خيال الكحيلة

بارت الرابع

الرابع

مسائكم مسك وياسمين ..❤️

#خيال #الكحيلة

#بقلمي_نشوى_السلطان
🧚‍♂️

دكيت على شيخ سلطان علما انكطع وماكو
ياربي هسه وكتك هسه چنت تحچي وين رحت..
رجع اتصل عليه رديت بدون سلام كلت الو استاذ شبي بابا الله يخليك والله بابا مظلوم ماعندو سوالف داعش الله يخليك بدون ماحس على نفسي.. ..گمت ابچي.. بهالاثناء
سمعتو يكول لناس يمو من رخصتكم...وشويه جان يگلي ول يابه شبيج ؟؟ كتلو ابوس ايدك بابا شبي شنو صاير بالقضية..احجي وابجي گمت افكر بحزتها خاف السكر صعد خاف بي شي... واني ابچي  تلخبطت كل افكاري هو سكت حسيت جر حسرة كال
سلطان__ما كالج خالج ؟؟
كحلاء__لا شكو الله عليك احچي
سلطان__ابوچ متهم بقضايا تفجيرات وقضية اختلاس اموال والمحكمة مالتو اسبوع الجاي ومتخربط بالسجن

كحلاء__بدووون وعي صحت لاااااااا بااااباااا عزززه لااااا والله ماعندو هيج سوالف والله مايكدر يذبح طير مو انسان احجي وابجي 

سلطان__كحلاء الووو تسمعيني
كحلاء__اي استاذ اسمعك احجي وابچي ...

سلطان__لا تبچين باجر اني رايح بنفسي دحگي الا مايطلع اكو غلط ان شاء الله سهله بس لا تبچين وعد رجال باجر تسمعين اخبار حلوة

كحلاء__والله خايفة والله ليش هيج صار

سلطان__جر حسرة وكال عوني بالله خير كومي غسلي وباجر من الصبح بس خل تصبح الدنيا  اني يمو وخالج وياي  تسبعي صيري سباعية لا تبجين

كحلاء__ لا راح اسكت  والله
سلطان__عجل اعوفج ترتاحين
كحلاء__استاذ ممكن طلب؟؟
سلطان__امري
كحلاء__مايأمر عليك ظالم..اريد اروح وياكم اشوف بابا الله يخليك

ضحك  بصوت عالي كال  ماتريدين اخليج تباتين يمو ليلة ؟؟
كحلاء___علواااااه ياريييت
سلطان___ اكضبي روحج يابه 

كحلاء_ليش والله اتمنى اشوفه 
سلطان_ لا يابه اكعدي جم يوم ويجي عدكم 
كحلاء__عجل شلون والله اهجس گلبي نار
سلطان__ول افهميييييي...اسمعي اليوم شنو من الايام ،؟
كحلاء__اليوم سبت
سلطان__احسبي للخميس لو الجمعة بالزايد ابوج بالبيت هااااا عايل ؟؟

كحلاء__انطيني كلمة رجال
سلطان__كلمة رجال من هين للخميس اذا ماطلع اني فلا اكعد بين الزلم...  بس سالفه روحة السجن موراهمه ...
لو انتي شتشوفيها..!

كحلاء__حشاك شيخ محشوم.. خلص ماراح اروح داحجي وجان اسمع صوت احد يمو يدك الباب كال سلطان تفضل
صاح واحد كال  شيخ الجماعة گامو رايحين
سلطان__اي جاي لحظات
كحلاء__اسفة عطلتك
سلطان... لا ماصار شي... 
كحلاء شكرا اخذ راحتك 
سديت الخط ومسحت دموعي تنفست حيل عدلت نفسي ونزلت جوه لكيت امي تبجي وتدك على رجليها وخالتي وسراب ولمياء مكابليها ويبجون دورت خالي لكيتو يخابر تقربت يمو سمعتو يحچي مع احد عرفتو محامي من خلال كلامو ... ياربي روحي مفرفحة مدري شبيه .. افتر هين وهين...

رجعت طبيت للربعة رحت كعدت يم  امي تربعت وكعدت كلتلها والله ماما يطلع خالي  باجر يروحوله حضريلو اكل ولبسو والعلاج كالت ان شاء الله يارب الله ما يقبل بالظلم
كامت خالتي كالت يلا احنا هم نروح ماظل وكت سلمت علينا وراحت هي ولمياء وراح خالي يدرجهن الطريق .. اني متربعه وكاعده اهجس الحايط البسدي واكع على راسي... صفنت اتذكرت وعد شيخ سلطان... كلت لا مدام وعدني يعني ابوي يطلع
عفت امي متمددة بالهول وسراب بالغرفه ..كمت صعدت الغرفتي
عيني عالتلفون.. كلامة من اسمعه يطمني،..
تمنيت اتصل واسمع سوالفه ورجعت حاجيت روحي
شبيه بس اريد اخابر... اثگلي كحلاء عيييب ..
زلمة معروف واله  منصب بحال زعطوطه مثلي..
شداسوي اني .. طميت روحي ... وكعدت كبال المرايه ..
كمت امشط بشعري... هناااك وجان اتذكر الحذاء .. كمت اضحك مثل الخبله واني وحدي بالغرفه... صديت الشحاطه كبالي صارت..
ياربي شكبرها هاي.... اكيد مالت حرمة ضخمة..  مر الوقت
جيت فتحت كتابي ... اريد اركز بشي ماكدر دماغي وافكاري مخربطه ابويه شلون ياربي..
اني اتيه بدونه .. اويلي .. يعني ابقى على ايد
ذياب.. يمكن اموووت.. شلون اگدر اعيش بدونه
رفعت راسي .. ودعيت من گل گلبي ربي يفرج  عنه
تمددت بفراشي بقيت افكر لحد ماغفيييت ...
كعدت الصبح على حس المنبه ... اووف وقت الجامعه
والله ولا اكدر اشيل روحي ولا الي خلگ ادرس..
ارفع راسي من المخده وارجع اتمدد
اخ دتفوتني دروس لازم اكوم
كمت الحيلي.. صفنت
تذكرت الدروس والمحاضرات وهوسة الجامعه
حسيت ضاگ صدري..
رجعت تمددت .. كلت ماداوم والي يصير خل  يصير..
نمت وگعدت ساعه عشرة ونص .. الصبح
فتحت الشبابيك والستائر ونزلت...
طبيت للحمام وغسلت داانشف..

سمعت صوت جدتي تحاجي امي...
علگت الخاولي وطلعت...
لگيت امي تگلم بالبامية ..
وجدتي متربعه وكاعده قريب منها ..
اسمعها اتكول.. والله ذياب مايعوفها
ويگول ان شفتها طالعه الباب اكسر رجليها
وهي تحجي اني قاطعتها.. سلمت ..
كتلها جده .. سالفه ذياب ماريد اسمعها..
اذياب واني مانتوالم  ابددد
جان امي تكول سدي السالفه مو وكت خطبات ابوج بالسجن
احنا بيا حال..!
صديت على  جتي ضاجت من حجت امي
عفتهم وشلت ااقوري حميت الجاي.. وكعدت اتريك.
وهمة يسولفون .. كمت حطيت الصينية ع الكاونتر اخذت المكناسه
وطبيت للهول ..

بديت اكنس .. دحكت عالساعه .. 11

خالي ماموجود  رايح للسجن يودذي غراض ابويه و .. سراب بالمدرسه.. كنست الهول وعزلته..
تبرمت وطلعت للطرمة  شلت الصونده .. اريد اغسل البره..
توني فاتحة الماي... وجان يندگ الباب.. صحت منووو ..

_ ذياب ... يعني منو اني ذياب... كتله فوت ...

كطيت الصونده وطبيت اركض للبيت لان بدون حجاب..
جان يصيح .. عليش طبيتي هو بقى .. گووو..اا ... ماشفج مفرعه

مارديت عليه.. حسيت بي فات يمشي ورايه.. الحجاب معلگ يم الباب سحبته لبسته ... نداريت لين هو بوجهي .. ضخم طويل بطوله ساد الباب .. كضب ايدي بقوووه .. عيونه حاطهن بعيوني وهو خازني.. حجة بصوت ناصي.. يووولي .. احجي ليش رحتي لبيت العليان.. هااا..؟

_ عتيت ايد بقوه .. ماكدررت اسحب نفسي . كتلو .. يعني نبقى
نعيد ونسقل بالسالفه  عوف ايدي

ذياب.. جاوووبي ولا تتهربين تره اعرف الي تخططين اله

_ شبيييك شخطط .. عوفني اكلك

_ ذياب... البالج مايجرة .. انسي بيون تصيرين الزلمة  غيري..

_ يعني عجييييييب شلون تتقبل انسان بحياتك مايحبك
يعني داكولك ماااريدك موبيدي يعني شلون اجبر نفسسسي

_ هاااااااه .. ماتريديني لازم هي احبك وماحبك  الظاهر صدك
حاطه عينج على زلم العلياااااان .. ولج تبقين بالبيت لما يغزيج الشيب واتزوج .. وماخليج اتزوجين خاف عباااااااالج

_ يااااعليان انت شبيك كافي تخبلااااات زلم العليان بحالي .. على صياحي وصياحة جت امي تركض وجدتي اتوجهه العوجيه ..
صاحت امي... عوفها تره ماصارت يوميه طلبه شبيك وياهه

ذياااااب ... ماعوفهاااا بنت عمي اريدهااااااا ومحد اله دخل...

كحلاء.. ادحك عليه عيونه تريد تطلع من مكانهه وجهه احمر محموق.. ويصيح ... من شفته هيج بقيت ساكته وهو كاضب ايدي ويصيح بوجه امي ... جت جدتي وضربت ايده بالعوجيه ..
صاحت عوف البنت يوووول .. شو عوفهاا...

ذياب.. جدتي خليج محظر خير .. اني گلبي متحمل عليها..

كحلاء... هو يسولف وصادد عليها  سحبا نفسي بقوة ركضت وكفت وره امي... كتله انت مريض والله مريض...

صاح من  مكانو علييييينن يولي....انهزمتي موو خل تكضبج ايدي
والله لمو جدتي هين وعمتي... جان عرفت شلون اتصرف وياج

_ يحجي هو واني عيني على  ايدي .. شلون مرسومه اصابيعه ..
كتله شتريد تسوي سوي... بس تحلم اصير بيوم الك...

احلم مو... ولج واله غصب اخذج .. واكسرو لخشمج ...
وارد شوف منهو يجي ايتقدم غيري خاطر افلعوو فلع ...

_ عفت امي وصعدت عالدرج ركض هو يصيح وامي تصيح
وتكله عيب عليك يوميه هاد شبيها بنتي.. شنو شفتها طالعه من الطريق تره مايصير هيج حاجي عمتي... تره ماكو زواج غصب
وابوها موهين .. كافي يوميه هاد .. لا تخليني اللبس عباتي وتعنى على الولد....

_ صحت من مكاني وهو يدحك عليه كتله خلي يمه يسولف ..
شبيج مهتمة ... عوفي...

_ صااااح هااااا عوفي ... لازم اني موبعيييينج ... ولج
حدري تعاي هين كبالي...

_ من شفته كام يصيح وتقرب عليه.. ركضت الغرفتي..
اني اركض وسمعت جدتي تصيح تعاااااال حدر يول...

هاي بنتج ماتكدر تكضب اللسانها.. يعني الا تسويلنه بلوه..
طبيت طبكت الباب.. عليه اريد اقفله .. وجان يدفعه ... طب

كضبني من اديه الاثنين لوووواهم ليوره.. اني اعيط وجدتي وامي جوه بصيحن عليه... دحكت بعيونه واني اتألم ... واديه لوره اثنينهم .. كتله شبيييييييك ... ماكاااافي عاد شبييييك ...

بقى ساكت وصافن عليه .. اني اعت  بديه واعاتج ( اجرجر)
بنفسي ماكدرت.. اتذكرت ابويه بحزتها كلت لو هو هين ما مد ايدو

عليه ...عيوني من حالهم گامو ..، دحگ علية بنظرة .. غريبة ..
شافني اتوجع.. دحگ بعيوني  حسيته يريد يحجي شي... هد ايدي
بدون مايحجي عافني وحدر...  بقيت بغرفتي مانزلت .. حدر هو وجدتي  تصيح عليه تكله ها شسووويت الها .. خمو ضربتها يحاجو
لكن ماجابوهم .. سمعت باب البره انلطخ بحيييل.. مسحت دموعي
وحدرت واني افرك بديه.. صاحت امي ها شسوالج.. حدرت وكعدت غادي منهم .. كتله ماسووووه شي . شلت التلفون

جان تكول جدتي،. يحبها مايكدر يضربها .. يستخطيها

وفعت راسي عليها كتله جده ياحب هذا .. شتحجين انتي
هذا مو حب هذا دماااااار

_ اي يايمه ايكولج اللبسي لبس راهم ماتسمعين الكلمه
يكولج عوفي الجامعه ماتقبلين.. يعني شيسويلج حگوووا

_ كتله يعني حگو يهين بيه ويضربني ويصيح عليه .. والتالي يعني
اني ماريده هيييييييي گوووه ...

ليش يمه ليش ماتريدي شو طول وشكل واخلاق وابن عمج بعد شتريدين تره شوفي لمو ينغار عليج ماسوه هيج

جده تره هي نفسسسسسسيات مو بيدي يعني ماكدر والله  شوكت تفهمووووني ... عفتهم وطلعت للطرمة .. كعدت بالحديقه

عالمشراگة تشمست شويه .. وصنه تجيبني وصفنه توديني
شلوو مااصفن بعيد ترجع تاخذني الصفنه واتذكر  سلطان..

شبيه يربي .. ماريد يجي على بالي.. كمت كلت خل الهي نفسي شويه كمت فتحت الماي وبلشت اغسل بالطرمة .. شويه وجان ينفتح

الباب ..  جان تفوت سراب ..صاحت ... هاااااا يولي امي شركبت غده .. كتله ولج ماتولين عن وجهي اني انتظر خالي وهي بالها يم بطنها دفوتي جوه وكطي حذائج بره ...

سراب.. ولج كحلاء جووووووعانه جوعاااااانه ... الله هاي ريحتيش بانيه  مووووو خل الحگ اكل ..

كحلاء.. دحكت عليها كلت ياريت عندي گلب مثلها.. شلت الماسحة وكعدت انشف  بالبره.. .. كملت رجيت الماسحة عالحايط .. جان يطب خالي .. كال سلام عليكم

رديت هلا خال بشرررر  صحت يمه جة خالووو

_ ادهام .. واجهت الوالد ... تعاي خل جوه اسولفلج ...

طب يمشي واني طبيت وراه .. كعد وكعدنه يمه كلنه ..

كال .. الحمدلله ابو كحلاء زين ويسلم عليكم .. وديتلو الدوه والهدوم
بس ماخلوني افوت شي .. خليتهن يم العسكري كتلو حاول تفوتهم

_ كحلاء ... عليك الله خالو خمو مريض اححي الصدك

_لا اا كتلج الحمدلله زين بس شوي شعرو عالي .. كال جيبولي جكاير طلعت اشتريتله الجكاير .. والله لمو شيخ حامد العليان وسلطان .. ماايخلون بشر يعبر ليمه .. بس الزلمة ماقصر ..

كالت امي .. ريتهم طبيبن الله ينطيهم ... زين مافتهمت شي عن قضيته شوكت يطلع..

جدتي كاعدن تباوع سمعت لمن كال توسطولنه بيت العليان  بقت ساكته ماحجت شي.. ..  

ادهام.. والله لحد الان مافهمت شي الضباط مايتحاجوون..
بس خابرني شيخ سلطان كال مرني اعتقد اخذك لجماعه وروحتنا تبشر بخيرر...

كحلاء... بخزتها تفطنت لمن كال احسبي للخميس هو يمج ..
كلت هو كال من هالشارب.. يعني الزلمة ديمشي وماقصر..

كالت جدتي يالله بلجي الله خير... 

لمن عرفت ابويه بخير وخالي طمني عليه حسيت ملكت الدنيا كلها
ماصدك يجي يوم وترجع لمتنه وابويه يكون يمي...  

كمت للمطبخ صبيت الغده وتغدينا ... للعصر
كالت امي خدريلنه جاي .. خالي كال راح افوت اسبح الزلمة راح

يمر عليه جهزيلي الحمام خيتي.. كمت اني  .. طلعت كعك خدرت جاي ومدري شبيه مخبوصه واني بالمطبخ عيني عالباب.. كل

مااسمع هورن سياره اكول جة شيخ سلطان...
بحزتها جنت لابسه كلابيه  سوده بيها احمر بالردن وشعري رافعتو ذيل الحصان .. افتر بالبيت واعدل .. وارتب .. وعيوني عالباب..
طلع صاح خالي كال يولو المنشفى وين ..هو صاح وجان اسمع هورن بالباب وسياره طبكت.. صديت باوعت عالباب اريد اشوف
وجان تلفون خالي عالشحن يدگ .. ركضت قريت الأسم

سلطان العليان يتصل.. يابة اهجس عضمي ترجف رجف
ادري شجاني اثولت .. بسرعه رجعت التلفون عالشحن وصديت جدتي كالت منو هذا يولي... كتلها هاا... هذا .. هذا هذا ...

صاحت سراب سالمين كحلاء...؟

كتله شمدريني منووو.. عفتهم ودحكت من الباب.. كتلهم سياره بيضه عاليه طابكة... صاحت جدتي اكفي لا تطلعين خل خالج يشوف منو .. كتله لا طبعا ماطلع ...
طبيت للمطبخ ركض طفيت الجاي... وفتحت الشباك اريد اشوف منو ماكدر .. سحلت الكرسي وصعدت فوكاهه ... دحكت السياره طابكة وسلطان مرتجي عالسياره والتلفون بيده  .. يبووو وينج مريم
الحگيلي...  ربي معقول بيت العليان كلهم هيج شخصيه .. جت تركض سراب كالت وين صاعده حدري يولي لا تكعين ..
كتله ها اي بس صار عندي فضوول اشوف منو ..
كلت هاي مفضوحة بسرعه حدرت .. وكمت ارتب بالاستكانات
سمعت حس خالي طلع كال بسرعه الحذاء وين الزلمة عالبال واكف
طلعت امي كالت وينه خل ينزل .. عيب خل يشرب جاي

دهام.. الزلمة عندو شغل مو مال ينزل  ول كحلاء وينوووو
الحذاء..

كتله اي خالو جايه ... طبيت للغرفه طلعت الحذاء وطلعت
ديلبس بالحذاء امي لفت حجابها زين كالت راح اطلع عليه اسلم عجل يركض بشغله ابو كحلاء مانسلم عليه .. صاحت جدتي حك اي والله
كامت وهي اتوجة عالعوجيه ... طلعت وراهه .. اني مشيت وراهم وكفت بالطرمة .. سمعت امي وجداي يسلمون عليه .. كلتله تفضل اشرب   جاي..

اسمعه يكلله واصل والله بس وراي شغل ماكدر..  تشكرت منه جدتي

كال الها ماسويت شي حجيه وان شاءالله اكدر اساعدكم ويطلع

كالتله والله يابه ضلم اخذو رجل دجاجة مايحل ...

كال ادري حجيه والله صحيح ليش اني ماعرفكم .. سهلة  لا تخافون يطلع ان شاءالله ... اني واكفه ورا الحايط واسمع وسراب اتكمز يمي

تكلي اريد اشوفه واني اسد بحلگها .. طلع خالي يمشي سريع
طلع علية  كالو شعجب ماكو حمايه .. ضحك هو وكاله

خمو كل مرة  ويايه اريد اخذ راحتي شويه .. جاوبه خالي حكگ والله ... جدتي صاحت امانه الله خابرونه يايابه ... وهنااااااك ولين اسمع حس ذياب ...گال يحاجي جدتي ... حركت سياره سلطان ..
واني واگفه بمكاني جمدت .. بدون شعور ضربت على وجهي ..
صاحت سرااااب خير شكوووو ولج

كتلها وخري جة ذياااب ..طبيت امشي اريد افوت جان يدفع باب الحوش وصاح هااااا انهزمتي ..، لازم جنتي واكفه وياه عفته يسولف مارديت طبيت وسديت الباب... وكفت اتسمع وره الباب
يمي سراب تلغي كتله خل اسمع شيحجي لا اذبح...

صاح ..والله مايصير البالج والله .... سهلة عبالج ماسويها واكطع مهر والله الا اكسر راسج ... انعل ابو .. علواااان لابو اهلو

شجابو هذا هيييين ... يصيح وجدتي تسكت بي
امي صاحت عليه كلتله الناس لا تسمع شبيك انت مثل الكبسوله

كل وكت وهاد علينا ماكافي عاد ... شو الزلمة من فزعتنه لومنكم
هيج فلحو ذراعكم وروحو افزعوله بس مكادركم على كحلاء

صاح كال عمتي اني احترمج لا تخليني اطلع من طوري
اسمعي عليه بنتج تكليله الجامعه ما تفوت بعد واذا طبت الجامعه

ادفنهاااااا والله ... راح اطلع كليله هالاسبوع ان ماطلع عمي
خل اتهير بنتج سبوع الجاي اكطع مهرها...كال هيج وطلع
شغل السياره ومشه سرريع والشحيط  مالت السياره لويييين
طلعت لكيت امي تعاتب بجدتي .. كتله شديحجي هذا
كالت جدتي .. عوفي بس ماعليج انتي لا تراددي وهاي الجامعه
عوفيها يايمه لا تعاندي....

جده تحجين صدك هاي السنين الدرستها وتعبت يجي سيد ذياب
يكلي عوفي تعبج وبطلي والله لو يموتني مابطل والله
وها صدك جده كوليله سالفه مهر كطنه وخل يشيلها من اذانووو
كالت راح اكوم اروح على ابو بلجي يسكته ... صاحت على سراب
كالت يمه جيبي عباتي...
عفتهم بره وطبيت جوووه ... شلون خلاني افور هذا
مخبل موطبيعي... كعدت بالهول واني اعصابي نار ..
طبت تمشي سراب ... كالت هسه دوافقي بي وفضيييها
نكضيها طلايب من وراج .. شلت الريمونت كتله تسكتيييين
لو افلشه عليج...
جت امي صاحت كاااااافي هذا البييت بس مشاكل وتالي...
اكعدن ادعن الله يفك اسر ابوج وعوفن ذياب والسوالف...

سحبت نفس وتعوذت الشيطان كتله يمه هسه همه وين راحو

كالت منو خالج والزلمة قصدج...

اي شو كالو راحو علمود ابويه ماكلج وين راح

_ شمدريني يمه وين مايروحون خل يروحون بس كون اكو احبار زينه ...

كمت الحيلي كتلها اليشوف ذياب وين يشوف اخبار زينه
صعدت الغرفتي كعدت اراجع دروسي ... وكل شري ادحك من فوك
مدري ليش متحمسه لجيتهم ...
مر ساعه ومبين خالي ... دحكت شيشيه صبغ الاضافر ..
الله صار شكد مامصبغه.. فتحت الشيشه .. شميت عطر الصبغ
اوووف عشق ريحتووو.. سديته وشلته بيدي وحدرت.. واني عالدرج .. طب خالي يمشي.. حزتها عرفت انو جة خالي وحدي
وشيخ سلطان راح وكالحكت عليه..
كعد عالطخم دينزع بالحذاء صحت ماما تعااااي جك خالي ادهام

تربعت وكعدت كباله ...وجا امي تركض...
كتله بشر خالو شسويتو...

كالو لا الامور حيل زينه .. لا تخافون...

صاحت امي ياااااالله كون يطلع يارب

كتله يعني هالاسبوع يطلع...

ادهام.. مادري والله بس شيخ سلطان خوش ديشتغل شغل
يعني بعد لحد يخاف يطلع ان شاءالله

كتله يارب الله يسمع منك
كالت امي شنو وينه هو لازم راح البيته ..

ادهام.. لا وين خابرو من بغداد .. نزلني بالباب وخابر حمايتو
كال الهم جهزو السيارات راخ يطلع البغداد

كتله عزززه شو هسه شوكت راح يصل...

صاحت سراب ولج وانتي شعليج بي..

صديت عليها اشرتلها بيدي بسيطه...

كال عندو اجتماع مدري شنو بغداد .. ماعرف المهم خابرو بالطريق وانخبص كال لازم اطلع البغداد.. الزلمة ماقصر ويانه والله

كالت امي .. اي والله ينراد نعزمة الزلمة ركض النا جثير

كتله اي يمه خل يطلع ابوية ونعزمة...

مر اليوم ... وجة اليوم الثاني  وهو ماكوخبر عنه ولا اني اكدر اسأل خالي ادهام عنه ... جنت عيني عالتلفون تمنيت يتصل  تمنيت اعرف هو وصل الانبار لو لا .. رغم اني نفسي جنت مستغربه من اهتمامي بي... لكن جان طول الوقت مايفارك خيلتي..
صبح يوم الاربعاء ولازم اروح الدوامي ... كعدت اريد اكوم اغسل مافي لازم اداوم صار كم يوم تاركة الجامعه .. كمت الحيلي شلت التلفون اريذ اشوف الساعه .. انتبهت التلفون جايتني رساله
كلت ياالله خيررر.. سميت بسم الله وفتحت الرساله ..
جة كبالي اسم سلطان العليان... يمة گلبي...
قريت مكتوووب ... (كحيلة باجر ابقي بالبيت لا تطلعين )
ابقي بالبيت ... هين استغربت شنو هيج كاتب وليش .. گلبي احسه انتهى  النوب كاتب اسمي كحيله ... .وينج مريم الحگيلي ... طبيت على الخيارات  انتبهت وقت الرسالة 2 الا ربع
يعني جنت نايمه من الليل دزهااا.. وهسه الساعه 7 ونص الصبح
اكيد هو نااايم.... شرااااااااح يصبرني ...

تتوقعون ليش طلب منها تبقى بالبيت..🙄

وتستمر الحكايه ...

في الحلقة المقبله ....👇🏻
تجرأت اسألو
كحلاء__ممكن سؤال ؟
سلطان__تدللي
كحلاء__منين تعرف خالي ادهام ؟
سلطان... ادهام اعرفه معرفه قديمة ..  ؟
كحلاء مممم فضول عندي اتمنيت اعرف وين تعرفتو   ؟
سلطان عادي كتلج معرفه قديمة...
كحلاء   اوكي اخذ راحتك استاذ...