من فجر ديسمبر

٤٣

من فجر ديسمبر
🍁
🍁
ماخليتهه تحجي شي وجريتهه لصدري وانه ابوسهه بوسه متعطش وبالكوه متحمل كل ماتريد تفلت من ايدي ارجعهه اكوى .. ورفعت ايدي غمضت عيونه ورجعت ايدهه وره راسي وضليت مطول وياهه لحد ماخليتهه تتجاوب وياي بكل هدؤها ... وتالي كمت شلتهه بين ايدي واخذتهه للحجره وخليتهه عله الجربايه وهيه عينهه بعيني وبعدهه محاوطه ركبتي بايدهه .. صرت فوكاهه ودنجت شميت وجهها وبست حنجهه ورجعت لشفتهه ابوسهه بكل هداوه وانه ايدي وره اذانهه واصابعي متغلغله بشعرهه وهيه ايدهه عله جتفي
وهادئه وياي كلش .. وخرت من شفتهه وخليت وجهي بركبتهه شميتهه وهيه دفعتني رديت خليت وجهي عله وجهه وكلتلهه...
- عليش مااكدر اشتهيج بين ايديه وماكدرن لهالشي علييش كبل جنتي تتمشين باحلامي واتخيلهه لحظه لحظه كل هالسنين واليوم مايجيني هالشي ليييش
- هيج احسن كافي شهاب
- لااا موش كافي انه متعطش عليج اريدنج مااريد اكتفي بشي اريد ارتوي افهميني
-مو هسه شهاب بعدين كافي هيج الله يخليك كافيي
اهدء شويه

حضنتهه وشميتهه حيل وانه بعدني فوكاهه كلتلهه
- اخليج براحتج بس ضلي هيج هادئه وياي شويه
- ماشي

ضليت هيج مخلي راسي بركبتهه واشتمهه وهيه ايدهه عله ظهري وهاديين اثنينه .. من وكت الي بستهه هيه بين الي تكابر وبين الي تستلم ليه فرحني هالشي وصرت بي اعرف شعورهه الي مغطيته بالبرود ...

وخرت عنهه ونمت عله ظهري وجريتهه لصدري
- خلي اكوم شهاب عوفني
- عليش تكابرين ربى خليج طبيعيه وياي
- ما مكابره بشي بس اريد اكوم
- براحتج كومي

وخرت ايدي  منهه وهيه طلعت كبل من الحجره
مثل الي جنهه تندمت عله الصار بينه وانه ضليت بقلق خاف تتغير وياي وتخلي حدود بينه بعد الصار ...
كمت طلعت دورتهه وشفتهه عله البالكون واكفه وصافنه .. اجيت وكفت بسدهه وبدون مااعاينلهه
كلت ...
- تخافين مني ؟
- لا انته الامان الي
- زين تندمتي عله شي هسه ؟
- مادري ماعرف الصار ليش وشلون اني سويت هيج مادري افكاري متخربطه هالشي مجان لازم يصير
- عليش يعني شني اليمنع
- شهاب احنه ممتزوجين شلون يصير بينه هيج
- تكصدين الحلال والحرام
-اي طبعاً
- شوفي انه هم اخافن ربي واعرفن حدي وشفتيني ماكدرت اسوي شي اكثر كتلج ماكدرت اشتهيج
واخليج رغبه وجم دقيقه وتروح ..انه من تكربتلج هيج بكل نقاء تفهمين شني نقااء هالشي يسوي الشعور العندي ماتفهميني لو ماتحسين بي .. فاريدج ماتفكرين بهالشي بعد ولا تضنين انه اعاينلج بنظره بعيده لاا ابد يشهد علي ربي من يوم طلعنه بي من ديرتنه لهاليوم ماففكرت بالموزين وياج وشفتيني بين ايدي وماعبرت حدي بشي
وحجايتي الاخيره لج ان تخوفتي مني بهالناحيه
كليلي اردج لهلج ..

عفتهه وطبيت اخذت باكيت الجكاير وشغلت التلفزيون وكعدت ادخن واعاين الاخبار
وهيه وره شويه طبت ورجعت تعزل بالملابس
وراحت للمطبخ تسوي الغده وانه نمت شويه بين مااجتي كعدتني وتغدينه ونحجي جن ماصار شي
ولليل رحنه نمنه وكلمن منطي ظهره للثاني

رديت للشغل والوادم كلهه تحضر للاحتفاليه براس السنه ماضل غير خمس ايام عليهه ... من ثاني يوم ابو المخزن نطانه عطله منا لوره راس السنه
بهاليوم انه جان بالي ابوي وشحالهم هناك اريدن اعرف شي عنهم .. رحت شغلت خطي القديم وجان تصلني كومه رسايل من وليد ومحمد يكلي
" شهاب لا ترد عله رقم الغريب وطفي جهازك"
استغربت هالشي تالي رحت قريت رساله وليد
" شهاب لاترجعون ابد هذا بسام حالف يمين بذبح اخته "
ورساله ثانيه تكول " شهاب بسام يدوركم بغداد اذا انتو هناك اطلعو "
" اكسر خطك وروحو لابعد مكان بسام صارله شهر مهوس وكالب الدنيا عليكم يريد يذبح اخته لاترجعون لو مهما صار اذا احتاجيت فلوس او اي شي خابرني "
ومحمد يكول" سويلهه جواز وسافرو  محد هنا واكف وياكم واابوي تعب من الحجي وياهم اخوهه علك الدنيا وامهه بيت اهلهه راحت مريضه "

عاد رديتلهم " احنه بامان لاتخافون وانتبهو عله جدتي وامي وزهره وكل الي يصير ذنبه بركبه الشيخ "

رحت كسرت السيمكارت وشمرته وضليت صافن وافكر بهذا بسام جنت اعرف هيج رد فعله يصير
وادري طلعتنه هاي مابيهه رده وحتجيب الاذى للكل ... سكتت وماحجيت ليهه شي هيه الي بيهه كافيهه واخافن عليهه  كلبهه بعده تعبان ...

بيومهه مااكلت ورحت نمت وانه حسبه تجيبني وحسبه توديني عله هالصار بسبت هالجلاب
ضليت اشتغل بس بالمحطه من ال ٦ لل١١
وره يومين اجتني ربى وره الغدا وكفت جدامي وانه كاعد واكلب بالتلفون ..
- شهاب اريد اطلب منك شي
- كولي تامرين بكل شي انتي
- تسلم .. اريد اطلع للسوك ويه ليال العصر
- ليش ويه ليال موش وياي
- انته عندك شغل وبعدين هي طلبت مني اروح وياهه تريد تشتري شي تلبسه راح تطلع ويه زوجهه بليله راس السنه واني اريد اجيب كم شغله للاحتفال هم حباب خلي اروح وياهه حبااب
- ماشي روحي بس تدفين نفسج زين وماريد تتعبين امشي بهداوه واكعدي ارتاحي وبس تحسين روحج تعبتي كبل خابريني من تلفونهه اجي اخذج
- لا ان شاء الله ميصير شي شبيك لتضل خايف عليه هيج تره صرت احسن على العلاج متشوفني اتنفس براحه ومابيه شي
- ميخالف انه يضل بالي عليج
- هههه انته ماكو منك
- ايييي مبين

ضحكت وراحت طلعت وردت رجعت عمدت راسهه من الباب ..
- راح اروح لشقتهه اكللهه زين ماتاخر
- ماشي ماشي

راحت ركض وانه تمددت وماكدرت انام كل فكري صاير بعمليتهه لازم اسويهه الهه باكرب وكت عبن رجعه لهناك ماتصيرن بعد ولو رادت تصير موش اقل من جم سنه ...

اجتي وراحت سبحت وكعدت يمي تمشط وتتصفن نادري وين بالهه .. عاد رادت تبدل طلعت كعدت اتفرج تلفزيون وجان يندك الباب .. كمت شفت زوج ليال اسمه ادم .. سلمت عليه وهوه مارضى يفوت بس كالي راح نضل وحدنه خلي نطلع عازمك عله العشه .. عاد كتله ابدل وانزل ليك
طبيت وكلت لربى عله جيته .. وهيه كالت احسن غير جو كافي شغل .. رحت بدلت واجيت وكفت يمهه طلعت فلوس وحطيتهن ع الميز ..
- لا شهاب عندي مايحتاج والله
- اششش جم مره انه كايلج فلوسج الج ضميهن ومصرفج مني
- بس والله عندي اذا خلصن عود اخذ منك
- وليش تخلصيهن وتضلين مفلسه انه ماريدج حته تعتازين الي ضميهن وهذني اصرفي منهن .. يلا راح اطلع انه بس مثل ماوصيتج تدفي زين واشتريلج جفوف حته نطلع للثلج
- اييييي واخيررراً
-هههههه اعرفنه بنفسج ضال بس غير جنت اخافن عليج هسه مدامج تحسنتني اخذج تدللي
- شكرررراً ابو الشهب شكرراً

كرصت خدهه وضحكت وطلعت للولد اخذته بسيارتي عبن ليال ماخذه سيارته ورحنه للكهوه
كعدنه هوه نزل نركيله وانه اكتفيت بالجكاير والكهوه صار زمان مشاربهه ... عاد كالي
- شنو تشتغل شهاب
- والله اشتغل الصبح بالمخازن نفرغ بضاعه وبالليل بمحطه البانزين
- هااا الله يوفقك .. انته شنو مخلص لو مدارس
- لااا شلون مدارس انه خريج تحليلات مرضيه
اخذت الشهاده من تركيه كبل خمس سنين بس الدنيا ماتدوم لاحد ياخوي
- يعني تعرف لغات !
- اي الانكليزي والتركي
- كل هذني وهيج تشتغل !!تساويت ويه الماعنده شهاده ابتدائي
- الشغل موش عيب مدامه كافيني واجيب بيه لكمتي الحمدلله مادور ابهه انه .. عندي بيتي الي معوضني
- هااا مرتك تقصد
- اي طبعاً
- زين شنو جان مرضهه هذاك اليوم كتلي كلبهه مو
- اي كلبهه من زمان تعبان
- وشلون صارت بالعلاج
- زينه بس يحتاجلهه عمليه
- لااااا متستاهل والله شوكت تسويهه
- بعد انه ماكلتلهه ماريدنهه تضعف هسه واريدن الوكت المناسب الي ارتب اموري بي واحاجيهه
- كاكا اني عندك انته شتريد حاضر اني
- تسلم ماتكصر والله بس مااعرفن امدن ايدي لاحد انه بتعبي ادبرنهه وربك الرزاك
- نتساعد كاكا مو عيب احنه صرنا اهل
- تسلم

ضل يلح عليه وانه ماارضى نهائياً اتدين من احد
ووصيته مايجيبون طاري ليهه ع العمليه ... تعشينه وانه ترخصت منه ورحت للمحطه وبالي يم ربى اخاف تعبت وصار لازم اطول للوحده بالليل اعوض بيهه ساعتين التاخرتهن عن الشغل

ومن رديت اول مافتحت الباب اجتي عليه وهيه عصبيه ...
- يعني ويننننك هااا ليش هيج تتاخر
- بويه شمالج جنت بالشغل
- الساعه بالوحده وانته كل يوم بال ١١ ونص هنا
ليش هيج تتاخر وتخلي بالي يمك
- هههههه تخافين علي ولج
- لعد ليش مااخاف عليك شمدريني شيصيرلك
بهالليل ولاعندي تلفون واخابرك ولا اعرف احد اساله عليك شلون يعني فهمني شلوون

ضحكت وتكربت ليهه جريتهه من خصرهه وكربتهه ليه وعيني بعينهه انه اضحك وهيه مبوزه
- عليش ماتخافين علي كل يوم هيج هاا
- دائماً اخاف عليك مو اول مره هاي
- بس انتي ماتبينلي خوفج علي هالشكل تكابرين مدري عليش هالمكابر حاطته وياي
- ماكو هيج
- لااا اكو
- مااكو كتلك
- اثبتلج ؟
- اي اثبتلي

ضحكت وخليت راسهه بنص صدري ودنجت لركبتهه وشميتهه وكلتلهه ..
- شوفي هسه شلون ضليتي جامده هيج بحضني وانتي ايدج تريد تحضني وتتراجع هاذ شني موش مكابر لو شيسموه
- مو مكابر بس استحي
- وعليش شني اليخجل بالسالفه هسه انتي ابوج من يرجع من شغله ماتحضنيه ! وانه هسه بداله ماتحضنيني !
- لاااا
كالتهه بغنج وحاوطت ظهري بايديهه وكالت..
- هواي خوفتني بتاخيرك اشكال كمت اتخيل صارلك لاتتاخر هيج بعد عفيه
- موش بيدي والله هاذ ادم اخرني عن الشغل ساعتين عله ماتعشينه وهناك ابو المحطه كالي لازم تعوضهن وتاخرت
- امممم زين اهم شي ماصارلك شي .. روح اسبح بين مااحط الاكل
- شني مااكلتي لساعج !
- اي ماشتهيت
- وعلاجج يابنتي شسالفتج
- اييي هسه اخذه ماصار شي
- رااس يابس انتي
رحت سبحت وطلعت لكيتهه تنتظرني اشيل الصينيه وكعدنه اكلنه وخليتهه جدامي تشرب علاجهه .. وكعدت تحجيلي عله طلعتهه وتالي
نمنه .. وثاني يوم نظفنه البيت سوه و وره ماطلعت من الحمام كبل راحت تشرب ماي واجيت انه وراهه جاي اريدن اكللهه نطلع نتمشى وشفتهه ماده ايدهه اليمنه للكلاص وساندتهه باليسره وضاله ايدهه ترجف ممسيطره عاد كبل رحت اخذت الكلاص من ايدهه وهيه صارت تبجي وانه حضنتهه واخذتهه كعدتهه بالهول .. وامسح بدموعهه ..
- اهدي بويه عليش الدموع علييش
- شهاب ليش هيج جسمي ضعيف يعني شنو كلاص مي ماكدر اشيل
- بنيتي مابيهه شي ولاتنسين بعدج بفتره علاج
ماخلصتي هسه بس تخلصين علاجج يتغير كلشي وبعدين انتي كويه مايهزج هيج شي بنيتي انتي هاذ كله يعدي ويروح باذن الله
- مايروح شهاب والله مايروح
- لااااا لاااا كافي هيج كااافي كتلج يروح شني ماتثقين بحجيي
- اي اثق بي
- جا اسمعي ولاتضلين تفكرين بالموزين هدي نفسج شويه وكافي دموع عليش هالعيون غديتيهه حمر شني اليستاهل !!! كومي انشف شعرج حته تنامين ترتاحين ونطلع للثلج
- صدددك !!
- اي جا عليمن اشتريتي الجفوف واللفاف شني نضل ضاميهن !!
- هههههه شكراً ابو الشهب
- ههههه تدللي

كامت للحجره وهيه كعدت وانه نشفتلهه شعرهه
ردت امشطلهه مارضت رادت تنام .. عفتهه تمددت وطلعت للمطبخ اشوف شعدنه اكل وشناكص اجيبه .. شويه وصاحتني رحت ليهه مفزوع اخافن صارلهه شي ...
- هااا بنيتي بيج شي
- لااا بس اريدك تجي شويه
- اي هاي اجيت شني احجي
- ااا هوه يعني تكدر تجي تنام يمي شويه
- هههههه بويه هبطتيني عبالي شو شكو جنج عله هالنومه سهله

رحت تمددت يمهه وعكست ايدي وسندت  بيهه
راسي وضليت اعاينلهه وهيه اجتي كربت نفسهه
عليه وصارت كلش ملازكه لصدري عاد انه ضحكت وجريتهه ازيد وغطيتهه ونزلت راسي خليتهه يم راسهه وامسد عله شعرهه لحد ماغفينه اثنينه ...

كعدنا العصريه واكلنه وراحت تبدل واجتي جابتلي ملابسي بين مابدلت واجيت ليهه طلعت زوجين جفوف ووياهن لفاف .. لبسنه اثنينه ومن طلعنه
خليت كبوس الكوت عله راسهه وانه هم لابس كبوس وجان الهوا يثلج ردت ارجعهه وهيه جلبت
الا نكمل روحتنه تموت بالهوا البارد وكلشي بارد

طلعنه لمنطقه ابعد وبيهه ثلج ازيد من منطقتنه
وضلينه ناخذ صور وصورتهه جم فيديو وهيه ترسم بالثلج .. عاد كالتلي ...
- شهاب خابر ليال خلي يجون هنا هم هي ضايجه
- بويه شيجيبهم خاف رجلهه بالشغل
- لا هسه رجع دخابرهم حباااب نتونس سوه
- يلا ماشي ماشي

خابرتهم وسمعته بس كللهه ننزل للثلج ويه شهاب وربى هيه كبل كامت تصيح اييي ايي عاد ضحكت وكتله انتظركم ودليته وين احنه ...

ضلينه انه وربى كاعدين ونسوي رجل ثلج حسب مواصفاتهه طبعاً .. صار جنه دبه غاز وبي عوادين عاد نزعت لفافهه خلته عليه وضليت اصورهه وياه وهيه تضحك حيل تتغير فرحتهه بهيج اجواء مشايف هيج بشر يحب البروده مثلهه

عاد اجوي ادم وليال سلمنه عليهن وبعدين صرنا
فريقين وحرب بالثلج وموش بس احنه جانو ويانه هم جم عايله وجهال كلهه تشمر بالثلج واحنه انترسنه ثلج كمنه مانعرف الضربه منين تجي

كعدنا ارتاحينه وكام ادم اخذلنه صوره جماعيه وليال انطت تلفونهه لربى تاخذلهم صور وهوه يحضن ويبوس بيهه وربى تصورهم ...
عاد اجتي ليال وكالت...
- يلاا كومو خلي اصوركم قبل ماتظلم يلا يلا

ربى تعاينلي وانه اشرتلهه نكوم ووكفنه واحد بسد الثاني عاد اجتي ليال ..
- هااي شبيكم اريد صور عفويه شنو هيج متجمدين يلا سو حركه حلوه

عاد ضحكت وجريتهه حضنتهه وضلت تصورنه وصوره انه تعمدتهه جريتهه جدامي وحضنتهه من وره ودنجت خليت راسي يم ركبتهه وهيه دارت وجهه علي كلتلهه..
- احبنج وعلي

عاد هيه ضحكت ودنجت خجلانه وانه ضليت اعاينلهه هيج وليال تصيح يااي وشكد حلو ..
لحد ماخلصنه هالتصوير طلعنه كلنه تعشينه سوه وربى رادت تشرب كهوه انه هم جنت مشتهيهه ورحنه وحدنه شربنا الكهوه وطلعنه نتمشى للسياره .. جانت مخليه خشمه جوه اللفاف وايدهه بجيوب الكوت وتتمشى بسدي .. جان شويه ونزلته للفاف من خشمه وكالت ...
- تدري مااتمنى الشته يخلص
- ههههه شلون نضل بالبرد كل عمرنه
- شكو بيهه احسن من الحر .. اني بالبروده تلكه مزاجي عال العال بالصيف اضل مطايقه روحي
- هههههههاااااي اكول عليش جنتي تشمرين بالحجي وياي كبل وخليتينه نكضيهه بس عرك
ومصايب
- ههههههه والله كل مره اذكر عركاتنه قبل اكول سبحان الغير الاحوال وخلانه هيج هادئين منو جان يتخيل احنه يجي يوم ونتفاهم هيج
-انتي كله بيدج صدكيني
- شلون يعني
- هسه شفتيني شلون هالشهر كله هادىء وحباب وياج ليش لين انتي مطاوعتني وكريبه يمي لو تكعدين تعاندين وياي وتروحين بعيد مني تلكيني اصير وحش ماانحمل .. يعني باختصار انتي بيدج تخلين حياتنه حلوه وبيدج تخلينه نسويهه جحيم وصوتنه يصل لسابع جار
- اممممممم زين كلتلي هالشي راح استغله لعد
- ههههه استغلي بويه اااانه اريدنج تستغلي
- ايييي واني اكيف استغل هههههه
- مرتاحه وياي ؟
- ايي كلش مرتاحه
- الحمدلله .. ربى اذا بيوم شفتي صار شي يزعجج مني وانه مامنتبه عليه نبهيني وكليلي هيج وهيج ماريدنه لاتضلين ساكته بويه احجيلي تره انه موش اعلم الغيب واعرفن بيج تضوجين لو شني تريدين كليلي حته افهم ماشي
- ماشي ماااشي وانته هم
- انه دايماً احجيلج ماضم شي عليج
- اي كلش زين

صعدنه بالسياره ورجعنه للشقه كبل نمنه .. وثاني يوم الظهر ..
- شهاب اريد اروح يم ليال شويه
- عليش شعندج وياهه
-فد شغله بيناتنه حباب خلي اروح ساعه وارجع
- موش اكثر من ساعه تره اجي ادك الباب عليج
واجيبج
- لا لا والله ماتاخر بس ساعه
- يلا روحي
- شكرراً

راحت كبل لبست شالهه وطلعت ..هنايه لين ادري مامش احد بالعماره يضل صاعد نازل اخليهه تطلع بالبجامه بس تلبس شالهه وهيه الشقه جدامنه صايره فامن عليهه ... بس ماعرفن شعدهه ويه ليال كثرانه روحاتهه وكعداتهن سوه ...

رحت للحجره وضليت الملم جم شغله وجان اشوفن كلادتهه مال شمس الشيخ محطوطه بمجر عاد انه انتبهت انهه مالابستهه من اول ماكعدنه هنايه تفاجات كلش .. عبن مدامهه نزعتهه معناهه الشيخ طلع من بالهه وسدت عله سالفته .. استغربت كوتهه بهالناحيه من تكولن انتهى يعني انتهى انه كل ضني بعدهه تفكر بي .. بس فرحني هالشي عبن انه اريدهه تنساهم وتخلص من حزنهه..

رحت نمت وتالي حسيت عليهه تكعدني بالخمسه
كمت بدلت وطلعت للشغل وجنت افكر باجر بليله راس السنه شنسوي ؟؟؟
عاد ثاني يوم ساعه ٣ اجاني ادم وراد نطلع تذرت منه ردت مارضى الا نطلع ورحنه لكهوه وعرفني عله جم واحد من صحبانه وضلينه نلعب دومنه ونسينه الوكت عاد انه بالسته كبل عفتهم وطلعت للمحطه وهوه الزلمه بالعشره طلعنه كلنه ورجعت للشقه ..
طبيت جانت كلهه ضلمه استغربت رحت اريدن اشغل الضوا .. جان كبل اشتغلت نشرات عاينت الصاله كلهه نشرات وشجره ونفاخ وطبلات كلهه حلويات وشموع صغار .. ضليت واكف وصافن
هاي شقتي !!!!
انداريت اريد اصيح ربى اشوفنهه وين وشني هاذ الصاير .. جان تجي وشايله كيكه صغيره لونهه احمر وحطتهه بين الحلويات بالنص انه ضليت اعاينلهه شعرهه رافعته ومرجعه هذيج الكذله مثل الكوريين مسويتهه ولابسه ثوب كصير للركبه لونه وردي وصلوخ وجسمهه الابيض يضوي بي ومكياج بس عله كد حمره ورطيه طوخ وكحل فوك جفنهه .. انه ماجنت اعرف بعد شسوي كلش تصنمت بمجاني مطوه وحده ماخطيت ضال واكف يم الباب وفاتح حلكي واعاين ... جان يكسر هالشي
صوت ضحكتهه العالي ..
- شبيييك صفنت تره شقتنه هاي لاتخاف
- لا متاكده !
- اي متاكده متاكده
- وانتي منو ؟
- هههههه مو طبيعي ابببد

اجتي ليه واخذت ايدي بايدهه ومشينه وانه بعدهه اثار الصدمه بيه .. مشينه للحمام وكالتلي ..
- اسبح يلا محضرتلك الحمام

مالحكت اكول شي وهيه راحت .. طبيت الحمام
وسبحت وانه بس اتصفن شني الصاير؟؟ رحت اريد البس لكيت بجامه جديده لونهه ابيض ونيلي
كلت معقول هاي هيه اشترتهه؟؟؟؟ ويمتى !!!
لبستهه اجتي قياسي بالمضبوط عاد طلعت وانه انشف شعري ورحت للحجره مشطت وتعطرت
وطلعت ليهه .. جانت واكفه تعدل بالزينه الي عله الشجره وانه اتمعن بعودهه الحلو الي صاير انعم بميه مره بهالثوب الي عليهه .. اندارتلي وهيه تضحك كالت ...
- نعيماً
- الله ينعم عليج .. تعاي ليه فهميني شني الصاير
- شنو تره ليله الميلاد غير نحتفل
- هااا زين زين تطورات عمي

رحت ليهه واخذت ايدهه وشبكت بيهه اصابعي وكلتلهه وانه اعدل بكذلتهه ..
- وهالجمال ؟
- الك
- الي !!!!!
- اي غير لازم تشوفني حلوه لعد تحتفل ويه وحده محلوه يصير !!!
- انه الي عندي دومهه حلوه بس هسه زايد حلاهه
- ههه كااافي تخجلني هيج تعال نكعد ناكل
- متريدين نطلع !! جنت مفكر اخذج للقلعه نشوف الصعادات
- امممممم مو بعدك تعبان
- اي والله شويه
- زين هسه بعد ساعتين باقي .. ارتاح شويه وناكل وعود نطلع
- اي زين هيج

رحت كعدت عله القنفه واجتي كالتلي..
- تريد عشه لو كيك وحلويات
- كيك
- تمام
اجتي جابت ماعونين وسجين وجنت اشوفنهه مرتبكه مدري شبيهه وكفت رحت اخذت منهه كلاصات العصير وحطيتهن عله الطبله واخذتهه ووكفتهه جدامي ..
- شمالج بنتي فهميني عليش هيج مرتبكه ومشدوهه
- مادري يعني افففف
- ههههه اهدي اهدي واحجي براحه يلا عوفي الاكل هسه احجيلي شني الي بالج
- تمام تمام بس لحظه واجي
- براحتج

راحت للحجره وسدت الباب وانه واكف وصافن شمالهه هاي !!!!
وره شويه اجتي ووكفت جدامي ورفعت ايدهه خلتهه عله لحيتي انه من هجست بروده ايدهه هنايه انه نقطه ضعفي من زمان ارتخي بايدهه عله لحيتي وعيوني ..عاد كبل غمضت عيني براحه
وهيه لامست خدي وهمستلي ..
- احبك
انه جني سمعت وماسمعت ..جريتهه من خصرهه ودنجت راسي ليم وجهه ..
- شني كلتي
-ا ا احبك
- بعد ماجاي اصدك الي اسمعه بعد عيدي
- شهاااب لا تربكني هيج كافي بالكوه دبرتهه
- هههههههااااي يبعددد رويحتي انتتتتي ياكل هلي ودنيتي اعشكج انه اعششكج

حضنتني وانه اضحك وحاضنهه عاد كلتلهه
- بس فهميني شلون ويمتى وشمعني هسه يلا احجيلي كلشي ربى لاتضمين شي ماتتخيلين فرحتي شكبرهه اليوم احجيلي وكملي فرحتي
- ماشي ياعيني احجيلك بس خلي نكعد

جريتهه وكعدتهه بحضني وهيه حطت ايد عله جتفي والثانيه عله لحيتي وتعاينلي وكالت ..

- انته حركت بداخلي شعور جان منسي وماتخيلت بيوم راح اعيشه او هو اصلا شلون يكون بس
مادري شلون وليش صار هيج صراحه ماعرف الوكت المضبوط الي بي حبيتك بس لكيت نفسي متعلقه بيك وحتى بدوامك اضل حيل ضايجه واحسبهن ساعه ساعه لحد ماترجع واشوفك حيل ارتاح واطمئن حتى انسى مرضي واهلي وكلشي
بس ماجنت افهم هالشي شنو لحد ماليوم الي تقربتلي بي صح اني ضجت بس جان السبب اني
مو خايفه منك
- جا شني الي جان
- هههه يعني حكلك بس مو تضحك
- معقول الشغله اتضحك!!شني كولي
- جنت افكر يعني انته جنت هيج ويه ناديه واتخبل
فما تحملت هالشي بعد
-هههههاااااااااااااي لج بويه انتتتتي شتحجييين
- اييي يعني شنو ماصاربينكم هالشي يعني ماحضنتهه مابستهه
- اييي وشني يعني غير جانت
- اي كافي لاتكمل

رادت تكوم جريتهه وحضنتهه وريت كلتلهه..
- ولج ياثوله انتتتي شني نسيتي انه شلون تزوجتهه نستي من اجيت عليج هذيج الليله شمالج
- اييي اجيت وتريد تعوف كلشي وحالتك حاله وره اسبوع تروح تتزوج !!! شيسموهه هاي
- يسموهه ثولج الزايد
- لااا مو ثولي اصلا زايده مني وكاعده احجي بهيج شي هاي عوف السالفه
- ولج بنتي اكعدي خلي افهمج بس اهدي شويه شمالج تسودنتني . ههههههاااي ولج بويه تغارين من الي ماتسوه تراب جدامج !!!
- ماغار بس هيج
- شننني الهيج هاي اذا متغارين وهيج اكلتيني حاصل فاصل جا لو تغارين شتسوين بيه
- اكرهك عيشتك
- هههخخخخخخخ هيه هم تاليهه هيج
- هسه شنووو احجيلي لا تضل تغير بالموضوع
- هااا موش ماتردين تعرفين
-شهااااب
- اسمعي بويه انه وعيونج ماطخيتهه لا بخطوبه ولا بزواج
-هاي شنوو معقول!
-اي وغلاتج عندي .. عبن بالخطوبه انه مالي نفس بيهه كل بالي يمج حته وكت احاجيهه جان فكري كله بيج وهذاك اليوم من عرفت البيهه عاد تزوجتهه للستر واحفظ بي ماي وجه خوالي وضلت عايشه ويانه بس هيج لا حضنت ولا بوست ولا شمشمت كلشي ماسويت بطلي خبالات
- هاااا يعني ابد ولا مره
- ههههخخخخخ والحمزه لااا
- اممممم زين انته شنو العرفته عليهه
- انتي الي لازم تكليلي شني العرفتي ونبهتيني
عليه !!
- اني شفتهه ويه واحد بوضع مو حلو بس هيج
- وشلون بله هيج شفتي
- مادري اني جنت اريد اكعد اتغده وهي كدامي كاعده عاد صفنت عليهه وشفتهه هيج واني اجي واكلك وانته تعاند
- انتي صوجج تعاي احجيلي هيج واعوف موش تضمضمين علي شعرفني انه
- اي ميصير شلون اجي احجيلك هيج مراح تصدكني
- اووووووف يمعوده هسه انتي شجبتيلنه هالسالفه خلينه بالمهم
- امممممم
- تحبيني ؟
- اي
-اي شني
- اي احبك
- شكد
- بلا حد لحجمه
- زين ماكلتيلي شعجب اليوم يلا حنيتي عليه
- هههههه لسببين .. الاول اريد ابدا سنه جديده
وياك واحنه قريبين اكثر والثاني اريد انهيلك التعب مال السنه هاي كلهه
- ياارويحتي انتتتي .. تدرين بكل شي سويتي اليوم عله فرحتي بي انه اضمنلج تدخلين الجنه
-هههههههههههههه يعني هيج بيهه حسنات هواي
- بويه انتي حييتيني شلتي مني تعب سنين هاي جزاهه جبير وحك هالعيون
- ربي يكدرني ومااخلي عندك اي تعب
- بس خليج وياي وصوتج وضحكتج هاي كفيله تغير كل يومي وعيونج

ضحكت وباستني بخدي عاد ضحكت وكلتلهه...:
- هسه تخليني ابوسج براحه لو تضلين تفرفرين بافكارج
- ههههههههههههه لاا اطمنت بعد
- بس يعني صدك هيج تغارين !!!
- باوع هاي مو غيره يعني بس ضجت لان هيج شي حلو واني حبيته ماحب احد ماخذه قبلي فهمتني يعني هو هيج
- ههههههه تحبين تتملكين انتي
- اييي كلشش .. خلي ناكل يلا ورانه طلعه

بستهه بجتفهه وهيه شردت مني كامت جابت السجين وكعدنه اخذنه جم صوره وكصينه الكيك
كالت ..
- هاي تعويض لتعبك بالشغل صدكني حيل انقهر من اشوفك هيج تتعب علمودي
- ياكليبي هالتعب كله راحه جدام سعادتج وتشكرين عله هالمفاجاه فرحتيني بيهه ونسيتيني كلشي
- تدلل
- والبجامه خوش ذوق
- هههه همزين عجبتك هاي اشتريتهه هذاك اليوم ويه ليال وحتى هيه اختارتلي هالفستان
- تدرين من كد مالايك عليج مصفني بهالنعومه المزيدهه عليج
- امممممم هواي ادقق
- هههههههه جا غير لعابتي شلون ماادقق بيج
- هههه شهاااب تره انته هواي تخجل اكل وكافي

ضحكت وهيه وكلتني الكيك وضليت حاضنهه وهيه توكلني وضلينه ناكل كرزات وحلويات
وبعدين كمنه بدلنه وطلعنه ايدي بايدهه وفرحتي ازيدن من فرح كل هالدنيا بهاليوم ...

طلعنه بالسياره وجان المركز ازدحام قافله عاد طبكت بعيد ونزلنه نمشي والدنيا تثلج برد .. ايدهه مافلتتهه ولا لحضه .. صار وكت العد التنازلي
وكلهه كامت تصيح وتهوس واهل الجوبي وكفو
وصار الكل يصيح بالارقام .. واحنه هم وكلهه تصيح بعلو صوتهه لحد ماصحنه واااحد وبدات الصاعدات والتصفير وانه حاط ايدي عله جتفهه ونعاينلهن وبداخلي احمد ربي واشكره لهيج فرحه ماجنت اتخيلهه بكل عمري اصلا جنت مأيس يجي هيج يوم واضحك هالضحكه من كل كلبي وياهه

ضلينه للساعه وحده شبعنه تصوير وهوسنه لحد ماملينه وتالي ردينه للشقه .. طبت تبدل وانه رحت غسلت وطفيت الاضويه والنشرات ورحت للحجره .. جنت لابس بس الفانيله والبجامه عبن الشقه دافيه .. رحت ليهه وهيه جانت تعلك بملابسهه .. عفتهه كملتهن ورحت ليهه تلمست شعرهه النازل عله جتفهه ولامست خدهه ورفعت وجهه ابتسمتلهه وهيه هم ..دنجت بستهه بشفتهه
وشلتهه للجربايه ...
مددتهه ورحت طفيت الضوا وشغلت بس التيبلام
واجيت يمهه هيه حضنتني عاد انه صرت فوكاهه وكلتلهه ..
- رويحتي تثقين بيه !
- طبعا اثق بيك
- زين جا خليج هاديه وياي عطشان عليج ماتريدين ترويني اليوم
- شهاب مايصير هيج
- مااتعده لغير شي لاتخافين بس صفي بالج وياي ولاتمانعيني بشي وانه مااسوي الي مايرضيج
- ماشي

دنجت لركبتهه شميتهه ورديت كعدتهه ورفعت تشيرتهه نزعته الهه وكل ماتريد تحجي ماخليهه
ضلت بس بفانيله مدلعه حضنتهه وشميتهه من ركبتهه وصدرهه وشعرهه ورجعت نومتهه وضليت ابوس بجتفهه وركبتهه وصدرهه وهيه كل لمسه منهه تتيهني بيهه بالزايد .. ضليت اتفنن بشافهه وهيه متجاوبه وياي بكلشي .. من شفت روحي كلش انفعلت وخفت لا ماسيطر بعد وياهه وخرت منهه وجريتهه لصدري حضنتهه وبست راسهه وكلتلهه ...
- بوستج تكفيني عن كلشي
- كلبك يدك سريع
- هههه ايي من حبج
- ههههه شلون هيج تحبني احجيلي
- بصراحه انه ضليت اعاند ويه روحي ماريد احبنج بس ماكدرت جنت اصير اعصاب وماكدر انساج كلشي اشتغلت ودرست واشكال لهيت نفسي حته مافكرن بيج بس اضل مشتاكلج ولعطرج انجن بي اهجس روحي مثل المدمن بس اشتمهه اهدا وارتاح وكبل انام
- ومنين جنت تحصل عطري هناك!
- هههههه معليج هاذ شي خاص
- لااا شنو خاص كولي منين
- جنت معطر واحد من تشيرتاتي بعطرج وكضيت الليالي اتحضنه وانام
- ههههههه يالله صدك !!
- اي وعيونج وكلهه عرفتني عاشك من وراه بس ميعرفون مني معشوكتي لحد النهوه يلا انفضحت بعد
- هههههههه اوووي هلكد متعبك الحب
- ههه تكلي متعبك بويه انه اجدادي بكبورهم اشتعلو من وره هالحب راد يسودني بعلي
- اممم الحمدلله تلاحكناله
- اييييييي بالله العظيم يمكن جنت احلم اطب الجنه بس بهاليوم وهيج يصير لااا
- ههههههههه هاي شنو هيج مأيس مني
- والله كولي لنفسج مبقيتي اي امل كلهن حركتيهن
-بس عوضتك ها لاتنسى
- لاا بويه خلف الله عليج
- شهاااب
- يا رويحته كولي
- اريد كتب اقرا شلون واني حتى ماعرف كلشي بالماده
- عندج وحده من صاحباتج تعرفين حساب الفيس مالهه
- اي عندي
- انطيج تلفوني باجر راسليهه وافتهمي منهه بلكي مسوين ملازم pdf واذا لا خلي اتصورلج الماده
- زين شكللهه اذا سالتني ويني
- كليلهه مسافره بايران ولاتخليهه تتسال هواي
كليلهه هاذ مو تلفوني وماكدر اتاخر وخلي ادزلج
مال كل المواد
- اممم ماشي
- خلي نام وراي شغل الصبح
- اففف مايخلص هالشغل
- بيمن نعيش بنتي غير نشتغل
- زين ماشي يلا انام بس وقت التلفون خاف تاخذنه لنومه

وقته وهيه طفت التيبلام وجريتهه لحضني ونمت
جانت ليله من العمر نمت وانه ملكت كل فرح هالدنيا .....

كضيت هالايام بكل حب وياهه شايلتني بعيونهه
تمشي وياي مثل خيالي وكل ماتتلكاني بضحكه وحضنه والحب الي جنت اشوفه بعيونهه جان يكفي يخليني طاير بالسمه .. شفت حته صحتهه تحسنت ودايماً الضحكه ممفاركتهه ولا فاركت حضني .. لبسي حمامي اكلي كله معتنيه بي ودايماً تخصصلي وكت راحه من الشغل .. ياما تجي تفرجلي جسمي لو نطلع وتضل تنسيني الدنيا بحجيهه وحركاتهه الطفوليه الي تشاقيني بيهن
تخليني انسى الشغل وكلشي .. والليل تخليني انام عله صدرهه وتضل تلعب بشعري لحد مااغفى
جان كلشي باحسن مايكون لحد مابيوم ابو المحطه
صار عنده مشاكل ولازم يسافر فسرحنه كلنه من الشغل .. وابو المخزن شغله فلوسه مو هلكد واكثره تعب ... عاد ضليت يومين ادور شغل ثاني مالكيت فرجعت للبيت بالليل ضايج وبالي الف حسبه انه يله اريد اجمع فلوس العمليه وجنت اريد اشترك بسلفه وهسه كلشي خرب فرجعت حيل مخنوك .... تلكتني بجمالهه وضحكتهه بوست راسهه وطبيت كعدت ع القنفه ...
راحت جابتلي ماي شربت وخلت ايدهه عله لحيتي ورفعت راسي ليهه عاينت بوجهي وابتسمت دنجت باستني بين عيوني وراحت للمطبخ جابت العشه ... كعدنا اكلنه وهيه ساكته وتعاينلي بعدين كامت جابتلي جاي وانه شويه ساعدتهه بالمطبخ ورديت رحت غسلت ورحت للحجره كعدت وافرك براسي عاد اجتي كعدت بسدي وكضت ايدي وباستهه ..
- شبي حبيبي ضايج
- شويه بالشغل يارويحيتي
- شبي الشغل احجيلي اسمعك
- هاذ ابو المحطه سافر وبطلنه كلنه وشغل المخزن متعبني ومامنه ربح زين وجاي ادورن عله شغل غيره بس مامش شي
- لاتهتم سهله حبيبي كوم نام وارتاح وكلشي يسهل لعيونك
- الله كريم

ضحكت وحضنتني وانه تمددت جنت انتظرهه تجي تنام يمي شو هاي طفت الضوا وراحت
صحتلهه وكالت شويه واجي عفتهه براحتهه

ضليت اتكلب ماكدرت انام وهيه مو يمي كمت جاي اريدن اروحن ليهه جان تجي .. سدت الباب
واجتي تمددت واشرتلي اجي لحضنهه .. رحت خليت راسي عله صدرهه وهيه حاضنه راسي وتلعب بلحيتي واذاني انه رفعت ايدهه خليتهه عله عيوني هيه ضحكت وباست راسي عاد هيج يلا كدرت انام ...

ثاني يوم بالشغل الصبح خابرني ادم ..
- شلونك كاكا
- هلاا خويه بخير
- شوكت يخلص شغل اريدك بسالفا
-ساعتين و اخلص ليش خير صاير شي
- كاكا ب ١٢ اني ينتظرك بالكهوه نحجي شويه
- يلا ماشي

سديته ورحت كملت شغل وطلعت للكهوه الي دايماً نكعد بيهه ... سلمت عليه وكعدنه نسولف وشويه جان يكلي ...
- كاكا شهاب لكيت شغل اثنين يلوك الك
- هااااه صدك تحجي
-اي والله
- شني هالشغل
- واحد مساعد مختبر بس بغير منطقه وثاني شغل على انترنت
- شلون هذا الثاني
- انته مو يعرف لغات اكو موقع يترجمون بي افلام وبرامج ومسلسلات وبي هواي ارباح

كعد يشرحلي عله هالشغله وكال لازم اسوي بطاقه كرديت كارد حته يحوليلي الفلوس .. واتفقت وياه
باجر نروح نسويهه ورديت للشقه وكبل اول ماطبيت ...
- ربى يارويحتي
- هلااا عمري شو تاخرت
- لكيت شغل حبيبتي شغل بالبيت ع المرتاح
- الحمدلله حبيبي مو كتلك تسهل لا تخاف

جانت حاطه ايدهه عله وجهي ومبتسمه من اول ماحجيتلهه ..عاد جريت ايدهه بوستهه وطبينه

وثاني يوم رحنه سوينه البطاقه والحساب وعلمني صاحبه عله البرنامج الي اشتغل بي وهوه عنده
لابتوبين  مالته ومال زوجته ..اشتريت من عنده واحد وضليت اشتغل بي وتركت شغل المخزن
صار يومي كله كاعد عله اللابتوب اعاين للافلام انه وربى واحجيلهه شيصير ميصير وبعدين ابدي اترجمهن واضل سهران بيهن وربى تحجي عليه وكلساع ومطلعتلهه حجه حته اعوفه وانام ..

وهيه راسلت صاحبتهه ودزتلهه المواد نص ملفات ونص صور ومنطيتهه جم قناه ع اليوتيوب يشرحون موادهم وضلت هيه تدرس وانه اشتغل ع اللابتوب ...
حصلت بي خوش ارباح اطلع منه الايجار ومصرفنه والباقي اضمه .. ومن كمت اترجم بالمسلسلات زادت الارباح اكثر بالاخص المسلسلات الطوال عبن من بديت بافلام الساعه وساعتين بس هذني كلش ربحني ... وكل يوميه ادعيله لهالزلمه الدلاني لهيج شغله وريح بالي

جنت اخذهه كل عشر ايام اسويلهه تحليل فقر دم
واشوف النسبه جاي تزيد الحمدلله .. وحالته زينه هالفتره وانه ماخليهه تشتغل شي اذا موش وياهه

كبل اسبوع الامتحانات رحت فتحت حسابي القديم
وخابرت وليد جاوبني بسرعه وملهوف ...
- لك يالضللللللع وينك
- ياصخيم اسكت فضحتني
-لاتخاف بالكهوه اني .. شلووونك خويي والعباس مشتاقلك كلبي طاك عليك
- بخير ونعمه انه انتم شلونكم اهلنه زهره طمني عليهه
- زهره شيبت كلبي كل يومين والكاهه داكه مناحه وتعال ياوليد تحايل وسكتهه .. بس اني كلتلهه اخر شي .. اخوج عايش بالعسل وانتي تبجين عليه من ثول الثولج
- هههههههااااي
- والله عاد سكتت بعد بطلت بجي
- زين سويت ديربالك عليهه وليد
- والله حاطهه بعيوني اخذتهه زيارات والعاب وشبعتهه ونسه وهدايا ومامقصر وياهه اسالهه وشوف شتكلك
- لااا مايحتاج شني ماعرفك انه .. اكلك وليد اريدك بشغله
- خادم صغيرون كول
- بسام اريدك تخلي عينك عليه وتلهي فد عشر ايام
- هاا ليش بس لا ترجعون للعماره
- لااا شنرجع .. بس اريد اجي لبغداد امتحانات ربى راح تبدا وخاف هذا مفكر يجي للكليه كلشي يصير اريدك تشوفله صرفه
- هاااااا ... كتلي عشر ايام
- اي
- باوع تره هو اجه دور عليكم بغداد وبسليمانيه واربيل وايس مالكاكم وين انتو هسه!
- بعيدين ماعليك بهالسالفه هسه شراح تسوي
- هسه انته ليش متكلي وينك
- حته لايزل لسانك جدام احد ولو حلفوك ماتحلف جذب عبن كلهه تريد مجانه منك
-اي والله هذا ابوك رايح جاي يسالني عليك واحلفله ميه يمين ماعرف
- شفت هيج احسن ... هسه شتسوي فهمني
- باوع يمكن اخذه ونروح لاربيل
-لااااااا وين رايح هناك
-لعد وين اخذه
- اخذه سافرو لاي دوله
- مفلس مو مال سفر خويك
-ماعندك ورقتين تروح بيهن لايران اذا ماعندك ادزلك
- لك هااااا عمي طاك من يومك
- انجب عاد هسه اخذه وروح لايران خلي ابوك شويه يحرك جيبه متكلي المن رايد هالفلوس
- اييي والله جبتهه خوش سالفه هاي حته اروح استفاد من فلوسه شويه يلا لعد نروح
-وليد اريدنك تقنعه موش بجلمتين ويسكتك تضل تنك عليه وتاخذه من باجر تروح تحجز وتفيز ماريدنه يشك بشي فهمت كون كبل ماتبدا الامتحانات انتم هناك بايران فهمتني
- اي وداعتك هاي اعتبرهه صارت باجر اروحله واخذه سحل ولا يهمك اعتمد عليه
-عفيه بالنسيب عفيه بصاحبي الضلع
- اااااخ شهاااب ليش هيج صار بحالكم شلون بيكم لك والله مامر يوم اذا مافكر بيكم شلون عايشين
- الله كريم شنسوي
-تزوجتو بعدكم
-لا بعدنه
-خاااااب شتنتظر ماتكلي تزوجهه واضمن كلشي الك لاتصير مطي
- بعدين موش هسه خلي تكمل امتحان يلا
-عود اعزمني
-ههههه ماعزم اتزوج سكتاوي
-عمي لاتعزم بس اتزوج خلصني ربيتلي عله
- ههههه يلا تفرج تفرج ... يلا انه اروحن موش تنسه وعود راسلني وكلي شيصير
-ماشي خويي مودع بالله

سديته واطمئنيت من ناحيه بسام جنت شايله هم شكبره هاذ مسودن اذا عرف بينه بغداد مايكعد راحه يسويلنه بلوه ...

نهايه الاسبوع سافرو وليد وبسام وحيدر لايران
واحنه تحضرنا حته نمشي لبغداد وانه جنت متفاهم ويه الحجي حته نضل يمه جم يوم وهوه رحب بينه
خطيه يكيف بس يريدن احد يجي ليمه ...

وبدات الامتحانات جنت اوصلهه الصبح واضل هناك بالنادي كاعد انتضرهه لحد مايبدون الطلاب يطلعون اروح انتظرهه بالسنتر لحد ماتجي اتطمن عليهه شلون جاوبت ونطلع لبيت الحجي ...

جان امتحانهه بين يوم ويوم وجنت اخليهه تدرس واسمعلهه وادقق برسمهه والحجي هم ينطي ملاحضاته عبن هوه هم مهندس جان كبل وعنده خبره طويله ... وتساعدنه وياهه عله طول الامتحانات جان من يجي محي ماخليهه تطلع من الحجره واتضل عيني عليهه وماخلي يلمحهه ابد

وباخر امتحان الحجي اخذنه "لكهوه وكتاب " وحضرنا امسيه وهيه كلش عجبتهه الكعده هناك
وضلت تحجي عليه ليش ماجبتني من كبل وتعاركنه عله هيج سالفه ... وحيييل تغار اذا كلت لواحد حبيبي الله يخليك بعد اجرم عله روحي

ردينه لاربيل وسوينه غدا وعزمنه ليال وادم وكضينا اليوم سوه ... وادم كال يريدنا نطلع
لجبل كورك نكضي يومين هناك نختم بي الشتويه

عاد اخذ اجازه واحنه رتبنه امورنه وطلعنه
وهيه كيفت عله الروحه جيف بيهه ثلج ..
صعدنه بالتلفريك وليال المصوره مال الرحله
ماخلت مجان ماصورته ولا لقطه ماخذتهه لينه
هناك مشينه صعدنا يم الحافه وانه كاض ايدهه
وكلساع اسالهه اذا بيهه شي وتطمني عليهه

اخذنه صور هناك وهيه صورت ادم وليال ولعبنه بالثلج لما ملينه عاد رحنه هناك صاير فندق بالجبل
بس شني هاذ كله حجر خشبيه ومدفاه مال حطب
وممنوع تلفونات تطب لازم نسلمهه ويه الكاميرا للاستعلامات يلا نكدر نحجز ... يكولون هاذ حته يضل الفندق محافظ عله جودته وماله منافسين

بس هو من صدك يستاهل كل هاذ التشدد عالم ثاني كله هدوء ودفو واطلالته صايره عله علو بحيث الجوه مثل النمل صايرين تحس روحك بالسمه معلك شي خيالي ...

جانت ربى مغرمه بهالمجان كله واحنه جنه تعبانين فكلمن راح لحجرته ... سبحت واجيتهه
جانت واكفه وتعاين من الشباج ...
- ها حبيبي نعيماً
- ينعم عليج يارويحتي .. روحي الماي دافي يريح عظامج
- اييي والله ياريت

راحت كبل للحمام وانه تمددت واجتي بالي عمليتهه ماضل من الفلوس هواي شغله شهر ونص واكملهن بس شلون اقنعهه تسويهه هيه هنايه المشكله ... ادري بيهه راح تعرضلي وتطلعلي ميه حجه حته ماتسويهه ...

لشويه واجتي لابسه الروب الابيض مدنفشه بي
ورافعه شعرهه بالمنشفه عاد انه كلتلهه ...
- بويه ارحميني موش يوسف انه
- هههههه لتباوع
- والله حلوه هاي تجيني تنكرط وتصيح لتباوع ليش عيني ماباوع
- ايييي شهاب يعني شسوي نسيت اخذ ملابس بعدهن بالجنطه هاي راح اخذهن والبس واجيك
يلا ارتاح
- لااا يارويحتي هوه دخول الحمام زي خروجو
تعاي بويه تعااااي ثلج الله كله مايطفيني هسه بدونج

رحت كبل شلتهه عله جتفي واجيت مددتهه عله الجربايه ووخرت المنشفه من شعرهه واخذت جم خصله شميتهن وهيه تتلمس بلحيتي كلتلهه ..

- يمتى نتزوج ماكافي هيج حركان كلب
مااضمنلج اصبر ازيد من هيج
- شلون نتزوج بدون اهلنه شهاب ميصير
- يصير حبيبه يصير هسه همه سالين علينه مدورينه ترديني اصبر ليا وكت مثلا هاا فهميني
- مادري بس عيب نتزوج هيج بدون علم اهلي ماكدر
-اصلا هسه كلهه تفكر احنه تزوجنه ورحنه
- ماكدر صعبه عليه هيج
- ربى انه جاي وياج بكل شي يريحج بس هم فكري بيه يعني ليمتى نضل عايشين سوه بدون زواج فهميني شننتظر بعد !!!!
- خلي نصبر شويه حباب يجوز اهلنه يريدونا نرجع وهناك نتزوج
- راح اخليج عله راحتج بس مااظن هالشي يصير وحسبي بالج اطول مده انطيج منا لشهر الرابع
ازيد منهه تحلمين لين انه صبر خلص وشلت
-ههههههههه ماشي مو تدلل
- مشتاكلج
- بس اني يمك
- اريد ازيد بعد تكربين ازيد هيج بعدني اهجسج بعيده
- شلون ازيد !
- يعني هيج

حضنتهه وخليت رجليهه بين رجلي وهيه ضحكت وانه تمشيت عله شفافهه ضعت وضعيتهه وياي بيهن جانت هالليله حيل صعب سيطرتي بيهه
انفعلت كلش وماصحاني  الا رفضهه ...عاد حضنتهه وتعذرت منهه ونومتهه بحضني وانه كل يوم احمد الله عله هالنعمه لاتطير من ايدي ...

ثاني يوم كملنه جولتنه ولليل يلا ردينه للشقه
جانت ايامنه حلوه وهاديه والشغل زين بكل شي
ووين مااروح متوفق بكل شي لحد ما بيوم بدايه
الربيع نزلنه ويه ادم وليال لمتنزه وجنه ماخذين غدانا ويانه .. فرشنه وكعدنا انه وادم نشوي وهنه يجهزن السفره .. كعدنا اكلنا ورحنه نشيل الزباله انه وادم ونغسل وهنه ضلن يلمن بالغراض من رجعنه شفت ربى راحت واستندت عله شجره
انه كلبي نغزني وكبل رحت اركض ليهه وهيه اندارت تدورني بعيونهه وبالكوه تجر النفس
كبل رحت كضيتهه وطاحت من طولهه وضلت تشهك وتكح جنت افرك صدرهه وايدهه وهيه عينهه بعيني ماجانت تحجي بس جنت افهمهه مادري شلون بس فهمت .....
.
.
يتبع
😁😁