لجين:-ركضت للشارع العام.. اباوع يمين وشمال.. اريد سياره ماكو..
بقيت اركض ما اعرف الطريق بس اركض.. شفت سياره مرت.. وقفتها.. وقف..
ولد شاب.. بدايه خفت.. بس تقويت ودنكت.. سألته من وين اطلع لبغداد.. كال من الكراج ..
كلتله توديني الكراج.. وافق.. صعدت وياه.. كنت لافه راسي ووجهي كله باللفاف. بس خفت عيوني تبرز ويبقى يباوعلهم بالمرايا ويوزه الشيطان..
نزلت اللفاف على عيوني ودرت وجهي ما باوعتله ابد.. لحد ما وصلني الكراج.. انطيته الاجره ونزلت..
سمعت كيا ويمها ولد يصيح بغداد بغداد .. تقربت يم الولد.. عفوا بغداد تاخذني قريب للاعظميه.. كال اوصل العلاوي..
قبلت بس خل اصعد بغداد.. دا اصعد.. شفت 5 شباب كاعدين بالسياره.. مال اكعد يمهم منا لبغداد.. الله عالم شيطلع منهم..
رجعت لابو السياره.. وسألته.. اخي اكدر احجز الكراسي الورى كلهم .. كال اي طبعا.. طلع الولد.. وصعدت ورى محد كعدته يمي..
بحجزي للخانات الورى اجو بعدي رجال ومرته..قبطت السياره وطلعت.. اطمأنيت من صعدت عائله ويانه.. احسن..
قريت الفاتحه لله.. حتى اوصل سلامات.. لان كان طريق الموصل بيجي تكريت بغداد.. صعب حيل..
الارهاب كان متواجد بكثره خاصه بهذه المناطق يتكاثرون.. ما خذت عيني نوم قهري على مالك جنني
معقوله مات.. ما اصدك. ولو فعلا مالك مات.. بعمري ما راح اباوع بوجه مخلد ومستحيل اصيرله مره..
واني اللي ضحيت بحب مالك وقبلت بيه يقتله.... بقيت افكر لحد ما وصلنا بغداد بعد 6 ساعات ونص طريق..
نزلت بالكراج وطلعت.. جانت الساعه 8 الصبح.. رحت لمحل موبايلات.. اشتريت موبايل .. وشريحه مستخدمه مقبل ينطيني جديده.. الا مستمسكات..
شغلت الجهاز.. ودكيت رقم مالك.. دك.. يارب يكون عايش.. رد.. بس مو مالك.. خفت لا فعل ميت .. انهبطت..كال الوو
-منو
-انتي اللي متصله.. مو اني
-رقم مالك
-اي نعم رقم مالك منوو
-مالك وين
-مالك تعرض لسطو مسلح وحاليا هو بالمستشفى.. وحالته احسن.. بس معرفت منو.. انتي ناديه
-بيا مستشفى
-الكاظميه
-قفلته.. نزلت دموعي.. ااااااااه الحمدلله ياااارب مميت..اخذت تكسي وطلعت لمستشفى الكاظميه..
نزلت وسئلت الاستعلامات عن المريض مالك قيس جابر.. بحثو كثير ياله عرفولي رقم الغرفه بالخاص..
صعدت لغرفته.. وصلت.. كانت الممر هادئ.. تمشيت للغرفه.. دخلت كان نايم تقربت يمه وبجيت.
هلكد مشتاقتله ومشتاقه اشوفه.. البعد ما نساني وانما زادني اشتياق اله ولكل حرف منه..
كان نايم.. وصدره بدون ملابس ملفوف بشاش الضاهر الاطلاق بصدره .. ابجي واحاول اكتم صوت شهكاتي..
بس لهدوء الغرفه.. صوت البجي مالتي طلع.... فتح عينه بثقل.. باوعلي بنعاس.. شافني فتح عيونه حيل.. وهمس..
مالك:- لجييين ..حبيبتي..
-اريد احجي الدموع تجري بحركه. احاول امسح الدموع واحجي وترجع تنزل من صدمتي بي نسيت شأحجي..
مدلي ايده تعاي.. انطيته ايدي.. باسها.. جريتها منه.. شلونك ..
لزم ايدي وصار يحجي بألم وصوت ناصي
-ميت شوك عليج .. شفتي غيابج اشسوه بيه تجننت وما عرفت طريقي وين وانتي ماكو.. لجين لا تبتعدين عني احتاجج.. حجاها وخنكته العبره..
بجيت بمكانه.. مالك طريقنا صعب.. وابويه خيرني بينك وبينه واني اختاريت ابويه بس دا اتعذب هوايه بغيابك..
ما كدرت اتأقلم ولا حتى اتقبله.. تعبت حيل..
-هششش لتبجين نبضي انتي.. منا ورايح انتي الي ومحد يكدر يمنعنا.. واللي اسمه مخلد.. صار ماضي وطويته..
-شلون يعني طويته..
-لجين مخلد هو اللي قتلني.. الكلب بعد ما عرفت مكانج .. كنت ناوي اجيج واخذج منه. بس سبقني وطبو عليه عصابجه للشقه وقتلوني
-ومنو كالك مخلد.. مخلد يمي كان معليه بقتلك .. مو ممكن مخلد يقتل.. يتبلون عليه
-ايهاب كشف واحد من افراد العصابه ولزمه واعترف ان النقيب مخلد هو وراء سالفة السطو المسلح
ف وصيت ايهاب يبعث جماعه الج للموصل يقتلوه ويجيبوج الي.. حتى نعيش اني وياج طول عمرنا..
-لحظه .. كمت من مكاني شنو يقتلو مالك شديصير اي جماعه احجيلي
-منو جابج
-اني اجيتك وحدي..
-عرفت مكانج بالقياره باجحله.. وبعثت جماعه يجيبوج..
-جماعه يقتلون مخلد..
-هذا قاتل وحاول يقتلني وان ما قتلته يرجع يقتلني..
-اياك مالك.. والله وقسم بذات الله مخلد لو صار عليه شي.. مستحيل اقبل بيك بيوم. اقتل نفسي والله..
-لجين مخلد عائق بيني وبينج..
-مو عائق بس اني اختاريته حتى ارضي ابويه.. مو ذنبه.. مالك كول ما اذيته .. احجييييي..
-ما اعرف.. يجي ايهاب وافتهم منه..
-اتصل بأيهاب فورا..
-جهاز موبايلي عنده.. ناسيه يمه.. وهو موجود بالمستشفى بس ما اعرف وين طلع يجي وافتهم..
-كمت من مكاني بسرعه. لزم ايدي
-لجين وين لا ترحين ابقي يمي ..
-اسمعني مالك لو مخلد انأذت منه شعرايه. بعمرك والله محتشوف وجهي.. مستحيل اسامحك لو اذيته
-لجين بس....
-تركت وما سمعته شحجه. طلعت بكل همه اركض بره المستشفى.. اتذكرت عندي موبايل خل اتصل بي..
دكيت رقم مخلد.. رن.. وقفت بمكاني عسى ولعل يجاوب.. رد الو.. ااااااااااه الف الحمدلله والشكر يااارب ما بي شي..
-الوووو
-اني لجين..
-بنت الكلبببببببب وين انتي..
-وصلت بغداد.. ورايحه لبيت بابا..
-اجي واعلمج بسيطه..
-انت وين
-دخلت بغداد. اصبريلي
-قفلت الخط.. وطلعت لبيت ابويه.. دكيت الباب.. الساعه 9 ونص يمكن ما اعرف اكثر.. والجو بارد ومحد يطلع.
لهناااك ياله طلعت امي.. هي شافتني وشهكت لجين ماماتي حبيبتي.. حظنتها حيل وكمت ابجي بحركه..
تبوس بوجهي من كل مكان كصتي عيوني خدودي .. مشتاقه اليه هواي واني ميته عليها..
فدوه الصوتج يعمري واخيرا طبتي الحمدلله الله مضيع دعواتي والله جنت ادعيلج ليل نهار..
-فدوه لگلبج ماماتي.. لعد مخلد وين.
-اني اجيت وحدي بس هو جاي وراي
-شنو القصه شصاير..
-مالك ما بطل بحث وراي.. لحد ما عرف مكاني.. مخلد داز جماعه يقتلوه قبل لا يوصلنا..
-عززززا العزاج لجين.. بس كون مات..
-اسم الله يوم شمفاوله.. مميت مالك بعده عايش وداز جماعه يقتلون مخلد.. ومخلد جاي وراي وما اعرف شصار
-لج متعرفين هذا مالك شلون سبانه بيوم الرحتي.. غير اجه دك البيت طلق ويكلهم اطلعها من جوه الكاع عبالكم تضموها عليه..
اخذها اخذها.. وبيومها ابوج اتصل على مخلد يطلع بيج بسرعه.. ومخلد رايد يتقاتل وياه.. بس خفنه يقتله..
وعمامج كلها خابرت مخلد يطلع فورا بيج من بيت عمج.. لان عرف بيج هناك.. وربج طلعتو قبل لا يوصل..
واصل بيت عمج وساطين على بيته.. ولازمين مازن لان غالط عليهم مشبعي دفرات وعمتج كرجيه شامره روحها على مازن.. وتاركي وطالعين بعد ما عمج كال ما اعرف بيهم وحلفلهم..
كلب الدنيا والله يمه خفنا عليج منه.. شيلي من بالج هذا مجرم.. وحتى مخلد.. كلناله اطلع بيها من العراق
-كال اريد نسافر.. بس ممقرر.. الضاهر جانت نيته يقتل مالك مو يسافر وقتله..
-لجين اطلعو ماما مالك هذا مراح يتركمم بحالكم. مجرم يمه هذا مجرم.
-ومخلد شنو.. هم مجرم.. مو حاول يقتل مالك..
-لا بنتي اني تعرفيني مخلد اكرهه ما احبه. بس قتله مستحق.. هذا يدمركم..
-مالك يحبني ماما.. واني لليوم ما متقبله غيره.. ما اكدر انساه واطلعه من بالي ماما مو بيدي..
-يا عزا العزاج يداده شحبيتي بي ولج هذا مجرم..
-ليش تكولون مجرم ليش مو انسان يحبني ويحارب حتى ياخذني..
-يا انزول هاي انتي بيا مسلسل عايشه اصحي ماما.. شنو يحبج شنو يحارب .. احنه ناس تحكمنا عادتنا وتقاليدنا.. هذا قاتل مو مستقتل.. مو بعينه احد..
يذبح ويقتل ويسطي على بيوت العالم والله احب.. من حبته حيه ام راسين وخلصتنه منه.
تركت امي ورحت للغرفه الصغيره.. خابرت مالك. الو
-الو عيوني روحي انتي لج الهوى بلياج ما احب حتى اشمه..
-مالك اوعدني
-كولي
-متتقرب لمخلد.. واني رح اطلب الطلاق منه
-ولو ما اطلقتي غصب عنه يطلقج انتي ملكي..
-لو رايدني.. لازم توعدني ما تأذي مخلد..
-هو عايش
-اي عايش يلا اقسملي بالله مراح تأذي.. وتوعدني بهذا الشي..
-محاج اقسم اخذيها مني مراح اتقربله بس مترحين وياه.. لو مو ابوج انتي الي
-انت مفكرني ما اتمناك.. مالك الضروف تحكمني شسوي..
-الضروف كلها تهون لما الانسان يحب لازم تحاربين مثل ما اني جاي احارب علمودج..
-هو حب مو حرب.. الحب ما يجي غصب وتحكمه الضروف.. مخلد اوعدني الله عليك ما تنجن مره لخ تره تعبت من جنونك والله
-تغلطين اسمي بأسمه وتردين ما اجن..
-ليش اني شكلت.. ؟!
-كلتي مخلد اوعدني..
-اسفه .. هو من حبسني هناك ما كمت اشوف غيره كبالي فالليل والنهار مخلد مخلد لهيج طلعت تعويدة السان.
-هههه وليهمج اعرف حبيبتي عادي.. بس ليش انطيتيني العنوان غلط من رديتي عليه المره السابقه..
- مو غلط بس هو جنه ناوين نروح لطهران بس هو غير رأيه واخذني للموصل..
- رغم اعرفج تجذبين.. بس احبج مو بيدي .. ما اكدر اضوج منج..
-هههههههه
-ليش مكلتي الحقيقه..
-خفت
-تخافين مني
-لا خفت تصير مشاكل واني وافقت عليه بسبب بابا.. لهيج.... ما اعرف يعني كان لازم اسوي هيج
-احبج لجين لج امووووت عليج اعشق كولشي بيج حتى كذبج احسه ببراءه..
صدكيني ما اكدر اعيش بدونج شايفه الگلب من يدك.. ما يطلع صوت يطلع اسمج واتنفس اسمج مع كل دكه وجرة نفس..
ما اكدر اتحمل تصيرين لغيري.. لتكليلي اسكت .. اذا ما اخذج ما ارتاح لو وين ما ترحين.. لج مجنونج اني مجنووووون
- اوف يمجنوني اووووف اني هم جننتي بيك كلامك المثل سحر سحرتني بيهم. بس شسوي خل اطلق ونتفاهم بعدين..
-هههههههه احبج لج يول اعشقج اعشقج
-رح توعدني متأذي احد وتبطل جنون مووو
-لو صرتي الي اي.. اوعدج وانا بكامل قواي العقليه..
-الحمدلله ههههه.. يله اروح باي
-راح اشتاق
-ههههه
-ولو سجلت المكالمه شسوي اصبر روحي بيها لان صدك اشتاق اسمع صوتج.. وبهلتسجيل راح اغفى براحه
-مجنون..
-ليش مو وقح تره اشتاقيت لهلكلمه ههههه
-ههههههه
-********
-وقح هههههه
-اموت عليج من اجبرج تكوليها.. ووووقح
-هههههههه باي.. قفلته.. دقات قلبي نبضاته مو طبيعيه.. ارتاح وياه راحه نفسيه. وكان قلبي انخلق حتى يدك اله.
شعوري اله يتجاوز الاحاسيس .. رغم جنونه مؤذي بس الصراحه حتى جنونه اعشقه.. يفهمني ويسامحني بسرعه حتى لو كذبت..
وياه ما اكدر الا اضحك وافرح من كل گلبي.. ويمكن هذا اللي يسموه شعور الحب
ما تمنى من الدنيا غيره.. لازم اطلق من مخلد.. ما اكدر اعيش مع انسان وعقلي وقلبي مع انسان ثاني
راح ابقى خاينه الاثنين.. خاينه زواجي بحبي لمالك.. وخاينه حبي بزواجي من مخلد.. مراح ارتاح اذا ما اطلق.. خلاص وين اريد اوصل بزواجي الفاشل والاشبه بالسجن.
صاحتلي ماما.. رحت يمها..
:-وي منو جنت تحجين..
-مالك
-ماما اللي دتسوي غلط.. انتي متزوجه حرام..
-ماما زواجي للان مو حقيقي فقط ورق وصار لازم اشق هذه الورقه واخلص..
-هو شلونه مخلد وياج..
-طلعتلها ايدي.. هذا اشلونه يعني باعي الجروح والضرب اطلعلج ضهري شمسوي بي
-بس ماما انتي كلتي تعامله وياي زين.. شنو سبب ضربه..
-ماما قتل مالك.........قاطعتني
-لجين لجين ماما اسمعيني.. اني مو وي مخلد.. بس الحق يقال.. الرجال يحبج ولليوم مانعته منج ومتحملج .. صدوك عصبي بس ماما هذه قسمتج
لازم تعرفين تسايرين زوجج.. لازم تكسبي..
-ماما اكسب انسان مثله.. انتي تعرفين بأي سجن معيشني..
-ماما هاي الحياة الزوجيه دتشوفيني كدامج اطلع اروح.. هذا حال المرأه المتزوجه ماما..
انطيناج الحريه قبل الزواج لان نعرف بعد الزواج متلكيها ف حتى ما تنظلمين خليناج تعيشين شبابج بحريه.
هسه انتي كبرتي ووعيتي اتركج من طيش الشباب واقبلي بزوجج..
-ماما ما ادتحمل ولا دا تقبله.. شسوي ما اكدر
-لا ماما تكدرين.. انتي حتى محاولتي.. مو زين صابر للان بدون اي شي الغيره يكلب الدنيا اهم شي حاجته بس هو اثبتلج حبه ووعيه واحتواءه الج. احتوي
-يوم شأ احتوي واني ما احبه.
-ماما انتي جربتي تصيريله زوجه وما حبيتي.. العلاقه الحميميه بالزواج مهمه لربط الزوجين وتقريب قلوبهم لبعض..
انتي تقبلي وصيري بين اديه .. وحسو بمشاعر زوجيه اتجاه بعض وشوفي شلون تتغير حياتج
بالله كوليلي شلون تحبي وانتي مانعته
-ماما مختصر الكلام ما اريده.. واريد اطلق .. خلوني هنا ما اريد اتزوج هي كوه. لا اريد مالك ولا مخلد.. غصب هي..
-ابوج مراح يقبل وحيكولج طيعي زوجج
-لازم بابا يخضع.. تعبت ماما ما اكدر شتان مابين عقلي وعقله.. ماما شهر ونص تخيلي الباب ما شايفته غير مره طلعت للسوك وكلب الدنيا فوك راسي..
رح تكليلي هاي الحياة الزوجيه.. لا ماما مو هاي وممجبوره اخذ انسان ممتفهم حياتي..
من حقي اختار انسان يفهمني.. مو يفرض نفسه عليه بالقوه ويكعدني ابيت هلكده شهر ونص اني من الغرفه للمطبخ من المطبخ للغرفه
هذا موت مو حياة.. اريد ارجع لحياتي ماما. وصراحه مليت من العراق افكر اطلع برا اعيش .. لان دا اتقيد هنا كولشي عيب وحرام..
هي حياة وحده اعيشها خل اطلع برا اشوف الدنيا واعيشها .. شجابرني اتحمل هلعيشه وهلحياة هنا..
-ماما اغلب بنات بلدج هذا وضعهم وميطلعون
-واني ارفض وضعهم.. ليش مو من حقي اعيش.. من حقي اخذ الحريه اللي ماخذها الرجل..
يطلع ويتونس ويمرح وكافيهات ويلعب واني اذا طلعت شويه كالو دايحه.. شهلبلد هذه وشهلعادات الظالمه..
-ماما احنه مجتمع شرقي وهاي عادتنا.
-وهسه عاد مجتمعنا شلونه.. ع فكره المجتمع الشرقي اتصنف على ان هو من المجتمعات المتخلفه والرجعيه الغير قابله للتحظر..
يبيح للرجل كل شي .. ويتهم المرأه بكل شي..
واني اكره التخلف ماما اريد اعيش اريد اشوف العالم اريد اسافر .. اغامر فد على قمة جبال افيرست..احس بالحياة حالي حال العالم العايشه بره..
لازم اصير ربة بيت وانجبر على هلشي فقط لاني عراقيه.. هذا مو طموحي.. من حقي اعيش حياتي باجمل تفاصيلها..
مو اكعد اطبخ وانفخ لرجال خلف الله عليه اذا كال شكرا وابقى انتضرها منه مثل وحده هبله حتى يرضه عليه هه نوووو وي امباسيبل..
-ههههههه حتى لحجاياتج اشتاقيتلج فدوه الصوتج حبيبتي..
-هههه حيااااتي باع اليحب بااااع ويكولولي تعالي كعدي عند رجال حتى يحبج يشعل صفحة اهله ما اريده
-هههههههههه
-دنحجي.. اندكت الباب مال الكراج بقوه.. صحت استلمي اجه كرندايزر..
-هههههههه
-روحي فتحي الباب وكوليله لجين اجت من زمان ونايمه. ما اريد احجي وياه ابد..
-صعدي نامي وهسه اخابر ابوج يجي..
-صعدت وهي راحت تفتح الباب اله.. دخلت لغرفتي اخذت نفس.. كل شبر بغرفتي الي بيها حكايه..
كعدت ع السرير.. جسمي يأذيني من الضرب.. وما احس بالوجع بس لما ارتاح.. من خوفي ع مالك.. حتى اوجاعي نسيتها.
شمرت نفسي ليوره ونمت.. اااااا الحمدلله ربي متلاحكي وعايش لو ميت.. يمكن امووت..
صفنت.. احس بحبي اله في شي خطأ بس مدا اميز الخطأ شنو.. شعور الحب البداخلي اله غالب على كلشي بيه حتى على عقلي..
سمعت مخلد يصيح جوه.. اوووف فرق بين مخلد ومالك.. مالك بقمة الوعي الحظاري.. ممقيد عقله بحدود شرقيه ..
اما مخلد مثال للرجل الشرقي المتغطرس اللي يحب كولشي تحت سيطرته وامره.. ما احبه لان ما يحترم عقلي وافكاري..
ويحب يفرض عليه عقليته وافكاره.. واني ما اتقبله .. ف ليش اكمل وياه.. دا افكر وي روحي.. طب للغرفه.. بعصبيه.. وصرخ
-لج كلبه تشردين من البييييت..
-كمت على حيلي وابتعدت بساع. راد يتقرب يضرني.. امي صارت كباله..
الام:- ما الك اي كلمه وياها.. اتركها يجي ابوها وتفاهموو
مخلد:- انتي وخريييييي زوجتي واتفاهم وياها..
لجين:- شوكت صرت زوجي بالله .. افتهم ما اريدك مليت منك كافي عوفني ما ارجع وياك لو على موتي والله. حس يا اخي حس ما احبك شلزكت..
الام:- يا ابني كتلك يجي ابوها ويتفاهم وياك.. ما اسمحلك تمد ايدك عليها ابيت ابوها
باوعلي بخزره وعصبيه وكال..
مخلد:- بسيطه اني اعلمج يا ادب سز..
تركني وطلع وطبك الاب وراه حيل.. اندارتلي امي..
-يمه ارجعي وياه .. مرته حقه يريدج..
-يوم ما احبه والله ما اريده هي كوه تركتوني بالشهرين ولا كدرت اتحمله ولا اطيقه. حرام عليكم والله..
لا الله ولا انبياءه تقبل باللي دتسووه بيه دتجبروني عليه واني ما احبه شلون يعني..
اكولها الكم واسمعوها عدل.. والله مستعده اموت ولا ارجع وياه.. حياتي وياه اشبه بالجحيم.. 24 ساعه نتناكر لا هو فاهمني ولا اني فاهمته شلون تردونه نرهم.
- والله يا ماما ما اعرف شأكولج.. هو حقه مرته يريدج وانتي حقج مجبوره عليه وما تحبي..
-ماما هو ابدا مو حقه .. هو اللي فرض نفسه على انسانه محابته ومتريده.. شيريد مثلا اسويله..
-خل يجي ابوج واحجي وياه.. اني تعبت احجي وياه يكلي لجين ما الها غير مخلد.. اذا انفصلت ترجع للمجرم مراح يتركها بحالها..
-ماما مالك ما تاركني.. هاجم على بيتنا اللي بالموصل رايد يقتل مخلد وياخذني وربج اجيت لهنا ومخلد تبعني ..
جان هسه مخلد مقتول واني يم مالك..
-ماما وشلون تأمنين لواحد يقتل زوجج في سبيل ياخذج... هذا مجرم..
-وشنو فرقه عن مخلد اللي جابريني عليه.. هم راح دز جماعه على مالك وقتلته.
الام:- لنفترض اطلقتي.. هم راح يبقى مالك يلح بالزواج
-وشبي مالك
-ياااا لجين شبيج بنتي .. هذا مجرم يخوف..ما تعرفين شسوه بينا من تزوجتي ومخلد طلع بيج للموصل..
سبانا سبايه بليلتها.. سافرنه ثاني يوم ردنه نسلم بارواحنه
-ماما مخلد هم قتل مالك وهو البده يعني اجرم منه. مالك كل اللي ديسوي يحاول ننجمع اني وياه..
-ومخلد نفس الحاله... هم ديحارب حتى تبقين وياه.
-الفرق الحب ماما.. مخلد ما احبه ومالك......سكتت
-والله يا بنتي دضيعين نفسج بهذا اللي اسمه مالك. اخذي مخلد واطلعو بره العراق واخلصو.. شتعرفين عن مالك وتردي..
ولتكولين شيفرق عن مخلد.. اني مخلد ما احبه بس واحد يحجي العليه والمو عليه يا بنتي الولد مستقتل عليج وقتل مالك لان مهدد حياته وزوجته.
شنو ينتظره يجي يقتله وياخذج.. والنعرفه احسن من اللي منعرفه.. عصبي صح ويضرب بس حباب واخلاقه حلوه..
مالك تصرفاته تصرفات عصابجي.. وليخدعج بكلام الحب.. تره حتى الحيوانات تكدر تحب وتعبر عن حبها
حكمي عقلج واختاري صاحب الاخلاق والمشتريج والمتحمل شهرين ما جابرج على المقاربه في سبيل تقبلين..
مو ابو الحب والرومانسيات.. وهدروب التعبانه.. مو كلمن كالج ما اعيش من دونج صادق تره اكثر الكالوها تركو نسوانهم واخذو عليهن يا امي
اخذي اللي بحبج مو اللي تحبي.. اقنعي بقسمتج يا ماما وارضي شتسوين..
-مو بيدي ماما.. ما اكدر.. ما اتقبله لو شيصير ما احبه.. هي كوه ماكو حب غصب.. واني ما احبه افتهموها مااااااااا احبه .. اعيدها بعد لو سمعتيها
-شكول يا امي غير الله يهديج ويصفي عقلج ويهدي قلبج..
-طلعت من عندي امي.. تمددت على السرير وبعد التفكير الكثير نمت..
كعدت العصر.. ابوي كان موجود وعمامي وعمتي التحفه كرجيه.. والعالم ما شاءالله كلها ملتمه.
نزلت ديتحاجون بصوت عالي بالصاله رحت للمطبخ نرت عمي عثمان واكفه. سلمت عليها وكالت هلا بالنايمه والدنيا كالبتها..
بوستها.. خير شكو يتصايحون..
-صدك مانعه مخلد منج لليوم.. يكول شكد حاولت وياه نصدق زواجنا ما قبلت وكلما اريدها زوجه تمنتع واني اكول ما اجبرها..
-بالله ميستحي يذكر هلشي..
-لا عمه حقه.. لو طلعن منج الحجايه مو منا يتهمو برجولته محد يكول انتي متقبلين يكولون هو مو رجال لو رجال جان كسرج واخذج
-اي والله مو هي بكيفه..
-ها ولج لعد بكيفمن
-بكيفي اني انسانه وجسمي حره بي مو من حقه يجبرني على شي ما اريده..
-غير زوجته.. لعد المن تزوجتي..
-اي وكأن كان اختياري اتزوجه غير بابا.. دنحجي صاح ابوي لجيييين..
-رحت الهم سلمت عليهم ومشيت سلمت على بابا كال هلا وبعد خده ما قبل ابوسه عرفته متضايق.. كال كعدي..
كعدت..
حجه عمو عثمان:- الله بالخير عليج بنتي
-هلا عمو تفضل
-هذا مخلد كبالنا وحجالنا على حياتكم.. يكول حاولت وياها بكل طريقه ما دا تجي للطريق.. ضربت سايست تنازلت سكتت.. وكل هذا ما فايد وياج
شنو اللي تردي منه ومانعته يصير زوجج .. شهرين رجال مماخذ مرته وين صايره .. واحنه حجينه وياه وكناله صوجك انت رجال المفروض تكسر راسها وتاخذها كال ما ردت اكسر بخاطرها..
اذا هو ما راد يكسر بخاطرج.. شنو قصوره وياج وشارده منه.. اكو بنيه محترمه تبجي على واحد سرسري شلون تقتله..
لو احنه لمكانه جان ذبحناج علقبله مو نكتلج..
-عمو بغض النضر عن كل الكلام اللي كلته.. اتمنى تفهمون حاجه وان هي كيف اتقبل انسانه واعاشره واني ما احبه..
لو احبه من زماااااان وافقت عليه وكان هسه عندي منا 3 اطفال.. بس عمو ما اريده .. شهر كامل اني محبوسه بالبيت شارع من شوارع الموصل ما شفتها..
مره وحده طلعت سوك مليت.. اجه خبص الدنيا.. هو اخذني من بيت اهلي صيدلانيه بالنهار واعلاميه بليل واتنازلت عن الاعلام.. وكتله بعد ما اشتغل
وبقى هو حارمني من كولشي اقل شي موبايل مينطيني.. هو ما اخذني ربة بيت .. اخذني صيدلانيه
ان قطعت الشراكه بصيدلية مؤيد.. اتعين واشتغل.. هو كل هذا حرمني منه وكعدني بالبيت ويجبرني اصير ربة بيت..
ونظرية الجبر اني ما اتقبلها.. يفرض عليه افكاره واوامره وميتفهمني.. طيب شلون تردون اتقبل انسان ممتقبل شغلي ومكانتي وعقليتي..
يريد ربة بيت يروح يشوف اللي تناسبه.. تعبت واني اكولكم مااااا اريده.. ما احب الحياة الروتينيه اللي هو يحبها ويريدها..
عمران:- هو مو صوج صوج ابوج .. شفت هاي الحريه الانطيتها البنتك وتصيح واثق بيها شفت شسوت بيها
-عمو شئتم ام ابيتم اني ما خنت ثقة بابا فد يوم.. وافقت على ابنك فقط لان هو راد.. ومو غلط لو طلبت حقوقي..
ادافعون المخلد وتصيحون حقه. طيب حقي وين.. ليش تجبروني اقبل بافكاره متجبروه هو يقبل بافكاري وبعقليتي.
اريد حريتي شغلي حياتي.. ما احب اتقيد وهو منعني منها كلها...
مخلد:- لما اشوفج تستحقين الثقه انطيج كل اللي تردي... حاليا ممنوع
-وممجبور تعيش وي انسانه متثق بيها وهي متحبك.
عثمان:-ولج انتي شنو من ابنيه توكفين كبال رجلج وتكليله ما احبك.. اكوم اكسر راسج والله..
غصبا عليج ياخذج اليوم واذا رفضتي ذبح اذبحج .. ولج خاف مكسوره وتخافين يوصلج ويفضحج.
-سبق وكتلكم مستعده اخضع لفحص واني اشرف من اي بشر يتهمني بشرفي.. ومو مجبوره اقبل بانسان ما احبه. خلص ما تفاهمنه خل يطلقني شنو كوه هي..
حجيت وهد عمو عثمان وعماتي صارو كبالي ويصيح
عثمان:- اشرف منين لج ادب سز ساقطه.. غصبا عنج اليوم ياخذج واذا ما قبلتي والله اذبحج..
-اليقتلني ابويه بوجود عمامي لما يحجون ويايه يسكت.. حيييل ضعيف كدامهم ويقنعو باي كلمه..
صحت ما اريده هي كوه.. ما اريده خل يحس خل يطلقني.. شهلمصيبه يا الله انسان مجبور بانسان ولازم يقبل بي..
انا حررتكم فلا يستعبدكم احد من بعدي مو هيج يكول الرسول لو بس بالحجاب والبس تركضون عليه بالدين..
كلهم بقو يحجون ويتصايحون عليه.. اخر شي.. حجه ابوي..
:- اسمعي لجين.. انطيتج عين ازياده كل ضني ادميه.. تقبلين بزوجح لا وحق الحق .. اتبرى منج صدك واحبسج وارجع اعيد تربيتج ..
ولا تتوقعين لغير مخلد انطيج ..
-بس بابا
-ما الج نص كلمه تكومين هسه ترحين وي رجلج
عمران:- مخلد اخذها هسه وروحو لفندق وبليل نريد بياضها واذا ما انطتك معناها مكسوره.. رجعها نقتلها..
عثمان:- اخذها ومن باجر اطلع لسوريا.. لا تبقى تره هلكلب وراك مراح يتركك لحد ما يقتلك وياخذها
لا تبقى هيج..
مخلد:- طلبت حمايه وياي .. اجوي 4 شرطه وسياره لحمايتي
عثمان:- هذا مجرم كلشي يسوي اترك دوامك واطلع بيها لسوريا.. ومناك نخلي عمك يسحبك للسويد تعيشون يمه.
يتفقون ولا كأني موجوده اريد احجي كلها تسكتني ويكملون كلامهم.. دار عليه عمو عثمان وكال يله كومي وي رجلج.
عماتي كوموني.. تقربت لبابا.. بابا الله يخليك ما اريده اقتلني ولا تعيشني وي مخلد.. ما اريد اتزوج والله خليني عايشه يمك..
الاب:- اتبعي زوجج وكومي وياه
لجين:- بابا اترجاك .. انت العلمتني ما اقبل بالذل.. تذلوني هسه ليش .. ما اريده خلوني هنا ما اريد امشي وياه..
الاب- محد ذالج انتي اللي ذليتي الولد.. صابر ومتحملج وانتي اللي ذليتي بتعجرفج.. صيري خوش ابنيه وتبعي زوجح وارضي وتذكري رضاي من رضاه
-هزيت راسي.. انت اللي علمتني ما انذل لو مهما يصير بس تهون بابا.. قربت بست راسه.. ما حجه..
طلعت.. ردت اصعد.. الغضب كله يفور بداخلي ما اكدر انغصب وانذل مستحيل اقبلها هيهات.. مشيت للكاونتر.. طلعت الدله اللي انسوي بيها قهوه..
وكفت كبال الكاونتر جريت السم مال الحشرات من الجراره خليت بسرعه.. صاحت ماما لجين.. رجعته بسرعه..
وانداريتلها..
:- صبري يا ماما تهون كسبي زوجط وبالكلمه الحلوه خلي ينفذلج التردي ارضي بقسمتج ماماتي..
-ما احبه ماما ما احبه... حظنتها ابجي.. بقت تمسح على راسي وتكلي انسي البقلبج ماما وارضي بالمكتوب..
اجه مخلد للمطبخ.. يصيح استعجلي يله ما عندي وقت..
-مو انت اللي تجبرني وتتأمر عليه .. لو شتسوي ما راح انجبر بيك افتهمت.
مخلد:- بسيطه اعلمج
الام:- لجين اسكتي ماما..
-اخذت نفس.. ودرت وجهي للكاونتر حجت ماما شدسوين.. كتلها دا اسوي قهوه راسي وجعني حيل ..
-استعجلي امي وصعدي رتبي نفسج.. ملابسج هواي فوك .. وبدلي..
-هزيت راسي.. خليت قهوه.. ومي.. وخليت على النار.. دموعي كامت تجري وحده.. ممكن اموت بس مو ممكن اقبل بمخلد..
صبيت القهوه بفنجان صغير.. وصعدت.. فوك.. كلها تصيح بسرعه استعجلي مخلد وحمايته بره كاعد ينتظر..
شربت القهوه.. صكه وحده..ودموعي كامت تجري..
بهذه الاثناء.. ماما شايفه شي متبدي ع الكاونتر والجراره مفتوحه.. فاتحه الجراره وشايفه السم اللي لافته بجيس متبدي..
عرفت شجنت اسوي وليش طلبت القهوه .. بساع صارخه وصاعده اليه كلهم صعدو على صرختها لانو هي مريضه ممنوع عليها الصريخ..
بمجرد ما شربت القهوه.. ثواني وبقت ماما ادك الباب لجين لتضيعين نفسج بنتي حرررام لتخلين الشيطان يغويج بنتي حبيبتي فدوه افتحي الباب
ولكم كسرووووو البااااب البنيه انتحرت كسروووو..
يردون يفتحون الباب واني واكفه ابجي.. جسمي اشتعل.. نفسي انقطع.. لزمت ركبتي اريد اتنفس..
احس نار شبت بجسمي.. واتنفس وانشغ مثل واحد يجالع.. كسرو عمامي الباب .. ودخل ابوي اخذني بحظنه..
ويصرخ لجين اتقيئي لا تسوي هيج بنتيييي .. يفتح بحلكي ويريدني اتقيئ واني بين اديه فاتحه عيوني واشهك..ومختنكه.. ولازمه بقميصه حيييل.
-لجين بابا لتسوين هيج برووووحج اتقيئي.... شالني بكل حيله وركض.. وماما تبجي وعماتي وعمامي ومخلد يصيح عمي انطينياها..
وابوي مثل طفله لزمني ويركض بيه.. من استعجاله.. وهو يركض على الدرج متعثر وواكع..
اني ويه وكعته وكعت منه من الدرج للكاع وفقدت عن العالم...يتبع
☆☆☆☆☆☆☆☆
#خطوات_نحو_الجحيم
////بقلم الكاتبه زينب ماجد////
الحلقه_20
احيانا الانتحار ميكون ضعف.. وانما بلحظة ضعف لما تحس انت خسرت كولشي.. ابوك امك اهلك عمامك..
تحس كل الدنيا.. ضدك.. تريد شي .. وتنجبر على شي اخر.. ومجبر ان تعمله لان لو ما عملته ممكن تنقتل..
او ممكن يتهموك بشرفك.. او ما يرضون عنك.. في لحظه تحس انك خسرت كل شي وما بقى شي تعيش من أجله..
في لحظة غضب وانفعال تقرر تنهي حياتك بنفسك احسن من مما تخلي غيرك ينهيها..
خطوه فاشله نعم.. وحرام.. وغباء.. لكن الانسان في حالة الغضب والانفعال.. ممكن يتخذ اغبى قرار ممكن يندم عليه العمر كله..
بعمري ما فكرت فد يوم اقدم على خطوة الانتحار.. او أؤذي اهلي بهشكل .. لكن لحظة الغضب ممكن تنسى كلشي حتى نفسك..
حادثة الانتحار كان فعلا انتحار رغم عيشي وعدم موتي .. لكن هذه الحادثه غيرت مسار حياتي ..
مخلد اللي رفضته ممكن يكون اعرفه سيء.. لكن المشكله لما قلبك يتعلق بشي متعرفه.. تحس اكو شي خطأ.. بس شعور قوي مسيطر عليك ميخلي عقلك يتحكم بيك..
يخليك تشوف انسان بقمة الاخلاق والحب والروعه.. رغم ان الناس متشوف بي هيج شي.. يمكن صدق من قال الحب اعمى..
ان رفضت السيء.. لكن في قول يكول.. الشين التعرفه احسن من الزين المتعرفه..
امثال مو فقط حروف وكلمات.. لما تمر بيها تحس الها معنى كولش جبير..
القرار كان قرار قلبي.. والقلب دائما ما ياخذ خطواتك نحو الجحيم ويوهمك ان هذه مو نار الجحيم وانما نور تستنير بها حياتك...
لكن للاسف انتحاري كان بداية جحيمي...............
********
(في المشفى)
للحظه كنت اتمنى ما اصحى وارجع ويرجعون يجبروني على مخلد.. ولكن ما اخفي كنت خايفه اموت..
تمنيت لو اكعد والكى مالك.. لحتى يرتاح قلبي.. ما اريد اشوف الناس اللي تسببو بوصولي لهذه المرحله..
فتحت عيوني.. رمشه .. رمشتينين.. عرفت اني بالمستشفى.. حسيت ايد لزمت ايدي ..
ايد شعرت بحنانها من اول لمسه... عرفت هذه امي
الام:- حبيبتي ماما الحمدلله ع السلامه لج يروحي ليش اسوين بنفسج هيج ابنيتي انتي العاقله المثقفه تنتحرين .. ؟!!
-جنت تعبانه لساني ثكيل عن الرد.. اكتفت ادموعي بالتعبير عن اللي بداخلي..
بوستني براسي .. دخل الدكتور.. :- لجين اسمها مو
الام:- اي دكتور..
الدكتور:- لجين هل صحيح انتي اقدمتي على الانتحار لو في شي اخر..
-لا دكتور اني انتحرت..
-تحسين اكو شي اهم من حياتج حتى تخسريها..
-لما ما تكون لحياتك قيمه ف ليش عايش.. الموت والحياة بواقع مر .. واحد.. بنفس العذاب
-نسيتي الله .. ليش ملتجئتي لله.. دعيتي يوم وخيبج..
- تنهدت ..وغمضت عيوني.. بسرعه خطرت ابالي يا غياث المستغيثين.. لما طلبت منه ينجيني من الموت ونجاني وكان عند وعده لما قال ادعوني استجب لكم..
خجلت من ربي كثير بهذه اللحظه... فتحت عيوني للسماء وگعو دموعي اللهي حبيبي سامحني ارجوك..
-وذكر ان الذكرى تنفع المؤمنين.. بنتي الله باب الخائفين واليائسين.. ليش تخلين للشيطان عليج سلطان..
ليش تخلي يضعفج بلحضة ضعف او غضب بتالي يخليج تخسرين الحياة بالدنيا والجنه بالاخره..
المنتحر خاسر لا محاله.. محد يخسر غيره.. حرام اللي يضلمج يعيش وينعم بالحياة وانتي تموتين..
ان كان عندج رب اكبر من اللي ظالمج ف ادعي هو اقوى منهم كلهم.. لو استنقذتي بي.. راح يكون الج سندج ويكسرهم ويجبر بكسرج..
لان هو مع المظلوم على الظالم لانه الحق..
-هزيت راسي اشكرك دكتور.. وحتى امي شكرته لكلامه.. انطاني العلاج وكال بالسلامه..
لجين:-ماما شنو اللي صار
:- متتذكرين؟
-اتذكر انتحرت بس ما اتذكر شنو صار بعدها.
-اللي صار نقلناج اني و مخلد للمستشفى وابوج وعمامج تبعونه.. من وصلنه .. مخلد رمى يمين الطلاق عليج وطلع بدون ميجاوب احد.
-اخذت نفس .. وبابا
-ابوج بعده جوه.. خابرته كتله كعدت لجين.. وصاعد خسه ح يجي.. و عمامج راحو لما كالو تعدت مرحلة الخطر..
-شوكت اطلع..
-خل نشوف الدكتور اذا كتبلنا خروج نطلع..
-دخل بابا باوعلي وكال اروح اشوف الدكتور.. طلع.. حسيت الزعل بعيونه.. بقت ماما تحجي يمي ليش هيج سويتي وانتي الحبابه والعاقله ومن هلكلام..
شوي واجه بابا كال لامي يله جهزيها خل نطلع الدكتور يكول ما عليها شي.. ساعدتني ماما بلبس الجاكيت ..
سحبت شعري ولمته.. واخذت ايدي ومشت.. طلعنا من المستشفى.. اخذنا بابا..
رجعنا للبيت.. ودخلوني للصاله.. مددتني امي على التخم ونومتني.. انطتني العلاج.. ونمت..
للصبح.. فتحت عيوني على صوت دگة باب الكراج مالتنا الخارجي.. طلعت امي فتحت الباب..
دخلت خالاتي وخوالي كلهم اجو.. باسو راسي والحمدلله ع السلامه.. وما تشوفين شر..
اخذتني خالتي سعاد وخلتني بحظنها.. وتكولي
:- ليش خاله تنتحرين.. اكو واحد يستاهل تخسرين روحج عليه.. المابيهم خير عمامج يعيشون وانتي الورده تموتين.
-خاله تعبت واني اگلهم ما اريد اتزوج مخلد.. وكلهم جبروني عليه..
-وشنو هلمخلد هذا لزكه الله ما خالق غيرج.. شكد ميستحي وبلا كرامه.. متريدك جابر روحك شكو
الام:- طلقها البارحه وراح..
سعاد:- عمى بعينه بعديش بعد ما موت البنيه .. وثبتتله الموت احسن من العيشه وياه.. شلون بشر ماكو احساس..
بحظه وابخته كل الصار وياج من وراه .. وكف قسمتج وفرض نفسه ابن گرجيه الخايبه..
الام:- لا سعاد اسم الله لا تدعين الولد جان يحبها واحد يحجي الحق
سعاد:- وحبته الگراده .. متحبه شلون يعني
الام:- والله يا سعاد.. اني خايفه نكوم نتحسر على هلزكه .. ابوها اليوم الصبح يكول راح اخابر الشيخ الاجه وي مالك واكله اخذوها..
سعاد:- يا لج عيني بس لا هذا اللي دك بيتكم بالسلاح بيوم زواجها
الام:- اي لج داده هو.. يگلون عنه مجرم ولو تشوفين شكله مال عصابچي محترف عضلاته وطبرة حاجبه والوشم اللي بأيده..
يخوف مدري هاي العوبه اشافت واشحبت بي.. دنرها الله لا ينطي..
اندارتلي خالتي.. وسألت.. :- خاله لجين انتي هذا تعرفينه واثقه منه..
-خاله هو حجالي عن اهله.. ابوه مقابل بزواجه مني لان جنت اشتغل اذاعه..
سعاد:- عوذه يعني هم عقد..
-لا مو هيج.. مالك لان مموافق على زواجنه .. طالع من ابوه ومتبري منه.
-هلفلم حقيقي لو تزوير
-هو حجالي ه الكلام..
-وانتي واثقه منه. تعرفي..
-خاله ماكو شي يكذبه.. واني اشعر باحساسه ..صادقه مشاعره.. صح هو شوي مجنون.. بس ما اعتقد يكذب..
وليش ديكذب.. سبق وتقدملي اكثر من مره واصر عليه والا لما وكعت بمشكله بسببه راح جاب شيوخ واجه على بابا
لغيره يفلت ويخليني اواجه مصيري وحدي ويخاف ينضر.. بس مالك اثبتلي حبه.. ف ليش ما اصدقه..
-زين خاله هو مو تحرش بيج بالبدايه.. شلون تأمنين بي..
-خاله هو قبلها محاول يحجي ويايه ورادته الى ان استثار.. بس اعتذرلي هوايه عن هذا التصرف..
-والله يا خاله ما اعرف اذا تحبي .. الله يسعدكم شنريد..
الام:- كومي بنتي لغرفتج ارتاحي..
لجين:- اي ماما... ساعدتني بنت خالتي ساره وصعدت لغرفتي نومتني ع السرير وبقت ترتب الغرفه وتحجي ويايه.
-من كل عقلج تنتحرين حتى لا تتزوجين مخلد.. لج اوك هو مينحب وثكيل دمه .. بس مو انتحار غبيه..
-ساره لو بعقلي هذا واني هادئه كان مستحيل افكر انتحر.. ساره متعرفين البارحه شلون استحقروني..
يحجون على ليلة الفندق وياخذني واذا مقبلت بقتلوني ويعتبروني لان عار ما خليته يتقرب وادور يتفقون شلون يطلعوني لسوريا
ومن سوريا عمي يسحبنا للسويد. لج بيناتهم ما تركولي رأي اتكلم بي. وكأني لعبه باديهم..
احااول احجي ويسكتوني.. اتفقو على كولشي واني سادين حلكي.. احس النار گبت براسي .. ع اي اساس هم يتحكمون بيه..
طفله.. مخبله.. لو حيوانه.. ما لكيت ساعتها غير الانتحار اخلص نفسي منهم واقتل روحي قبل ميقتلوني لما امنع مخلد..
- هسه خ يولي مخلد.. انطوت صفحته وطلگ عساه لا رجع .. احجيلي بمالك.
-اوووف مالك.. لج ساره فعلا احتاجه هسه.. احس داخلي محطم.. احتاج احد يفتهمني.. احتاج شخص يحتويني ويلمني.. احتاج انسان يحس شبيه..
وكل هذه عند مالك الكاها..بس..... سكتت
-انطيج موبايلي تخابري..
-ابتسمت .. طلعت جهازها وانطتيالي .. دقيت رقمه.. ضغطت اتصال.. رن .. رن.. رد...الوووو
-انطيته لساره كتلها جاوبي بسرعه .. وسحبي السانه .. هو بقى يصيح الو..
ساره:- الو
-منو
-اسمي ساره من بغداد انت من وين.. -بصوت حليمه بولند-
مالك:- وشبيج تتماوعين.. جمدي ورجعي كلميني عدل..
-هههههه انزول شكد ينحب دمك..
-ههه والمطلوب شتردين
-كالو عنك حلو كلت نجرب معك علاقه..
-شنو نوع العلاقه.. ؟!
-يعني شنو .. ليش اكو انواع..
-اكو نوع علاقة فراش وهاي مابيه حيل الها مكسر صاير تفصيخ.. واكو علاقة حب وهاي هم ما نحصليها گلبي محجوز.. واكو علاقة صداقه.. وهذه ممكنه
لجين:- اني استمع وياها واذني يم اذنها.. صمت الموبايل وكالت..
-لج عزا بعينه شلون عليه اسلوب بالكلام يقنع..
-همست وكتلها جاوبي وكليلها اريد مكان بقلبك حتى لو محجوز.. رجعت الموبايل وحجت
-العفو ماما صاحتلي اعتذر.. اي اكمل كلامي.. اني اريد علاقة حب واريد مكان بقلبك.. ولتكولي محجوز ازعل..
-الزعلتي وان رضيتي شيفرق عندي.. ما اعرفج.. وكتلج گلبي محجوز..
-طيب لمنو محجوز.. منو سعيدة الحظ..
-المشكله هي مو سعيدة حظ.. تعيسة حظ بيه بس مو بيدي احبها.. .
-ليش تعيسة حظ.. هلكد انت مو زين..
-اكثر مما تتصورين..
-اشتشتغل انت.
-شلج علاقه انتي.. واعتذر عن الكلام لان تعبان انتي حددي نوع العلاقه ورجعي حاجيني هسه اشطحي..
-اخذت الجهاز من ساره. وكتله طيب اني هم اشطح.
-منو
-معرفتني
-لجيييين..
-اممم
-حياتي انتي اخابرج على رقمج اللي اتصليتي بي البارحه مغلق ليش. سمعت ناقليج مستشفى ليش. بالي مشوش عليج.
-شربت سم ونقلوني للمستشفى والموبايل ضايع مدري بي..
-لا صدك .
-اي والله حاولت انتحر
-ليييش شنو السبب.. تأذين روحج ليش.. منو مضايقج.. نطقي اسمه وثقي ابرد كلبج بي بس لتسوين هيج بنفسج لجين اجن
-ابويه وافق عليك
-يعني شنو
-وافق نتزوج
-لا صدك ؟!!!!!
-اي والله.. كان جابرني على مخلد.. وجبروني الا اروح وياه للفندق واذا متقربلي معناها اني عار وخايفه انفضح..
-لحظه يعني هو ما تقربلج لليوم من لما اتزوجج ؟!!
-طبعا
-عفيه عليج .. بس حبيبتي جبروج مو تنتحرين حتى تتخلصين منهم. جان خابرتيني احل الموضوع.
-مالك احتاجك..
حياتي مو بكدي لج متعرفين شكد مشتاق اشوفج بين اديه واشم عطرج واتنفس كلشي بيج. لج ح اجن اريدج
-قريب ان شاءالله..
-هههه حافز ممتاز للشفاء
-ههههه اي معناها طيب بسرعه وتعال اخذني..
-وتصيرين مرتي..
-ساره تسلم عليك..
-غيرتي الموضوع اوك.. شقصتها هذه ساره شو تريد علاقه
-تتشاقى
-اهااا سلميلي عليها.. وكليلها باب الصداقه مفتوح
-ساره ديطول باب الصداقه مفتوح.
-لا باب الصداقه ضايع مفتاحه خاف ادخل واتورط وهو يكول اني مؤذي... على كدج.. ههههههه
-سمعتها هههههه
-تفتهم ههههه
-اروح حبيبي..
-اخذي راحتج وديري بالج على نفسج وبطلي خبال وسوالف انتحار.. تره اذبحج..
-لا صدووووك
-هههههه اي صدووووك.. انعوج حلكي باي..
-هههه باي...
بيومها رغم الالم بس فرحت بلمة خوالي.. اجه بابا بعدين وخابر الشيخ وكال راح انطيج للي تردي وكتلتي نفسج عليه..
بس اسمعي.. تنسين عندج اب.. لو يذبحج ويشمرج ابابي ما اهتم.. هذا اختيارج انتي تتحملين نتيجته
ومن اليوم ورايح لا اني ابوج ولا انتي بنتي..
توسلت بي بقيت ابجي كتله ما اريد اتزوج اتركني عندك بس ما اتحمل زعلك..
كال بعد ما اثق بيج واتركج عندي.. ردتج لمخلد وانتي ما قبلتي باختياري ف تحملي اختيارج انتي اني ما الي شغل بيج بعد.
ما ربيت وتعبت حتى تنتحر وتسوي هلسوالف.. انتي مو بنتي لجين.. بنتي جانت اعقل منج هووواي وهسه اعتبرها ماتت
كل محاولاتي وياه بالصلح فشلت.. كان رافضني رفض قطعي.. واتصل بالشيخ انطاهم خبر واجو خطبوني من بابا ومالك وياهم
وكان قراره خلال اسبوع واحد يتم الزواج ما يريده يتأخر.. ميريد يشوفني اني ومالك كدامه.
ف فعلا عجلنه بالزواج.. ورحنا اول شي سوينه الفحص الطبي قبل الزواج.. للتأكد من الامراض الوراثيه ومطابقة الدم..
طلع دمنا ما متطابق.. اني A+ وهو O- كملنه التقرير سوه.. صح كنت حزنانه من زعل بابا بس وجود مالك بجنبي كان مالي عليه الدنيا..
بكل خطوه اخطيها يكول .. احبج .. اعشقج.. ويتغزل بغزل يذوبني بحبه..
حددنا يوم عقد المحكمه ورحنا نعقد.. لبست بيومها فستان احمر.. التور الخفيف الاحمر يغطي الصدر والاكتاف والادين
والباقي قماش ناعم.. مخصر على جسمي... وطوله وي ركبة رجليه. حيل حلو .. ولبست علي جاكيت جلد اسود.. وحذاء كعب سوده ..
برمت شعري .. ومكيجت فقط لو ضل لون اسود والحمره حمره طوخ .. مكياج جليدي بارد..
باوعت لنفسي.. حبيت نفسي.. بس بداخلي شي مكسور.. ما اعرف ليش ما داحس بالامان.. احس في شي مو ضابط
يمكن لان بابا مقابل ع الزواج.. يجوز !!
انتظرت مالك يجي ياخذني.. ب9 ونص الصبح.. دك هورن يعني وصلت.. اخذت جنطتي وبوست ماما وطلعت..
ابوي رفض امي ترافقني للمحكمه.. يكول حتى تعرف احنه مالنا شغل بزواجها هي تتحمله
طلعت لمالك.. وصعدت وياه بالسياره.. بقى صافن بيه..
-اااااه اليوم العرس
-لا عقد مو عرس
-طيب ليش هلكد حلوه متخافين عليه
-ههههههه لا ما اخاف.. امشي..
-طيب بس بوسه السياره مضلله محد يشوف
-بعد ساعه نصير متزوجين وتكدر تاخذ بوسه براحتك ام الان ف نووووو وي امباسيبل..
-ادور تحجي انكلش وتتموع واني بلياهن مضيع مستقبلي .. بهالحاله شلون اسوق
-ههههههههههههه عادي انزل اصفن بوجهي واني اسوق للمحكمه.
-ها تردين تحكميني وتسوقين بيه من هسه مو هههه .. ؟!
-لا يعني كلت اساعدك..
-كرص خدي.. ويكولي اموت عليج. كتله لا مالك فدوه لتمد ايدك.. مكياجي يخرب..
-هههههه اوك ماشي..
-رحنا للمحكمه.. كانت ايده بأيدي.. هو لابس اسود باسود بنطرون اسود والجاكيت اسود جلد.. بس القميص ابيض وممبين كان قافل القمصله لان بارده حيل.
من نحجي نطلع دخان بيومها. انفخ ع زجاج السياره وارسم قلب الحب وسهم وابدايته اكتب لجين وبنهايته مالك..
وهو يضحك ويجر بايدي يبوس بيها.. وصلنا.. نزلنه نتمشى بس احس رجليه جمدو من البرد.
رحنا وقفنا ننتظر دورنا.. وكاعدين سويه هو يباوعلي وينزل عينه واني ما شلت عيني عنه
لحد ما صاحو اسمنا دخلنا.. عقدلنه القاضي كان مهري 100 مليون.. ما قبلت يخلي هلكد.. وكتله اني احبك مو ضروري الماده تكون بيناتنا.
كال ما اقبل مو احسن منج اللي ياخذون مهر.. انتي بعيني اميرتهم..
كنت فعلا احس نفسي اميره يمه. لان معاملته اليه مثل الاميرات.. ورومانسيته مفيده جدا بالجو البارد.. هههههه يعيشني بغير عالم..
عقد القاضي وطلب قبولنه وافقنا.. وكال مبروك زوجاً وزوجه. مد ايده مالك سلم عليه وطلع..
اني بقت ترن ابالي مبروك زوجاً و زوجه.. وكفنا بره.. كتله مبروك زوجاً وزوجه.. اخذني لحظنه حيل ويكولي احلى زوجه..
-نطقت احبك.
-اويلي گلب لج يابه امووووت عليج اعشق ترابج
اخذ ايدي وصعدت للسياره.. كال وين الوعد يا حلوه .. ضحكت.. اتقرب مني. مديت ايدي الحيته اتحسس بيها ..
كال احبج. بسته بخده .. امووت عليك.
-مكلفه نفسج.. بخدي.. (يقلد عليه)
-اممم مالك لتصير وكيح.. تلحك تشبع..
-زين خل نطلع للشقه مالتي ما اتعدى وياج صدكي..
-مستحيييل .. اطلع للبيت
-لج شبيج نص ساعه منطول لجين اريدج..
-جريت ايده وبستها واني احبك واموت عليك بس شقتك ما ادخلها الا واني عروستك.. غيرها نووووو
-اوف منج اوووف.. تنهد... ع راحتج..ساق ورحنا تغدينا بمطعم.. بعدها بقينا نفتر لحد ما رجعنا للبيت
نزلنا اثنينا
دقيت الباب طلعتلي ماما.. مبدله ملابس حلوه.. دخلت لكيت الدنيا كلها عازمتهم امي على المهر..
انصدمت.. حظنت ماما من الفرحه.. غصب عن ابويه مسويتلي العزيمه حتى لو مموافق بزواجي بس ما رادت تكسر بخاطري..
كلهم موجودين حتى عمتي كرجيه جايه عناد ما اعرف تريد تشوف منو بديل ابنها
الزينا والكيك والدي جي .. نزعت الجاكيت وعدلت شعري وكعدنه اني ومالك.. مطلعين البوم ساريه السواس بس اسمع مني..
وقفنا نقصص كيك وكلني ووكلته .. والوقح بوسني من شفتي كبالهم وكلهن ضحكن وصرخن عااا ويصورون .
رفعنا صوت ال دي جي.. ونزلت ارقص كدامه..
ويحبايبنا ويحبايبنا بطلنا ناخذ من كرايبنه..واحنه ما ناخذ الا اليعجبنه ...
ساعات.. وهو ترخص.. وصلته للباب..ورجعت طلعت.. اغير الفستان.. دا اريد ابدل اندكت الباب ..
فتحتها.. مالك.. خله ايده على حلكي وطب. رجعني للحايط وقفل الباب..
-مو رحت شرجعك .
-لك يا غزال اصيدك لو اطير
-ههههه لا صدك شدخلك خوفتني لا ادور جني
-هههه لا متفق وي ساره دخلتني من المطبخ وركض..
-اامممم. خليت اديه حول رگبته.. تتذكر هذا المكان
-هههههه لما سطيت على بيتكم بالليل
-كنت مفكرتك الجحيم
-شنو الجحيم..
-روايه رعب جنت اقرى بيها و انته اجيت بيومها من خوفي تخربطتت.. سحب خصري اله وحجه
-وهسه مناويه تتخربطين
-لاء ناويه اصير وقحه.. وابتسمت بوجهه..
صك على اسنانه وحجه..
-واني اموت على الوقاحه
-هههههههههههه مجنون....................
جنت مجنونه بي.. كان احساسي عنده يختلف جدا عن كل الاحاسيس بالدنيا..
كل بنت تحب تشعر بأن هي انثى .. وهذا الشعور مستحيل يتحقق الا مع رجل يحسسج بكل انوثتج
ما تقتصر على الرومانسيه او التقارب لا.. لكن لما تكونين جنب رجل تحسيه ملك وانتي اميرته
يتغزل باجمل الغزل.. يوصفج باروع الاوصاف .. لما تبجي يحتويها ولما تغلط يسامحها ولما تطلب ينفذلها.. والاهم من هذا لما تحس مشاعره تضعفه كدامها رغم قوة شخصيته.
هذا اللي كان يخليني اعشق مالك.. لاني بجنبه انثى كاملة المواصفات..
بيومها طول عندي نص ساعه وراح .. بعدها بدلت فستاني ومكياجي ونزلت للحفله رقصت وضحكت وحيل كنت فرحانه
بيومها ما كنت احس بنفسي بشر لااا.. فراشه ملونه بالوان الحب والسعاده ترقص بكل فرح ..
بعد ما طلعو.. بوستني ماما وباركتلي ودعت يارب يوفقني بزواجي ويكون خير وتخيب ضنونهم بي
صعدت لغرفتي سبحت ورجعت.. امشط واغني الدنيا خلوه واحلى اسنين بنعشها واحنه يا ناس عاشئين ننسى اللي فاتنى ونعش حياتنا على الحب متواعدين
واني دا اغني.. دك جهاز موبايلي.. باوعته رقم غريب.. منو هذا.. رديت الوووو
-الووو انتي لجين
-نعم عزيزتي تفضلي
-يا حرااام انتي مسكينه
-ليش
-مصدكه اليوم زواجج..
-منو حظرتج
-اني ناديه
-عذرا ولا صغر ما اعرفج..
-انتي متعرفيني بس مالك يعرفني
-وشدخل مالك.. ممكن افتهم
-انتي مصدكه يحبج
-مفتهمت.. شنو اللي تردي
-ما انتي الا ضحيه جديده للملك
-ما اعرف انتي شدتحجين.. ممكن توضحين اكثر الملك منو
-مالك.. انصحج اتركي
-وليش اتركه.. انطيني دليل على كلامج وان اني ضحيه وياريت اعرف انتي منو
-اني زوجته ومستحيل يبدلني بيج بس انتي فقط لعبه يلعبها ويربح بيها ومن ثم يرميها بالنار.
-مالك متزوج ؟!
-يا ريت تحسين على نفسج واتركي.......يتبع
...............