#الكاتبة_نهى_الحسون
#قضية_الشمل
مساء الانوار والسرور عليكم 🌹🌹🌹
اعتذر عن التأخير وشكراً لتفهمكم
جلال
طلعت من كلية ريم امشي هايم على وجهي
حسيت الابواب كلها انسدت بوجهي وضاقت علية دنياي
وكأن الزمن ما كفاه الي اخذه مني
جايني ولاحگني يريد يسلب احلى شي باقي بحياتي
حور هي حلقة الوصل بيني وبين الحياة
رفعت راسي للسما
ربي مالي غيرك وغير رحمتك وانت تعرف بحاجتي
غصب عني لكيت روحي واكف كدام كلية حور
شلون وصلت وليش جاي وشنو الي اريد اسويه
مااعرف لحد هسه شنو يطلع بيدي
بس كل الي اعرفه انا احتاج اشوفها واحجي وياها
انا من عرفت بحب حور كان عن طريق السلسلة
اكتفيت بس بالاعتراف و ما اتجرأت اتمادى اكثر واكعد وياها واحجيلها على الي بگلبي واقدملها الوعود وافهمها على ظروفي حتى تنتظرني وتصبر علية
كان كل حبنا وشغفنا ولهفتنا بس بالعيون
يكفي اشوف نظرات عيونها واعرف بروحي لازلت على قيد الحياة
وبلمعة عيونها اشوف مستقبلي كله
اتصلت عليها حتى ابلغها بوجودي بالكلية
اريد اشوفها وتكولي وين تكدر تلتقي بية
ورة فترة وصلت على المكان الي وصفته الي ورحت هناك
كان بداخل الكلية
لكيتها تنتظرني بلهفة ما فاتتني نظرات عيونها الذبلانة من السهر
نهضت من مكانها اقتربت منها وسألتني بقلق
.. جلال شتسوي جاي للكلية صاير شي
باوعت عليها ..بعد شتردين يصير اكثر من الكارثة الي وكعت على راسي.
ولج حور سمعت جايين عليج خطابة ويردون يسلبون روحي مني
ولج صدك هذا الحجي ؟؟
شهكت وغطت وجهّة بكفوف ايديها وصارت تبجي بحزن
اتمنيت اخذها بحضني اخليها بين ضلوعي واكعد اواسيها
واطمنها واكلها هذا انا هنا يمج
انا حلالج وانتي حلالي
بس وين هيهات العين بصيرة والايد قصيرة بس اباوع بعيوني على احباب گلبي وهم يعانون والادهى والامر من هذا كله
من تكون انت نفسك مصدر حزنهم والسبب في اذيتهم
اي جلال بعد كم گلب ملجوم راح تترك وراك
وهاي حور انضمت للقائمة
كالت من بين دموعها .. اي جلال البارحة مهيمن وامي فاتحوني بالموضوع ومهيمن مقتنع بالولد وانطاني مهلة يومين افكر بيها وارد له الجواب
جليت صوتي ورحت ابتعدت عنها
ورحت كعدت على المصطبة
سألتها وانا حابس انفاسي
.. وانتي شنو رأيج بالموضوع
باوعت علية وبعيونها نظرت التعجب من سؤالي
جاوبتني مستنكرة .. جلال انت صدك تحجي
تسألني شنو رأيي بالموضوع ليش انت ما تعرف حوراء
باوعت عليها بقلة حيلة وگلت .. اعرف بس مو متأكد خايف
اريد اسمع رأيج
جاوبتني بدون اي تردد .. اكيد ارفض مستحيل اوافق
وبعد بقت يمهم و بكيفهم
شنو يقررون يردون يدخلون بخطيتي ويغصبوني على الزواج
لو يتقون الله بية ويعتقوني لوجه الله
اطلقت سراح انفاسي المحبوسة بداخل صدري وكلت
.. حور انا اريدج تصيرين حلالي
انرسمت البسمة على شفايفها وضوت وجهها
صارت بسمتها وية الدمعة المعلگة برموشها صورة متناقضة
تجمع. بين الحزن والامل
بعدما شفت بسكوتها علامة القبول وانطلقت بالكلام
.. بس عندي هواي عراقيل بحياتي وامور تمنعني اتقدم واطلب ايدج من اخوج بالوقت الحالي.
انا اعرف بروحي ما املك الحق اطلب منج تنتظريني وتصبرين علية.
بس هالشي مو بيدي غصب عني
لكن راح اتجرأ واكولج اريدج تنتظريني وتصبرين علية
ما ادري ليش اليحب يصير اناني وية محبوبه
شنو تردين تسميها سميها غرور .. ثقة بالنفس بكيفج
بس اهم شي اريدج تعرفين اني احبج
واريد اعرف شنو رأيج
ابتسمت ولون الخجل بخدودها
جاوبتني بصوت ناصي .. اي .. موافقة
ابتسمت ابتسامة نصر وفخر وصرت اتلفت منا ومنا
احس گلبي ما جاي يوسع فرحتي الجبيرة
وكلت وانا كوة لازم نفسي
.. ولج حور ااااااااخ صدقة لربج
والله لو ما عيب جان صحت بعالي صوتي
واكول اااخت مهيمن راح تصير حلالي
باوعت منا ومنا مرتبكة وكالت .. لا لا عفية جلال احنا بالكلية
اصلا وجودك بالكلية. يلفت الانتباه من غير ما تسوي مشاهد
مو نوب تصيح بعالي صوتك والله اعوفك واروح واكول عليك هذا واحد مخبل ما عليكم بي مااعرفه
جاوبتها وانا اضحك .. والله تسويها اخت مهيمن ما عليج عتب
ساد الصمت لحظات وبقينا نتبادل النظرات
اخذت ايدها بين ايدية رجفت مثل عصفور بلله المطر بيوم برد الشتا
ضغطت على ايدها اريد اوصللها مشاعري وحبي ما عندي اي طريقة ثانية
واستمد الشجاعة منها حتى اكدر اكوللها عن كل شي
سحبت ايدها وهي تتلفت خجل مني وخوف من الطلبة اخاف احد يشوفنا
واني خلص حسيت اخذت القوة الي احتاجها حتى اكوللها عن كل الي يصير وياية
جليت صوتي وكلت
.. حور انا ما عندي شي اقدمه الج بالوقت الحالي يثبت صدق وعدي وياج
غير بس الشرف والوعد ونبضة گلب متلهفة لقربج
هذني اصدق شي عندي اكدر اقدمهم الج
اقتربت عليها ومديت ايدي وبسطت كفي كدامها
كنت شايل بيدي الرتبة .. والعلگ الاخضر .. والسلسلة
باوعت على الغراض مستغربة وجودهم
وسألتني بحيرة .. جلال هذولي شنو
جاوبتها بفخر .. هذني الي كاعد تشوفيهم كدامج
هن اغلى ما املك
كالت وهي تأشر على الغراض الموجودات بيدي
.. جلال شنو هاي الرتبة
العلك والسلسلة اعرفهن
.. حور جاي وناوي اكشفلج كل اوراقي بس بالاول اريدج تقطعيلي
وعد
الكلام الي راح احجي ما يطلع لأي بشر
حتى بينج وبين نفسج ما اريدج تذكريه
هزت راسها بالموافقة وكالت .. اخذ مني كلمة وعد
راح احفظ سرك جوة گلبي وية النبض
حاله حال حبك
.. وهذا الشي الي خلاني اتشجع واسلمج اسراري
سألتني .. ھَذني اغلى ما تملك ؟؟
باوعت لكل حاجة بيدي وجريت حسرة
وهزيت راسي بموافقة وكلت
.. اي الشرف والوعد ونبضة گلبي الي كلتلج عنهم
هذني اصدق شي عندي واليوم اجيتج اريد اقدمهم. الج مهر
اذا على الفلوس موجودة وتحت رجلج ومال الدنيا مايكفيني ادفعلج مهرج
رفعت الرتبة .. هاي الشرف والرفعة
ورفعت العلگ الاخضر .. هذا الوعد الي بي قطعته الج
ورفعت السلسلة المحفور بيها اسمها .. وهاي نبضة گلبي هنا
وهنا بحت بكل اسراري لحور
حجيت كل شي كنت كاتمه بگلبي
حسيت براحة لان شاركتها سري اريدها تعرف ويطمأن كلبها ولا تبقى بشك يحيرها ويعذبها
كانت تستمع لاسراري ودموعها تنزل بقلة حلية وخوف من المجهول
ريم
مرت الايام واني مثل ما اني
كان عالمي يدور حول الكلية ودراستي والبنات
نور وحور
اما مهيمن فحاولت اتجنبه بقدر الامكان
كلما التقي بي كانت نطراته الي بيهم رسالة
تذكرني بالصار بيني وبينه
وانا هذا الشي كنت احاول انهزم منه ما اريد حتى اعترف لنفسي
بلحظة ضعفي وانا بين ايديه
كنت كاعدة اكل وية خالة والبنات
وكان يدخل شاغل افكاري وسلم
ام مهيمن.. كومي حور صبي لاخوج غدا خلي يجي يتغدى ويانا
كانت ام مهيمن تحجي واني كمت من الاكل وانسحبت بهدوء ما اريد الفت انتباه.احد
باوع علية ونظرة عيونه تتوعد من الغيض
شكله ما عاجبه تصرفي
كنت اذا اني موجودة بمكان ويدخل لازم اتركه للمكان واطلع
حتى البنات حور ونور انتبهوا. علية
اجتي نور وراي للغرفة وكالت بعتب
.. ريم ترة ما يصير هيج ليش هالحرب الاعصاب الباردة الي شانتها على مهيمن انتي شنو تردين تعاقبينه لان كان يتعامل وياج ببرود
.. لا نور اني ما اريد انتقم منه
اصلا حتى هاي اعتبرها محاولة حتى تدفعه ينتبه لنفسه
واني اقسمت ما اخطي او اقدم اي شي يخليه يحس على نفسه ويجيني اريده هو من وحده يتصرف بنفسه
لذلك مستحيل انتقم منه
بس تصرفي هذا علمود اشتري راحة بالي
.. ترى انتي المفروض تعرفين مهيمن هو شخصيته هيج على الاقل الولد ما جاي يمثل عليج ويتصنع هو هذا طبعه
وتعامله وية الكل هيج يعني انتي مو استثناء
بس انتي بهذا برودج وجفاج وياه. هو الي ينرفز
لان كلنا نعرف انتي هذا مو طبعج
وهالشي صدك يحز بالخاطر
باوعت عليها وكلت .. نور اني ما رايدة شي انتوا ليش تسون من الحبة گبة
اني احتاج اكون بعيدة عنه. فقط ما اريد اشوفه
واوشوف بروده
تخيلي كلما التقي بي لازم ينظرلي بغرور ويحاول يذكرني
بالصار بيني وبينه بذاك اليوم
مثل ذيب يتونس بفريسته. هيج يكون حالي وياه
والي يكتلج رغم كل الي صار بيني وبينه ورغم كل الكلام الي حجيته هو لازال بعده يتربع على عرش الكبرياء
يعني احلفج بالله جاي يشوفني صارلي كم يوم اني اتلافى وجوده
ويعرف ان الصار بيني وبينه خلق حاجز
حتى ما كلف نفسه ويسأل ليش ما جاي تاكلين او ليش تتهربين مني
تزعلين من اكول هو شايف نفسه ويريد الناس هم يجونه
فلحد يكعد يلومني من اعامله بهاي الطريقة لان يستاهل
وفوك كل هاي الضغوط الي اني دا اعيشها
ام مهيمن طالعتلي بسالفة جديدة. بهاي الايام
كالما تشوفني لازم تلمحلي عالزواج وسالفة الزواج
وتريد تشوف عرس ابنها قبل لا تموت
اي شي يصير بالعالم كون تربطه بسالفة زواج ابنها وتسمعني
مثل ذاك اليوم من ماتت مرية كبيرة بالعمر جوارينهم
كالت خطية لو تشوفون احفادها شلون ييجون عليها
وجرت حسرة وكالت .. وانا يا حظي حتى عرس ابني محرومة من شوفته مو نوب اشوف الاحفاد واربيهم
لو مرة سمعت بقرايبهم راح يزوج ابنه
وهم كعدت تحجي
حتى صرت احط گلبي بشيشة من تجي تكعد يمي
لان ما عندها سيرة غير بس شلون تزوج ابنها.
شكلها طاك روحها
بس مو ذنبي محد كللها تخلف واحد محجر مصلبخ
شايف نفسه
بالمطبخ كاعدة انا وحور ونور جاي نشرب حليب وكاكو
وجان تدخل صاحبة افكاري المرعبة
نزعت عبايتها كانت ببيت اخوها
وسألتها نور .. هلا خالة اصبلج حليب بالشوكولا
راحت كعدت بالكاع وكالت .. لا خالة كل شي ما اريد
لا حليب ولا شوكه اريد تحطيلي سم واشربه
حتى ارتاح من هالضيم
حور بصوت ناصي.. لا يالحمزة امي راح تشتغل
شيطفيها بعد
نور بأهتمام .. شنو خالة كولي يا الله شبيج سامعة شي
.. خالة كولي هو شنو الما بية.
اشو هن كلما اجالهن يكثرن مواجعي باقية اعاين بس بعيوني
سكتت نور وعم الهدوء الساكن المريب
الذي ينبيء بقدوم العاصفة. وما طول الصمت هواي
وجان تهب العاصفة الزهراوية
ودارت وجهّة علية وسالتني
.. اكلج خالة ريم. شنو ما خلصت فترة التفكير شوكت ناوية تقررين
والله ماطلعت هاي
حتى الارملة خلصت فترة عدتها واتزوجت وراح تخلف
وانت بعدج لازمة عدة وتردين تفكرين
غمضت عيوني بصبر
المشكلة ام مهيمن ما جاي تقتنع بالاسباب والاعذار الي احاول انطيها حتى اتهرب من اسئلتها
.. خالة اني بعدني ما مستعدة للزواج حالياً اريد اكمل دراستي
.. شنو هالعيارة مالت البنات النازلات بيها هاي الايام
حاطات الدراسة حجة تعلگن عليها الرفض
كولي ما يعجبني اتزوج مهيمن وفضيها بعد على شنو معلگتنا
.. خالة مهيمن مو سبب رفضي
وانما اني لاغية فكرة الزواج من راسي
فلا تاخذينها على انه تقليل من قدر ابنج
.. شنو ياخالة لا عبالج انتي بعدج صغيرة وتأجلين
يعني هم يالله تتزوجين وتخلفين وتكونين بيت وعائلة
وبعد هم العمر يركض وانا اريد اشوف عرس ابني
وابني رجال وعمره دك باب الثلاثين وانا لحد هسة ما شايفة بزره
غمضت عيوني على الاساس انا ناقصة واحد ياكل گلبي ويشتت افكاري وتجي ام مهيمن تحملني مسؤلية تاخير زواج ابنها
وحرمانها من شوفة احفادها
دخل مهيمن على كلام امه واني جاوبتها وكلت
.. خالة ترة اني ما ضاربة احد على ايده يعني هو ما مجبور
ينتظرني اكو الف وحدة ما يروح يتزوج منهم اني شكو
هذا هو ابنج واحجي وياه
عزة هو انا حجيت هيج وهو اتجه علية يرعد مال واحد
مخزن كلبه ومحمل
وبصوت يرعد وكال.. اي اتزوج وشنو قابل انا متعوق عليج
قابل الخلقج ما خلق غيرج
كلامه مثل السجاجين تضرب بگلبي ..
وكمل كلامه
بس ها سمعيني زين
وخلي ببالج عسى ما اتزوج الف وحدة
وانتي تكملين العدد وتصيرين الف وواحد
يعني بأختصار انتي الي وما تحلين على غيري
.. لعد براحتك راح تنتظر هواي
جاوبني بتحدي وكال
.. براحتج شكد بعد تردين انتظر سنة .. سنتين .. عشرة
عسى ما تكبرين وتعجزين وسنونج توگع
ما يهمني انا كلت انتي الي يعني تبقين الي
.. وراج .. وراج
خفق گلبي على اصراره
.. اصلا ما استغرب تصرفك هذا انت .. مثلما انت
ما راح تتغير دائما اعصاب والي تريده لازم يجرالك وتعصب اذا ما صار التريده
درت وجهي عنه وتركته
اسمعه كام يسب ويلعن
نور
اتصل علية جلال وكال نور حضري جنطتي اريد اسافر لبغداد
وكعدت اسأله عن سبب سفره
وجوابه كان عندي شغل مهم
والله حيرني زين شنو هذا الشغل المهم الي ما يكول عنه
هاي ثاني مرة راح يسافر لبغداد بذاك الاسبوع سافر وهالمرة راح يسافر
وكالعادة كدر يتهرب مني وينهي الاتصال
غمضت عيوني
انتبهت لأم مهيمن واكفة عالطباخ تطبخ وتدردم لوحدها
وهي الثانية ما اعرف شبيها صارلها فترة لاجة عالبيت كله
ومنا ريم ومهيمن كبت العركة بينهم
وحيروني هذولي ما اعرف شبيهم
رحت وراه للغرفة
لكيته كاعد بالكاع ويحجي بالنقال عالشغل
سحبت جنطة جلال وكعدت احظرله الملابس للسفر
انهى اتصاله وسألني .. هاي المن الجنطة
شنو جلال راح يسافر
.. اي. اتصل علية قبل شوية وبلغني
.. ادري هذا شنو سالفته سفراته كثرن وما نعرف سببها
يعني الواحد الا ياكل تبن ويركض وراه ويتعارك يالله
يحجي ويكول
باوعت عليه بكل هدوء وكلتله
.. مهيمن انت الى متى تبقى هيج اعصاب وتخلي الكل يبتعد
من عندك
صاير هالفترة عبارة غيمة سودة بس ترعد
كل شي ما نفتهم منك.
جاوبني .. ظغوط الشغل متعبتني
ابتسمت وكلتله.. متأكد ضغوط الشغل هي الي متعبتك وكالبة مزاجك لو شي ثاني
جاوبني بكبرياء .. لا يابة شعندي غير الشغل
.. يعني ما ضايج من الصار بينك وبين ريم وتصرفات ريم
باوع علية متفاجيء من كلامي .. ليش شنو بيني انا وريم
اي انا قررت اكعد وياه وافاتحه بالموضوع وافهمه
بالهداوة
.. مهيمن ترة انا اعرف شنو الصار بينك وبين ريم بذاك اليوم
واني اجيتك هسة علمود احجي وياك وافهمك
تفكير ريم واكلك رأيي طبعاً اذا تحب تسمعه
عدلت گعدته وكدرت الفت انتباهه لكلامي
.. اتفضلي احجي اسمعج
.. مهيمن على كيفك وية ريم خف عليها يعني لازم شوية تتنازل
عن الحدية
صدگني وراح تشوف بعينك طلبات ريم موصعبة
جاوبني بنفاذ صبر .. نور انتي ما تعرفين ريم جاي تصعب
علية الامور وتطلب مني اشياء ما يشيلها العقل
وانا الله وكيلج رجال حلگي مشكوك من الشغل ارجع للبيت
تعبان منتهي تستقبلني بت عمج بلسانها المزروف شتردين مني
اسويلها وهسة كملتها بصدها مني
فهميني شنو حلها
جاوبته وكلت.. تعرف شنو المشكلة بالموضوع
المشكلة ان انت وريم اثنينكم واكفين على طرفي نقيض
واحدكم يفهم الثاني بالعكس
يعني مثلا عندك هاي الاشياء الي طلبتها ريم من عندك
والي انت فسرتها وكلت عنها طلباتها ما يشيلها العقل
ريم اني اعرفها كلش زين
هي متعودة تحجي بعفوية بدون ما تنتبه لتفكير المقابيل
اهم شي هي تحجي الي بداخلها
جان يباوع علية وهو مقتنع .. بربج اكو بنية تجي لرجال وتسأله
يهتم بيها ويحسسها بأنوثتها بالله انا عقلي محجر
بالله انتي كولي شتفسريها لو جنتي بمكاني
ابتسمت وكلتله .. مو كلتلك تفكريكم على طرفي نقيض
شوف مهيمن اكو اشياء بسيطة يكدر يسويها الرجال
بتجاه المرأة. تحسسها بأنوثتها
بس مو مثل ما انت تفكر
.. يعني مثل شنو هاي الاشياء ممكن تترجمين وتوضحين اكثر
.. انا اكلك
مثلا عندك اذا من تكعد الصبح وتشوفها وتكوللها
كلمة صباح الخير وانت تبتسم
من تلبس لبسة جديد او تسوي شعرها او اي تغير تسوي لروحها
حلو لو تنطيها رأيك بي وتكللها
الله شكد حلو عليج هاي اللبسة
او تكللها هذا اللون عليج يجنن
مثلا من انت تكون بالشغل شكد حلو من تتصل عليها
وتسألها شلونج اليوم
وهواي امور بسيطة فوك ما تتصور وسهلة
وداعتك ريم شفافة ومو صعب تكسب ودها بهيج كلمات راح تملكها المثل ريم ما يهمها فلوس ولا جاه يهمها
حنانك واهتمامك
كنت احجي ومهيمن كان يباوع علية بغرابة عبالك جاي اشرحله
معادلة كيميائية صعبة الفهم
وكال .. والله انتوا عليكم سوالف غريبة
يعني ترديني اكعد انتظر ست ريم شوكت تشتري بدلة جديدة
علمود تلبسها واكللها الله هاي شكد حلوة طالعة باللبسة الجديدة
زين ما يصير اكللها بالعافية.
جان يحجي ويهز بيده
يالله نسوي ونشوف بس والله ما اجت للدرب اكضج انتي وياها واطكم راس براس
لان راح ادوس على اعصابي واسوي الي كلتيه
ولو انا نسيت نصه عود ذكريني خاف انسى
وانا غمضت عيوني بصبر
الظاهر راح اتعب يالله مهيمن
جلال
بالصناعية سافرت للمرة الثانية لبغداد
هالمرة الخطة تقتضي ان اخذ الجهاز واسافر بي على بغداد واعرضه
على الاسطى زاهر
بالمرة الاولى الي سافرت بيها لبغداد رحتله بحجة تحوير السيارة
انطيته عنواني وبعدها
اخذ الجهاز واروح اعرضه عليه
مثلما التعليمات تكول
كنت دائما على تواصل مع الضباط المشرفين على المهمة
وصلت للكراج وهناك انتقلت للصناعية
والتقيت بالاسطى سلم علية وسألني
.. هلا تفضل اغاتي
شكله ما عرفني ابتسمت
كعدت كدامه وكلت .. شكلك نسيتني انا بذاك الاسبوع اجياك علمود سيارة محورة
.. وانا اكول انا شايفك بس ناسي وين
اعذرنا عمي كبرنا بالعمر
بالحقيقة انا هالمرة جايلك بغير شغلة
.. كول امر بشنو اكدر اخدمك
.. والله انا سمعت من جماعتي ان انت تشتغل بالمكاين والاجهزة
وهم نصحوني بيك وكالوا هو الوحيد الي راح يكدر يفيدك
وانا اجيتك اول مرة حتى اتأكد بنفسي ومن اتطمنت
قررت اعرض جهازي عليك
.. شنو هذا الجهاز ومنين جايبه وبشنو يفيد
كعدت افهم واشرح للاسطى عن مميزات الجهاز وراويته الجهاز الي كنت جايبه وياي
هو باوع بأهتمام وتركيز
وسألني .. اكدر اخذ صور للجهاز حتى ارسله لجماعتي
.. اي عادي اخذ راحتك تكدر. تصوره مقطع فديو اذا تريد حتى يتأكدون
صوره ورسل الصور بالواتساب
دقايق ووصله الجواب
باوع علية بأهتمام وكال .. امممممم شنو كلتلي اسمك ؟؟
.. انا اسمي جلال قربان
رجع يتراسل بالواتساب ونوب سألني .. انت وين ساكن
.. انا بالبصرة
كان يسألني ويرجع يتراسل
بعدها خلص وباوع علية وكال
.. انطيني رقمك. حتى جماعتي يتواصلون وياك بالحقيقة
عندي جماعة عرضت عليهم الجهاز
وشكلهم يعرفونه او نفس اللي يردونه
المهم انت انتظرمنهم اتصال
يتصلون عليك وتتفاهمون عالسعر
نهضت من مكاني وجاوبته .. يعني هاي هي وافقوا يشترونه
سويت نفسي كلش فرحان
.. لا هي موافقة مبدئية
بعدين هم يفهمونك من يتصلون عليك
.. ما اعرف شلون اشكرك. والله هذا معروفك ما انساه
زين شوكت اشوفهم
لان وراي سفر ارجع للبصرة
.. هم كالوا يتصلون عليك ما كالوا يشوفونك
فانت تكدر ترجع للبصرة.
ريم
واكفة كدام حور الي كانت تبجي محتارة
.. شنو شبيج حور معقولة ما تكدرين تحجين وية مهيمن وتكليله ما اريد اتزوج
حجت من بين دموعها.. ريم امي تضغط علية وراح تعاديني
اذا رفضت
ما اكدر اروح لمهيمن صعبة
.. زين استاذ جلال وينه عن هذا كله شنو ينتظر ليش
ما يتقدملج ويحط حد لهاي الهوسة
.. هَـا مو اتفقنا اني وجلال يتقدملي من يخلص بناء البيت
ويخلص مشروع الجهاز عفية ريم اريد حل دبريني
.. اوووف هسة على الاقل بس خطوبة
وبعدين خلصوا البيت
.. اني هم عندي كلية لا تنسين
كعدت افكر شلون تنحل هاي السالفة
كمت من مكاني وكلت .. ريم انا احلها الج
كامت وياي .. شنو شلون راح تحلينها شراح تسوين
لبست نعال الشبشب الارنوب
وطلعت من الغرفة واني اجاوبها .. ابقى هنا انتظريني
وبعدين اكلج
رحت صعدت
فوك للطابق الثاني بعدما سألت نور عن مكان مهيمن
كنت اعاين عالتغيرات
كمل الطابق الثاني وتشطب
وصار كلش حلو ومهيمن ينتظر يفرغ. حتى يبدي يأثثه
دورت عليه لكيته بالغرفة الثانية كاعد بالكاع يشد بالبنكة.
ويركبها نازع التشيرت وباقي بالجينز
كان الباب مفتوح
مايحتاج ادكه. جليت صوتي والتفت باوع علية ونهض من مكانه
واخذ التشيرت الي كان معلگ عالباب
لبسه وعيونه علية
يحاصرني بنظرات عيونه اتوترت
وگلبي انتفض لان وحدي وياه انذكرت خوفي ابتعد وخليت مسافة معقولة بيني وبينه
رفع حاجبه على حركتي وكال .. ريم اشو صاعدة فوك لوحدج
ما تخافين ياكلج البعبع
سحبت نفس عميق وكلت
.. مهيمن اني ما صعدت حتى اتجادل اني وياك
اني اجيت حتى احجي وياك بخصوص موضوع حور
عگد حواجبه وسألني .. شنو شبيها حور
.. شوف مهيمن حور اختك رافضة الزواج. من هذا الولد صاحبك الي اتقدملها
وامك جاي تضغط عليها حتى توافق
دار وجهه وصار يتحرك بالغرفة ويجمع العدة وسألني
.. زين ليش ما اجتني هي وتبلغني عن رفضها ليش
ودتج حتى انتي توصلين رفضها
رفعت حاجبي وكلت .. اولا هي ما تدري انا راح احجي وياك
وابلغك رفضها
وثانياً هي تستحي من عندك وما تكدر تصارحك وتحجيلك مخاوفها ورفضها
طبعاً حقها وما اكدر الومها ما دام انت اخوها اذن اكيد
راح يصعب عليها الحجي وياك هاي اذا ما ينعقد لسانها
شمر العدة من ايده وصدر صوت عالي كمزت من الصوت واجة بتجاهي ووكف كدامي وكال
.. يعني حور تخاف مني.
وانتي ست ريم بما انج ما تخافين اجيتي تبلغيني
......
احداث البارت القادم
نور
كاعدة افرك بأيدية متوترة واباوع لهذولي الشباب الي
مصخوها كلش اتضايقت
رفعت راسي اريد اشوف جلال وين راح
شنو وين اختفى وهاي الثانية وين راحت ست ريم
اتمنى لكم قراءة ممتعة
اختكم نهى الحسون