#الكاتبة_نهى_الحسون
#قضية_الشمل
مساء الانوار والسرور عليكم 🌹🌹🌹
اعتذر على التأخير بتنزيل البارت
بس الظرف الطاريء حال بيني وبينكم
شكراً لتفهمكم وتعاونكم 🌹🌹🌹
جلال
من يوم الي رجعت للبيت وانا عايش بدوامة
صرت اتهرب منهم لان شوفتهم تحسسني بالذنب كلامهم وياي
صار يشكل ضغط على اعصابي
حاولت اتجنبهم بقدر الامكان حتى ما اتعرض لأسئلتهم
صبيت اهتمامي على المهمة الي بيدي
التحاقي بالدورة كان له الاثر في تعزيز ارادتي وتقويتها
وبيوم اديت القسم
انزرع بگلبي دافع ثاني بجانب اخذ الثار صار يكملها
تراب الوطن
وزاد عزمي اكثر من الاول
اتصل علية الضابط علي انطاني عنوان وكال
.. جلال ارسلتلك عنوان النقيب همام تروح للعنوان وهو راح يستقبلك ويفهمك شنو المطلوب منك
.. تمام سيدي
انهيت الاتصال بعدما اخذت العنوان ورحت للمكان الي مكتوب
وصلت هناك وسألت عن النقيب همام
راويتهم هويتي العسكرية وبسرعة دخلوني
بعدني ما متعود عليها احس شي جديد علية
بس غير التعامل يتغير درجة بالتسعين من يشوفون الهوية
العريف كال .. تفضل سيدي
فتح باب مكتب ودخلني
اتقدمت ودخلت لغرفة المكتب لكيت ضابط كاعد خلف المكتب واول ما شافني كال
.. الملازم جلال مؤيد صح ؟؟؟
كالها بتخمين
.. نعم سيدي
مد ايده بالسلام وكال .. وياك النقيب همام
كانت ابتسامته مرحبة
رجع كعد بمكانه واشرلي حتى اكعد
وبدا كلامه وكال .. جلال انت هسة انتقلت للمرحلة الثانية
وهي مرحلة التأهيل ما قبل الالتحاق بالمهمة
واكيد الضابط علي فهمك شنو المطلوب منك
.. نعم فهمني وكال النقيب همام راح يقوم بتأهيلك
.. تمام شوف جلال بالحقيقة احنا عدنا بعض القضايا الي جاي نتحرى عنها بصورة سرية
وهي القضايا بخصوص مكافحة الارهاب وتعطيل عمليات التهريب
والمهمة الي انا مستلمها حالياً هو
ملاحقة خلية او وكر خاص لعصابة تهريب المخدرات والتجارة بالدعارة
وانا صارلي اربعة اشهر من استلمت المهمة وكدرت
ازرع روحي بشكل مبدأي بينهم
صار النقيب همام بشرحلي عن نظامهم وطريقة عملهم
وعرفني عالشخصية الي انتحلها حتى تساعده يدخل بينهم
كمل كلامه وكال .. جلال المطلوب منك حتى تعزز موقفك وخبراتك لازم تنزل وياي بالمهمة وتشوف طريقة تعاملنا واستخدامنا لوسائل الاستخبارات بهيج مواقف
طبعاً بهاي الخطوة راح نضرب عصفورين بحجر واحد
اولها تعزيز خبراتك الاستخباراتية
والثانية توثيق معلومة مهمة عند داعش بسجل معلوماتك عند داعش لدخول السجن والخروج عن القانون
وهالشي راح يعزز موقفك عندهم يعني نسبة الامان ترتفع اكثر
بعدها سلمني ملف وكال .. هذا الملف ضروري تطلع عليه
بي كل المعلومات المطلوبة منك بالمهمة
.. بس اريد اعرف هالشي يأثر على حياتي الشخصية؟؟
.. اكيد لا ما راح يأثر بصورة مباشرة ما عدى تغيبك عن اهلك
بس اكيد انت راح تدبرلهم حجج لفترات غيابك عنهم
.. ان شاء الله احاول اتلافى موضوع غيابي عنهم
بعدها خلصت المقابلة بعدما انطاني عنوان راح التقي بي وياه
.. هسة كلشي مفهوم عندك لو اعيد ؟؟
.. تمام سيدي ميحتاج افتهمت كل شي
ابتسم وكال
.. بعد اليوم ماكو شي اسمه تمام سيدي
لان عدنا مهمة
وباجر اذا التقيت بيك عالعنوان المتفق عليه
راح يكون اسمي ابو طبرة والكل بالگهوة يعرفني بهذا الاسم
وهالشي حاول ما تنساه
مد ايده وسلم علية وكال بخفة دم
.. محسوبك ابو طبرة.
حضنت ايده بالسلام وجاوبته ..والنعم منك سيدي ابو طبرة
.. ههههه هم رجعنا لسيدي لا هاي هي فلحنا بالمهمة
.. كلتها بحكم المكان يعني جاي اعود نفسي عالاسم
.. انت بهاي غلبتني
وبعد الصار بيوم ثاني حاولت ابين لمهيمن اهتماماتي بالحياة الطبيعية وطلبت منه
ان يشتريلي قطعة ارض تكون قريبة على بيتهم
بالحقيقة هذا صار حلمي الثاني من بعد اخذ الثار
اتمنى احققه
اريد ابني بيت واكون عائلة واطفال يشيلون اسمي
عندي هواي احلام بقيد التنفيذ كل شي متوقف
ومهيمن لكة قطعة ارض وجاي يفاوض عليها
حضرت نفسي حتى ابدي المهمة كانت المعلومات الموجودة بالملف تتطلب ارتداء ملابس بسيطة غير متكلفة
يعني بين قوسين ملابس تعبانة.
طلعت ملابسي القديمة ولبستها حتى نور مستغربة طلبي منها بيوم سألتها على الملابس القديمة وظلت تباوعلي بفضول
بس ما ارضيت فضولها وما حجيت اي شي
ورحت على العنوان وبالموعد المضبوط
وكان العنوان عبارة عن گهوة او كوفي تعبان بمكان بعيد عن المركز دخلت للگهوة وصرت ادور على النقيب همام
اقصد ابو طبرة مسحت جميع الوجوه ادور عليه بس ما لكيته
عقدت حواجبي مستغرب هذا وين صار مو على الاساس اتفقنا هنا نلتقي
مر من يمي عامل شايل بيده نركيله بيها فحم
استوقفته وسألته
.. عيني بلا زحمة عليك ابو طبرة وين ؟؟
باوع علية بشك وسألني .. منين تعرف ابو طبرة وشتريد منه
.. انا صاحبه واتفقنا نلتقي انا وياه هنا ؟؟
رفع حاجبه وكال .. زين ما دامك صاحبه ما تتصل عليه وتسأله هو وين ليش كاعد تسأل
حسيت على ايد ربتت على كتفي من الخلف التفتت وكان اشوف النقيب همام واكف وراي او بالاحرى بقايا النقيب
ماكو اي شي بوجهه يعود للنقيب همام صدك لايك عليه اسم ابو طبرة
باوعت لحاجبه مطبور وجهه بي شخطة صفح فاتح دكم قميصه للنص ولاف منشفة لونها برتقالي على رگبته
وصاير شكله مشبوه
باوع علية وابتسم العامل شافه
.. استاذي هذا الولد كان يسأل عليك ويكول انا صاحبه
جان يحجي ويباوع علية النقيب لزم كتفي ومشى وياي بتجاه ميز يصير بزاوية الكهوة بعيد عن مسامع الشباب
وجاوبه .. مو مشكلة دوحي هذا صديقي من ايام الجهاد
ابتسم العامل وكال .. اذا صاحبك معناها نضيفه على حسابنا
جاوبه .. كريم على الوالد مو بيدك
رحنا وكعدنا عالميز وكال وهو يحجي بصوت ناصي ومرسوم على وجهه ابتسامة.
كال.. اول غلطة بالاستخبارات تسأل شخص عن اسمي وتكله انا صاحبه
شفت حتى دوحي عرف شلون يدينك بسؤالك الغبي
جلال الموضوع ما يتحمل غباء او فهاوة اريدك فطن وتفتح باللبن
يعني هي منا وتبدي تصنع خبرتك اريدك سريع البديهية
وبسرعة تناور بالكلام من تتعرض لهيج موقف
انتبهت عليه لطالما هو يحجي وياي يبتسم بالرغم كلامنا كان كله حدي ومهم وهذا كان ثاني درس
همام كان يناور حتى بمعاني وجهه
وصرت يوم عن يوم اكتسب خبرة جديدة من صحبتي وية همام
اقصد ابو طبرة
بديت اروح وياه للاماكن المشبوهة وعرفني على كم واحد
من الي عليهم علامة كروس اي هم المقصودين بالقضية
الي راح يوصلونا للراس المدبر
وهكذا
احس بروحي جاي اعيش بعالمين منفصلين واحد يختلف عن الثاني
الساعات الي اكون بيها وية ابو طبرة بأثناء قيامنا بالمهمة
تختلف اختلاف جذري عن الساعات الي اقضيها وية عناد او مهيمن او بالبيت وخصوصاً اللحظات الي اشوف بيها غزال البصرة
غير ترد روحي ومن تسلم علية بصوتها الدافي
غير تزيل عني كل همومي
بس كلها بكوم وعناد بكوم
كان يحوم فوك راسي ويسألني
.. ما تگلي انت شنو سالفتك اشو كمنا ما نحصلك متكلي انت وين تروح اشو ياهو الي اسأله عنك من جماعتنا يكول مو يمي
حتى اخوك من سألته هم نفس الجواب
.. يابة گلنالك عندي شغل ليش تلح
.. كلنا عندنا شغل وملتهين
بس حضرتك هواي صاير تختفي شنو جلال
صارت صحبتنا ما تعجبك
كول لا تستحي ترة عادي اعرفك انت عار
كل شي يطلع منك
.. لك عناد انت محد گلك صاير جنك ذبانة بس تزن على راسي
.. لا محد كلي
.. ولك والله عندي شغل انا مو كلتلكم انت ومهيمن
انا حاي ادور على محل بالصناعية علمود افتح لي مشروع صيانة
آليات
.. اي كلت بس كل شي ما شفنا من هذا مشروعك الي خبصتنا بي
.. صبركم علية العافية بالتداريج
.. شلون ما اشوف شكلك تتهرب من صحبتنا
ابتسمت وكلت .. انت ليش تحسسني عبالك مرتي وغيران علية
ضربتي لكمة على صدري بخفة .. وكال خايب ما تاكل تبن نوب سويتني مرتك كول ما رايد عشرتي وياك
خليت ذراعي على كتفه وكلت
.. ولك صاح انا شعندي غيرك ما عاش الي يبدل رفقتك
.. وداعتك بس حجي جنك واحد يريد يسكت مرته ويراضيها
.. ههههههههههههههههههععععع
كان عناد صديقي الصدوق الي استند عليه بكل شي
الا شغلة الاستخبارات والجهاز ما كدرت استأمنه عليها
لان اعرف ردت فعله راح تكون تشبه ردت فعل مهيمن
وحالياً ما اريد اجازف بأي شي خصوصاً بعدما وصلت لمرحلة التنفيذ
نور
اليوم حضرت نفسي حتى تاخذني ام مهيمن للسوك واشتري ذهب
هاي اول مرة بحياتي راح اشتري ذهب
ام مهيمن .. اكلك يمة اليوم انا ونور نريد نطلع للسوك اشتريلها سوارات وكلادة.
كملت على كلام ام مهيمن وكلت.. مهيمن اني راح اسحب من البنك فلوس عادي يعني تكدر انت تسحب اني ما اعرف بهاي الاجراءات
يعني
كان يمشط بشعره كدام مرايا المغسلة باوع علية وكال
.. بسيطة مو مشكلة خليهن علية ماكو فرق بيني وبينج
.. لا مهيمن انت ما مقصر وياي بس المن حاطتهم بالبنك على الاقل
خلي اشتري ذهب بيهم
باوع علية وكال .. نور ليش ما اشوفلج انت هم قطعة ارض يمنا مثل جلال وقريبة على بيتنا بنفس الوكت
وهن القطع يمنا كلها زراعية يعني رخيصات
قطعة ارض ابنيها الج بيت بفلوسج يبقى الج ذخر وبأسمح
.. والله فكرتك حلوة
تمام لعد اذا هيج الحجي راح اشتري بس كلادة ما اشتري سوارات
باوع علية وابتسم .. نور تكدرين تشترين الي بنفسج
لاتخافين عالفلوس ابوج عايف خير من الله
.. تمام بس اريدك تسحب لي مبلغ بالحقيقة اني ما اعرف شكد
احتاج فلوس للكلادة والسوارات
شال نقاله وكال خلي اتصل على الحاج ابو حيدر
اتذكر مرة اشتريت محبس لأمي وهو دلاني على صايغ قريبهم
اتصل مهيمن على الحجي ابو حيدر وانطاه العنوان وكله
.. بس انطي خبر للرجال كله الاهل اليوم يردون يجون يشترون كم شغلة ذهب
.. تسلم حجي ما يأمر عليك عدو
.. ها يمة شنو صفت
.. انطاني العنوان اذا تردون ترحون جهزوا نفسكم خلوني اوصلكم بطريقي قبل لا اروح للشغل
كان الوقت بعد الظهر مهيمن يفتح محله مرتين باليوم الصبح والعصر
التفتت علية ام مهيمن وكالت
.. يالله خالة بالعجل جهزي روحج بين ما اكمل الخلطة والبس عباتي وجواريبي
دخلت ريم وسمعت كلامنا وكالت
.. اخذوني وياكم للسوك ما شايفته بنات الكلية كلها تحجي بي
يكولون بي اشياء حلوة.
باوع عليها مهيمن وكال بصوت لأمه .. يمة انا طالع بالباب
انتظركم مو تتأخرين انتي ونور وبس
ديري بالج تجيبين وياج ممنوعات لسيارتي
والله اشمرها من السيارة مو تكولين ما كال مهيمن
ريم حجت وهي ضايجة .. يعني شلون اني محتاجة شغلات وغراض لازم اطلع للسوك
باوع عليها وكال .. اعرف عندج احتياجات بس مو بهذا السوك
انا اخذج للمول انتي وحور من افرغ
.. باوعتله بتفكير وكالت .. اممم اوك ننتظر ونشوف
بس ديربالك تغلس خليك عند كلمتك
.. انتبهي للسانج ترة بعدها شفايفج ما طابت من الفلفل
هزت شعرها بثقة ودلع وراحت تمشي على كيف
اباوع على مهيمن امه كامت تحجي وياه
وهو عيونه ظلت ورة ريم.
نفض راسه وانتبه على امه وكال
.. ها اي ان شاء الله تأمرين
ام مهيمن عاطت بي .. هو شنو الي افتهمته وكلت اي انشاء الله
يمة انت بالك وين اكلك بيت ام هارون احترك بيتهم وماتت بتهم تكلي ان شاء الله تامرين
شبيك يمة الماخذ عقلك خلي يرجعه
كنت كوة لازمة نفسي لا اضحك كدام مهيمن لا يطنكر
بس خالة راحت تلبس عبايتها
وعافته وهي تدردوم وتكول .. الله يكون بعونك يلي بگلبي من هسة
بالك مشدوه وتايه بعدنا ما گلنا حلال ونسيت روحك
.. اهووو الحجية اليوم داكة عندها اجراس الانذار
بس الله يستر
طلع مهيمن وباوعت لريم جاي تحجي هي وحوراء تكللها مهيمن راح يطلعهم للمول
وانا دخلت للغرفة بدلت ملابسي وطلعت من الغرفة لكيت خالة مخلصة وطالعة كدامي لمهيمن
رحت للبنات وكلت لريم بتحذير
.. ريم احنا طالعين ما تدخلين للمطبخ وتسوين شي عفية ستري علينا منا لحد ما نرجع للبيت
برطمت شفايفها وكالت .. اهووو يعني ما ناوية تنسين انتي واخوج
حوراء جاوبتها وكالت.. ولج كناري شلون ننسى الكارثة السويتيها وركضتج بالشارع انتي والكفشة تركضين ورة البزونة
علمود الدجاجة
ريم بخيبة .. لا ونوب فوك هاي الهوسة الصارت كلها
الدجاجة ذبتها امج بالزبالة. يعني راح تعبي ببلاش
ما يسوى العيطة والركضة اووف والرزالة الحصلتها
..شتريدين ناكلها ورة مااخذتها البزونه بحلكها
تركتهم يحجون بينهم ورحت بسرعة لمهيمن
وصلنا للسوك يم الصايغ الي وصفه الحجي ابو حيدر وراح بعدما انطانا فلوس
وكال .. يمة اذا تحتاجون بعد فلوس اتصلوا علية وانا اتصر
.. ان شاء الله
دخلنا للصايغ كان المحل مرصوص باأطقام الذهب
وسورات وكلايد وتراجي وكل شي
ام مهيمن كعدت على الكرسي المقابل للصايغ وسلمت عليه وكلتله ان احنا من طرف الحجي ابو حيدر وهو رحب بينا
وكال .. اهلا وسهلا تشرفونا بالخدمة
ام مهيمن التفتت علية وكالت .. خادم ربك
بس اجيت اريد كلادة لبنتي واسوارات
رف گلبي على كلمة بنتي ما اعرف شصار بية
كملت كلامها وكالت
.. عفية اريدلها ذهب تكمة صب مو فارغ
باوع علية وكال .. تدلل عروستنا
.هي شنو مخطوبة لو متزوجة
ام مهيمن جاوبته بحسرة .. لا وين ماكو لا مخطوبة ولا متزوجة
جان الصايغ رجال كبير بالعمر وجهه بشوش
باوع علية وكال .. احنا ذهبنا فاله خير عالبنات البنية الي تجي تشتري من عدنا ترجعلنا تجهز نيشان العرس من يمنا
.. اي والله حجي الله. يسمع منك
كنا بس اني وخالتي بالمحل موجودات
وصار الصايغ يعرضلي موديلات السوارات الذهب
ويعددلي مواصفاته الايطالي والهندي والتركي والكويتي
والعراقي واني باقية مصفصة
بس ام مهيمن الظاهر تعرف للذهب وتفتهم شنو كان يقصد
احتاريت شنو اختار
وبعدين عجبوني ثلاث سوارات عريضة كلش حبيتهم
واختاريت كلادة قريبة على نقش السوارات
اخذهم من عدنا ووزنهم وخبرنا بالوزن والسعر واني عيوني نطت
من مكانها عزة گلبي كام يوجعني اني اعرف بالذهب
غالي بس عمري وحياتي ما سامعة وحدة من البنات الي اعرفهم
دافعة هيج سعرف
بس ام مهيمن كعدت تعامله وتداهره عالسعر وحتى من نزل من السعر مو كلش هواي يعني لا زال الرقم مرعب
بالنسبة الي
اباوع عليهم يعني هذني اذا البسهم ابقى احس برعب لا يضعون مني
حجيت وياها بصوت ناصي.. خالة هذني كلش غاليات
ابتسمت وكالت.. يمة الف عافية عليج انتي ذهب ويلوكلج الذهب
طلعت الفلوس من جنطتها وكعدت تحسب وطلع ما يكفي المبلغ المطلوب للدفع
اتصلت على مهيمن وهو كال
.. انتظروني شوية واتصل عليكم
الصايغ كال لأم مهيمن.. حجية خليهم خال ماعندكم فلوس
ترة الحجي وصاني عليكم
جاوبته.. لا حجي عدنا وعندك خير من الله
قطع كلامنا صوت نقال الصايغ
اترخص من عدنا
ورد عالمتصل
سمعت الصايغ كال .. شنو السالفة عناد من غير لا توصيني عليهم
ابوك الحجي قبلك واذا عالمبلغ انت استلمه من الولد وجيبه وياك للمحل
ولو انت استاذ عناد بعد ما كمنا نشوفك
من عهد ما اجيتني للمحل واشتريت الكلادة بعد لفيت علية
ضحك الصايغ ونوب كال.. الله يرحمه ويطيب روحه الجنة
.. هاي هي تدللون انت والحجي شعندي غيركم. عودك سويلك جية بلكي تنفتح الجبسة وتتزوج
دك نقال ام مهيمن وردت وبلغها مهيمن ان الحجي ابو حيدر راح ينطي للصايغ الفلوس من يمه وبعدين انا انطيه
والصايغ انهى الاتصال وباوع على ام مهيمن وكال
.. هاي هي حجية اعتبروا فلوسكم واصلات
طلع دفتر الوصولات وكال اكتبه بأسم منو
ام مهيمن كالت .. بأسم نور
هم كانوا يحجون واني بالي وعقلي كعد يراجع بكلام الصايغ وية عناد عن الكلادة الذهب ما اعرف ليش فجاءة اجتي على بالي الكلادة مال رغد
غمضت عيوني واني اتذكر الصار من قهري شمرت الكلادة وية هدايا رغد او بالاحرى هدايا عناد
وحطيتهم بالمخزن معقولة الصايغ كان يقصد عليها
لا ما معقولة
اخذنا الذهب بعدما حطهم بعلب حلوة وخالة مكالت
خلي نروح نتسوك مناك عبر الشارع يصير المخضر
كلتلها بخوف .. لا عفية خالة خلي نرجع للبيت
ما اكدر اتحرك منا لهنا واني شايلة ذهب قيمته تكسر الظهر
كالت .. يا خالة والله انتي طيبة وعلى نياتج خالة ترة هذا سعره مناسب جا لو تسمعين بأسعار البقية شتسوين
.. ما اريد اسمع خليني على هذني كافي علية
رجعنا للبيت واني فرحانة واستقبلتني ريم وحور
وشافو الذهب
حوراء.. كلش حلوات الف عافية يارب تلبسيهم بيوم عرسج
وريم هم مثلها كالت
لليل اتذكرت الكلادة ورحت صعدت للمخزن وصرت ادور بالغراض على علاكة الهدايا مال رغد
ولگيتها وطلعت الكلادة وگلبتها وصرت اعاين عليها
رحت نزلت جوة يم ام مهيمن وسألتها
.. اكول خالة بالله ما تشوفيلي هاي الكلادة ذهب لو شبه
اخذتها مني وكالت .. هاي منين جبتيها
صفنت شوية افكر بحجة وبعدها كلت
.. خالة هاي لگيتها بغراض امس الله يرحمها
.. الله يرحمها بالله جيبي خلي اشوف
كعدت تعاين عليها وكالت
.. خالة هاي الكلادة ذهب
هي گالت ذهب واني گلبي ارتعد
عزة بعينك عناد مشتريلي كلادة ذهب حتى بدون ما اعرف
جسمي كام كله ينكت وصارت الذكريات والصورة الي اخذتها بوقتها لصدري طلعت من يم ام مهيمن ورحت للغرفة
كعدت بالكاع احس بوجهي صخن
لفيت الكلادة وحطيتها بوحدة من العلب
مستحيل اقبل بيها لا ونوب ذهب
لازم ارجعها بأي طريقة ما اعرف شلون بس المهم ارجعها
جلال
صرت انتقل من مهمة لمهمة وية ابو طبرة
كان عالم غريب عجيب
كان ابو طبرة شخص معروف بين المهربين واله كلمته يمهم
يعني شلون كدر يزرع روحه
اخذني لمكان يصير بيت كبير يصير بمنطقة كلش راقية
كانت الوجوه الي واكفين يحرسون الباب
تكول بيت مسؤل مو بيت دعارة
والمشكلة اهل المنطقة ما عندهم اي علم بالموضوع
او بالاحرى يتغاضون عن الموضوع
هذا حسب كلام ابو الكشك الي يصير بنهاية الفرع بالمنطقة
سأله ابو طبرة وكان هذا جوابه
.. هذا البيت سمعتهم زينة وما شايفين عليهم شي
وهاك شوف السيارات الي تركن على بابهم كلها راجعة لجهات
معروفة
ومن طلعنا من عنده كال
ابو طبرة .. هذا ابو الكشك جذاب
.. شلون عرفت بي يكذب
.. هذا من الخوف حجة هشكل الظاهر الجهات الي كال عنهم
مهددينه
وهو خايف منهم لان هو متأكد اذا فتح حلكه بكلمه يطيرونه ويطيرون عشرته ورة الشمس
.. هسة شنو شراح تسوي
.. انا اذا دخلت لهذا البيت وكدرت اتوفل بينهم
اصير ملك تعرف ليش لان هنا تكدر تكول المنبع مال المستنقع مالتهم هم راس الحية
.. زين انت مو كلت هم بيت دعارة ويحيون الحفلات
خلي ندخل عليهم بحجة جايين نتونس
ضحك وكال.. ولك جلال هم هيج غشمة يستقبلون ياهو هب ودب عليهم
ولك ما سمعت ابو الكشك شنو كال عليهم كلهم روس كبار
يعني مو ياهو الجان يستقبلونه
.. استغفر الله زين شنو حلها
صفن شوية وكال هي المشكلة مو بس بالدخول
.. لعد شنو
.. وبعدما ندخل لازم نخطط شلون راح نجيبهم للدرب ونكسب ودهم وثقتهم حتى نصير ضيوف مرحب بيهم
كان ويانا واحد لاخ اسمه دوحي هذا دوحي هم صدمني من كال
انا وية النقيب همام و رتبته رائد
كان دوحي او بالاحرى دحام
كله عالصامت شغلته يكرص ويضم راسه
نور
دخلت للغرفة
ولكيت حوراء ضايجة وعرفت شنو سبب زعلها
اكيد جلال لان الله يحفظه صاير ما ينشاف
.. شنو حور شبيج تنافخين
.. ما بية شي بس اخوج جلالوه عنده ذيل طويل
.. شنو شلون عرفتي
.. من هاي حركاته انا عرفته اصلاً ما استغرب اذا
يندك الباب وتجي وحدة تكول اني زوجة جلال
ومو بس هشكل تعرفين هاي زمن اخت الزبالة الي اتعاركنا مرة وياها بالمدرسة
.. اي شبيها زمن
.. اشو البارحة تكول امي شافتها بالسوك وسألتها عن جلال
يعني كل هذا يصير وتكولين لاتظليمنه
وضيفي عليه غيابه طول اليوم
ماتكليلي هو وين يولي طول اليوم لامهيمن يعرف بي وين ولا
صاحبه عناد يعرف عن مكانه
كنا نحجي وسمعنا صوت الجرس اندك
.. انتي اهدي شوية
طلعت اشوف منو بالباب ريم كانت سابقتني تريد تفتح صحت عليها
وكلتلها انا افتح لان مهيمن مانع منعاً ريم لو حور يفتحون الباب
هذا القرار صدر صارله فترة قصيرة
رجعت ريم دخلت جوة وانا عدلت شالي وفتحت الباب
ومديت راسي وسألت بصوت ناصي .. منو
شفت واحد واكف وناطيني ظهره التفتت على صوتي
وكان اشوف عناد جلى صوته وسألني .. جلال موجود
.. لا مو موجود
عقد حواجبه مستغرب وباوع لساعته وكال .. شنو هاي
لعد وين راح مو على اساس انا وياه متواعدين نروح للعرس
زين نقاله ليش اتصل عليه يطلع لي مغلق
ما انتظر زدي اتصل على مهيمن واستفسر من عنده
على مكان جلال
والظاهر حتى مهيمن ما عنده علم بمكان جلال
انهى الاتصال ودار وجهه يريد يروح
بس اني وين فرصة شوفتي لعناد مستحيل تتكرر هيج فرصة
استوقفته وكلت
.. لحظة عناد لتروح
التفت وباوع علية
.. شنو نور كولي محتاجة شي
.. لا ما اريد منك اي شي بس الك امانة يمي اريد اسلمها الك
باوعلي مستغرب .. وشنو هي هاي الامانة
.. بس انتظر لحظة اجيبها واجي وانت تعرف شنو الامانة
رحت دخلت للبيت بسرعة وانا گلبي يدك حيل
رحت جبت علبة الكلادة
رجعت مرت الثانية ولكيته بعده واكف ينتظر
مديت ايدي بالعلبة وكلت
.. هاي هي الامانة
باوع عليها وكال .. شنو هاي
.. افتحها وانت تعرف شنو هاي
فتح العلبة وباوع للكلادة ورفعها وكال
.. هاي الكلادة مالتج ليش ترجعيها
.. هواي اسباب تمنعني ابقيها عندي
عناد.. مو جنج جاية متأخرة ترجعيها
.. عرفت راح تسألني هذا السؤال
بس اني ما كنت اعرف بيها ذهب بكل ضني هي شبه
وعرفت بالصدفة ان الكلادة ذهب
وهالشي مستحيل اقبل بي
لانوع الهدية ولا مناسبة الهدية ولا الهادي الهدية
كل هاي الاسباب تدفعني ارجعها الك
اباوع لعناد وجهه يريد ينفجر اخير شي جاوبني وكال مد ايده واخذ العلبة وكال
.. هاي هي وصلت رسالتج ويجرالج التردينه
باوع منا ومنا وكال
.. و هسة فوتي دخلي جوة للبيت
اتذكرت زمخته وكلت
.. صحيح اتذكرت وشغلة ثانية ترة اني ما نسيت زمختك علية بذاك اليوم ترة بذاك اليوم سكتت لان الموقف ما يسمح ارد عليك
هسة بعد مو مال اعديها
انت مالك حقق تتأمر علية وانا جبيرة مو صغيرة تعلي صوتك علية
غمض عيونه ومسح على وجهه بقلة صبر وكال
.. يابنت الناس مو قصدي اتأمر عليج هذا من حرصي عليج
وهسة من كلتلج فوتي دخلي جوة
لان شفت مو حلوة وكفتج وياي بالباب
ما اريد احد يجيب طاريج بالشينة
وهسة انا اعتذر منج خاف اتطاولت عليج
يالله انا اترخص
هو راح ووجهه مدخن مبين كلامي وياه كدره
دخلت للبيت واني احس هالمرة بشعور غريب بأتجاه عناد مو غضب ولا حيرة وانما هالشعور جديد وحلو وگلبي رف بكل قوته
جلال
اجاني ابو طبرة وهو يضحك وكال
.. جلال قربان حضر روحك بعد يومين معزوم بحفلة سهر ووناسسة
ببيت الناس الخيرة
كان يقصد على البيت الي كنا نستقصي عنه
.. صار بس شنو المطلوب منا
.. المطلوب شاب وسيم حلو يلبس ملابس كشخة عليها القيمة ونرتبلك سيارة اخر موديل. حتى تكمل الصورة وانا ودوحي ندخل وياك بصفتنا حمايتك.
بعد شتريد باشا جلال علگ سوكك وطكيت وصار عندك حماية
ابتسمت على كلامه
.. بس ها خلي ببالك باجر تبات بالسجن
.. ليش
.. لان حسب المخطط راح تصير مداهمة عالبيت وياخذونهم كلهم للسجن وهنا راح نشمرلهم الطعم
مفاجئات النقيب همام ما تخلص كل يوم اعرف عنه شي
فاجئني بي
انا لحد الان عقلي ما مستوعب الي سمعته منه
النقيب همام. .. تصدك جلال انا صارلي خمس سنين اشتغل وية هذولي الملة التعبانة
تجي ايام تلكاني احمل وياهم ممنوعات لو اشتغل وياهم بالتهريب
لو اخطف لهم واحد
بس ها لكل شغلة اسويها تكون مدروسة وبيها غاية
.. معقولة !!!
.. كل شي بشغلنا معقول
كان لازم اكسب ولائهم وثقتهم لعد شنو عبالك الثقة ما تجي منا للدرب اذا مايكونون مختبريني بدل المرة الف
وخلي ببالك شغل الاستخبارات بالذات
اذا تريد توصل لهدفك وتنجح بمهمتك لازم عليك تسبح وياهم بمستنقعهم القذر
وتخوض كل المجالات الي هم يخوضونها
حتى تعرف كل نقاط قوتهم وضعفهم
بعدما خلصنا وضع الخطط رجعت
رجعت للبيت هلكان وانا بالطريق مهيمن اتصل علية وسألني
.. انت وين يا اخي ليش اتصل عليك نقالك مغلق شكو شصاير
غمضت عيوني ومسحت وجهي وهاي سالفة النقال بالشغل لازم ينقفل حتى ما نلفت انتباه
يعني مرة نسيته للنقال ما غلقته وبأثناء ما جاي اادي المهمة
واحنا متحاصرين جوة الكرفان وهذولي هجموا على الوكر وصارت بالنعل
وجان مهيمن يتصل علية و بكل برود كال
جلال تعال للبيت امي مسوية تبسي
.. ولك مهيمن يا تبسي انا صاير تبسي
ومن يومها صرت اغلق النقال
لان العائلة ما تعرف شنو معنى كلمة مشغول او عندك خصوصيات
انتبهت لمهيمن كان بعده يحجي بالنقال وكمل كلامه وكال
.. الو جلال شنو نمت مو جاي احجي وياك
ليش جهازك مغلق
.. مهيمن خلص شحن
.. يالله ترة لكيتلك خوش مهندس علمود يخطط لبيتك
بس انت وين لاهي ما تدري بالدنيا طشت لو رشت
عمي خليني انا ادورلك على محل بالصناعية ما صار محل
الي يشوفك يكول راح تستخرج ابار النفط
.. حقك علية ارجع ونتفاهم على سالفة المهندس
.. اي صحيح قبل لا انسى ترة عناد مر عليك للبيت وانا جنت ماموجود
مبلغ البيت كال على الاساس متفق انت وياه يجي عليك وترحون سوية لعرس صاحبكم
ضربت على كصتي
ااااخ يابة انا شلون نسيت هذا عناد
هسة اكيد الكاه كالب الدنيا علية
.. والله نسيت سالفة العرس
مهيمن بشك .. جلال متكلي شنو سالفتك عقلك هاي الايام هواي
يسرح بيك.
كان كلام مهيمن وياي مثل البسامير
گبل غيرت اتجاه طريقي ورحت بوجهي لعناد ادري بي
راح ياخذ بخاطره مني
دكيت الباب وطلع لي اخوه حيدر وبعدها صاح لعناد
طلع عناد
وبس شافني گبل نزل علية بالحجي
ولزم ياخة قميصي وكال
.. لك جلال انت شعندك وية هذا العار ابو طبرة
صدمني بحركته وبكلامه
نترت ايده وسألته .. شكو عناد شبيك
.. شوف جلال راح اكتفي هالمرة احذرك من ابو طبرة وتبعد عن طريقه
بس مرت الثانية راح اتخذ غير اجراء لان الظاهر انت ما تعرف
منو جاي تصاحب
صحت بي وكلت
.. عناد رجعت تحط خشمك بأشياء ما تخصك
واكثر من مرة نبهتك ما اريدك تتدخل بحياتي فاهم لو لا
.. لا جلال مو بكيفك صدگني احط هذا الحجي بحك مهيمن واخليه
يشوف شغله وياك وانت بكيفك
هو ذكر اسم مهيمن وانا هجمت وزنكته من ياخته وكلت بتحذير
.. قسماً بذات الله اذا هذا الحجي وصل لمهيمن يا عناد
صدكني ما ارحمك وساعتها جيب الي يخلصك مني
دفعته ورحت وانا شايط
......
جلال
يوم ثاني بلشت المهمة ودخلنا للبيت وانا بقمة اناقتي
كنت اباوع للوجوه انا وابوطبرة ودوحي (دحام )
دخلنا والوجوه تباوع علية
الي يشوفني يكول هذا الشاب ما يقبل غلط ابن مسؤل
على الكشخة والفخامة الي طليت بيها
اجة واحد وبدة يرحب بينا بحرارة
ابو طبرة بصوت ناصي .. هذا ابو البيت حسب المعلومات الي جمعناها
هزيت راسي بالموافقة
الرجال مد ايده كدامي بترحيب حتى ادخل للصالة
وكال.. هلة والف هلا بالباشا ابن الباشا جلال نور البيت بجيتك
ابتسمت بثقة .. منور بوجودكم يالغالي
رفعت راسي اباوع بالوجوه وهنا جان انصدم صدمة عمري
وجمدت بمكاني
وحجيت بصوت مبهوت ما مصدك عيوني
.. مهيمن ؟؟؟؟!!!!!!!
ابو طبرة اقترب مني وكال بصوت عالي .. شنو باشا ليش اتوقفت
ما كدرت امثل اكثر راح اتخبل مهيمن شلون وصل لهنا
بسرعة التفتت على ابو طبرة
وكلتله .. .. ابو طبرة انا ما اريد منك اي شي غير بس اخوي ما يصير عليه شي
ابو طبرة ارتبك متفاجيء .. اخوك شيسوي هنا
.. والله ما اعرف بس كل الي اعرفه
ان مستحيل اخلي احد يلمس شعرة من اخوي
يتبع
احداث البارت القادم
نور
ركضت ورة مهيمن وجلال خايفة وصلت
لباب الشارع وصحت وراهم
.. لك جلال وين رايح عفية. لاتتهور
مهيمن ابوس ايدك روح وراه
راحوا من غير ما يلتفتون علية
لطمت على خدودي بخوف ياربي دخيلك
اتمنى لكم قراءة ممتعة
اختكم نهى الحسون