خطوات نحو الجحيم

البارت 11

مالك:- اتركهاااااا

مخلد:- اقتلك انت وياها ..واغسل عارنا منكم يا سسسسسسسفله..

لجين:- مااااالك دخيلك.. نزل سلاحك..

وهمه رافعين اسلحتهم بسرعه الامن اجه والتف عليهم.. ورفع اسلحتهم عليهم وبقو يحجون كردي..

:-سلاحه كانتان دابكرن خيرا..

وبسرعه التفو على مالك قيدوه .. مخلد نزل سلاحه بدون ميجون عليه..كان لابس عسكري وطلعلهم الباج ضابط..

ردت اهرب وهو يحجي وياهم.. وكأني عصفور يبحث عن خيط نجاة لحتى يهرب.. انسليت من بينهم.. وطلعت.. دا اريد اركض.. لزمني مخلد..

-بنت الكلب وتشردييين.. يا عااار ..

ضربني راشدي.. وجرني من شعري للسياره

-مخلد والله ما سويت شي اتركني..

-امشي عدل لا المسدس افرغه براسج والله..امشييي..

-صعدني بالسياره وياه.. وصعد الجنطه واجه صعد اول شي سواه جر شعري وضرب على راسي وغلط وفشار بأبشع ما يكون..

حاولت اشرحله وبس انطق يضربني على راسي.. لزمني صداع يذبح كد ما كفخ على راسي..

ومن اربيل لبغداد.. جاب الطريق كله يغلط ويضرب ولا كأنه مخلد السابق اللي اكدر اتفاهم وياه رغم عصبيته..

خابرهم وكاللهم هيج لكيتها وياه نازله من الفندق ويدفع الحساب عنها ويردون ينهزمون..

عيني ما بطلت دموع الطريق كله.. اذا مخلد وهيج اللي ينتضروني شلوونهم.. وصلنا بغداد.. بقيت اصرخ اريده بس يسمعني اكوله ما سويت شي حرام عليكم..

ما سمع ولا اهتز.. كلما غلط وعصب يرجع يجر راسي ويضربه بالكشن ويبقى يجر بشعري لحد ما يتعب ويوخر..

وصلنا الاعظميه.. حسيت وصلت ساحة اعدامي.. كان ملجأي الوحيد هو الله.. بقيت انادي يا مغيث من لا مغيث له اغثني.. يا غياث المستغيثين

احجيها بكلبي وبس الدموع تحاجي ربي بكل حزن.. دعوة انسان بينه وبين الموت شعرايه.. بقيت اردد الدعاء لحد ما وصلنا باب بيتنا..

وشفت عمامي واكفين 2 عمران وعثمان.. ومازن وياهم.. وكأنهم قصابين ينتظرون الكبش حتى يذبحوه..

نزلني من السياره.. وحجه صوت ما اسمعلج.. افتهمتي... خلينا نطم عارج بدون صوت..

-مخلد فدوه ابوس ايدك بس اسمعني والله ما سويت شي وحق القران ما سويت شي.. يمشي ولا ينتبه الكلامي..

دخلني لبييت.. كمت اصيح ولج ماااااامااااااا.. ماما انقذيني حيذبحووووني..

طلعت امي مفزوعه وتصرخ دخيييلكم بتييييي حرام عليكم بنتي تريد تلزمني ويشمروها مني..

واني اصرخ من كل كلبي تعااااالي لا تعوفيني راح يقتلوني.. وينك بابااااااااا بابا حبيبي لا تعوفييييي

كانت صرخاتي تطلع من كل گلبي.. شمرني مخلد بالغرفه الصغيره وامي تصرخ من كل كلبها وعمي لازمها..

تركني مخلد وطلع وخله بس عمي عثمان ومازن يمي.. لزموني ما اعرف يضربوني من اي مكان..

2 رياجيل مستقوين على مره لا حول ولا قوه .. كانو يضربون بحقدهم بكل قوتهم.. ما اعرف ضربهم وين بجسمي كل مكان كام يصرخ بيه من الالم..

تمنيت ينطوني رصاصة الرحمه وينهون عذابي والله يعرف ما غلطت وحيسامحني اكثر منهم.

ابويه بيومها وقبل لا يوصلني مخلد.. كايللهم كتلوها وتاركهم وطالع. اعرف ميتحمل يسمع صريخي واني اطلب الرحمه.. اعرفه لبابا ميتحمل..

كانت بس امي موجوده وتصرخ بكل صوتها.. ومخلد يمنعها مني .. وسادين الباب.. عليه ويضربوني بكل انواع الوحشيه..

دفر بوكسيات تمليخ شعري.. ويشيلوه ويركعوه بالكاه.. وكأن صرخاتي بين اديهم كانت تنادي يا ناس ارحمو عزيز قوم ذل..

اني مدللة بابا اللي بعمري محد حاول يأذيني..اكون بهلموقف..لكن عرفت بيومها تنذل البنيه لو تركها ابوها ..

فقط لو ما كسرت ثقة ابويه ما كان احد كدر يلزمني.. كنت امشي بالدنيا مرح بزود ابويه.. بيومها عرفت شكد خسرته..

مستعده ادفع عمري كله.. بس ترجع ثقت ابويه بيه.. والله ما ااطلب اي شي لا مالك ولا حب ولا اي شي بس اريده هو.. وما اريد من الدنيا كولشي غيره

نعمه كنت عايشه بثناياها.. خسرتها بسبب غباءي واتباعي لنزوات قلبي.. مستعده اتحمل بعد هلضرب مرتين وانقتل بس خل يرجعلي بابا..

كانت بس امي اللي رغم كل اخطائي وتنبيها الي على اخطائي .. وياما حجت وملت وهي تكولي ابتعدي وما ابتعدت.. بس ما عافتني..

بقت روحها معلكه بيه وتصرخ وكأن الضرب اللي دا اتلقاه منهم بجسمها مو بجسمي..

العجيب بالام وقت لما تحس بضناها بخطر.. تصير عندها طاقه هائله.. تتعدى طاقتها ك امرأه من الجنس اللطيف..

كدرت تتخطاهم كلهم رغم ما مخلد يصيح ويجرها.. شالت تحفيه وضربته بيها واجت من بينهم لفتني وهم يجرون ويغلطون عليها ويفشرون..

وهي تصرخ تكلهم كتلوني وياها.. اذبحوني وبعدين اذبحوها.. مو الام تتحمل خطيئة بتها اني تحمل غلطها وكتلوني..

لفتني بحظنها وكأني طفل يحاولون يجروني منها مجلبه بملابسها حيل ما اريد اتركها.. وهي ايد على جسمي وايد ضامه راسي بصدرها..

سمعت خوالي دخلو 3 .. وبقو يحجون بصوت عالي تركوني عمامي وراحو.. ما حجت امي بس خلت راسها على راسي وتنشغ وتبجي حيل واني ابجي وياها..

دنبجي وطبن خالاتي..

سعاد:- لج ها وداد بشري .. يمه مات گلبي كلت كتلوها.. الحمدلله ربي لحكنا.. والله من خابرتي ما لحكت اشوف شلبست..

خابرت انور واجيت بساع.. اووووي سوده عليه يا خاله شمسوين بيج.. ليش هيج حظج..

كعدن كبال امي ومدن ايدهن على راسي يمسحن على شعري واني بحظن امي ونبجي..

وداد:- حظها يا اختي.. والله النار بگلبي شراح يسون بيها وشاكر عافهم وطلع.. باعي شسوو بيها عسى بيدهم الكسر..

سعاد:- لحظه خل نسمع اشد يحجون.. نومتني امي على المخده وكامت يم الباب..

كعدو عمامي وخوالي .. يتحاجون.. طب بابا.. صاح وينها... واجه للغرفه كبل ... ركضت امي وخالتي صارولي سد..

واني امدده من الوجع.. صرخ ابوي انطونياااااها اليوم اشرب من دمها.. طبو خوالي للغرفه غيث وانور..

خالو انور لزم ابويه

انور: ابو لجين رحمه لله ارحمها اسمعها بس اهدئ خل نفتهم الموضوع..

عمران:- هاي نزلت روسناااااا مااااااااازن شيلها واخذها اكتلها واشمرها..

الام:- بنتي ما انطيها الكم . اذبحوني وما انطيها والله..

انور:- كولو يا الله يا ناس حرام عليكم حتى الينثبت عليها الجريمه عقابها الجلد مو الموت

عثمان:- انت اخذ اختك واطلع براااااا البت بتنا واحنه نصرف وياها..

انور:- داخل ابيت اختي.. والكلام اخذه من ابوها.. وهاي اكولها بوجهك.. لجين اني مستعد اخذها لابني واسفرها لاوكرنيا..

واني واثق مليون بلميه من تربية اختي ما تضيع والبنيه مظلومه انطونا ياها الابني

مخلد:- انت شوووو ما تطلع دكووووووم.. ودفع خالو يريد.يطلعه

انور:- ابو لجين الجواب الك لا تخلي مصير بنتك بيد غيرك حرام عليك..

ابوي يصرخ وعمامي يصرخون وامي وخالاتي يكاد محد يسمع احد..من كد هوستهم..

انتهى الامر... عمامي دفعو خوالي وطردوهم من البيت.. راحت امي وخالاتي تتعارك وياهم. وامي من حركة كلبها..كايله لعمي

الله يطلع حركة كلبي بيك.. وتلاكيها ان شاءالله...حاجيه هيج ومتوليها بابا بالغلط والصياح .. وعمامي كامو يغلطون عليها..

خالاتي ما سكتن كامن يهدن ويحجن على عمامي.. هام بابا رايد يضرب امي وخالتي واكفتله..

كايلتله بنتك تضربها وبلعناها تمد ايدك على اختنا.. نعلگ اديكم بروسكم والله..

من هلكلام مخبوصين فد مره وطاردين امي وخوالي وخالاتي من البيت.. بقيت وحيده بين الذياب..

فقط اني ورحمة الله اللي ما سكت الساني واني اصيح يا مغيث من لا مغيث له.. اغثني..

هنا كعدو كلهم وابوي قفل الباب عليه وصوتهم يتعالى .. بقو يحجون يردون يعرفون شصار ويايه..

عثمان:- مخلد سولفنه بالتفصيل شصار.. وين لكيتها

مخلد:- من خابرتوني وكلتولي انهزمت.. اول شي فكرت بي القناة اللي تشتغل بيها سبق وكالتلي بس اخلص العيد وياهم وابطل منهم..

اني سابقا جنت ماخذ رقم مصطفى المقدم الوياها بالبرنامج للاحتياط.. ف من كلتولي بسالفه.

رفعت اتصال وخابرته كالي احنه باربيل حسسته ماكو شي وجريت السانه بالكلام.. وكتله لجين شلونها..

كال تخربطت البارحه ونقلناها مستشفى وهسه هي بغرفتها.. كتله انطيني العنوان اجيها..

انطاني.. وقررت اروحلها بس ما كدرت اترك النقطه مالتي بليل.. فكلت يطلع الفجر واتوجه لاربيل..

من وصلت للفندق.. لمحتها.. ولمحت الكلب اللي اسمه مالك واكف وراها يتحاسب ويدفع وهي شافتني

مجرد ما تقربت الها .. الكلب خلاها وره ضهره وتلاوى وياي وتعاركنا.. طردونا ولزمت لجين جانت رايده تشرد..

اللي اسمه مالك رفع اسلاحه بوجهي. تالي اخذوه الامن واني جبتها واجيت..

عثمان:- مخلد عمي اخذ البنيه اعقد عليها اليوم واسترها.. وفض السالفه لا ننفضح..

مخلد:- وهي من جانت شريفه محد انطانياها.. هسه من باعت شرفها اخذها.. لو اموت ماخذ وحده مثلها..

.........اني بالغرفه واسمع.. مابيه حيل حتى افكر.. اون من الم جسمي لحد ما تركتهم يحجون وغفيت من كد البجي........

*******

عثمان:- هو الولد الجان وياها شنو قضيته شاكر

شاكر:- اجه خطبها مني اكثر من 5 مرات ورفضته لان سبق واتعرضلها الكلب .. وكتلها ابتعدي عنه.. بس اخخخخ اني الوثقت بيها..

عمران:- اذن انطوها للولد وخل نخلص منها احسن من القتل وتدمر ادينه بدمها .. خل يجي ياخذها وما يشوفنا وجها..

مخلد:- هو شنو ياخذها شنو يخطبها.. انتم تعرفون هذا منو لو لاااا..

مالك قاتل مأجور سياسي.. كل سياسي يريد يصفيله جماعه لو يقتلهم.. مالك يتولى هشغل هو وعصابته. ويسمونه بالوسط الملك..

ملك القتل بالعراق هو ..معروف عنه يقتل البشر وجكارته بحلكه بكل دم بارد..

عثمان:- يعني قاتل ... ولكم خاف يجي يقتلنا.

شاكر:- وليش ما حجيت من قبل هلكلام

مخلد:- هو انتو اكو واحد بيكم يسمعني حاولت اخلي حمايه لجين وابطلها من القناة حتى تبتعد.. الخانم ما قبلت ..

شاكر:- ومن شوكت تعرف بي ..

مخلد:- بعد ما كمت جرحي لما اغتالوني.. رحت ابحث عنه ليش طلع وما انسجن طلع مدعوم سياسيا..

عمران:- انطوها اله وخل نخلص من شره لا يجي يكتلنا ونتورط من وره هلساقطه..

مخلد:- وتروح تنطيها لهذا الساقط هو وعصابته..

عثمان:- يطبها مرض هي اللي اختارت طريقها خل تاخذه وتمشي..

مخلد:- اشمرها للكلاب وما انطيها اله والله.. لو تمووت .. اسلم عرضي لواحد كوا...... شنو تخبلنا

عثمان:- والحل شلون مخلد... لا انت قابل تستر عليها ولا انته قابل ننطيه شنو لعبه بيدك احنه..

-اني اعرف شنو الحل..

لجين:- جنت نايمه بمكاني ما بيه اشيل ايد لو رجل..واجه مخلد جرني من زندي.. وشالني.. فزيت على جرته

مخلد:- امشي..

لجين:- اتركني مخلد.. الله يخليك.. والله مسويت شي... بابااااااااا.. لا تعوووووفني والقران مسويت شي حررااااام عليكم..

جر اسلاحه وخلاه بوجهي.. تسكتين كلمه وحده ما تطلع منج مفهوووووم..

بقت بس دموعي تجري بدون صوت.. السياره كانت بالكراج.. صعدني.. واخذني لبيت اهله.. شمرني بغرفته دا اكوم اريد احجي وياه طلع وقفل الباب..

اثناء ما اخذني مخلد وطالع.. راجع خالو وامي لبيت ابويه.. ما متحمله تبقى عند خوالي واني بين اديهم..

رجعت طبت تتعارك وي عمامي.. ف عمي عمران كاللها اخذها مخلد.. وراح ينفذ بيهم ويغسل عارنا..

باقيه تصرخ.. ف متصل بالجذب رافع تليفون وعود يحجي وي مخلد ويكله عفيه رفعت راسنا وغسلت عارك..

حجه هيج فقط حتى يحرك قلب امي.. اوفعلا نال رغبته...مي باقيه تصرخ بالبيت من كل قلبها.. من قوت الصرخه..

تلفت عدها الحبال الصوتيه واختفى صوتها باقيه تريد تصرخ صوت ما يطلع منها.. فشايليها بهذا اليوم للمستشفى..

ابوي من سامع عمي عمران هيج حاجي طالع من البيت ومرتفع الضغط وباقي ينزف

واثنينهم للمستشفى.. امي بعد الفحص تبين ان اختفى صوتها بسبب تلف الاوتار الصوتيه..

من كد حزنها وتريد تصرخ وماكو.. مشكل عدها سكر.. ف منوميها مستشفى..

تالي خابر خالو على مخلد.. يريد يفتهم جثتي وينها كاله ما قتلتها اريد اعيد تربيتها وهي عندي بالبيت..

خالو متخبل راجع متعارك وي عمي عمران هو وخوالي وخالتي كلها هجمو على عمامي.. كالولهم كذب بس حتى يحرك كلب ام لجين وحالتها هسه بسببه

هذا كله عرفته في ما بعد.. يومين.. اني ما اعرف شنو صاير بيهم.. مخبوصين واني محبوسه.. فقط بغرفة مخلد.. موجوده بيها ثلاجه تحتوي على مي واكل قليل..

يومين حتى الحمام مشايفته.. بس نايمه بمكاني لا اكل ولا شرب..

بعد يومين من الخبصه اللي ما اعرف عن شنو يحجون كل ضني من ورايه.. طب مخلد بليل..

كعدت على حيلي وتراجعت.. لميت رجليه ولفيت نفسي بالشرشف

-من شوكت هذا الكلب عندج علاقه بي..

-منزله راسي وما احجي..

لزم شعري احجي لا تخليني افرغ اسلاحي براسج بالقران.. جان بايت وياج بالغرفه..

-سكتت

-احجيييييييي

-ما سوالي شي والله.. كنت ناويه اهرب وهو كال اساعدج.. جر راسي بسرعه

-تهربين وياااااه موووو

-لااااا وحدي

-لج هلدروب احجيهن على غيري لجيييييين.. شيسوي صعد لغرفتج.. وشيسوي وياج بالفندق كل هذا وتكوليلي ماكو شي

والقران ذبح اذبحج..

-هذا اللي صار.. والله ماكو غير شي..

-يا لجين اذا ما خليتج تتمنين الموت وما تلاكي فلا اطلع اني مخلد..

-ماما وين مخلد فدوه خل اخابرها..

-بجهنم ان شاءالله

-اريد امي.. گلبي نار عليها فدوه بس احجي وياها..

-هه هو انتي بقيتي صوت عد اهلج ويحجون وياج . تبرو منج

-شنو الرايدي مني... اهلي تبرو.. خلاص اذبحوني وخلصوني.. ما اريد اعيش هلعيشه..

-تردين تموتين مووو..

-اتقرب عليه..

-اتراجعت..

-ولج احجي راح انجن لزمج لو لااااااا

-ابتعد عني..

-اني ابتعد.. مووو .. بس ذاك من يتقرب اهلا وسهلا موووووو

شال راسي وضربه بالحايط ويصيح احجيييي.. كولي اتقربلج لو لااااااااا..

-بقيت ابجي حيل وما رديت.. بقى يضرب.. ويشيل الغراض ويكسر ويصيح.

طبت امه تهدي بي.. وتكله حيلك تهده علمود وحده ما عدها شرف..

مخلد:- ما عدها شرف اذبحها.. اغسل عاري منها واخلللللللللص..

اخذني من شعري ونزل بيه سحل.. لزمه عمي عثمان..

عثمان:- مخلد وين

مخلد:- ما اتحملها هاي البلا شرف ما يطفى ناري الا بدمها ...ما اتحملها ساقطه هااااي سااااااااااقطه.

اني ابجي واجر بي واصرخ لعمي.. جرني منه وكاله ساقطه ياخذها اللي سقطها ويسترها

الولد اجه لعمك قبل شوي وجاب ناس يريد يخطب واعتذر هو والشيوخ الوياه.

مخلد:- شنووووووو شيوخ هذا ساقط منيله اهل حتى عنده شيوخ عصابجي هذا مجرررررررم..

عثمان:- وانت شعليك عسى ما يطلع غول هو وياها يتجازون.. لا تبقى على كل واحد يخطبها مطلعلك سالفه خل ننطيها ونخلص منها

مخلد:- اذبحها وما تتزوجه والله..

عمران:- مخلد ابني تره طلعت ارواحنا .. لا قابل احد يتزوجها ولا انته تريدها شلووون نبتلش بعارها ونسكت.

مخلد:- اوافق بشرط.

عثمان:- كول

مخلد:- تخضع لفحص طبي كامل مو فقط عذريه واذا ابين بالفحص ما لامسها من اي مكان بجسمها.. ذاك الوقت بعد ما اتأكد من طهارتها اتزوجها..

لجين:- مو انت اللي تذلني.. كنت تحلم بخيط من شعري وهسه تتشرط تتزوجني وتسترني..

المبلل ما يخاف من المطر اذا بعينكم استاهل القتل اقتلوني بس لا تحلم ارضيلك غرورك .. مو اني الاقبل بهيج فحص.. اموت ولا تذلني

هم سمعوني رديت.. لو تكابلو عليه عمامي اثنينهم ومخلد.. واحد يجر واحد يضرب..

سحلوني سحل.. وهم يكتلوني وجروني للغرفه مثل الميته من الوجع.. شمروني بالغرفه وطلعو

بقيت ابجي بجي من الالم والحركه والوحده .. لل3 وما غفتلي عين.. اني مخلد يذلني.. اللي جان يحلم بيه يتشرط عليه ..

يردون يستروني ينطوني لمالك.. والما رادوو... يقتلوني مو فد مشكله.. اموت ولا انذل لمخلد واخلي يسويلي فحص عذريه.. حتى يرضي غروره

لو عمامي طالبين جان خضعت وسويت حتى اثبت برائتي.. بس مخلد ويتشرط بفحص حتى يتزوجني لو اموت وما اتزوجه..

كرهته كلش بعد معاملته وي امي واليه .. كاعده ابجي.. للحظه وكفت بجي وقررت اسوي شي بدل البجي.

كمت فتحت الشباك يصعب عليه الهروب منه.. كمت ادور على شي بالغراض الكت اكدر افتح الباب بي..

لكيت جراره بيها عدة درنفيس .. جريت درنفيس منبل.. ورحت للباب.. فتحت براغي القفل مال الباب من جوه

رخى القفل.. بس بقى مقفول.. كمت بلدرنفيس.. اكسر الخشب اللي ساد القفل واشخط بيه حتى ما يطلع صوت..

ساعه يلا انفتح.. حسيت بأنتصار وهو ينفتح الباب.. لميت شعري ووخليت الدرنفيس بي مثبت حتى لو احد تعرضلي اجرح بي.

نزلت على اطراف رجليه .. واني حافيه بدون صوت.. جانو مطفين الضوه.. الدرج مالتهم كبال الصاله..

نزلت بساع واتخبيت وره الدرج.. ما حسيت اكو صوت.. رجعت اتقدمت للصاله اللي تطلع للكراج وماكو غير باب ..

مو مثلن بابين لبيتنا.. هم باب واحد والمنفذ الوحيد هو الصاله.. مديت راسي.. نايمين بس ضلمه ما عرفت اميز واحد منهم..

مشيت بحذر واني اباوع عليهم.. كان اكو سويج سياره على ميز التلفزيون.. جريته وخليته بصدري على كيف..

وصلت للباب كان حديد بس قوي متن.. وبي جام . من فوك لجوه..

فتحت على كيف وجريت المفاتيح.. واباوعلهم نايمين. طلعت وقبل لا اسد الباب خليت المفاتيح من بره..

رديت الباب.. وقفلته على كيف.. بس رغم هاي طلع صوت خفيف للقفل وهو يقفل.. صاح مخلد منو..

تركت الباب وركضت للباب الشارع.. فتحته شافني.. كام يحاول يفتح بي.. اني فتحت باب الشارع وطلعت وطبكته وراي..

دست السويج.. طلعت سيارة عمي.. ركضت ركبتها اول ما مشيت.. مخلد.. طلع..

دست بالسياره حييييييل.. حتى ما باوعت بعد وراي.. عرفته راح يلحكني.. رحت لبيت اهلي كبل.. وكفت السياره اباب بين اهلي..

وعفتها وشردت.. حتى اوهم مخلد اني دخلت البيت ابويه.. طلعت من الفرع الثاني اركض وكفت سياره..

خفت اصعد.. طلع رجال جبير كان طالع لشغله لان كان فجر شوي الضوه يريد يطلع السما لونها نيلي..

من شفته رجال جبير.. صعدت وكتله عمو شردت من ناس يردون يقتلوني امشي بساع.. خطيه شافني مضروبه وشكلي تعبان داس حيل..

كال وين.. دليته بيت خالتي سعاد اقرب بين علينه من خوالي.. وصلت .. ما راح الحجي بقى واكف خطيه..

دكيت بابهم .. ماكو ادك ادك ادك.. ماكو.. لهناك بعد ما تعبت من الدك.. صاح زوج خالتي منو..

كتله عمو اني لجين.. افتح الباب فدوه.. ركض فتح الباب انصدم بشكلي وجهي ازرك ومضروب وشعري مكفش ومكطع..

حظني خطيه وسلم عليه شبيج بنتي ليش هيج حالج. كتله عمامي يردون يكتلوني..

كال طبي اتحاسب وي ابو التكسي.. طلع شكره وحاسبه ما قبل ياخذ كال خدمه انسانيه بس طمني على البنيه كون مابيها شي..

كاله عمو لا احنه اهلها مابيها شي ان شاءالله.. طلع ودخلني للبيت كعدني بالهول.. وراح جابلي مي.. وكال اهدي .. خل اكعدلج البنات..

صعد كعد مينا و ساره.. نزللي بسرعه يحظن بيه ويبوسن..

ساره:- لج والله البارحه بس ابجي عليج الله لينطيهم شنو ذوله.. لج عيني باع وجهج شمسوين بيج اللهم عسى الكسر بأديهم..

لجين:- لج لو بيه ذنب كان كلت استاهل وهذا عقابي.. بس والله ما الي ذنب. لا اني صعدت الولد ولا اني طلبته

هو اللي يفتر وتبعني لاربيل.. وخطبني البارحه من عدهم وجايب اهله وشيوخ وللان مخلد رافض ينطيني الكلب

لو يقتلني لو يتشرط اسوي فحص عذريه ويتزوجني حتى اعيش وياه العمر كله بذل.. كتله اكتلني وما اريدك

اجتمعو عليه كلهم ضربوني.. باعي ايدي سوده جسمي صار اسود من كد دفراتهم..

مينا:- سوده عليه يروحي الله لينطيهم ان شاءالله بنار جهنم..

حجه زوج خالتي:- عمو هم ليش ضاربينج شايفينج وي واحد لو شنو الموضوع..

-دا احجي .. ردت ساره

-بابا كل القصه واحد يفتر وره لجين ومعجب بيها بس مخبل.. تعرف فنانه وتطلع تلفزيون هذا قافل عليها

من كد ما صادته وما راده عليه.. متسلق بيتهم وصاعد على بلكون غرفتها يريد يحجي وياها.. طاردته هي.. ما قابله تفتح

جاي ابوها عباله هي متفقه وياه.. گلب الدنيا وعمامها ميعونون يلزمون عليها شي تعرف حاجيتلك ماما على عقلياتهم..

متوليها وضاربيها ويدون يقتلوها ويكولون عليها عار وهاي كل القصه..

-لا حول ولا قوة الا بالله بناتي اخذوها فوك خل ترتاح اني اخبر امجن خطيه نايمه وي امها .. بالمستشفى..

لجين:- اشبيها امي.. ليش نايمه بالمستشفى..

ساره:- ماكو شي حبيبتي لتقلقين.. ضغطها من القهر عليج صاعد.. هسه نخابرها تجي وتشوفج وتصير زينه بس ارتاحي..

صعدت وياهن للغرفه طلعلي ملابس وكاللي طبي سبحي بمي حار حتى ترتاحين وتنامين..

اخذت شاور دافي بس المي من يمشي على جسمي كله اتأذى.. والمشكله الوجع ميوجعك.. الا لما تسترخي

وكأن الجروح تتذكر المها وتبقى توجعك.. بدلت وطلعت.. كعدت ابجي .. ومينا وساره يمي..

مشطتلي ساره نص شعري وكع .. بوستني وكالت لتهتمين.. تصير سوالف ويارب يجي مالك ياخذج وتعيشون اجمل اثنين وتخلصين من مخلد..

لجين:- مينا فعلا احتاج مالك.. هو الوحيد اللي يكدر يعيشني بعالمه وينسيني العالم كله.. وياه انسى كولشي..

-عمي الولد وفى وياج وخطب شكم مره وهلأجه وجاب ناس وتقدم البارحه شيردون بعد اهلج

نامي ارتاحي حبيبتي لتفكرين.. عود من تنامين حلمي بمالك وووو ههههههه...

-ابتسمت رغم الوجع واتمدد .. غطتني بقيت افكر افكر لحد ما نمت.. الصبح كعدت على صوت ساره تكولي امج اجت.

فزيت من مكاني.. ونزلت وياهن.. شفت ماما كاعده شافتني وكامت اليه.. ركضت لحظنها بس ابجي..

رفعت راسي ابوس بخدها وبراسها هي بس تون وتبجي متحجي.. استغربت سكوتها..

ماما شبيج ليش متحجين.. بس تبجي وتحظن بيه.. اجت يمي خاله سعاد كالت

سعاد:- خاله عمامج الله لا ينطيهم حركو كلبها وكالو كتلوج وغسلو عارهم وهي كامت تصرخ من كل گلبها وتبجي لحد ما انبح صوتها وصار عدها تلف بالحبال الصوتيه واختفى صوتها..

اني كالت هيج لو حظنت ماما وكلت ماما لاااااا فدوه سمعيني صوتج... كمت ابجي بحركه

صعب من تحس انو عائلتك ادمرت بسببك.. والاصعب ان انته متحس انت مذنب لان كولشي صار خارج عن ارادتي..

بقيت ابجي حيل.. وشلتها واخذتها لغير غرفه خليتها على رجليه لحد ما نامت.. اجت خالتي كالت

- كومي خاله اكلي..

-والله خاله ما الي نفس

- ماكو هلحجي سويت شوربة دجاج بالخضروات علمودج باع وجهج..

-عمامي هم خابرو

-خابصين الدنيا.. راحو الخالج حلفلهم كابللهم مو يمي خابرني ابوج حلفتله مو يمنا لان صدك ما جنت اعرف بيج انتي يمنا

راجعين مخابرين خالتج هناء .. وخالج غيث .. وحتى للشيخ اللي اجه وي الولد الخطبج وراح تأكد من الولد كالو مو وياه..

انخبصو بيج وينها.. حل خل يدوخون زعساهم بالسرطان على حركة كلب امج السووها بيها الكلاب حركو كلوبنا عليج يا خاله..

باستني ومشتني للمطبخ كعدت وي البنات اكل.. كالو اجه شاكر رجل وداد.. يعني بابا.. احس فز كلبي والدمعه انحبست بعيوني..

جرتني خالتي وصعدتني فوك.. ونزلو يحجون ويتصايحون وياه.. بس كان تعبان مريض ما كادر يرد عليهم..

بس كاللهم اذا تعرفون مكان لجين كلولنه.. مابيه اتحمل بعد.. بقت تحجي وياه خالتي على ابو ليش فضحتها وليش كلت لاخوتك..

جاوبها اي رجال بمكاني جان سوى السويته محد يتحمل السوته بنتي..

كالتله ما واثق ابنتك انته.. جاوبها فقدت الثقه من ساعة النكرت وجذبت وعينها بعيني..

متحملت.. طبيت عليهم وهمه بالغرفه.. وبجيت بابا والله من ارتباكي كذبت بكل غباء.. والقران وجيبو كتاب الله واحلف عليه..

ولا بعمري فكرت ائذيك.. اللي سواه كان بدون علمي وكلامي وياه كان طرد.

راد يحجي اني اخذته بالحجي وتقربت ابوس راسه مقبل.. وكعت يم رجليه.. بابا اذا تشك بيه اقسم عليك بالقران اذبحني.. واني باريتك الذمه..

شال ايده من عندي وراد يكوم.. لزمته..بابا الله يخليك.. لا تروح...مستعده ادفع عمري بس لا انته تزعل..

شنو تريد اني اسوي بس سامحني والله بابا ما كان بودي اضرك وهروبي كان خوف من القتل ومالك هو تبعني لهناك والله ما كنت متفقه وياه.

كنت انويه اهرب لاحمد ابن خالو انر مو ويه احد.. ولا تفكر فد يوم اهرب مع احد واكسرك.. انتى اغلى شي ممكن افكر بيه..

بقى يهز براسه.. حظنته بابا سامحني الله عليك.. بعدني.. وحجه تردين اسامحج.. تقبلين بمخلد وترحين وياه وتنسين كلشي ابالج.

ولو ما رضيتي لا تفكرين توصلين يمج ولا اني ابوج ولا اعرفج ومتبري منج ليوم الدين..

بقت خالتي وخوالي يحجون.. كام ابوي يتصايح وياهم وكاللهم انتم ما الكم احجايه يمنا.. وهي القرار الها

تريد توافق على مالك .. هسه اخابرهم واكلهم موافق.. تاخذه وتمشي.. بس اتبرى منها .. واذا تريد رضاي ومسامحتي من باجر يعقد عليها مخلد وياخذها وياه للموصل..

رادو يحجون.. كتلهم اذا بابا يسامحني بموافقتي من مخلد.. اني موافقه اتزوجه بس بشرط..

دارلي ابوي.. وباوع ودون ميحجي..

اني مغلط ولا انطيت نفسي لاحد وتأذيت من عمامي هوايه.. ف اذا مخلد يريدني يوافق يتزوجني بدون فحص..

علمتني على الكرامه وما اكدر انذل.. يا اموت يا اعيش بكرامتي.. ومستحيل انذل لمخلد..

عاد اذا هو ما واثق مني مو مجبور يتزوجني خل يتركني بحال سبيلي اعيش..

غير هلكلام ما املك بابا واني موافقه باللي تريده.. وان كنت اخطأت بعينك واقسمتلك ما كان خطئي لكن اعرف انته ما تقبلي الذله....يتبع

☆☆☆☆☆☆☆☆

#خطوات_نحو_الجحيم

////بقلم الكاتبه زينب ماجد////

الحلقه_15

الاب:- موافق بشرطج.. وراح اشترط عليه هذا الامر

لجين:- واذا ما وافق

الاب:- لتحلمين بغيره.. اللي اسمه مالك مستحيل اوافق عليه.. ولو اخذتيه تنسين عندج اب..

حجت خالتي سعاد.. وليش متوافق عليه انتو ليش تجبرون البنات يرحن بغير طريق والسبب انتم..

الولد 8 مرات تقدم ورادها منك .. وجابلك شيوخ وناس كبار وحتى كاللكم مستعد مهرها 100 مليون بس اقبل نتزوج..

وانت معاند على ابن اخوك الهمجي اللي ما يحجي كله ايده والضرب وبنتك مدلله ممتعوده على اسلوبهه عبالك مجرم عنده مو بنيه

حرام عليكم خافوا الله.. ما حبيت انت قبل وجنت من شقاوات المحله والحجي رافض ينطيك وداد لان هم يعتبرك مجرم..

بس بداخلك انت ووداد ما جنتو تتمنون الزواج .. ما كتلت روحك حتى تتزوجها.. اترك انانيتك وفكر بمشاعرهم..

يحبون بعض انطيهم.. عاصي بالبنيه شنو شراح تحصل من وراها متكلي

الاب:- اولا يا اخت سعاد هنا للمره الالف اعيد.. بنتي لا تدخلون بيها.. ثانيا اني من ارفض وان كنت غاضب على بنتي

لكن اسيّرها للطريق الصح.. مالك قاتل مؤجور سياسي ومجرم وسبق واتعرضلها واللي ما يخاف على سمعة اللي يحبها ويطافر على بيتها بنص الليالي

هذا ما اسمي حب.. هذا الرجل معتبر لجين شي غالي وديحاول يلفلها من كل مكان.. واعرف لو اخذها لجين راح تترحم على مخلد الف مره..

مخلد عصبي وحاليا متضايق منها بسبب افعالها.. وصح يأذي بعصبيته.. بس اني متأكد منه يصونها.

سعاد:- مالك قاتل مأجور.. من وين الكم هلكلام

الاب:- مخلد بحث عنه وعرفه

لجين:- هه هلمره قاتل .. كنت تعجبت لو مخلد ما طلع بيه خلل مثل البقيه وهلمره قاتل.. والقبله واحد سرسري والقبله دكتور بايع مهنته..

فقط هو الشريف..

سعاد:- وانت صدكت مخلد.

الاب:- اي اصدكه.. واسمعيني لجين اخر كلام وياج كلته.. غيره انسي عندج اب.. وروحي للي تشوفي مناسب الج..

لجين:- بابا اني ممعارضتك.. ومستعده اوافق على اي انسان انت ترضاه في سبيل تقبل واتذكر بابا كل غايتي رضاك حتى لو كان هذا الشخص عدوي

مستعده اتحمل المر في سبيل ترضى عليه.. واذا ما واثق مني ومن طهارتي مستعده اروح وياك للمستشفى واخضع للفحص وتتأكد..

.... اخذ نفس وهز راسه.. وكال لخالتي.. كولي لوداد تحظر نفسها ارجعها للبيت.. هيه وهاي.. يقصد عليه..

ما زعلت بالعكس فرحت.. رحت اركض للغرفه.. دخلت وكعدت يم راس ماما.. فتحت عيونها وباوعتلي ..

دنكت بستها بنص اعيونها.. كومي حبيبتي نرجع للبيت.. لبيتنا..

تهز راسها تريد تعرف شكو.. سولفتلها هيج كلت البابا وهيج قنعته ... هزيت راسها وكامت ويايه..

لبستها حجابها.. هي تلبس حجاب الاميره بدون الكب مالته فقط الحجاب الجبير وتنوره وقميص مناسبه لعمرها.. 55 سنه عمر ماما..

كومتها ورحنا سلمنا على بيت خالتي.. وطلعنا وي بابا.. صعدت ماما يمه واني بالسياره وره..

اخذنا ورجعنا لبيتنا.. اول ما دخل كال وداد بنتج ما تصعد الغرفتها .. مكانها الغرفه الصغيره.. وطلعه للكراج ممنوع تطلع

وابن عمها اليوم يجي يعقد عليها.. واخلص منها..

باوعتلي امي وهزت راسها.. اخذتها ودخلت جوه.. خابر ابوي على مخلد.. وكاله لجين كانت ابيت خالتها وهسه ابيتي تعال..

خلص مكالمته.. اني بالغرفه دخلت.. قفل الباب عليه.. اخذت نفس.. صبرني يارب.. خليني اتحمل الزواج من مخلد..

ابعد مالك من قلبي وخليني ارتاح.. يارب يرجع بابا يحبني ويسامحني.. ما اريد شي اخر دخيلك ..

فكرت اتزوج مخلد.. ما اتحملها.. معقوله اني اقبل بي .. احس قرار موافقتي منه وكأن اعدامي..

بقيت اروح وارجع وافكر بهالموضوع.. لساعه وشوي.. سمعت صوت عمامي ومخلد وياهم..

فتحت الباب ماما.. ودخلتلي تبوس بيه وتبجي وتون وتأشر.. عود تصبرني.. جرت دموعي وياها.. وحظنتها

ابتعدت منها.. وبستها.. لتخافين ماما.. مخلد خوش انسان صح عصبي بس ..خنكتني العبره.. خوش ولد..نزلت دموعي..

ماما ادعيلي اصبر الله يخليج.. حظنتها ما كدرت اخفي اكثر.. ما عندي غيرها انفجر بحظنها..

دك الباب عمي عثمان.. وصاح يا الله..

ابتعدت عن امي.. وهي دارت وجها من عنده وطلعت زعلانه منه ما تريد تباوع بوجهه..

دخل هو.. وما اهتم الها.. كال كعدي.. مشيت للفراش كعدت. كعد هو..

عثمان:- اكو وحده مربايه تشرد بهاي الطريقه مثلج .. ما استحيتي.. وج شنو من ابنيه انتي

لجين:- شتريد اسوي عمو.. حلفتلكم ممسويه شي والله يعلم ممسويه شي.. الولد من يوم يومه يتبعني وهذا الشي مو ذنبي..

وانتو قسيتو عليه اكثر من اللازم. اعتبرتوني عار.. وضربتوني ضرب ما يتحمله الحديد..

وحتى قوة الضرب على الحديد يفله. واني فليت منكم وشردت انقذ نفسي..

عثمان:- شكد وكحه وانتي كل هذا الصار وعينج ما انكسرت .. شلون اذبحج واكسر عيييينج ..

لجين:- مو وكحه ولا تجاسرت عليك بلحظه.. دا احاجيك بصيغة دفاع عن النفس. لكن انتم برأيكم اللي ادافع عن نفسها وكحه

والي تتحمل اهاين وضرب وشتايم.. خوش ابنيه وخلوقه.. واني فكري غير فكركم

عثمان:- هينه يا لجين هينه.. لا ما ربيناج وعدنا تربيتج ونخليج تمشين على السراط المستقيم وما تميلين فلا اطلع اني عمج .. هينه.

كام مني وراح.. وصاح وراي تعاي.. رحت الهم.. دخلت للصاله وعيون مخلد تباوعنا واحس النار تطلع منها بوده يكوم يذبحني..

حجه عمو عثمان بصيغة نتر:- كعدي هنا

-كعدت..

عثمان:- هذا ابن عمج تنازل عن نفسه وقبل بيج

لجين:- تنازل بشنو.. اذا قضية يستر عليه .. ف اني ما ارتكبت العار حتى احد يسترني..

مخلد:- اكلي خ...... واللي لكيته وياج هذا شيسموه.

لجين:- هو تبعني لاربيل.. مو ذنبي..

مخلد:- لا تخليني اكوم اذبحج والله..

عثمان:- ما خربوج غير خوالج الساقطين.. باعي ولج.. نحجي واذا تردين بكلمه راسج بالنعال الدوسه افتهمتي .

لجين:- شوف عمو وهذا بابا كاعد كبالكم واحجيها كدامه.. مخلد وافقت عليه فقط حتى ارضي ابويه..

وحجيتها لبابا.. اذا يريد اثبت براءتي بفحص اني مستعده. وكل زواجي ارضاء الرغبة ابويه لا اكثر

لا غلطت ولا سويت الغلط وانضربت وانذليت بدون متسمعون مني ولا كلمه.. واللي سويتو بيه لا يرضى دين ولا اخلاق ولا منطق..

مديتله ايدي وبينتلهم السواد اللي على اديه من دفراتهم..كل هذا بذبتكم.. واذا اني مظلومه.. تطلع حوبتي

ومخلد الا لو يبقى اخر رجل بعمري مستحيل افكر بشخص مثله.. بس لخاطر ابويه اني موافقه..

بس هذه كدام ابويه احجيها لو تعرضت لضرب او اي تعنيف.. انفصل لو كان زواجي عباره عن يوم واحد..

سمعتني بابا..

مخلد:- وتتشرطين انتي.. البارحه تتوسلين واحد يرحمج وما يقتلج واليوم تتشرطيييييييين.. ما تمشين الا بالضرب تصيرين ادميه وتتربين كلبببه

لجين:- اني مو حيوان.. واليضرب ذكر مو رجال.. وان طلبت الرحمه.. لان كنتو تضربون وتقتلون بدون متفهمون مني..

...........اني كلت هيج لو عمي عمران و مخلد كامو اثنينهم.. احنه ذكر ولج مو رياجيل... كام ابوي يتصايح وطردني من الصاله بس ما خلاهم يلزموني..

طلعت.. وكفت بالمطبخ.. بقو يتصايحون.. اني ما بجيت كدامهم بس من طلعت بجيت..

لان فعلا حسيت نفسي بزواجي هذا اوكع بأديهم خصوصا مخلد مساندهم.. اتحمل منو منهم عمي لو ام مخلد لو مازن. لو منو..

حتى بنات عمي المتزوجات الساناتهن مثل الساان امهن يبث سم.. زين هاي شلون ارهم وياهم..

طلعتلي ماما مسحت دموعي وتأشرلي وتونون.. عود اتحملي ومن هلكلام.. وترفع اديها عود اني ادعيلج

هزيت راسها واخذت اديها.. توعديني تسافرين تتعالجين.. وترجعيلي محتاجتج ماما ما اكدر اواجهم وحدي وابويه ضعيف كدامهم..

بقت شمر حسرات واطبطب على كتفي.. كتلها الله كريم.. سمعناهم خابرو شيخ يجي يعقدلنا..

ساعه الا شويه اجه الشيخ.. صاحولي وكالو ستري نفسج والبسي حجاب كدامه..

لبست من ماما ولبست كلبيه واسعه عليه من ماما ودخلني عمي عثمان.. كعد الشيخ يسألني..

كال وكلي ابوج عنج.. وكلت ابويه وطلعت.. عقدو اليه.. واجه ابويه ورايه..

الاب:- اسمعي.. من اليوم ورايح مخلد زوجج شرعا.. وان شاءالله قريبا تعقدون محكمه..

شيكلج .. تكليله اامرك وحاظر.. لو سمعتج مخالفته اني من يمي اكله ايدك الك ..

لجين:- نزلت دموعي من هيج حجه .. رفعتله راسي وحجيت... شيكول وشيأمر اكوله حاظر وامرك واذا عصيت انضرب..

هزيت راسي.. طيب كولي شنو فرقي عن الحيوان.. اني اللي كل عمري علمتني امشي بكيفي.. هسه تطلب مني اصير حيوانه لمخلد يحكمها ..

الله يعرف ما الي ذنب.. واذا الي حوبه ومظلومه.. الله ياخذ حقي.. ومع الاسف انت ابويه اللي تحجي هلحجي. كنت متوقعه منك دكوله ممنوع تضربها عودها عليك.. تجيني تحجيلي هلكلام..

عفت ابويه ورحت للغرفه دا اكعد. صاح عمي عمران يله وينج.. رجعت.. كال يلا لبسي ترحين ويانا.. من اليوم انتي مرت مخلد..

لجين:- بس مو هسه اروح ..لحد ما نعقد قانوني اروح ..

عمران:- لا هسه.. وهو شوكت ما يفضى يعقد محكمه..

ديحجي وصاح مخلد.. يلا يابا خلها تجي بسرعه تره اجي اعلمها اشلون تجي..

احس كزبر جسمي من حجه... كارهه كولشي بيه.. مو طايقه اسمع صوته اصلا.. شلون راح اعيش وياه..

بعمري كله ما كرهت بشر.. بس بذاك اليوم مخلد كان اول انسان امقته لدرجة الحقد.. الانسان اللي خابص الدنيا ويكول احبها..

ما احس نفسي عنده الا حاجه ثمينه يحاول الحصول عليها بدون اي تعب وثمن..بحيله.. حتى بدون مهر او اي عرس وزواج.. بحجة عار ويكفيني استرها..

حقيقه تمنيت مخلد.. يموت بذاك اليوم.. من كد كرهي اله.. اني اتزوج الانسان اللي لزم امي حتى يخلي ابوه واخوه يضربوني..

اني اخذ انسان ذكر مثله .. واهوج وهمجي.. ليش شنو سويته حتى استاهل مخلد..

صعدت لغرفتي.. دموعي نزلت.. كولشي بيه يريد مالك.. قلبي حظني .. مسامعي.. حابه اسمعه وارتاح. حابه اخلي راسي على كتفه واحس بالامان..

احبه مو بيدي الرجل اللي استقتل عليه لاخر لحظه وما تهور واستخدم غير اسلوب وجاب ناس لخطبتي ويكولهم مستعد اخلي مهرها 100 مليون بس انطونياها..

غير هذا الهمجي اللي اخذني بالحيله واستغل موقف ضعفي وهو يعرف اني بريئه.. واخذني غصب وبدون حتى اي مهر وكأني مو انسانه..

كأني بهيمه وساقوني لمخلد.. بس اني اعرف شلون اعلمه ان اني لجين.. مو بهيمته..

جريت جنطة سفري السابقه.. طلعت منها شسواري ومكياجي.. لبست اوفر احمر طويل.. وعليه ستره سوده تلث ارباع الردن.. وياه حذاء كعب عالي اسود...

شسورت شعري بسرعه.. وخطيت مكياجي.. وجهزت نفسي على اتم وجه.. فقط حتى ابين لمخلد.. ان هو مستحيل يكسرني.. ما اسمحله..

رشيت العطر.. وهمه خلصوها صياح وياله ووينج راح اصعدلج.. لميت كل غراضي بجنطة سفر طلعتها بالممر نزلوها..شلت الجنطه صغيره سوده وخليتها بعكس ايدي..

ونزلت اضرب بالكعب على الدرج.. من شافوني سكتو.. اول شي رحت سويته.. بست ماما وكتلها لتخافين عليه.. تعرفيني بنتج كدها..

كانت دموعها بعينها.. هزت راسها.. حظنتها حيل.. وكتلها لخاطري تسافرين ترجعين صوتج.. احتاجج والله . سلمت عليها وطلعت..

رجعت طلعت الهم بالصاله.. اول ما دخلت. شمرت شعري ورى.. وكلت بابا اني جاهزه..

ديريد يحجي بابا.. سبقه مخلد

مخلد:- ما اخذها بهاي الملابس تروح تبدل غيرها..

الاب:- وشبي لبسها مستور كلشي مابي ..

مخلد:- كلت تبدل ملابسها وتلم شعرها بسرعه

ما رديت عليه.. بقيت اعدل بشعري والعب بي لان مشسور ناعم ... خبلته واني اعرف اندق مني مو من ملابسي بس لان بدلت.. كل همه يكسرني بحبه الاناني والجشع..

ابوي ما قبل وكاله ادير بالك عليها.. واذا متريدها ومتريد اطباعها احجي هسه افصلها عنك وانطيها للي رادوها..

ما تحمل بسرعه طلع من البيت.. وكفت كبالي ابويه .. بست راسه.. كال الله يرضى عليج..

رضاتي من رضات زوجج وسعادته.. صح بسرعه بسرعه وبدون عرس.. بس هذا كان عقابج على اللي سويتي..

حظنته وكتله اهم شي رضاك بابا.. طلعت ويا بابا صعدني سيارة مخلد وره.. وصعد جنطتي ..

امي وكفت بالباب تلوحلي بايدها وتبجي.. دمعت عيوني بس ما بجيت.. كوه اكابر ما اضعف كدامهم

شغل مخلد السياره وابوه يمه وعمي عثمان بسيارته .. مشى بالسياره احس انسلبت روحي..

همست جمله وحده...مالك احبك.... وكأني تركت قلبي واحساسي ابيت اهلي واجيت مع مخلد جسد لا اكثر..

كل عقلي وروحي وقلبي يم مالك.. اتمنيت يعترض طريقنا ويجي يصيح انتي الي.. تمنيت ياخذني من الموت اللي رسمته النفسي بمخلد..

تمنيت يجي مالك ويكسر عين مخلد اللي احسه يشتعل نار فقط لاني بدلت وعطرت.. و حس انو دا اتحداه..

وصلنا لبيتهم.. اتذكرت هروبي منه البارحه ورجوعي اله اليوم.. صف السياره ودخلها للكراج مال بيت اهله..

نزلت شفت الباب الحديد جامه مكسور.. عرفت هو كسره وفتح القفل البارحه وراي.. بعدني دا اباوع..

لزمني من ايدي وسحبني حيل.. ومشى.. اريده يوكف..يمشي بكل قوته.. حسيت راح اوكع..

دخلني من نص اهله وصعدني للغرفه فوك.. جر علدرج يصعدني.. وصلني لغرفته.. شمرني بالكاع حيل..

تكومت وتكسرت.. تقرب يمي.. ولزمني من شعري.. ويكولي

:- مو اني اللي ينلعب وياي هيج.. ذبح اذبحج فهمتيييييؤؤي..

ما رديت عليه..

من شعري وقربني اله.. ويصيح..

مخلد:- شحجي وشنو اكول.. اسمع الحاظر منج والا تشوفين وجهي الثاني..

لجين:- ليش بعد اكو اقبح من هذا وجهك.... فتح عيونه حيل.. ورفع ايده راد يضربني.. خليت اديه فوك راسي ودنكت احمي نفسي منه .

لزمني من ركبتي ويكلي الا اشوفج القباحه على اصولها.. وشمرني للكاع.. وطلع..

حجيت.. الله ياخذك ويخلصني منك.. شلون بشر.. الله يخلق واحنه نبتلي.. تفوووو .. تفلت وراه..

كمت على حيلي.. باوعت غرفته على حطة ايدي.. هوسه تلعب النفس.. وعباله انضف.. يحلم.

نزعت الستره شمرتها على السرير..بقيت بس بالاوفر.. باوعت بالمرايا.. جسمي مبين الضرب بي.. جان الاوفر بلا ردن ولا حتى رافعات ايد..

لحد الصدر.. وينضب على الجسم بسحابه من ورا.. تركت بلا ستره وبقيت افتر بالغرفه..

غرفه مال نفر واحد.. ونص بيبانها مكسره وهدومه مكعوره بالكنتور بس مال الطلعه معلكات..

والباقيات مو هدوم عبالك عربانة لنگات.. السرير نفر.. الكاع. حصير ويمكن صارلها شهر ممنظفه ..

غرفه لو زباله.. بس يلا هو الزباله للزباله.. تلوكله غرفته.. وعباله انظفله.. يحلم..

دا احجي.. طب.. فزيت بسرعه للستره اخذتها هو دنك عينه ودار وجهه.. لبستها.. رجع باوعلي وتقرب..

مخلد:- لتحاولين تلعبين وياي هاي سوالفج. لو مو تنزعين ستره.. لو تتصلخين.. وحده سزز مثلج مستحيل اباوعلها..

لجين:- الله..ههههههيي.. العب وياك.. ... دطلع حباب هوايه واثق بروحك..

مخلد:- بالقران اذا ما ربيتج..وعدت تربيتج.. فلا اطلع اسمي مخلد..

لجين:- رفعتله حاجب..براحتك..هو كلمن يعامل زوجته حسب رجولته..

في اللي فاقدها بره وميكدر يتلاوى وي الرياجيل.. ف يجي يسترجل عليها لانها ضعيفه ومتكدر ترده..

و في سيد الرجال بينهم.. وضعيف امام زوجته لانها ضعيفه.. وانته حدد

ضربني راشدي.. ...:- اني اعلمج شلون تصير المراجل..

طلع بسرعه...اخذ نفس.. مو لازم اضعف ابد.. ان لم تكن ذئبا اكلتك الذئاب.. مو لازم اضعف..

حبست العبره بداخلي وما طلعتها .. رجع دخل الجاكوج بيده.. تراجعت وره.. هذا شيريد يسوي..

تقرب مني.. واني اتراجع.. عثرت بالجراره ولزمت بالكنتور.. وابتعدت عنه.. دنك للجراره ويحاول يخفي ضحكته..

اخذ بسامير وبراغي ودرنفيس.. وراح للباب.. كعد يسوي ويعدل القفل الكسرته بليل ..

هبطني الله ياخذه.. عبالي صار ابو طبر ..
من الهبطه كعدت ع السرير.. هو على يساري.. دايره وجهي عنه..

كام يضرب بالباب بالجاكوج.. والصوت قوي.. درت وجهي اباوعله.. دنك ياخذ بسمار.. وباوع..

درت وجهي وباوعت على الشباك.. ياربي حتى وجوده يمي كارهته.. احس اريد اتقيئ وهو موجود.. شلون راح اتحمل.. هو وغرفته الهرجه..

حتى لو فصليه.. على الاقل يخلوني بمكان نضيف مو هيج .. ماخذني خاوه ابن كرجيه..

رجعت اتذكر شقة مالك من دخلتها.. تلمع من النظافه.. مو مثل هذا الوصخ.. كمل دتثبيت القفل.. وحجه..

مخلد:- ما اوصيج لليل فكي وشردي.. صارت مهنتج هشغله.. خبره دبلوم بيها..

لجين:- لو لكيت اليفهمني ليش اهرب.. بس اذا مناسبني.. لو مو باب.. لو تحط فولاذ هم ازرفه واطلع منه.. خل يكون بعلمك

اجه جرني من ايدي ووكفني كباله.. البارحه جنتي هنا.. بنفس المكان تتوسلين مخلد ابوس ايدك لا تذبحني وهسه يطلع السانج

تره ما ناسي والقران اسمع صوتج.. راسج افجره..افتهمتي..

لجين:- سحبت ايدي منه وما حجيت.. تركني وطلع وقفل الباب.. تمددت على السرير.. الله ياخذك ان شاءالله واخلص من شي اسمه مخلد بحياتي.

بقيت متمدده على ضهري وافكر بهلوضع.. شيصير لو ماخذه مالك.. تنهدت.. اللي يصير كان هسه اخذني بين اديه وسرقني لعالم بعيد عن مرارة هلحياة..

كان هسه اسعد انسانه بالكون.. غمضت عيوني وصرت اتخيل همساته وعطره وهو قريب مني.. انداريت على يميني وباوعت للسرير..

شيصير لو هو هسه هنا يمي.. احتاجه واحتاج كلشي بي همسه وحبه وعالمه ورومانسيته وحتى جنونه..

اوووف يجنونه هو اللي وصلني لهذا المكان.. بس العجيب اني عاشقه حتى جنونه.. احس حبه الي مختلف..

مستقتل عليه بطريقه ما اعرف كيف اوصفها.. كتل نفسه بالحلال والحرام. اجه من الباب والشباك.. ورغم هذا ما حصلته..

تركت اللي كان مقدرني.. ومستعد يوفرلي كل الحياة اللي احتاجها.. وصرت الواحد.. ما كلف نفسه ملابس ولا حتى غرفة نوم..

دا افكر.. قطعت سلسلة افكاري عمتي كرجيه وهي اطب الغرفه.. كعدت على حيلي..

باوعتلي من فوك ليجوه.. وحجت..

كرجيه:- عبالج راح تغرين ابني بلبسج هذا..

-مرديت عليها.. بقيت اسحب شعري على صفحه ومدنكه راسي..

-كومي يلا.. نزلي نضفي المطبخ وي مرت مازن بسرعه..

-ما تحركت...

-مو احجي وياج..

-اسمعيني عمه.. هنا اني مو خدامة احد.. لا تبقين تتأمرين عليه وانتو ماخذيني حالي حال الفصليه..

قبلت فقط حتى ارضي ابويه.. ورضا ابويه كال برضى زوجج.. ف واجبي ارضى زوجي مو انتو..

-تكومين لو اكسر راسج والله.. بسرعه يله..

-هيج وضع ما اتحمله ابدا.. ما اقبل بيوم توكفين وتصيحين عليه.. اني لجين اللي ابنج سنين وهو يحلم اصيرله..

وهسه اخذني خاوه بدون اي احترام ومتحمله وساكته لخاطر ابويه.. تجين تزوديها رجاءا ما اسمح.

ولو تعديتي حدودج.. وضربتي لو حاولتي تأذيني. راح اروح اشكي مثل ذيج المره وعود برري تعاملج يم ابويه..

خلي شغله ابالج مو اني اللي اصير چنه..

-طبعااااا تربية قنوات حالج حال الساقطات الماينكدر اليطلعن بالتلفزيون يضربن بالرياجيل وانتي تربيتهن..

-درت وجهي منها وما رديت عليها.. بقت تعد وتسفط ساقطه ام الرياجيل ام القنوات هيج وهيج اهل القناة سوو بيج .. وفشار مقرف...

لعبت نفسي شلون راح ابقى وياهم.. ما اعرف.. طلعت تصيح بالممر.. قفلت الباب وراها.. وهي زادت صيح تطردني من غرفة ابنييييي

بت وداد الساقطه تطردنيييي.. ولا اهتميت.. سمعت مرت مازن تحجي وياها وتكلها عمه صوتج فدوه بس نزلي..

بعدين خابرت مخلد.. تكله تعال شوف هاي الساقطه طردتني من غرفتك.. تعال تقبل هاي تطردني من بيتي..

هزيت راسي.. اوف بابا هذوله اهلك الذبحتني بيهم حتى اوافق.. تعال شوفهم وشوف همجيتهم..

ما عجبك مالك.. حسيته عصابجي بس ما عجبوك اهلك وانت كولش زين تعرف همجيتهم..

نص ساعه وسمعت صوت مخلد يصيح جوه ويكلها يمه تحملي بس هذا الايام على ما اجر بيت بالموصل واجيبها..

هي سمعت هيج لو تخبلت.. بقت تصيح.. تنتقل للموصل يعني ما تنزل كل 20 يوم وتجيني.. باكتك ام القنوات..

هاي ام الرياجيل اللكيتها بالفندق وي صاحبها تسويلها بيت.. خبصت الدنيا واني فوك بس اسمع..

صعد هو فاير دمه راد يفتح الباب ما انفتح.. كام يهز باليده حييييل ويدك على الباب.. فتحتله.

لزمني من شعري .. تقفلين الباب بوجه امييييي..

-ما قفلته هي طلعت وقفلته وراها..

-ضربني راشدي.. ويكولي كذابه عاهره تهينين اميي... كام يدفر الكنتور برجله كسره تكسر..

لزمت جنطتي.. وكفت كباله.. رجعني لاهلي مو متحمله هلعيشه ابد.. وقت اللي تكمل البيت بالموصل عود اخذني..

اتقرب عليه ويصيح شلووووون ولج.. لزمني من هدومي حيل.. ما تتحملين موو

-بجيت.. مخلد الله يخليك كافي .. بعدت ايده.. حرام عليك.. محد متأذي بكدي.. اذا انت تعرف مالك فتعرفني ما اكدر اردعه..

واذا حبيته فد يوم.. ف اني بعت كلبي اله حتى اشتريك.. كل همي كان انت ما تتأذى..

لو اني انانيه كان تركتك بين اديهم وشردت لغير دوله.. لو اني عاهره كان من زمان قدمت نفسي..

ولو مقدمه نفسي كان ما اجه ولا خطب ولا جاب ناس.. عمري ما ذليت نفسي لاحد.. واحاول احل كلشي بسلام في سبيل اعيش..

ابتعد مني ارجوك.. متتحملتي اتركتي .. عاهره بعينك ممجبور تسترني.. جبروتك وقسوتك عليه دمرتني..

لو ما انت يمكن اني اليوم عندي اثنين اطفال وعايشه اجمل عيشه مع عائله ممكن تكون عائلتي ..

لا تظلمني اكثر وانت اللي دمرتني.. ابتعد مني ارجوك.. تعبت منكم والله تعبت... دنكت ابجي..

اجه لزمني من ايدي.. شلون يعني بعتي گلبج في سبيل تنقذيني..... ما رديت

-جاوبي لا تحركين اعصابي..

سحبت ايدي منه.. وخليتها على وجهي ابجي..

-تحبينه مووو .. احجيييي لا تسكتين تحبينه موووووو..

-هزيت راسي اي.. ضربني على راسي وكعني للسرير وطلع وهو نار..

بقيت ابجي بالغرفه.. لحد ما غفيت.. ما فزيت غير بليل حيل.. باوعت الضوه مطفي...كمت من مكاني بطني مصفره فد.مره من الجوع..

فتحت الباب وباوعت جانت اكو ساعه بالممر.. ساعه 2 وثلث.. رجعت للغرفه..الجنطه مالتي جانت مدخليها الغرفه..

فتحتها.. طلعت تراك منها ولبسته.. اكو لاستيك مال فلوس بجرارة مخلد شفت.. جريت ولفيت شعري..

ونزلت.. كانو مطفين الاضويه.. رحت للمطبخ شغلته.. فتحت الثلاجه.. بيها دجاج مشوي مال مطاعم.

تلعب نفسي منه اذا بارد واكله.. يصير زفر.. لو بحرارته لو ما اخلي بحلكي.. لكيت بواكيت جبن.. اخذت شيدر..

وقصصته بالماعون.. وبقيت ادور على الجاي وينه. قتحت الكاونترات ماكو الخانات.. لكيته مخلينه ببطن الفرن مال الطباخ..

غسلته وخليته على النار.. حسيت اكو خطوات وراي.. درت وجهي مخلد كبالي.. فزيت.. وخليت ايدي على صدري..

درت وجهي عنه. ودا امشي.. حجه :- تحبينه مووو

تنهدت.. استغفرك يا الله.. لزم ايدي.. ودارني اله.. شنو البيه ما يعجبج..

مخلد ابتعد..

-مو رجال ليش.. لان احبج

-الحب مو هيج مخلد.. الدتسوي ظلم مو حب.. اتقرب اكثر.. ابتعد ارجوك..

-رجلج اني

- ورق وبس كل احساس ما عندي وياك.. ارجوك ابتعد.. لزمني من ركبتي ويصك على سنونه..

-لو هو جان فرحتي مووووو ...

-مخلد دتخنكني.. ابتعد..

-اذبحج ومتصيرين لغيري افتهمتي.. مجبوره تقبلين بيه... افتهمتييييي......يتبع

☆☆☆☆☆☆