قضية لم الشمل

البارت خمسة وعشرون

#الكاتبة_نهى_الحسون
#قضية_لم_الشمل

السلام عليكم ورحمة الله وبركاته
اسعد الله مساءكم يا احبتي المتابعين ❤️🌹

ريم

رجعنا للبيت اني وحوراء والوجوه مخطوفة
وحدة تكول للثانية شلون شنسوي نكوللهم لو لا

حوراء.. ريم احنا لازم نكوللهم الي صار لان الموضوع زاد عن حده
ووصل للعظم ما يصير نسكت
ومثل هيج امور لازم اهلنا يعرفون بيها

.. والله مهيمن يتخبل اذا عرف ويلعب بينا طوبة
.. ميخالف رزالة مهيمن ولا مصيبة تايهة من ورة هذولي الساقطين

اليوم هيج سوو بينا باجر الله يعلم شنو يصخمون
كنا كاعدات بالغرفة ودخلت نور شايلة بيدها الملابس النظيفة تريد تحطهم بمكانهم

باوعت علينا وكالت
.. ها بشروا اليوم شلونكم بالامتحان
.. الحمدلله مجاوبين
.. يالله ما بقى شي شدوا حيلكم

.. ان شاء الله كانت حوراء تجاوبها واني ساكتة وافكر بمهيمن شلون افاتحه بالموضوع

طلعت نور ورجعنا اني وحوراء نكمل كلامنا

حوراء.. شوفي ريم عندي فكرة احنا نحجي وية امي ونكوللها كل الي صار
وهي بطريقتها تكول لمهيمن

ووبيومها كلنا لأم مهيمن
وهي ضربت على صدرها
.. يمة صخام وجهي على هاي السواية
ولج هاي مصيبة وحلت عليينا

بلعت ريگي .. عمة اهدي شوية لا تخافين همة الشرطة
قبضوا عالشباب واخذهم للسجن يعني الموضوع انحل
والقانون راح ياخذ مجراه

.. ولج خايبة يا قانون يا صخام ولج هذا الولد متعدي عليج وهتك سترج وهاي عليها فصول وطلابة جبيرة بس الله يسترنا.
وين جانتلج هاي زهرة

اباوع عليها ظلت تحوم بالبيت ونور تهدي بيها واني وحوراء وحدة تباوع بوجه اللاخ
حوراء.. شفتي ريم هاي الي اني خايفة منه

باوعت لحوراء وزاد خوفي .. يعني امج شنو تقصد بهذا كلامها
.. مو كلتلج الموضوع ما ينسكت عنه

وشكل ام مهيمن عظمت الامور فوك ما اني متصورة مدري هو الموضوع بالاصل كبير واني ما جاي افهم عليهم احس كأنه داخلة بدوامة. وما اعرف شلون اخلص نفسي واطلع منها.

يعني همة ليش هيج يحبون يعقدون الامور
الشباب الي تجاوزوا علينا اخذوهم الشرطة خلاص
بعد شنو يردون

ام مهيمن .. ولكم انطوني النقال خلي اتصل على مهيمن

وبعدما اتصلت على مهيمن وحجتله الموضوع كاللها هسه جاي
بعدها دقايق

وكان يندك الباب راحت ام مهيمن لبست عبايتها وفتحت الباب ودخلوا اخوانها اولادهم وكل واحد بيهم شايل سلاح

اتسعت عيوني متعجبة
.. يا ستار شنو صاير دخيلك ربي هذولي بس لا عندهم عركة

ورحت اركض لحوراء
.. حوراء لحكي اجوي خوالج واولادهم و وياهم اسلحة
شكلهم متعاركين عندهم مشكلة

حوراء طفرت من مكانها ولطمت خدها

.. عزة العزاني ولج هذولي اجوي وشدوا حزام الفزعة علمود سالفتنا.
بس لا راح يدكون بيوت اهالي الشباب

حجيت بصوت واهن.. حوراء عفية فهميني وحدة وحدة
احنا شنو دخلنا. وليش السلاح. وشنو يدكون

.. ولج معناها راح تصير طلابة يعني مصيبة. بس الله يستر
يعني مهيمن ما راح يسكت

هي حوراء كالت هيج واني رجلية بادت
وكعدت بالكاع وحطيت ايدي على راسي
صرت ادعي ياربي سترك بس لا يصير على مهيمن
شي من وراي والله. اموت

ورة ربع ساعة وكان يدخلون مهيمن وجلال
وصاح من الباب .. وينهن البنات صيحيهم اريد احجي وياهم

ام مهيمن كالت .. يمة بهداي وية البنات ترة هن
ميتات من الخوف

مهيمن .. رحمة لموتاج صيحيهن خلي افتهم منهن السالفة

رحت وية حوراء للمطبخ ورجلية
رجل تطك برجل

جلال شافنا وكال..خو ما سولكم شي
هزيت راسي بلا

ما اكدر اجاوب من الخوف
مهيمن .. احجولي بالتفصل شلون وكفوا وياكم بالشارع

بدت حوراء تحجي الصار لمهيمن

رفع راسه وباوع علية وكال .. ولج غضب شلون
تفلين بوجه الولد

جاوبته .. مو هو كعد يهدد وكال وصلي الرسالة لابن عمج.

مهيمن.. المفروض منج بهيج امور ما تردين عليهم بسرعة تبتعدين عنهم وترحين للحرس او ترجعين للبيت وتبلغيني رسالتهم وانا اشوف شغلي وياهم
مو تگدين تتراددين وياهم بنص الشارع

انتي مو رجال وتكعدين تتلاوين وياهم
شفتي الساقط من رديتي عليه شسوة بيج
راسا تعدى على سترج

ولوما انتي صايرة فطنة ومتلاحكة لروحج
وشاخطته كان مو بس ينزعج حجابج هاي اذا ما سحلج بالشارع كدام الناس

دنكت وجاوبته بخوف .. اي صحيح اني ضربته بالمبرد
بس والله ما اذيته.بس شوية شخطت ذراعه

جلال..والله عمي كفو منج. بس لو جايبتها بعينه كان ارتاح گلبي

مهيمن سكت جلال وكال .. ولج غضب فهميني انا ما جاي احجي على المبرد
انا جاي احجي عن الي سويتي وكلامج وياه استفز الشباب وهجموا عليج.

نهض من مكانه وكال

.. وعليه من بعد الي صار
انا ما راح اعديها على خير واكبر عيب بحقي اذا سكتت على الي صار بيج

اتوجه للباب يريد يطلع والنار تسعر بوجهه رحت ركضت و قطعت عليه الطريق بخوف
.. لا لا لا عفية مهيمن لا تروح. الله يخليك والله اذا يصير بيك شي اموت.

ام مهيمن كام تلطم .. يمة انهجم بيتي.

مهيمن بعدني عن طريقه
.. ولج ريم بعدي عن طريقي انتي انطيتهم سبب حتى يتطاولون على عرضي
وهاي النتيجة

وانا مو زلمة وشاربي مو علية اليوم اذا ما اسويها دم للركب.

نور
انگلب البيت بلحظة الى حجيم. ريم انهارت بالبجي من بعدما طلع مهيمن
طلع مهيمن وجلال وياه كان جلال يمشي ورة مهيمن مثل ظله احس بعيونه حذر وارتباك من الي كاعد يصير

وبساعتها طلعوا مهيمن وجلال وخواله والشيوخ

وام مهيمن لبست عبايتها وهي لازمة راسها وتولول ووصلت يم الباب ودارت وجها على حوراء وريم وكالت بغضب

.. والله اذا صار على ابني شي بسببكم ، والله محد يخلصكم مني
وانتي حويرة اذا ما بطلتج من المدرسة ما اتسمى زهرة
خليتوا ابني علج بحلك الناس كله منج انتي وياها

كانت تقصد حوراء وريم
وطلعت وسدت الباب ووصتني ما افتح الباب لكائن من كان.

ريم .. يعني ترة همة الي هجموا علينا احنا شنو بيدنا
قابل احنا كللنالهم تعالوا تحارشوا بينا

نور.. صحيح هم الي اجوكم وهددوكم حتى توصلون الرسالة لمهيمن.
بس انتي بجوابج وطلعتج. خربت كلشي.
يعني لو بس ساكتة وما تافلة على الشاب وغالطة عليه ورايحة للحارس
او ترجعين تكولين لمهيمن كان ما صار كل هذا

شفتي لا تستهانين بأبسط الامور لان هي الامور الصغيرة اساس مصايب الناس وهجمان البيوت
وهسة بس الله الي يستر من الجايات

وبقينا اني والبنات بس نترقب شنو الي راح يصير
حوراء خنست وگعدت على صفحة ووجهها اصفر وريم بس تبجي وكل شوية تجيني تتوسل حتى اتصل على
اي واحد تريد تعرف شصار وياهم

التفتت على حوراء. وسألتها حوراء
.. عفية اتصلي على ابن خالج وسأليه شنو الصار

اتصلت حوراء وكعدت تستفسر عن الي صار
وبعدها انهت الاتصال

.. ها بشري شنو گال

.. يكول مهيمن وخوالي راحوا هدوا لمركز الشرطة علمود يطالبون بالشباب الثنين. الموجودين هناك وكلولهم هذولي حصتنا
والضابط معترض ما مسلمهم الشباب

ويكول واهل الشباب اجوي وجابوا شيوخهم لهناك وطلبوا عطوة من شيخ العشيرة ثلاثة ايام وراح تصير كعدت عشاير

اني كنت اسمع قبل عن هيج امور بس ما مارة علية
كعدنا ندعي اني والبنات ان ربي يردهم ساليمن وتعدي السالفة على خير

جلال

اليوم الكعدة صارت بديوان خال مهيمن
انا بالحقيقة انا مو هالگد متطلع عن قوانين العشيرة والفصل.

بس كل الي اعرفه ان انا لازم اكون موجود بصف مهيمن وين ما يروح مستعد ومحضر حالي
خاف تصير عركة ويغدرون بينا

انا والشباب ما كعدنا بالديوان. بقينا لازمين اسلحة وواكفين بباب المضيف ماخذين احتياطاتنا
حتى العشاير البقية كل واحد جايبله درزن زلم ومتحضر

اهالي الشباب كل واحد عشيرته شكل جمعوا شيخوهم وناسهم واجوا حتى يحلون السالفة
اجتمعوا بالديوان ومهيمن جوة كاعد وانا واكف بالباب
واسمع اصواتهم العالية وما افتهمت شي منهم غير بس كلمة صلوا النبي واتعوذوا من ابليس

وكل شوية تگب العيطة. وتحتد المناقشة وتعلى الاصوات هذا اليصيح مايصير هذا الكلام

وهذا الي يكول شباب طايشين ماعندهم احد يردهم
ودامت سالفة الفصل
ثلاثة ايام بس بأيام متفرقة

واخر شي ما كدروا يفضون السالفة لان مهيمن رفض الفصل كانوا اهالي الشباب يردون ينطون فصل فلوس
كتعويض عن الصار

لذلك ما توصلوا لحل وطلعوا من الديوان

ويم باب الديوان. واحد يتوعد للثاني واحد من الشباب
كال .. بسيطة انا اعلمك.

وانا اجيت اهد عليه بس شيخ عشيرة خوال مهيمن لزمني وكال. .. لا تهد يابعد عمك. تنحسب علينا مو عليهم
لان همة بديوانة. جايين

باوعت عليه وجاوبته .. شيخنا ما شفته شبون يهدد

الشيخ وجه كلامه لشيوخ عشاير الشباب
وكال بصوت عالي

.. شوفوا هذا ابن كعد يهدد كدامكم. وانتوا شاهدين
والي رفع السما اذا وكعت حجارة على ابنا. ترة انتوا حصتنا

اباوع لمهيمن غافل خواله وراح زنك الولد ومطله بالگاع. وگال

.. ولك مخنث تهدد منو وحق الكعبة. ما اتسمى مهيمن اذا ما لبستك ثوب نسوان وانا اعرف شلون اخذ حقي منكم

وخواله بسرعة رفعوا مهيمن من على الولد وسحبوه ودخلوه بالديوان والشيوخ البقية. اخذوا ولدهم وراحوا

والشباب الثنين بعدهم بالمركز. والثنين الباقين لحد الان ما لاكيهم
اهلهم هربوهم و مهيمن يطالب بالبقية يريدهم
يكول ما يشفي غليلي الا اخليهم يخيسون بالسجن

وبيومها مهيمن اتصل على ابو حيدر وطلب منه ان ينطي رقم ضابط بالجنايات
ابو حيدر عنده هواي معارف وواسطات

نور
كان البيت هوسة وكله نسوان قرايب ام مهيمن
متجمعات عندها حتى يواسنها
ويستفسرون عن اخبار الگعدة

وريم وحوراء غابوا من المدرسة بأمر من مهيمن

بعد الي صار مهيمن كال
.. راح اخذ للبنات اجازة هاي اليومين الى ان تفض الطلابة.
لان بعد الي صار كلشي اتوقع منهم يسون

سمعت صوت قوري الجاي ورحت اصب جايات للنسوان وحوراء تساعدني
وكلما تدخل وحدة من خالاتها.
تظل تحجي على حوراء وتبهذل احوالها
هي وريم.

.. شنو من بنات انتو ما كاعدات راحة.
شلون توكفون بالشارع وتردون الزلم والله عمي خوش هاي
بنات اخر زمن.

وحوراء تسكت ما تجاوب
وريم تظل تدردم

.. من وصلت للعراق واني مشاكلي بدت. واكتشفت شغلة وحدة ان البنية بالعراق. لازم تسكت سواء كانت صاحبة حق او لا.
ظالمة مظلومة بالحالتين هي غلط

ان سكتت راح يركبون فوك راسي واني الممنونه
وان حجيت راح تصير كل المصايب براسي
ويطلعوني ام لسان. وما استحي وبالاخير البنية هي الضحية الوحيدة من كل هذا

..لكل مجتمع قوانينه. ولازم تخضعين لهاي القوانين حالج حال البقية ريم ترة مو صعبة

بس انتي الي صعبتيها بعدم اهتمامج ان تعرفين معنى تصرفاتج
وادراكج للمواقف الي تجريها لنفسج

بقينا ننتظر رجوع الرجال من الديوان
وصار الليل وراحوا قريبات ام مهيمن ورجعوا مهيمن وجلال
اباوع لريم طلعت من الغرفة. بلهفة. وراحت يم مهيمن تباوع عليه.

راحوا دخلوا كلهم بالهول يم ام مهيمن وكعدوا يفهمونها على الصار بالگعدة

وام مهيمن بخوف.. يعني يمة افهم من كلامك الشغلة ما انحلت

.. لا يمة ما انحلت وانا ما اريدها تنحل
شنو ترديني اوافق يساوموني على ستر بنت عمي بفلوس

.. زين وبعدين شنو الحل اذا انت ما ترضى وهم ما يوافقون على طلبك
ويسلموك ولدهم ، هم يخافون عليهم منو يسلم ابنه بيده

. . خلاص هاي مشكلتهم واظل وراهم لحد ما اجيبهم واحد واحد واخيسهم بالسجن بس خلي يصبرولي

ريم .. عفية مهيمن وافق على الفصل
باوع عليها وكال .. هاي نتيجة تصرفاتج الطايشة
طلع الموضوع من ايدي وصارت شغلة تمس الشرف
وهالشي مو هيّن انزل راسي وامشي بين الناس بسببج

اباوع لريم الليل كله وهي تتكلب مثل السمجة الي مطلعيها من المي ومتكدر تتنفس
. ما تعرف شنو تسوي

وحوراء حالها اضرب من ريم. امها كل شوية تحجي عليها.

جلال
يوم ثاني
انا ومهيمن مثل كل يوم نطلع من الفجر
على شغلنا بنفس الوقت الي متعودين عليه
لان هاي الايام هملنا الشغل

طلعنا ووكفنا بالباب وهو يريد يركب بالسيارة واني ي بصفه
وسألني مهيمن .. اكلك جلال صدك المكينة الهيتر مالتها عطلان الخاص بالسليفان ؟؟

جاوبته.. اي بس لا تخاف وصيت عالادوات راح يجيبوها الي من بغداد وانا اسويها

جنا نحجي
وكان تعبر من يمنا دراجة عليها اثنين شباب ملثمين. ورموا. علينا وانهزموا

مهيمن شافهم قبلي وكان اسرع مني دفعني ووكعنا بالكاع
اثنينا. كانت هي مجرد لحظات مو اكثر

كنت بعدني ما مستوعب الي صار متفاجيء
الناس طلعوا على صوت الرمي

بديت انهض على كيف من الكاع
وانا احجي وية مهيمن وانفض بملابسي
..سووها الناقصين

مهيمن كان ساكت التفتت وكان اشوف
مهيمن بعده مدد بالكاع واكع على وجهه ما يحرك ساكن

انخمط گلبي رحت عليه بسرعة
وقلبته على ظهره وصار ممدد بحظني وكان اشوف بطنه كلها دماية

هو انا شفته هيج وانا اتخبلت. احس اندليت مكان گلبي بلحظتها.
عرفت بأحساس الخوف على الاخ
كان شعور مرعب بشكل ما اتمناه لعدوي

فقدت من منظره و صرت اصيح بصوت مفجوع.
وما اشوف الا الناس فوك راسي كلها ملتمة
وام مهيمن طلعت على الصوت

وشافت ابنها غركان بدمه كدامها وگامت تدك وتلطم على وجهها مفجوعة.
والبنات طلعوا على صوتها

لفت انتباهي حوراء طلعت حافية. وما عليها حجاب وشافت مهيمن وركضت عليها وكعدت يمه بالكاع
ووهي تصرخ وتلطم.
..لاااااااا عفية مهيمن لاااااا تكولها وتكسر ظهري

كل واحد بينا حاله شكل
وانا عقلي فاصل عنهم بغير عالم كان همي الوحيد بهاي اللحظة شلون الحك على مهيمن واوصله للمستشفى

تعاونا انا وكم واحد حتى نصعد مهيمن بالسيارة
كنت مرعوب لا اخسر اخوية.
ربي حتى بعدني ما لحكت اتهنى بي

انتبهت لوحدة من النسوان شمرت عباية على حوراء الي بعدها كاعدة بالگاع فاقدة

وصلنا للمستشفى وهناك استلموه واخذوه من بين ايدية
الحياة اختبار ومرات يجي مع الاختبار صدمة تخليك
تعرف قيمة المقابيل

سمعت صوت وراي وحدة تبجي مثل الطفلة المهضومة

التفتت وكان انصدم بوجود ريم كاعدة بالكاع يم الباب الي دخلوا بي مهيمن
منظرها كان غريب
كانت مكرفصة على نفسها وحاضنة روحها وتحجي بكلام غير مفهوم.

.. كله مني اني السبب
عفية عمو لا تتركني

رحت عليها .. ولج ريم. شلون وصلتي لهنا
منو جابج

اباوع عليها. كانت لابسة شماغ على راسها مثل الحجاب وببجامة البيت

خال مهيمن جاوبني .. بوية انا جبتها ويانا
لگيتها تركض بالشارع ورة سيارتكم مثل المخبلة فاقدة ما تدري بنفسها. وما عليها حجاب وتصيح عمي
وخفت عليها والدنيا فجر كلت لابني يصعدها ويانا
وانطيتها شماغي تستر حالها

اي صدك خوال مهيمن كلهم اجوي ورانا

هواي ناس تفقد عقلها بساعة المصاب ما ينتبهون على حالهم وتكون كل افعالهم وتصرفاتهم صادرة عنهم بدون وعي وادراك

احس بحيلي انهد ورجلية بعد ما بيها حيل تشيلني كعدت بالگاع واتكأت عالحايط المقابيل غرفة الطواريء الي دخلوا مهيمن بيها

كانت الناس تروح وتجي والمستشفى انگلب گلاب بالناس وانا عيني بعدها ثابتة عالباب
منتظر الدكتور يطلع

انتبهت على واحد لزم كتفي وعصره يواسيني
التفتت وكان اشوف عناد. كاعد بصفي بالكاع

وابوه واخوانه كلهم جايين وواكفين يم خوال مهيمن

عناد.. هونها يا صاح
جاوبته وانا ناسي الزعل .. عناد انا جاي انازع بالروح
وبعدها دخلت بسكون عميق ما اتحركت من مكاني

نور
خوف ورعب وصدمة الي صار بمهيمن
عياط ام مهيمن ومنظر حوراء. واختفاء ريم
نساني نفسي والدمعة عاندت وياي

صرت انتقل من شخص لشخص اسأله عن ريم بس لا سوت بروحها شي ياربي سترك

صرت اواسي ام مهيمن وارجع اواسي بحوراء
بعدها ام مهيمن صاحت
.. ولكم اخذوني لابني. لا اكتل روحي

اخوها جاوبها .. شتسوين ترحين وهناك كلها شيوخ وزلم. وصوتج يطلع هناك

ام مهيمن .. والله اذا ما تاخذوني انا اروح.
كامت من مكانها وصاحت
.. وينكم انطوني عبايتي. خلوني اولي. اروح اشوف ابني
شصاير بي محد يرضى يطمني عليه

اخوها .. بوية جيبولها عباية. انا اعرفها ما ترتاح الا تشوفه بعينها

اني ركضت ولبست حجابي والجبة. ورحت وكفت يم ام مهيمن
.. عفية خالة اخذيني وياج

وصلنا للمستشفى وشفنا كل جماعته واقاربه هناك
عيوني كامت تدور على جلال
لكيته كاعد بالكاع وصافن بغير عالم وتشيرته كله دم
كسر گلبي بمنظره
اتمنيت اروح واحضنه واوسيه مثل ما الاخت تواسي اخوها. بس شكل الزمن
حبس مشاعرنا ودفنها وخلانا نخجل نعلن عنها

وهناااك وكان اشوف ريم رحت عليها وكومتها من الكاع واخذتها يم ام مهيمن
ريم كانت بس ترجف والعيون ذبلانة من البجي

وخالهم حسن بس شاف اخته اجة علينا
ام مهيمن .. خوية ابو مؤمل انشدك. على ابني كلي
شلونه

.. تعالي بالاول كعدي هنا واخدنا على صفحة وكعدنا
على كراسي مخصصة للمراجعين الي بالمستشفى

كعدنا وصار يفهم ام مهيمن عن الصار
.. بعدنا كلنا منتظرين بس لا تخافين ان شاء الله ما بي شي

دقايق وطلع الدكتور من غرفة الطورايء. وجلال بسرعة كام من مكانه. واتجه هو وخوال مهيمن على الدكتور

.. ها دكتور طمنا على اخوي
الدكتور ابتسم وكال .. الحمدلله على سلامة اخوك
اصابته طفيفة. لان الطلقة جاية شطح من الخاصرة

ام مهيمن سجدت بالگاع وصارت تحمد ربها وتشكره

جلال

كنت حابس انفاسي لكن كلام الطبيب طمني عن مهيمن
تنفست براحة. والتفتت على اولاد خوال مهيمن وكلت

.. انا اعرف منو الي سوى الدكة الناقصة بأخوية
وانا راح عليهم. احرك بيوتهم

رحت طلعت من المستشفى وتركتهم وراية. التفتت
لكيت اولاد خواله كلهم. متحزمين

واحد منهم كال.. جلال اخذنا وياك ما تروح لوحدك
كل واحد صعد بالسيارة الي جاي بيها

صعدت بسارة مهيمن واتفاجئت من انفتح باب السيارة الثاني وكعد يمي عناد

غمضت عيوني وحجيت .. عناد شتسوي هنا انا رايح طالب ثار
عناد بعيون تلمع كال .. صاح انا وياك وين ماتروح

غمضت عيوني بصبر وشغلت السيارة وعفته مو وكت الزعل انا بيا حال
انا هسة كون الله يوليني على هذولي السفلة الي رموا مهيمن
والله ما ارحم ولا واحد بيهم

اباوع لعناد على طول الطريق يتصل كان بالي مو يمه
كل شوية يحجي وية واحد وينطي تعليمات

منا لحد ما وصلنا لبيت الشباب. لگينا مفارز الشرطة
موجودة تنتظرنا

نزلت من السيارة وسألت .. الشرطة. شنو عدهم هنا شلون عرفوا احنا جايين هدادة عليهم

عناد .. جلال انا اتصلت على كم واحد من جماعتي
وهمة اي دزوا مفارز الشرطة ولزموا واحد من الشباب الي كانوا شاردين

باوعت عليه وزنگته من ياخة قميصه
.. انت منو طلب منك تتصرف ، بس كول هسة اني شلون اخذ حق اخوية
وارد الصاع صاعين واحرك گلوبهم مثلما حركوا گلبي

عناد ما قاوم وجاوبني.. صدگني جلال راح تشكرني بعدين على الي سويته

لان انت هسة غضبك متحكم بأفعالك اذا خليتك تسوي الي براسك صدگني الدم راح يجيب الدم وما راح تنتهي الا يموت واحد بيكم

دفعته حيل وكلت .. عناد وخر من وجهي ولا تخليني اشوفك. غدرتني بهاي سوايتك

بس بسيطة ما علينا وين يرحون

وفعلاً طلع كلام عناد صحيح. جماعته لازمين واحد من الشباب الثنين الي كانوا شاردين

وبعد ما لزموه وضيفوا بالحبس اعترف بعظمة لسانه انه
هو وصاحبه الثاني رموا علينا وانطاهم مكان صاحبه الثاني

وراحوا الشرطة والقوا القبض على الثاني
كله هذا صار خلال سبع ساعات
ورغم الي صار بس ما اعترفت بفضل عناد وموقفه

بقيت متمسك ومعبس وجهي وهو بقى مرافقني وين ما اروح ما يعوفني

كنت كاعد بالمستشفى وكمت من مكاني
باوعت لعناد هو راسا نهض

درت وجهي عليه وكلت .. خير سالمين انا رايح للحمام شعندك كايم وراية
عناد. ابتسم وكال .. مو ادري بيك الشر متربع براسك. خايف تسوي شي

غمضت عيوني .. شكلك باقي لزكة

نور
بقينا اني وخالتي وريم كاعدات بالمستشفى
وخالتي تدهورت صحتها والتهيت بيها
واخوانها خطية انخبصوا خبص واخذناها لطواريء النساء

شافوا ضغطها ولكوه مرتفع
انطوها ابرة خلتها شوية تنام
تركتها بعد ما اتطمن عليها واتذكرت ريم الي كانت كاعدة لوحدها بغير عالم
ورحت يمها كعدت ولزمت ايدها كانت قالب ثلج
. همست بصوت ناصي
.. ريم باوعي علية وسمعيني زين
درت راسها وحطيت عيني بعينها

كانت نظراتها ضايعة .. ريم مهيمن زين وما بي شي
هزت راسها بخوف ونزلت دموعها
وحجت بصوت متجرح .. كولي والله مهيمن ما بي شي

.. والله صحته تمام والاصابة مو خطيرة
حطت راسها بحضني وكامت تبجي وتكول

.. والله اذا صار على مهيمن شي ما اسامح نفسي
رجعت رفعت راسها وكالت

.. بس يطلع مهيمن من المستشفى راح ابدي اغير من نفسي وبعد ما اسوي مشاكل
واصير مثلج مثلما كان. مهيمن يتمنى

دمعت عيوني على كلامها عن مهيمن
وكلتلها.. ريم لا تلومين نفسج الي صار كله قضاء وقدر
صيري قوية.

هزت راسها برفض وكالت.. لا نور صوجي اني
كان دائما عمو مؤيد يكولي انتي وين ما ترحين تسوين مشاكل. وفعلاً كلامه.

ريم كسرت خاطري. جاي تحمل نفسها اصابة مهيمن
ومناك حوراء الي تركتها منهارة بحضن خالتها
ما اعرف شصار بينا حياتنا انگلبت فوك حدر

كنت حاضنة ريم وامسح بدموعها
وكان واحد يجي علينا ويمدلنا. علاكة
رفعت راسي وكان اشوف عناد. كدامي

اجتي عيني بعينه. كان ينظر لي بلهفة

لكن بسرعة اتلاحك. لروحه. نزل راسه وكال
.. نور هاي شوية عصاير وماي وكيك
انتبهت عليكم باقين على كعدتكم ما اتحركتوا ولا اكلتولكم شي

اخذتها منه وايدية ترجف. وشكرته بصوت ناصي
يمكن حتى ما سمعني
تركنا وراح. واني دخلت مشاعري بحالة فوضى

ورة ساعتين اجة جلال وكال
.. نور اريدكم ترجعون انتي وريم وخالتي للبيت
وانا راح ابات يم مهيمن بالمستشفى

وبيومها بالكوة كدرنا نقنع ام مهيمن ترجع ويانا
للبيت.

جلال
كنت كاعد بالليل يم مهيمن وسمعته بالليل يهذي
بأسم ريم

ابتسمت. واستغليت الفرصة وصورته فديو
خلي يكوم بالسلامة واراويه

كل شوية اباوع عليه واضحك
خرب يومه طلع اخوية مو هين
ولا مبين عليه ، اثاري الزلمة غركان بحب باربي
وما يحجي ههههههه

الساعة بالوحدة بالليل مهيمن صحى
وسألني وانا كعدت احجيله عن الصار. من بعده وعن صحته.
اتحرك وهو متأذي.
وكال بصوت تعبان .. ااااااااخ ولك جلال انت متأكد الرصاصة جاي شطح.

.. اي والله هذا كلام الدكتور
.. ليش احس بخاصرتي مقصومة نصين ما اكدر اتنفس

.. اي غير هي طلقة قابل شوية
.. كلي انت شتسوي هنا ليش ما بتت بالبيت الاهل منو يمهم

.. ماكدرت اتركك لوحدك
.. شعليه قابل انا صغير بس البيت ما يصير نعوفهم
لوحدهم محد يمهم. كلشي يصير

.. لا تخاف الشرطة لزموا الي رموا علينا
وكعدت احجيليه عن موقف عناد

مهيمن.. الي سواه عناد عين العقل
مرات العرايك مو حل حتى تاخذ حقك

بس طمني ما كالوا شوكت اطلع طكت روحي
.. بعدنا ما گلنا حلال

......
نور
يوم ثاني خالة كعدت من الصبح وكامت تطبخ
واني وياها اساعدها حتى تاخذه لمهيمن

ام مهيمن.. اكل المستشفى مايلزم الگلب

اباوع لحوراء دخلت للمطبخ وتباوع لأمها بس ام مهيمن بعدها ما تحجي وياها

وحوراء متأذية على زعل امها
وريم ما اقتربت لأم مهيمن ولا احتكت بيها

اجة ابن خال مهيمن حتى ياخذ الاكل وام مهيمن لبست عباتها وكالت تاخذني وياك
واني هم حضرت نفسي حتى اروح وياها ما اكدر اعوفها تروح لوحدها
هي صحتها ما تساعد خطية لطالما تطبخ
ايديها ترجف

وصلنا للمستشفى ولكينا
هواي ناس واكفين يم غرفة مهيمن
واخوان ام مهيمن بس شافونا
فسحولنا مجال حتى ندخل يم مهيمن بعدما طلعوا

جماعته من الغرفة
دخلت ام مهيمن وحضنت ابنها وكامت تبجي
واني بقيت واكفة بمكاني مترددة. اقترب منه وكلت
.. الحمدلله على سلامتك مهيمن
باوع وعيونه بيهم حنان علية ومد ايده يدعوني اقترب منه

........
نور
المكان في المستشفى

طلعت من الحمامات وكان اشوف عناد بوجهي
صارت عيني بعينه وارتبكت

دنكت وردت اكمل طريقي
لكن صوته استوقفني وكال

عناد .. نور لحظة

يتبع

مع تحيات اختكم نهى الحسون