قضية لم الشمل

البارت ستة وعشرون

#الكاتبة_نهى_الحسون
#قضية_لم_الشمل

السلام عليكم ورحمة الله وبركاته
اسعد الله مساءكم يا احبتي المتابعين ❤️🌹

جلال

وصلت ام مهيمن هي ونور وابن اخوها محملين بالاكل
اباوع لحنان ام مهيمن على ابنها.
ولهفتها واصفن وية نفسي واكول امي گلبها من شنو
مخلوق

لو انا اتصل اسأل عليها لوماكو
ما يوم كلفت نفسها وكالت خلي اشوف ابني
عايش لو ميت

من عشت وية اهل مهيمن وشفت حنان امه
حسيت بالفرق بينها وبين امي

نهضت من مكاني وكلت
.. ما دامكم اجيتوا يم مهيمن
لعد انا استغل الفرصة واروح للبيت اسبح اغير ملابسي واجي

مهيمن .. مو تنسى الي كلتلك عليه مفاتيح المحل سلمها للحاج ابو حيدر حتى يخلي كرار ابنه يكعد بمكاني

وانت عينك على المعمل بعد كافي لا تجي تبات يمي
انا ان شاء الله ماضل شي واطلع من المستشفى

.. صار بعد تأمر على شي
.. لا اتوكل على الله

طلعت وتركت نور. وام مهيمن كاعدات يمه
ولا زالت صالة الاستعلامات مليانة بخوال مهيمن وناسهم.

لكيت الحاج ابو حيدر وكرار وعناد جايين
وكاعدين يمهم

وكم واحد من جماعتنا هم موجودين
استحيت امر واسلم بدون ما اكعد وياهم همة اصلاً جايين علمود. اخوية

رحت سلمت علييهم وكعدت يم ابو صادق
من جماعة السوق. اسمع الشاب الي كاعد يم ابو صادق يگله .. بالله سأله عن البنية الفاتت وية ام مهيمن صدك هاي اخته لمهيمن

التفت علية الرجال الكبير ابو صادق وسألني
.. اكول بوية ولو تطفل مني بس اريد اسألك البنية الفاتت هسة منا اختكم.

عقدت حواجبي يالله هسة هذا شحجي وياه بربكم هسة هذا هم سؤال
جوابته وانا على اعصابي

.. اي عمي اختي
كال .. اكلك يابعد عمك متزوجة مخطوبة
هو سألني هيج وما احس الا الشخص المقابيلي
وكع النقال من ايده

رفعت راسي وكان الكة عناد عيونه تريد تطلع من راسه. وموجهة على الشاب شكله سمع كلامهم
اباوع على وجهه مال واحد راح يرتكب جريمة قتل

ما اعرف ليش من شفت ارتباك عناد
ارتاح گلبي احس ماي بارد ونزل على گلبي

التفتت على الرجال وجاوبته

.. لا ما مرتبطة. ليش تسأل
.. بوية ولو هو مو وكته. هذا الكلام . بس يگولك
في البلايا تحصل الغنايم.

واختك الله يستر عليها شنو من ادب واخلاق شايلة
البارحة وانا مثل ابوك انتبهت عليها ولارفعت عينها ولا علت صوتها.
وهيج ذهب انا جنّايه.

رفعت راسي بفخر وصارت عيوني بعيون عناد اتحداه
يحجي او يفتح حلگه.

.. والله ابو صادق انت الذهب واصلك معروف بس مثلما اتفضلت وگلت. هذا الكلام مو وكته هسة
خلي مهيمن يطلع بالسلامة. ويرتاح والله كريم
لكل حادث حديث

انا احجي وبعدني اباوع لعناد الي صار يمسح بعرك كصته وكل شوية يحم حم
احتار شيسوي. يمكن لو عليه يشيل ابو صادق والشاب الي يمه. ويطلعهم سحل برة المستشفى

بقيت كاعد وياهم حوالي ساعة وطول هاي الساعة اباوع لعناد كل شوية ينافخ

گمت من مكاني .. انا اترخص منكم. اريد امر على البيت

ابو حيدر .. الله وياك عمي. مو تنسى تجيب مفاتيح المحل وياك
.. ان شاء الله ما انسى

نور

كاعدين يم مهيمن وخالة بسطت بالاكل يمه

مهيمن.. شالقضية يمة المن هذا الاكل كله

جوابته.. يمة هذا كله الك اريدك تاكل يايمة حتى يترمم جرحك وانت سودة علية بالگوة تاكل

صبت واني ساعدتها لان لطالما تتحرك ايدها ترجف
مهيمن عقد حواجبه مستغرب وسأل

.. يمة ايدج ترجف شنو شبيج
.. كلشي ما بية

اني من يمي حجيت .. لا مهيمن خالة البارحة اتخربطت
هنا بالمستشفى ونقلناها للطورايء وطلع ضغطها مرتفع

باوع عليها.. معناها البارحة كالبة المستشفى عزة حسب ما فهمت
يمة شلون بيج وين اوديج.
.. يمة حقك ما تدري بگلب الوالدة شكد شايل محنّة
لاولادها

كعدت يمه تريد تأكله
مهيمن.. يمة لاتكولين راح تكعدين تأكليني بأيدج
شوفيني اني ما انشليت
ايدية ما بيهم شي جيبي عنج انا اكل وانتي اكلي وياية

جنت ارجع حافظات الاكل بالعلاگة
واتبدة علية سوب اللحم
كمزت من مكاني ولاح طرف الجبة

ام مهيمن .. يالله خالة فدوة. خو ما احتركتي
حار السوب

.. لا ما لاح رجلي بس تلف الجبة
.. روحي غسلي وصيحي وياج الفراشة حتى تجي تنظف الكاع

طلعت من يم مهيمن وعبرت الممر ورحت للحمامات
حتى انظف طرف الجبة
بين ما خلصت تنظيف وكملت

وطلعت من الحمامات وكان اشوف عناد بوجهي
صارت عيني بعينه وارتبكت

دنكت وردت اكمل طريقي
لكن صوته استوقفني وقطع علية الطريق وكال

عناد .. نور لحظة

وكفت محرجة وباوعت منا ومنا ما اريد احد يمر ويشوفني واكفة يمه

حجيت بصوت ناصي
ما اعرف انا صوتي ليش يختفي بهيج مواقف
.. ششنو عناد

غمض عيونه ومسح بكف ايده على وجهه وكال
.. يابنت الناس اترجاج بعد لا تلفين للمستشفى
الناس كاموا يحجون بيج ويردون يخطبونج

وخلي ببالج انا ما راح اسكت

.. عناد اني ما اسمحلك تحجي وياي بهاي الطريقة

.. مو انتوا ماناوين تنسون ولا تسامحون
سديتوا ابواب رحمة الله كلها بوجهي
شترديني اسوي من اسمع الناس تطلب ايدج من اخوانج كدامي

.. عناد كل شي بالدنيا قسمة ونصيب اترجاك تنسى وتكمل طريقك

اشر على گلبه وكأل .. ليش هو هذا امره بيدي حتى انا
هيج سهلة علية انسى واكمل. طريقي
لج نور انا الله بلاني بحبج واتورطت بي
كون الامر بيدي كان هسة انا مرتاح ونايم ليلي مرتاح ومتهني

هو يحجي بحرگة گلب واني كلي ارتعد ما اعرف شبية خايفة ومخبوصة. ومتوترة هيج خلطة مشاعر غريبة
ما اعرف شنو مصدرها وليش اصلاً اني مرتبكة

رفعت راسي وكلت.. عناد بعد عن طريقي خليتي اروح لا والله اكول لجلال عليك

اباوع عليه رص على اسنانه واتحرك على صفحة حتى افوت. مشيت وهو كال وراية

.. نور سمعني زين هي حجاية وما اثنيها لو على گص رگبتي انتي اتسميتي بأسمي وعسى ما يصيرون خواطيبج مية انتي الي ما تصيرين لغيري

تركته وكملت طريقي ورجلية ترجف
عناد تمسكه بية يربكني دخلت لغرفة مهيمن
وام مهيمن كالت .. ها خالة صحتي للفراشة

.. هااا لا خالة ما لگيتها
رحت گعدت يمهم وبعد ما اتحركت من مكاني اراجع بكلام عناد وياية
و گلبي يدك سريع شبي

جلال

وصلت للبيت وحوراء فتحتلي الباب
باوعت عليها عيونها وخشمها حمر من كثر البجي
خطية هاي الثانية هم تحس بالذنب على الصار بأخوها

الله يحفظهم الكل حملوهم ذنب ما مرتكباته
سلمت عليها وكلتلها حتى اطمنها
.. حوري مسحي دموعج انتي تعرفين مهيمن اسد ما ينخاف عليه
ذاك هو كاعد بحضن امج وكاعد يتدلل عليها

حوراء سمعت كلامي ودموعها كامت تنزل وغطت وجهها بكفوف ايدها

عود انا النجر بين اصحابي
وبدمعة من غزال البصرة لگيت گلبي ينعصر

.. ولج حور كافي لا تبجين عليمن هاي الدموع
حوراء جاوبتني وهي تبجي بحركة
.. جلال محد يقبل ياخذني اشوف اخوي والله گلبي طاك على شوفته
امي علنت الحرب علية والكل هنا معاديني
منو الي اكله اخذني يظل يحجي علية

نست نفسها وصارت تشتكيلي وتبجي
وعاد انا شلون گلبي منا ميت عليها ونوب تشتكيلي قهرها

.. حور مسحي دموعج ما عاش الي يقهرج

سحبتها النقال من جيبي واتصلت على مهيمن
.. الو مهيمن. انا راح اجي للمستشفى واجيب حوراء وريم وياية
خطية هاي اختك تكسر خاطر حتى الي ما بگلبه رحم تريد بس تشوفك
الظاهر الوالدة والكل معاديها علمود الي صار

جاوبني وكال.. اي اي جيبها وياك اريد اشوفها

اسمعه يحجي وية امه ويگول
.. ها يمة اشتغلت رحمة الله. انا مو موصيج كل شي ولا حور تقهريها وتأذيها من انا مو يمها ، مو محلفج ما تحجين عليها

امه جاوبته.. خليها تولي لا يجيبها للمستشفى
هي وذيج. كله من تحت راسهن الي صار

رجع حجة وياية .. جلال جيبهن وتعال ماعليك بأمي

غلقت النقال وهي كانت عيونها معلكة بأمل بوجهي
غير انا تروح روحي من تباوع لي بهيج نظرات

روحي جهزي نفسج وكولي لريم هم تحضر نفسها حتى اخذكم اثنينكم للمستشفى

ابتسمت بفرحة والعيون تلمع بالدموع
.. صدك والله جلال راح تاخذني ؟

فهيت بوجهها
.. هااا اي اخذج
اااا يالله بسرعة تحركي وروحي كولي لريم
بين ما اسبح

.. ربي ما يحرمني من حنانك
وراحت ركضت تصيح بعالي صوتها على ريم
ضحكت على شكلها وهزيت راسي

ريم

وصلنا للمستشفى واني كلي لهفة حتى اشوفه واتطمن عليه ما ارتاح الا اشوفه بعيوني
جلال اجة للبيت واخذنا وياه من وصلنا للمستشفى جلال كال
.. ريم حوراء من تمرون من يم خوال مهيمن دنكو وامشوا بسرعة.

لان جماعتنا كلهم هنا بالمستشفى
وعيونهم ليزر من ابو صادق وشيل ايدك

سألته.. منو ابو صادق
جاوبني وهو يمشي كدامنا .. هذا واحد يفرق الجماعات
وصلنا للمكان الي بي مهيمن
جلال دك الباب ودخل. واني وحوراء دخلنا وراه

مرتبكات ومترددات رفعت راسي وباوعت عليه
عيوني ما تشوف بس هو

سمعت صوت شهگة بجي حوراء كانت بعدها واكفة يمي مثل الي تنتظر الاذن حتى تروح لعنده

باوع علينا انا وحور وفتح ذراعه وصاح
تعالي حوري ولج ولا تبجين

هي سمعت هاي الكلمات وراحت ركضت عليه مثل الطفلة وشمرت روحها بحضنه وكأمت تبجي بحرگة گلب. .. مهيمن والله اجيت اموت. ما راح اسامح نفسي على الي صار بيك

التفت على امه وگال .. عفو عليج يمة شمسوية بأختي
مو تدرين بية ازعل على زعلها. شلون انطاج گلبج هيج حاركة كلبها

ام مهيمن .. هو احنا شحصلنا من دلالك لها
اشو تتعارك بالمدرسة وتجيب المشاكل

هي تحجي اني وبلعت ريگي اهووو ام مهيمن كلش محملة بكلبها علينا بس الله اليستر

بقيت واكفة بمكاني. اباوع عليه شلون حاضن اخته يواسيها ويسكتها
اتمنيت بلحظتها اني بمكانها وهذا حنانه كله الي

همست بصوت ناصي .. مهيمن الحمدلله على سلامتك
رفع راسه وباوع علية عيونه بيهم شوك مدفون

لكن مع الاسف جاوبني ببرود .. الله يسلمج ريم
من باجر ترجعون تداومون وجلال يوصلكم ويرجعكم
للمدرسة. انا اتفقت وية المديرة بس تخلص امتحاناتكم تكعدون بالبيت قبل شهر المراجعة

جاوبته واني مقهورة من اسلوبه البارد وياي
.. اوك كلي انت شلون صرت

.. الحمدلله بخير

حجاها والتهة يحجي وية جلال يسأله
باوعت لنور والدمعة معلكة بعيوني

جلال .. مهيمن قبل شوية اجة الضابط ويريد ياخذ اقوالك بموضوع هذولي الي لزموهم

اي وقبل لا انسى ابو سيف درة بالموضوع وكال راح ادزلكم جماعة اختصاص بهاي الامور ، راح يفهموكم شنو تسون

مهيمن .. والله اجة بوكته

جلال

رحت للمعمل مستعجل اكمل شغلي حتى ارجع لمهيمن لان راح يطلعون مهمين من المستشفى ولازم اكون وياه امه مسوية عزيمة على سلامته

كنت مشغول وكان تدخل علينا بنية شكلها من هذني
الفايخات عقدت حواجبي واستغربت هاي شتسوي هنا
وبالمعمل موقعها كلش غلط احنا نادراً ما تجينا نسوان
للمعمل.

كبل سألتني .. العفو عناد هنا
اهاااا من جماعة الاستاذ عناد
دخل عناد. وتفاجيء بوجودها وجمد بمكانه

وسألها بغضب .. انتي شلون تتجرأين تجين لهنا.
ولج انتي شنو ما تعبين ما تملين مو كلنا يفتح الله

البنية بدلع .. عنودي ليش هذا الجفة ما اتعودت عليك هشكل تعاملني

عناد يباوع علية مثل الي وكع بمأزق ورجع باوع عليها وحجة
.. لا تخليني اسب ابو عنودي تطلعين برة لا بالقران اعزل المعمل على راس الخلفوج.
كافي ما مليتي

حجة وياها وطلعها من المعمل ورجع للمكتب باوع علية وگال .. جلال الله عليك لا تاخذ علية نظرة مو حلوة

والله العظيم هاي من الملفات القديمة. يعني ماضي
لا تسجلها علية نقطة ضدي ادري هذا الشي ما راح يشفعلي

رفعت حاجبي بأستهزاء وكلت .. وهسة انت منو سألك حتى كعدت تبررلي.

اخذت نظرة عليك او ما اخذت ما راح اقدم او ااخر
هاي سوالفك الناقصة تخصك لك لوحدك ما تخصني

كمت من مكاني وهزيت ايدي
.. لا ويريدنا نزوجه اختنا. تحلم تشوف طرف ثوبها على هاي سوالفك

انا حجيت هيج وطلعت وهو بقى بمكانه يحوم مثل الي عنده مصارعة

عناد.. الله يلعن ابو الحظ الي شايله مو هي جانت عايزة والتمت

نور

اليوم مهيمن
يطلع من المستشفى والبيت مخبوص خبص بالناس
وخالة ام مهيمن وما ادراك ما ام مهيمن

كالبة البيت فوك حدر جابت خروف علمود سلامته واول ما وصل ذبحوه يم رجله

وظلت الناس على طول هاي الايام يجون
هي كلها بصفحة وريم الي كانت. تحاول دائما تتقرب من مهيمن. اباوع عليها اذا صاح مهيمن يطلب شغلة

هي تركض اول وحدة يمه
كانت ما تداري لهفتها كدامنا حتى خالات مهيمن انتبهوا عليها وحدة منهم حجت بعد ما كدرت تضمها

.. اكلج خية شعجب تخلين بنت عمه تدخل وتطلع بكيفها يم الولد شنو وين كاعدين

ام مهيمن .. هي مثل اخته ومتعلقة بي حالها حال حوري

بس ام مهيمن من هذا اليوم كامت تراقب تصرفات ريم
الي كانت غافلة عنها.

كنت سرحانة وسمعت صوت مهيمن صاح على حوراء

ريم كانت تقرة بس سمعت صوته تركت كتابها وكامت
تريد تروحله

ام مهيمن .. خالة كعدي وين رايحة. ابني شاب لوحده بالغرفة ما يصير كل شوية داخلة عليه هم يريد ياخذ راحته

ريم ..اي بس مهيمن مو اي واحد هو خط ....
ابن عمي يعني مو غريب

ام مهيمن صاحت.. يالله هسة هاي شحجي وياها

رجع مهيمن يصيح على حوراء وريم راحت وهي تكول .. خالة حوراء بالحمام

راحت ريم ودخلت على مهيمن وانا كنت اسوي بالعشا
الخطار بدوا يخفون شوية وبدة البيت يرجع لوضعه الطبيعي

شوية وسمعت صوت مهيمن يصيح بأسمي
درت وجهي على ام مهيمن وكلت
. خالة عينج عالاكل خلي اروح اشوف مهيمن شنو يريد

رحت دخلت ولكيت مهيمن كاعد على فراشه بالكاع ومتكيء على المخدة

وريم كانت تباوع عليه والوجه احمر والشفايف مبرطمة

مهيمن .. نور رحمة على والديج كعدي وياها وفهميها
بعد مرت الثانية ما تدخل لغرفتي

ارتبكت من طلبه وما كدرت اسأله عن السبب بس مهيمن مو هونفسه مهيمن الاولي اي كان متولع بشوفة ريم كان اذا مر يوم عليه ما يشوفها
يظل يدور الاعذار بس بعد الي صار
هواية تغير بتعامله وية ريم.

صار يعاملها برسمية وما يوجهلها اي كلام ويتجنب التقرب منها وكأنما قنبلة موقوته تهدد حياته

باوعت عليها نزلت دموعها وكالت
.. اريد اعرف انت ليش هيج تبعدني عنك وتصدني

غمضت عيوني مقهورة عليها وكلتلها
.. ريم حياتي تعالي شوية خلي احجي وياج

.. لا ما تحجين وياية خلي هو يجاوبني
مهيمن لزم خاصرته وكال
.. ريم رحمة على موتاج طلعي برة. اريد ارتاح
اباوع لريم طلعت برة بسرعة مثل العاصفة

سألته .. ليش هيج مهيمن تعاملها بقسوة

مهيمن مسح على وجهه وكال
.. ما اريدها تتعلم على قربي منها وتتأمل بوجودي لجانبها لان انا بعد الي صار ما ناوي اكمل طريقي وياها. من يوم الي صار

انا عرفت ان ريم مستحيل تتغير لان حياتها ما تتوالم وية حياتنا. حاولت اكثر من مرة انصحها وانتي وحدة من الناس هم كمتي تعلميها

لكن هي ما جاي ترضخ.للامر الواقع
وحقها ما الومها لان كضت عمرها كله. عايشة بعالم غير عالمي
وشوفت عينج اني شخص بسيط وهذولي ناسي وهاي حياتي ما اكدر اغيرهم

وصعبة اطلب منها تتغير علمودي بليلة ويوم ولا راح
اترجى منها بعد تتغير طلبت منها مرة وحاولت.وهي ما سمعتني
بعد حلم ارجع اطلب مرة ثانية هي جبيرة. مو صغيرة
لذلك انا نويت ابتعد عنها وما اخليها تعلق املها بية

.. بس مهيمن انت تحبها واعرف طبعك انت مو بسهولة
تحب شلون ترضاها

.. الي يشوف الموت يرضى بالصخونة. وانا تعرضت للموت وعشيرتي دخلت بمشكله طويلة عريضة بسبب قلة فهمها لحياتنا. ما مستعد اعيد الي صار بهفوة ثانية من هفواتها
خليني فقط ولي امرها. منا لحد ما الله يسهلها

صافنة بكلام مهيمن وقراره
دورت على ريم ما لكيتها ونوب هاي وين راحت

ريم

طلعت من غرفته مقهورة. منه ومن تصرفه وياية
حوراء شافتني واجتي يمي بالغرفة

.. شنو شبيج ريم
.. اخوج. قهرني. من يوم الي صار وهو ما يقبل يحجي وياية

حوراء.. لا تضوجين هو كل مرة هيج يزعل عليج وبعدين من وحده يجي يراضيج. لان ما يكدر زعلج

التفتت عليها بأمل .. يعني انتي تشوفين هيج
.. اي والله شبيج. هسة تشوفين. شلون هو من وحده يكعد يسأل عنج ويدور عليج

بس هسة لازم تعذريه لان ما صارله هواي من متصوب
وكاعد بالبيت وهو ما متعلم على كعدة البيت فتشوفين
بسرعة. يتعصب من ابسط الاشياء

هم صحيح كلامج
تركتها وصعدت فوك ادور على جلال حتى يدرسني كيميا
لكيته بالسطح كاعد يدخن ويحجي بالنقال
وية بيت خاله شافني واشرلي هسة اخلص المكالمة

اسمع خاله يكله بعتب
. . جلال مرة الثانية من يصير هيج شي وياكم انطينا خبر حتى ما يظل بالنا عليك

.. خال لا يظل بالك بس هي هيج صارت على غفلة وهجموا علينا
وما صار عندي وقت اتصل عليكم

كان يحجي واني فرشت الحصيرة وبسطت بكتبي
وملزمتي كدامه حتى يدرسني

جلال.. خال مو تنسى تطمني على الاوضاع الي يمكم وان شاء الله ماكو شي عليكم هاي كلها مخربين ما راح يسون شي

يالله اخذ راحتك وسلمنا على الاهل
وبوسلي رنين ورند

انهى الاتصال وباوع علية وكال
.. هاي شنو باربي بعدج عايشة. لحد الان

برطمت شفايفي وكلت .. عفية جلال اسكت ما ناقصتك هسة اتعاركنا اني ومهيمن وواصلة حدي بس تسويلي بز ابجي
نزلت دموعي بقلة حيلة
.. جلال والله تعبت اريد اعرف اني شنو سويت حتى مهيمن هيج يصدني وبيعدني عنه

جلال .. منعوج عن صبا اخت زمن وانتي ما امتنعتي. وبقيتي ترافقيها

ولج انا الزلمة شكدني وشكبرني ومن مهيمن منعني عن بيت زمن اخذت بكلامه وابتعدت عنها

وانتي ام راس اليابس عرب وعجم تصيح وتكلج يابة ابتعدي عن هاي العلة ماكو انتي مستقلة بتفكيرج

وشحصلتي بعدين من مشيتي وياها غير بس الطلابة وكعدة عشاير. ومهيمن تهدد من وراج. واتصوب وزين ما. مات. كل هذا صار وانتي تكولين اني شنو سويت. ولج باربي انتي مال خنك.

.. على فكرة هم كبروا الموضوع وسوها كعدت عشاير يعني مالها داعي كل هاي الهوسة

جلال.. ما ينلام بيج مهيمن من يكول الكلام وياج ضايع ولج غضب بس افهمي

شلون مالها داعي كعدة العشاير
ليش مو اربع شباب اتهجموا عليج ونزعوج حجابج بالشارع كدام الناس وفوك هذا هددوج.

واي واحد عنده غيرة على عرضه ما راح يسكت ويسوي مثل ما سوى مهيمن لان العرض عظيم وما يستهان بي.

جلال يحجي واني تسود الدنيا بوجهي فوك ما هي سودة
.. عفية جلال لا تخليني اتندم صعدت لك فوك حتى تدرسني اشو گلبت علية الموازين

سحب الكتاب مني وكعد يگلب بي وكال
.. وحوراء ما تجي تدرس وياج فد مرة ادرسكم اثنينكم

رفعت حاجبي وكلتله.. استاذ جلال درسني بس اني
حوراء ما محتاجة خدماتك هي اصلاً شاطرة بالكيميا

جلال.. شنو سالفتج باربي كطعتي علينا الهوى والماي سديتها

خلي نقريج وحدج امرنا لله

جلال

بالمعمل ومهيمن اتصل علية
طبعاً مهيمن صارله يومين من رجع على الشغل
والحمدلله. شغلة الجماعة انحلت. الشباب اربعتهم.
موجودين بالسجن. وية جماعة ابو سيف وابو حيدر

انتقل ملف قضيتهم. لبغداد وراح ينحكمون.
بسبب التعدي على ريم ومحاولة قتل مهيمن.

الجماعة كالوا.. راح يخيسون كم سنة بالسجن

طبعاً اهالي الشباب حاولوا بكل طريقة اقناع مهيمن حتى يتنازل بس هو رفض

كنت كاعد بالمعمل
وكان يدخل عناد ووجهه مدخن ما يتفسر
ما حجيت وياه ولا هو اقترب مني
بعدنا محد يحجي وية الثاني

كعد على المكتب وفتح الحاسبة وهو ينافخ كل شوية

دقايق واتصل علية مهيمن وسألني وهو معصب

.. اكول هذا الحقير عناد يمك

رفعت حاجبي وباوعت عليه
.. اي يمي

مهيمن بغضب .. هسة اريدك تجيبه سحل لمحل ابوه عندي حجي وياه
.. ليش شنو مسوي
.. انت جيبه لهناك وبعدين تعرف

انهيت الاتصال
باوعت لعناد بالله هذا الطنطل شلون راح اسحله
مو عبالك مهيمن شوية حمة. من كال سحله وجيبه لمحل

نهضت من مكاني وجليت صوتي
.. اكول ابو الشباب مطلوب منك الحضور هسة لمحل ابوك

سألني مستغرب .. شكو وليش انت تكول
.. تعالي وياية وانت تعرف ليش

سحب نقاله واتصل على ابوه وشكله حتى ابوه عنده علم بطلب مهيمن
كام وياية واخذ نقاله

صعد بسيارته وشافني اتوجهت للدراجة
وكال .. مالها داعي تركب الدراجة انا وياك اثنينا رايحين بنفس المكان

رفعت حاجبي وما جاوبته بعدني زعلان عليه
.. ما يحتاج دراجتي موجودة

ركبتها وحركتها وانطلقت كدامه وهو شغل سيارته
واتحرك وراية

وصلنا لمحلات ابوه لكينا مهيمن وحيدر وكرار. موجودين بالمحل

ابوه بس شافه كال .. يالله مهيمن كول الي عندك هذا هو عناد وصل شكو شصاير

مهيمن كام ووكف گدام عناد وكال
..شوف عناد هاي كدام ابوك واخوانك. اذا مرة الثانية
سمعت بيك. حاجي بالسوك وكايل انا خاطب اخت مهيمن ما تلوم الا نفسك

هاي المرة راح اعديها لخاطر الحاج واخوانك مرة الثانية بالقران
ادفنك اذا جبت سيرة اختي على لسانك

ابو حيدر كام من مكانه مستنكر
.. مهيمن فهمنا شنو الموضوع شبي عناد وشبيها اختك

مهيمن التفتت على ابو حيدر وكال
.. قبل كم يوم اجاني ابو صادق يريد يطلب ايد اختي
ابو حيدر .. اي
.. واليوم رجعلي ابو صادق زعلان يكلي ليش ما كلتلي اختك مخطوبة. لعناد. اشو احنا اخر من يعلم

وانا سألته منو كلك هذا الشي
كال عناد ابن الحجي هو بنفسه اجانا للمحل وكال
انا خاطب اخته وهي الي.وما يصير تحجون بيها وتجيبون سيرتها وكعد يهدد

شوف عمي ابو حيدر والله خاطرك وكف بعيني
والا جان عناد هسة ممدد يم رجليك مكسر بالكاع

جلال كنت واكف وراه وقريب عليه
.. كلب ما تصيرلك جارة ولا حل

عناد.. اي صدك انا خطبتها قبلهم. وهم ارجع اخطبها مرة الثانية وثالثة ورابعة. منا لحد ما تملون وتزوجوني اختكم بيدكم

كان مهيمن بعده واكف كدامه
لزمه من ياخته وضربه كلة براسه ووكعه بالكاع
مهيمن .. هاي حتى مرت الثانية ما تجيب سيرة اختي على لسانك.

ودار على ابو حيدر
.. حجي لزمه وفهمه مو كل شي يريده يحصله

طلع مهيمن وطلعت وياه
وكال .. والله هذا عناد تاليته مكتول على ايدي

جاوبته.. ما عليك منه هذا دواه يمي انا اعرف شلون اعلمه

نور

رجعوا مهيمن وجلال للبيت
وحجوا وية خالتي وكان صوتهم عالي واني كنت اريد اروح يمهم
انتبهت على كلامهم وسمعت اسم عناد بالقصة

ثبتت رجلية بمكانها وتلقائياً صرت استمع لكلامهم
وتفاجئت بالسمعته

ام مهيمن .. يايمة والله مسكين هذا عناد
شكله ماعنده حظ وياكم خطية مبين عليه هذا الشاب الحيد وكع ومحد
سمة عليه

مهيمن .. ادفنه بأرضه والله اذا يتجرأ ويفكر يهوى اختي
ام مهيمن .. يايمة ليش هو الحب بيده حتى يكدر يمنعه

مهيمن.. يمة سدي الموضوع ما اريد احجي بي
كافي علية اليوم شطت للزركة.احتركت اعصابي بسبب عملته السودة

هم كانوا يحجون واني كنت بعدني واكفة اسمعهم
وكلبي وية كل كلمة يحجوها يخفق. ما اعرف شبي

حسيت على لكزة بخاصرتي وانتفضت من مكاني
وباوعت بخوف
.. عابتلج ريم. خوفتيني شبيج

ريم غمزتلي وكالت بصوت. ناصي
.. هاي شنو استاذ عناد كلش مستقتل ومسوي ثورة

بس تدرين حبيت كلامه من يكول
اخطبها منكم (مرة ثانية وثالثة ورابعة. لحد ما تملون
وتزوجوني اختكم ). اوووووف يوم للي ببالي

يسحل روحه علمودي اوووف بس شكلي ما راح انطي مجال يسحل روحه. اني راسا انطيه الموافقة. بدون ما ينتظر

سحبتها من ذراعها ودخلتها للغرفة .. لج اشششش انفضحنا والله

ريم.. ليش عيني اني ما حجيت شي
بس تدرين كسر خاطري هذا عناد يحب وحدة مو بحاله
وما تفكر بي

راح اندعيله ربي يخلي ينسى حبج ويعوضه بحب وحدة ثانية تكون تحبه وتموت عليه

ما اعرف شصار بية من سمعت دعاء ريم المستفز
.. ريم انتي صايرة كلش مكروهة. بالله شو وخري عني. تركيني بحالي
ضوجتيني بدعائج هذا

طلعت من الغرفة واسمعها
ضحكت من وراي وكالت .. اكص ايدي اذا ما طلعتي تحبينه وما تدرين بروحج
وعلى كلامها ارتعد گلبي يثبت كلامها

مر اسبوع
والبنات استلموا النتائج. وريم داخلة بكلوريا بس واكعة بثلاثة
وكانت طايرة من الفرح اباوع لفرحتها واتذكر كلام مهيمن وقراره وانقهرت عليها

ريم .. وين مهيمن اريد ابشره اني دخلت بكلوريا
وان شاء الله ادرس وانجح

لزمتها وكعدتها يمي وحجيت وياها ما اريدها
تنجح وتدرس لاجل شخص مقرر يتركها
.. ريم حبيبتي ما اريدج تبنين حياتج وحول مهيمن وتنجحين علموده هالشي غلط

اني اريدج تهتمين بدروسج ومستقبلج
وتكون حياتج كلها تدور حول شهادتج ومستقبلج

اما الحب والزواج خليه عامل مكمل لاتخليه شي اساسي بحياتج

.. لا نور انتي غلطانة هو اصلا ما عندي حياة
ومن شفت مهيمن بدت حياتي وادركت هو كل عالمي.
وهالشي ما تحسين بي الا من تكونين وحيدة

كنت احاول اغير تفكير ريم واهيأها حتى ما تنصدم بقرار مهميمن اريدها تستقل بحياتها
بس شكلي جاية متأخرة صعبة تقنع شخص عماه الحب

تركتها فرحانة بنتيجتها وتنتظر مهيمن يجي

صار الليل
وكان ينزل جلال من السطح بسرعة ووجهه مخطوف
سألني .. نور وين مهيمن اشرت على الغرفة

تركني وراح يركض فتح باب الغرفة وكال.
.. مهيمن. واحد من ولد الحاج ابو حيدر مات
وما يعرفون منو. بيهم الميت
اني سمعت هشكل وگلبي انخمط شهكت بصوت مخنوك

......

في البارت القادم

ريم
جمدت بمكاني ما مصدكة الي كاعد اسمعه
من كلام ام مهيمن وية اختها هزيت راسي معترضة ورحت عليها

.. عمة لحظة انتي شنو جاي تحجين ترة اني ومهيمن متفقين عالزواج

يتبع

..

تحياتي لكم اختكم نهى الحسون