهيمن كم مرة اكلك لا تستهزء بية
انت تعرف كلش زين اني شنو كنت اقصد
.. والله انتي ما تنحزرين بالله فهميني
.. طبعاً اني كنت مقررة ان ماكون صريحة وياك
بس انت كوة تدفعني وتخليني احجي
يا استاذ مهيمن بطل نظراتك الي دائماً تتعمد تذكرني بموقفك وياي بيوم اقتربت مني
.. و.. و سلبت برائة شفايفي
انا كلت هيج وما اشوف الا ومهيمن نطت عيونه و وكعت البنكة من عنده وصارت طبة قوية عبالك قصف
ارتديت للخلف وعطت يخوف من ورة الصوت
ما انطاني مجال استوعب الخرعة
بسرعة اجة بتجاهي مثل الزوبعة
وزنگني من صفحة كتف البجامة بعد شوية راح يرفعني
عبالك حرامي مسحول هيج جان شكلي
اتخردلت وانخبصت
عيوني متسعة .. شش .. شش..نو مهيمن شبيك شنو صار
زمخ بية بغضب
.. ولج غضب اسود طركاعة شنو كلتي قبل شوية
شخرطتي
لازم كتف التشيرت مالتي
كان يرزل بية ويحركني بنفس الوقت مثل اللعبة يجيبني يمين اروح يسار
كنت مصدومة
.. ش.. ش.. نو .. ماكلت شي
سمعنا صوت نور المتفاجيء ورانا كالت
.. لك مهيمن هاااي شجاي تسوي !!!!!!!
درنا وجهنا اثنينا
كان مهيمن بعده لازمني من كتف التشيرت واني بعدني معلكة مثل الحرامي المسحول
باوع عليها ورجع دنك باوع علية
نور انطته نظرة لوم وكالت
.. مهيييييمن !!! شنو كلنا.
سألها .. شنو.. شنو كلنا ؟؟؟
نور رفعت حواجبها وكالت .. شنو وين لحگت تنسى
الهدوء .. الرقة .. اللطافة
گلب عيونه بقلة صبر
رجع باوع علية ونفض ايده مني وتركني
وعدل الكتف البجامة المخربط المعفوس
على كيف بكل رقة وحنان
باوع لنور الي كانت بعدها تباوع عليه ضايجة
وكال .. شكو خير ليش تباوعيلي هيج ترة
كل شي ما سويتلها جنت احجي وياها اريد افهمها
نور بعدم اقتناع
باوعت علية ورجعت باوعت عليه وكالت
..لا واضح كل شي ممسوي والدليل لون وجهه المخطوف
هم يحجون واني اباوع عليهم منا ومنا
كل شي مامفتهمة منهم بس الي اعرفه نور اجتي باللحظة الحاسمة ونقذتني والا جان انسحلت وما اعرف شنو السبب
عدلت تشيرت بجامتي وصرت اتحسس حافة گبتي
عليها لان من زنك كتف البجامة حافتها اذت رگبتي.
نور باوعتلي وشافت الخط. الاحمر وشهكت وكالت
.. شوف شمسوي برگبتها عود صدك تحجي مهيمن معقولة ؟؟
هي كالت هيج واني اتخبلت
وكلت .. شوف والله اذا ما راح الاثر من على رگبتي لاخلي بيك اثر برگبتك مقابل السويته بية ما اكون ريم
كملت كلامي ادردم واني حاصرتني البجية
.. والله راح تتشوه بشرتي وتتحسس
مهيمن باوع لنور وكال .. هااا نور هم كولي لا تفهمها غلط وجاي تحجي بعفوية. وانا لازم اكل تبن واصفي النية
باوع علية وسألني .. ياست عفوية يا ام لسان مزروف
بالله ما تفهميني شلون تردين تسويلي اثر برگبتي
نور باوعتلي وخدودها حمز وكالت .. من عزة ريم
هذا لسانج المزروف شوكت يعربونه
.. شنو شبيج نور ترة اني ما گلت شي
عفية نور لاتخلينه يخوفج انتي الثانية بصوته العالي
مهيمن بفروغ صبر كال لنور .. نور اشتري بت عمج
واخذيها من گدامي وطلعوا لا والله. اجي اعلگها بمكان البنكة
نور.. مهيمن طول بالك
باوعت علية وكالت ريم طلعي واني جاية وراج
باوعت عليه وگلبت عيوني وهزيت شعري بحركتي المفضلة وطلعت ومن طلعت
سمعت نور تكوله .. عفية عليك مهيمن هو هيج الي يريد يحسس بنية بأنوثتها يگوم يسحلها.
.. هو كلت راح ناكل تبن ونسوي الي كلتي عليه
بس والغضب شيسكته
سمعت صوت ام مهيمن وابتعدت عن الغرفة
واختفى الصوت ونزلت جوة
نور
شنو هذا معقولة. لا لا مستحيل
لانور لا تضلمينه.
جنت احجي وية نفسي وانا اگلب بالجهاز الي كدامي مستغربةً
كنت جوة بالمطبخ يم ام مهيمن واجتي بنت جوارينهم طلبت من عدنا الشواية مال السمج الي يشون بيها بالتنور
اتذكر صعدها قبل كم يوم فوك السطح الجديد
صعدت حتى اجيبها ومن طلعت للسطح لفت انتباهي كونية بيضة
ملفوفة مثل الشوال
عگدت حواجبي وانا اريد اتذكر اني شوكت مصعدة هالگونية
وشنو حاطة بيها بالحقيقة انا المسؤولة عن تنظيف البيت كله
واعرف الغراض والسطح بالذات ما حطيت بي شي غير بس الشوايا وغراض التنور فقط
رحت عليها اريد اشوف شنو بيها
لكن من فتحتها انصدمت
هاي شنو هذا مو جهاز جلال الاختراع الي سافر علموده
هذا شيسوي هنا ليش هو گال اخذوه الشركة واتعاقد وياهم ومنتظر الاعلان عن الاختراع
بقيت مصفصفة ومحتارة والله يا جلال حيرتني ما اعرف وين راح
توصلنا بهذا غموضك
رجعت كلشي بمكانه واخذت الشوايا ونزلت جوة
وانا افكر شلون اعرف شنو سالفة الجهاز ومن جلال بالذات
بس المشكلة انا متأكدة من جلال ما راح يجاوبني واكيد يبقى يتهرب
مثل كل مرة اسأله
كنت طول اليوم اشتغل وانا افكر بي
دك نقالي وكان المتصل جلال. وكأنما يعرف اني كنت افكربي
رديت عليه
وكال .. هلا بنورة شلونج
.. الحمد لله بخير شنو بعدك بالمعمل لو راجع
.. هو انا اتصلت عليج حتى تكولين للبنات يجهزون نفسهم انتي ويااهم اريد اخذكم اعشيكم برة اليوم
غمضت عيوني بحيرة من هاي التصرفات
جاوبته وحاولت ما ابين بصوتي شي .. مشكور جلال
هسة ابلغ البنات اكيد يفرحون
انهيت الاتصال وياه بعدما اتفقنا على الوقت الي راح ياخذنا بي
رحت بشرت البنات
وفرحوا من سمعوا اكو طلعة.
جلال
واكف انتظر بباب الگهًًوة مال ابو طبرة جية الرجال الثلاثة
الي اتصلوا عليك وكالوا احنا من طرف الاسطى زاهر
ابو الكراج
بالحقيقة انا انطبت لزاهر عنوان الكهوة ومكان ابو طبرة الي يصير بظهر الكوفي او الگهوة. وانا هواي اتواجد هنا
والحلو بالموضوع ان بيت اهل مهيمن يصيرون باطراف البصرة يعني بعيد عن العين والخطر
ما اريد اعم عليهم خلي كل شي يتم بعيد عنهم
وصلوا الشباب وابو طبرة ودوحي
كانوا مرتبين كلشي طبيعي مكان عام الشباب يتوافدون عليه يعني محد يخلي بباله شي يشك بي
وصلوا الرجال الثلاثة
واول ما شفتهم انقبض گلبي يعني صدك لو كالوا سيماهم في وجوههم نعلة على ابو اصلكم شنو من وجوه نكسة
لحاياهم طويلة ووجوهم مسودة تكرب النفس
اثنين طوال وواحد وسط. نهضت من مكاني ورسمت الابتسامة المزيفة على وجهي ورحت استقبلتهم بترحيب
وكعدت وياهم بزاوية الكهوة وطلبتلهم جاي
وبدينا نتبادل الاسماء ونتعارف وبعدها انتقلنا لموضوع الجهاز
وعملية بيعه. واحد منهم اسمه ابو ذياب
والثاني اسمه شنگال الثالث اسمه كان ابو جراس
بدوا بالاول ياخذون وينطون وياي بالكلام
وسألوني على الجهاز وانطيتهم التفاصيل كلها
والسعر
.. انا اهم شي عندي الفلوس يعني ما اخطي اي خطوة ولا اسلم جهاز اذا ما اشوف فلوسكم عالميز
انا ابوي ما اعرفه بالفلوس تكولون ثقة احنا ناس كلمتنا وحدة على عيني وراسي
بس من توصل السالفة للفلوس ما اثق بأحد
عذروني انا هذا تعاملي والكل يعرفني
ابتسم ابوذياب وكال .. والله جلال قربان ما يحتاج تكوللنا احنا نعرفك كلش زين قبل لا نشوفك
سويت روحي مستغرب .. شلون يعني تعرفوني
.. يعني نعرفك ونعرف كل تفاصيل حياتك على فكرة هذا الجهاز
شايفينه قبل جماعتنا انت كنت قبل سنتين متعامل وياهم على هذا الجهاز ولو انت حسب كلامهم هذا الجهاز محدث اكثر من القديم
تتذكر ابو بهاء سويت نفسي مرتبك والتفتت منا ومنا
وقربت راسي عالميز احجي وياهم بصوت ناصي
.. اششششش نصي صوتك لا يسمعونك. هذا الشي محضور هنا
ابتسم بأمان وكال يطمني .. لاتخاف احنا ماخذين احتياطاتنا
باوعت عليهم ملابسهم وشكلهم كان كله محور طبيعي
بس انا اعرف كلش زين هاي الملابس ما تبقى عليهم
من يوصلون الموصل اكيد تتغير عندهم زيهم الموحد
مهيمن
كاعد عالكرسي ورافع راسي اباوع لعناد متعجب بكلامه
عناد.. مهيمن هالمرة لاتگلي اخوي وواثق منه ومن هالسوالف
عوف المكابرة على صفحة
جاوبته.. لا عناد مو مسألة مكابرة
جاوبني بنفاذ صبر وگال .. مهيمن صرت اعرفك كلش زين
متريد احد يشوف ويعرف اخطاء اخوك
بس انا مو اي احد انا صاحبه لجلال يمكن اعرفه اكثر مما انت تعرف عن اخوك
اكيد راح تسألني وتستغرب عن سبب ملحتي بسالفة جلال والتمسك بي بالرغم احنا متزاعلين وما نتحاجة
بس راح اكلك شي انا ما كايله لاحد حتى جلال بنفسه
انا بيوم الله اخذ امانته واتوفى اخوي كرار
حيل انكسرت وصرت اشوف الدنيا ظلمة بعيني
وجلال الوحيد الي كدر يطلعني
و صرت اشوف بي كرار اخوي المرحوم لدرجة اتعلقت بي
هو حتى يشبه سوالف كرار وشخصيته المرحة
وما يحب يزاعل احد عيناً مثل كرار اخوي
وهذا الشي الي خلة لجلال معزة خاصة بگلبي اضافة لصداقتنا
لذلك من صرت اشوفه كام يمشي بالطريق الاعوج
صرت امشي وراه مثل ظله
ادري هالشي يزعجه بس مو بيدي ما مستعد اخسر كرار اخوي مرة ثانية وهالمرة اذا صدك وصارت وخسرته
معناها انا جنيت على نفسي وخسرت فرصتي للمرة الثانية بأنقاذ اخوي
جان عناد يحجي وكل معاني وجهه دلت عالمعاناة والحزن الي كان يحس بي
كان دافن بگلبه وضميره بعده يأنبه بموت اخوه
وشاف بجلال الوسيلة او المخرج الوحيد الي راح ينقذه ويطلعه من
حالة تأنيب الضمير والبؤس
جاوبته .. عناد ادري بيك وبحرصك على جلال من غير ما تكول
بس زين كلي شنو اسوي شنو الحل حتى ابعد عن هذا الطريق
جاوبني وكال .. شوف مهيمن هو لو ما مرافق ابو طبرة جان
ما التم على هيج شكولات مثل الي كاعد اشوفهم. يلتقي بيهم
مشبوهين يا اخي ما ظل واحد ما سألته عن هذولي الثلاثة
منو هم ومنين جايين ووين اهلهم
بس المشكلة ياهو الي اسئله يجاوبني نفس الجواب
(ما نعرفهم واول مرة نشرفهم )
.. زين شلون حلها هاي الزم جلال واحبسه بالبيت واربطه قبل لا يجيبلي العار واشتهر لو شنو اسوي
جاوبني بتفكير وكال.. شوف هو ماكو غير حل واحد
.. شنو هذا الحل الله وايدك
.. نكطع راس الحية
ابو طبرة هو الي خلة جلال يتعرف ويلتم على هيج شكولات
.. يعني قصدك ناخذه ونبلغ عنه للسجن
جاوبني .. لا يابة سجن شنو انسى بابا
يكلك هذا السجن بيته الثاني يدخل ويطلع وراه ظهر قوي راسا يطلعونه من السجن يوم ثاني
.. اي والحل
.. انا اكلك نخطفه. ونحطه بصندوك السيارة مثل الخروف
وناخذه بمكان عندنا مزرعة مال حيدر مفاتيحها عندي
وهناك نراويه نجوم الظهر ونسويله كرصة معدلة ونهدده اذا اتقرب لجلال او نشوفه يمه ما يلوم الا نفسه هالمرة خطف مرة الثانية
كملت كلامه .. نقتله ما تقبل غلط
عناد.. كول يالله ابو الهمة جنك حميت. احنا مو مجرمين حتى نقتل احنا ناس نخاف الله
بس نشمره جوة اقرب سيارة لوري وهي تشوف شغلها بالقضاء والقدر
طبعاً هاي الله لا يگولها اذا لزم الامر
وان شاء الله ما نحتاج نوصل هالشي
نور
اباوع لحوراء ولريم شلون يجهزون نفسهم فرحانات للطلعة ومنتظرين جية جلال
اباوع لريم كلما اجالها يحلالها العمر وزهرة سنينها
ابتسمت وانا اتذكر محاولات مهيمن العقيمة
كلما تدخل علينا ريم او هو يوصل من الشغل يسألها
هاي اللبسة الي لابستها جديدة لولا
هي ترفع حاجبها مستغربة وتجاوبه بغرور.. لا مو جديدة
ليش تسأل
.. هيج كل شي ماكو سلاماتج
وهاي الحالة ظلت وياه كلما يشوفها بسألها نفس السؤال
لحد ما مرة طكت روحه وسألها
.. اكلج انتي شنو سالفتج شوكت تشترين لبسة جديدة اي مو طگ جبدي فضينا
جنت كاعدة انضف تمن العنبر بالصينية وحور تدرس يمي
وسمعت كلامه ريم
جاوبته
ريم مستغربة.. وانت شكو البس جديد قديم لايكون كاسرة
خاطرك
..لا يابة على شنو تكسرين خاطري
هسة فضينا هذا الثوب جديد لو لا
لا مو جديد والا تكلي شنو سالفتك
.. خايبة غضب غير علمود نگلج الله هذا الثوب شكد حلو عليج
حتى تحسين بأنوثتج
غمضت عيوني وشهكت وضربت كصتي لاياربي مهيمن خرط الاول والتالي نعلة على يومك
ريم بقت مصفصفة بوجهه مصدومة وهو
كمل كلامه وكال .. وعلى اساس انتي ناقصج حلى ومحتاجة ثوب يجملج. خاب هسة من البسج گونية هم راح تطلع تگطع على عودج الريان وتسمطين ابو ابوي من تمرين. من كدامي
وتهزين شعرج المنتف والمصيبة حتى هذا هم لايگ. عليج
جان مهيمن منطلق بالكلام
ابتسمت على كلامه
حور صافنة على اخوها وكالت
.. هسة هذا شنو نگول عنه
جا يكحلها وعماها مدري فكسها داس ببطنها
ابتسمت وجاوبتها .. هذا مهيمن وهاي معرفته عن الغزل على كده
ريم جانت تباوعله بعيون تلمع عبالك طفل وكلوله باجر العيد
هذا شكلها
حور لكزتني وهي تباوع عليهم . . خرب ولج شوفي هاي الفطيرة
لايكون فرحانة على هالكلام المصلبخ شنو شعرج منتف. وگونية
وتسمطين ابوابوي
ولكم تعالوا لحكولي وينه هو نزار قباني خلي يجي ويشوف كلام الغزل اصبح في خطر. ينعل شكلك يا مهيمن
انت اختصاص حلبة مصارعة شجابك عالغزل ويكلك ليش تحجي
لكزتها .. اششسس انجبي لاتحجين عليه مو زين منه جاي يحاول
.. اي هم صدك وشكلها بت عمج مقتنعة وزايد عليها غزل مهيمن
دك الجرس والبنات صاحوا اجة جلال
عدلت شالي كنت لابسة فستان تركي طويل خاص للمحجبات
كان كلش حلو
طلعنا احنا وجلال وكان طول الطريق يحجي ويانا ويسولف وينكت
وية البنات واني كنت ملتزمة بالسكوت ادرس جلال وتصرفاته
هو انسان طيب وكل تصرفاته حلوة واخلاقه وية الكل ما عليها غبار
زين ليش شخصيته تتغير مية وثمانين درجة من يكون لوحده بالخفاء ويجري اتصال فوك السطع ويتكلم وية ناس ما اعرف منوً هم بالضبط بس شكلهم من خلال الكلام مو راحة ووراهم شي
يعني منا سالفة الجهاز الي لحد الان ما اعرف شلون افاتحه بالموضوع. اصلا هذا اذا انطاني مجال احجي وياها
وهسة اتصالاته الغريبة والكلام الي كله بالالغاز ونصه مريب
محتارة خايفة افتح الموضوع وية مهيمن ونوب يروح يتعارك
وياه
قشعر جسمي وانا اتذكر شكلهم بيوم تعاركوا اثنيهم
گلبي انتفض مجرد الذكرى
اكيد مهيمن يتعارك وياه وما نستفاد اي شي
قررت ابقى اراقبه. وادور بأغراضه بلكي اتوصل لشي يوصلني
لمعرفة نوع شغل جلال
وصلنا للمطعم يصير بداخل مول كبير كلش حلو
دخلنا بي وكان بي هواي عوائل وشباب وريم وحور انطلقوا
جلال .. لحظة بنات ما كو مشترى وتسوق قبل ما نتعشى
حور.. اوك. صار
باوع عليها وابتسم وكللها تعاي امشي بصفي اريد احجي وياج
اتمشى هو وحور كدامنا بخطوات واني وريم وراهم نعاين عالمحلات والغراض والاكسسوارات هالاشياء كلها جديدة علية هاي رابع مرة اطلع. وكل مرة اشوف مكان جديد.
بفضل مهيمن وجلال والبنات
كانوا بالنسبة الي المرأة الي اشوف من خلالها الحياة واعرف شلون ماشية. اني عالمي على گدي والسبب خوفي من المجازفة
مرة وحدة جازفت وثقت وصادقت رغد الي كانت في يوم من الايام نافذتي الثانية الي من خلالها راوتني العالم شلون صاير
وانتهت بالخسران والخذلان. والغدر
صارت لي درس وعبرة وانضافت الى مجموعة المخاوف الي كانت تقيدني
دخلنا للمطعم واختارينا ميز طعام بمكان حلو وجلال كان منطلق ويانا وعلى گولت ريم
جلال انت جنتل مان حلو بالطلعة. احسن من اخوك استاذ حجر
بالله رحمة على اهلك مدخله عندك دروس تقوية بلكي يتعلم من خبراتك
جلال رفع ياخة قميصه وكال
.. احم احم بالحقيقة والواقع انها ليست خبرات مكتسبة وانما
هي موهبة ذاتية ربانية. لقد توارثتها الاجيال من اباءهم واجدادهم
كان يحجي بصوت متحدث ناشيونال جيوغرافيك
وحور لكزته بالشوكة وهو كام يضحك واني بس اوزع ابتسامات
طلبنا واكلنا وكنا كلش متونسين كام جلال كال
وبأثناء ما كنا نتبادل الكلام فاجئنا جلال بكلامه
.. طبعاً انا طلعتكم حتى اكلكم انا خلال هاليومين راح اسافر
للخارج واحتمال سفري يستغرق وقت طويل غير محدد وقت رجوعي
احس وكفت اللگمة بصدري لاهي النازلة ولاهي الطالعة
شنو جلال شكاعد يسوي
شربت الماي وسألته
.. جلال مهيمن يعرف بسفرك لو لا
.. اي نعم بلغته وانطيته خير
.. وشنو كال
.. شنو.. شنو كال يعني عندي شغل مهم خو ما اخذ اذن مهيمن
قبل لا اسافر.
غمضت عيوني بقلة حيلة هذولي هم اخواني كلمن شوره من راسه
وكل واحد بيهم يكول انا الصح وغيري الغلط
وكالعادة جلال هرب من اسئلتي وكال
.. انتظروني انا رايح ادفع الحساب واروح للحمام واجيكم
دفع الكرسي وكام وراح يتمشى
وعيون حور اتبعته انتظرته يبتعد
ودارت وجهة على ريم بسرعة وگالت
.. يمة همزين كام جلال
بسرعة ريم گومي بالعجل خلي اروح للحمام بسرعة كلش مفولة قبل لا يرجع جلال واستحي
ريم گلبت عيونها وكالت.. على شنو تستحين ترة هو حمام ليش
هيج تصعبين على نفسج الامور
حور كامت وسحبت ريم وياها بالگوة
.. دگومي فضينا بسرعة
راحوا البنات وخلوا جنطهم يمي عالميز وانا بقيت انتظرهم
رفعت راسي بالصدفة وجان توكع عيني على مجموعة شباب
مكنت منتبهة عليهم كانوا كاعدين عالميز القريب على ميزنا
كانت نظراتهم ومشاوراتهم مبينة علية
دنكت راسي وصرفت انتباهي عنهم وبدا القلق لان صاروا يشمرون بالكلام وكعدت
افرك بأيدية متوترة واباوع لهذولي الشباب الي
مصخوها كلش اتضايقت
رفعت راسي اريد اشوف جلال وين راح
شنو وين اختفى وهاي الثانية وين راحت ست ريم
جنت متضايقة واباوع بالنقال ادور على رقم جلال حتى خاف واحد منهم يخبص اني مباشرتاً اتصل
كنت جاي افكر شلون اخذ احتياطاتي للدفاع
وجان احس اكو. ظل غيم عالميز رفعت راسي وجان يصير بوجهي عناد
باوع علية ورجع باوع عالميز الي بصفي وخزرهم
وكال .. سلام عليكم
ما جاوبته على اساس انا ناقصة هبطات واجة عناد يكملني
منا هذولي ونوب عناد الي لحد الان هبطة العركة ترجف بين ظلوعي.
كان واكف بصف الميز مالتنا دنك يباوع علية وكال
.. السلام لله
مجاوبته خليني هيج احسن
سألني متضايق .. انتي شتسوين كاعدة لوحدج وويامن جاية هنا
جاوبته بحدة وكلت .. اجيت وية اخوية جلال يالله اتأكدت
هسة تكدر تروح لاتبقى واكف هنا لايجي جلال ويشوفك وتصير مشكلة
عناد بغيض كال.. وحق الكعبة ما اتحرك منا الا يرجع هذا اخوج التيس شنو قابل هي هيتة. اعوفج لوحدج يم هذولي
جاوبته.. عناد رحمة على اهلك انت مو احسن منهم وجاي تحميني منهم ترة انت مواقفك هواي
باوع علية بخزرة وكال .. شوفي يابنت الناس
انا غيرتي ما تسمحلي اعوف عرض صاحبي للفرجة
ومرة ثانية ثمني كلامج من تحجين وياي
جاوبته اذكره بوعده الي الما وفى بي
.. جاي تعلمني اثمن كلامي وياك وانت اصلا ماعندك كلمة
نسيت بيوم انطيتني كلمة ووعدتني ما تأذي جلال اخوي
رفع حاجبه مستغرب وكال .. اي وانا كنت عند وعدي ووفيت بكلمتي وياج
.. هاي شوكت لعد منو الي اجة للبيت وهد علينا واتعارك ويك اخوي وضربه
.. اي انا كلتلج اوعدج ما اسوي شي لأخوج ويرجعلج قطعة ووحدة وفعلاً كنت عند حجايتي اخوج رجعلج كامل لا ناقصة ايد منه ولا رجل
شتردين. اكعد اهفي عليه وامسح على راسه من يجي يهد علية
هزيت راسي متعجبة على كلامه هذا شنو مو معقول
شلون جاي يفكر
.. بالحقيقة ما راح اتعب روحي واجاوبك لان انت عقلك قافل ومقتنع ما يريد يفتهم
وكلامي وياك ضايع ما يجيب نتيجة
مثل واحد يريد يقنع بحايط. ويكله اسمحلي اعبر من خلالك
هذا انت بالضبط
ابتسم وحك حاجبه مثل الي يريد يحجي وكوة لازم نفسه
اسمعه حجة بصوت ناصي وكال
.. والله طلعت حمامة بغداد مو هينة تغرد بالكلام
وبهاي اللحظة وصل جلال وشاف عناد وعكد حواجبه مستغرب وجوده
اقترب منه ووكف كدامه. وكلة.. خير عناد شعندك واكف هنا
كان جلال يحجي متنرفز
كلبي انخمط من شفته هيج يحجي بتهديد عبالك ناوي يتعارك
اتحركت ايدية بتوتر وانكلب كلاص الماي ووكع بالكاع وانكسر
التفتوا علية وباوعولي
جلال كال .. فدوة .. فدوة التفتت يصيح العامل
وعناد باوعلي ونظراته ثبتت على وجهي المخطوف لونه وحركت شفايفي بتوسل بدون صوت
.. عفية لا تتعاركون
رجع التفتت جلال على عناد وكله .. يالله اتفضل هوينا وكفتك هنا مو حلوة
اباوع لعناد كوة لازم نفسه لا يبتلي بجلال
بس كمل كلامه وكال .. يالله اتوكل منا مادام النفس عليك طيبة
هو كال هيج وعناد زنگه من ياخة قميصه وقرب راسه يم راس جلال وكله بصوت ناصي
.. كم مرة اكلك لا تصير حمار وخليني محترمك ولك عار
انا ما جاي لسواد عيونك
بس المال السايب يعلم الناس عالسرقة
جان بحجي وباوع علية ونقل نظراته على الشباب الي عالميز الثاني
جلال نتر ايد عناد وبعدها عن ياخته وكال
.. مشكور ما قصرت وكثر الله خيرك.
ابن اصول. وهذولي انا اشوف شغلي وياهم
اجة يتوجه يروح للشباب ولزمه عناد
وكال .. من اكول حمار تزعل وتعصب
صير ادمي لا تتصرف برعونية شلون تريد تتعارك وياهم وانت وياك بنات متخاف يصير عليهن شي
انت شنو حمار لو حمار بس كلي
باوع عليه جلال وكله . . ما عليك بية انا اشوف شغلي وياهم
تركنا جلال وراح على المسؤل صاحب المطعم
كان يحجي وياه وهو ظهره
وعناد يغلط ويسب وباوع علية كال .. بروح اخوي الغالي لوما
انتي حاجية ولازمتني جان يا جلال لكون دايس ببطنك بهاي اللحظة
على الاخلاق الزفت
دار عناد وجهه وراح متضايق وباوعت لجلال رجع كعد يمي
وانتبهت اجة صاحب المطعم عالشباب وحجة وياهم وطلعهم وهم
متفاجئين ومعترضين
جلال
ولك دوحي راح اتخبل شنو الي كاعد يصير
ابو طبرة وين اختفى ماله اثر اتصل عليه يطلع جهازه مغلق
دحام .. راح ننتظر ١٠ ساعات اذا ما بين نتحرك ونبلغ
الجهات المسؤلة
كنت حيل خايف على همام لان اعدائه هواي واذا يصير عليه شي
دمه ينهدر يروح غدر
يتبع
اتمنى لكم قراءة ممتعة
اختكم نهى الحسون