#الكاتبة_نهى_الحسون
#قضية_الشمل
مساء الخير والعافية. عليكم 🌹🌹🌹
جلال
والناس بالناس والكرعة تهلس بالراس
بعد ما اخذونا كلنا للسجن سحل وخلوا المجموعة كلها بزنزانة وحدة
طبعاً انا اعرف الاجراء الروتيني للخطة البديلة في حال فشل الخطة الاولى ان يتم القبض علينا بصفتنا كلنا مشبوهين
وهنا ابو طبرة راح يشوف شغله وياهم
كانوا الكل مخبوصين لان بعضهم كان معروف
وكل واحد ملتهي بروحه
وكل ساعة اسمع واحد بيهم
يصيح نادولي الضابط الفلاني
والثاني كال اتصل على المقدم الفلاني
وهذا الي كاعد يتوعد ويهدد
بالشرطة لان القوا عليه القبض
بس هي كلها بصفحة ومهيمن اخوي بصفحة
الهوسة هايسة وما اشوف الا ومهيمن هد علية وزنكني من قميصي وسحلني بزاوية الزنزانة
جانت عروگ جبينه بارزة من الغضب
فتحت حلكي بمحاولة عقيمة اريد اهديه بس ما انطلني مجال
احجي سكتني بضربة كلة على راسي
احس افترت بية الدنيا
صاح بغضب .. ولك جلال زبالة
يعني لهاي الدرجة انت انحرفت راح اتخبل ولك
دعارة وسجن بيوم واحد هاي تاليتك
احس بي محتار منين يبدي بية بالسحل
ما الومه لان اتبهذل بالسجن كله من وراي
انا لحد هسة مصدوم من مفاجئة وجود مهيمن بالبيت
لزمت ايديه الي كانت لازمة ياخة القميص
.. مهيمن انطيني فرصة بس اسمعني خليني افهمك
.. ولك شتفهمني بعد ترة انا مو اعمي لا عبالك تعبر علية هاي سوالفك ترة انا كل شي اعرف عنك
.. بس انطيني سبب واحد يخليك تروح للمنزول
ولطشني على الحايط ما رفعت ايدي ادافع عن نفسي
كان بأستطاتي ارده عني وامدده بأرضه بس المشكلة مهيمن اخوي
وله كل الحق بعصب علية
التموا علينا واجة ابو طبرة وجتف مهيمن بس هو هالمرة ما انطاه فرصة كبل لوى ذراعه ودفعه للگاع
وحجة وياه بتهديد.. شوف ولك ابو طبرة اسمعني زين
قسماً بذات الله خليني اشوفك واكف او متقرب يم جلال السكط
بشبر احسب الله ماخلقك ويصير كتلك ثواب
دخلوا حرس السجن وفرقونا وسحبوا مهيمن
رحت بسرعة ساعدت ابو طبرة ينهض من على الكاع
وحجيت وياه بسرعة بصوت ناصي
.. ابو طبرة اتصرف وشوفلك صرفة اخوي مهيمن ما اريده يبقى بالسجن ولا دقيقة
باوع علية وكال .. بدون ما تكول لازم نطلعه منا
لان وجوده هنا راح يخرب كل خططنا ويضيع الاول والتالي
كان مهيمن معصب اخذوه الحراس وسمعت ابو طبرة كال بصوت عالي
.. اي عفية اخذوه طلعوه منا ودوه على الحبس الانفرادي
لان صارله ساعة يتعارك ويسوي مشاكل
اخذوا مهيمن وهو يصيح ويتحلف بأبو طبرة
.. انا الك ابو طبرة العار بسيطة وين تروح مني
باوعت لابو طبرة بخوف وسألته .. شنو وين ماخذين مهيمن
راح كعد بمكاني بالكاع وكال
ا.. انت مو كلت طلعوه من السجن هذا احنا طلعناه
اتطمنت شوية
اباوع لابو اوس صار يفر بأذاناته
محتار شلون راح يحل اموره وكل شوية الكاه يحاول يتواصل وية
واحد من الواسطات بس احنا سدينا عليه الماي والكهرباء وكطعنا عليه كل الجسور
غمزلي ابو طبرة وكال .. اكول باشا هسة شلون راح نبقى بالتوقيف
محبوسين
ابتسمت وكلت اطمنه .. لا تخاف ابو طبرة هسة احسب للعشرة
وراح يجون يطلعونا.
مو جلال الي يبقى بالسجن
اباوع لابو اوس اجة كعد يمنا وصار ياخذ وينطي ويانا بالكلام
باوعت عليه وكلت
.. انا لو كنت اعرف بمكانكم مو امان جان ما عتبت بابه
مع الاسف عليك ابو اوس ما تعرف تحافظ على امان الزباين
يعني انا جلال من تالي عمري اكل هيج بهذلة من ورة
حضرتك
بس هو مو صوجك صوج ابو كنعان الي وصاني على هيج
مكان تعبان
صار ابو اوس يتودد وكانت هاي احد علامات اخذ الطعم
مهيمن
نار وشرار
كل شي ما اشوف كدامي من الغضب
شلون وليش وشوكت كل هذا يصير من وراي
نفضت راسي وانتبهت على الضابط الي كان يحجي وياي
الضابط .. انت اسمك مهيمن مؤيد
.. اي نعم سيدي اني مهيمن
.. تعال هاك تفضل وقع هنا على هاي الورقة
تم دفع الكفالة الي عليك. حتى تطلع منا
باوعت عليه مستغرب شنو منو هذا الي طلعني من السجن
معقولة يكون عناد اي يمكن هو لان انا تركته ينتظرني برة البيت
وانا دخلت حتى اشوف العار اخوي بعيوني
غمضت عيوني وانا اتذكر اليوم الي جاني بي عناد
وخبرني عن جلال وصحبته لواحد تعبان
من لحظتها وانا قررت ما استعجل واحكم على جلال
انا خلال هاي السنتين الي عشتهم وية جلال
عرفت عنه هواي اشياء
والمواقف هي الي تبين معدن الواحد
وجلال ثبتلي اكثر من موقف معدنه نضيف ما انكر هو مو كامل
بس يكفي صدق نيته بتجاهي واتجاه نور وهالشي
بحد ذاته يشفعله عندي
بس الغريب بالامر اخوي من يوم وفاة بيت خاله وهو احواله انكلبت
ماعاد ذاك جلال الاولي الي اعرفه
اتذكر بذاك اليوم طلبت من عناد ان ما يجيب سيرة لجلال عن الموضوع بتبليغي
وكلت .. عناد خلي الموضوع بيني وبينك
عناد سألني بفضول .. شنو راح تسوي
ما بينت لعناد اي شي لان يبقى جلال اخوي وهالشي خاص بيني وبينه. اي نعم ما انكر عناد كان صاحب الفضل باكتشافي لأفعال جلال بس لكل شي واله حد
جاوبته وانا اوهمه .. والله يا عناد ما اعرف شنو اكلك
بس جلال مو صغير حتى انا ارده وامنعه واكعد اختارله صحبانه
هالشي مو من حقي لا تنسى جلال رجال وهو مسؤول عن نفسه وتصرفاته
عناد كال بأعتراض متعجب .. اي بس انت اخوه يعني ما معقولة
راح تكعد وتسكت ما تسوي شي على الاقل اكعد احجي وياه بلكي يسمع منك انا اعرفه هو دائماً يسويلك احساب ويدور خاطرك
وانا لو ما اعرف تأثيرك عليه جان ما اجيتك وبلغتك
كان عناد يحاول يقنعني وهو ضايج من ردة فعلي
عناد بهذا موقفه كبر بعيني
جاوبته .. والله يا عناد ما بيدي شي اسوي
انا اثق بأخوي
باوع علية بخذلان وكال
.. شكلي لجأت للشخص الغلط. انا هم زايدة مني
اكعد اتدخل بحياة هذا الغبي
ما اعرف ليش اصلا ضايج من تصرفاته
عسى ما ناره تاكل حطبه
كام من مكانه يريد يطلع
كمت من الكرسي الي كدام المكتب وسألته بكل هدوء
.. ها عناد وين رايح حتى بعدنا ما ضيفناك
باوع علية بنظرة غيض وكال
.. خليها غير مرة يالله انا اترخص عندي شغل تاركه وراي
وانت هم عندك شغل ما اريد اعطلك
طلع عناد يجر بأذيال الخيبة وراه الي يشوفني وانا احجي يكول هينياله على هالگلب والبرود الي شايله
بس لو يدرون بية بداخلي بركان ثاير تتناثر منه الشرار
هذا حالي من ذاك اليوم لهذا الوقت
لا ليلي ليل ولا نهاري نهار
اول شي سويته من بعد خروج عناد من المحل
رحت اتصلت على صديقي الصدوق كان هذا واحد من اصدقائي القلة الي اثق بيهم واكدر اامنهم حتى على حياتي
طلبت منه يراقبلي جلال ويجيب لي عنه معلومات وين يروح ويامن يكعد وكل شي يخصه
وكل المعلومات الي وصلتني على جلال
كانت صحيحة فعلاً جلال كان مرافق واحد تعبان
اسمه ابوطبرة سمعته زبالة ولا واحد سألته عنه وكال
عنه كلمة خير
كلهم حذروني منه فضلت اسكت واحتفظ بمعلوماتي لنفسي وابقى اراقب جلال كتلني الفضول اربد اعرف
شعنده مصاحب هذا يعني لا مستواه لا بعمره يعني مابينهم اي شي يربطهم لا عمل ولا مصلحة
بقيت اجمع المعلومات والمشكلة ما انضاف اي شي جديد على المعلومات الي عندي جلال فقط مرافق هذا ويطلع وياه
ويلتقون وية ناس شكولهم مگبلة مو راحة
وحتى صلاح صاحبي ما كدر يعرف منو هذولي الناس
بعدها قررت اتحقق من خلفية ابو طبرة يعني اهله وين ساكن
منو عشيرته
وهم انتهت حملة البحث لباب مسدود ما كدرت اتوصل لأي معلومة
وهالشي خلاني اتخبط بالظلام اكثر واكثر
كنت اراقب تصرفات جلال من يكون بالبيت
بس زادت حيرتي كثر واكثر جلال كان يتصرف ويانا
كلش طبيعي ومحترم البنات وامي وما يوم شفت عليه شي
حاولت اتقرب منه واقوي علاقتي وياه واتصل عليه واطالبه يرجع للبيت من وكت ونكعد سوية حتى بلكي يتطمن ويحجيلي
لكن مع الاسف ماكو وحتى بيوم الي حجالي بموضوع صاحبه
هم اتمنيت يتطرق لموضوع صحبته لأبو طبرة
بس ماكو ولا جاب سيرة وانا فضلت اسكت وابقى اراقب
الى ان اجة اليوم الي انصل علية بي صديقي صلاح
اتصل علية بالليل وكال .. اكول مهيمن صار شي يخص جلال ولازم تجي تشوف بنفسك
لان الموضوع يتطلب تدخلك
.. شنو صلاح انطق كول جلال شبي
.. بالحقيقة هسة شفت جلال راكب سيارة فخمة هو وهذا صاحبه التعبان ابو طبرة والثاني دوحي وشكلهم راح يرحون على
على مكان البيت المشبوه الي مرة كلت لك عليه
مرة. شفت جلال وجماعته يحومون يمه.
.. انت شلون عرفت بيهم رايحيين للبيت
لان شكلهم وكشختهم وسمعت بالخطف ابو طبرة يكله
.. اليوم ونسة للصبح
وهذا البيت مشبوه وانا هسة وراهم بسيارتي
نهضت من فراشي وكلت بستعجال .. صلاح انطيني عنوان البيت
انا جايك بالطريق
صلاح استوقفني وكال .. بس مهيمن اكو مشكلة ثانية
سألته بنفاذ صبر وانا ابدل بملابسي عالسريع
.. احجي كول شنو هاي المشكلة
.. هذا البيت مو اي واحد يكدر يدخله يعني اذا اجيت
مستحيل يخلونك تدخل للبيت
.. شنو هو انا بكيفهم اخوي هناك ما غصباً عنهم يدخلوني ماكو اطلعه سحل من البيت
.. مهيمن الموضوع مو بهاي السهولة الي انت متصورها
هذولي حاطين حرس بالباب ما راح تكدر تجتازهم
سألته .. زين شلون والحل شنو
.. انصحك تشوفلك واحد عنده ناس واصلة يتوسطولك بلكي يكدر يدخلك
انهيت الاتصال من صلاح وانا
احاول استعين بشخص يكدر يفيدني
المشكلة انا جماعتي كلهم على كدهم. مو مال هيج سوالف
وفجاءة وجان يجي عناد على بالي
اي هو عنده هواي معارف واصدقاء معروفين بهيج سوالف
اي ما عندي غيره
بسرعة اتصلت عليه وانت متوجه على عنوان البيت
رد على اتصالي وكان يحجي وياي من ورة خشمه
ما اهتميت لرده ولو انا اتخبل من واحد يحجي وياي من ورة
خشمه
حجيت .. عناد طلبتك وكول تم
اتغيرت نبرت صوته بسرعة وكال بأهتمام
.. تم وانا ابن ابوي كول مهيمن امرني
غمضت عيوني وانا اعرف بروحي راح انطي باخوي ماعندي غير حل شي ابدى من شي
هسة اهم شي عندي اطلع جلال من ذاك المنزول حجيت
.. عناد اريدك بخدمة جلال راح يسهر ببيت تعبان مشبوه
وهذا البيت ما يخلوني ادخل له الا عن طريق احد يعرفهم
فأتصلت عليك بلكي تلكالي واحد من جماعتك يدخلني للبيت
جاوبني بسرعة وكال .. اعتبر روحك دخلت للبيت بس قبل كل شي
كلي انت وين وانطيني عنوان مكان البيت انتظرني
لا تسوي اي شي انا جاي
.. راح انتظرك بس لاتتأخر لان ما اضمن لك روحي
كنت احجي وية عناد وانا واكف قريب عالبيت
انهيت الاتصال ورجعت اتصلت على صلاح صاحبي
.. الو ها صلاح شنو وينهم الجماعة
.. بعدهم بالطريق ومثلما اتوقعت كلامي كان بمحله الطريق كله يوصل لنفس البيت
.. تمام يالله انت خلي بالك يمهم
مو تغفل عنهم
انهيت الاتصال وانتظرت عناد
ما اطول عشر دقايق ولكيت عناد مزروع كدامي
نزل من سيارته العالية واجة بتجاه سيارتي
نزلت والتقيت بي كدام باب البيت والحارس كام من الكرسي
بستعداد
عناد سألني .. مهيمن سنو الموضوع جلال شيسوي هنا
.. بعدين افهمك الموضوع هسة كل الي اريده منك
تدخلني
سكت ما حجة شي اتخصر وطلع نقاله واجرى اتصال سريع
وحجة وية واحد وانطاه المعلومات وبعدها نزل النقال والتفت علية وكال
.. تعال وراي.
راح للحارس وكال هاك اخذ هذا اتصال الك احجي وياهم
الحارس اخذ النقال وكعد يحجي وية الطرف المقابل
وعيونه علينا بعدها انهى المكالمة وكال
.. تعالوا بشوات اتفضلوا
شفت عناد يريد يدخل ورة الحارس
بس استوقفته وكلت
.. عناد لحظة
التفت علية وكال .. شنو مهيمن
.. عناد خليني بس انا ادخل للبيت وانت اوكف هنا انتظرني برة
.. ليش مهيمن يعني انت تخجل مني خاف اشوف اخوك وهو بهذا البيت التعبان
..عناد انت تعرف البير وغطاه
وانا لو صدك اخجل منك جان ما لجأتلك. انت اول واحد
.. زين ليش ما تخلينب ادخل وياك
بارعت للبيت وكلت بصوت ناصي
.. هذا البيت مشبوه ومو راحة ما اريد اثنينا ندخل
لازم واحد يبقى بينا موجود مستعد خاف كل شي
على الاقل تتلاحك للموضوع
.. تمام هاي هي انا راح ابقى انتظرك برة بالسيارة وانت ادخل بس خلينا على اتصال
.. تمام
تركت عناد ودخلت للبيت
وهناك بعد طول انتظار وقلق وخرب اعصاب
كدرت الكة جلال وبساعتها كل شياطين العالم تربعت براسي
وما ظل عقل يحتوي التعقل
لكيت روحي هاد عليه ونازل عليه ضرب
انتبهت من صفنتي على صوت الضابط يأمرني اتوكل اطلع برة
بعدما كملت الاجراءات
وطلعت من المركز
لكيت عناد ينتظرني برة واتفاجيء بخروجي
.. هاي شنو شلون طلعوك صارلي ساعة اسعى
بالسالفة ما بقى واحد ما اتصلت عليه حتى يطلعك
بس كلها تكول الموضوع هذا مو يمنا
غمضت عيوني بتعب ومسحت على وجهي بكفوف ادية وكلت
.. الحمدلله شكلهم يعرفون هم على منو جايين
.. وجلال شنو سالفته ما كدرت تعرف عنه شي
لميت كف ايدي بغيض وانا اتذكر وجهه المتفاجيء بوجودي
..ما كدرت اعرف عنه اي شي ما انطوني اي مجال بسرعة طلعوني
.. عالعموم انا وصيت كم واحد يدخل يستفسر من الجماعة
عن الموضوع حتى نعرف ليش هم هنا جوة بالسجن
تعال امشي خلي اوصلك لسيارتك بعدها بمكانها يم البيت
صعدت بسيارة عناد وانا احس الدنيا ضاكت بعيني
سندت راسي للخلف وانا مهضوم اريد اعاتب الزمن
واكله انت شنو طالبني بطلابة. عليك يمي دين وتريد تاخذه مني
شجاه عضيدي الي جان بالامس اتنومس بطاريه مفتخر
بين اهلي وخلاّني واكول عنه هذا رفعة راسي
جا شماله صفى هاليوم سجين بيد شمّاتي
وصلني عناد يم سيارتي وقبل لا انزل التفتت عليه وكلت
حجيت وياه بتردد قبل لا انهي الاتصال وياه
.. عناد .. .. وكفتك اليوم وياي
صارت دين بركتبتي ما انساه الك
باوع علية وكال.. مهيمن انت وجلال صحباني
ما بين الصاحب والصديق ديون
اتوجهت للبيت وانا النار ما راضية تنطفي
اريد واحد يسلمني جلال بيدي
بالبيت بعدما ما رجع جلال للبيت بعدي بثلاث ساعات
ودخلت انا وياه للغرفة وطلبت من امي تعوفنا لوحدنا جانت نظرات القلق محتلة كل معاني وحههة
قررت اكعد وياه ونحجي بهدوء لان الصياح والغضب ما وصلني لنتيجة. لكينا روحنا اثنينا بالسجن
كعدت وياه اول ما وصل وصرت اسأله واتحققت منه شلون وليش وشوكت وشنو السبب ومنو وراك
بحيث كشفت كل اوراقه
جنت حيل مغثوث وسوايته حازة بخاطري
باوعت عليه كان واكف كدامي وبعيونه نظرات الذنب
سألته
.. كلي شنو هو عذرك وياي يا ابن ابوي
انطيني سبب واحد يخليني اشفعلك غير الدم الي يجري بعروگنا
باوع علية. بلا حول ولا قوة
وكال .. ما اكدر استغل وياك حق الخوة حتى تسامحني
بس راح اكلك شي واحد
مهيمن انا عشت وياك سنتين واضن ما بدر مني
شي او صدر مني فعل يخليك تخاف مني او يگصر رگبتك كدام الناس اترجاك كل شي ما اريدك منك
راح اطالبك بس تنطيني ثقة الاخو بعضيده
كل الي اطلبه منك ان تثق بية صدگني ما تندم
.. جلال طلبك صعب شلون تريد مني اثق بيك وانا اشوف افعالك ردية وتصرفاتك الدونية تشهد عليك
باوع علية وكال بصوت واهن .. براحتك مهيمن ما اكدر اجبرك
توثق بية بس صدكني الايام راح تثبتلك شنو اخوك
.. وليش كل هذا كلي منو ابو طبرة الي ما تكدر تتنازل عن صحبته
شنو لازم عليك شي فهمني انا اخوك
خاف جاي يهددك ويضغط عليك
لاتخجل مني انا اخوك خليني اتورج على عيوبك احسن ما يجي الغريب يتشفى بينا ويعرف بكل عيوبك
جاوبني بغضب معترض.. شنو شبيك مهيمن شنو هاي الاسئلة ترة انت طوختها شنو تقصد يهددني ولازم علية لزمة
مهيمن انا رجال عيب تحجي وياي بهاي الطريقة
احس وصل حدي وانفجرت بي وزنكته من قميصه وزمخت بي بصوت يهدر
.. ولك جا مادامك تعرف العيب شعندك مصاحب العار ولافي ببيوت الزنى
لزم ايدية يريد يبعدها عن قميصها وكال
.. مهيمن شيل ايدك عني
وكلي منو الوزك علية ونبش وراي ونقلك الحجي
.. انت هذا الي هامك منو الي وصلي الكلام
يعني ما مسحتي من عارك
انطيته دفعه وحجيت .. الله يلعنك جلال. ولك انا شسويت
ويعابيني زماني بيك
محتار شنو استخدم وياه ياتصرف
نهض جلال من الكاع وكال وهو يعدل بملابسه ووجهه صاير احمر كال
.. ماكو غيره العار عناد الي وصلك الحجي
.. ولك سكط جاوبني انت ليش جاي تتهرب ووشنو الي راح يفرق عندك اذا كان عناد گلي والا غيره
اباوع عليه دار وجهه واتجه بريد يطلع من الغرفة بسرعة
.. يابة اليوم عناد اذا ما ازوعه حليب امه ما اتسمى جلال
ركضت وراه ولزمته اريد اقيده
.. ولك غبي لا تخليني اكسرك والله العظيم اسويها
جان جلال يتلاوة وياي يريد يروح لعناد
.. اليوم لو انا لوهو
دفعني وراح طلع من البيت وانا وراه
نور
كنت واكفة بالباب ارجف من الخوف على اخواني الي اتعاركوا وطلعوا برة البيت واحد يركض ورة الثاني
ما اعرف شنو اسوي دخلت للبيت والبنات يسألوني وام مهيمن
كاعدة بك
مهيمن وجلال شنو كاعد يصير وياهم
بس كل الي عرفته ان جلال ناوي نية كشرة على عناد وهو رايح عليه
رحت بسرعة على نقالي واني اتذكر عناد كنت خايفة عليه وعلى اخواني لازم احذره لا يروح جلال يسوي بي شي
اي ماعندي غير حل
فتحت النقال واتصلت على عناد
دقايق وجان يجيني الرد سألني بأهتمام
.. هلا نور ليش متصلة الولد صار عليهم شي ؟؟؟
..عناد عفية اطلع من البيت
سألني مستغرب وكال .. شنو ليش اطلع شكو سنو صاير
.. جلال جاي عليك وهو ناوي عليك نية گشرة
عناد جاوبني بعناد وكال.. خليه يجي هلا بي شنو قابل
اخاف منه
.. لا عفية عناد هي مو مال تكعد تتحداه
.. انا رجال شلون تطلبين مني انهزم من غضب جلال
ترة واكفة السالفة
اذا كنتي خايفة فخافي على اخوج مني لا ااذيه
جاوبته وانا دموعي خانتني .. لا عفية عناد الله يخليك لا تأذي
جلال
وحجة بغضب .. من الله ياخذني وياخذ العار جلال وياي ولج مسحي دموعج. لاتبجين
.. اوعدني ما تأذي اخوي
.. اوعدج اخوج يرجعلج قطعة وحدة.
يتبع
اتمنى لكم قراءة ممتعة
اختكم نهى الحسون