رحمة عاطف

البارت الاول

البارت الاول

رواية...رحمة عاطف..
بقلم ...نورا ناصر..ونور سمو العراق

💔💔💔💔💔💔💔

تحن والليل 
يتغنه بحزن #ونك
وتفز مرعوب ودموعك يغرگنك
المصيبه الحسبه ماتنگظي بجرة #اخ
والبگلبك بقن بس #اليغثنك              

...................................
             

كاعدة بغرفة انصبغت الوان جدرانها باللون الرمادي الداكن نفس الوان حياتي البائسة بالضبط ، اعتاديت اخلي اصابعي بداخل حلكي واقضمهم ، ودموعي حفرت طريقها على خدي ذاكرتي مليانة بالالم والوجع  ..

بهاللحظة تذكرت احد اكثر  ايامي سوداوية اليوم
الي حول حياتي الي جحيم مو كادرة اخلص منه
اليوم الي فقدت بي فرحتي وسعادتي املي وانسلب مني لاامان وانقتلت بي انوثتي .. 

تخللت لاسماعي اصوات ذاك اليوم ، امتلأت ذاكرتي بي فجأة ، ماعدت اكدر اسيطر على حالي ، ضاق المكان بيه ، وقلبي يخفق بسرعة وبدا العرق يتصبب مني ، خليت ايديه على أذاني وصرت اصرخ من كل اعماقي ، واصداء صرخاتي ترجع عليه بمزيد من الالم ..

دخلت عليه مرة ابوية تخصرت ووكفت كدامي متذمرة ومزعوجة من صوتي الي ملئ الارجاء ..
كالت ؛ وسم سمج ان شاءالله ولج شون والتالي وياج صرعتينا راح نظل هيجي احنا مو الجهال اخترعوا ليلهم ماينامو من وراج ..

استمرت صرخاتي المعتلة والموجوعة ..
غمتني ناهدة وتوجهت للباب ، بصف باب الغرفة الي اني بيها درج للطابق الثاني مخصص لزوجة ابوي الزغيرة ضحى ..

توجهت للدرج وظلت تصيح بعلو صوتها وتضرب بيدها على الدرج ..
_ لك وينك يعقوب مكافي نايم بالعسل من جيت من شغلك لهسه ويا هاذي المعصعصة دنزل شوف خلفتك المفجوعة صرعتنا صرع الله اكبر عليكم ان شاءالله ...

ثواني ودخل بابا يلهث وانفاسه سريعة ، وهو يركض اجه يمي وحضني بسرعة وهو يحاول يوكفني علئ رجليه لكن اني منهارة ومااقوئ علئ الوقوف

نهاد وبتنهيده ؛  المسودنه هسه تخبل الجهال من وره صريخها والله كل شويه يكمزون والطلاب تعيرهم باختهم المجنونه ..

ابو رحمة بعصبيه...انجبي واطلعي بره
طلعت مقهوره وصكت الباب وراها ...

راح بابا فتح الضوه ورجع يمي شالني وخلاني  علئ فراشي وهو يباوع الوجهي وكأنه مصدوم من وجهي الشاحب شحوب الموتئ  ...

درت وجهي عنه صوب الحايط وخليت طرف البطانية بحلكي وكتمت صرخة من اعماق روحي خفت تفصح لابويه عن الي صار الي ..

سحبني اله حيل وكال ؛ ...هذي امانة الغاليه الي محافظ عليها

همس بحده...رحمة منوو وياج منو مأذيج

باوعتله بعيوني دموع  ردت احجي لكن غيرت رأيي ..

بابا برجاء...رحمه احجي لا تخافين ليش،غيرتي رأيج

سكتت ما رديت عليه

تنهد بحزن مد ايده نزعي  البالطوو الاسود ولي دائما لابسته مااستغني عنه لو اموت ولو شيصير ماانزعه رغم كبره عليه احس بي الامان احس يحميني ويحمي جسدي ..

سحبته بحده وافتراس ورجعت لبسته ، صار يتأملني  ويتجول بنظراته عليه حسيته انتبه علئ رقبتي واديه جروح بليغه واثار مرعبه ..

سحبني من اديه وكلني بحده...منووو ضرربج؟

سحبت اديه منه بعصبيه  وماحاجيته هذي حالتي من قبل اربع سنين السكوت نظامي ومن اصرخ اهز البيت هز وكف ووكف بباب الغرفه وصاح بعالي صوته ..
_ نهاد نهاد ، ضحى تعالن هنا ..

اجن اثنينهن اول الواصلين نهاد خلت باطن كفها على ظاهر كفها الثاني
وجاوبته بتذمر
_ خير شرايد ؟

ابو رحمة ؛ منووو ضارب رحمة؟وشنو هاي الجروح الي بيدها وجسمها؟

ناهده بدون نفس...وشمدريني منوو ضاربها وحده مسودنه وهي تضرب بنفسها ههه نسيت علئ منو طالعه هم امها جانت مسو

ماكملت كلمتها من الكف الي شل خدها شل

حطت ايدها على خدها وبصدمه ؛ تضربني يعقوب تضربني الخاطر رحمه ووحده ميته؟

ابو رحمة...واطيح حظج اذكروا محاسن موتاكم ليش،تحجين علئ انسانه ماتت وشبعت موت بالباطل

ناهده بوقاحه...وهسه شتريد؟؟

ابو رحمه...منوو ويه رحمه؟:

ناهده بصياح...شمدريني بيه هي تضرب نفسها وتهجم علينه وتكتل الجهال من تجيها حالتها مليت مليييت مليت منها بنتك خطر علئ حياتنا مااكدر اعوف الجهال واروح بنتك وحشيه تقتلهم وسالهم اسالهم شلون تهد عليهم بسجين اشمرها بمستشفئ المجانين

ابو رحمه بصدمه...اشمر بنيه بمستشفئ المجانين تردين عشيرتي تأكل وجهي عايف بنيه مراهقه بمستشفئ وهي حالتها خاصه ماتعرف شنو يصير وياها لو تطلع نخله براسج ماارسلها هناك

بهاللحظة دخلت ضحئ وتكلمت بدلع
_ حبيبي شكوو لويش دا تصيح

ابو رحمه وهو يكتم غضبه...هاااي الثوله تريد اشمر رحمه بمستشفئ المجانين

ضحئ بتنهيده...يعقوب هي هاي زوجة الابو مترحم

ناهده بعصبيه...انجبي ولج جااا انتي هم زوجه ابو

ضحئ بحده...بس اني مو مثلج اني گلبي طيب مو صدوك يعقوب

يعقوب بتصريفه..اءء اي كلبج طيب هسه مو وكت هذا الحجي انطنها علاجها ترئ ما متحمل صوت صريخها

ضحئ...حبيبي اني اخاف منها

ناهده بغضب...شبيج تتعايرين علئ شنو تخافين منها

يعقوب...اي تخاف ضحئ بعدها صغيره وانتي كبيره وتعرفين الحياة انطيها علاجها

ناهده بعصبيه...والله ولا انطيها علاجها تريد انت انطيها اني مو مسؤؤله بالمسودنه مالتك

ضحئ بتثائب وهي تتمغط...يالله اني حروح انام

ناهده بغضب...تعااااي تعااااي وكت نووم مادگومين تسوين غده

ضحئ بدلع..والله نعسانه البارحه يعقوب مخلاني انام مو هييج يعقوب

يعقوب باارتباك...اي يالله روحي نامي

ناهده احترگ گلبها لان ضحئ مامخليها يعقوب تنام...انعل ابووووج ياابو الخلفج بنت الكلب مخلصتها بس نووم

ضحئ بعصبيه...انجبي وكلي تبن ياحقيره ولا تسبين بابا فاهمة ..

ناهده...امداج امده ابووج الي انطاج الواحد شايب بس اكيد مسويتلج مكسوره وطلكج رجلج وذبج ابوج وزوجج اليعقوب

ضحئ هجمت علئ ناهده وجرت حجابها بس ناهده اكبر واقوئ من ضحئ لزمت ضحئ كطعتها تكطع

وبابا يفارغ بيهن
رفس ناهده بقوووه شمرها من مكانها وضل يغلط عليها وحاضن ضحئ

ضحئ دفعته وطلعت وبابا تبعها ، بقت بس ناهدة تباوع عليه وتزفر بعصبية ، تقربت مني وجرتني من ياخة البالطو وقربتني منها
خزرتني ويه شكل التاتو مال حواجبها والشامة الداكتها على طرف خدها ،  انطاها مظهر ساحرة مخيفة مثل بالافلام ..

كالت ؛ سمعي ولج حسج ما اسمعه افتهمتي بسببج انضربت وترزلت ترة والله اشيلج منا واشمرج بمكان محد يعرفه ؟؟

ظليت اباوعلها بنظرات فزع والرعب تملك داخلي وبان على هيئتي ، كوة تملصت منها وتغطيت بالبطانية لحد راسي ودفنت وجهي بالمخدة ..

بعد كم يوم ابويه اخذ ضحى وطلع من البيت
شبت نار الغضب بناهدة وصارت نهار كله تحجي ومو راضية عن بابا وتصرفه ..

الظهر كنت بالغرفة حسيت باطرافي متكسرة
كمت من على السرير توجهت لباب الغرفة فتحتها ودااطلع ، صارت مقابيلي اختي من ابويه مشطة شعرها جنطة المدرسة على ظهرها شافتني وخافت

هربت مرعوبة وتصيح : ماما كعدت المخبلة تعالي اريد
اروح للمدرسة ..

اجتي امها وحظنتها من اكتافها ودتطلعها برة وتباوعلي وتخزر بيه وتدردم عليه وتدعي ..
_ الله لايوفقه ابوج الي خلاج على قلبي واخذ ست الحسن وطلع بيها بيت وحدها ..

اخذت بنتها وطلعت من باب المطبخ .. ....

تملكني اليأس والاحباط اني ليش عايشة سألت نفسي ، باوعت للدرج خطرتلي فكرة اخلص نفسي واخلص الناس مني ..

وصلت لباب السطح فتحته وبقيت واكفة اباوع ع المحجر واخذتني خطواتي اله بلا وعي مني ..

شفت بلوكات مخلينهم الجهال صعدت عليهن رغم قواي الخائرة والمنهكة ..

مديت ايديه تعلكت بالمحجر ورفعت جسمي تسلقت وصعدت فوكه وكعدت عليه وظليت اباوع من فوك
حسيت بدوار ودوخة ..

جان وقت ب ١١ الظهر واكو طلاب جايين من المدارس وناس رايحة وجاية ..

حسيت وحدة من البنات الي بالشارع شافتني وظلت تأشر وتصيح ..
المخبلة فووك وراح تشمر روحها خالة ام يوسف لحكي بنتج راح تجيت من فوك وتنتحر ..

على صوتها التموا الناس وصاروا يحجون وظليت افسر كلامهم حسب يأسي ..
اي خل تنتحر شنو الفايدة من حياتها مخبلة ومأذية اهلها ومأذية الجيران والبنت من بعد امها تموت وياها احسن لان محد يرحمها ..

لحظات وطلعت نهاد بيدها الجفجير وشادة شالها على راسها مثل العمامة وتباوع ليفوك والشمس بوجهه ومقلصة عيونها ..
ظلت تصيح ولج يا معزاية شدتسوين تردين تبليني انزلي الله اكبر عليج وعلى ابوج الي بلاني بيج ..

مهتميت لكلام احد وجيت اوكع نفسي ، انزلقت واستعديت  للوكعة ..

اثنائها حسيت شخص سحبني قوي من ملابسي
رفعت راسي شفته ابن جيرانه عرفته شايفته من قبل
..

لزمني من طرف البالطو وظل يسحب بيه واني متعلكة ايد بالمحجر وايد هو ساحبني من طرف البالطو ..

بسبب وسع البالطو انسحبت ايدي منه وصار بيني وبين السقوط شعرة وحدة بس ...

حسيت بحلاوة روحي وصرت اصرخ بشكل هيستيري
ماريد اموت غيرت رأي اريد اعيش ..

لزمني من الايد الثانية قبل لا افلتها من المحجر ورفعني ليفوك بحيث بطني كلها دحجت بالمحجر وتزلغت وتجرحت ..

شالني ونزلني بالسطح وظل يحجي
صدك جذب منهم اهلج مايعالجوج مبقيج هيج ع الاقل يودوج لمشفى المجانين ..

بسرعة اجت نهاد ولزمتني  وهيه تتشكر من الولد
اخذتني ونزلتني جوة وصارت تضربني بكل مكان من جسمي وتسب وتغلط بيه وبأمي وابوية ..

حسيت جسمي تبنج واعصابي تخدرت وماعاد احس بأي وجع ..

بعد ما اكتفت من ضربي صارت تدردم وتحجي بانفاس مثقلة ..
_ امشي مالج ضله هنا اله اخذج اشمرج على بيبيتج تردين تبليني تردين تكتلين روحج يا معزاية موتي هناك يم اهل امج مو يمي مدام ابوج ماقابل يوديج لمستشفى  المخابيل ..

جرتني جر وشمرتني بالشارع وعبايتها على راسها قفلت الباب ورجعتلي تسحل بيه لحد ماوصلنه للشارع العام ، صعدنا فورتات وانطلقت بينا والناس تباوع عليه ويتهامسون بيناتهم ..

واني جنت اباوع عليهم واتمنئ اقتلهم اكلهم بااسناني يستهزئون بيه اعرفهم نظراتهم نظرة مستهزء بيه اكرهم اكرة الناس كله حقراء ....

وصلنه البيت جدو وسحبتني وتمشي بعصبيه عبالك ناهبه نهيبة...

دكت الباب حيييل فتحته مرت عمي وهي تصيح...وسم هذا منو هيج يدك الباب ليكول اقتحام مو خطار

باوعت عليه وعدلت حواجبها المعقوده كال...خيير اليوم مشرفات لا دكولين نقمه هجمت علئ الجيران وجبتيها يمنه

اني عطت بوجهها...انجبي لا دكولين نقمه ..واهز براسي بتوتر...

مرة ابووي دفعتها ودخلت لكت بيبي كاعده تشرب جاي بسرعه من حست بينه رفعت راسها كالت...هااا خير

نهاد بعصبيه...منين يجي الخير وابنج الكوا...مزوج وحده بكد بزرة وراح طلع بيها وعزل واني مخليني ويه المسودنه اجت تنتحر بالله اذا انتحرت اني شسووي يذبونها براسي وانسجن...

بيبيتي كلتلها...وهسه شتردين

نهاد دفعتني...هاي بتكم واني مرة غريبه شلي شغل بيها اخذوها خلوها عدكم

غمضت عيوني باسئ هذا اليتيم هيج يضل بيد اللطامات تنهدت بحزن ليش ما امووت طويلة عمر الله يأخذني ويخلصني...

مرة عمي كالت بااستنكار...لا والله اذا اجت يمنه اني اروح لاهلي

بيبي كلتلها...اخذيها لبيبيتها ام امها يكولون ابن ابنها دكتور نفساني بلكي يعالجها يشمرها بمستشفئ لمجانين

اني انسانه رغم مرضي بس احس وانقهر واتالم صرخت بوجهها بغضب...جاااسميه ام السحورة تردين تشمريني بالمستشفئ مال مخبلين يا مخابيل والله والله اكتلكم كلكم...

بيبي لطمت وجهها كالت...يااا صخام بوجهج صدك نقمه مو رحمه شوف شلون تغلط عليه اخذيها شمريها بالمستشفئ والله ما يرف الي جفن هاي منو كلج اسوي سحوره امج ؟؟

هجمت عليه بس مرة ابووي لزمتني كلتلها...لا تجيبين سيرة امي علئ لسانح الله يحشرج ويه ابو لهب يا مجرمه ام السحوره...

هي تخبلت وضليت تصيح وتغلط وطردتنه ومرة ابوي ضربتني حييل علئ جتفي ورجعنه للبيت

بعدنه واكفين وهي اخذت الجناسي والاوراق ورجعت طلعتنه رحنه ركبنه تكسي بس ما عرفت هي وين ماخذتني ومااعرف مصيري ويين والمن نصاعت الامور....

وضلت تحجي وتدردم وتسب با ابويه وضحئ واني جانت ملامحي جامده من جابت سيرة ضحئ نعصر صدري  مجرد ذكر اسمها احس بغصه واحس شبح يطاردني...

صرخت بصوت عالي وحضنت نفسي ..مرة ابووي ضربتني حييل والسايق كمز...

كالت بغضب...دهر صابج وموت الكرفج راح تكطعني خلفتي بصراخج شوكت افتك منج امج ماتت وخلصت منج وشمرت ضيمج عليه

باوعت عليها باسئ وغضب اكرهم كلهم كلهم مااحبهم...حقراء استضعفوني...

وصلنه لمكان مطوقته سيارة الحرس وتحيطه الاشجار اشبه بالمدرسه من شفته دب الرعب داخل اعضائي ورجفت اني ما عندي ثقه بأي شخص هاي وين جايبتني

حجت ويه الشرطي وانطته لأوراق والجناسي ودخلنه علئ ام التفتيش فتشتنه ودخلنه....

اباوع علئ المكان عباره عن حديقه ويتوسطها حانوت صغير وغرف مثل الشقق.

جريت نفس ومشيت مسيره غير مخيره

دخلت على غرفة الطبيب واني اتلفت بكل الاتجاهات وراسي يهتز بتوتر بدون ارادة مني ..

باوعت للطبيب الي كاعد خلف مكتبه
ويشتغل بالحاسبه الي كدامه ..

نهاد كالت ؛  السلام عليكم

جاوبها  بدون ماايباوع عليها ...وعليكم السلام

كالت بلبكه ؛ دكتور علئ الله وعليك خلصني من هل بلوة

باوع علينا بتفحص عقد حواجبه

كال ؛ تفضلي حجيه شعندج؟

كعدت نهاد علئ الكرسي وحجت بنبرة حزن مصطنعة
_ دكتور هاي البنيه مريضه وهاي اوراقها وابوها شمرها عليه وسافر واني مااكدر على مسؤؤليتها تطفر من البيت وتطفر علئ سطوح الجيران ومتوحشه تكتل بااخواتها وتعرف اكوو ناس نفسيتهم دنيه اخاف يحبلوها وين انطي وجي من الفضيحه..

الدكتور بصدمة ؛ انتي امها ؟

كالت ؛ اي

حجيت بقلبي لو انتِ امي مو هذا حالي ..

توجهت نهاد للدكتور وقدمتله تقارير عن حالتي
لزم الاوراق وظل يقرا بيها  ..

باوع عليه البنيه واني اشهك وابجي ..

كال ؛ بصراحه ماانصحكم بالمصح من تشوف المريضات راح تتمرض اكثر..

جاوبته نهاد برجاء ؛ ميخالف بس خلصني منها ..

غمض عيونه وجر نفس ؛ هي مرضها الانطوائيه عدنه حالات جنونيه قوويه احتمال المريضات يأذنها عدنه الفصام مرض كلش قووي واكثر المريضات يعانن منه ومرض شخصناه تشخيص مرض الاضطراب ثنائي القطب وغيره وغيره

كالت ميخالف دكتور الله يخليك والله علئ يوم اكتلها واموته اخذها وخلصني اخاف واحد يزني بيها ..

تنهد الدكتور  وسكت وكأنه منقرف من كلام نهاد ...
طلب منها اسمي ومعلومات عني وظل يسجلهم ..

نهاد طلعت من الغرفة وعافتني ، ركضت وراها وتوسلت بيها ماتتركني لزمتها من طرف عبايتها
واصيح فدوة لا تتركيني فدوة لا تخليني وحدي هنا ...

كالت بااستهزاء...المن رايحه وياي للضيم دباعي للدكتور شلون حباب وشكله حلوو ضلي هنا احسلج يعالجج ويهتم بيج

رجعت لزمتها بتوسل وابوس بيها ما تتركني هنا

لكن للاسف دفعتني حييل وكعت ع الارض  احسيت عظامي تكسرت .. وضهري وجعني

ضليت اصررخ وابجي بمكاني خفت منه واني وحدي ويا بالغرفة خفت هووواي  ، مارفعت راسي بقيت مدنكة واضرب بايديه على ارضية الغرفة بقوة ..

الدكتور سحب نفس وزفره ودك جرس الانذار واجن ممرضات اثنين اشر الهن ياخذن رحمة...

اخذنها وهي ضجت المكان بصراخها وضربها الهن وهنه سحبنها سحب بتذمر وبدون رحمة وهي
فرفحت تفرفح...

عم الهدوء داخل المكان وبعد ماانسمع الها صوت ..

.........................................

يتبع...

كونوا انتم كونوا بخير...انحبكم😘