دخل الميلس وقعد بثقل ..وفتح زرار ثوبه بتعب ..وقعد يطالع اطار الصوره اللي معلقه بنظرات تائهه ..وباله في مكان ثاني ..طلع
المسباح من مخباه وقعد يسبحن شوي ..
دخل فهد وهو منزل راسه من الفشيله من عمه ..:يبه ..
ابومحمد وهوعارف رد فهد ابتسم بحزن ..: لاتقول شي يابوك ..عارف شردها ...وقف بتعب ...الله يهديها ..
فهد : يبه انزين اقعد تغدى ..
ابومحمد : خيركم سابق ..العيال ينطروني ..
فهد : يبه ..كان ودي اقدر اسوي شي ..
ابومحمد ببتسامه هادئه : العمل بيد ربك ..والله يقدم اللي فيه الخير ..وقف يتوجه للباب بس وقف في مكانه بعد ماطلع شاب طويل
عريض في ويهه بلبس غربي ...اللي وقفه ملامح ويهه كانت قريبه منه ذكره بنفسه من فتره هب قريبه ...
حمد تيبس في مكانه وطالع هالريال الكبير ..حس بشعور انه مب غريب منه ..كانه شايفه بس هب عارف وين قرب منه وحب خشمه
...
فهد وهو يكسر تسأل : يبه هاذا حمد ولد عمتي عفرا ...
ابومحمد : يامرحبا ..
حمد بأحراج حب راس خاله ..: هلا يبه شلونك ...؟
ابومحمد : الله يسلمك سلامة الاسفار ...
حمد : الله يسلمك ..وين رايح حياك الغدا ..
ابومحمد : الله يكثر خيركم ..انا جاي اسلم عليكم ..العيال كلهم مجتمعين ...
حمد سكت من الاحراج خاله جاي يسلم وهو اصلا ماطرى على باله هالشي ...والسبب معروف امه الله يسامحها ..واكيد رفضت
تطلع لخاله ...حمد وهو يحاول يداوي الموقف ..: يبه ..اسمح ..بس خاله قاطعه ..
ابومحمد : حمد ..ماصار الاالخير يله استرخص منكم ...وطلع ..
حمد طالع فهد وهومتلوم من خاله ..تنهد بحسره ...: الله يهديها ...يعني عندي خال هالشكل وتطردني منه ...
فهد وهويقعد بتعب ..: الله يسامح الجميع ..موقف كله معقد ...يبي له وقت ..لين ينحل ...ومصير عمتي ..تعقل وتعرف الحقيقه
حقيقة عمي عبدالله ..
حمد قعد جنب فهد : فهد كم هم عيال خالي ..
فهد : اربعه ..محمد الكبير وخالد وبنات نور وغلا ...
حمد ابتسم وبعدها في باله البنت الصغيره يوم قالت غلوي ..اكيد هي ..يعني بنت خالي ...: اها ..
فهد : قم قم تغدا..
---------------------------------
-
كانت تنشف ايدين شهد ومافاتها دخوله غرفته بشكل خوفها قعدت شهد على الكنبه ..وراحت وراه لغرفته وقلبها يسابقها بدقاته
السريعه ...دقت الباب بنعومه معتاده منها ..وسمعت صوته من ورى الباب يسمح لها بدخول ..
كان قاعد على سريره وفاسخ الغتره وفاتح ازره ثوبه كلها ومنزل راسه والشيب متخلله ....قعدت جنبه بهدوء وحطت يدها على
ذراعه : يبه شفيك ..؟
ابومحمد طالعها ببتسامه حنونه ..محد يحس فيه مثلها ..: ماشي ..
غلا وهي ترص بعيونها ..: علينا ابومحمد ..شفيك ..
ابومحمد : مافيني الا العافيه ..
غلا : عيل ليش ماتغديت ..من جيت انسدحت ..
ابومحمد : مالي شاهيه في الاكل ..يمكن من الحر ..
غلا : او من اللي رحت لهم ...رحت لعمتي صح ..
ابومحمد سكت شوي ...: من يومج نبيهه بنت عبدالله ..
غلابأهتمام : شصار ..؟
ابومحمد : ماشي ..
غلا بأستغراب ..: شلون ..ماجفتها ماتكلمتوا ..
ابومحمد : لاماجفتها ..
غلا : رفضت صح ..
ابومحمد هز راسه موافق ..
غلا بغضب : وانت ليش تعور قلبك يبه ..ليش رحت ...
ابومحمد : اختي ..
غلا : بس ماتبي هالخوه ..يبه ليش تدعس على كرامتك عشان ناس مايستاهلوون ..
ابومحمد : لو واحد من خوانج كان سويتي مثلي ...هاي اختي اللي بقت لي من هالدنيا ..اختي حتى لو مارضت ..
غلا :يبه ...انزين انت رحت لها هالمره ..بس اوعدني ماتروح ...يبه لاتذبح روحك عشان عيله ماجفت منها الخير ..يبه تكفى ..
ودمعت عيونها ...
ابومحمد تضايق من شكل غلا وزاد حزنه من الوضع كامل ..مسكها وحظنها ...: بس خلاص ...اللي الله بيقدمه راضي فيه بس
لاتزعلين ...ومسك ويهها ومسح دموعها ...
غلا سندت راسها على صدره ..: يبه مايهون علي اجوفك جذي ...
ابومحمد : الله كريم ويهديها ...
غلا وهي تحس بنار في يوفها من موقف عمتها ..حقدت عليها ...ليش تصد انسان مثل ابوها ..لو تلف العالم ماتلاقي اخو مثله ..
وحظنت ابوها اكثر ...
--------------------------------------
-
قاعدين كلهم متحاولين لعبة Ludoوأكياس الجبس والحب وعلب البيبسي ودلة الشاهي والبيالات مصفوفه وانواع البسكوت والكيك..
نور : غلوي يله سنه يعني تعدين ارقام الزهره خلصي ..
غلا : وجع وشله مستعجله ..خلي اركز من اطير منكم ..
شيخه وهي تنزل علبة الدايت ..: لالالا تكفين ...خرعتينا ..اللي يجوفج تخطيط عسكري ...لعبي لاأفرك ويهج في اللعبه ..
غلا : يمه زين كليتيني ...
مها : يماااااااااااااه منكم سوفااج ..
شيخه بنظره ناقمه ..: ايش ...ايش ...سوووووفاااج ..اقول ..لعبي انتي وياها لاحطكم سندويجة كلاب ..
نور: وعععععععععععععععع ...لاتخليني اكرهها ...الله يلوع جبودهم وع ..
مها : وعع منج انتي وياها ..
غلا وبعد مارمت الزهره ........:اييييييييييييييه ...ماقلت لكم شصار اليوم ..
نور : طحتي في الجمعيه ..؟
غلا : وجع لا ..
نور : خسار كنت مدعيه عليج..
غلا : بكيتج يالدب ...
شيخه : انزين اخلصي شصار ..؟
غلا : ايه ..اليوم وانا في الجمعيه ..جفت لكم ذاك المزيون المووووووووووووت ..
نور : غلا ..وجععععععععععععععع من متى اطالعين الريايل ...
غلا : صبري ..بعدين نظره واحده بس ..
نور : نظره تجر نظره بعدييين ..
مها تقاطعها : نوري انطمي شوي نسمع السالفه بعدين افتي على كيفج ..
نور : ابووووووووووووووك ياقواة العين على هالبرع ...
غلا بقهر : انزين اسمعي السالفه ..
نور : قولي ..يمال ...ال....العافيه ..
غلا : المهم ...نوري نشبت في قسم الكافي الا تبطل لها واحد وتاكله ..وانا معيه قلت لها بجينا شرطي ..
شيخه باهتمام : زين ..
غلا : جان اطالع المزيون ياكل ..وتوقف عنده وتقول لي شمعنى هو وانا لا...قسم بالله كرهتها من قلب ..حسيت بماي بارد على
راسي ..
نور : وبعدين ..
غلا : جان تكمل الاخت مافيه شرطي وهي تقلد صوت نوره حرتني ...جان اللعين يقول لها عادي اكلي ...بغيت اكفخه بالشنطه..الاخ
فالها عادي عندي ..جان الم اغراضي واطلع من الجمعيه ..بس تصدقون قلت بكيت زينه ..على شين اخلاق ووقاحه ...
نور: يعني شباب الحين شتنطرين منهم ...
شيخه : شباب عايش حياته بعرضها وطولها ولاهامه اقصى حد ..
مها : ههههههه وانا اقول رقمته ..بس عشان كلمه ..
شيخه : وجععععععععع ذا اللي ناقص يالعوبا ..
نور : اني داريه ...معاد الاذا بعد قولي عادي نكلم ونطلع مع البوي فرند ..
مها بدلع مصطنع ..: عادي شفيها ..الموضه جذي ..لازم كل وحده عندها بوي فرند مب واحد الااكثر ..
شيخه قامت على مها ولفت يدها ورى ظهرها ..: قصورج يابنت حمد ...
مها وهي تضحك وتتألم ...: شويخ هديني اضحك ...معاكم ..
نور : اضحك ..شيوخ كسري ظروسها عشان ماتعيدهالكلام ..
غلا وهي تفكك مها من ايدين شيخه : يمااااااااه يالمتوحشه فكيها ...
شيخه وهي ادز راس مها : زيد عيدي هالكلام شق احلجج ..
مها وهي ميته من الضحك ..: اللي يجوفج صج مغازله ..
شيخه :بس فكري فيها ..عشان تفقدين الذاكره ..
نقعوا كلهم من الضحك على شيخه وسوالفها ..صلوا العصر ونزلوا تحت عند العيايز ..وضحى وامها ..أول مانزلوا ..حصلو أم فهد
موجوده ....وخف الازعاج اللي كان مصاحب دخلتهم ..
ام فهد ابتسمت من جافت نور ....سلموا البنات وقعدوا...ماعادا نور اللي خذت الدله من خالتها وصارت تصب عليهم ..وهي منحرجه
من نظرات ام فهد ..ابيه لايكون قال لها اللي صار وناقده علي ...نزلت الدله وراحت المطبخ بحجة انها تيب دلة الحليب ...دخلت
المطبخ قعدت على الكرسي وهي تهوجس في اللي سوته كانت جرائه منها وخافت من هالشخصيه اللي طلعت مع وجود فهد ..
وقفت عند باب المطبخ وعينها على الفله الثانيه ...افففففففففففففف ..رجعت وشالت الصينيه اللي فيها دلة الحليب ..ورجعت ...اول
مادخلت حصلتهم كلهم يضحكون ويطالعونها ...وقفت في مكانها ...اكيد قال لها ...يافضيحتي ...نزلت الدله بشويش وهي تحاول
تلقط نظراتهم شي عشان تفهم ...:شفيكم ...؟
ام فهد : نضحك على اللبن اللي جبتيه اليوم ...
نور وقف قلبها ...لالالا كانت بتروح من الفشيله لولا ان ام فهد كملت على نياتها ...: ولد عمج ..شرب اللي هو شرب والباقي طاح
منه وانتثر ...قهرني ...
نور قعدت جنب شيخه وهي تحس بشي ثقيل انزاح من صدرها ...شيخه بهمس ..: مادري ليه عندي احساس ان فيه سالفه على هاللبن
.....
نور وبعد الصدمه مأثره لكزت جنب شيخه : لايمي ثمج بعدين بقول لج ..
شيخه وهي تضحك : هههههه انزين ..والله اني كنت عارفه ..
نور : شاسوي دجاله ..هههههه
شيخه : والله ...سخيفه..ماتضحكين ..ياالبقره ام اللبن ..
نور:وجعععععععععع ..قصري صوتج ....لاحد يسمع ...
-------------------------------------
--
دخل البيت بتعب حصل خالته قاعده اطالع التلفزيون وشهد ونوره متسدحين على ريولها ...سلم عليها وقعد جنبها وهو يلعب في
خدودشهد المندمجه مع الرسوم ..وتوخر يده بأنزعاج ..: حااااااااااااااالد ..وحل ...(خالد ...وخر )
خالد :هههه مفهيه ..عشان الرسوم ..فديت المعصبين ..
وضحى : حبيبي شهد عيب تقولين لعمج خالد ..وقولي عمي خالد ..
خالد وهو يضحك : لا يمه لالا بعدين يقولون علي شيبه ..
وضحى : سم الله عليك شيخ الشباب ..فديت هالويه ..
خالد : الله الله على المدح وين حمد يسمع هالغزل الصريح ..
وضحى بضحكه : الله يحفظه ..واثق ..مايسمع عواذل ..
خالد : احلا يالواثق ...الامتى بيرجع ..؟
وضحى : من كلامه اليوم على الثلاثاء او الاربعاء بيعود ..
خالد : اها الله يسهل دربه ...الاوين شلة الأنس ..الساعه 10 ومالهم حس ...لايكون زوجتوهم بعدي ...
وضحى وهي تضحك ..: ياليت ...برى في الحوش ..فارشين لهم وقاعدين ..
خالد : وانتي ليه منتي بعندهم ..؟
وضحى : كنت قاعده مع امي قدام لاترقد وبعدين هالعفرتيتين طلعوا لي يبون الرسوم قلت بعد ماتخلص بنطلع لهم ..
خالد : خلاص ..عيل بطلع لهم ...يعطوني عشى ...ميت من اليوع ..
وضحى بأهتمام : ايه يمه قل لهم ..ترى امي قايله للخدامات يخلون لك عشى ...
خالد يبتسم بحنان : فديت قلبها ..
وقام يطلع للبنات في الحوش الوراني صوب الزرع مكان قعدتهم ..
---------------------------------
--
قاعدين مثل الدائره متجمعين حوالين ورق اونو وكل وحده في يدها مجموعه ورق ..طبعا نور وشيخه قاعدين جنب بعض شيخه لافه
الشيله على راسها مثل الترمبا ...ونور مرخيه راسها على جتفها ...
غلا : لاوالله تغشون ..
نور : جب بس اللعبي من اللي يغش الحين ..
مها : لاوالله ..تغش وعادها بعد ..محن بلاعبين مع الغشاشين ...
شيخه : اقول لعبي انتي وياها خاييفن من الخساره ...
غلا : اي خساره وانتوا من الصبح تغشون اكبر خساره يوم لعبنا مع اللي مثلكم ...
حصه : هاي شويخ ..ماتخلي حركاتها ...
شيخه وهي متنرفزه من حصه : اقول حصيص ابلعي العافيه ...
حصه : وانا صادقه تغشين ولاتبين حد يقول شي ...
شيخه : ليه وين غشيت ...قولي يله ..
حصه : مادري الورق اللي في المخبى اللي في صدرج ..شفيه ..جفت نوري يوم حطتها بلفيت تلوي عليج ..
شيخه يوم حست انها انكشفت : اقول حصه قومي رقدي تأخر الوقت ..
حصه : لا مهب على كيفج ..يالسروق انتي ونوري ..
نور : سرقوا جوازج في الهند قولي امين ...وليه ويش سرقت منج ..
شيخه : حصه بترفس في بطنج ترى ..
غلا: ليه عشانها كشفتكم يالغشاشين ..
شيخه : انسه مثاليه انطمي بس ..
غلا: طمج بحر ..ياهيا الشعيبي ....
شيخه ماداني حد يناديها بهالاسم ...جان تقوم على غلا ..تبي تعظها ..بس مها وحصه ماخلوها ..بس نور ماخلتهم يقربون جان
تنقزعلى حصه ومها بس حصه مسكتها لان بنيتها اقوى من نور سدحتها وحطت ركبها على زنودها وثبتتها ...نور تحاول تتخلص
منها ..وشيخه تمكنت من غلا وعظتها بس مها ركبت على ظهرها ومسكت فك شيخه وغلا تحاول تخلص منها ..وقدروا بعد جهد
اسدحوها الثنتين وحده جتفتها والثانيه ركبت على بطنها ..
غلا وهي قاعده عليها : الحين براويج شلون يعظون ..
شيخه وهي ميته من الضحك ..: ام كشه قومي من بطنى عورتيني ...شيخه كانت طافسه من شعر غلا اللي طاير من الهواش ..
غلا انسدحت عليها وعظت خدها بقوه ...لين صرخت شيخه ...: يالدبه فكيني ...يمااااااااه كلتني ...فكيني ...
حصه من صوب ثاني كانت تربط ايدين نور ورى ظهرها بشيلتها وهي ميته من الضحك من نور اللي تتلوى تحتها ...حصه قامت
تعلن انتصارها ..نور حاولت توقف بس بصعوبه وقفت ...وشعرها مغطي ويهها ...حاولت تركض عشان تبعد من حصه وتفك الشيله
..
شيخه فكت نفسها منهم ...بس في لحظه شردوا منها غلا راحت صوب المطبخ ومها ورى الفله شيخه ركضت ورى غلا لانها حارتها
ومها بتقدر عليها البطه ...دخلت المطبخ وخصل شعرها منفلته من كماشتها ..شيخه : غلوي طلعي يالجبانه ...
بس محد رد عليها بطلت الثلاجه ..وطلعت غرشة بيبسي حجم عائلي ..وضحكت بشيطنه ...رجت الدبه ...وراحت ورى الباب .....
نور كانت تلوى ايدينها وهي واقفه بس ..لمحت حصه جايتها تركض ...نور من الخوف ركضت وهي اطالع حصه وراها ....لكن
للأسف مانتبهت للحاجز العشبي وطاحت فيه على ظهرها في حوش عمها ..نور من الصدمه غمضت عيونها كانت تحس بالم في
ظهرها وظلوعها من غير الجروح من الشجر على ايدينها ..
فتحت عيونها بصعوبه وهي تأن ..حاولت تقعد بصعوبه ..يالله ياخذج ياحصوص ...بس حركتها وتوقفت بعد ماسمعت صوت تكسر
اغصان وراها ..شهقت بخوف ...
صوت جلف ..: من اللي هني ..؟
نور وهي شوي وتصيح مانقصني الافهد ...بصوت يرتجف ..: انا ...نـــ .....نور ..
فهد بستغراب ..:نور شتسوين ..؟
نور : لاتقرب ..مب لابسه جلال ..
فهد : زين يله لبسي ..
نور : ماقدر ...
فهد : ايش ...شلون ...خلاص برجع داخل وانتي طلعي ..
نور حاولت تقوم بس الويع ماخلاها ..: ف...فهد ناد الريم ..
فهد : ريم راقده ...نور شفيج ..؟
نور شمرقدها هالحزه ديايه ..: لالالا...
فهد : نور قولي ولاترى بيي اجوف شفيج ..
نور وهي تحاول تحتمى في الظلمه ..: فهد لالالا..ماقدر اقوم ايديني مربطه ...الله يلعن ابليسج ياحصيص ..
فهد : ايش ..من اللي مسوي جذي فيج ..
نور : فهد ..زين ناد اختي غلا ..
فهد : والله شقول لخوانج اذا طلعوا لي اختكم طايحه في حوشنا تبي اختها ..
نور : فهد مب وقتك سخافه ..شاسوي ..
فهد بعد تفكير بسيط ..: لحظه ...وراح مكان حبل الملابس وخذ جلابيه من جلابيات امه ...ورجع لمكانها ...: سمع انا جبت معاي
غطا بغمض عيوني لين اوصل لج وبحطه عليج وفك ايدينج ..
نور بعد مابلعت ريقها ..: لا..شيظمن انك مااطالعني ..
فهد برود : انا بظمن نفسي ..
نور بعد ماحست بروده خافت ..: زين خلاص ..
فهد يوم حس انه قريب منها غمض عيونه وتبع حدسه للوصول لها وصوت تنفسها الغير منتظم ..من التوتر ...بعد ماحس انه قريب
حط الغطا عليها ..: خلاص
نور بصوت خفيف ..: ايه ..
فتح عيونه ..انصدم من ظألة حجمها وهي مربطه حز في نفسه شكلها قعد وراها وحاول يفك الرباط بأصابع تنتفض مرتبكه من
قربها..
نور من قعد وراها سرى في عمودها الفقري تيار كهربائي ..وحاولت تكتم انفاسها من سمعت فحيف انفاسه وعطره اللى كتم انفاسها
ودوخها ...
فهد فك العقده كانها عمليه حسابيه معقده وهو يلاحظ عروق يدها النافره من التوتر ..والخدوش الماليه ايدينها ..هزه هالمنظر الدامي
لها ...
نور حطت ايدينها في حظنها وهي تفركها ..من الم ..وطفرت عيونها بدموع الم وفشيله ..رجعت شعرها تحت الغطا ..ولفت ويها فيه
بس عيونها اللي بينت ..فهد وقف بتوتر وهي تحاول توقف ..كان ودها يساعدها بس نخوته ماسمحت له ..وقفت بصعوبه ..وقبل لاتلف
لمح لمعان دموعها ...تجمد في مكان حس بشي حار يتحرك في صدره ..وثقل على قلبه ...نور تلاشت من قدامه في الظلام وراحت
لبيتهم وهي تتهادى في خطواتها ...
اما فهد وقف يتجرع عواطفه المتضاربه ...عواطف لأول مره تثار في نفسه ..وتقلب كيانه ...ماصدق شعوره وماقدريفسره من جاف
دموعها ..تنهد بتعب ورجع يقعد على الكرسي اللي في الحديقه ويقرى كتابه ويحاول يتناسى هالمشاعر ...
-----------------------------------
واقفه ورى الباب وهي تحاول اداري ضحكتها ...سمعت صوت خطوات قربت من المطبخ ..جهزت الدبه وحطت يدها على فوهتها ..
اول خطوه لدخول غلا ..طلعت في ويهها وفكت الببسي اللي فار من الدبه ....بس الصدمه ...مب غلا ....كان خالد ...
شيخه الدبه طاحت من يدها بعد ماشهقت شهقه قويه ...شردت ورى الباب ..وهي حاطه يدها على حجلها ..وترجف من الخوف ..
خالد بصوت جهوري ...: شييييييييييييييييييييييييييييخه ...
شيخه غاص قلبها من الخوف ورجفت ..لدرجه ان ريولها ماشالتها وقعدت من الخوف ....خالد وهي تسمع صوت صرير اسنانه ..:
شيوخ طلعي ...شهالحركات ..
شيخه بصوت خائف ..: مب قصدي ..كنت ....احسبك ....غلا ..
خالد بغضب : واذا غلا ..بيبسي ..شهالحركات مالت البزران ...اللي يجوفكم مب حريم ..لوتعرسون تيبون درزن عيال ..
شيخه وهي معصبه ..: ياخي قلنا مب قصدنا ...لازم تعقد السالفه ..
خالد من الغضب شات الباب اللي هي واقفه وراه ..ونقزت من الخوف واصدرت صيحه صغيره تمنت انه ماسمعها ..بس خالد سمعها
وضحك وتلاشي غضبه من عرف انها خايفه لان خوفها مب سهل ...: اقول طلعي يله من عندج ...
شيخه ..: لاوالله اطلع اول ..مب لابسه نقاب ..
خالد : عادي تغطي ...لاني ابيج ..في شي ..
شيخه : خير شعندك ..
خالد : خريتي من سابع سما لسابع ارض ..تعالي ..وقالها بقوه ..
شيخه خافت من تفاقم الوضع وتغطت وطلعت ..وبخوف ..: هاه ..
خالد وهويحاول يكتم ضحكته ...: تعالي ..
شيخه وهي ماسكه الباب كانه امان لها منه ..: كاني ..شتبي ..
خالد : يبي لي الفاين ...
شيخه جابت رول الفاين من كبت المطبخ ..ومدته فيه ..: هاك..
خالد ..: مشي ويهي ..
شيخه بصدمه ..: تهبي ...ذا اللي ناقص ..
خالد اتسعت ابتسامته ..: يبي ..بس الفاين ...
شيخه عطته وكانت بتطلع ..بس خالد وقف في طريقها ...: وين ..؟
شيخه : وخر بعد وين بروح داخل ...
خالد : ليه هي بساهل ..بس جذي تسوين اللي تسوينه وتروحين ...لا..مافي طلعه ..
شيخه وهي تبلع ريقها ..: شتبي ..يعني ..
خالد بخبث ..: ابي ...........امممممممممممممم اشياء وايد ....بس الحين ابي ............عشى ...خالد كان يراقب حركات اصابع
ايدينها المرتبكه ..وحس بلذة الانتصار انه زلل امانها ..
شيخه :زين ..واللتفت للفرن وطلعت صحن المعكرونه بالبشاميل ..وحطتها في المايكرويف ..وقعدت تنطر من غير لااطالع وراها
..خالد اللي قعد على الكرس وريح ايدينه على الطاوله ...بعد مانظف ويهه في مغسلة المطبخ ..ونشف ويهه ..شيخه حطت الاكل
جدامه ..
خالد : وين العصير ..؟
شيخه وهي تتأفف ..رجعت صوب الثلاجه ...وطلعت له ميرندا تفاح لانه يحبه ..حطت له ويابت قلاص وحطته جنبه ...شيخه برود
:شي ثاني؟
خالد وهويبتسم لها ..: اكليني ..
شيخه : ليش ياهل ..ولا ماأدل طريج حلجك ...
خالد وهو يزم شفايفه ..: شيخه خاطري اقص لسانج ..
شيخه : مب كيفك ..
خالد وهو يضحك ..: صدقيني ...بيصر بكيفي ...
شيخه وعيونه بغت تطلع من مكانها ...وطلعت من عنده هاذي ثاني مره يحذف مثل هالكلام في ويهها ..مب عارفه شيبي ...راحت
سيده لغرفة نور ...
-------------------------------------------
اليوم الثاني ...صباحا ...غلا كانت واقفه تستعد تلبس نقابها وجلالها ..تبي تتوجه لبيت عمها ..بعد ماأتصلت في الريم تبي من عندها
مرجع لبحثها ..وأكدت لها ان مافيه حد ...