#الكاتبة_نهى_الحسون
#قضية_الشمل
مساء الانوار والسرور عليكم 🌹🌹🌹
حوراء
صار وقت الظهر وكلنا حاطين كلبنا بيدنا مهيمن قرر السفر للموصل
لان اتصل على نور قبل شوية وبلغها حتى تجهز جنطته
احس روحي غركانه بمخاوفي مااعرف شسوي
خايفة على اخوية لان يريد يسافر للمجهول مايعرف حتى واحد بالموصل
أمي وخوفي عليها شلون نوصللها خبر سفر مهيمن اكيد راح يرتفع ضغطها
خايفة يصير عليها شي
جلال واختفاءه معقولة راح للموصل ولزموا الدواعش لان لو مابي شي كان اتصل وطمنا عليه
رحت دخلت لغرفة مهيمن وية نور واجتي ريم تسأل عنه بخوف وعيونها فاضحتها
.. عفية نور شنو هذا صحيح الي سمعته صدك مهيمن اتصل عليج
يريد يسافر للموصل
تركت الجنطة والتفتت عليها بسرعة .. لج اششش نصي صوتج لا تسمعج امي
منا اني مرعوبة وريم اجتي زادت علية بمخاوفها
احس اعصابي تلفت من الانتظار والتفكير ما بقى عقل براسي
سمعنا صوت الجرس تركت نور تجمع بملابس مهيمن ورحت افتح الباب
.. هذا اكيد مهيمن وصل
رحت فتحت الباب واني محضرة نفسي حتى احجي وية مهيمن بلكي يغير قراره لان احنا منو النا بالدنيا غيره
صحيح اني ميتة خوف على جلال بس منو يكول هو سافر للموصل
يعني سفر مهيمن مبني على تخمين ماكو شي مضمون
كنت فاتحة الباب وواكفة وراه منتظره دخول مهيمن
بس ما اشوف الا وجلال دخل للبيت
صحت بفرحة ولهفة بأسمه بدون مااحس على نفسي
.. لك جلال انت وين اختفيت كلبنا الدنيا عليك وين رحت
باوع علية وبعيونه نظرة تعب وحزن كسر گلبي عليه
جاوبني .. كنت موجود بأرض الله الواسعة
اجوي البنات على صوتي
نور شافته واقتربت منه ورادت تحضنه لكن اتوقفت مترددة
وبجت بعتب وهي واكفة يمه
جلال .. نور المن هاي الدموع
نور .. خفت عليك لان انت فجأة اختفيت من سمعت بوفاة صاحبك
شتريد مني يكون حالي
ريم .. ومهيمن ما ترك شبر بالبصرة يدور عليك
وهسة هو يريد يسافر للموصل
عقد حواجبه بذنب وكال .. يسافر للموصل ليش
كان يحجي وية البنات واني گلبي كام يفور بقهر منه وعليه
جاوبته .. مو حضرتك من درت وجهك وطلعت من البيت ما فكرت بالناس الي عفتهم وراك شنو راح يكون گلبهم مشلوع عليك
ولو حقك انت شيفهمك بهيج امور اهم شي نفسك
وتفكر شلون تحزن لوحدك
جلال متفاجيء من كلامي وياه
باوع علية وكال .. خبر وفاة صاحبي نساني حتى اسمي فقدت بساعتها كنت ما ادري بروحي شنو كاعد اسوي
وراح اقترب على نور
.. نور كافي لا تبجين حقج علية
واني متحملت رجعت سألته بغيض .. متكول انت وين رحت وليش اختفيت كل هاي المدة
باوع علية وكال .. رحت بمكان منعزل عالشط وبقيت هناك
سألته نور بقلق .. يعني راح ترجع لقوقعتك وتعيد ايام الهروب
مد ايده على كتف نور وعصره بمواساة شكله مثل حال نور
متردد يلمها بحضنه ويطمنها ااوف هاي لو اني ومهيمن جان ما تردد لحظة وحدة يلمني لحظنه حتى يطمني
جلال .. نور لا يظل بالج علية الي صار من الماضي ما مستعد ارجعله ووفاة صديق عمري قضاء الله وقدره ما منه مفر
بس كل ما في الموضوع انا شفت نفسي
احتاج اكعد لوحدي بدون ما احد يكون شاهد على حزني
كان يحجي اتمنيت اخنكه
جاوبته بعصبية .. حتى لو كنت حزين هالشي ما ينطيك الحق تعيشنا بخوف ورعب عليك
تدري احنا من البارحة ما غمضت عينا ولا شفنا النوم من الخوف
وانت كاعد حضرتك. المالك الحزين كاعد وحدك الشط تريد تحزن على صديقك وحدك
مكلفت خاطرك تبلغنا شنو معناه هذا تصرفك
ريم اجتي ولزمتني تهدي بية حتى اسكت
جلال جاوبني .. الي صار وياي مو شوية خلاني ما اشوف دربي
كانت الدنيا ضايقة بعيني صدكيني ما فكرت حتى بنفسي
درت وجهي بزعل عنه كنت مقهورة منه وعليه الى متى يبقى يتصرف بدون تفكير المفروض احنا اهله واول ناس يفكر بيهم
اخته واخوه
اجتي امي وشافت جلال وصلت عالنبي واتحمدتله عالسلامة بفرح
.. يا خالة جلال الف الحمدلله على سلامتك قلقتنا عليك
تعال يمة فوت ادخل للبيت ليش واكف بالشمس
راح على امي وباسها من راسها وجاوبها وهو يباوع علية
.. ما كدرت ادخل لان لكيت السيطرة واكفتلي بالباب ونزلوا علية
دك بالاسئلة
امي باوعت علينا اني والبنات وكالت
.. يا خايبات على كيفجن وية الولد وحدتكم تكول عريف تستجوبه
خلي يكعد بالاول وياخذله نفس ويرتاح
جاوبتها واني امشي وراهم
.. وما يرتاح منو الي لازمه عاد هو شلون يسويلنا حساب ويخاف علينا
نور كالت .. خلي اتصل على مهيمن واطمنه
واني دخلت لغرفتي وسديت الباب بقوة
جلال
كعدت يوم ثاني الصبح على صوت حركة مهيمن بالغرفة وسألته
.. ها راح تروح للشغل
باوع علية وكال .. اي اريد هم يالله اروح للمحل
نهضت من مكاني وكلتله.. خلي مفاتيح المعمل هنا
باوع علية مستغرب .. شنو راح تروح للمعمل اليوم
.. اي يعني الواحد لازم يرجع يشوف حياته و اموره
باوع علية بحذر وكال.. اكيد كلامك صحيح وشي طبيعي الحياة لازم تستمر مهما صار
الله يهدي بالك ان شاءالله ...
هاك اخذ
شمر علية المفاتيح وانطاني نقالي وراح طلع من الغرفة بعده وجهه ثكيل علية
اخذتهم منه بقيت اباوع وراه
البارحة الليل كله ما نمت كنت بس افكر
لان ردة فعل البنات ومهيمن خلتني اوكف بنص الطريق عاجز محتار
بالحقيقة تفاجأت من رجعت ولكيتهم مخبوصين وخايفيين علية
وخصوصاً ردة فعل مهيمن صدمني
من رجع للبيت وكام يحجي علية وكال
.. انت اكبر غبي شفته بحياتي واحلف عليك انت مو عاقل
بختك بوفاة صاحبك وعذرتك
والا وحق الله مال هسة كون انطيك ضربة عالراس اخليك ترجع لوعيك وتبطل رعونية
جلال ديربالك مني لا عبالك راح اسكت على تصرفاتك هالمرة
راح اعديها لان معذور بس اذا انعادت حسابي وياك يصير غير شكل
ومن ورة كلام مهيمن وتحذيره بقيت الليل كاعد افكر بيهم
وبقراري الي اتخذته من وراهم وبغير علمهم
همزين الموضوع يتطلب السرية مني
لان لو يدري مهيمن والبقية على شنو ناوي جان مستحيل
يخلوني اخطي هيج خطوة اكيد الكل راح يعترض ومو بعيد مهيمن
لو يعرف يحبسني ولا يخليني اروح لداعش برجلية
اوووف وانا الفطير جنت ناوي فقط اصارح مهيمن بالموضوع واطلب منه يخلي الموضوع سر بيني وبينه. بس بعدما شفت ردة فعلهم وخوفهم علية. بسبب غيابي المفاجيء عنهم بطلت ما اكول وخصوصا لمهيمن
وعليه اذا اريد انجح بتنفيذ قراري لازم التزم السكوت واتخلى عن
فكرة مصارحة مهيمن لان اكيد مليون بالمية راح يعارض ويخرب علية كل شي بنيته
فخلي الموضوع سر والله كريم شوف شلون تصفى تاليها
نهضت من مكاني وجهزت نفسي حتى اتوكل على شغلي لازم اتصرف كدام الكل بصورة طبيعية وانا راح استمر بحياتي مثل الاول حتى ما الفت انتباههم ويكعذون يسألوني
ريم
فترة امتحانات وكنت كلش ملتهية كنت ماخذة عهد على نفسي ان
اتفوق على دفعتي حتى اثبت للكل واولهم مهيمن انه اني كد المسؤولية
طلعت من الحمام ولافة المنشفة على شعري ولابسة بجامة صيفية
وصارت بوجهي ام مهيمن
اشو هاي كعدت تتفحصني وتباوع علية من فوك ليجوة كصتني كص بعدها حجت بصوت راضي مثل الي تحجي وية نفسها
.. والله طلعت مو هين اثاري طلع معطب وانا ما ادري
سألتها مستغربة .. شنو خالة تحجين وياي ما فهمتج
.. ها خالة اي جاي احجي وياج. ردت اكلج
من تفرغين تعالي شوية يمي بالمطبخ
.. ليش خالة
.. هيج بس كلت نكعد نسولف انا وياج
واكعد اعلمج شلون تطبخين وشلون تصيرين ام بيت يعني من هاي السوالف
.. شكو خالة مو من عوايدج شعجب
.. لا والله ماكو عجب بس شفت نور وحوراء كل شي يعرفون
وباوعت عليج حتى بيضة ما تعرفين تكلين كلت خطية
انا مقصرة وية هاي البنية لازم اكعد وياها واعلمها
ابتسمت وحاوبتها
.. والله اني احب الطبخ والمطبخ بس هم ما يحبوني
.. يايمة هو منو الي يكدر يتحمل ما يحبج
من الي ببالي وشيلي ايدج
باوعت عليها بشك شنو سالفتها ام مهيمن صارلها كم يوم مو طبيعية
شنو سامعة شي عني معقولة تعبت من محاولاتها وية زواج مهيمن.
وحبت تغير النمط ودارت علية
.. بس من هسة اكلج خالة ترة اني مو شاطرة وراح اتعبج وياية اني مثل متعرفين
كل شي مااعرف
ابتسمت وكالت .. ياخالة محد طلع من بطن امه متعلم
هي العافية بالتداريج وتتعلمين
كنت احجي وية خالة واجفف بشعري واحط مرطبات لأيدية
وهي تباوع
.. خالة دخيل الله شتحطين على بشرتج هو انتي عايز ترافة
جانت تحجي ونور دخلت للغرفة شايلة بيدها سلة الملابس النظيفة
وسمعت كلام خالة وابتسمت
اندك الجرس
وام مهيمن راحت طلعت وهي بعدها تحجي بينها وبين نفسها
(يمة الله يكون بعونك يلي بگلبي )
باوعت لنور وكلت .. هاي ام مهيمن راح تخبلني شنو سالفتها
اشو كلما تشوفني تصيح الله يكون بعونك يلي بگلبي
نور ضحكت .. لج اي حتى اني انتبهت عليها
.. بعد منا ورايح ما اكوللها خالة اسميها ( الله يكون بعونك يلي بگلبي)
شكلها جايبتلي عريس
.. عمي خليها تلتهي بيج مو احسن ما تكعد تدور عرايس لأبنها وانتي تكعدين تلطمين على راسي
برطمت شفايفي وكلت .. واذا يدور على عروس وشنو يعني
عبالج اهتم
.. حلفي والله خليني اصدك
رفعت حاجبي بغرور واكابر ما اريد ابين
.. لا نور اني احجي صدك ربي يهني اخوج بحياته
وان شاء الله يلكه بنت الحلال .. عروس تسعده
نور كالت بشماتة .. اللهم امين
ما اتحملت ما حسيت على روحي من شلت المخدة وضربتها على وجهها وكلت
.. امين بعيونج يا ثولة انتي شلون تأمنين على دعائي
هي تضحك وكالت.. مو بيدج والله مجنونة بحبه
بس تدرين اني عاذرتج لان گلبج تورط بحب واحد گلبه من صخر ما يحن
فكل خبال يبدر منج ناتج عن تجميع وتراكم بالمشاعر عندج
.. بالله رحمة على اهلج ما تسكتين گلبي مورم عليه وحيل ضايجة منه ومن تصرفاته وبروده وياية.
اصلاً انا الغبية ليش احرگ بدمي وهو مو بحالي
بس شسوي گلبي اغبر ما يعرف مصلحته اعمى
او ما فكر يحب حب ووكع بحفرة مهيمن الظلمة
لحد هذا يومي مو كادرة اطلع من هاي الحفرة
اصلاً حتى ما حاولت اساعد نفسي واطلع منها واشوف حياتي شكلي عاجبني ابقى ضايعة بظلام حبه
والله ولو اي وحدة منكم يصير بيها مثل الي صار بية
راح اتهمها بالغباء على استمرارها بهيج حب
نور باوعت علية وكالت .. لا ريم كلامج مو صحيح انتي حبيتي
ومو غلط ولا غباء الوحدة من تحب
بس تصاريف الزمن هي الي تتحكم بينا وبحياتنا
دخلت حوراء وكالت .. بنات لحكوا اجوي جيوش بيت خالي علمود يسلمون على جلال
باوعت للساعة كانت الساعة بال٨بالليل.
نور.. هلة بيهم بس لا يكون جايبين جهالهم وياهم لان ذيج المرة
لكيتهم داخلين للاستقبال مسويها ملعب وما مبقين شي على حاله
حوراء.. هم جايين وجايبين شياطينهم وياهم
يالله امشوا امي كالت صيحي للبنات
طلعت نور واني طلعت وراها بعد ما كملت لكيت البنات كلهم موجودين وجلال نزل من فوك حتى يسلم على خوال مهيمن
والله هالرجل ما يتوب من صعوده بالقاط الثاني عبالك شامرين صرته هناك فوك
دخلت للهول وسلمت على النسوان وبناتهم ورحت للمطبخ لنور
كعدت اساعدها
وسألتها.. شنو راح تسوين عشا الهم
.. لا خالة سألتهم وكالوا متعشين راح اصبلهم بس جاي
كنا نحجي وكان يدخل مهيمن ووياه وحدة من بنات خاله ابو سجاد
كان اسمها بتول يجي عمرها ١٦ سنة
كان الاخ خربان ضحك على شي حجته بتول وياه
وهي منطلقة تسولف وياه ماخذة كل انتباهه
وانا اباوع عليهم بحقد وغيرة ربي يبليك يا مهيمن بحرگة گلبي
احتاريت ما اعرف شنو اسوي
نور كالت من غير ما تنتبه .. ريم حضري الصينية والاستكاين
.. صار
طلعت الصينية من الكاونتر وركعتها بصوت يرعد عالميز
بحيث مهيمن وبتول اثنينهم التفتوا على مصدر الصوت
وكعت عيني بعين مهيمن ورفعت حاجبي
هو جلى صوته وباوع لبتول
ورجع باوع علية بنظرة عارف
معقولة حس بغيرتي لا هذا حايط ما يحس خالي من المشاعر
حضرت كلش ونور اجتي وصبت الجاي
وكلتله
..مهيمن عن اذنك اذا متصير زحمة ممكن تجي تاخذ صينية الجاي
والسوالف لاحك عليها
اقترب واخذ الصينية وكال .. ترة بتول طفلة صغيرة
رفعت حاجبي وكلت .. وانا شكو شنو قابل سألتك عن بتول وجاي تعرفني بيها
لو جاي تعرفني على عروستك
شال الصينية وكال .. لو اعرف هذا لسانج شوكت يبطل يجي
يوم وابتلي بي واكصه الج على هاي التصريحات الي تجلط
بس بسبطة بختج بالخطار حسابي وياج بعدين
اخذ الصينية وراح واجتي بتول كعدت يمنا وتسولف وتضحك وية نور
ودخلت حوراء وسألتها .. ولج بتول شنو هاي صدك الي سمعته من امج
بتول جاوبتها وهي تضحك.. يا اختي جنت العب وية اخواني بالمزرعة طوبة ومنطلقة وبالك عني وجان توكع الطوبة على راس
رجال جبير وتوكع عگاله بالكاع وهاي تعتبر شينة وعليها فصول
وما نشوف غير اولاد الرجال الي وكعت الطوبة على راسه
جايين على ابوي يردون يگامونه ويسوها كعدة عشاير لان وكع عگال ابوهم
وابوي ساعة الي يعصب علية وساعة الي يضحك يكول شنو اكول
للناس بالديوان بتي جانت تلعب طوبة وهي مرية حدثة
وحجيت لمهيمن حتى يهدي ابوي اشو مهيمن كام يضحك هو الثاني
والله انفضحت وصرت سالفة بحلك الكل اريد واحد يساعدني مايضحك علية
حوراء.. هو انتي بطلي تضحكين على روحج من تحجين القصة حتى الباقين مايضحكون زين انتي ما توبين من هاي سوالفج هي الطوبة للولد مو للبنات
بتول.. خية شسوي مو بيدي بس اشوف الطوبة تلكيني محزمة ثوبي وانسى روحي واكعد العب
هيج رجلية يكومون يحكوني من اشوف طوبة
الي يكول ابوية رونالدو
بتول تحجي وتضحك وانا احس ماي بارد ونزل على گلبي
بس تذكرت موقفي وية مهيمن اهووو هسة تعال شي يخلصنا من الاستاذ
اكيد راح يكعد يتفلسف براسي وينتقد تصرفاتي وسرعة حكمي عليه
جلال
كانوا خوال مهيمن كاعدين كلهم وبالصدفة كانوا يحجون بالشغل
واستغليت الفرصة وحجيت بموضوع الجهاز
.. اي فعلا كلامكم صحيح الشخص لازم يسعى ويجاهد بحياته حتى
يكون نفسه والشيء بالشيء يذكر طبعاً انا يعرف بية مهيمن
سويت جهاز يخص السيارات والسرعة وقدمت طلب لشركة سيارات بالخارج وشرحتلهم عن نوعية الاختراع. ومنتظرهم
يردون الجواب
مهيمن عقد حواجبه وكال .. والله عفية عليك زين سويت بس
هاي شوكت اشو انا ما عندي علم
جاوبته .. والله كلت خلي اجرب حظي بلكي الكة احد يدعم مشروعي ويتبناه فقدمت والله كريم بعده كل شي ما مبين منهم
.. على العموم ربي يوفقك واذا ما حصلت منهم رد كولي
حتى اسألك احد بلكي يعرف ناس يشتغلون بالسيارات حتى لو اعرف اسفرك للخارج وهناك تقدم عرض الجهاز
حسيت بالذنب من شفت حماس مهيمن بخصوص الموضوع
كان يحجي بأفتخار
وكعدوا خواله واولادهم يسألوني متعجبين انا مسوي هيج جهاز
بقيت تحت تأنيب الضمير لحد ما اجة الليل واتصلت على الضابط علي حتى انطيه الاشارة علمود يتحرك ويرسل الشخص وينفذ الخطة المتفق عليها
نور
رجعوا البنات من الكلية
وبلشت اصب الغدة لان كنت منتظرتهم حتى اكل وياهم على الواهس
بس لفتت انتباهي ريم كان بالها مو يمنا
وكفت يمها وسألتها .. شنو شبيج احجي ليش صافنة شنو صاير شي
ريم بنت عمي صرت اعرفها كانت واضحة مثل الكتاب المفتوح من يكون عندها شي شاغل تفكيرها تصير فجاءة هادئة وما تشارك ويانا بالكلام
باوعت علية وكالت .. ما بية شي بس اليوم
واحد معيد ويانا بالكلية خلاني بموقف كلش محرج
.. شنو هالموقف المحرج هسة غير تحجي ست ريم
.. اااااا طلب ايدي
وانا استحيت انطي جوابي وارفضه بسرعة
..لعد شنو سويتي
.. ما سويت شي انطيته رقم مهيمن مثلما سويت وية علاء الي قبله
اني اعرف بروحي راح ارفضه بس صدكيني استحيت
افشله كدام البنات
جاوبتها .. لا عادي ما بيها مستحى هاي قسمة
بس ماكلتيلي انتي شنوسبب رفضج
.. بالحقيقة اني ما اعرف عنه اي شي وما عندي اي معلومات عنه غير ان هو استاذ ياخذنا
محاضرات هو حباب وسمعته زينة بس
.. بس شنو
.. اممم ما يعرف يختار ملابسه يعني ذوقه صفر
وانا اموت ولا اتزوج واحد ما عنده ذوق بأختيار الملابس
.. اهاااااا وهاي انتي راح تكعدين ترفضين الخواطيب علىً هيج اسباب تافهة لج ريم كوليها من الاخير
ترة اني اعرفج كلش زين واعرف السبب الحقيقي ورة رفضج
بس انا راح اغلس بمزاجي واعديها الج
.. هسة الي يسمعج شنو يكول علية كاتلة روحها على مهيمن
رفعت حاجبي وكلت .. العفو منو جاب سيرة مهيمن بالموضوع
بس الي بعبه خروف يظل يمعمع يا ريم
.. اشش نصي صوتج فضحتيني نور ترة والله ابطل بعد ما احجيلج
.. يالله على العموم خلينا نخلص غدة وبعدين ذبي القنبلة
لان احنا اتعودنا القنابل الريمية
.. يعني هسة الي يسمعج يكول هاي كل يوم جايها عريس
هو بس علاء اتقدملي وهذا الاستاذ بعد شكو
.. ومؤمل نسيتيه الي خربت خطوبة مهيمن من وراه
.. بالله هذا ما محسوب لان اصلاً مهيمن رفضه من يمه بدون ما ياخذ شوري
.. الله كريم هاج اخذي السلطة وحطيها على السفرة
جلال
كعدت من النوم على اتصال الضابط يبلغني بقدوم الرجل الي راح ينتحل شخصية المندوب الي رسلوه الشركة
نهضت بكل لهفة من فراشي وباوعت لمكان مهيمن لكيته كاعد قبلي.
جهزت نفسي وانا كلي حماس للقادم الاتي
دخلت للهول وصارت بوجهي غزال البصرة
خزرتني بعيونها بزعل اووف يا عيونها عطبت گلبي مو على اساس انا عايز قهر وهي تزيدني بزعلها
البية كافيني وجع گلبي على صاحبي وخوفي من المرحلة القادمة من حياتي وعليهم كلهم
حور.هي الشي الوحيد الحلو البريء بحياتي احس حتى وهي زعلانة
مثل المرهم على كلبي
راضية حزنانة فرحانة كلها على بعضها شي دافي على گلبي البارد
التفتت اباوع منا ومنا اخاف احد موجود ويسمعني
لان اريد احجي وياها اراضيها من يوم الي رجعت بي للبيت وهي ما تحجي وياي
.. حور لحظة اريد احجي وياج
گلبت شفايفها بزعل وكالت
.. ما احجي وياك انا زعلانة عليك
ابتسمت .. لعد منو الي كاعد يجاوبني هسة اذا ما تحجين وياية
.. لازم اجاوبك وانطيك علم بزعلي منك بس مو معناها اذا حجيت وياك وجاوبت خلص اني بطلت زعل
.. زين واذا كلت حقج علية وانا اسف
.. شسوي بأعتذارك وانت ما راح تبطل تخوفنا عليك
بأول فرصة الكاك جايب العيد ومخلينا واحد يدعم بالثاني من وراك
.. هسة شلون راح تخلصيها علية محاضرات مو كلنا اسفين
وحقج علينا عمي وتعالي ابوسج من راسج حتى ترضين
اتقدمت منها بتهديد وهي اتسعت عيونها وشهكت وارتدت للخلف وتباوع وراية خاف احد موجود
.. عزة بعينك جلال تريد تبوسني من راسي
جانت تحجي بصوت ناصي والخدود حمر
نصيت صوتي مثلها اقلد عليها
.. هسة الي يسمعج يكول طالب ابوسج من شفتج
انخبصت والتفتت ولزمت الكوشة الموجودة بالهول وشمرتها علية
.. صدك ما تستحي روح منا خلي افوت
.. ما اخليج تفوتين الا تكولين اني ما زعلانة عليك
غمضت عيونها وهي مرتبكة وبعدها تباوع وراية خاف احد يجي
.. لك جلال وخر منا خلي اروح لا يجي احد ويشوفك ساد علية الطريق ويفتهمنا غلط
.. خليهم يفتهمون غلط ها هسة شكلتي سماح لو لا
.. اوووف منك جلال دومك تمشي بالمگلوب وكل شي تاخذه بالقوة
والتهديد
.. هسة انا شنو طالب منج غير بس كلمة سماح
.. يالله هاي هي ما زعلانة منك وسامحتك بس وخر خلي اروح
الله يخليك
.. ااااااخ اي هيج من الاول وبردي گلبي لو انتي واخوج مو بيدكم
كون تخلون الواحد يمشي على الجمر حتى يطولكم يالله ترتاحون
.. احسن حتى تتوب وتبطل هاي سوالفك الي ترفع الضغط
طلعت من البيت واتصل علية مهيمن وكال
.. جلال تعال بوجهك للمحل
.. شنو ليش
.. هذا شاب اجة. يسأل عليك مبعوث من طرف الشركة الي راسلتهم علمود الجهاز
كان مهيمن يحجي بفرح
جاوبته.. يالله انا جاي بالطريق خلي ينتظرني ما راح اتأخر
طبعا هو اتفاق بيناتنا نخلي نقاش الموضوع بخصوص الجهاز يصير كدام مهيمن حتى يكون عنده علم
انهيت الاتصال من عنده وسحبت نفس عميق
ما اريد اوصل لهاي المرحلة واكعد اجذب على مهيمن لان ما يستاهل احد يستغفله بس كل الي كاعد اسويه
لمصلحته ما اريده يورط روحه وياي كافي انا رايح برجلية
لداعش
وصلت للمحل ولكيت شاب يجي عمره بعمر مهيمن
مهيمن كله.. هذا هو جلال. اجة
كام من مكانه. وسلم علية وسألني
.. جلال مؤيد
مديت ايدي وسلمت
.. اي نعم
.. وياك صفاء من طرف شركة (....) للسيارات
بالحقيقة انا الممثل عنهم الموجود بالعراق
اجيت حتى ابلغك تمت الموافقة على تبني مشروعك من قبل الشركة
ورسلوني حتى نتعاقد واتفق وياك على الشروط
كعدت ومهيمن كان يستمع النا
.. وشنو هاي الشروط
.. بالحقيقة انت لازم تشرفنا وتسافر وياي على الشركة علمود
تشرحلهم عن جهازك وشلون طورته وطريقة عمله
ولازم تكون متواجد بتنفيذ تركيب الجهاز عالسيارة
لان اكيد يتم هالشي تحت اشرافك
سألته .. بالحقيقة ماعندي مانع اسافر وياك لان هذا حلمي
مهيمن سأل .. بس انت لازم تفهمنا
وين يكون موقع هاي الشركة ولازم اكو ضمانات تضمن حقوق
اخوية يعني شنو الي يضمن ان انتوا راح تحافظون على كلامكم وية جلال
باوعت لمهيمن ولحرصه علية وغمضت عيوني وكلت
.. لا مهيمن انا ما اقدم جهازي لهاي الشركة لوما كنت اعرف
مصداقيتهم وهواي شباب قبلي من مختلف الدول دعموا مشاريعهم
صفاء جاوبه وكال .. استاذ مهيمن احنا شركة معروفة واذا تحب
تكدر تدخل عالنت وتجري البحث عن اسم الشركة وراح تشوف بعينك وتطمن
وعالعموم انا جبت الاوراق وطبعاً جلال راح يشوفها ويقراها
ويوقع عليها
جاوبته بحماس حتى ابين لمهيمن لهفتي للموضوع وكلت .. اكيد اكيد اوقع هذا حلمي
مهيمن .. بس انت ما كلت شكد راح يطول بالسفر
.. يعني يجي بحدود ال٣ اشهر طبعاً الاقامة وسكنه وكلفة سفره كلها مدفوعة الثمن على حساب الشركة
مهيمن .. بس مو فترة ٣ اشهر هواية يعني هو جهاز
جاوبته ادعم كلام صفاء.. بربك مهيمن جهاز كلفني سنين حتى
سويته اكيد راح ياخذ وقت طويل حتى انصبه بالسيارة وتنفيذ هيج مشروع يحتاج وقت طويل
مهيمن .. تمام اذا تشوف هيج الوضع وانت واثق منهم
اذن اتوكل على الله ووافق وانا بظهرك
من تحتاج شي تلكاني يمك
تمت المهمة الاولى بنجاح كام صفاء وكال
.. جهز نفسك بين ما اخلص اجراءات السفر
ونسافر سوية
ريم
بالكلية وبأخر ايام الامتحانات جنت واكفة يم دعاء اراجع بالاجوبة وياها وكان يجي المعيد الي قبل ثلاث ايام فاتحني بموضوعه
حجة وياي وهو عابس وجهه ضايج
هذا شبي منو يمه
.. ريم انا البارحة فاتحت ابن عمج بطلبي
باوعت عليه متفاجئة البارحة هاي شنو اشو مهيمن ما حجة وماكال شي
.. اي
حاولت ما ابين كدام سلام انه اني ما عندي خبر بالموضوع
.. شنو هو ال (اي. ) يعني حضرتج تسوين نفسج ما تعرفين
ودازتني على عمى عيني وحطيتيني بموقف محرج وتكولين
اي
حجيت مستغربة انفعاله .. شنو ليش تحجي وياية هيج شنو الي صاير
.. كتيلي شنو الي صاير
اذا انتي مخطوبة لأبن عمج شنو معناها دازتني عليه
يعني تردين تثبتين موقف لو تحمين سوكج عنده عود شوفني انا
جاي يتقدمولي عرسان
ترة عيب عليج هاي حركات مال اطفال مو مال عمرج
جان سلام كلش معصب وشكله مجروح
بس انا كلها بكوم وكلامه عن جواب مهيمن كوم.
سألته .. سلام هو ابن عمي شنو كلك بالضبط
.. والله المفروض ما تسميه ابن عمج
كولي المجرم كولي العصابجي احسن ترهم له اكثر من كلمة ابن عمي
دعاء سألته بنفاذ صبر .. سلام غير تفهمنا شنو كلك وانت هيج معصب شلون راح نفتهم
.. بالمختصر كال بنت عمي مخطوبة الي ومسماية بأسمي
وانا هاي المرة راح اعذرك لجهلك بالموضوع وبيك بخت
انت ما تعرف بيها مخطوبة الي
والا كان الي كلام ثاني وياك
وبعدين حضرته كعد يهددني بصورة مبطنة
تدرين انا حيل متعجب انتي ريم يكون عندج هيج اقارب
متوحشيين
هو سلام يحجي وانا اريد انفجر من الغيض
هذا مهيمن شكاعد يسوي وشنو قصده بهذا كلامه
يتبع
اتمنى لكم قراءة ممتعة
اختكم نهى الحسون