عجاف القلوب

بارت 21

اسعد الله اوقاتكم بكل خير احبتي ❤
البارت (21)
#عجـاف_القلـوب ..
#بقلمي_شمـس_السعدي ..

انتظرتك طويلا علـى طرقات الحياة ..
وما أن اوشكت على شم عطر نحرك ..
اختنق حلمـي ونزف الدماء ..
وابتعد بعد الارض عن السماء ..
من يعطف على قلبـي الاحمق ..
الذي قبل لحظات ثملة فرحـا ..
لم يعلم انه كان على بعد خطوات من الفراق ..
تبـاً لكل عُرفٌ ظالم !!
فيه تسـاق الحبيبة كـالاضحية ..
الى سجانها الظالم ..
وانا مقيد ..
ويجب ان اصمت ..
وان لاانوح ولاابكي فقدي ..
لأن الرجال لاتبكي !!
بل تقف كـالرجال الشوامخ ..
ولكن كيف وروحي تشعل وتنطفأ ..
وقد سحبت مني رويدا رويدا ..
فمتى ينتهي البشر من هذا الظلام ..
ومتى يتركون العشاق لتجتمـع ؟؟
--------------------------------------------

يوسف .. من سمعت بقرار جدي وهو يلغي العقد ..
ومن تنمرت وحجيت جان ردة الي ..

الشيخ .. يوسف اعرف بحرگة روحك يبوي .. بس اذا عاندت وخاصه بعد مااشتكوا عليه ..
الشيوخ والعشاير تاكل وجهي ..
انتظر يبعد ابوي بين مااشوف تاليها وياهم والبنيه ماطايرة هاليمك ومحد يتگرب عليها ويخطبها غيرك ..

يوسف .. يعني تعرف بعد نهوة مال السگط ابن عمها محد يتگربلها .. جنت اتوقع كلها تخاف الا انت معقوله خفت منهم ..؟؟

صاح ابوي .. اتأدب يوسف ولاتتجاوز وتقلل احترامك الجدك ..
حمزة .. علمود مرة هيج تسوي وتحجي وي جدك .. ليش وين موليه النسوان الف من يتمناك انت ..

ضحكت .. بس اني مااتمنى غيرها ولااريد غيرها لو ابقى عمري كله منتظر .. وخلوها ترجيه بأذنكم لو نبقى اثنينة بلا زواج العمر كله بس مااخليها تصير الغيري فاهمين .
وانت يعمي الي تعلمني .. مو كتلت روحك على عمتي واخذتها .
عفتهم وطلعت واحس روحي كاره الدنيا كلها ..
اليوم جان المفروض اعقد على حبيبتي ..
اليوم اخلي الحلقه بيدها ..
اليوم اشوف الفستان الالسمائي عليها . واشوف عيونها الحلوة وهي فرحانه ..
معقوله كلشي خرب بلحظة ..
ماردت ابقى بالديوانية ..
احس روحي كارهة حيل ..
اجرت وطلعت الكربلاء ..
محتاج ازور وارتاح ..
اريد شي يهديني ..
رحت وتركت كلشي وراي حتى حبيبتي الي مااعرف شصارلهة من سمعت هم ضاجت مثلي .. ؟؟
هم گلبها انكسر مثل كسرت گلبي .. ؟؟
معقوله درتي حلم وانتهى .. !!
لامستحيل اخليه مجرد حلم ..
مااسكت لازم اشوف حل ..

بقيت الليل كله مگابل شباك الحسين والعباس وانخاهم
وادعي الـ الله واحلفه بيهم ..
غفيت بوسط الامام وماادري بروحي ..
فزيت على صوت الاذان يأذن ..
صليت وگمت ..
اني ليش معتمد عليهم ومستسلم .
لازم اروح واحجي اني وي ابوها ..

رجعت للديوانية من الصبح وكلي امل الگي صورة حل وتفاهم بيني وبين ابوها ..

اول ماوصلت الديوانية اجرت سيارة لولايتهم ومشيت ..
دگيت الباب من الصبح ..
طلعت مرت ابوها الدرة ..
گالت من ورى الباب ..
تفضل منو انت وشرايد ..
يوسف .. اني من الديوانية وعندي شغله يم ابو امير ياليت تصيحي الي ..
احلام .. قصدك ابو محمد لأن هو متبري من ولده والمنطقه كلها تصيحله باسم محمد ..
يوسف .. ماكو فرق بس صيحي اذا امكن ..

راحت وبسرعه انفتح الباب وطلع ابوها ..
صفن بوجهي واول كلمة گالها ..
-انت شجابك وشرايد .. ؟؟
-اريد احجي وياك واتمنى تسمعني ..
-ماكو حجي بينا والمحاكم بيناتنا والعشاير .. انتو تماديتوا مو كافي اخذتوا ولدي وهسا تزوجون بنتي ومن غير علمي ..
يوسف .. العن الشيطان البنية موافقه ليش تظلمها
حاكم .. الله العالم شلون فريت عقلها ادري بيها ثوله مثل امها وتتقشمر ..
يوسف .. مااتحملت كلامه وتكبرة عليه .. وشگد ردت اهدأ ماانطاني فرصه ..
گتله .. قصدك من ضحكت عليها واخذت بيتها ..
بس الحمد لله الله عوضها بولد بنو الها بيت اكبر واحلى من هذا ..
واذا على درة فثق اذا ماصارت الي ماتصير لأبن اخوك العار ..
حاكم .. امشي ولي جاي البيتي وتهددني ..
يوسف .. اجيتك بالحسنى ومارضيت شسويلك .
عفته ومشيت ..
مااتحملت امشي من غير مااشوف قيصر وافرغ الي بگلبي ..
رحت البيتهم ..
طلعلي هو والله جابه .. شافني استغرب ..
اول كلمة گالها ..
-شعندك ولك هنا ..
-لاتگول ولك واحترم نفسك .. اجيت اگلك اذا بقيت تحوم علينا اني ودرة وحق الله ماارحمك .. ولاتظن اخليك تاخذها لو يبقى اخر يوم بعمري ..

گام يضحك .. ماتعرفني من اعاند ..
يوسف .. جا ماتعرفني انت وشسوي اذا واحد حط عينه على شي الي ..
البنيه ماتطيق تباوع بخلقتك فلا تضن يوم توافق عليك

قيصر .. لو اعرف تعجز وتعنس وتبقى بالبيت هم مااعوفها واخليك تتهنى بيها ..
مااتحملت ضربت على وجهة بوكس وگتله هاي مجرد تحذير المرة الثانية حسابي يكون غيرر..

عفته ومشيت .. رجعت للديوانية والبيتنا ..
شفت الدنيا مگلوبه وكلها تسأل عليه ..
من شافوني انصدموا والكل يسأل من جهة وين جنت ووين رحت وليش تخلينا بقلق ..
بدون اي صوت رحت للغرفه وذبيت روحي ع الجربايه ونمت ..

دگت الباب امي ..
يوسف .. يمة بيها مجال تعوفيني وحدي اريد انام ..
ام يوسف .. يمة ليش هيج تسوي وتكسر گلبي عليك تدري شصار بيه الليل كله واني افكر خاف صار بيك شي لو ذيج المسكينه الي فوگ قهرها قهرك وغيابك المفاجئ
واني مغمض حجيت ..
هي شلونها ؟؟
-شلونها يعني حالتها حالها حتى ماحجت وي واحد وبس نايمة ..
الله لاينطي الضيع فرحتكم ..
يوسف .. خليني يمة وحدي .. واذا اجة جدي گليله نايم مااريد احجي وي واحد ..

تمنيت اكو شي يريح بالي الي مابطل تفكير ..
فوگاها عندي امتحانات هذا الاسبوع وفرحان لأن راح اعقد قبلها وصارلي واهس اتخرج بسرعه ..
هسا طار واهسي من الدنيا كلها ..

اندگت الباب ..
صحت اريد انام لحد يجي ..
سمعت صوت امير ..
مو قبل ماتگلي وين جنت وشغلت بالنا هيح ..
فزيت على صوته ..
امير !!
امير .. اي شبيك اخترعت ماتريد تشوفني لازم

فتحت الباب وصارت عيني بعينه ..
- لا موهيج بس مالي خلگ .

امير .. شوف يوسف احنه تربينا سويه ومايوم خلينا شي يهزنا وجنة كل الي نريدة ناخذة ومانستسلم ..
شبيك تخربطت احوالك ..
ولك وداعتك درة الغيرك ماتصير بعد شتريد
خليهم ينبحون بكيفهم ويملون من يشوفون ماكو نتيجة ..
يوسف .. جنت عندهم اليوم وابوك طردني وهددني بعد
وذاك العار يحجي بزودة ومااعرف بيمن ساند ظهرة بس مااتحملت وضربتة ..

امير .. ليش رحتلهم يوسف ليش ..
مااتوقعت هالشي منك .. هسا يتصورون خايفين ويستقون ..
يوسف .. شسوي عبالي ابوك يتفاهم وگلت احجي وياه بهداوة ..
امير .. ولك الي باع اولاده ومرته وشمرهم بالشارع تتوقعه هذا يصير ادمي ويتفاهم ..
ابوي همة مصلحته وبس ..
يوسف .. لاتلومني امير الخاطر الله .. اني هسا مثل الغرگان ومتعلگ بقشة ..

ضحك امير .. عمي ماادري هيج متلوع ..
يوسف .. لاتضحكني مالي خلگ .. من تشوف انسانه اختاريتها واتمنيتها مرة الك تخلص عمرك وياها وتگول هي هاي الي اختارها گلبي ..
وتالي بيوم خطوبتك يخرب كلشي وتصير حلم بالنسبة الك بعد ماجانت حقيقه شتسوي بيهيج حاله ..
اعذرني لأن الي جاي احجي عليها هي اختك بس ماعندي احد احجي وياه غيرك ..

جر حسرة امير وابتسم ..
سألته .. شو بيها حسرة معقوله ضام عليه شي ..

امير .. وليش گلت صارت حلم .. درة لو يموت قيصر ماينول اضفرها مادام اني عايش ..

يوسف .. ولو غيرت الموضوع بس عساس انت ماتعرف جدي اذا الشغله صارت بيها عشاير وحكم يتصرف بعدل ..

امير .. اني اشوفك متشائم بالخالي بلاش .. وداعتك سنة سنتين ويمل من يشوف محد انطاه وهو جبير مو صغير وامة تبقى تلح عليه وتزوجه وينسى درة ..
واحنه اصلا مقررين درة. تخلص سادس يله تتزوجون وهسا هي بأعتبار محجوزة الك بعد لويش مقهور ..

يوسف .. كلامك ريحني بس الي ضوجني فرحتنا الي ضاعت ..
امير .. وعد يعمي الا اسويلك حفله ماصايرة ساعتها وازفك بيدي لأختي اها بعد شتريد وين اكو اخو مثلي ..

ضحكت .. موگتلك انت وحدك الي تفهمني ..

امير .. انتو الاثنين غالين عليه ومايهون عليه اشوف فرحتكم ضايعه .. بس بيبيتي جانت تگول كل تأخيرة وبيها خيرة ..
شد حيلك وراك امتحانات حتى تتخرج وتصير محامي ..
يوسف .. ان شاء الله..

اندگت الباب ..
دخلت سدن .. يوسف اجة جدي يريدك بسرعة ..
يوسف .. استلم اكيد وصل الة الخبر ..

اول مانزلت تلگاني جدي ..
انت شلون تروح لهناك .. زيدت الطين بله .. الشيخ فلان خابرني ويعتب وذولاك يتمسكنون ..
وعساس انت هاد عليهم بسلاحك ومهددهم اذا ماتراجعوا عن النهوة وضارب قيصر بوجهة وعينة مورمة ..

يوسف .. جدي يحجي واني صافن شنو من بشر ذوله وتندمت لأن رحت وكبرت راسهم ..

جدي .. هسا مشتكين عليك انت هم فهمني شلون نحلها
بدل مانحلها كبرتها انت وبعد كل حگ ماعدنا يمهم ..

يوسف .. جدي انت تصدگهم اني رحت اتفاهم ..
جدي .. ولو امير واگف .. بس انت تعرفهم شنو همة ومو مال تفاهم بعد تروحلهم ليش. .
مرزا .. وهسا شنسوي بويه ..
حمزة .. مو خاف احجي ويزعل يوسف مني .. يوسف صاير متهور كلش ومايعرف يتصرف ولايشور واحد تعلم يتصرف من راسه ..
يوسف .. عمي تحجي صدگ .. لو انت بمكاني شتسوي وبعدين اني تعلمت من جدي حگي اخذة لو عند ابوي ..
الشيخ .. بس مو هيج وليدي .. بدل ماجانت الامور ماشية زين واني دزيت ناس وحجوا وي شيخهم وفهمهم هسا رجعلي خبر وهو الزعلان ويريد حگة ..
امير .. بوية من البدايه جان مادزينا خبر الهم واني گتلك ولو اللوم مايفيد بعد ..
الشيخ .. بوية مايصير شبيكم انتم .. ولو ساكتين وعاقدين ثقوا بالله بعد مايدرون تزيد اكثر ويمكن يطلگوها منه ..
يوسف .. ليش احنه وين عايشين هذا الحجي قبل .. المفروض هسا الناس تحررت والوضع تغيير ..
الشيخ .. بالعكس يبوي الوضع زاد وهسا كلمن يحجي بكيفه ويحكم وينهى وراح تجي ايام يصير بعد اسوء من هيج ..
لاعبالك العراق راح يتحسن وضعة ..
راح ناس تاكل ناس .. وناس تحكم ناس .. ابو الحگ يضيع حگة .. والغلطان يحجي بوكاحة عين وهو ابو الراهي ..
لاتشوفون اني احكم بعقلي واخاف ربي ..
اكو شيوخ تهمها مصالحها وناسها ..
يعني حتى واحد من عشيرته غلطان يطلعه نزيه وماكو منه ..
مثل ماهسا شيخ عشيرة امير يسوي ..
تدرون شيگلي من حجيت وياه وگتله هو اصلا مايدري عنهم ومن صغرهم عافهم وربوا عندي ..
يگلي ..
لو ماانت تخفيهم عنه وماخبرتهم عن مكانهم جان هسا همة بحضن ابوهم ..
اني ماردت اكسر بيك اول مرة واجيت على حاكم وكسرته بس هسا اشوف العايل انت ..
انت تعتبر رجال غريب بالنسبة الهم ..
والمفروض تاخذ مشية وتروحلهم وتخطبها من ابوها وعمامها ..
مو تاخذها بسكته وتعقدلها على ابن ابنك ومجرد تدز تبليغ بيد رجال غريب الابوها ..

يعني گدام العشاير كلها اني الغلطان وهمة اصحاب الحق ..
امير .. بوية اني مستعد اروح واحجي وياهم واگلهم اني الي گتلك لاتگول ..
همة مالهم حق يحجون لأن ماعاشوا الي عشناه من ابونا وعمنا ..
الشيخ .. لايوليدي ماكو داعي هاي الناس ماتفهم بالحجي ..
سدوا هذا الموضوع وگلي اختك شلون صارت ..
البارحة ام يوسف گالتلي تخربطت ..
امير .. اي صحيح بس هسا احسن ودزيتلها خبر برجعت يوسف لأن كلنا قلقنا عليه ..

درة .. الليل مانمتة واني ادعي يرجع بالسلامة ومابي شي .. الف شغله اجت ببالي ..
ساعة اگول خاف راح القيصر وقيصر كتله لو شو سواله
ماصدگت الصبح حيدر گال يوسف رجع ..
فرحت وشكرت ربي ..
بس ماعرفنا وين راح ووين بات لأن هاي اول مرة يسويها. .
حتى للمزرعه راحوا الولد ومالگوه ..

بقيت بمكاني متمددة .. اجت امي ..
-يمة گومي اكلي لگمة ..
-مااشتهي ..
-ولج يمة بعدج صغيرة .. ابوج وابن عمج سوها عناد ونهو عليج صدگي بس يجزع منج ويدري ماترديه يمل ويعرس صدگتي سهيله تاخذج الابنها هي اصلا ماتحبني ولاتحب خلفتي ..
درة .. كافي يمة الى متى نبقى عايشين بظلم بسبب ابوي وعمامي .. كرهتهم وكرهت ابوي الي اجة هنا يمثل عليه وخلاني اصدگ هو تغيير ..
بس صدگ لو گالوا ابو طبع مايغير طبعه ..
راح يبقون عمرهم كله ورانا ومايتمنون الخير ..
ياقوت .. درة مااريدج هيج تحجين .. عوفيهم ورى الله وهو ياخذ حقج .. بس لاتحقدين ..
اريد گلبج هذا نظيف دووم ومايصير اسود ..

درة .. يمة ماشفت انضف من گلبج بله ماتگليلي شحصلتي شو الناس كلها مارحمتج ..
ياقوت .. ليش تگولين هيج .. ولج كافي انتو عندي والله عوضني بيكم وبخالي الي وگف وياي مثل ابوي واكثر ..
صح عمامي وابن عمي ماشفت خير منهم ..
بس دوووم الله ناصرني وموگف ولد الحلال بطريقي ..
دگومي هسا غسلي .. واكلي لگمة راح اصب الغدا واخوانج على جية هسا مااريد يشوفوج هيج عيب شيگولون كاتله روحها ع العرس ..
وبعدين حتى اذا نهى عليج هذا… فأنتي راح تبقين محجوزة اليوسف وشوكت ماتبلغين بعد محد يتدخل ويحجي ..

گمت اني وامي وطلعنا من الغرفه ..
سمعت صوت امير اجة ويصيح ..
يمة وينج ..
الغدا جاهز عندي خطار ..

ياقوت .. اي يمة جاهز بس منو خطارك ..
يوسف .. اني عمة تستضيفوني لو لا .
ياقوت .. يا يمة هلا بيك هذا بيتك ماتحتاج عزيمة ..

درة .. صارت عيني بعينة .. حسيت العبرة خنگتني ..
وهو جان يباوعلي بحسرة ..
دنگت ومشيت اطلع الماعين من الكاونتر ..
مااعرف ليش سكتت وماحجيت ..
لأن ماكو شي يعبر عن الي بداخلي ..
الي استغربتة هو هم سكت وماحجة دخل گبل للبراني وي امير ..
غسلت وجهي بمي بارد .. اريد شي يطفي حرارة جسمي وگلبي ..
دخلوا اخواني يشيلون ماعين والكل كان ساكت ..
الصمت هو سيد الموقف بذاك اليوم ..

كملنا ..
گال امير تعالوا يله اگعدوا واشرلي يمة ..
درة .. مااشتهي اكلوا بالعافيه ..
امير .. الخاطري ..
اجيت وگعدت يمة ..
وجان يوسف مدنگ ويگلب السوب بالخاشوگة ..
امير .. يله اتهنوا ..
الكل جان ياكل وساكت ..
لااني گدرت ارفع عيني واخليها بعينة ولاهو ..
احس روحنا رجعنا النقطه البدايه ..

كملنا غدا صبيتلهم جاي ..
اجة غسل وكمل وراح ..
ماحجة ولاخلى عينة بعيني ..
هذا الشي ضوجني حيل ..
دخلت للغرفه ابجي بصوت مكتوم ..

ومن ذيج اللحظة ماجمعنا بس الكلام ..
وكأنه النهوة حرمتنا على بعض وانقطع الامل بينا ..

من شفت تصرفات يوسف وياي وعيت على حالي ..
وصحيت الوضعي ..
اني ليش هيج هامله نفسي .. وحابسة روحي بالغرفه ومااطلع .. مر شهر واني الباب ماشايفته ..
رغم الامور زادت سوء بين ابوي والشيخ وخاصه بعد الشكوى عليه صحيح تم التنازل بعدين .. لكن امر النهوة ماتنازلوا عنه والعشاير صارت كلها تعرف بنهوة قيصر عليه ..

بعدها اجة ابوي البيتنا ..
وماكنت بيوم راح يجي ويعرف بيتنا ..
طلعت بالصدفه وعبالي واحد من اخواني ..
لكن من شفت ابوي تفاجات بقيت صافنه لاگدرت اعاتبة ولاگدرت اگله شعندك جاي ..

حاكم .. هاي بوية درة راح تبقين موكفه ابوج ع الباب ..
درة .. ليش انت ابوي ؟؟
حاكم .. الي سويته المصلحتج .. بعدج صغيرة وراح تتندمين اذا اخذتي ابن شيوخ باجر عگبه يگوم ويگعد يعيرج ..

درة .. بيمن يعيرني بأبوي العافنة وشمرنا بالشارع ..
حاكم .. بيوية جنتي صغيرة وغسلوا دماغج .. اني طردت امير لان من هو صغير مجرم وكتل احلام وجان ماتت لو ماالله ستر ..
بس امج عاندت واخذتكم وطلعت هي السبب خلتكم مشردين ..
اني اريدج ترحين وياي ابن عمج يحبج وشاريج ومستعد يخليلج بيت وحدج ..
امير .. انت شتسوي هنا وشعندك جاي ..
حاكم .. ماجاي علمودك جاي اخذ بنتي وامشي .
امير .. غلطان بالعنوان ماعندك بنيه هنا .
حاكم .. شفتي بويه هذا هو من صغرة مايحترم ولايعرف ابو ..
امير .. انت لو صدگ ابو ماجان كسرت فرحة بنتك وفضحتها بين العشاير.
حاكم .. درة امشي وياي گتلج بيتج وحدج وابن عمج يدللج ..
امير .. مادامني عايش مااخلي قدر امي ونصيبها يتكرر بأختي .. ويابيت الي يخليلهيا .. قصدك حصة امي من بيت جدي ..
حاكم .. امك مالها حصه عدنا ..
امير .. بعلي الا اخليكم تفرون اذاناتكم .. گلت كلشي مااريد منكم بس بعد سوايتكم هاي الا اخذ نصيب امي منكم فلس فلس وگولوا امير گال ..
وهسا يله اطلع ..

درة .. امير تعصب وگام يدفع بأبوي للباب ويصيح .. صح ابوي غلط هواي بحقنا وعذبنا بس ماحبيت اشوفه ينطرد بهيج طريقه ..
لزمت ايد امير وگتله لا مو هيج امير لاتدفعه ..
طلع حيدر شافه تعصب اكثر واجة يصيح عليه ويطرد بي
وابوي يرجع لورة وجن خايف منهم ..
احس المشهد هذا تكرر ..
تذكرت من طردنا وامي تتوسل بي وماعدنا لا حول ولاقوة ..
صدگ لو گالوا الدنيا دوارة .
صحت وفقدت كافي كافي ..
وانت بويه اترجاك روح خلينا بحالنا ولاتجينا ..
هيج احنة عايشين ومرتاحين بلياك اترجاك عوفنا ..
واذا ع الزواج خلص مااريد اتزوج لاقيصر ولا غيرة خليها ببالك هاي ..

طلع وسدوا الباب وراه ..
رجعت للبيت مقهورة وضايجة صارت عيني بعين امي الي جانت واگفه وتراقب من شباك المطبخ ..
ماحجيت شي وياه ودخلت لجوة ..

صاحني امير رجعت ..
-درة ليش تعصبتي وضجتي عليه .. نسيتي الي سواه بينا حيدر .. معقوله حنيتي عليه وصدگتيه ..
درة .. لا طبعا بس مهما يكون هذا ابونا سواء ردنا او لا اسمة ابونا .. اعتبروه مخبل ومو صاحي وانطوه ع گد عقله .. لاتعاملوه مثل ماعاملنا ..
اعرف انت امير تأذيت اكثر واحد منه .. بس اعتبروه رجال غريب وجبير وشيباته براسة مايصير هيج تدفعوه وتطلعوه ..
علي .. صحيح اني من رأي درة .. لو حاجين وياه وطارديه من غير متدفعوه مهما يكون هو رجال جبير .
امير .. هايمة وانتي ماتحجين هم گولوا انت غلطان لان طردته ودفعته ..
گولوا انت مااحترمت شيباته ..
جان ناقصكم تگولون سامحة ودخله البيتك واحضنه ..
ولكم ياابو تحجون عليه .. ليش هو مااشفق على طفولتنا ورحمنا ..
ليش ماهو رف گلبه وماطردنا ..
انتو كلكم صغار ماوعيتوا علينا شلون عشنا ..
اني الي تأذيت منه اكثر اني الي جنت اكل ضرب بالحزام اذا تعصب لو ضاج ..
اني الي طلعت افكك سيارات واشتغل والعب وعيني على جماعتي من يلعبون دعبل ..
اني الي اشوف مرتة وهي تضرب امي وتطردها من بيتها وامي تسكت وتبجي ..
ولكم انتو تنامون واني ابقى صاحي حتى خاف يأذي امي لو يضربها ..
لو اگلكم. شصار بيه من اشوف عمي يجي البيتنا وعندة غايه وسخة ومااگدر امنعه لو ادافع عن امي ..
لو لو لو .. شمااحجي ماتفهموني لأن ماعشتوا الي عشتة اني ..
اني كبرت قبل عمري وصرت الكم ابو واخو وتالي تهزكم شيباته ..
لو مستحي من شيباته وجاي معتذر وگايل خلونا ننسى الفات واني ندمان جان يمكن رف گلبي وسامحته ..
بس هذا جاي وعندة غايه ويريد يفككنا وبحياته ماراح يحبنا ويحن علينا ..
مااريد اعير واحد ولااريد اذكركم ..
بس اني تعبت وانتو كبرتوا بعد ..
ماابقى عمري كله خايف لاترحون وياه وتعوفونا ..
وتضيعون تعبي ..

عافنة وصعد الغرفته ..
بدل وطلع للشغل ..
خلانة بندمنا وحيرتنا ..
صح ضجت بس المفروض ماالومة ولاافتح جروحة ..
امي بقت تلوم بينا ..
وتگول لو ماهو جان احنه بيت ماعدنا ..
ولو ماهو جان موصلتوا ودرستوا ..
زادتنا ندم وخلتنا ننقهر ..
لليل كلش وامير مارجع ..
حتى ع العشا مااجة ..
امي قلقت عليه وخلتنا بحيرة وقلق ..
گالت العلي .. يمة ماتروح تشوف اخوك ببيت الشيخ
راح علي ورجع ..
گال ماهو ويوسف هم ماهو خاف سوة طالعين
ياقوت .. يايمة بهذا الوضع وين راحوا وبهالليل ..

شوية ورجع ..
گال السلام عليكم وصعد ..
ياقوت .. يمة اسويلك عشا
امير وهو يصعد الدرج .. لايمة مااشتهي ..

بقينا اني وحيدر وعلي واحد يباوع للثاني ..
اشرتلهم ورحنا للمطبخ ..
حميت الاكل وحضرنا الصينيه ..
شالها حيدر وصعدنا للغرفه ..
دگيت الباب ..
امير .. منو اريد انام ..
مديت راسي.. معقوله ماتريد درتك حبيبتك .
باوعلي صفح ..
دخلوا اخواني بالصينية يضحكون ..
حيدر .. يابة متنا جوع من وراك مدام ياقوت حرمتنا من العشا لأن زعلناك ..
درة .. معقوله اموري يزعل منا .. مستحيل هذا زعل حبايب ..
ابتسم وجان يحاول يخفي ابتسامته ..
حيدر .. بروح اهلك لاتخجل طلعها للضحكة ..
علي .. خوية لاتبيع ثگل ترى وكت البطون تعمى العيون متنا جوع تاكل لو لا ..
امير .. تعالوا حوواوين هو اني اگدر ازعل منكم ..
ضحكت .. عفوا شنو معنى حوواوين  ..

گعدنا ناكل وسوالف وضحك ونسينا كلشي ..
وصعدنا امي يمنا والحلو سهرنا كلنا بغرفه امير ..
ونزل اشترنا نميات وحب لأن يدري بيه احبه ..
بس اني نامت من وكت ..
ونصبنا على علي بيومها لأن عرفنا يحب وحدة ..
وحيدر يگله حلوة وعندها اخت وبيا قسم حتى من اداوم بالجامعه اشوفها ..
بس هو من النوع الكتوم ابد ماصرح بشي ..

الشيخ بعد ماالكل نجح سدن وعبد الله وحيدر هم نجحوا
سوة غدا وعزم الكل ..
ماگدر يسويلهم حفله مثل ماوعدهم بسبب الاوضاع ..
بس وفى بوعدة واشترالهم سيارة ..
بيوم الغدا ..
جان هذا اول يوم اروح بي البيت الشيخ بعد الي صار ..
الكل رحب بيه وبيباتي يواسني ويگللي الله يباوعلكم ويعوضكم ومايضيع صبركم ..
جنت مااحب اجي من نضرات الناس وشفقتها عليه.
التهيت بالمطبخ وي البنات ..
واكيد كانت نضرات الشماته بعين حوراء وامها ..
بس حاولت مااهتم ..
دخل عبد الله شافني ..
ضحك .. هاي شنو نور البيت .. صار وكت ماشايفيج حتى ماباراكتيلي على نجاحي ..
سدن .. اي غير بالدفعات يله طلعت ..
عفتهم ودخلت لجوة ..
تغدينا وكملنا رحت اغسل جوة الدرج المغسله ..
تفاجأت بعبد الله وراي ..
درة .. شرايد
عبد الله .. مو گتلج يوسف مو الج ..
درة .. وانت تتشمت بينا ..
عبدالله .. لا ابد بس حبيت انصحج انسيه احسن الج ..
لأن جدي مستحيل راح يخليه ينتضر العمر كله ولاتنسين هو اول حفيد اله وراح يزوجة من وكت حتى يشوف احفادة ويكثر نسله ..

صدگ هضمني من حجة هيج ..
دفعته ورحت للمطبخ تفاجأت بيوسف بالمطبخ ..
وحوراء تسولف وتضحك وياه ..
صارت عيني بعينه اختفت الابتسامة ..
اخذ صفنه طويله وگال يله بسرعه صبن الجاي الوادم گاعدة ..
اخذ الصينية مال الجاي وطلع وبقيت اني بحسرتي عليه وعلى كلمة منه ترضيني ..
مااعرف سبب بعدة ولاعرفت سبب جفاه وياي ..
#يتبع ..
( شمس السعدي )