بقلمي
الكاتبه غدير الحيدري
.....
رجعتلكم عمتكم
وجايبه وياهه كلام هواي
تابعوا يلا
...
الجزء الثاني...
متاهات
....
لعينيك حكايه
عجز القارءون عن فهمها
لنظراتك كلام
سحر الروح ومالت في رسمها
لكل شيء بك لغز
قد حير العارفين
ايا امرأه تحمل من الحب اكوام
هبي علينا بنسائم الشوق
لنسقي جفاء الاعوام
لنضيع وسط الزحام
لتأخذنا الايام بعيدا..
والملتقى في حضنك!!
.....
عيوني مادحكت
ولا راح تدحك هيج جمال
مو حرمه
تكول حمامه ومهزومه من الجنه
نظراتهه عيونهه خوفهه
اخذتني بسحر
تدحك مستغربه
الحواجب ثخينه
الرموش سيوف
والخشم مرتب
يول الشفايف تكول حلقومه
هاي مامخليه قطرة مكياج
وماشايله شعرهه
ولابسه اسود وتعبانه
وادحك هالجمال
عجل لو تتكشخ
وتتسردح جدامك
يول هميم هالفختايه طيرت العكل
هالجلمات تدور بعكلي
وانه ادحك بيهه
وهي تدحك خايفه
حركنه السياره
كالت
نسم:انتو منو؟
ول يابه شهالصوت
جنه ترنيمة ناي
كال ابوي
نائل:احنه هلج وانه عمج
باوعت بخوف
واشرت عليه
نسم:هذا منو؟
كلت
همام:انه ابن عمج عجل شبيج
التفتت ع عزام
ابن عمتي
نسم:وانت منووو؟
عزام;هههه انه ابن عمتج
بقت تدحك وتخوزر
مو حرمه تكول حوريه
عجل هالنسوان شتاكل وهيج جمالهه
شو صبريه بوم ومهزوم من بيتو
كالت
نسم:نزلوني هنا اني ماعندي اهل
نائل:عجل بنيتي شسالفه
نسم:دااكول نزلوني هنا
صارت تزكح (تصيح)
ماعجبني تصرفهه
كال عزام
عزام:بنت خالي كولي ياالله واهدي
نسم:انت تسكت اني ماعندي اهل ومااعرفكم ولاا تعرفوني نزلوووني يلا
زكحت بيهه
همام:نصي صوتج يا حرمه عجل ما تخجلين احنه هلج ان رضيتي وان مارضيتي وانتي بنت عمي عادل
خزتني وزكحت
نسم:يا عادل هذا؟ اللي مااعترف بينه اسسسكت وانت الثاني نزلني هنااا لك نزلنييي
اعصابي اشتعلت
تخزر وتزت جلماتهه مثل السم
جريتهه من زندهه بقوه
مو حرمه صاروخ
همام:اسمعيني ياحرمه عدل انتي تطاولتي ع الاسد اللي محد يزكح بوجودو وخليتي عينج بعينو والله بعالي سماه اعيد تربيتج فاهمه
دفعت ايدي وكالت
نسم:انت منو حتى تلزمني هيج ومنو حتى تهدد نسم سوالفك تمشي بالغربيه بس ماتمشي يمي
همان:لجن انتي ما ناويه تن...
كال ابوي بعصبيه
نائل:يابه همام عيفهه حكهه اعوام مرت ماعرفناهم مو بالسهل تتقبل وجودنه
سكتت
وهي دارت وجهه
رافعه خشمهه واعصابهه ترجف
شكلهه معصبه
اول مره حد يخلي عينو بعيني
شنهو من حرمه هاي
ماينلام اللي طلكها
بس يابه جمالهه يسكت شيوخ
مشينه مسافه
وهي صارت تمسح دمعاتهه
ول اوف حتى دموعهه تكول لؤلؤ
كلت
همام:عزام وكفنه هين انزل اخذ كم شغله
عزام:انزل ابن الخال
تمشيت لمحل
اشتريت منو ماي وعصاير
وكيك وجكاير
ورجعت
فتحت الباب من يمهه
قدمت الهه بطل مي
خوزرت
نسم:خييير منو كلك عطشانه
ول يابه العيون
حمحمت
همام:احم غسلي وجهج واشربي ورانه طريق طويل يول بعد جثير يلا نوصل
اخذت المي مني
وغسلت وجهه
سديت الباب
وصعدت
ادحكهه تمسح وجهه بعباتهه
لكفت عزام يدحك بالمرايه عليهه
نترت
همام:يول عزام خلي عينك ع الطريق وحرمتك تنتظرك
عزام:ههههه كلنه عدنه حرمه تنتظرنه
اسمع هالحرمه تدردم
وتلف طرف عباتهه بأيدهه
نسم:وين عفتني سيروان لك هيج تتركني اني غبيه شطلعني شطلعني
دحكت بيه
دارت وجهه بضوجه
عجل ماتحترمين الاسد
الا اكضبج يحرمه
طريق طويل
وانه اتصفن عليهه
اكلتهه بنظراتي
عجل هالجمال تتطلك
ياوسفه مطلكه
هي تدحك مستغربه ع الصحاري
وخايفه ومكتره روحهه يم الباب
الخجل والمستحه حلو بيج يولي
كال ابوي
نائل:انه يبنيتي ماادري بيج ولا بحالتج ولو عندي علوم ماابقيج دقيقه
نسم:ليش كل هالسنين وين كنتوا ليش ماسألتوا لو هسه صرتوا اهل
نترت
همام:عجل انتي ماتكنين (تهدأين) ول يابه مو لسان نص اخمس
نائل:عيف البنيه تحجي اللي بداخلهه
همام:ياب اكلتنه وشربتنه
عزام:لتعتبروه تدخل مني
كلت بأنزعاج
همام:كول يا عويزم
عزام:حكهه باللي تسوي عجل تاركيهم كل هالسنين وتريد تسكت وما تزت (تذب) الحجي يابه زين ما زتتنه من السياره
باوعتلو وضربتو ع ركبتو
همام:عجل ما تكوم تزتنه انت ادحك بيك جثير متونس بهوستهه
عزام:انه اكول الحك
همام:سوق وانت ساكت احسن
نائل:اثنينكم تسكتون ومعليكم
اجانه الاحسن
سكتت
كال
نائل:اسمعي نسم عمو اخر مره اجينه نطمن عليكم قبل سنه خالج دار وجهو وما استقبلنه وكال انتو بخير وما تحتاجونا شنو اللي نسوي؟ وابوج مسافر ماشفنه وجهو من سنين
كالت بصدمه
نسم:شنو يعني ابويه مو بالعراق؟
نائل:من سنين هو مو هين
شفتهه انقهرت
بقت تدير وجهه
ماادري شنهو السبب اللي خلاني انقهر
مر وقت طويل
ووصلنه للانبار
ماتزال ترتعد وضايجه
وكفت السياره
ونزلنه ادحك بيهه ما نزلت
رحت وفتحت الباب
همام:يول تردين حد يفتحلج الباب
نزلت
وهي تدحك بيتنه وع المنطقه
احس بيهه كأنما بغربه
جثير جذبتني نظراتهه
وانه واكف كدامهه مصكوع
الضخامه والطول
كأنما شيخة عرب
عدهه شموخ حيرني
دحكت بروحي
شبيك هميم شنهو الجرالك؟
جنك ما شايف نساوين
ولا عبرن عليك جثير منهن
كالت
نسم:شبيك صافن شو وخر هيج
همام:مو حرمه لسانج مايدخل حلكج
مشت ورا ابوي
ودخلنه للبيت
هالنسمه منصيه وتمشي بحذر
غريب امرهه مره كويه ومره فقيره
شنهو الوراج بنت العم!؟
...
نسم
الحياة ورتني هواي اشياء
اولهه اهلي اللي مااعرفهم
اهلي اللي توني شفتهم
ورغم العركه والهوسه طول الطريق
حسيت بمعنى السند!
ولمحت خوف وامان بعين همام
وفكرت
هذا يكدر يوكف بظهري ومايخلي
عمر يقربلي
ينفيهم مبين من شكله وضخامته
اسلوبه ويايه كان قوي
يمكن لان اني طلعت لساني
نظراته طوله ضخامته
يحسسني يمه نمله
وعيونه من تلتقي!
ضعف العالم يوكع بروحي
انتي دومج يا نسم هيج
نظره ماتتحملين
بس الحياة اكبر واقوى
اقوى من ان تعوفج ضعيفه
وصلنه للانبار
بداخلي مزيج من احساس مبعثر
واحس صوت يهمس بفكري
وين رحت سيروان
مدري ابجي ع عملتك
مدري ابجي من خوفي
شحيسوولي ذول
وشلون راح اعيش وياهم
نزلت
عمو نائل يمشي لكدام
هو واللي اسمه عزام
وهذا همام يمشي بمحاذاتي
وكل شوي مباوعلي بطرف عين
ازعجني هواي
هو وضخامته
رجال لو مصارع؟
اباوع للبيت
باب مفتوحه
جهال يلعبون بالباب
والداخل حديقه جبيره
ع جهه اكو كن دجاج
ومرجوحه بالطرف الثاني
وبنص الحديقه قصر جبير
بابه هم مفتوحه
دخلوني من المطبخ
جبير وحديث
بي نسوان ثنين يشتغلون
وحده جبيره شكلهه عادي
والثانيه اصغر
كال همام للجبيره
همام:صبريه ورباب تعالوا هين استقبلوا بنت العم
اجت اللي اسمهه صبريه
تبوس وترحب بيه
ورباب كذلك
واني بادلتهم
عمي كال
نائل:تعالي دحكي منهو المنتظرج
دخلت جوه
امشي ببطئ مستغربه
صارت كدامي مره عجوز
لافه شيلتهه
ولابسه ثوب نيلي منقش
وتفر بالسبحه
عقدت حاجبي
وباوعت لعمو
ابتسم وكال
نائل:هالحجيه هاي بيبيتج ام ابوج الله يحفظهه
تباوع بوجهي صافنه
واني كذلك
سمعت صوت همام
همام:سلمي ع الحجيه
تقدمت
واتذكر روحي طفله
من طلعنه من هالبيت
اللي كان عباره عن غابه
وبيبي واكفه بالباب
واجت ببالي امي
ومعاناتهه
خليط من مشاعر غريبه
ولو بيدي
مااعترف بهالناس
وصلت يمهه
نزلت للارض
لزمت وجهي وابتسمت
كالت
الحجيه:عجل يمه الخلف ما مات جنهه زمرده
دمعت عيوني
بوستني كالت
الحجيه:اخوهه سيروان وينه ما دحكته وياكم
اجه عمو وكعد يمهه
وصار يحجي وياهه بهدوء
اسمعهه كالت
الحجيه:بعد ما نزتهم هناك ما صدكت الكاهم
صفنت محتاره
فزيت من صفنتي
شفت همام يدخن
ويباوعلي
بربك ما توخر مابيه حيلك
اللي اسمهه رباب
تركض وره عزام
وهمام يضحك
همام:الحكي ترا عويزم ماينسكت عنه عجل اكل البنوات هناك بعيونه شهرنه المايستحي
عزام:هو منهو المايستحي ابو بطل المي لو اذكرك
شمر عليه بطل ماي
كال عمي نائل
نائل:عجل بويه خلينه نكعد..صبريييه خلي الاكل وانتي ربيبه ساعديهه
اني اباوع وساكته
بس احس بخنكه
كالت بيبي
الحجيه:يمه كومي ارتاحي بدلي حضرنالج غرفه هين
تأشر ع غرفه بالداخل
باوعت
شبدل واني ملابس مجايبه
كال همام
همام:اااحم رباب
رباب:ها خويه
همام:انطي لبنت عمج شي تلبسوا لان جت وماجابت وياهه ملابس
رباب:اي تدلل كومي خيه
كمت
واخذتني للغرفه
بيهه سرير واحد
وكنتور مرتب
مبينين اهل خير
ولو ما عشت وياهم هواي
غير طفوله مره
طلعتلي دشداشه
ذبيت العبايه
باوعتلي وضحكت
رباب:لا تزتيهه بوجهي انه ماالبس غير دشداشه
نسم:لالا عادي اني هم
رباب:بس يمكن راح تطلع عليج كصيفه لان انه ضعيفه
نسم:هاا..عود اخلي العباة فوكاهه
باوعتلي
بعدهه كالت مستغربه
رباب:عجل منهو الغريب انه بنت عمج نائل وبيبيتج وصبريه وهمام وامي بيت خوالي واذا عن رجلي عزام داياكل بالمطبخ راح يروح للبيت لان تعب
هزيت راسي
كالت
رباب:يلا حبيبه اخذي راحتج
طلعت
وسدت الباب
كعدت ع السرير
والدشداشه بيدي
يلعن حظك سيروان
لو الزمك املخك وماتبرد ناري
وين جبتني
ساعدني يا رب
اباوع ع الدشداشه
لونهه ماروني طوخ
مبينه كصيفه
شلون البسهه والله عيب
اخلي العبايه ع كتفي احسن
او انام مااريد اكل
اصلا لعبانه نفسي
بدلت وباوعت لروحي
حلوه حيل عليه
بس خجلت من ملامح جسمي
وبقيت كاعده ما طلعت
اجت رباب
لكتني كاعده كالت
رباب:احنه نتنطر جيتج وانتي هين راكده
نسم:هااا موو.
ماخلتني اكمل
فتحت الباب
وجرتني
وهي تحجي بصوت عالي
رباب:مستحيه نسم حبيتهه والله
باوعت
شفت همام صافن
وعيونه تاكل جسمي اكل
حسيت بخجل جبير
بيبي مدت ايدهه وكالت
الحجيه:تعاري حدري يم جدتج اليوم احس زمرد زايرتنه
كعدت يمهه
وفارشين سفره جبيره
كلهه اكل ولحم وخبصه
صبريه كاعده مبينه تعبانه وضايجه
كبيره بالعمر
مااعرف شتقرب الهم
كاعدين يمهه بنات ثنين صغار
حلوات ويضحكون
همام كاعد يم عمو نائل
ورباب متربعه يمي وتاكل
خواشيك ماكو!
والكل تاكل بأيدهه
حسب اللي سمعته
الاكله اسمهه دليميه
تمن ولحم وثريد
دغتني رباب
رباب:اكلي لج هذا انه سويته
نسم:عاشت ايدج بس ماكو خاشوكه!
همام رفع راسه
باوعلي بنظره غريبه
وبيبي كالت
الحجيه:سبحان الله مثل امهه من جت لهين عروسه
نائل:مانلومج يابه بغداديه
نصيت راسي
نسم:لا عادي راح اكل مثلكم
رباب:عجل الخواشيك ليش مصنوعه غير حتى ناكل بيهه بس لتستغربين هين هالاكله هيج تنوكل
بلعت ريك
كامت
وجابتلي خاشوكه
وكعدت اتصارع وي الاكل
اكلت شوي
انتبهت وشفتهم يباوعون لأكلي
يمكن مستغربين
وعمو نائل يضحك
صبريه ولا يمهه توكل جهالهه
وضايجه
لسه ماعرفتهه عدل
كملت اكل
شربت شوي جاي
بعدهه استأذنت ورحت للغرفه انام
متعبه وكدامي طريق طويل
لازم اتعلم ع هذي الحياة
ومرت الايام
وادركت
ان الدنيا تدور
هي قسمه!
....
البصره
نمر
دخلت للبيت
ساعه 1
مجرد ما شفت غرفتهه
اجاني احساس وجع
اجيت افتح الباب
سمعت صوت هديه خلفي
هديه:حبيبي شمالك كل يوم داخل لهالغرفه خيرك
التفتت
وجليت صوتي
نمر:ماكو شي بس عاجبني ارتاح بوحدي لان شوي تعبان
اقتربت
ووكفت كدامي
منصي راسي
مااكدر اباوع بعينه
اللي مستحلتني مدا تطلع
سحبتني من ايدي بهدوء
واخذتني للغرفه وهي تسولف
هديه:وين راح ذاك نمر اللي عاشك هديه جا ليش احسك ما تريدني
حوطت ايديهه ع ركبتي
باوعت بعينهه
شفت سه لار
بعدت ايدهه
نزعت دشداشتي
تمددت بالسرير
وبعدني اتذكر ملامحهه
واصفن
شني حالهه هسه؟
شداتسوي بين كومة مخابيل
ساعدني وساعدهه يارب
حسيت ع هديه تدردم
ماعاجبهه وتحجي بصوت خافت
هديه:انه كل يوم البس واسوي واحضر وما يعجبه يجي ناطيني ظهره جا ليش تزوجتني
غمضت عيوني
اجت تحجي وياي وانه مغمض
بقت تلح
دفعتهه وفرشت لروحي بالكاع
وغطيت راسي
اريد انام بس مااكدر
عذاب ضمير وخنكه
واحس ربي غاضب عليه
مااكدر اطلعهه من راسي
شكلهه نعومتهه تصرفاتهه
انه شلون ضيعتهه؟
شلون قبلت ع روحي اسوي هالشي
ياربي سامحني غلطه
ماكنت صاحي ماادري
هسه اتذكر ذيج الليله لحظه بلحظه
واتمنى سه لار يمي
حرمتي كدام الناس
وانتهي من هالعذاب
واخلص من غلطي
مر وقت وانه اتكلب
هديه نامت
فزيت
اباوعلهه غركانه بالنوم
انتي شنهو ذنبج تزوجتج وعفتج
شنهو ذنبج اتخيلج سه لار
وسه لار شني ذنبهه
كاعده بمستشفى
وبس الله اليعلم بحالهه
خاله ماتت بسببي
وامي ماتحاجيني
ربي منك الرحمه
شلون اكفر عن ذنب ارتكبته بسهو
طلعت برا
كعدت بالحديقه
اباوع ع المكان اللي حصرتهه بي
اجر بجكارتي
مو الجكاره التنحرك
لاا روحي
اتذكر شكلهه سوالفهه
ربي طفله وثوله
ماتنتبه لروحهه لجماليتهه
وانه بعد عملتي مااتسمى شيخ
انه شيطان
سويت هج ودمرتهه
برائتهه وخوفهه
ضحكهه وكمزاتهه
هسه شصار بيج يا روح نمر
مااكدر اطلع روحي من السجن العايشه
ولا اكدر اطلعج
تهت واحتاريت
كون اخليج يمي
وامسح راسج بأيدي
اخلصج من دمارج
باوعت لأيدي
يادمار اللي اخلصج منه
وانه سببته الج
ايدي اللي مفروض تسندج طيحتج
وكتمت صراخج
خليت ايدي ع راسي
مدمر وتعبان
احس عقلي راح ينفجر
عاشرت الكل
ومتأكد من نفسي
ابن شيوخ مااغلط
لو اعاشر يهودي ماانحرف عن مبادئي
جا شمالني طحت
شمالني اذيتج بغلطتي
ما تحلى بعيني حرمه غيرج
خليت ايدي ع وجهي
مسحت دموع متناثره
دموع تتكلم عن ندم وقهر
مو بس غلطت بحقهه
غلطت بحق نفسي هم
سويت كارثه بروحي
لا انه طايلهه
ولا مرتاح وي غيرهه
صعدت فوك
وجرني الشوك لغرفتهه
كلشي بمكانه
عطرهه ع المرايه
شميته واحس روحي تاهت
شلون راح تتقبلني بعد كلشي
شلون راح تعيش هيج
بقيت اتصفن
حاير وتعبان
كلهه ترن براسي
ضحكهه نكاتهه
تلاعب الهوى وصغيره
بس الغلط مني
انه محسوب الجبير
رجعت لغرفتي مثل كل مره
ذنوبي كثرت
والم يختاض بروحي
لا انه كادر ارجع
ولا استمر
واكف بالنص
سمعت صوت الاذان
اخجل التقي بربي بعد عملتي
بس يلا نمر الله يسامح
صليت وحسيت بذنوبي
حسيت بحقارتي
انسان مهزوز ضيع كلشي من ايده
باوعت للسما
ربي حاير عذبني الي
وخر العذاب عنهه ما تستاهل
الذنب ذنبي خدعتهه
اخذت ملابسي
سبحت وبدلت
وتوجهت لبغداد
ماعادت ارض تلمني
ولا شي يحويني غيرج
امنتي بيه وطيحتج
انه اللي استاهل الدمار مو انتي
طريق طويل خلصته بالصفنات
ماطلعت من بالي لحظه
تكعد يمي تهوس وتصفك وتضحك
شلون راح تكونين بعد كلشي صار
امج ماتت بسببي
راح تطيقين تشوفيني؟
راح تجمعني الايام بيج
لو ابقى محتار
وصلت لبغداد
وكبل للمستشفى
اهل الاستعلامات من شافوني ضاجوا
لا انه كادر اطلعهه
ولا كادر اقنع ابوهه
السالفه اكبر
احس حتى ابوهه مو بيده شي
خارت قواي
ايست من كلشي
بس ماايست من رحمة ربي
كعدت كبال المستشفى
مجرد احساسي بوجودج هنا
يدمرني
اباوع
وبعيوني محصوره دموع الكرامه
اللي ما تقبل تطيح
ولا تقبل تزيح وتخليني اشوف
وبروحي خنكه
مو كادر اتقبل غيرج والله
احس انتي مفصله علي تفصال
جا شلون؟
.....
سه لار
ان تعيش وسط عالم غريب
والوحيد انت اللي مألوف بينهم
ان تصارع وتصارع وتصارع
وتعرف اللي تمر بي عقاب
هذا دمار للنفس
وتحطيم لمحفزات القوه
اشكال والوان
صراخ عركات تكمز ركض
اني الوحيده بيهم هادئه
ودموعي ما نشفت
اني خسرت امي
خسرت شرفي ومكانتي
خسرت قلبي ونفسي
واصبحت تائهه
لا امي عادت تحتويني
لا خاله عادت ترحمني
ولا نمر عاد موجود
عالم اصبح فارغ ومؤلم
راسي يوجعني
احصر تفكيري واصحى
اشوف نفسي ضايعه
اذكر موقف نمر
وكعة امي
اخ يمه دمرتج بنتج وكسرت ظهرج
لميت نفسي
وصرت ادعي
ربي موتني
مااحمل هذا العار
ربي ساعدني وطلعني من هالدنيا بسلام
اعصابي ترجف
بديت اغفي
صرت اسمع صوت امي يصيح براسي
ما مسامحتج!!
ما مسامحتج
وافز من غفوتي اصرخ
مااعرف وين اروح
عذاب الضمير موتني
اجو ممرضات 2
جروني
ودخلوني لغرفه بيهه اجهزه طبيه
ربطوا ايدي ورجلي
واشوف وايرات يمي
بس دموعي تنزل
المواقف تعاد بالذاكره
وذيج الليله تلاحقني
حسيت ع الم قوي براسي
وجسمي ارتجف
صرخت بقوه
واني اتذكر نمر من خله ايده ع حلكي
وكتم صراخي!
وجع قوي بروحي
وعرفت هاي صدمات كهربائيه للعقل
دخت وجسمي يرتجف
المممم مو طبيعي
وصرت اتذكر سه لار القديمه
اللي تضحك وتكمز
وابجي
مستحيل تعود وترجع
وتحطمت ذيج الليله
وتدمرت من خارت قواي بأيده
صحيت ع وجع قوي
كوموني من الكرسي
ورجعوني لنفس المكان
كعدت
ورجيت راسي بالحايط
كل المي وعذابي
كل لحظات دماري
هي بذمتك يا نمر
هي دين بركبتك
ماراح توفي بي
اني اللي تبهذلت وانذليت
اني اللي امارس اقسى شعور
روحي وكعت
ومستحيل ترجع سه لار
مسحت وجهي
دموعي تنزل واحس بوجع
ارتجف وابجي
اسوء ايام حياتي عشتهه
وغفيت
وعاودت امي تلاحقني بأحلامي
وهي تكول
ما مسامحتج
كم ستستمر تلك المعاناة؟
....
بغداد
موده
احساس!!
رافق روحي
واني اباوع لوجهه اللي طالما رسمته
طالما حددت تفاصيله بالنجوم
وبجيت ع طيفه تحت السماء
وايام سوداء احتلت حياتي
بظلام الليل
صلاتي دعائي ختمات القرأن
لمنو راحت وانت واكف كدامي؟
زين والقبر؟
كنت ضحية لعبه
طاحت دموعي
مشيت بهدوء وببرود
لكن بكلبي نار
امشي تجاهه
وهو صافن بوجهي
ماكنت افهم نظراته
دموعي تغوش نظري وماافهم شي
وصلت يمه
كدامه وعيني بعيونه
يا ما ويا ما تأذيت
كل ظني هالطول سكن المقبره؟
همست
موده:ليش؟
سحب نفس بقوه
نزل راسه ع الطفله
لعب بشعرهه وصاح للبودي كارد
كرم:تعاال اخذ موده للبيت اني اجي وراك
باوعت عليهه
حلوه وتباوعلي وتضحك
ابتسمت بألم
موده:بنتك!
راحت بنته
وبقيت واكفه كدامه
قاط اسود كلاسك
وقميص ماروني
رافع شعره وساعه رولاكس
العطر خنكني
وحباسه بأيده
ونظاره شمسيه بالايد الثانيه
باوعت لروحي مبهذله
تنوره سوده وقميص اسود
شال لافته برخاوه
جنطه سوده وحذاء اسود
كتلة صخام وتمشي بالشارع
وهو كاشخ ع اخر حبه!
ضحكت
واني اشوف الفرق
احس الكاع فرتني بقوه
وصرت كوه افتح عيوني
هو مره يباوع مره ينصي
ماكدرت اكول شي
دموعي اللي تنزل عبرت عن كولشي
كال
كرم:مود..
قاطعته
موده:شششش حقير مثلك مايلفظ اسمي ع لسانه ماراح اكلك خدعتني بيك ودمرتني بس اكلك ليش صرت رعب الي واني أمانك؟
عيونه دمعت
واني ماسيطرت ع روحي
صحت البومه اللي بداخلي وصرت ابجي
اختنكت وصرت مااكدر احجي
مسحت دموعي وايدي ترجف
راد يحجي رفعت ايدي
موده:انت من زمان ميت احسب روحي ما شايفتك
عاودت رجوعي للسياره
واني ابجي
اطلب من ربي الثبات
لان طحت
الكاع مازالت تفتر
واحس نفسي بديت اتمرجح
لزمت سيارتي
وغمضت عيوني
سندت راسي ع القماره
واحس بحسره
وخيبة امل كبيييره
صاحب الكراج كال
:دكتوره بيج شي
اجه كرم ووكف يمي
راد يلزم كتفي بعدته
نطيت السويج لصاحب الكراج
موده:دخت وصلني للبيت لو سمحت
هز راسه
استندت وصعدت للسياره
درت وجهي كأن ما شايفه حسن
لالا كرم اسمه هه
وصلت للبيت
ع طول الطريق ابجي
والسايق يسأل خطيه
كنت متعبه ومندهشه
اجت ببالي سهسه من تكلي
قصتكم هنديه والمخرج تركي
اخ سه لار
محتاجتج انتي ونسم
هم يجي يوم وتجمعني الايام بيكم
وصلت للبيت
ونزلت استند بالحايط
دخلت كبل لغرفتي
بجيت بقوه
مامصدكه اللي امر بي
وبقيت اسبوع نايمه بالفراش
مااطلع
امجد يخابرني يطمن
واليوم خابرني
موده:الو
امجد:شبيج موده ليش مداومين
موده:امجد تعبانه واريد اخذ استراحه
امجد:اريد اعرف السبب
موده:ماكو اي سبب
سحب نفس
كال
امجد:راح اجي اخذج نطلع لمطعم هادئ
موده:امجد اسمع
كال بحده
امجد:ولا كلمه راح اخابر خالي الشيخ واكله وانتي بدلي
سد الخط
كمت من الفراش
سبحت
اباوع لروحي تعبانه
بدلت
واتصل بيه امجد
طلعت
لكيته واكف بسيارته يم الباب
صعدت يمه
حرك السياره
كال
امجد:خير دكتوره شبيج
موده:ماكو شي
امجد:موده صار هواي وياج وحافظج كولي عاد
موده:امجد تعبانه من الحالات اللي اشوفهه
هز راسه
امجد:عندي شغله بالشركه اكملهه ونروح لمطعم نتفاهم
وكف السياره يم شركته
نزل واني نزلت
دخل جوه
امجد حلو وكشاخ
ضخم وشخصيه اكثر من كرم
بس كرم كشخته وعطوراته
مبين ابن نائب
ع الرغم ان ملامحه عاديه
مو ذاك الجمال
التفت امجد
ابتسم
امجد:حتاكليني شبيج صافنه
موده:هااا لا ما كو شي
كمل شغله
وطلعنه لمطعم
منطلق بالسوالف
واني بغير عالم
كال
امجد:شنو السبب للان ما تزوجتي
موده:هههه مو يم الزواج
امجد:بس انتي داتكبرين
موده:مو مشكله الزواج او البقاء دونه
ابتسم
موده:وانت شعندك ما متزوج
امجد:ادعم العنوسه وياج
ضحكت وهو ضحك
تعشينه وغيرنه جو
بعدهه رجعنه للبيت
بعدهه تدك بكلبي سوالفك ياكرم
مانمت لل 2
بقيت اتكلب
واذكر الطفله من صاحتله بابا
يعني متزوج وهنت عليك
دموعي رجعت تنزل
اموتك بداخلي وما تلمح ضعفي
طلعت ابن النائب
وانت السبب بكلشي صار بيه
والصبح فزيت ع رنة الفون
فتحت
امجد:يلا دكتورتنه الى المستشفى
موده:احس بكسل
امجد:شششش كومي لا اخابر ع الشيخ يلا
موده:اوك اوك
سديت الخط
اباوع ع المحبس كدامي
نقشة كرم
حصرته بأيدي
ورجعت ضميته
بدلت وتوجهت للمستشفى
ركنت سيارتي
ودخلت للداخل
ازاول اعمالي
تطورت هواي بهالفتره
اسوي بحوثات واذكر عمار
ليش كذب عليه
اكو شي بعدج يا موده ما فاهمته
طلعت من غرفة العلاج
متوجهه لمكتب الدكتور عامر
المشرف الكبير
دخلت وبيدي ملفات
موده:عذرا دكتور الملفات كملتهه و
باوعت كرم كاعد
ويمه بنيه بيضه وضعيفه
بلعت ريك
كال الدكتور
عامر:دكتوره اريدج تشرفين ع حالة المريض محمد يكدر يتحمل مدة السفر بدون الجرع لازم ننطي لأهله نسبه
هزيت راسي
عيوني بعيون كرم
هاي اليمه مرته اكيد
طلعت وتركتهم
شيسوي جاي هنا
وليش ويا مرته
احس الحسره كبرت بصدري
اخ يا موده
الدموع ترست عيني
يلا عادي ماصار شي
اطلعت ع حالة المريض محمد
وكنت واكفه بالممرات
شفت كرم يمشي ويمه مرته
البودي كارد وراهم
كل المستشفى تباوع
ويتهامسون
ابن النائب..
شوفوا مرته شلون شايفه نفسهه
مرته طويله
حتى اطول منه
شعرهه اصفر قصير
لابسه بنطرون وستره
وجنطه وكعب ناعم
مروا من يمنه
كرم يباوعلي
نصيت راسي ومشيت
بروحي خنكه وكسره جبيره
شعندك جاي؟
اذيت روحي هواي
دمرتني وبعدك متونس بدماري
دخلت للغرفه
كعدت ع الكرسي
الدموع بعيوني
كافي موده
لتضعفين
جريت حزمة الملفات
وبالي شارد
فكري بعيد
شيسوي كرم هنا
كلبت الملفات
صدمه تتبع صدمه
وين عايشه يااااموده
ولج ضعتي!!
نفس السيناريو يعاد؟
نفس الالم
ليييش!!!
تمثل سه لار💔
....
مساء الحب
حبايبي عندي كتاب خاص بالتنويهات
ليش ماتنزلوا
الف وحده تسأل عن الموعد
ليش اني مو وضحت بالنوت
رأيكم
احبكم
انتظرووونا
ولتنسون التصويت