قضية لم الشمل

البارت الرابع عشر

مساء الانوار عليكم احبتي

#الكاتبة_نهى_الحسون
#قضية_لم_الشمل

مهيمن

دولاب حطنا الوكت
ياناس وتطشرنا
لااخ يعرف اخو
ولاجن اخت عدنا
اب لاهي بدنيته
ولافكر يوم البزرنا
زنبور اصفر مابي فود
بس يخرب عنب حديقتنا
بيوم دكة المرض
طرش الوادم تدورنا
حسباله دكمة كهرباء
ساعه يطفينا
وساعه يشغلنا
يابوية احنا بشر
عدنا احساسنا
وعدنا مشاعرنا
تريدنا نعيش سوة اغراب
ومن غصب عنا
خل نشوف الايام
وهالسنة شلون تمضي من عمرنا
هدى سعد
.......................................

الطريق كله من بغداد للبصرة ظليت حاير اقلب الامور براسي شلون وصلت
لهاي المرحلة ، اني بشنو رحت وبشنو رجعت

راسي راح ينفجر من التفكير وافكاري مشوشة ومااعرف شسوي بس الوالده الكة عدها الحل والنصيحه

وصلت للبيت بوقت كلش متأخر ولكيت امي تنتظرني
على نار

واول ما شافتني صارت تتحمدلي عالسلامة

لكيتها تحوم يم الباب
كسرت خاطري وشلت هم شلون راح افاتحها بالموضوع والله حتى ما ينطيني گلبي اذكرها بخيانة مؤيد لها
شراح اكولها مؤيد تركلج حمل جديد بعد موته

يعني استغفر الله ما اكتفى بالي سواه بيها لا والادهى
يريدها تستقبل اولاده
شنو من امتحان صعب انحطيت بي
انا بالحقيقة ما عندي اشكال يجون يمي بس امي شلون بيها

دخلت للبيت وهي تفتر وراي وتسألني
.. ليش اتصل عليك يطلع جهازك مغلق
والله گلبي اجة يوكف من الخوف ولو مطول شوية جان صبحت انا وخوالك ببغداد

التفتت عليها وبستها من راسها وكلت
.. ام مهيمن اهدي شوية وانطيني مجال افهمج القصة
النقال خلص شحن وانا ببغداد وما صارت فرصة حتى اشحنه

كنت احجي وية امي وابدل بملابسي وهي تحوم يمي وتجمع بيهم وراي
باوعت للبيت منا ومنا

وسألتها
.. اشو البيت هدوء حوراء وين
.. اختك نامت اليوم من وكت

.. شعجب مو من عوايدها تعزل من وكت
.. اتعاركت وياها ونامت زعلانة
.. ها يمة جا انا مو محلفج ما تزعليها وتكسرين بخاطرها

.. خلي تولي انت مطلع عينها

.. ليش هي شسوت ؟
.. انا وصيتها تغسل البطانية وطلعت لبيت خوالك اريد واحد يطمني عنك وعن احوالك

رجعت للبيت ولكيت الشارع فايض وصاير
(روجة تطك بروجة ) واثاري الخاتون ناسية الماي مفتوح على البطانية
وهي كاعدة تتابع مسلسل تركي

عاد انا منا گلبي محترك عليك ومنا هي حركته اكثر
طفيت التلفزيون وشلت هذا الجهاز الصغير ابو القنوات (الريسيفر) وضميته بكنتوري

.. الله يسامحج يمة
امي تحجي وتذكرت ريم بنت عمي تقريباً تصير بعمر حوارء اختي

ههههه والله امي لو تشوف ريم وتصرفاتها ولسانها جا شتسوي
ضحكت لااراديا من الفكرة

باوعتلي وكالت .. يمة عساها الضحكة دوم مو بس يوم
.. دايمة بوجودج ياغالية

.. اي يمة ما كلتلي شنو سويت بقصة الوصية

.. كولي شنو سويت بكل الصدمات الي طلعتلي هناك

.. ياستار شكو شصار لا يكون تعاركت وية اهل ابوك
احجيلي خو ما هدوا عليك
اقتربت علية وصارت تعاين تتفحص جسمي خاف مضروب
ونزلت علي بالاسئلة نزلة وحدة ماالحك اجاوبها

.. لحظة يمة مابية شي

احس انحشرت بزاوية المشكلة اي كلمة راح اكولها
راح تذكرها بكسرتها بس شسوي هذا شر لا بد منه

.. اي يمة كول يابعد امك شبيك شنو صار هناك

.. والله يمة لو اسولف سالفتي للمجنون ما راح يعقلها
اخذتها وكعدنا بالهول وصرت اعيد عليها كل الي صار وياية
موضوع لقائي باخواني وشلون اتفاجئت بيهم

.. يايمة الله يساعد كلبك على هذا الموقف
والله من يمي جسمي قشعر

ما كلتلي اخوانك شلون اوضاعهم

.. صدكيني وبدون مبالغة يمة حالهم اضرب من حالي
عايشيين بالضيم
وحجيتلها عن كل واحد بيهم وشلون عاش حياته
جرت حسرة وكالت

..الله يسامحك يامؤيد على هاي العملة ،خطية والله كسروا خاطري

استغليت لحظة انفعالها وتعاطفها
.. لو تشوفين نور راح ينفطر گلبج عليها بالزايد

.. اووف صدك الي يشوف مصايب الناس تهون عليه مصيبته
اي يمة كمل وتالي بعدين شنو صفت السالفة وية اخوانك

جريت نفس عميق يشجعني على التكملة
.. وتالي يا محفوظة السلامة طلع الوالد حاط شروط بالوصية
وكاتبلنا بيها اذا نريد نستلم حصتنا لازم ننفذ شروطه

.. وشنو هاي الشروط
.. شروطه تكول انه لازم اجيب اخواني وبنت عمي يعيشون يمي بالبيت لمدة سنة
كلت هذا الشي بسرعة وبعدها راسا كعدت اشرحلها
افهم امي شرط الوصية وشنو المطلوب مني شخصيا

وهي كانت بس تستمع ما علقت
كنت اراقب وجهها ، كلتلها تقريباً كل شي
الا شغلة وحدة ما كلتها

فضلت اتغاضى عنها وهو شرط زواجي من بنت عمي ريم
لان ابدا مو وقتها اكول للوالدة هذا الشي
بالاول خلي امهدلها. الموضوع حتى تتقبلهم بالبيت وبغير وقت اكللها

لان اذا اكللها هسة احتمال تنصدم ومو بعيد تنجلط اذا شافت البلوة كدامها
فخلي الموضوع على ماهو عليه ولكل حادث حديث

وكملت كلامي .. وهسة انا طلبت من المحامي
ينطيني مهلة كم يوم
حتى ارجع للبصرة واحجي وياج واخذ رأيج بموضوع نور وجلال وريم
لان انتي ام البيت وصاحبة القرار بي

شوفي يمة قبل لا تكولين شي وتقررين.
اريد اكلج انتي مامجبورة على اي شي
واي قرار تاخذينه انا راح احترمه وانفذه وانا الممنون وانتي براحتج

اباوع عليها ابتسمت وكالت حتى بدون ما تنتظر الى ان تاخذ وقت تفكر بي
..يمة هلا بيهم بأي وكت يشرفون ، بيتي مفتوحلهم
يكفي هم اخوانك من دمك ولحمك. واذا ما كفاهم البيت احطهم على راسي
شتريد بعد اكثر يالغالي

.. يسلم راسج يالغالية دومج رافعة راسي
لو تدرين شكد جنت شايل هم لهذا الشي
وخايف لا ترفضين جيتهم وانحط بين خيارين واحدهم امر من الثاني
ولازم اختار بين رضاج علية
وبين عرضي اختي وبنت عمي مااكدر اعوفهم وحدهم سايبات بهاي الدنيا
بس الحمدلله بموافقتج خففتي عني حمل بكد الجبل على صدري

.. جيبهم يمة ولا تشيل همهم سويها لله ما خسران شي
ان شاء الله لمتكم بيها الخير عليك وعلى اخوانك

.. بس يمة اضمها عليج على الله ما تنضم
انا بعدني عندي شكوك ومتخوف منهم
صحيح الي عرفته عنهم والي شفته منهم لحد الان يبشر بخير
مساكين لا حول ولاقوة

بس خايف لا تكون هاي بس الواجهة
ويكون ما خفي كان اعظم. ما اريد انصدم بيهم

.. يمة ما راح تكدر تعرف معدنهم بيوم ليلة
هي الايام والمواقف تبين معادن الناس
فخلي الايام الي تراويك معدن اخوتك
.. يمة انا خايف عليكم انتي واختي لا تنضرون من وجودهم وياكم
لان بعد غدر الوالد غسلت ايدي وصار مالي ثقة بالناس

كنت افضي بمخاوفي لأمي وصارت امي تطمني وتشجعني
امي الي عدها الرأي الحكيم دائما ويساعدني بحياتي واتخاذ قراراتي
مسحت على اكتافي
.. لا تخاف علينا
ما يصير بينا شي تطمن انا امك مو بنت اليوم
بنت شيخ ومفتحة واعرف البشر من شكلهم
وذا تريد اانا ختبرلك اياهم حتى تتطمن ويرتاح بالك

.. ما تعرفين اشكد ارتاحيت من حجيت وياج
احس هم وانزاح من على ظهري

كمت من يمها حتى اروح ارتاح لان كلش تعبان
.. يمة ادعيلي كون اصون الامانة واكون كدها

.. ان شاء الله يمة ربي يسهل عليك ويهدي اخوانك الك

دخلت لغرفتي وشفتهم فارشين فراش رحت اتمدد
وهنا تذكرت الرسالة واكعة مني الظاهر من بدلت ملابسي
دنكت واخذتها مستغرب من نفسي
ليش هذا الشي مكلته لامي ولاجبت سيرة الرساله من مؤيد.

تمددت بفراشي وفتحت الرسالة
كانت عبارة عن ورقتين مليانة بأسطر من الكلمات
صارت نظراتي تتناقل بين الحروف والكلمات على عجل اريد اعرف شنو كاتبلي
كانت مكتوبة بخط ايده اكيد هذا خطه
باوعت لتوقيعه بعدها بديت اقرة المكتوب

لكيت نفسي وية كل كلمة اقراها
احس شي يتوغل بين ثنايا روحي غصب عني

(رسالته كانت مملوءة بالاعتذارات والاعترافات
يعترف بنفسه انه مذنب ومقصر في حقنا هو الان يعرف انه لا يملك الحق بطلب الغفران
لكن كل ما يطلبه مني ان استلم زمام الامور بدل عنه واقود اخوتي واصل بيهم الى بر الامان الذي اخفق هو في تحقيقه لنا )

وبقيت اتنقل بين السطور الى ان
نهضت من مكاني مصدوم وانا اعيد قراءة هذا السطر
معقولة ما جاي اصدك يعني
الحجي ابو حيدر كان له علاقة وية مؤيد زين
هاي شلون وشوكت

......

نور
ببيت ابوية كاعدة واحس بالغربة
واحس بحالي مثل الضايعة وخايفة ومترددة
خطية ريم ما قصرت وياي لكيتها مجهزتلي
غرفة خاصة حتى اخذ راحتي.

اول ما دخلت للبيت تفاجئت بضخامته
ماكان يجي على بالي هو بهذا الشكل الفخم والراقي بكل معنى الكلمة.
لفت انتباهي صفير جلال هو مثلي متعجب من البيت وفخامته

جلال .. حييييييل هذا البيت كله كان لأبونا
الله يرحمه شكله كان صاحب ذوق راقي

اجانا صوت اسيا من ورانا يحذرنا ما نلمس اي شي

جلال باوعلها وكال
.. البيت بيت ابونا والقوم حاربونا
حجية بس اريد اذكرج هذا هسه بيتنا حلالنا
اكول الافضل روحي لاتظلين واكفة فوك راسنا
لان اذا بقيتي فبأذن الله راح تنجلطين وانا غير مسؤول

ريم كانت واكفة يمنا ابتسمت على كلام جلال

اسيا جاوبته من بين اسنانه المصطكة بغيض
.. وقح وقليل ادب

حجيت وياه بصوت ناصي
.. جلال عوفها لاتحط بالك يمها احنا جايين هنا خطار مؤقتاً كم يوم وطالعين

عدل العكازة وكال
..
لانور انتي متوهمة احنا مو خطار هي واولادها خطار عدنا
خلي تروح موتتنا صارلها ساعة تباوع علينا بنظرات
متقززة الي يشوفها يكول داخلين عليها غجر
لازم تعرف حدها وتعرف مو من حقها تكعد تحاسبنا وتقلل من مقامنا
احنا اصحاب الفضل عليها وعلى اولادها مو هم

ريم .. جلال ما عليك منها لا تضوج هي هذا طبعها

احس بريم تريدنا ناخذ راحتنا بالبيت بس عمتها واولادها ما منطيها المجال

مديت ايدي واخذت اغراض جلال من عنده وكلتله
.. انطيني جنطتك عنك
ريم .. تعال جلال خلي ادليك على غرفتك

.. اي والله ياريت

مشينا انا وجلال وراها
وريم اتوقفت يم باب غرفة وسحبت نفس عميق وغمضت عيونها وفتحته

الغرفة كانت جوة بالطابق الارضي
بقت واكفة بالباب وكالت

انتوا اخذوا راحتكم واني رايحة انطي خبر لأمو فلاح حتى تجهز العشا

جاوبتها .. ماشي تمام. راح نتعبج ويانا
ابتسمت وكالت.. تعبكم راحة

دخلنا انا وجلال للغرفة وحطيتله الجنطة عالسرير
جلال كسر خاطري احس بي محتاج احد يهتم بجروحه
ويضمدها
كلتله .. جلال اذا تحتاج اي شي كول لا تستحي اني اختك

سكت
ما جاوبني باوعت عليه لكيته مركز نظراته على شي كان خلفي

التفتت وكان اشوف صورة معلقة على الحايط لرجل يجي عمره تقريباً بالخمسين
او اكثر كان واكف بيهيبة ومبتسم ووجهه بشوش.
كان الرجل عيناً يشبه مهيمن لكن هذا كان عمره اكبر

جلال.. اتوقع هذا حضرة الوالد ابونا

راح اقترب من الصورة وصار يخاطبها
.. ها مؤيد شلونك انا ابنك جلال قربان
بلا زحمة عندي كم سؤال ظلت حسرة بگلبي بالله متجاوبني عليهن رحمة لوالديك

اباوع لجلال كان يكلم الصورة بأستهزاء لكن
رجفة فكه ورصت اسنانه دلت على غضب مكبوت وحزن دفين يحاول يغطي بالضحك

جليت صوتي ورجعت اباوع للصورة واني احجي وية
جلال
.. جلال لا تتعب نفسك ما راح يجاوبك روح ادخل اسبح وارتاح شوية احسن لك من الوكفة
وعندك الليل بطوله تكعد تسولف وية صورة الوالد
الظاهر اليوم راح تنام بغرفة سيد الوال.......

قطعت كلامي فجاءة ونظراتي اتوقفت على عيون مؤيد
رحت اقتربت من الصورة

وهمست بصوت ناصي.. اني شايفة هذا الرجل وخصوصاً هاي العيون
عندي احساس اني شايفته بس وين مااعرف
جاوبتي جلال.. يخلق من الشبه اربعين

قاطع علينا كلامنا دخول ريم وطلبت منا نجي نتعشا
جلال.. انتوا روحوا وانا شوية واجي وراكم

عشر دقايق واجة جلال وكعدنا
اكلنا كلنا سوية بس ما عدا نورس ونائل كانوا طالعين من البيت
كانت اجواء العشاء متوترة وجلال كلش هاديء حتى
ما اكل اي شي شوية واستأذن منا وكام بسرعة من الاكل

كان مبين عليه كلش مختنك ما اعرف شبي هسة كان طبيعي ما بي شي

خلصنا العشا واخذتني ريم لغرفتي احس هذا اليوم كان اطول يوم يمر علية بحياتي
كنت جدا تعبانة من الي صار

صعدت وياها فوك ودخلتني بغرفة حلوة بسيطة
لكيت جنطتي الكبيرة مركونة قرب الكنتور

ريم.. اخذي راحتج مبين عليج تعبانة
اني لو علية ما اعوفج تنامين
بس ما علينا الايام الجاية هواي وحضري نفسج تبقين سهرانة وياي يومية للصبح

طلعت وتركتني بالغرفة لوحدي. سمعت صوت نقالي يرن
اتوجهت على جنطتي وفتحتها
وكعدت عالسرير كان المتصل خالة سناء تريد تتطمن علية
بعدها انهيت الاتصال وياها ووكعت عيني
على الرسالة الي سلمها لي المحامي ابو سيف

عقدت حواجبي طلعتها من الجنطة وفتحتها
وبديت اقرة بيها وياريتني ما قريتها
مع كل كلمة اقراها بالرسالة كنت احس بغصة كبيرة في بلعومي
مااكدر حتى ابلع ريقي

نهيت الرسالة وحظنتها لصدري ودموعي غزت خدي
يعني معقولة الاب الي شفته بذاك اليوم يم بيت امير
الي كالوا عنه جاي علمود يدور على بنته هو نفسه
(ابوية ) وكان جاي يدور علية اني ... بنته

غمضت عيوني واني اتذكر نظرات عيونه ودموعه
بذاك اليوم والكلام الي مكدر ينطقه لان وكع وهو ماد ايده
كانه يكولي تعالي انتي المقصودة واني يومها مفهمت عليه
ولا على مدت ايده المستعطفة الي تريد تحضني ........
......

ريم

والله كلبي من الفرحة يريد ينفجر
اليوم مهيمن اتصل على عمو ابو سيف وبلغه عن موافقته على الشرط الاول من الوصية

جلال من سمع الخبر بقى هاديء ما كال شي لكن نور سحبت نفس عميق بأرتياح
شكلها هي مثلي كانت شايلة هم لرد مهيمن وارتاحت لما سمعت بموافقته

بديت اجهز الجنط والاغراض بالحقيقة كانوا هواي
بس كلت اخذ نص واخلي النص الباقي عمو ابو سيف يشحنه للبصرة
لان اكيد السيارة ما راح تكفي

الليل كله ما اجاني نوم بس اتگلب بفراشي
واتخيل حياتي من انتقل لبيت مهيمن وراح اكدر اشوفه
كل يوم

غمضت عيوني واني اتذكر شكله وشخصيتة وهو معصب على اولاد اسيا وشلون سكت اسيا واخذ دور القيادة بصورة تلقائيا وية اخوانه وكأنما هو متعود على هذا الشي

من شفته بالصورة حبيت شكله لان يشبه عمو مؤيد الله يرحمه
لكن من التقيت بي وشفت شخصيته
عجبني الي عرفته عنه لحد الان واتمنى ما يخذلني
ويبقى هيج

سحبت الجنطة الاخيرة وكمت من مكاني
ورحت اشوف على الجنطة اليدوية الي راح اخذها وياي بالسيارة فتحتها حتى اتأكد من المستمسكات
وجان توكع عيني على رسالة عمو
طلعتها من الجنطة
وكعدت على كرسي ميز المرايا
بديت افتح بيها
وبس فتحتها لفحتني ريحة عمو وحن عليه گلبي المشتاقله
فتحتها وبديت اقرة بيها ووية كل كلمة اقراها
دموعي تنزل غصب عني عبالك داسمع صوته يحجي وياي
كانه هاي الكلمات احسها صارت ايده وتمسح على شعري بحنية

كان يوصيني على اولاده وبنته
وكاتب ( ريمة صحيح انتي اصغر وحدة بيهم لكن الي اعرفه قلبك كبير ويوسع الكل )
بقيت اقرأ كل كلمة بتمعن عبالك اريد احفرهم بذاكرتي
كان يشرحلي عن شرطه بالوصية بزواجي من مهيمن

( سيأتي يوم واتمنى ان يكون قريب جدا تعرفين ان مافعلته
وشروط الوصية هو لمصلحتك التي حرصت عليها طوال مدة اقامتك معي )

وبعدها كملت القراءة واني مامصدكه الي تقراه عيني
بقيت اباوع متفاجئة على الكلام المكتوب
معقولة الي جاي اقراه
عمة اسيا طلعت ورة موضوع قصة الصور والتهديد
يعني معقولة حقدها وطمعها يوصلها لهاي المرحلة
معقولة

.....

.....
نور

بالطريق للبصرة
اني وجلال وريم گلوبنا كانت محملة بالترقب
باوعت لريم الي كانت حاطة راسها على كتفي
غافية خطية تعبت بتحميل جنطها

ابتسمت واني اتذكر جلال شلون انصدم بالكم الهائل
من جنط ريم
التفت علية وسألني
.. نور رحمة على والديج بالله روحي اتأكدي هاي الجنط المن
هاي بس لا اهل المنطقة ناوين يسافرون ويانا للبصرة

ريم تباوع عليه بكل هدوء جاوبته
.. لا جلال هاي الجنط كلهم الي
.. شكو حضرتج طالبة لجوء وماخذة هالكد جنط
شدعوة ترة بيت مهيمن بالبصرة مو بصحراء الربع الخالي

.. اي هو اني هم كلت هشكل لذلك اخذت نص الجنط
جلال فتح حلكه وبقة بس يباوع عليهاعبالك

ديشوف كائن غريب كدامه
.. لا والله بيج الخير شلون ما اشوف انتي رايحة للبصرة حتى تغزين بيت المكرود مهيمن

احلى شي بالموضوع الاخت البث ما يوصللها بسرعة

.. جلال شنو مگرود
.. معناها الضحية

جلال
كان الطريق
طويل من بغداد للبصرة خلصتها كلها صفنات
من يوم الي دخلت بي للمكتب وانا احس بروحي
بحلم
شلون صفة بية القدر متوجه للبصرة شكد بعيدة عن الموصل

اليوم قبل لا اسافر حولت الراتب كله لبيت خالي
واتصلت عليه وسألته كم سؤال
كان گلبي متشعوط من ورة الي قريته
بالرسالة. وجوابه اكد الكلام المكتوب بالرسالة

البارحة من نمت بتالي الليل فتحت الرسالة وانا الفضول
يقرة عندي الف

كنت بس اريد اعرف مؤيد شكاتبلي
قريت المكتوب الي ما منه مهروب كان كلامه

كله اعتذار وندم. وامنيات. واتفاجئت كن عرفت ان اسيا ورة موضوع طردي من بيته
وهو عرف بالموضوع قبل لايموت
بعدها صار يطلب مني السماح. لرجل شارف على الانتهاء

احس بروحي انطعنت من هذا الكلام
طويت الرسالة وما كملت قراءتها لان اكتفيت من الي عرفته ما اريد اعرف بعد اي شي
صرت اكره المفاجئات

باوعت للسايق الي كان يسوق وعينه عالطريق
التفتت اباوع على البنات نور وريم كاعدات ورة بالسيارة

ريم كان مبين عليها بزر دلال.
ونور مثل حلاتي متعودة على عكوسيات الحياة

هذولي هم امانة صاروا بركبتي. وين جانتلك هاي يا جلال

......
نور
احس بروحي اتكسرت من كعدت السيارة هاي اول مرة بحياتي اسافر بهيج طريق طويل

باوعت لجلال يباوع علينا
ابتسم بوجهي وكال
.. ما بقى شي ونوصل

باوعنا لريم الي كانت كل شوية تهفي على وجها
ريم.. اوووف كولش حارة
جلال التفت علينا كان كاعد يم السايق وكال
.. هسة باربي تسيح من الحر لان وصلنا
البصرة ترحب بكم بشمسها التي تسمط الي خلفوكم

ريم .. حقك عيني تقلد علية اذا انت حاط منشفة على جام السيارة حتى ما توصلك الشمس

رن نقال جلال وجاوب المتصل
.. الو هلا مهيمن
اي اي احنا هسة دخلنا للبصرة
بس اريدك توصف للسايق وين بيتكم

مد ايده بالنقال للسايق حتى يحجي وية مهيمن
بعدما وصف للسايق المكان
بثلث ساعة وصلنا لمنطقتهم ودك نقال جلال
والمتصل مهيمن
جلال .. مهيمن وصلنا لمنطقتكم بس اطلعلنا
تمام .. صار يعني تريدني اغلف باربي

انهى الاتصال والتفت علينا وباوع لريم
.. باربي مهيمن يكول خلي ريم تحط شي على راسها

ريم.. يعني شنو احط شي على راسي
جلال .. استغفر الله ربي واتوب اليه
يعني بين قوسين( اتستري يامرة ). يالله بالعجل ترة وصلنا
التفتت علية تستفسر
جاوبتها .. جلال قصده يعني لبسي حجاب على راسج
لان اهل مهيمن ناس ملتزمين

ريم بأعتراض.. هاي شنو اي غير تنطوني خبر حتى احضرلي شال يتناسق وية ملابسي بالله هسة اني
منين اجيب شال اصلاً.

جلال بنفاذ صبر .. نور رحمة على والديج ما عندج حجاب تحطه على كفشتها وتستر علينا

جاوبته.. لا والله ما جوة ايدي. بس عندي ورة بالجنطة مالتي. اذا تريد
جلال.. لا يابة شيطلعها للجنطة مالتج اذا ست باربي مقبطة الصندوق بجنطها

السايق كال.. اتوقع هاي الجهال واللمة الكم
التفتنا كلنا نباوع كدام وجان نشوف

مجموعة اطفال صغار اجوي يركضون وعجاجة الترابة هايجة من ركضهم. عالسيارة
انتبهت على مهيمن كان واكف يم مجموعة زلم

رجع جلال يستعجل ريم.. خرب بالقسمة السودة
لج ريم وصلنا وانتي بعدج ما حاطة شي على راسج

ريم جاوبته بارتباك .. شنو ما دتشوف ماعندي شي
اخليه على شعري

وكفت السيارة قريب على مهيمن
وجلال التفت بسرعة سحب المنشفة الي كانت
عالجامة .. خاااب دتعاي صارلج ساعة تنعوصين علينا
اشو حطي هذا على راسج دبري امرج بي

حط المنشفة على راسها وريم عاطت

.. لالالا جلال عيييييع راح تخرب النيولوك كله

كاتمة ضحكتي على شكلها كانت لابسة نضارات شمسية وحاطة خاولي على راسها

جلال.. هسة ديالله ما تكليلي منو راح يعرفج اذا شافج هشكل
ريم.. خربت كشختي

اجة مهيمن وفتح الباب الي على صفحتي وكال
الحمدلله على سلامتكم ونورت البصرة بجيتكم

يتبع

اتمنى لكم قراءة ممتعة
مع تحيات اختكم نهى الحسون