قضية لم الشمل

البارت الرابع والعشرون

#الكاتبة_نهى_الحسون
#قضية_لم_الشمل

السلام عليكم ورحمة الله وبركاته
اسعد الله مساءكم يا احبتي المتابعين ❤️

تحية خاصة الى كل المتابعين الي دعموني وتابعوني وصوتوا للقصة
لكم مني جزيل الشكر على تعاونكم وتفهمكم
حقاً جعلتموني افتخر بكم🌹🌹🌹.

ريم
بالمدرسة ، والامتحانات شرفت
هلكت بالدراسة ونور خطية ما قصرت وياية
وفعلاً حسيت بفرق وصرت افهم بالمواد

صحيح كان شهر امتحانات لكن هذا الشي ما كدر يشغل
صبا عن مشاحناتها وياية اني وحوراء وكل شوية
تشمرلنا كلام ومرات تخلي البنات تضحك علينا

واكثر شي تستغل الفرصة من تلكاني كاعدة لوحدي تكوم تغرد بالزايد
واني اغلس عليها ما اجاوبها
بالحقيقة هيج نماذج. مو جديدة علية
ياما مرت علية هيج تصرفات وبنات متنمرات
بس اني كان تصرفي اتحاشاهم وما اجاوبهم وبعدين يتعبون ويروحون
بس شكل صبا مطولة الى ان تتعب

واني بطبعي اكره المشاكل والعراك
وهي شكلها مبين عليها عراكة درجة اولى
فكفاً للمشاكل كلت احسن شي اهملها وما اجاوبها ابد

لكن الامور تختلف اذا كانت حوراء موجودة. لان حوراء ما تفوتلها كلمة تنطيها الكلمة بعشرة

حوراء .. هي انتي وين صافنة حطي بالج يمي راح اكوم اشتري عصير وبتيتة فينگر من الكافتريا
تردين اشتريلج وياي

طلعت فلوس من جنطتي وانطيتها
باوعتلي وكالت.. شنو تردين مهيمن يزفني

غمضت عيوني بصبر .. بس ما يصير هيج اني عندي راتبي واكدر اصرف منه
الى متى مهيمن يبقى ينطني مصرف انا ما اقبل اخذ منه
كل مرة اسكت بس لهنا وكافي

حوراء.. هاي شنو بايسن كلك حركات. ولا عرفتك
كناري صاير تبيع ثگل علينا يمعودة.
اصرف ما في الجيب يأتيك مافي الغيب

جاوبتها.. اي بس ما يصير احس جاي استغله

.. خلي فلوسج عندج. وخلي اخوي يحرك جيبه انتي
شبيج ضايجة هو بكيفه يريد يصرف على بنت عمه

تركتني وراحت تشتري
واني بقيت كاعدة بالرحلة اراجع الاجوبة. وية صديقتي
ورة عشر دقايق باوعت للساعة هاي وين صارت
اي مو الفرصة راح تخلص شوكت ناكل

صديقتي جاوبتني .. هسة تلكين الكافتريا صايرة هوسة من الازدحام

كنا نحجي وكان تدخل للصف وحدة تركض

وكالت .. ريم لحگي حوراء بنت عمج زلكت ووكعت على ظهرها
ما نعرف شبيها بس لا انكسرت

شهكت بخوف وطفرت من مكاني
.. يااا عيني عليج حور

ورحت ركض ورة البنية
كانت المدرسة كلش كبيرة. ومتكونة من طابقين واحنا صفنا فوك بالطابق الثاني

كنت اركض ورة البنية واسألها
.. كليلي شلون وكعت

اباوع للبنية تمشي وتتلفت وراحت ورة الساحة
.. اكلج يا بنية هي حوراء راحت للكافتربا شوصلها ورة الحمامات

انتبهت المكان هنا كان هاديء كانت بي فقط كم بنية ينعدون بالاصابع

عكس بقية اماكن المدرسة ،هذا المكان عبارة عن ساحة ترابية صغيرة خلف الحمامات كان لتجمعات البنات السرية

مثلاً الي تريد تحف وجهها او مرات يلتمون البنات ياخذون خيرة بالقاموس وسوالف وكذا او الي تريد تتصل. وعندها تلفون سري وغيرها من الامور

وبين ما كنت اتسائل وادور بعيوني عن حوراء
فجأة طلعت كدامي صبا وصديقاتها وقطعوا علية الطريق

جمدت واكفة بمكاني وعيوني شاخصة تباوعلها بخوف وحذر اتقدمت علية هي وصديقاتها

والشرمبين بعيونهن ارتديت للخلف مرعوبة.
وسألتها .. هاي شششنو صبا ؟؟؟؟؟؟؟

صبا بخبث .. لج انا من تالي وكت انفصل من المدرسة من وراج وينطوني انذار علمود حضرت جنابج ها ولج

عزة ليش اليوم صبا مو غايبة شجابها للمدرسة.
حسيت اكو كمين بالموضوع
بلعت ريكي واني اتلفت منا ومنا ادور على واحد يفزعلي الا من معين يرحم بحالي

يمكن هسة لو يذبحوني ويدفنوني هنا محد راح يسمع لي خبر

رجعت باوعت عليهن. كانت صبا تحجي وياي وتتقدم
بتجاهي كانت قاطعة علية الطريق

كلتلها .. صبا اني ما سويت لج شي انتي ردتي تورطيني بمكالمة وية ولد واني رفضت يعني انتي الي بديتي بالاول

صبا.. اكلج انتي ما تكولين على شنو شايفة نفسج
لو اعرف الشباب شنو عاجبهم بيج وهيج كاتلين نفسهم عليج. كان ارتاحيت

جاوبتها .. اني ما اريدهم اخذيهم الج اني متنازلة عنهم بس خليني اروح ارجع للصف

كانت محاولتي عقيمة مثل طفل يحاول يقنع ذئب ان يروح ياكل جزرة

ضحكت صبا ودارت وجهها عالبنات
وكالت .. يالله بنات شوفوا شغلكم مثلما اتفقنا

وهن البنات باوعوا علية وابتسموا بخباثة
وحدة طلعت مكص من جيبها والثانية طلعت لاصق

يمة اني شفتهم هيج ارتديت للخلف
وكان اطكها ركضة مثل بيب بيب. ما يشوفون الا غباري

بس مع الاسف هن ركضن وراي وكانوا اسرع مني ما لحكت اجتاز الساحة الترابية

و لزموني وكتفوني اثنينهن والثالثة اجتي هي ومكصها
واني صرت اتلاوة جوة ايدهن احاول ادافع عن نفسي

مددني بالگاع بالتراب
وصارت تكص بملابسي بالصدرية. والقميص
اني كمت اصرخ مفزوعة خايفة يسولي شي

وكان يجيني راشدي من ست صبا
وجتي الثانية فتحت اللاصق تريد تلصقه على شفايفي
كنت خايفة ومرعوبة

ويمكن لو يذبحوني ما يلكون قطرة دم بية.
رجلية بادت من الخوف
وكنت اتلاوة جوة ايدهن اقاومهم. حتى ابعدهن عني

.. لج صباااااااا لاااااااا ملابسيييي

حاولت انهض بس وكعت بالكاع مرة الثانية
وصبا گامت ترفسني ببطني

كنت اتلوى من الالم واني لا زلت مستمرة اصرخ وما انطيت مجال لصديقتها. تكمم حلگي

كنت ما ازال اقاوم بس فجاءة سمعت اصوات هوسة مال بنات
ما احس الا وتجيني العجاجة من نهاية الساحة. رفعت راسي وكان اشوف

المنقذ مالتي حوراء كانت جاية تركض مشنفة ردانها مستعدة للعركة ولازمة بيدها عصا
وموبس هيج

وجامعة بنات خوالها وخالاتها الي يداومن ويانا بالمدرسة
بس بصفوف متفرقة كان بيهم سبع بنات وحوراء الثامنة

كانت حوراء تركض مترأسة العصابة
انتبهت كل وحدة بيهن لازمة بيدها شي تهد بي حتى نغم كانت حاضرة وشايلة بيدها كتاب ضخم ما اعرف مال يا مادة

وكفوا المجموعتين وحدة مقابيل الثانية ببعد مسافة خمس مترات مجموعة حوراء ومجموعة صبا

وانا لازلت على وضعي ممددة بالكاع بالنص
حاولت انهض من مكاني بالكوة لا اروح بالرجلين

حوراء. بغيض تتوعد
.. ولج صبية اذا ما اليوم نتفت شعرج ما اكون
حوراء بنت زهرة

التفتت على بنات خوالها وخالاتها وكالت
.. يالله بنات راونا همتكم اليوم عالوا بينا نريد فزعتكم
وصاحت بصوت عالي

..يلة بنااااات

بس عود شنو هي حوراء صاحت يلة بنات
وما اشوف الا الترابه. گامت وصارت عجاجة تگول ساحة حرب مو مدرسة

واني وكفت مستندة على الحايط ولازمة بطني كنت خايفة ومتأذية و بنفس الوقت اراقب العركة

اريد افتهم شنو الموضوع منو الي انتصر ومنو المهزوم ماكو بس ترابة وگايمة زائداً. عياط

.. آآآآي.. آآآآي ولج اااخ
.. شعري .. شعري
.. عوبة عوفي شعري
.. حجااااااابي ..

بالحقيقة هذا كل الي كدرت اسمعه
من العركة طبعاً هاي من غير الغلط والسب
وفردة حذاء تطير بالهوى حجاب ينشمر

بس لفت انتاهي دور نغم بالعركة
الي توكع يم رجليها تركعها على راسها بالكتاب ما تنطيها مجال تكوم
اني من يمي راسي گام يوجعني من ورة صوت السطرة

كنت مستندة عالحايط بطني تكطعني من الالم

وعيوني تدور على حوراء خايفة عليها
وهناااااااااك. وكان اشوف حوراء مددة صبا بالكاع وصاعدة فوكها. ولازمة المكص وجاي تكص بكذلتها
واسمع ذيج بس تعيط

.. لج لاااااا حيوانة. والله اذا لمستي شعري ايدج اكصها
حوراء لزمت الكذلة وكالت .. يالله هاي انا راح اكص
عطوبج بالله راويني شراح تسوين

بدوا بقية. الطالبات يتجمهرون حولنا بس يباوعون ما يسون شي

كانت الهوسة كايمة. وكان تجي المديرة والمعاونات
وكم مدرسة. وكعدوا يفرقون بالبنات. والمديرة كعدت ترزل وتتوعد بيهن

وسحبونا كلنا عالادارة
دخلنا. لغرفة المديرة
وصبا وجماعتها وكفوا على صفحة بزاوية. الغرفة كان ملعوب بخلقتهن لعب

اما اني وحوراء وبنات خالها كنا واكفات صف واحد
كدام مكتب المديرة

اباوع لملابسي المشككة والردان مكصوصه
وشعري منكوش. التفتت اعاين على البقية كان شكلهن ارحم مني بس الصداري كلها متربة
والشالات معووجة كان شكلنا تحفة
مال واحد ياخذلنا صورة ويكتب عليها ( كي لا ننسى)

المديرة بتأنيب .. صدك جذب تحجون. عود هاي انتوا
بنات العوائل المحترمات تتصرفون بهذا الشكل لعد شنو بقيتوا
للصايعات

حوراء.. ست بس خلي افهمج
المديرة.. اششش ولا كلمة. محد تفتح حلكها بأي حرف
اتصلت على اولياء اموركم. واتفاهم وياهم

والتفتت على صبا. وكالت .. وانتي ست صبا
انتي اليوم مو على اساس غايبة ومسجلينج غياب بدفتر الحضور
يس كوليلي شلون يعني بالله ظهرتي بقدرة قادر بداخل المدرسة

صبا.. ست اني مداومة من الاول بس كنت مريضة ما كدرت ادخل اي درس

المديرة .. اشششش انتي الثانية ما اسمعلج ولا صوت
شبيج مريضه من تعاركتي شو صايحة مابيج شي
دزيت على اولياء اموركم انا ما يصرفلي استقبل هيج نماذج. بمدرستي

قطعت كلامها وصاحت الفراشة

وطلبت منها. تصيح كم وحدة من الطالبات الي كانوا موجودين وشاهدين على العركة. حتى تفتهم منهم القصة.

حتى تحكم منو الظالم ومنو المظلوم

الطالبة الاولى كالت .. ست كنا كاعدين بالصف اني وريم نراجع الاجوبة
ودخلت وحدة للصف وصاحت لريم وكالتلها بنت عمج وكعت

وريم راحت ركضت وانا بين ما ضميت كتبي ورحت اركض ورة ريم بمسافة حتى نشوف حوراء شبيها ووين وكعت بس استغربت البنية اخذت ريم لخلف الحمامات. وكان اشوف صبا وصديقاتها

وصارت البنية تحجي للمديرة عن كل كلام صبا وياي
اما الطالبة الثانية كالت
.. ست احنا وحوراء كنا نشتري من الكافتريا
واجتي نجود

كان اسم الطالبة الاولى. وكالت لحكوا بنات صبا
راح تأذي ريم. مسويلها كمين

واحنا كلنا ركضنا حتى نشوف شنو جاي يصير.
وحوراء ركضت وهي تركض بالساحة كامت تصيح لأقاربها ولمت بنات خوالها وخالاتها كلهم
وطلعت بيهم نفير عام وراحت لمكان صبا وريم

والطالبة الثالثة كالت .. ست اني اكلج الحقيقة كولها
ريم كانت تتواعد مع ولد وهذا الولد. دائما يحجي وياها

بالنقال. ومن سمعت بصبا هنا راحت عليها وصارت تتوسل بيها علمود تنطيها النقال. حتى تحجي وية الشاب
وصبا كلتلها احترمي نفسج انا ما اجيب نقالات للمدرسة

اني باوعت عليها متفاجئة من كذبها والتفتت على المديرة
.. ست والله كذابة وتتبلى علية

المدير.. ليش ريم تنكرين مو على اساس صبا صاحبتج وكنتي كله تمشين وياها

بس احب اكولكم لا عبالكم. احنا ما نعرف شنو يصير من ورانا

واستمر حبل الشهود ما بين معنا وعلينا
وحوراء كل شوية تصيح .. والله جذابات ست لا تصدكيهم

وهي كلها بصفحة واني كنت ابجي على منظري وشكلي والكشخة كلها خربت
النوبة المديرة اتصلت على مهيمن وخواله. وطلبت منهم يحضرون فورا للمدرسة

هسة اني بهاي اللحظة اتمنى اتبخر بالجو واختفي
من ورة الخوف والترقب اليوم كلها التمت فوك راسي

ياربي شلون ورطة هاي
همست بصوت تعبان
.. ياربي سترك

حوراء.. خرب بالحظ ولج اتصلوا على قباض الارواح اليوم شيخلصنا اليوم

اجتي الفراشة. وانطتني عباية من بيتهم لان هم عايشين بالمدرسة والفراشة تصير مرت الحارس

باوعت للعباية بغرابة لا ونوب عباية راس ولونها من كثر الاستعمال گالب اسود مخضر يعني شطلع بيها

اخذتها حوراء منها وكالت
.. مشكورة خالة باجر نرجعها الج

انطتني اياها وكالت .. هاج ستري روحج انا وصيت الفراشة تجيبلج شي من بيتهم تلبسينه
قبل لا يجي مهيمن ويشوف منظرج والله يحرك الدنيا

هزيت راسي برفض .. لا لا عفية خليني هشكل ولا البس هاي العباية والله اتخبل اذا حطيتها على جسمي

.. ماشي براحتج ابقي هيج اني مالي دخل
وخلي مهيمن يجي ويشوف عرض الزنود والزرور الي انتي مسويته

حتى ما يخبلج من صدك
انصحج تلبسيها لان انتي بكل الاحوال راح تتخبلين
علينا

عقجت وجهي ولبست العباية على راسي واني
حاصرتني البجية

حوراء بابتسامة معوقة كالت .. اي هسة صرتي شحلاتج جنج سعدية ام اللبن

كنا نحجي وكان يدخل مهيمن وجلال
وكم واحد من خواله عزة اباوع لمهيمن عيونه نار
وعروكه مبينة من راسه من الغضب
واهل صبا والبنات هم اجوي

همست لا ارادي.. ولج حوراء شلون بينا مهيمن عبالك وحش

حوراء ما جاوبتني بس اسمعها تقرة ايات
((وجعانا من بين ايديهم سدا ومن خلفهم سدا فأغشيناهم فهم لايبصرون ))

دارت وجهها علية وكالت .. ان شاء الله نتقابل بالجنة واشوفج هناك بس خاف اموت قبلج
اطلب منج طلب واحد سلميلي على امي وكليلها بنت جانت خوش بنية

اخذت نفس عميق وصرت اهدي نفسي
.. اني ما مسوية شي حتى اخاف منه
والمفروض ما اخاف

بس شكل مجتمعهم لازم البنية تخاف بكل الاحوال سواء كانت ظالمة او مظلومة.
وهالشي يحسسني بالظلم اكثر من ظلم صبا الي

وصارت المديرة تحجي لأولياء الامور عن الي صار
وحجت لهم عن كل كلام الشهود الي النا والي علينا

كانت هي تحجي وعيون مهيمن وجلال كل شوية يباوعون علينا اني وحوراء

المديرة كملت كلامها والتفتت على مهيمن
.. واختك الحبابة هاي ما شاءالله الطالبة الشاطرة.
حشمت قريباتها وراحت هدادة على البنات
يعني هاي بدال ما تجي للادارة وتكللنا اشو راحت تتعارك وياهم

كانت المديرة تحجي بحيادية وية عوائل البنات
كلهم حتى تتجنب المشاكل

مهيمن باوع علية وكام من مكانه
ووكف كدامي دنكت راسي اني وحوراء

كال .. بالله شو رفعي راسج خلي اشوف
رفعت راسي وشفايفي ترجف بية بجية
التفت على المديرة وكال

.. احلفج بالله هاي شكلها مال وحدة تعتدي على وحدة مثل هاي واشر على صبا

وكان واحد من اهل صبا زمخ بي
.. احترم نفسك وانتبه لكلامك. شنو شبيها بتنا. دشوف
شكلها هي هم مكتولة مثل بتكم

اني منا موجوعة من الم بطني وفوكاها الخوف والرهبة من الموقف

ونوب هذولي يصيحون بينهم وجلال واكف كدام مهيمن حتى يردعه ما يهد

وذولاك مناك هم كل واحد بيهم يكول بنتي سلام الله عليها ما يطلع منها هيج شي

لعد منو الي سوة العركة امي. اشو الكل طلع مظلوم وشككوني بروحي

وبعد الجر والعر ما طلعنا بنتيجة والمديرة
كالت .. رجاءاً بدون عرايك هاي مدرسة محترمة مو سوك اذا تردون تتعاركون. تتفضلون برة خارج المدرسة وتعاركوا

مهيمن .. ما دامها مدرستكم . محترمة ممكن اعرف ليش
اجي الكة اختي وبنت عمي. معتدين عليهم ومتعرضات للتهديد.، اكدر اعرف وين. جانت ادارة المدرسة المحترمة من صارت العركة انتوا شنو دوركم بالضبط

المديرة .. ياعيني هن حشى مو بنات وحوش.
رايحات يتعاركن ورة المدرسة وبالحقيقة الي تتعارك تعكس بيئتها

وبعد الاخذ والعطاء بالكلام
كم واحد من اولياء الامور وافق يتنازل ويوقع ورقة تعهد ان الادارة. لا تتحمل مسؤلية البنات المذكورة اسماءهم نتيجة تصرفهم الغير مقبول الخارج عن. نظام المدرسة

ومن ضمن الي وقعوا بيت اهل صبا واخذوا بنتهم مع فصل ثلاث ايام. وتنزيل درجة السلوك
بوثيقتها المدرسية

ومهيمن وخواله رفضوا يوقعون على الورقة
خالهم حسن كال
.. شوفي ست المديرة احنا ما راح نوقع على هاي الورقة لان هالشي يحط من قدر بناتنا وسمعتهن

وعلى فكرة احنا كلنا نعرف منو العايل
وانتي وحدة من الناس تعرفين كلش زين هاي الطالبة

كان يقصد على صبا
وانا متأكد سبق وان جايتج كم شكوى عليها
فمو من المعقول تساوين بناتنا وياهن
حق الله هسة احنا نگاوم اهالي البنات ونسويها كعدة عشاير

بس بنفس الوقت احنا ما نرضاها مدرستكم تتعرض للتخريب والتهديد
احنا ناس تخاف الله وحقنا ما يضيع

المديرة .. حجي كلامك على راسي وانت مبين عليك
شخص تعرف بالقانون والاصول
بس هم الصوج من بتكم ريم

واشرت علية والعيون كلها التفتت علية
صار شكلي مثل الحرامي الهارب من السجن من يسلطون عليه الاضواء حتى يقبضون عليه
بلعت ريكي

مهيمن عقد حواجبه وسألها بشك .. ليش شبيها ريم
المديرة .. هي هم كانت من فترة مرافقة صبا ودائماً تمشي وياها

مهيمن .. مستحيل ريم ما تسويها تعرف انا الف مرة محذر البيت من زمن واختها

المديرة.. هاي اختك حوراء. كدامك واسألها
دارت على حوراء وكالت
.. ماما حوراء بنت عمج ريم كانت تمشي وية صبا لولا

حوراء دنكت راسها وهزته بموافقة
وبعدها كالت .. اي. بس ست ريم تركتها لصبا

المديرة .. حتى بعد ما تركتها المشاكل زادت ما نقصت حوراء احجي كم مرة. صارت مشكلة بين ريم وصبا ويجيبوهم للادارة يمي

حوراء.. ثلاث مرات
التفتت المديرة. على مهيمن وكالت
.. شفت انا ما جاي اتبلى على بنت عمك

مهيمن .. اكدر اعرف على شنو المشاكل الي صارت بينهم

.. مشاكلهم كلها علمود سالفة شباب طبعاً اعرف هذا الشي مالي حق احجي بي بس لازم احجي حتى انتوا هم تكونون على بينة ومعرفة بالامور
وتعلمون بناتكم يبتعدون عن هيج نماذج

اني هذا كل الي اكدر. عليه تعرفون ماكو امان.
وصاير التهديد بفلس وحصرة على المدير يصدر قرار عقوبة بحق طالب اذا مو يوم ثاني يهدون بيته على راسه

هي كانت تحجي ومهيمن صار وجهه احمر من الغضب

اريد احجي ادافع عن نفسي بس هم هنا محد ينطي مجال
.. ست الكل يعرف اني قطعت علاقتي بيها وهي ظلت تلحكني وين ما اروح يعني مو ذنبي

مهيمن حجة من بين اسنانه وكال
.. ريم سدي الموضوع

المديرة كملت كلامها وية خال مهيمن
.. شوف حجي اني هالمرة راح اعفيكم من التوقيع على الورقة. وهاي لخاطر جيتكم

ولان اعرف ببناتكم طالبات مؤدبات وشاطرات
بس بعد اذا صارت مرة الثانية اني تعذروني اتخذ غير اجراءات

طلعوا خواله واخذوا بناتهم ومهيمن انطى السويج مالت السيارة لجلال وكله اخذ البنات وصعدهن بالسيارة

وطلعنا من المدرسة
وجلال يباوع لشكلنا اني وحوراء وكان كوة لازم نفسه ما يعلق كال
.. الحمدلله على سلامتكم شباب

باوع علية وكال
.. تصدگين باربي ولا عرفتج وانتي لابسة العباية
طالعة تشبهين س........

جاوبته واني معبسه وضايجة .. اعرف لا تكمل طالعة اشبه سعدية ام اللبن
ابتسم وگال .. اي والله صدك هاي شلون عرفتي

فتحلنا باب السيارة واني صعدت بالاول وحوراء صعدت وراي وهو بقى واكف وفاتح الباب ويباوع على حوراء

وكال .. اكول جعفرري. انت هم طلعت مو هين وينخاف منك صاير عراك المنطقة وتلم الشلة وتعزمهم عالعركة والله فاجئتني

حوراء باوعت علية وكالت بصوت ناصي
.. اكلج هذا ابن عمج منين ينطفي. كليله خلي يسكت لا ابتلي بي واسحله بنص الشارع
مثلما سحلت صبية

هو انا اليوم مكتولة مكتولة اخلي اسحله واريح الناس من عيونه ااااقصد من ثقل دمه

جلال.. الله يكفينا شرك ياجعفوري

حوراء.. جعفوري بعينك ابو عيون الحول

سد الباب وهو خربان ضحك على كلام حوراء
ومهيمن طلع من المدرسة وصعد بالسيارة

انگلب جو السيارة هدووووء سكون
الوضع ينطبق عليه مقولة الهدوء الذي يسبق العاصفة

نور
كنا بالبيت اني وخالتي وكان يدخلون علينا ريم وحوراء
وشكلهم ملعوب بي طوبه
وخالة شافتهم ولطمت على صدرها

.. يمة صخام ولك مهيمن شبيهم بناتنا
ياهو الي مسوي بيهن هشكل

مهيمن.. الخواتين متعاركات بالمدرسة

ام مهيمن لطمت على صدرها .. يايمة اسم الرحمن
ويامن اتعاركن

كانت خالة تسأل بمهيمن وهو يجاوبها
واني عيوني تتفحص شكل البنات
كانت ريم اكثر وحدة متضررة. ووجها اصفر ولازمة بطنها تتلوى. مبينة من عقدت حواجبها جاي تتألم

رحت وكفت يمها اتطمن عليها

ام مهيمن دارت على حوراء
.. ها ولج حويرة صايرة تتعاركين بالمدرسة هاي من تالي وقت

اجتي حوراء ووكفت وراي تحتمي بية وكالت
.. شوفي يمة انتي تعرفيني كلش زين ما احب العرايك

ريم كالت بصوت موجوع
.. والله خالة انا اشهد حوراء بنية مسالمة

كنت احجي وية خالة واتذكرت شكل حوراء الي كانت تركض ولازمة بيدها العصى كان شكلها بذيج اللحظة
بعيد كل البعد. عن المسالمة

حوراء.. بس هن صبا وشلتها عالوا بينا
لكيتهم ماخذات ريم ورة الحمامات
ويضربن بيها وشكو عليها ملابسها

مهيمن بصوت هادي بس بي تحذير
.. حوراء صوتج ما اريد اسمعه.
هسة ترحين انتي وهاي اليمج وتبدلون ملابسكم وحسابي وياكم بعدين

اباوع لريم رفعت راسها وباوعت لمهيمن بنظرة عتاب
حسيت على جسمها ارتعد جوة ايدي

ريم .. اني عندي اسم ما اقبل تكول علية هاي
ودارت وجهها ومشت متوجهة لغرفة. حوراء وكان توكع ويغمى عليها

ومهيمن اتحول شكله من اللامبالاة والعصيبة
الى الخوف والاهتمام

اول واحد وصل لريم من وكعت نزل يمها بالكاع من غير ما ينتبه على نفسه وحط راسه بحضنه

وصاح بصوت مرعوب
.. نورررر بسرعة جيبي ماي هاي اغمى عليها ووجها انگلب اصفر

رحت اركض اجيب ماي ومهيمن ربت على خدها
حتى تصحى .. لج ريم كعدي

يمة روحي جيبيلها شي خلي تلبسه
وعاط بجلال الي واكف متصنم بمكانه شمر عليه السويج وكال
.. جلال اركض روح شغل السيارة

انخبصنا كلنا بسبب صياح مهيمن.
ام مهيمن اخذت كلاص الماي مني

كالت.. يمة گول يالله شبيك حركت الدنيا وخبصتنا
بالله شو انطيني البنية.

اباوع لمهيمن حس على وضعة الي مو طبيعي وشكله شلون حاط ريم بحضنه

ام مهيمن اخذتها منه وصارت تمسح على وجهة وقربت شيشة عطر يم خشمها حتى تصحى

بدت ريم تسترد الوعي

مهيمن .. يمة خلي ناخذها للمستشفى
ريم بصوت ناصي تعبان .. لا ما اريد اني اكره المستشفيات

ام مهيمن.. ما يصير خالة لازم ناخذج ما تشوفين وجهج انگلب اصفر

ريم جاوبتها.. لا عفية مااحب المستشفى صارت بية عقدة من ايام عمومؤيد الله يرحمه
ماريد اروح الله يخليكم لا تاخذوني

ام مهيمن.. زين شنو الحل
حوراء.. يمة اكيد ريم متأذية من بطنها لان انا لحكت عليها ولكيت صبا منومتها بالكاع وتدفر ببطنها

مهيمن باوع على ريم وكال .. انا رايح للصيدلية اشوف
شنو اجيب
راح طلع من البيت

ام مهيمن باوعت لحوراء وكالت .. ولج ثولة كافي بعد لا تكعدين تزيدين النار حطب هو اخوج مشتعل من گاعه ما يحتاج تزيدين الطين بلة
متشوفين انا سكتت لان ادري بي كوة لازم نفسه ما يهد عليهم

حوراء .. اي يمة غير اكله شنو علتها وليش متأذية

اني تركت خالة وحوراء يحجون واخذت ريم عالحمام حتى ابدللها ملابسها وتسبح

وبين ما بدلت وخلصتها
كعدتها بالغرفة كانت بس تبجي مثل المصدومة
شكل الصدمة هسة بينت عليها

.. لاتخافين حبيبتي بس سكتي
ولو مو وكته الكلام هسه بس تريدين الصحيح انتي السبب انتي
يعني هسة حتى اني الي ما اعرف صبا
صرت اعرفها من كلام حوراء وياج انه هي بنية مو زينة

ريم .. اي اني صح مشيت وياها فترة هي ظلت تريد بس تصير صديقتي واني شفت ليش لا اذا ممسويتلي شي واحنا بس بالمدرسة نحجي اني شعلية بيها مصادقة او لا هذا شي يخصها وحدها بس تركتها من حاولت تخليني احجي وية واحد واني ماريد ومن يومها وهي كامت تسبب لي مشاكل روحي سألي الطالبات الي ويانا بالصف

.. ليش ما اجيتي وگلتي حتى احنا نحط لها حد لتجاوزاتها بس هي شافت من يسكت واستقوت
وهذا الي صار ما يحمد عقباه

كنت احجي وفجاءة وسمعنا صوت
صياح زلم

ام مهيمن گبل صاحت .. والله عرفت بي ما راح يعديها على خير هذا الي اني خايفة منه
ولج حويرة ركضي جيبيلي عبايتي

ريم باوعتلي بخوف
.. لالالالا عفية لا تكولون عركة ثانية والله راح اتخبل

رحت تركتها وطلعت اركض واخذت شالي
اصطدمت بحوراء. بطريقي

لگيت ام مهيمن سابقتني
وجلال نزل من فوك. يركض
.. شكو شصاير

جاوبته.. اتوقع هذا مهيمن تعارك وية بيت زمن
تركني وراح طلعت للطارمة ولازلت اسمع صوت صياح رجال

مديت راسي من الباب وراهم اريد افتهم شنو الي صار
لكيت خوال مهيمن لازمين مهيمن. وهناك واحد واكف يم بيت زمن على بعد بيتين يصيح على مهيمن ويتوعد

ومهيمن .. وحق هذا الله اليوم الا اشيلكم من المنطقة ما اتسمى ابن ابوي اذا تريد سلامة اهل بيتك

بيع بيتك واطلع بيهم اني حذرتك مو تگول ما كال مهيمن

خاله حسن كال.. عيب مهيمن شنو هالحجي هذا جارك

ام مهمين صاحت .. كومة حجار ولا هالجار.
يا خوية هذولي ما يتسمون جورايين

هذولي عصابة ترضاها هاي صبية بتهم لازمة البنية
وناعلة ابو حظها . وين كاعدين هاي من غير سوالفهم الغمة

تالي خوال مهيمن فضوا الموقف ودخلوا مهيمن للبيت
وجلال يهدئ بي

لليل هدأت الامور ومهيمن انطى المقسوم لحوراء وريم
وراحوا ناموا من وقت دخلت يمهن كانوا يسولفون بينهم

ريم .. اي صدك حوراء انتي
ليش جبتي بنات خالج وياج ليش ما صحتي لصديقاتنا
خطية بنات خوالج وخالاتج

حوراء.. لا ريم مو انتي ما تعرفين منطقتنا احنا كاعدين بمنطقة عشائرية
ما يصير وحدة تتدخل بمشكلة اي بنية غريبة الا اذا. تقربلها حتى ما يگامون عشيرتها وتصير فصول

وبيومها ريم نامت وكل شوية تكعد من نومها مفزوعة خطية. كسرت خاطري صرت اقرة عليها ايات الليل كله

...
ريم
مرت فترة على موضوع العركة واني وحوراء رجعنا داومنا بالمدرسة من يوم ثاني بس ما لگينة.
صبا لان فصلوها ثلاث ايام واني من ذاك اليوم
صرت اخذ وياي مبرد الاظافر

لان صارت بية خوفة من الي صار حتى يكون عندي شي ادافع عن نفسي بي

مر من يمي مهيمن واني جريت حسرة بقهر
هو من ذاك اليوم ما يحجي وياي

رحت يم نور اشتكي لها
.. بس اريد اعرف اني شنو ذنبي وشنو الي سويته حتى مهيمن يعاقبني بجفاه

نور.. تستاهلين وزين منه بس ما يحجي وياج اني لو منه من بعد الي صار ابطلج حتى من المدرسة

باوعت عليها مستغربة.. ليش تحجين هيج
فوك ما اني مكتولة

نور.. ولج ريم هاي نتائج الي ترافق بنت السوء
والمشكلة انتي لحد هسة ما مستوعبة خطورة الي صار

ريم لازم تعرفين مهيمن حقه. انتي امانة عنده ومسؤولية
يعني شنو تردين منه. يصفك لج مثلاً على الي سويتي
اتخيلي هذني البنات حتى الادارة المدرسية
صايحيين منهم الغوث وما يكدرون يتخذون بحقهم اي اجراء
ترة هذني عصابة مستعدات يسوون بيج اكثر من هذا الشي

كنت كل يوم اكعد واشوف مهيمن تلاگيني نظرات عيونه الي كانت كلها خذلان. زين من شنو ينخذل

ما انسى اخر كلام وجهه الي
.. انتي ليش كله تمشين بالعكس ولج انا كضيت عمري كله ما طالع لي صوت بالمنطقة انا من تالي وكت
اطلع اتعارك وية الجيران بسببج

انتي ليش ما تاخذين بالكلام تدرين تصرفاتج هاي جاي تصعب علية الامور وتعقدها فوك ماهي متعقدة
جاي تسدين الابواب كلها بوجهي

ليش انتي مو وعدتيني راح تتغيرين بتصرفاتج

اليوم اخر يوم بالامتحانات المصيرية
رغم الي صار بس ما تركت دراستي ونور بقت تساعدني بدروسي

لكن اليوم من طلعنا من البيت اني وحوراء انتبهت لشغلة كانت اكو سيارة بيها اربع شباب شفتهم اول ما طلعنا من البيت

حوراء شافتهم وكالت عزة هذولي جماعة صبية والله راح اموت بدمي

كلتلها .. امشي خلي نركب بالسيارة. ماعلينا بيهم.
احنا ما عندنا شي نخاف منه

بس من خلص الدوام وحلت المدرسة
لگينا هذولي الشباب نفسهم واكفين قريب عالمدرسة ونازلين من السيارة

حوراء .. لاااااا اني اليوم راح احجي لمهيمن عن هذولي الشباب لان الموضوع زاد عن حده

.. انتي شبيج خايفة منهم وليش نخاف اصلاً
ما عندنا شي يمهم وهم ما يكدرون يسوون شي لنا
ما يتجرؤن اكو شرطة وقانون

حوراء.. لج عوبة هذولي ذيل صبا يعني مثلها ناس ما تخاف الله
والي ما يخاف الله لا تتوقعين منه يخاف من الشرطة والقانون

حوراء تتلفت .. ادري وين صار هذا اشو اتأخر السايق

ماكو هي لحظات وكان يجون يتقدمون بسرعة بتجاهنا
اني گبل مديت ايدي داخل جنطتي ولزمت مبرد الاظافر اخذ احتياطاتي

وواحد منهم اقترب علية وكال بتهديد
.. وصلي هاي الرسالة لابن عمج ابو الهمة گليله
مرة ثانية ما يروح يهدد صباوي
لان انتي وهاي ترحن بالرجلين حتى يعرف صبا وراها زلم

تفلت بوجهه وجاوبته .. قصدك انتوا كلاب صبا. السافلة

هو بغضب غلط علية ومد ايده بتجاهي ما اعرف شنو يريد يسوي بس سمعت شهگة حوراء
من خوفي لزمت المبرد وشخطت ذراعه

لزم ذراعه المجروحة وصاح بصوت موجوع ومتفاجيء

الولد .. ولج ساقطة اليوم ابوج احركه
وين ترحين مني

كنت واكفة جامدة بمكاني من الهبطة والخوف
اقترب علية جرني من شالي

وعطت بي .. حيوووووووان

حوراء راحت ركضت للمدرسة تصيح الحراس بصوت عالي خايفة
كان اكو ثلاث حراس شرطة يم باب المدرسة بس هم يدخلون جوة من تصير الطلعه وهمَ طلعوا على اصوتنا. كم طالبة من الموجودات كامن يصرخن مفزوعات

والشرطة بس شافوا منظرنا اجوي يركضون
واحد من الحرس رمى ليفوك حتى يرهبهم

الحراس.. اوكف بمكانك لا تتحرك
قبضوا على اثنين منهم. والبقية انهزموا بالسيارة
واخذوهم سحل على مركز الشرطة

والسايق اجة بعد العركة بعشردقايق
وعلى طول الطريق كنا اني وحوراء وحدة تباوع للثانية
بخوف

اني جسمي كله يهتز اباوع لأيدية اني شسويت

يتبع

مع تحيات اختكم نهى الحسون