قضية لم الشمل

البارت السابع

مساء الخير والصحة والعافية على كل احبتي المتابعين

#الكاتبة_نهى_الحسون
#قضية_لم _الشمل

جلال
شنو الجهاز وين
احس گلبي يريد يطلع من صدري
طلعت بسرعة من السرداب اريد اعرف منو اخذ الجهاز طلعت لكيت الاسطى ديحجي بالنقال

رحت ركض عليه
.. استاذي الحك الجهاز اختفى
سلوان اجة وراي
.. شنو شلون اختفى البارحة احنة بالليل
عزلنا الورشة وهو كان موجود بمكانه منو اخذه

التفتت على سلوان
.. سلوان اتصل بسرعة على مثنى

قطع كلامي الاسطى توفيق
.. انتظر لحظة جلال ما يحتاج تتصل على مثنى وتسأله

باوعت عليه بشك منتظره يحجي
.. الجهاز انا اخذته وعرضته على ناس يحتاجونه للجهاز

عكدت حواجبي مستنكر موقفه وياي
.. ومنو سمحلك تاخذ تعبي وتعرضه للبيع بدون علمي

.. على كيفك لحظة ترة الجهاز مثلما انت الك بي حق انا هم الي بي حق
جلال لاتنسى انت صنعت الجهاز بفلوسي يعني لوما انا
انت مستحيل تكدر تسوي هيج جهاز

.. واذا انت مولتني بس هذا مو معناه ينطيك الحق تروح تتصرف من يمك بدون ما ترجع لي وتاخذ اذني

.. لا تكعد تبجي مثل النسوان انا عرضته لفائدتك
لان الجماعة الي راح يتبنون الاختراع انت تعرفهم كلش زين
وانا قررت ابيعلهم الجهاز سواء رضيت او ما رضيت
ولا تخاف راح انطيك اتعابك

باوعت للاسطى توفيق بحقد وقررت العب وياه على نفس منواله يعني الناقص يريد ياكل حقي
مقرر ينطيني تفاليس حالي حال اي عامل ولا كأنما انا صاحب الفكرة والتخطيط بسيطة ما علينا

.. خلاص هذا هو ما دامك انت قررت من يمك
بالعافية عليك الجهاز والبيعة

درت وجهي واتوجهت لباب الورشة مشيت بكل ثقة وكلت قبل لا اطلع

.. خلي الجهاز ينفعكم بس يكون بمعلومك
ترة الجهاز بدوني ما يسوى شي
لان انا الوحيد الي يعرف شلون تشتغل منضومة الجهاز وشلون طريقة دمجه وية المحرك
فخلينا نشوف شلون راح تكدر تتمم البيعة بدوني

سمعت صوت توفيق صار يلعن ويشتم
شكلها الامور طلعت عن سيطرته وانسحب البساط من تحته مشيت وتركته

صاح بصوت عالي يستوقفني
.. جلال لحظة انتظر لا تروح

وكفت بمكاني منطي ظهري بكل ثقة
لان انقلبت الادوار وصار هو حاجته يمي
.. كول توفيق شتريد من عندي

سمعت صوت غضبه
.. شنو اشو تكول توفيق هيج حاف بدون استاذي شكلك نسيت نفسك ياولد

.. لا ما نسيت نفسي بس بما ان الامور اتغيرت
لان انت غدرت وانا الضحية
فلا تتوقع مني الاحترام منا ورايح

كنت احجي وياه وگلبي يغلي عالجهاز اريد بس اوصله
احس عبالك ماخذين وصلة من روحي

اباوع عليه صك على اسنانه بغيض بس مجبور يجاريني لان يحتاجني
.. لحظة جلال ارجع خلينا نگعد ونتفاهم

.. ما يحتاج نتفاهم گلي وين اخذت الجهاز والمن انطيته
.. انا اكلك بس بالاول تعال اكعد خلي نتفاهم

.........
ريم

كنت اساعد عمو حتى يجهز نفسه لقدوم ابو سيف
دخلت عمة اسيا
عمو سألها .. ابو سيف وصل
.. لا مو ابو سيف هذني جاراتي اجوي علمود يتحمدون
السلامة علمود رجوعك من العلاج

عمة كانت تحجي وية عمو واني
كنت افكر بغير وادي

منتظرة وكلي لهفة حتى اعرف تفاصيل حياة اولاد عمي هم وين عايشيين وشلون شكلهم عندي فضول قاتل حتى اعرف كلشي عنهم

ورة عشر دقايق اندك الجرس ورحت فتحت الباب
وجان القادم ابو سيف اتحمدلنا عالسلامة وسألني على
صحة عمو بين ما جنت ادخله للاستقبال
.. عمو بخير وهسة ابلغه بحضورك وانت تشوفه بعينك وتحكم بنفسك على صحته
بعدها
دخل عمو للاستقبال وسلم على عمو ابو سيف
كعد على القنفة وعمو ابو سيف كعد عالكرسي الي بجانبه
باوعلي عمو وكال
.. عمو ريم قدمي الضيافة لعمج ابو سيف
ابو سيف .. قابل انا خطار عمي ما نريد نتعبها للحلوة

ابتسمت وجاوبته .. لا عمو تعبك راحة
رحت بسرعة جبت صينية الضيافة
ودخلت وقدمتلهم
وبقيت واكفة يمهم ولازمة الصينية بثنين ايدية
انتبهت على نظراتهم اثنينهم باوعوا علية
يعني بين قوسين اتفضلي من غير مطرود
مؤيد.. يالله يا حلوة تندلين الباب لو ادليج حتى تطلعين
ابتسمت بوداعة الاطفال وكلت
.. عمو ليش اطلع ترة اني صرت شريكة وياك بكلشي يعني
صار لازم اعرف اخبارهم حالي من حالك
ما راح يأثر عليك اذا بقيت وسمعت مو احسن ما اطلع وابقى اتلصص واستمع لكلامكم

باوعلي عمو بتفكير وكال
.. هو انا اكدر لهذا لسانج دائما غالبتني
يالله سدي الباب وتعالي كعدي وما اريد اسمع اي مقاطعة
حطيت ايدي على حلكي بحركة كاتم

ابو سيف .. اي هيج احسن لان المعلومات تخص اولاد عمج ولازم عمج يركز وياي بكل كلمة اكولها حتى يكون على بينة

سويت حركات القرود الثلاثة لا اسمع لا ارى لا اتكلم
همة اثنينهم ضحكوا على شكلي

وبعدها انتقل عمو ابو سيف للجدية
وطلع من جنطته ثلاث ملفات
وكال

.. طبعا بطلاع الروح يالله كدرت اوكع على عناوين اولادك
.. ادري تعبتك وياي وراح تتعب اكثر اذا كملت المهمة
بس شسوي لازم تتحمل هذا شغلك

.. ما دام انا محاميك اذن هذا من واجبي اتجاه كل وكلائي
وانت ياما كلفتني بمهمات يعني مو جديد علية هالشغل
.. هو انا ليش اختاريتك انت للمهمة لان ادري بيك كفو وراح تصون الامانة
.. تسلم يالغالي
هسة عوفك مني وخلينا بالمهم
شوف يامحفوظ السلامة هذني ثلاث ملفات سويتهم راح تلكة بيها معلومات مفصلة عن حياة كل واحد منهم
وبيها صورة لكل واحد بيهم حتى تتأكد وتتعرف عليهم وتكدر تكون فكرة عن شخصياتهم

.. ابدي اقراها الي وراويني صورهم
ابوسيف .. شوف راح ابدي بملف ابنك الكبير
لبس نظارة القراءة وفتح الملف وطلع من عنده صورة وانطاها لعمو وكال

.. هاي صورة ابنك مهمين شوفها بين ما ابدي اقرالك المعلومات
جنت كاعدة يم عمو مؤيد عالقنفة قربت راسي بفضول اريد اباوع وياه على الصورة
اخذها عمو منه
انتبهت لأيد عمو صارت ترجف واتلمس الصورة بأصابعه
بدت اصابعه تنزل عن وجه ابنه وصارت معالم صاحب الصورة تبين بالتدريج

جانت الصورة ماخوذة لرجل اسمراني مملوح لابس قميص كاحت تعبان عاقد حواجبه وواكف مخصر عبالك واحد مستعد للعركة او هو شكله يوحي للعنف
كان شعره مهوس مبين الصورة مأخوذة بدون علمه
لان كان واضح عليه الغفلة وعدم الانتباه
بعدما كملت معالم الصورة كدامي هنا تكمن المفاجئة

صرت اباوع للصورة وارجع اباوع لعمو متعجبة
وارجع اباوع للصورة مرة اللخ

.. عمو هاي شنو مهيمن كلش يشبهك عيناً
اتذكر عندك صورة وانت شاب هيج كان شكلك
ابتسم ولمعت عيونه بدموع الفخر

.. شكلي خسرت هواي امور بحياتي ووحدة من هاي الامور
خسرت حقي من ان افتخر بين الناس بأبني الي صار رجال ويشبهني

كان الندم واضح عليه سكتنا اثنينا ورجعنا نباوع للصورة مرة ثانية بتمعن
كنت احاول اكون انطباع عن شخصية مهيمن من خلال الصورة لكن ما كدرت
كانت نظرات عيونه غامضة صاحب معاني حادة
مبين عليه طويل بس شكله يلفت النظر غصب عني لكيت اني كل شوية اسرق النظرات على صورته

ابو سيف جلى صوته حتى يلفت انتباهنا
واني بعدني عين على صاحب الصورة وعين على ابو سيف حتى اسمعه شنو يكول

وصار يقرأ
.. الاسم مهيمن مؤيد ..... العمر ٢٩سنة

خريج كلية زراعة ساكن بشمال البصرة قرب بيت خواله
عايش وية امه واخته وغير متزوج

مؤيد .. يعني زهرة اتزوجت من بعد طلاقنا والله عفية عليها شافت حياتها وما التفتت للماضي

.. اي نعم بعد طلاقها بأربع سنوات اتزوجت واحد ضابط وصار عندها بنية من عنده واستشهد رجلها بعد ثلاث سنوات من ولادة بنتها حوراء
مؤيد .. شكلها هالمرة ما مكتوبلها ترتاح

.. كلشي بالقسمة
ورجع ابو سيف يسرد المعلومات عن مهيمن من جديد
مهيمن هو المعيل الوحيد لعائلته
وحسب المعلومات الي وصلتني ان مهيمن
بالوقت الحالي اشترى محل بالسوك ويشتغل بي

المعلومات تكول مصدر فلوس المحل كان
من الارض الزراعية الي ورثتها امه من ابوها
باعت نصها وبنوا بالنص الباقي بيت وهسة البيت مبني عالنص
سكنوا بي وهو مو كامل حاسبين حسابهم
بالتدريج يكملونه
كان عنده قبل لا يشتري المحل بسطية صغيرة يبيع بيها مواد غذائية

مهيمن رجل شاغول كان يشتغل وية خواله بمحلاتهم
ومن كبر استقل عنهم بالبسطية حتى يصير عنده شغله الخاص

سمعته زينة وطيبة ماعليها غبار شهم وصاحب نخوة
لكن ديربالك تدوسله على طرف هذا الكلام يتفق عليه اهل السوك كلهم
بساعتها امك داعية عليك

يسمونه بالسوك ابو الهمم بس تنخاه تلكاه عند يمناك هاي كلام واحد يدفع عربانة من سألناه عن مهيمن كان هذا جوابه

عمو سحب نفس عميق وكال بصوت تعبان
.. شكله طالع على خواله بكل شي مبين عليه صاحب مسؤولية
كان عمو يحجي ونظراته سارحة بعيد بعدها اشر لأبو سيف حتى يكمل

ابو سيف .. وهسة هو داخل شريك وية تاجر كبير بالعمر معروف بالسوك وحالياً بعده ببداية المشروع
ويتأمل خير من ورة هاي الشراكة
.. الله يوفقه شكل زهرة عرفت تربي و الله عوضها بولد يرفع الراس
.. فعلا الواحد يفتخر يكون عنده ابن مثله

على فكرة قبل لا انتقل للملف الثاني
مهيمن لحد هذا يومك يعرف بيك متوفي.
.. يعني زهرة علنت وفاتي حتى امام مهيمن

اباوع لعمو كانت نظرات الندم باينة من عيونه
بس مايفيد الندم بعد الخسارة
والي صار صار

.. لهنا ونغلق ملف مهيمن
ان شاء الله تفيدك هالمعلومات
.. ما قصرت والنعم منك

طلع ابو سيف ملف ثاني وفتحه وسحب منه صورة نفس حجم صورة مهيمن كان حجمها بحجم ورقة الكتاب
مدها لعمو وعمو اخذها منه

وباوع للصورة
كان صاحب الصورة شاب جداً وسيم
كانت عيونه ملونه عسلي واخضر
نظراته بيهم نوع من المرح والشقاوة
بشرته برونزية لافحتها الشمس

عكس اخوه مهيمن يعني الي يشوفهم مستحيل يكول هذولي اخوان واحد شمال وواحد جنوب

بدة ابو سيف يسرد المعلومات عن جلال
.. عندك الابن الثاني
جلال مؤيد ...... العمر 27سنة
خريج هندسة ميكانيك
غير مرتبط لا زواج ولا خطوبة
حياته غير مستقرة

امه اتزوجت وسافرت وية زوجها للخارج وتركت جلال يم امها ببيت خاله

.. ليش تركته عند اهلها. ليش ما رسلته الي

انتبهت لأبو سيف جلى صوته مرتبك وكال
.. هو هنا انا اتفاجئت من عرفت
ان ام جلال رسلتلك جلال قبل لا تتزوج والمعلومات تگول ان انت رجعتلها جلال ومبلغها ان ما دام هي وقعت بالمحكمة ورادت وانها تتحمل المسؤولية الكاملة عن ابنها
بعد ما يحقلها تشمره عليك

بيني وبنك مؤيد انا من سمعت بهذا الكلام انصدمت
وصرت اتسأئل الف مرة مستحيل صاحبي يسويها
والدليل الثاني الي خلاني اتأكد ان مو انت الي رجعت جلال على امه هو فترة ارسال جلال لبيتك
في نفس الفترة الي كنت انت بيها مسافر

يبقى السؤال منو خلف ترجيع جلال على امه
وتكلم بالنيابة عنك

كان ابو سيف يحجي وعمو عيونه على الصورة ورجفة ايده تدل على البركان الي يغلي جواه

ابو سيف كمل كلامه
.. راح اترك لك موضوع
التخلي عن جلال انت تتصرف بي لان الي متصرف هذا التصرف واحد منك وبيك
بس عليك انت تتذكر من سافرت المن سلمت البيت بوقتها

عمو هز راسه بمعرفة وفضل السكوت ومعالم وجهه تسجل حرب بين الذات

ابو سيف كمل كلامه وكال
.. عالعموم خلينا بالمهم
المعلومات تكول ما بعد ذلك ام جلال
قررت تتركه عند امها ويم اخوها بالموصل
وتتزوج وتسافر للخارج

وبنفس الوقت رانيا ما اتخلت عن جلال بقت هي المسؤلة عن جميع صرفيات جلال الى ان وصل جلال
لأول سنة كلية وصادف صار حادث على واحد من اولادها واحتاجله علاج مكلف
وحسب المعلومات جلال طلب منها ان تتوقف عن ارسال المصرف لان هي بحاجته اكثر من عنده

ومن عندها جلال بلش يشتغل بورشة تصليح سيارات
وكمل كليته
وبقى يشتغل بالورشة لان ماكو تعيين

قلب ورقة بالملف وكمل كلامه

جلال كلش ذكي
وحاليا هو معروف بالصناعية بأسم جلال قربان
اي واحد تعصى عليه مكينة سيارة راسا يدلوا على الورشة الي يشتغل بيها جلال عامل

ابتسم وسأل ابو سيف
.. ليش اسمه جلال قربان
.. يامحفوظ السلامة ابنك انعرف بهذا الاسم بسبب مقولته الشهيرة كلما يدخل بعمل صعب يكول اني اهلي بايعني وناذريني قربان

عمو عقد حواجبه وكال
.. يعني جلال مكون صورة بباله انه منبوذ من عدنا انا امه

ولو يدري مستعد ادفع نص عمري في سبيل نظرة
رضى من عنده انا صحيح بنيت حياتي على خراب
بس مستحيل اتنازل عن اي واحد من اولادي لو كان بحاجتي
بعدها غير كلامه عمو وسأل ابو سيف
.. معرفت مثليش هاي المهمات الي يرسلونه بيها

.. اخر مهمة ان يشتغل وية جماعة مجهولة الهوية
حتى مصادري ما كدرت تتعرف عليهم منو هم وشنو يشتغلون ما كدروا يوصلون لاي معلومة عنهم
بحيث الشي الوحيد الي عصى علية بالبحث عن جلال هذا الشي بس لاتخاف كل المعلومات تشير وتأكد جلال قربان سبع ما ينخاف عليه

لمعة عيون عمو وهو يدنك ويباوع على صورة جلال بفخر وكال
.. الله يستر عليه ويحيطه يحفظه
طبعا كلش يشبه رانيا ابد ما يشبهني

ابتسم ابو سيف
.. هههه لا تستعجل على رزقك عنده خصلة يشبهك بيها
.. شنو
.. الاخ مغازلجي درجة اولى وبالمقابل يموتون عليه النسوان
وهو بالمقابل هم حنين عليهن ويحبهن مايرد وحده تقصده

ضحك عمو .. بهاي انت صدكت
ابو سيف كمل
.. ملاحظة عن جلال قبل لا انتقل للملف الثالث
جلال شكد شاطر بشغله وشكد يحب الشغل
بس عيبه هواي يتعارك بالعمل مرات يتعارك وينطرد
من الشغل
.. شكل جلال دمه حامي ومتهور

.. وحالياً جلال ساكن بالموصل مع خاله ابو مصطفى

لهنا وتخلص معلومات جلال وان شاء الله تفيدك
مد ايده على الملف الثالث وطلع صورة

وكال قبل لا ينطي الصورة لعمومؤيد
وهسة وصلنا للملف الثالث
وهو ملف نور وهذا اكثر واحد تعبنا بالبحث

مد الصورة لعمو وميلت راسي بأتجاه عمو حتى اشوف وياها الصورة عمو اخذ الصور وهو جداً متلهف حتى يشوفها ويعرف عنها المعلومات
عمو باوع للصورة وعيون عمو اتسعت

.. ليش بنتي نور هيج صورتها حزينة.
تشبه سهير فقط بالشكل اما الباقي فتختلف

سهير كانت وردة زاهية بألوانها
اما هاي الشابة الي اشوفها كدامي بالصورة
كأنها نبات ذبل عوده بفصل الخريف وتساقطت اوراقه غصب عنه
صحيح نفس العيون ونفس الرقة بس ليش هاي كمية البؤس الموجودة على معالم وجهة

رفع راسه بعدما خلص تسائلاته وكال
ابو سيف ابدي اقرة بعد ما بية صبر احس گلبي كام يعصرني

فتح الملف وبدة يقرة معلومات نور

.. نور مؤيد
العمر ٢٥ سنة خريجة علوم حاسبات
غير مرتبطة
تسكن حالياً في بغداد عند خالتها سناء

.. ليش سهير وين لاتكول هي الثانية اتزوجت
.. لا ما اتزوجت سهير ماتت بأثر انفجار مفخخة قرب مكان علمها يعني موت مفاجيء لم يكن بالحسبان
ماتت بعمر ال٣٣ سنة يعني بعدها شابة الله يرحمها

ملاحظة قبل لا اكمل
نور مثل مهيمن تعتقد ابوها متوفي من امها حامل بيها

عمو التزم الصمت واخذ كلاص الماي وشربه
صارت كصته تنضح عرق

وهمس بصوت واهن .. كمل
.. حالة خالتها المادية ضعيفة
زوجها يشتغل حارس بشركة اهلية
قدمت على الكثير من الوظائف وما حصلت تعيين
بسبب مظهرها الي ما يتطابق مع مواصفات الوظيفة

لذلك اضطرت ان تشتغل كمنظفة ببيت ناس محترمين
وصارلها سنتين تعمل عندهم
والى الان ماعندها شي جديد بحياتها
هاي كل المعلومات الي كدرت اجمعها عن نور

كان ابو سيف يحجي وعمو اخذ صورة نور ونهض من مكانه وكأنه يحاول يوصللها

سأل ابو سيف
.. انت كلت نور ببغداد يعني قريبة علية
كان يحجي ويباوع للصورة
.. اي نعم عايشة ببغداد

صار يحجي وية صورة بنته متناسي وجودنا
.. نور بابا ليش هذا السواد
ليش بعيونج نظرة هضم وحزن و عدم امان
بابا طمنيني وكوليلي انتي بخير

..............................................
((جميلة
منمقة انتي يا ابنة بغداد
فراشة حقل
ابدع فصورها رب العباد
جارت الايام
فصرتي بوصاية الجلاد
اجنحتك البيضاء احترقت
بنار الغل والاحقاد
رثة الثياب
اعلنتي على نفسك الحداد
اين جمال روحك
ودجلة الخير يسكنها
لماذا غلفها السواد))

هدى سعد
................................................
نور
اخذت اجازة اليومين
وبأول يوم طلعت من البيت بنفس موعد روحتي لبيت ام امير حتى خالتي سناء ما تحس علية
ورحت لبيت صديقتي اسيل
ومناك رحنا انا وياها وخالة للسوق واشتريت كم شغلة للخطوبة
ورحنا بعدها للصالون
واول شي سويته حفيت حواجبي حفافة بناتية
لان ام اسيل كالت علمود لاتخفيفيهم
حتى يصير فرق بالخطوبة والعرس.
شكلي اتغير بالتسعين من حفيت بدت
ارتفعت معنوياتي وزادت ثقتي بنفسي

اسيل.. هلا والله هسة اموري يشوف هذا الجمال
وينصب خيمة يم بابكم

كنت اضحك على كلمات اسيل
دك نقالي وكان المتصل
ام امير اشرت لأسيل حتى تسكت لان المكالمة مهمة ا
.. اش اسيل سكتي هاي خالة ام امير دتتصل
ام اسيل .. ردي خالة بالعجل خاف متصلة علمود تتفقون عالموعد

سحبت نفس عميق اريد اهدي نبضات گلبي بعدها رديت
.. الو هلا خالة شلونج
.. هلا وغلا بنورة عذريني خالة اتصلت عليج بيوم عطلتج
.. لا عادي خالة بأي وقت يعجبج
اتصلي انا موجودة

.. تسلمين حبيبتي انا اتصلت عليج
علمود اطلب منج تسوين فد ثلاث كليو كليجة علمود
خطوبة امير عكب باجر عفية خالة وياريت تجين
تساعديني بالخطوبة لان الشغل واصل لهامتي وما الحك اسوي شي

بهت لوني وعرگت گصتي
.. لحظة خالة ممكن تفهميني شلون امير عكب يتقدم ويخطب زين واني شوكت ناووين تنطوني علم

ام امير بتلقائية .. يا حبيبتي شلون ما ننطيج خبر
وهو امير البارحة بذات نفسه اصر علية ان اتصل عليج وابشرج بخبر خطوبته واكد علية ان اكلج انتي معزومة ويكول ازعل عليها اذا ما حضرت

ام امير تحجي وانا النقال وكع من ايدي
احس العالم كله افتر داير مدايري
ما اعرف شصار بية هو العالم يفتر مدري انا الي اختل توازني بس كل الي اعرفه اني بهاي اللحظة اني كاعد انازع من الصدمة و اتمنى اختفي اواموت

..

مهيمن
.. ما عرفت منو هذولي الجماعة الي جايين يسألون عني وشنو يردون مني
.. والله يابو الهمة ما عرفت منهم شنو يردون بس الغريب بالامر
طلعوا سألين قبل فترة كم واحد من اهل السوك

وواحد منهم كال شفتهم حتى اخذوله صورة من بعيد
عقدت حواجبي مستغرب عجيب منو هذولي

بقت السالفة تدور بعقلي منو هذولي وشنو يردون مني
معقولة هذا عناد الخسيس
وعلى طاري عناد

صدك ابن الحلال بذكره
وكأنما يعرف كنت افكر بي
ركن سيارته كدام المحل كان شكله وملابسه كلها توحي بالبذخ شاب طول بعرض

كورت ايدي بغيض هسة من اشوه وجهه الحلو اكو احد يلومني شلون يتجريء ويروح يدز ناس وراي يتبعوني

نزل من السيارة ونزع نضاراته الشمسية واجة بتجاهي
وباوع للمحل بتمعن وكال

.. شلونه الشغل وياك
كان يحجي ويكلب بعيونه بأنحاء المحل هاي من غير
نظرات التكبر الي يلقيها علية

.. والله الشغل بخير اتفضل محتاج اساعدك بشي
.. لا مو انا اليحتاج مساعدة خلينا المساعدة للناس اليحتاجونها

على فكرة الوالد عطف عليك وشاركك بالمحل
ترة مو تصدك ابوي حط ايده بيدك عبالك انت تاجر جبير ومعروف

ما انطيته مجال يكمل كلامه
هو انا منا گلبي محمل عليه من ورة هذولي الناس الي دازهم وراي يراقبوني ونوب هو كام يحجي هيج
ما حسيت الا انا لازمه من ياخته ولاطشه عالحايط
.. حرمات هاي الخلقة الحلوة تتخربط معانيها

......
جلال

وصلت لنفس المكان المسمى بطريق الموت
بلعت ريكي واتوكلت على الله.

سمعت صوت سلوان وراي .. جلال بدون عناد
خليني اروح وياك

.. لا سلوان خليك انت هنا
كلشي يصير الوضع ما ينعرف يم الجماعة اريد افتهم شنو الموضوع واشوف الجهاز بعيني ويفهموني شنو يسوون بي وبعدين انا اقرر اتعاقد وياهم اولا

كنا نحجي ووصلت نفس السيارات الي كانت تاخذنا
للمزرعة رحت صعدت وياهم بالسيارة

سلمت عليهم وردوا علية السلام بلغتهم العربية الفصحى
بعدما كعدنا انا والاسطى توفيق وبدة يشرحلي
شنو المطلوب مني وشنو الي يردونه من هذا الجهاز
كل الي افتهمته ان همة ناس تجار

وعندهم تعامل بجاه بالخارج هم الوحيدين الي يكدرون يدعموني ويوصلوني للجهات المعنية بشغل التقنية والتطور

كيفت على كلام توفيق وبنفس بعدني متردد
يعني معقولة الاسطى توفيق هيج بكل سهولة وطيب خاطر يريد مصلحتي وحتى وان اخذله ربح من الجهاز
راح يكون ربح قليل بالنسبة لشغله المعروف عنه

جاريته بالكلام وخليته يرتبلي موعد وياهم
اهم شي عندي اوصل للجهاز وافتهم بطريقتي شنو يردون مني

كانت السيارة تمشي على نفس طريق المزرعة
ورة ربع ساعة اتغير مسار السيارة

وبدت معالم الشارع يختلف والطريق اصبح ترابي محوط بأسلاك شائكة بعدها وصلنا لبوابة عليها حرس وبيدهم اسلحة وجهاز حاكية
فتحوا البوابة والغبار مالي ساحة الداخل
وسط الساحة ترابية كانوا مجموعة يتدربون
على تفكيك الاسلحة

هناك وجان اشوف ابو بهاء اجة بتجاهي لكن هالمرة كان لابس زي اسود ولابس عمامة سودة

بلعت ريگي وعيوني صارت تستطلع المكان بحذر
ابو بهاء.. السلام عليكم يا جلال قربان
.. وعليكم السلام ورحمة الله وبركاته
ربت على كتفي بترحيب وگال
.. مرحبا بك في موطيء السلام والان سوف
ينالك شرف الاطلاع على رايات الاسلام

كان ابو بهاء يحجي بفخر ويمشي كدامي للامام يدليني الطريق وانا والرجال نتبعه بكل هدوء

بس كل الهدوء المرسوم على وجهي
اختفى وحل محله الرعب وكف امام بوابة كبيرة
وبدة يفتحها بثنين ايديه وكال

.. انضامك لنا وعملك معنا سوف تكون
ضربة نصر ضد الشيطان

واول ما فتح البوابة وجان اشوووووووف

يتبع

اتمنى لكم قراءة ممتعة
مع تحيات اختكم نهى الحسون