رحمة عاطف

البارت السابع

البارت السابع

رواية...رحمة عاطف..
نورا ناصر ..نور سمو العراق

💔💔💔💔💔💔💔💔

احسد المجانين على أرواحهم البريئة على نفوسهم النقيه. على جهلهم في الحياه.انتم من يقال عليهم أصحاب الحظ السعيد  .دخلتهم الحياه طاهرين بريئين طيبين. وخرجتم فائزين مسرورين حائزين على رضا رب العباد والعالمين. .ليتني منكم نعم ليتني مجنونه أو ليتني طفله توفيت بسبب حادث غير مقصود.واغلقت قضيتها. .ليتني جنين مات في بطن أمه. بسبب سقطه غير مقصوده...ليتني لم أكون ولم أولد كم كنت أو سأكون سعيده..

بقلم المبدعه...hajar_4

.......................................

عاطف بصياح وعصبية ؛ هيه وانتَ منو طلب رأيك اكول حط لسانك بحلكك لك هاي عرضك وشرفك !

حميد كام على حيله وتوجه لعاطف وظل يصيح بوجهه
_ شنو محد طلب رأيي ولك اني الكل بالكل هنا مو جاي بعد سنين من اوكرانيا تريد تحط بيننا مخبلة خوش والله ..

عاطف؛ احترم نفسك لك شنو هالحجي شنو هالتخلف روح تعالج احسلك ماكو غيرك مخبل يا زمال ..

هجم حميد بهاللحظة ، كور قبضة ايده ويريد يضربني
صارت بيناتنا بيبي وصيحت بوجهه بانفاس متعبة ..
_ ولك حميد رحمة راح تجي هنا يعني تجي واذا مايعجبك امشي اطلع برة من هذا البيت !..

ام حميد ؛ شنو هالكلام هذا عمه سنين واحنا عايشين وياج ونبعد عنج الوحشة هسه تطردينا عمود وحدة مخبلة وواحد صارله سنين تارككم وهسه يله تذكر عنده اهل واجه ..

بيبي ؛ اي من لحمي ودمي والظفر مايتبرا من اللحم ما اتبرا منهم اني ..

ام حميد ؛ واحنه الاصل هنا

حميد ؛ يمه مالج علاقة لاتدخلين اني احلها وشحدة اذا جابها والله اطردها منا واشمرها على ابوها معايزيين مخابيل كافي الي اجانه هذا الخاطب وحدة كافرة وخابص روحه هو الساقط شيلم غير ساقطين .. وراح كعد ع التخم وخله رجل على رجل ..

تقربت منه ولزمته من ياخة قميصه سحبته حييل وصربته كله على راسه ومديت ايدي وضربته بوكس على حلكه وظل الدم ينزل من حلكه ، انشكت شفته وانكسر سنه ..

واريد بعد اضربه ومجاي اكدر اتركه كلي حقد وبراكين نار وغضب منفجرة بيه ..

ما احس بس على بيبيتي وام حميد كل واحد ماخذتلها صفحة مني وبجرجرن بيه ..

كتلهن بصياح ؛ اتركني اليوم موته على ايدي والله اتركني وخرررن ..

كام حميد ومبين على هيئته انو دايخ يطوطح والدم يطلع من حلكه وخشمه لان الضربه جتي ترس بنص وجهه ..

ركضت عليه امه ، لازمته وتصيح وعين عليه وعين عليه ..
الله لاينطيك كون شوف شسويت بي علمود وحدة مخبلة تضرب ابن عمك الله ياخذك ..

جاوبتها بيبي ؛ لا تدعين عليه وجه البومة لاتدعين ماشوقين حجيه شلونه وشكال الطايح الحظ الممتربي ...

_ اي عمه اي ضلي بهايه تفرقتج بينهم اله ماسوينها حرب بينهم يلله ترتاحين ..

حميد ضل يمشي ويتلفتلي ويحجي ويحاول يسيطر على نزيف خشمه وحلكه ..
_ لا عبالك اسكتلك عاطف اني الك وعلى جثتي تجيب هالمخبلة بس اصبر عليه شويه مساكتلك ترة ..

اخذته امه لازمته من عكسه وراحوا صوب الحمام ...

جريت نفس بصعوبة واسمع بيبي تحجي يمي ..
_ يمه شجاك ليش هيج فقدت اعصابك جان يولي خلي ينبح مثل الجلب وماعليك بي ..

جاوبتها واشر ع المكان الراح بي ؛ شفتي شلون يحجي شون ترديني اسكت اله لا والله ما اسكت مو بكيفه والبيت هذا مو بيته ..

بيبي ؛ بس هدي يمه اعصابك على كيفك ..

_ بيبي امشي وياي نجيب رحمة يله واذا ماتردين خليج وراهم اني اعرف وين اوديها ..

_ لا لا يمه اجي بعد عيني شون ما اجي رايحة اللبس جواريبي واجيب عبايتي بس انت اطلع هسه انتظرني يم الباب لا بجي حميد مرة ثانية وهم تتكاونون ..

_ وشنو قابل خايف منه ؟
جريت نفس ورفعت شعري ليفوك ..

_ لا يمه انت السبع البطل بس يمه اكسر الشر وروح وهسه رايحين نجيبها ..

_ بيبي حاجي عمي خلي يسكت ابنه رحمة محتاجة جو مناسب الها ماريد هذا يمس طرفها بحجاية خوش ؟ ترة اشوفه الامهات شجيب ماشي ؟

_ اي اي خليها عليه يبعد عيوني انت..
_ اني انتظرج بالسيارة لتتأخرين عليه ..
_ لا ما اتاخر دقايق وجايتك ..

طلعت للكراج وحضرت السيارة وبداخلي كلش قلق على جية رحمة لهنا وخايف عليها من هذا الناقص حميد .....

جتي بيبي رحت فتحت الها الباب وصعدت بالسيارة
سديت الباب مالتها ورحت صعدت وسقت السيارة ..
كتلها ؛ بيبي ترة رحمة مسؤؤليتج خاف اطلع اسافر اتأخر بالداوم بعد ميحتاج اوصيج عليها ماشي ؟

جاوبتني باطمئنان ؛ لا توصي حريص وليدي اخليها ابطن عيني وارافگها مثل ظل الها ...

_ اي ادري ماتقصرين بيبي لايروح يأذيها هذا الكلب ..

_ لاتخاف ميسويلها شي هذا حميدان اعرفه بس حجي لسان ..

_ لسانه ينكط سم والله لو ما لازميني جان كصيته اله وخليته يبلعه ..

_ يمه استهدي بالرحمن مايصير هيج انتوا مثل الاخوة وولد عم لاتخلي الشيطان يتدخل بيناتكم ..

_ هيج اخوة اني متبري منها وهذا حميد لو اظفري هم اكطعه واخلص منه ..

گضينا الطريق كُله هيج  شكال حميد وشسوه حميد لحد ما وصلنه للمستشفى نزلت ونزلت بيبي ودخلنا ..
اخذتها سلمت على زملائي الدكتارة وبعدها توجهنا لغرفة رحمة ..

فتحت الباب ودخلنا شفناهه متمددة على سريرها
بس شافتنه كعدت وظلت تباوع مستغربة ..
دقايق ونزلت من سريرها ونزلت تركض ، حضنت بيبي وتبجي وبيبي تبجي وياها وتبوس بيها ..

وخرت من حضن بيبي وظلت تباوعلي ونظراتها تبث الامتنان والاستغراب...

ابتسمت بوجهه كتلها ها شكتلج رحمة مو كلت الايام الجاية راح تكون احلى وهاي جبتلج بيبي وراح ناخذج ويانا وعدت وفيت ورفعت ايديه باستسلام ..

حسيتها ملامحها مستبشرة وفرحانة رغم الالم رغم الوجع الي مغلفها ....

كالت ؛ اروح ويابيبي ؟ اروح وياكم وين ؟

_ رحمة شفتي الدنيا شون صغيرة طلعتي بنت عمتي ..

رحمة : انصدمت معقولة ، اباوع لعاطف ولبيبي مستغربة والدموع بعيوني ممصدكة مستحي معقولة الحظ ابتسملي واخيرا .

حضنت بيبي واني مخنزره على عاطف صح اني بنظره مخبله بس مو هبج يضحك عليه ويكول انتي بنت عمتي...

اني مشايفته ولا سامعه بي رغم احنه انقطعنه عنهم من فتره طويله او يمكن سامعه بس بسبب اهوال الحياة نسيت...

اني نفسي مجاي اتذكرها اتذكر ابن خالي...

هذا مو مهم الاهم هو جاب بيبي هي منقذي بعد ربي وجان لازم من اول ما ماتت بيبي اني التجئ الها

ابن خالي ابن عمي ميهمني ولا بفرحني المهم بيبي اجت وحطلع من هذا السجن

هز راسه عاطف ومبتسم ..
حظنت  بيبي وفرحت من اعماقي رغم هذا مكدرت اضحك وابتسم لان اكو غصة بنص قلبي بنص روحي مكدرت اتجاوزهه ..

ظلت بيبي تبوس بيه حسيت بكمية حنان مو طبيعية ولاول مرة بعد وفاة ماما ارتميت بحظنها مثل طفلة واحس بحنانها يغمرني ..

اخذوني وطلعت من المستشفى الكئيب البائس واخيراً
صعدنا بالسيارة بالورة وكعدت بيبي بصفي مقبلت تكعُد بالصدر يم عاطف اله يمي ..

صعدنا وحركت السيارة ، نص الطريق وكالت لعاطف
_ يمه عاطف وديني لبيت عمتك وداد لان اليوم وصيتها على شغلات لحبيبة قلبي رحمة
وخلت ايدها تمسح على كتفي ..

كال الها ؛ صار تدللي انتِ ورحمة ..
وظل يباوعلي بالمراية وعيونه تضحك ..

خفت من نظراته وتملكتني الهواجس ، غمضت عيوني اطمأن حالي ، اكيد عاطف مايأذيني مستحيل وخاصة بعد الي سواه من اجلي ، ابويه ماسواه الي ..

وصلنا لبيت خالة وداد هم نفس الشي اخذتني بأحضانها وبوستني  ،راحت جابت جنطة واجت ويانا  اخذناهه لبيت بيبي ..

.......

عاطف ... وصلنا دنيا ليل ، شفت عمي ابو حميد ومرته ووياهم حميد كاعدين بالحديقة ، التفت على بيبي وعمتي ورحمة
كتلهم ؛ ابقوا هنانه هسه اجي لاتنزلون ..

نزلت وحدي وسديت الباب ، توجهت الهم كاعدين على الطاولة ، باوعت لحميد وجهه ازرك من الضربة ..
تقربت منهم خليت ايديه على الطاولة
حجيت باعصاب شبه متماسكة ..
_ السلام عليكم ....

بس عمي  رد
_ وعليكم السلام ، هلا بالدكتور ..
جاوبته بود ؛ هلا بيك عمو ..
باوعت لحميد وحجيت ..
_ اسمع حميد بنت عمتي جبتها ويانا بالسيارة والبنية تعبانة ومحتاجة جو مناسب خاصةً باول دخلتها لهذا البيت ، اي كلام ميعجب وفره لنفسك خوش ..

رفع عينه عليه ويخزر ، صاح عليه عمي ورمقه بنظرة تهديد .
عمي ؛ توكل ابني نزلها كل الهلا بيها ..

رحمة : نزلت من السيارة ويا بيبي وخالة استقبلني خالو
ابو حميد : هلا ببنت الغالية ...
وباسني على راسي ..
خجلت كلش وعيوني ع الكاع صار هواي مجاية الهم ..

فتت من يم مرة ووشاب كاعدين بالحديقة شافوني ماحركوا ساكن ، القبت نظرة عليهم شفت هذا الشاب يخزر بيه ، درت وجهي بسرعة ومشيت خايفة وقلبي دكاته سريعة وغير منتظمة..

دخلت للبيت ، اخذتني خالة للحمام وعلكتلي ملابس وكالت اغسلي ..
غسلت ولبست الملتبس الي خلتهن الي ..
ورجعت لبست البالطو وطلعت ..

مرت ايام واني عدهم بيبي مداريتني كلش وعاطف يطب يطلع يسأل عني ..

جنت مرتاحه حيل انام بحضن بيبي ولزمها حيل اخاف تروح مني اخاف اصحئ ويكون حلم

بيبي جانت تريد تعودني علئ البيت وتخليني اكون طبيعيه رغم كل هذا اني مااكدر اكوون..

احس نفسي دخيله عندهم وكله لازكه بيبي...

وين متروح اروح وراها حتى اذا دخلت للحمام اضل منتظرتها بالباب وخايفه ومترقبه...

بس هي مجانت تقبل دكول البيت بيتج لا تخافين

بيوم كاعدة على التخم ولازمه بيبي ضلت تحجي ويايه وتبوس بيه كالت مايصير هيج اريد اروح اصلي

المهم كوه خلتها راحت تصلي ..

جنت اباوع للاستقبال بخوف يممه هسه يجي يدخل هذا ابو حواجب ثخينه بس يخوزر بيه حميد مدري مجيد...

ضليت اباوع للاستقبال واكل بااضافري ومتوتره

دخل حميد مخلي ايديه بجيوبه ويباوعلي ويرفع بتك حاجبه ..

خفت منه حييل ولفيت روحي بالبالطو ودنكت وظليت ارجف مرتاحيت اله ابد  ، كعد مقابيلي ومخلي رجل على رجل ..

كال ؛ ههي مخبلة شدتسوين شدتباعيين ؟؟

كمت اريد اروح لزمني من طرف ملابسي وكعدني

اريد ابجي اريد اصرخ مجاي يطلع صوتي مدري شجاني ..

كال هاي شلابسة ؟ لج انتِ صدُك مخبلة طلعتي شهاللعبان نفس شهالخلاكيين اللابستهه اشو نزعيها يلله ..

وظل يجرجر بالبالطو يريد ينزعه مني ..

كمية الرعب الي حسيت بيها مو طبيعية وانعادت ذكريات ، صارت دموعي تجري وحاولت اصرخ ونجحت محاولاتي وصرخت بعلو صوتي .. ...

هو استغرب صرت اصررخ واصررخ كرضت باارجاء الاستقبال...

فتحت الباب واني أصيح...لااا عووفني مااما مااااما

عاطف..

جنت هسه داخل للبيت واسمع صوت صراخ طالع من الاستقبال اعرفها واميزها من بين كل الاصوات هاي رحمه...

يا ما صرخت واستنجدت بامها باارجاء المستشفى

ركضت للاستقبال اول مافتحت الباب شمرت روحها بحضني وهي تصرخ وتستنجد وتطلب المساعده

حسيت من احتضانها اليه رجعت خطوتين ليوره حصنتها بحنان وضميتها الصدري همست بصوت حنون...اششش لا تخافين اني يمج

باوعت الحميد واكف علئ صفحه مصدوم كال...والله مسويت الها شئ بس جنت اريدها تنزع هل بالطو الوصخ

هزيت راسي بقهر وانزعاج اتمنيت ادفنه هو ميعرف حالتها وميعرف تخاف من واحد يتقرب منها..

اجت بيبي اخذتها وهي تهدي بيها وتسمي عليها

بس جانت ترجف مثل السعفه وكل شويه تصرخ مكدرنه نسيطر عليها لذالك اضطريت انطيها ابره مهدئه..

من شافت الابره هجمت عليه بس هي ناعمه كدرت اسيطر عليها وضربتها...

شلتها واخذتها للغرفه ..نومتها وبيبي تبجي وتسمي وتقره ايات وتبوس بيها...

طلعت خارج الغرفه واني ناوي احاسب حميد رحت للاستقبال ملكيته دورت عليه ماكوو سألت مرت عمي كالت بضحك...هههه انهزم مو هاي المخبله خبلته ههههه..

جريت نفس وهمست ...ان شاء لله يبلاكم اكثر من بلوتها....

صعدت لغرفتي وروحي تعبانه يا ترئ شنو سر رحمه..

..............................

سفانا ...

رجعت كل عاده من المستشفى الحمد لله شويه احس براحه لان كنت مقيده بسبب وجود رحمه..

الدكتور جعلها من واجباتي لذالك كنت كووولش حذره وياها واخاف وحده من المسؤؤلات تسوي شئ واكون اني السبب...

اليوم طلعت حسيت براحه بس لحد الان ما حابه المستشفئ ياريت لو انقل لغير مكان....

دخلت للبيت تقريبا الساعه بالاربعه العصر...

شفت حسن شايل جنطته استغربت وهو من شافني صاح بوجهي...مو بعد وكت ما دكولين ذوله شيسممون شياكلون جان ضليتي للفجر...

جريت نفس متعصب...اكولك اني مجنت العب جنت اشتغل ....شوويه حس وقدر قيمتي دتحاسبني وتحسسني انت زوجي...يابه لا تنسه نفسك كلك ابن عمي

رفع حاجب كال..شنوو زوجي اشو متامله هوواي داخل جامعه اهليه وهناك البنات دكول بلابل مو مثل هنا دكول دواعش وتالي متالي اتزوجج شجاني تخبلت اصوم اصوم وافطر علئ راس بصل...

دخنت من كلامه كتله...انهجم بيتك يالاشكر يبوو عيون الزرك ...واني شبيه اصووم اصوم وافطر علئ بيذنجان مبزر...شووف بابا اقنع نفسك بهذا الكلام ...وليكون بعلمك انت ابن عمي لا اكثر...

كال..مع الاسف عندي بس عم واحد وخلفته ما بيها خير

جاوبته...نفس خلفة عمي بالضبط...

هو لزمني من الجنطه حييل كطعها واني صرخت لان جانت بيها مثل السلاسل اذت جتفي...

اجه جدو وبيبي يركضون وهمه يكولون ..شكوو شكوو

لزمت جتفي واني اتالم واتلوئ من الوجع...

هو كعد ركبه ونص همس بخووف..سفانا والله ماادري مو قصدي

جدي اجه يركض ضرب حسن علئ جتفه كله...لك ليش وياها سافل سريري البنيه تعبانه وتضربها اليوم احرك بغداد علئ راسك وارجع احرك البصره علئ راس الخلفك...

بنيه تعبانه وتشتغل وتجي تضربها لك عار بيك خير روح اشتغل...

اني انصدمت من جدوو وحسن عافس ملامحه مستغرب من كلام جدوو رغم مااثر بي لان شايلين ايعاز الإحساس

بيبي كلتله..علئ كيفك ويه الولد شسوالها تتعاير عود دلووعه ودكتوره...شوو جنه ننكتل منا نشتغل منا

صارت الها عركه هي وجدوو هو يكلها هذا حسن واحد ما محترم وسافل وهي دكله هاي سفانا تتعيقل  ولسانها يجرح..

خليت ورحت للغرفه خليتهم يتعاركون وحسن بنصهم اكيد واكف ويه بيبي ضد جدو

دخلت غرفتي بدلت وسبحت كلت ماانزل هسه حسن يجي يعتذر مني اكييييد...

ضليت بزعلتي منا لليل وهسه يجي يعتذر ويجيب اكل من المطعم...

صارت بالعشرة تقريبا خليت ونزلت متت جوع...

لكيت بيبي تاكل خبر وجاي وجبن انقهرت حيل كلتلها...وينه داعشي البصره ميجيب الج عشا من المطعم لو بس صايره مدعي عام اله وهو ولا مهتم الج

جرت نفس كالت..سوده عليه اليوم خلص امتحانات نص السنه وراح للبصره...

انصدمت يااا راح للبصره شكد نذل وحقير حتى ما كال بنت عمي خلي اسلم عليها قبل لا اروح واني كسرت خاطرها...

صعدت فوك والقهر صعد عندي الضغط...ليش اني وين مااروح لازم اكوله وهو لاا شنو الفرق هو ولد واني بنيه...

هو حر. روحه واني ملك الهم...لا اني وياه سوه ولا اقبل يتحكم بحياتي...

صعدت الغرفتي ودخلت لحساب ياسمين كتبت...هلاوو حسن اليوم اجيت لقسمك اسويلك مفاجأه اشو ملكيتك

ضليت ممنتضره تقريبا ساعه ورد عليه كال...لا بشرفي احتركت الجامعه لج شلون ما تنطيني خبر واني ادور بين الوجوه واكول هسه تجي ياسمين وتفاجئني..

ضحكت كتبت...يبوو حضك محلوو

كتب..حضي احلئ من عشيرتي مو تعرفت عليج

ضحكت بصوت عالي كتبت...بس اني حضي محلو ردت افاجئك وملكيتك ان شاء لله بعد عطلة نصف السنه نتشاوف

رد عليه..انتي شايفتني؟

كتبت..اي شايفتك ما شاء لله كوولش شكلك رجولي احسن من باقي الطلاب عبالك مزعطه لا انت مبين ناضج

رد..ناضج عقليا وفكريا وداز سمايل غامز

متت من الضحك بس مجاوبته..

رجع كتب..اتصل؟

كتبت بسرعه...لا لا اخوويه كاعد يمي يقره انكليزي ان شاء لله غير مره

كتب...احبببج

همست بكلبي حبتك حيه هههههاي

كتبت عود خجلانه...اووي خوجلت ...وسمايل ابو عيون قلب الحب...

بسرعه رد...اوووف اروح فدووه ونذر للخجلان ...شوكت التقي بيج...

ضليت اسولف واكذب عليه وهو مصدك ومستمتع ولو يدرب بيه سفانا يمكن يحركني ههههه...

غلقت الموبايل ونمت واني كل شوويه اضحك طلع حسوني رومانسي يفدوووه...

لعد شبي ويايه ماخذ دور ابو قتيبه السامرائي...

...................................

بعد مرور يومين ...

عاطف...

كعدت الصبح سبحت ودا احضر الدوامي حميد شوي كاف بلاه عن رحمه ميحجي وياها بعد رزاله اكلها من الكل...

رحمه جانت شويه زينه مستقره حالتها رغم خوفها وتعلقها بيبي...

استغربت خوفها وحالتها...

بيبي كالت..راح اخذها زياره واطلعها واونسها بلكي ترتاح شوويه كلتلها حلوو واني كذالك ان شاء لله احاول اخذكم اونسكم...

نزلت جوه جان البيت هدوء ومحد كاعد...

شوويه واندك الباب رحت فتحته انصدمت وعقدت حواجبي هذا شجابه .شيريد هم الع عين جاي هنا..

بدون ماارد عليه ولا اسلم كال بعصبية...اررريد رحمه

نهاية البارت...يتبع

كونوا انتم كونوا بخير..نحبكم💔

نورا ناصر..نور سمو العراق...

وقفه...حبيباتي فضلا وليس امرا تابعو هذي البنيه جان عندها كتاب وانمسح ومحتاجه دعم noor-noor-16