خيال الكحيلة

بارت السادس والعشرون

السادس والعشرووون

مسائكم جوري .... 🌹
#خيال #الكحيلة

#بقلمي_نشوى_السلطان

على كيفج شبيج تنهتين جايج بالطريق
اني وضرغام شلوون جت بالجهاز مالتج شبكة ...

لااااا ارجع احنا طلعنا من الانبارررر ...

يولي لا تجذبين عليه ... كتلج جاي يعني جاي ....

سلطان والله طلعنه شبيك انت على ياطريق راح تجي فهمني

خاف رحت عالطريق الخطررر ...

مالج شغل كتلج مستحيل بعد اعوفج هناك لو هالشي يكلفني عمري .. ادهام راح بسببي شلون اعوووفكم ...دحكي عليه

ساره شلونها خمو تعبانه ...!

ساره زينة بس انت لا تجي والله شوي ونصلك ...

يعني انتم بالطريق وين عمي انطينياه ...

اي والله شبيك... دقيقه هسه انطيكياه ... دحكت ابويه واكف يحاجي الجيش كتلو بابا ... سراب صيحيله ...

اخذت التلفون ورجعت للسياره ... جة ابوي يمشي

كال خير شكو..! عباله امي تخربطت ...

كتله ماكو شي هاك احجي ويا سلطان طلع جاي بالطريق ...

انطيته الجهاز ... اخذه وطلع غادي يحاجي ...

سراب ... شكد عنودي سلطان ...

اني ادري ... جماله جايب ويا ضرغام ...!

_ صدك جايبه وينهم هسه همه ... خل يجونه نطلع سوه

شبيج ... توج كلتي عنودي .. دحكتلها صفح ...

ارتبكت وكالت شبيج يعني بعد جة قابل شكو بيها ...

مممممم والله مدري ليش گلبي لاعب منكم ...

منو احنا شو تجمعين بالكلام ... خاف عبالك فردت حذائج سوت شغل وداعتج ابو سنديلا مايلحكني .. حضي واعرفه ...

من كالت هيج ضحكت ماتحملت .. صفنت بحزتها على نفسي صارلي شكد موضاكة .يولي ولا تنسين الحذاء ...

جة ابويه يمشي علينه كال حسجن نصنة ... خله التلفون بيدي
وصعد هو والسايق ...

كتله بابا شسويت شو سديته ..!

_ لا دليتو عالدرب وراح انتلاكة .. احنه وياه ... اي الف الحمدلله
اهم شي مايطب الانبار

مر الوقت امي بعدها على وضعها مره تصحى وتكعد ومره ترجع تون وهي نايمه
ساره عيينها عالدرب ونظراتها تكسر الگلب ...

ابويه من التعب نااام ...

وسراب صفنه توديها وصفنه تجيبها ....

واني ماراح خالي من بالي .... كل شوي اتذكره شلون جان فرحان
بوجود ساره بحياته ... من جان يكلي
هسه اني عشت من يوم الي اخذتها ...
ياربي كوون يرجع ويتلم شملهم ... ويرجع سالم النا بجاااه النبي
بقينا بالطريق انام ...

بحزتها جان الشارع العام بي سيارات لكن قليل ... بس قربنه نوصل جسر بزيبز ... بديت اشوف سيارات بكثره ...

كعدت سراب ... وامي كعدت الحيلها...

كتلهم دحكوووو شكد بشر هينه ....

ليلى ... ماما احنه وين شنو وصلنا..!

لا حبيبتي بعد طريقنه طووويل ...

مشينه والناس تمشي راجله وبالسيارات ... ياربي شسالفه
كل هالبشر هيييين مجموع .... السايق خفف المشي وركنها على صفحة ... صديت على ابويه ... كتلو شو وكفنه شنو مانعبرر

_ وين تعبرين بنتي دحكي البشر الجدامج كله مو كادر يعبر...

يعني شنو راح نرررجع لا مستحيل ..!

لا مانرجع بس نكضب سره حالنه حالهم ... شوي شوي ودلين احنه طالعين...

بس بابا هين بشر جثيررر ... صديت ادحك حرمة جبيره بالعمر
شايلها زلمة على جتافه ..... والشمس بوجهم ...

صاح السايق لهين وبعد ماكدر اعبر ... ادحك ساحة جبيره والسيارت مركونه والناس مدافع ...

اني يحجي وعيني عالناااس والبشر الي جدامي الجهيل اتعايط
والناس كوه تجر النفس الحر كاتلهم ...

ناس تدفع بناس وعياط وصياح والي يبجي والي كاعدين بالكاع
والناس ادوس عليهم .... ياربي معقوووول هيج شي نزلت ونزلو اهلي ورايه ...بدون شعور اخذتني رجليه وكمت امشي ... امشي وادحك عالناس ..

لاكتني مرة عجوووز شايله بيدها علاكة خبز وعلاكة صغيره مالت طماطه ... وياهه جاهله صغيره وبنيه ... تمشي خطوتين وتكعد ...
ادحك عليها گوة تجر النفس .. تربعت وكعدت بالتراب
وترفع راسها وتكول ربييييي ان جان باقي الي عمر اخذه
ربي شمسوين بدنيانه ... حسبي الله ونعم الوكيييييل
متنه عطش متنه جوووووع الحر جتلنه ياالاهي ... مابعد بيه اتحمل ... هي تدعي وعينها بالسما واني ماكدرت اتحمل اختنكت بجيت على بجيهااا ... كعدت يمها كتلها خاله هو هذا احنا العراقيين
ماكتوب علينا الفرح ... گومي خاله گومي

_ وين اكوم يمه وين انطي وجهي انذليييييت واني بهالعمر اتوسل بيهم بس عبروني ... محد يقبل ...

ميخالف امي انتي دكومي هناك اكعدي بالفي ....

\ ريتج طيبة بنيتي وين اكدر اصل لهناك رجليه ماتاخذني ....

اني أكودج خاله بس گومي الناس راح ادوس عليكم ...

يايمه ماتشوفين رجليه مجرحة وتنزف ... عجل بقيت للساع محد
داس عليه ... والله انداست روسنه وكرامتنه گبل اجدامنه

الله كريم خاله ان شاءالله مايبقى الحال هيج

_ الله يسمع منج امييييييين بجاة الله واهل البيت ... ونرجع الديارنا

ولدي اثنين صارلي فوگ العشرين يوم ماكو ...
طلعو. للشغل الصبح وماردووو ... ماريد شي من الدنيا
بس اريد ولدي .... واحد خاطب والثاني يدرس ... والله ماعدهم شي
جيف اخوهم الجبير ضابط اخذوهم بداله .... والله يايمه
اللگمة عليه علگم ... افكر بيهم شلون اكل وهمه جوعانين ...

اووف خاله الله يساعدج والله نفس حالنة ... هناك حرمة خالي
بعدهم عرسان واخذوا ... بس شنكول ...مانكدر نسوي شي بعد
العراق انبااااع وزلمنه راحووا ... واني احجي قاطعتني سراب

يولي ويييييينج انتي هييين ابوي يدور عليج ... امشي ويايه

_ هين اني يم الحجيه .... خطيه وحدها ....

_ سراب ... يا خطيه خاله شو وحدج ماكو احد وياج

_ لا وين يايمه ولدي واخذوهم مابقالي غير بنتي وهاي بنتها

\ كحلاء ... هااا يعني اكو وياج بعد بنيه ...

اي راحت ادورلي بطل ماي كتلنا العطش يايمه ...

اووف امشي سراب دوريلها ماااي اركضي

سراب .. خاله دگومي ويانه ... هسه ناخذج يمنه تكعدين يم امي

_ هااا مو بنتي هساع تجي تدور عليه ...

لا خاله هين تبقى كحلاء تجيبها ورانه ...

هااا عجل گوميني يايمه والله رجليه اثگاال وحيلي ميت ...

كحلاء ... كومناهه اني وسراب اخذنه العلاكة والجاهله وصلتها اليم اهلي ورجعت واكفت بنفس الدرب ...

انتظرتها تجي ماكو ... صديت على حس نسوان اتعايط ... ويركضون ركضت ليمهم ... ياربي خير شكووو

طبيت من بين الهوسه ... دحكت جاهل رافعي لفوك ويعيطن ملتمين عليه ... صحت شكووو شبي هذا الطفل...

ولكم شكووو ...

جة ازلمة بسدي ... كال خيتي الناس كلها متسممة الماي مو نظيف
الناس كامت تشرب ماي مو صحي ...

يااااا خطيه يعني الطفل بسبب الماي متسمم ...

_ خيتي مو بس هذا الجاهل جثير. ناس تسممت .. دحگي وراج الناس ملگحة بالكيعان ... المات مات والي كتله الحر ... شحجيليج خيتي ... الله مووووجود

ونعم بالله ... الله يفك شدتنه بجاه كلمن له جاه ...ادحك امه اخذت الجاهل وراحت تركض بعيد من لوبة روحة تحير شتسوي خطيه

رجعت امشي واتعثر بالبشر الي بالكاع ... ادحك ماكو هاي الحرمة وين صارت ... الشمس كتلتني .... واني واكفه دگ جهازي ...

جاوبت بسرعه ... الووو سلطان ...

هلا شلونج ابوية ....

الحمدلله انت شلونك ....

بخير بس انتظر شوفتج ...

اوووف سلطان احنا على جسر بزيبززز ...

اي حاجيت السايق وراح يطلع ياخذ الجهاز للجيش حتى يعبروكم

سلطان خطيه تدري شكد بشررر..!

اي يالغاليه ادري .... ادري بس شبيدنا ناس تجر وناس تعر ..
بلجي يعبروهم كلهم ... والله لو بيدي شي عليهم جان عبرتهم بس مابيدي شي يالحبيبة ..!

اوف سلطان مره يمنه اخذتها جبيره ... خطيه تكسر الگلب
ودتها سراب يم امي
_

ها... ليش وانتي وين ...!

اني بالهوسة انتظر تجي بنتها حتى اخذها ....

_ وماكو احد يكف غيرج ... ارجعي بسرعه

لا وين ارجع راح اتيه المرية ...

شكو واكفه بنص المدافع ... والزلم وحدج ... يولي لا تشيبين گلبي ارجعي اكفي يم اهلج ...

سلطااااان ششبيك ....

اسمعيني تعبر البنيه تاخذيه وكبل يم ابوج تكعدين ماتكومين الل تطلعووون ...

اي ميخالف ... هسه انت وين

_ شو الميخالف مالتج مو مقتنع بيها ها يووولي!

_ هههه لا والله شبيك راح ارجع

_ _ وين يعني بالدرب واكف انتظركم ... وبالي يم ادهام
والله شاعل گلبي شعل ....

_ اييي خالي ادهام ياكل ويشرب ويايه عاب گلبي عليه تعال شوف حال ساره ...

_ شبيها ساره خمو. مريضه ....!

لا بس مقهورة على خالي ...

حگها يايابه حگها بس شبيدنا عليها... والله ماكعدت ماخليت واحد ما دزيته يدوره ...

اي وشكلولك ...

بعد ديدورون والله كريم ...

يارررب يارررب كون يرجع النا سالم ...

وهسه شلووووون راح تبقين واكفه وحدج

طبعا صوتك يقطع گوه افهمك الممهم مو وحدي هين شكد بشر عينك وماتمدددد

هااا ماشاءالله وكحيلتي بنصهم ...درجي بسرعه

ههههه خرب والله مابيه اضحك واني بنفص هالقهر اكول ضرغام وياك صدك

اي وياي .. دانتتظركم ... بس تعاي عاااد

الله كريم ... بلكي يخلونه نطلع...

درجعي يله بسرعه .... ولا ثوليها علية

ماشي هيان سراب جتي مدري شبيها تأشرلي يمكن لكتها ...

ماشي يالغاليه ديربالج على نفسج ولا تكفين بالشمس ...
حاره عليج ....

ماشي حبيبي ... الله وياك .... سديت الخط ... جت سراب كالت تعاي من زمان جت البنيه ... كتله اي اللتهيت ويا قهر هالناس

امشي وعيني عليهم يارب رحمتك بينا .. يارب شذنب هالاطفال

مشيت اريد ارجع اني وسراب ... وهم سمعنا صياح ...

سراب... ولج تجااتلو خل نرجع يولي

اصبري اريد افتهم شكووو...

يبو. شعليج انتي امشي

لا شنو شعلي اني اذا اني وانتي وكلها تكول اشعلي ...
شلوو هالناس تعيش غير انكون ايد وحده ...

تعاي .. مشيت خطوتين .. وكفت على تله عاليه شويه ..

اسمع الشايب يكله والله مسوي عمليه ... وماكدر بعد اكف على حيلي عبرونا الله يستر عليكم

واحد عسكري يصيح علية ويكله ... هسه صرتو اترجووون
منو الصفگ للدواعش مو انتو خووووونة ...

من كاله هيج العالم صارت تصيح ...احنا مو خونه مو احنه الجبناهم هاي لعبه ونذبت بروسنه احنا مالنه ذنب ... حالنه حالكم بس الي
جابهم علينه لا ذمة ولا ظميررر عبرونا بسرعه ...

بهالاثناء صار رمي كامو الجيش يرمون بالجو والناس انرعبت

وكامت ترجع ليوره ... وصارت مدافع ناس فوك ناس
ووكعت بيها العجايز والشياب بالمدافع .. كلها درس عليهم ...

اويلي والله الحال يبجي الصخر ... ..

رجعنا نركض اني وسراب وادينه على اذانه نركض ...
وصلت اهلي لكيت ابويه خطيه جاي ديدور علينه من شافنه رجع ...
_ كام يصيح علينه ... كال دتشوفون هوسه والنار منهاره من الحر والجووع والعطش اكعدن بمكانجن اخير الجن ...

كتله اي ماكوم بعد ... تربعت وكعدت يم الحجيه بالتراب بعبايتي

كالت .. ها بنتي وين جنتي بطيتي يايمه ابوج خطيه خاف عليج

هي تحجي واني ادحك على بنتها وياهه ... تبين مهمومه .. صافنه
وماتحجي بس حلوه ملامحها .. عيونها كلش حلوات ...

كتله انتي بنت الحجيه ...

رفعت راسها عليه كالت اي هاي امي ...

عجل واخوج الضابط وينه شو وحدكم ...

اخويه اووف ياريت نسمع عنه خبر ... من طبو الدواعش الانبار اختفه ماندري وينه

ياااا يعني هم الدراعش اخذو

والله ياخيتي ليش اجذب عليج مادري هو طلع لمكان مادري ماخذي واجب والله يايمه ماندري وينه وتلفونه مقفول

خطيه الله يساعدكم شلون قهر 3 زلم مامنهم خبرر...

_ الحجية .. اوف يايمه والله السكر ديصعد من قهري عليهم
وخايفه اموت هاي بنيتي مالها احد ... غير هالطفله ..

عمرج طويل خاله ... انتو منين ...

من البو نمر بنيتي ... ...

عالراس خاله ... ان شاءالله يرجعون وتفرحين بشوفتهم

سراب ... كحلاء امي خطيه تعبت شلووون ..!

صديت عليه ها ماما شبيج بعده بطنج ....

اي والله يمه بعدني مادري شبيه عبالك المراره ...

زين شلون راح نطلع من هاي الهوسه يارب فرجك ...

اكول ساره خلي شي على راس ليلى باعي الحر موتها خطيه

شسويلها اكللها اكعدي ماتكعد تريد تلعب يم الجهال

اي ياريتنه مثلها جهال ومانعرف شي من هاالدنيا .....

بقينه كاعدين احنا والحجيه .. واندحك عالقهر وعالناس الي ادمرت
بالحر والي كتلها العطش ... يابه منظرهم يكسر الگلب ...
كامو حتى الي جايب ويا اكل وفراش من الشي الشافه يكطه بالكاع ويمشي .. الناس تركض ورافعه جناسيها وتنتظر بس الفرج ...
كلشي بعد مايريدون .. بس يردون يطلعون بروحهم ...

مر الوقت وبقينا على اتصال ويا سلطان ... وصار الليل وماكدرنا
نطلع ... امي ادهورت صحتها اكثر ... ومابقى حتى ماي نشرب ..

ليلى تصرخ تريد بس اكل تاكل ...

بوقتها الحجيه خطيه كامت تلفلها طماطه بالخبز وتوكلها ...

ادحك الناس حفاي يمشون ويركضون يردون بس احد يفتح الهم
المكان ويطلعون ... جانو يعبرون الناس بس قلييييل كلش والاكثر

يعبرون الي عدهم واسطه لو الي حالته توصل الموت ...
بوقتها تدقيق عالجناسي ... وحاسبات الواحد يشوف الموت يله

يوصل سراه ...لنص الليل واحنا على كعدتنه ابويه يروح ويرجع ليم الجيش وماكو فايده ... سلطان يدك كل شويه

والهوسه والتعب الي علينا ماينحجي .. عبايتي كلها تراب ...
تعبت حييييل ... الحجية نايمت فرشت عباتها ونامت وبنتها وكلنا كاعدين ننتظر الفرج ... اذن اذان الفجر ... وصاح

الله اكبر ... وجان الناس كلها تصيح الله اكبر على كل ظالم
حسبي الله ... ونعم الوكيل ... ادحك الناس تدعي وتشغر
كامو يتمشون الي راح ايتوضى والي كاعد على حيله كاتله العطش
واني صافنه دك الجهاز ... دحكت ابويه من بعيد جة يمشي سريع
يأشر تعالووو

جاوبت بسرعه ... لين سلطان كال توجهو عالسيطره بسرعه ...

كتله ماما كوووومي ...راح نطلع

الحجيه كعدت الحيلها وكالت يايمه واني ... ماتاخذونه وياكم

ياعيني قهرتني مالها احد كتله كومي خاله والله ماطلع اذا ماخذج ويايه ...

سراب كامت تسحل بالجنط ... هي وساره والبنيه وياهم خطيه
امي طلعت اجدامنه هي وابويه واحنا وراهم الحجيه گوه تمشي

كتلها خاله انطيني اديج ..

كالت يايمه ب
دشوفي عباتي شصار بيها ....

اي خاله كلنا مثلج تراب طبعا ..

يايمه دحكي عليها عبالك جلاب متجاتله فوك عباتي .. كلها تراب
مرغلة تمرغل ...

هههههه اوف خاله والله ضحكتيني ... الله ينطيج العافية كله هذا يهون بس خل نطلع ...

اي والله بس خل نطلع ويرجعون ولدي ...

كحلاء ..بقينا نمشي ازدحام وعياااط وصياح وناس ادفع بناس ... ... الكل منهارررر ياويلي عليكم

الحجيه تكعد بالكاع من التعب ترتاح وترد تمشي واني وياهه وياهه
لحد ماوصلنا تقريبا للسيطره كالت يمه خل ارتاح شويه وارجع امشي .. كتله اكعدي خاله عادي اني واكفه يمج .. كعدتها على صفحة .. دحكت عائله نايمين بالكاع وياهم رجال جبير .. .. دحكت العسكرينزع قميصه العسكري وكام ... ويسفط بي ... بقيت صافنه عليه شراح يسوي .. .. جة يمشي عالحجي كاله حجي شو ارفع راسك ... دنج عليه ورفع راس الححي بدي .. سفط القميص مالته وخلاه جوه راسه ...

الحجي خطيه تعبان منتهي ... كاله رحم الله والديك ...

الجندي بوقتها جان من اهل البصره من لهجته عرفته ...

خطيه جة عالاطفال كام يشرب بيهم ماي واحد واحد ...
ورجع النوب عالحجي كاله ها حجي محتاج شي .. اني مثل ابنك هنا
امانة الله شتحجتاج كلي ..

تشكرو من عنده الناس ...

كلهم جا غير احنا اهل وناس تساعد بناس ... والله لو انتم يمنا بالبصره افرشلكم الكاع ورد ... وامانه الله تعالو عدنا بيوتنا مفتوحة الكم ... كامت الحجيه بوست راسه ...

وهي تبجي نزلت دمعتها ... كالتله يايبه جنت اكول مابقى بشر يرحم ... روح ابني الله يحفظك من كل مكروه .. راح ادعيلك بكل صلاة ...

اووف قشعر جسمي والله ... من شفت نخوة الجنود وشلوو يساعدون اهلنا .. ماسيطرت نزلت دمعتي ...

اخذت الحجيه وطلعت للسيطره ... لكيت ابويه مقدم الجناسي
واكفين بسد سياره عسكريه ... كعدت الحجيه يم بنتها وجيت على امي ... شفتها امورها تقريبا زينه الحمدلله ...

تقربت على ساره كتلها يالة مابقى شي ونطلع ...

دحكتلي .. وكالت .. والله لو عايفيني هناك ارحم .. عليش ماخذيني
شو روحي وعفتها بالانبار ...

لا تكولين هيج ... هسه يطلع ويرجع النا ...

شووكت كحلاء شوكت ... التفكير موتني والله ...
هسه لو بس اعرف شحاله هسه عايش طيب شكالت روحة ..
جوز عذبو جوز كتلوو كحلاء راح اموت والله ...

تقربت بستها وحضنتها كتلها لا تحجين هيج عفيه والله مابيه قهر
منين مااباوع قهرر...

واني احاجيها قاطعتني سراب وكالت ... ولكم يلةةةةة طلعنه

صديت لين ابويه ايإشر تعالو ...
شلنا الجنط واخذنه الحجيه وركضنه عالجيش...

شوي وطلعنا السيطره ...

يابه ... والله جن جنت بناااار وطلعوني منها ... بحزتها
كل الحيل صار بينه ... نررركض ومانلحك حتى الحجيه كامت تمشي سريع ... ... وصار بيها كل الحيل...

طلعنا من السيطره مسافه جبيره .. صبحت الدنيا انريد عاد بس ماي نشرب ... حلوكنه يبست . ..

ابويه عافنه وراح يدور سياره ...

واني كمت افتر اخذت ويايه البنيه الصغيره كدتها بيدي ومشيت اريد محل اريد بيت شي بي ماي ... والجو ناررر

دورت ماكو .. برجعتي ... لاكتني سياره عسكريه ...

الجيش جان صاعدين بالبدي ...

خفف السياره وكال ها خيتي محتاجة شي...

اريد احاحي الشمس بعيوني .. خليت ايدي على كصتي ماله الله يسلمك اخويه والله ادور مكان بي ماي...

كال دقيقه ... مد راسه صاح الجنود الي بالبدي كال الهم انطوها بوكس ماي...

اواني واكفه جان ينزل العسكري كال ... هاج خيتي ...

واحنا هين مفرزة واكفين ... امانه الله شتحتاجون تعاي علينه ..
وياج اخوج من اهل النجف .. ماراح نقصر ...

كفو والله ريتكم طيبين ماتقصرون ... رحم الله والديكم...

من ذبلي البوكس مالت الماي عبالك منطيني كنز ...

اخذته وطلعت اركض .. اني والبنيه .. دحكت من بعيد واكفه سياره جمسي بيضه واهلي ديصعدون بالجنط ...

اااااي واخيرا ابويه جاب سياره ... طلعت اركض وييدب الماي رافعته عالي ... كتلهم حييييت وجبتلكم ماي ...

عاد صعدنه كلنا بالسياره ... وزعت البطاله عالكل .. رغم جان الماي نار .. بس بعد مابينه نتحمل العطش ..

يومين واحنا من سياره السياره .. ونتفتر من محافضه المحافضه

تكسرنه من التعب والطريق ...

سلطان بوقتها رجع الاربيل .. راحو جابو سيارة ضرغام ورجعو انتظرونا بالسيطره ... بعد التعب والمعناة الي شفناهه ...

وصلنا سيطرة كردستان ... واحدانه منتهي يريد بس يشتم الهوى

طبك السياره السايق وانزل هو وابويه راحو واخذو الجناسي

الحجيه تنام وتكعد وتصيح ها ولجن ماوصلنا ...

عاد سراب كالت حجيه اكعدي وصلنا واخيرا ...

كعدت الحيلها الحجيه مو مصدكة كامت تلف بالكحج كالت
الله يبشرجن بالخير... عجل دكومن خل ننزل

كتله لا خاله غير نختم من الاقامة يله نعبر...

سراب ... ولج كحلاء ... جناسيجن القديمة خاف ابويه نساهن

عززززه خاف صدك ... فتحنه جنطة امي

لكيت الجناسي

بعدهن ... كتله عزه ولج اركضي ابويه راح ينطيهم المزورات فتحت الباب ونزلت اركض اني وسراب

دحكت السيطره ملياااااانة ناس من تكريت ومن موصل ومن سامراء ومن الانبار ... حييييل شكد بشر

اركض ورايه سراب تركض ورايه وعباياتنه مفتوحة عبالك بات مان ...امشي وادحك عالشبابيك اريد اعرف ابويه

على ياشباك واكف كتله سراب امشي خل تلفوف من غادي ...

احاجيها شو هاي ماترد .. صديت بسرعه ... لين سلطان
بوجهي ... واكف عيني صارت بعينه ...اريد انطق ماكدر بعد

يتبع ... التوقعات الي كتلكم عليها بالبارت الي بعدو يعني من يصلون داخل اربيل ( خل تشوف منو الي راح يحزر )

مالحكت اليوم اكمل والله ... وياريت ترفعولي المنشور لان القصه مادتظهر عد الكل ...
😔😔😔
عجبت لحال وطني إنه برغم انحرافه يتضخم ويتعظم ويتعملق ، ويملك القوة والنفوذ ، ويصنع الأشياء من الإبرة حتى الصاروخ ، ويبشر باتجاه إنساني عظيم ، ولكن مابال الإنسان فيه قد تضاءل وتهافت حتى صار في تفاهة بعوضة ، ما باله يمضي بلا حقوق ولا كرامة ولا حماية ، ما باله ينهكه الجبن والنفاق والخواء.

هلو بنات ممكن تابعوني جديدة ع تيك توك تابعوني وردها hajarkasim3@ واعرف متقصرن😘