عشق ولكن

البارت الاخير

(عشق ولكن)
#Akbal_mahameed
صباح الخير والعافيه عليكم
&&&&&&&&&&&&&&

ماعرف شنو هو اخذ ملابس وراح للحمام ..

كعدت ع السرير افكر هذه وين جان يربي ..

قمر شبيك ..

قائد قمر سويلي قهوه ..

طخت ابالي هذه سكران من جره السانه ..

قمر انته شارب ..

فز وارتبك ..

قائد شبيچ اشارب ..

قمر هاااي تاليتك قائد تجي للبيت سكران...

قائد هشش صوتج ولج ..

قمر شنو خايف لو مستحي والله ماابقالك دقيقه

قائد وين تروحين شبيج انتي .

قمر ياحيف طلعت واحد ماتخاف الله والعالم مغشوشه بيك كدام الناس سبحتك وسجادتك وره العالم واحد سكير مايخاف ربه ..

حجيت هيج ضربني راشدي وكعت السرير ..

قمر تضربني قائد لان حجيت الحقيقه تمد ايدك عليه والله ماتسوه اضفر مني ..

ماهتم لحجيي ودفن راسه بركبتي يبوس ويعض بيها واني نفسي لعبانه ريحه انفاسه كلها ريحه مشروب لعبت نفسي .. ادفع بي ماريد اصرخ عيب من عمي

قمر قائد وخرررر قائد لعبانه نفسي وخرررر ..

مااهتم فاقد ويتصرف جنه خبل وتصرفاته تقزز شكد كرهته بوقتها بودي اشرب من دمه ..
بطني احسها تملخت من الوجع لان ذاب ثكله عليه . ونفسي لعبت من الريحه انفاسه..

قمر والله راح اصرخ والم العالم عليك وخرررر بطني اذتني وخر راح اموت جواك حرام عليك الله ياخذك واخلص ..قاااااااائد عطت بكل صوتي ..

ابتعد مني وكام اخذ ملاس ويتتطوطح مامتوازن..

دك الباب عمي ويصيح شكو شبيكم ..

لبس قائد ويفرك وجهه  يريد يصحصح ..
فتح الباب وطلع وسده..

قائد ماكو شي يابه شويه تعاركنه ..

راح عمي وهو راح للحمام واني احس روحي راح تطلع . متت لفيت نفسي بلجرجف نفسي لعبانه بس ماازوع ..

رجع دخل وشايل نسكافيه ..

باوعلي اني بس شفته تخربطت...

ماحسيت ع روحي الا واني بلمستشفى ..

وعمتي وقائد فوك راسي ..

دنك باس راسي...

قمر عمه شبيه ..

ام عصام مابيج الا العافيه يمه بس البارحه شويه صرتي ماتكدرين ورجلج جابج للمستشفى ..

طلع قائد بقت بس عمتي..

قمر عمه ابني خوما متأذي ..

ام عصام شويه نزفتي بس الحمدلله عدت سلامات وانطوج علاج ومثبتات .

قمر عمه اخذيني وياج ماارجع بعد لقائد ماريده بعد والله ..

ام عصام شبيكم ياامي شصاير ..

قمر عمه قائد بعد لو يصيرلي النفس ماارجلعه اموت روحي وماصيرله مره بعد..

ام عصام هذه الكلام مايصير بيناتكم طفل انتو
ليش تعاركتو

قمر عمه تعاركنه وضربني وهاني وصلني للمستشفى الشفته من قائد كفيل بان يخليني انساه واشلعه من كلبي ..

شويه ودخل وياه امي ..

ماباوعت بوجهه بس شفت امي وبجيت ..

اجتي حضنتني وباستني براسي ..

ام قمر يول اشبيج ليش هيج ذبلانه وليش جايبيج للمستشفى ..

قائد عمه نزفت وجبتها .

جاي يحجي  ودخلت الدكتورة ..

قاست ضغطي  وشافت السونار لان همه مسويلي سونار ..

الدكتورة قمر الطفل بعده عايش بس نبضه ضعييف كلش لازم تهتمين بنفسج وباكلج وتلتزمين بلعلاج..
عشر ايام وتجين نجيك وضعج وضع الطفل اذا عايش خير ع خير واذا ميت  انزله الج ..

من كالت اذا ميت وانزله شهكت بلبجي وقائد يفرك بوجهه وتنهد ..

كتبتلي خروج وطلعت ..

قائد ام عصام لبسيها عباتها راح اجيب سيارتي ..

قمر ماارجع وياك اريد اروح ويه عمتي .

قائد قمر بعدين نحجي هسه اهم شي سلامه ابنا ..

قمر معليك بي روح وعوفني ..

ماهتم راح وعمتي لبستني حجابي والعباء ..

جابو كرسي متحرك وكعدتني بي عمتي
طلعوني لباب المستشفى واجه قائد يريد يسندني علمود يصعدني بلسياره ..

قمر ابتعد عني قائد لا تخبلني روحه مااروح وياك..

ام قمر قائد اني اخذها وياي..

قمر ماروح وياج اروح ويه عمتي ماادخل اي بيت اله
قائد تدللين والله بعيني اصعدي واني اوديج وين ماتريدين ..

سندني وصعدني بلسيارة واني دايره وجهي عنه

ام عصام قائد ودينه لبيتي بلكاظميه..

صدك طلع بينه للكاظميه لبيت عمتي ..

الطريق كله اني ساكته واعيد السواه بذاكرتي اشبه بلغتصاب رغم مو بعنف بس تأذيت و تقززته منه الى درجه لان كلشي سواه بتقزز اخخخخ ياقائد هاي تالتك هيج تسوي بيه ..

وفوكاها يسكر اؤيلييي شكد انغشيت بيك ..
معقوله يشرب وهو دكتور جامعي واله هيبه وللطلاب صاير قدوه ..

يعني ماتدخل العقل دكتور ودارس ومثقف هيج يسوي بس للاسف سواها ..

دموعي تجري واشهك ..

انتبهولي اندارلي هوه .

قائد قمر كافي لخاطر ابنا مو لخاطر احد حرام عليج تأذينه ..

مسحت دموعي وخليت راسي ع جتف عمتي ..
وصلنه للباب
وكف السيارة واندار نزل سندني ..
فتح الباب رجل عمتي وتلكتنه مرت عصام ..
سلم قائد عليهم دخلني للصاله ..

وقائد دخلو للستقبال ..

تمددت واجتي يمي عمتي وامي عمتي تكشرلي برتقال .

ام قمر يمه شبيكم شنو الصار .

قمر يمه قائد ماريده بعد هاهيه البارحه ضربني وردت افقد طفلي بسببه اموت روحي وماارجع وياه..
ام عصام ع راحتج بنيتي هذه مو بيت عمتج بيتج عين غطه وعين فراش بالله شعندي غيرج اني .

ام قمر ماتقصرين ام عصام بس راح اخلي اخوها يشوف بيت ونكعد واخذها يمي ..

ام عصام شدعوه ام قمر هذه بيتها والله ..

شويه وراحت عمتي يم قائد واسمعه يتعذر ويريد يحاجيني عمتي ماقبلت كالتله عوفها يمي يمته  ماترتاح وتريد تحجي وياك ادز عليك ..

قائد خويه بس اشوفها واروح عوفيها ترتاح ادري بيها متأذيه ..

اجه ويه عمتي واني متمدده ..
كعد كبالي وباس راسي درت وجهي عنه...

قائد قمر كم يوم واجي ونحجي ادري بنفسي غلطان من السماء للكاع واعتذر منج  والله احبج بس طلعت مني بدون وعي ..

قمر قائد ماريد تسمع كلامك المعسول عوفني وروح ..
كام طلع واجتي يمي عمتي .. كعدنه وحدنه ..

ام عصام احجيلي يمه قمر علمود اعرف اتصرف وياه واخليله حد...

قمر عمه شحجي وشكول انغشيت بي طلع واحد سكير ولج عمه راح اموت دكتور ومثقف ويجيني تالي الليل سكران ويتطوطح ..

ام عصام صخااام بوجهج ولج صدك تحجين بداعت البطنج 

قمر والله والقران عمه ابد ماتوقعته هيج ومن كتله طلعت واحد سكير  ضربني وهاني وج عمه اغتصبني اغتصاب روحي طلعت منه جزت نفسي منه وطلع من نفسي .. وحجيتلهتا كلشي

ام عصام ارتاحي واني اعرف شلون اتصرف ..

لليل وراحت امي بقيت بلبيت بس اني وعمتي ومرت عصام رشا .. عمتي ماعدها بس عصام وعصام ب2006 استشهد بلطائفيه  وجنتها يتيمه الام ولاب وعمتي ماقبلت تطلع من بيتهم وبقت وياهم ..
وهمه يموتون عليها ..

اخذت علاج واريد انام مااكدر بس افكر بلي سواء ليش هيج يأذيني هو مو يحبني لو يحب بس نفسه ..
صح اني تجاوزت وغلطت من شككت بي واصلا بعد الصار رجعت اشك بي
بس مو هيج يسوي بيه لو مسقطه الطفل جان شكال لروحه ..

ماعرف شلون غفيت كعدت الفجر عنت نفسي وكمت توضيت وصليت ..

ورجعت لفراشي عمتو سوتلي غرفه ابيتها ..

ثاني يوم الصبح اجه قائد متسوك لبيت عمتي وجايبلي معلاك وباقي علاجي وجايبلي ملابس ومصرف انطاهن لعمتي 

واجوي اهله وياه كلهم امه وابو واخواته . تحمدولي ع السلامه ..وامه سئلت شبيكم وليش نزفتي ..

قمر عمه تعاركت اني وقائد وضربني وردت افقد طفلي بسببه ..

ام قائد الله يلعن الشيطان .. والله يايمه تعبان ومتندم ..

قمر شي يخصه ..

شويه وراحو مافتحو موضوع رجعتي ..

ماكدرت اداوم اني ..يوميه قائد يخابر ع عمتي ويسئل شلون صارت ..
مرت العشر ايام واجه الصبح يريد ياخذني للدكتورة اني لازمه كلبي بيدي اخاف تكولي شي وانهار والله مااستحمل ..

كمت بدلت وطلعتله ويانه عمتي ..
مادحكت بوجه ولا كانو شفته صعدت ليوره وعمتي يمه صعدت بلصدر ..
يسوق ويدحكلي بلمرايه ..

وصلنه يم الدكتور دخلنه وهو صف سيارته واجه .
بقينه ننتضر يوصلنه السره .. راح جابلي عصير وكيكه ..

قائد هاج اكلي بين مايوصلج السره .

قمر ماريد شكراً ..

سكت وراح انطاهن العمتي ..

وصلني السره واصر قائد يريد يدخل ودخل ويانه ..
سوتلي السونار واني اباوع لعيونها عسى اشوف شي يطمئن..

الدكتورة ابنكم بطل عايش هياته وكلشي مابي ..

نزلن دموعي ودموع قائد يمسح بدموعه ويحاول يخفيهن ..

مسحت بطني بكلنس وكمت.. جرني وحضني ويهمس الحمدلله الف الحمدلله ..

سحبت نفسي من حضنه ..

حاجتني الدكتورة وانطتني علاج ..وطلعنه ..
قائد اليوم نتغده ابيت اهلي ..

قمر مااروح وياك ..

قائد قمر كافي زعل ادري بنفسي غلطان بس والله ندمان ..

ام عصام قائد قمر مالها رجعه وياك ..

قائد ام عصام مرتي واني رايدها واريد ارجعها ..

ام عصام بس هيه ماتريد ترجع واني بصفتي عمتها ومثل امها مااقبل ترجع وياك وصلنه للبيت ..

سكت ماعجبه الكلام..

وصلني لبيت عمتي ودخل كال لازم نتفاهم ..

قائد قمر اريد احجي وياج وحدنه ..

دخل للستقبال واني بدلت ورحت عليه .. مدنك ولازم راسه حس عليه وكام ..

اجه يريد تقرب مني  ..

قمر ابتعد عني رجاءً قائد ..

قائد قمر اكعدي خلي نحجي ..

كعدت كباله ع القنفه ..

قمر اسمعك ..

قائد قمر اسف واعتذر والله غلطت وندمت ..

قمر اعتذارك مايوكل خبز اني اجيت اخسر ابني بسببك تفهم لو لا انته حتى الله ماتخافه شكد انغشيت بيك دكتور ومثقف تالي تجيني سكران ويتطوطح وتغتصبني لو ميت
الطفل جان شكلت لروحك ..

دنك راسه ويتنفس بقوه ..

قائد ادري بنفسي غلطان والله بس حياتي الاعتراف بلغلط فضيله واني جاي اعترف غلطان وداعتج وداعه لبطنج ماتنعاد بعد واذا انعادت شتريدين سوي .

قمر لا قائد لا بعد مانرهم سوه اني تعبت مستحيل ارجعلك بعد السويته ..

قائد شلون ننهي زواجنه وحبنه بسبب غلط واحد..

كمت وكفت ..

قمر بس هذه غلطك ماينغفر ياقائد مستحيل ارجع لواحد سكيييير ..

عفته وطلعت راحت وراه عمتي وكالتله قمر حجتلي كلشي احنه هيج شغله مستحيل نتقبلها ماعنده بنيه منطيها لواحد يشرب ابددد ..

قائد ام عصام اني مااشرب ولا متعود ع الشرب بس صارت بعد واخر مره قسم بالله العظيم وداعت ابني البطنها ماتنعاد بعد شتريد ..

ام عصام هيه حيل متأذيه الصار مو شويه انصدمت بيك واجتي تخسر ابنها ..

قائد شنو تريده اسوي بس خلي ترجع ..

ام عصام مااتوقع ترجع قائد اني مامقتنعه انو ترجعلك بعد الصار ..

كام وكف ..
قائد ام عصام الصار مو بيدي ماجنت بوعيي غلط وندمان مرتي اريدها هسه بعدهي متأذيه خلي ترتاح واجي اخذها  ..

خله فلوس ع  الطبله ..

قائد هذه مصرفها  وهذه موبايلها اي شي تحتاج خلي تخابرني .

طلع من البيت ..

شكد حاول يرجعني بس اني رفضت كل جمعه يجي وبلدوام يحاول يحجي وياي بس اني ارفض ..

لا يمل ولا يكل يوميه يكعد يحجي ويتوسل انو ارجعله كالي انو هو  مايشرب دائماً بس قبل لا ياخذني جان من ينقهر علمود شغله الاطفال يكعد يشرب بس محد يدري بي حتى رسل ماتدري  لان هو مايسكر وشارب ذاك اليوم يكول انقهرت من شكيتي بيه ..

اربع اشهر اني زعلانه يم اهلي رحت يم اهلي لان طلعو من بيت قائد ..
بطني كبرت حيل من دخلت بشهري ..

وقائد راح يتخبل يكول راح تجيبين وانتي مو يمي ..
اني مااقبل ورجعله وجنت مقرره بس اجيب اطلك .. اول شي لان مد ايده عليه اكثر من مره عبالك فصليه الخلفو وثاني  شي لان شرب وثالث شي ع السواه من تقربلي ..

بيوم جنت بلكلية واني من الصبح يجيني وجع خفيف ويروح ..

طلعت من المحاضره واني كوه امشي بطني كدامي ..
صار عندي الم عضيت شفتي ياربي بس لا طلوك شلون بيه ..

تمشيت للكافتريه ..

اجتي يمي سارة .
سارة يول شبيج اشو وجهج اصفر ..

قمر لج بطني توجعني تقلصات ..

سارة خلي اكوم اجيبلج نسكافيه بلكي يهدئ الالم..

راحت شويه واجتي وياها قائد ...

اني شفته والالم زاد..

قائد هاا يولي راح تولدين..

قمر الحكلي زاد الوجع يما راح اجيب ..

كوه مشاني للكراج اني صعدت بلسيارة وكمت  اصرخ من الالم ..

يسوق يكول هانت حبيبتي هاانت تحملي ..
مادري شلون وصلنه للمستشفى اخذوني للصاله الولاده وقائد بقى بره ..

عمري كله ماحاسه بهيج وجع ..احس روحي تريد تطلع ..

كمت اتشاهد ..

عطت بعلو حسي قاااااااااااااااائد وراها سمعت صوت ابني ..

سمعت صوته وفقدت مادريت شصار ..

صحيت  الممرضه جاي تلف بابني وحده طلعت
اللهم علمود يجيبولي ملابس . انطوها الجنطه واجتي بدلتلي ولفت وليدي ابطانيه وخلته بحضني .. يمااا فدوه لحبيبي وجه صغيير بس ابيض وعنده شعرايات سوده فدوه رحتله ...

طلعوني بكرسي متحرك لغرفه ..دخلت عمتي وياها سارة تصلي ع النبي دنكت باستني وبوست وليدي ..

باستني سارة وتحمدتلي ع السلامه ..

خلته بحضني اني اباوعله ومالكه الدنيا شعور حلو عمري كله ممجربه هيج شعور الامومه هذه الطفل ابني مالتي لعابتي ياااي ..

دخل قائد يباوعلي وعيونه مدمعه .. تقرب باسني براسي .

قائد حبيبتي وعمري وحياتي وام ابني الحمدلله ع سلامتج .. باوع لابنا وعيونه جرت دموع .. عمتي وسارة  طلعن وخلنه  وحدنه ..

قائد قمري هذه ابنا وابني  ..
يحجي ويبجي ..

تقرب شاله بين اديه باسه  ويمسح ع خده...

قائد انطيتيني اجمل هديه اطلبي التريدينه واني اكلج تم ...

قمر ماريد شي ..

حضنه حيل وكبر باذنه ودموعه تنزل بجاني وياه ..
وسماء محمد ..
ورجعه لحضني ويمسح بدموعه ..

قائد دخلت الاربعين واني قاطع  الامل بيوم اصير اب..
بس الحمدلله الله ماينسه عبده ..

دخلو امي وبدر بوسوني وكعدو دخلو اهل قائد كلهم..
امه بس دخلت كامت تهلهل هيه واخوته ونسوان اخوته هلهوله وره هلهوله والجكليت صار مطر ..

بوسوني وانطوني فلوس بضرف ..

شالته عمتي وتصلي ع النبي وتمسح بدموعها ..

ام  قائد الف مبروك يمه قائد قرت عينك بوليدك ..

قائد الحمدالله ..

بقو كاعدين للعصر وطلعوني من المستشفى ولبيت عيالي اخذوني قائد ماخله احد يحجي ..

وصلنه شالني وصعدني لغرفتنه خلاني ع السرير..

قمر ليش جبتني اهنا .

قائد اششش ماريد اسمع كافي فراك تعبت والله ..

قمر مو كتلي اطلبي التريدينه ..

قائد ايي واني كد كلمتي ..

قمر توعدني ماترجع تشرب واذا رجعت شربت تنطيني ورقه طلاكي ..

قائد شبيج بعد ما الله انطاني هيج مره ورزقني بولد ارجع اشرب التوبه هسه ماريد من الدنيا غيركم انتي وحمودي ..

قمر الحمدالله ..

قائد خلي اجيبه اهنا يمنه ..

راح جابه واجه يباوعله وعيونه تلمع من الفرح ..

خلا بحضني ..
صعدت عمتي ام قائد وساعدتني ارضعه...

غفيت وحمودي بحضني وقائد حاضني وحاضنه . هو بيناتنه ..

كعدت العصر .. قائد غافي كمت فز حس عليه ..

قائد هاا حياتي خوما متوجعه ..

قمر لا حبيبي زينه ..

كمت رحت للحمام غسلت ورجعت مشطت شعري .. ورتبت نفسي رجعت تمددت خليت وليدي بحضني
قائد بس يباوع ويوزع ابتسامات ..
ثاني يوم قائد ذبح ثلاث ذبايح وحده مال سلامتي وحده مالت حمودي وحده مال فرح لان صار عشرين سنه هو ماعنده ..

العالم كلها اجتي عشيرتهم كلها ..

اني كاعده بغرفتي مانزلت ابد ..

حمودي يشبهني نسخه بس عيونه ع ابو سود ..
كمت من اداوم اعوفه يم عمتي والكل مهتم بي بشكل عجييييب بودهم يشلونه من الكاع ..
قائد يمووت علي اسمه شايله ويفتر بي..

تصرفه ذاك ابد ماعاده كمت انتبهله من يجي وانتبه لتصرفاته اخاف يرجع يشرب بس ابدد ماعادهاا ..

يكولي مخبل عاقل وارجع اشرب انتي سويتلي جره اذن اربع اشهر حارمتني منج...

عرفنه رسل جايبه توم ولد وبنيه خطيه فرحتلها والله خوش مره وحبابه ..

ع الاربعين ورجعت حبلت وجبت بنوته سميها رحمه ..
تخرجت بس ماكو تعيين كعدت وسكتت ...

حياتي بلمرتبه الاوله اطفال اهتم بيهم ..

المرتبه الثانيه ابو اطفالي لازم اله حصه حبيبي يحب يشوفني مهتمه بنفسي واتحضرله يجي يلكاني عروس اله ..

من جبت بنتي وخلصت الكلية كعدنه ابيت وحدنه ..

الحمدلله عايشه بسعاده ويه حبيبي واطفالي ..
ماكو حياة تخلي من المشاكل تصير مشاكل بسيطه خاصه فرق العمر بيناتنه واختلاف العقليات
بس نتلافاها ماكو لليله تمر واحنه متزاعلين لازم تالي الليل اذا هو غلطان يجي يصالحني واذا اني غلطانه اروح اصالحه مرات اثنينه نركب روسنه وكلمن يكول لروحه اني ماغلطان نام بس نصحه نص الليل واحد حاضن الثاني ..

النهايه ..
&&&&&&&&&&&&&&&&&
  قصه تتحدث عن الصبر ربنه لازم يجازي الانسان اليصبر ومايقطع الامل

رسل صبرت ونالت صح ربنه مارزقها من قائد بس اخذت شخص يستاهلها واخذت قسمتها ..

قائد كان قلبه حاكمه وقلبه يمشي صح غلط من حب امراء غير زوجته بس مابيده شي
كان اناني كلش بس اخذ قسمته والله عاقبه باطفال اثنين ماتو وهمه ابطن رسل بس الله رزقه من قمر اثنين ...

قمر عشقت وحبت قائد حب صادق مابي دغش بس انخدعت وانكسر كلبها وكانت متهوره ماتعرف تتصرف من بدايه حبها لقائد بس نالت قلب قائد
والله قاسمه من قسمتها واخذته ..

الى اهنا واتنهتي قصه عشق ولكن اتمنى كانت خفيفه ضل وعجبتكم  التقيكم بقصه اخره وان شاءالله تنال اعجابكم ..

الى القاء بقصه اخره ..

#Akbal_mahameed