قولته ليهو إتفضل دي بطاقتك معليش نحن ناس على قدر حالنا وزي م شايف م بتاعين صرف من البنوك وكدة وبعدين م هحتاج ليها كفايهه على جدا قطعهه ارض جدي الرجعت وحالتكك الانت فيها دي،ختيت ليهو البطاقهه في يدو ومشيت وولدي ببكي،ركب على طول ،خالي التاج مشى عليهو م وقف إتحرك على طول ،وصلته جمب الباب قالت لي مستعجل شدييييد ي بتي الله يعدلها عليهو ي رب،دخلنا البيت لقيتهم مجهزين الغداء ،م عارفه بس حسيت براحهه بجد حاسه نفسي خطيت خطوة صح بناء على قراري انا،بالنسبه لواحدة حياتها كلها هي مسيرة فيها اقل قرار تاخدو وتنفذو حتسبو إنجاز بالنسبه ليها ودة الحاصل معي💜اكلته بنفس فاتحه وبعدها قعدته اتونس مع اهلي وبقو يسالوني عن الخرطوم وجوها والعيشهه فيها و....
حتى في النوم نومته مرتاحهه شدييييد م كان جواي اي إحساس بتانيب الضمير او الضيق او غيرو
اليوم التاني صحيت متأخرة لقيت عمتي رحمه بتقول لي عاد دة نوم ناس الخرطوم ينومو للضهر،ولدك دة صحى قبيل حايم من هنا لي هنا،قلته ليها اصلا بتاع شغب هناك بصحى بدري هههههههههههههه،وانا بشرب في الشاي جات هبه تكورك من الباب وتصرخ شهههد ي شهد جات جاريه واخدتني بالاحضان والبكى ،بعدها سلمته على سامي وبقى يسالني عن احوالي ،قولته ليهو زعلانه منك جيت الخرطوم وم جيت سالته مني حتى،
قال لي اعفي لي ياخ والله م كدة بس انا م اديتك خبر م صح اجي من غير اي سابق إنذار🙇قولته ليهو م بيناتنا الحاجه دي ،قال لي خليك من دة اها ولدي وينو ؟عمتي رحمه قالت ليهو من قبيل حايم هنا شالتو عمتي فتحيه مشت بيهو بيتكم ههههههه،قال ليها سمح النمشي عليهم كان ملهوووووف شديد عليهو مشى مستعجل ونحن وهبه بقينا نتونس...
في الجانب التاني صهيب بتكلم في تلفونو"ي جماعه انا في شقتي قلته ليكم انا كويس الحمدلله م عندي عوجه جيت متأخر نزلته في شقتي في شنو؟اي ي حبوبه لا عندي شغل ماشي عليهو ،لو لقيت نفسي فاضي بجي قفل منهم ،حبوبه قالت ليها والله م عارفه الحاصل بينهم شنو لكن الولد دة الفترة الاخيرة دي بقى ماشي عديل خلاص،امتثال قالت ليها اي والله امورو الزمان ديك كلها خلاها وبقى ماشي يبقى زولا مسؤل كلنا ملاحظين للحاجه دي اسي الخوف تاني يرجع لعمايلوو،حبوبهه قالت ليها انتي عارفه البت دي مشيتها اصلا م سااي في حاجه بينهم لكن شنو ي الله ،امتثال قالت ليها والله علمي علمكك ،قالت ليها كدي إتصلي عليها عشان م تقول من ما مشيت م سالو مني اضربي لي نصبح عليها كدي،
عمتي عواطف قالت ليهم غايتو انتو بتدو اي حاجه اكبر من حجمها البت دي بدنت بس عشان كدة كبرتو ليها راسها ،حبوبه قالت ليها ي عواطف الزول ببقى حقاني البت دي م شفنا منها شي كعب يخلينا نتعامل معاها كعب،عمتي عواطف قالت ليها وشافت مننا نحن شي كعب يعني؟
امتثال قالت ليهم خلاص ي جماعه الموضوع م بستاهل نقاش😓حبوبه قالت ليها الزول م يقول النصيحه يعني؟بت مأدبه واخلاقها عاليه وطيبانه وعلى نياتها لكن امك تسمع محاريش بتها ،عمتي عواطف قالت ليها انااا؟قالت ليها بكرة بموت وبياكلني الدود سمعتكم وانتو تتكلمو عشان تخطبو ليهو البت ام شعر مصدي الجات يوم داك دي💔عمتي عواطف قالت ليها ئهه وقامت خلتهم،قالت ليها م بتقدري تنكري شان كدة...
في بيتنا اخواتي الصغار قالو لي م جبتي لينا معاك حاجه،انا طبعا نسيت الحاجه دي وطلعت لي من بالي،في لحظتها بس جاتني فكرة قولته ليهم في شنطه تانيه م نزلت؟قالو لي شنطه؟قولته ليهم انا جايبه شنطتين شنطه حقتي والشنطه التانيه جايبهةفيها حجات م جات كدة فتشو البيت انا زاتي بقيت افتش معاهم ،حبوبه قالت لي خالك التاج جاب دي بس دخلها جوة البيت،بقيت اقول ليهم بإستغراب يعني مشت وين معقوله صهيب م نزلها،قالو لي ماف والله معناها م جات،
خالي التاج لما جا حبوبه سالتو قالت ليهو ي التاج شهد دي عندها شنطه تانيه قالت انتو نزلتو كم شنطه؟قال ليها دي اداني ليها صهيب اظن اتلخم مع ناس الحله الكانووبسلمو عليهو ديلك ونسى ينزلها،قالت ليهو معناها خلاص إتلخم صحي م مشكلهه
عدت الايام وانا بحس بالراحه النفسيه كل افكر في العملتو،رغم إنو تغير الجو اثر على كريم وإلتهب شديد 💔حبوبه وإمتثال كانو يومي بتصلو علي،واحيانا احمد ومرة مرة محمد،م كانو بجيبو لي سيرة صهيب إلا حبوبه احيانا تقول لي مشغول م بجينا طوالي رحل شقتو هناك قال اقرب لشغلو شان كدة،بدينا نجهز في موضوع عرس خالي التاج ودينا قوله الخير وبدينا نجهز في الشيله،لما تميت قريب الشهر خالي التاج قال لي ي بت انتي راجعه متين؟قولته ليهو بعد عرسك يتم💃ضحكك قال لي امشي راجلك دة صبر عديل خلاك شهر لمن العرس يقرب تعالي مع راجلك،قولته ليهو هئهه م بمشي وبجي راجعه تاني وبعدين هو م عندو مشكله ،حبوبه قالت اقعدي قولي م عندو مشكله بكرة ترجعي تلقي معرس فيك الرجال م بحبو الإهمال وطول غياب المرة من البيت م تبقي عويرة😒قولته ليها حبوبه بجد هو م كدة لكن ياااخ وبعدين هو مشغول شديد م عندو وقت للعرس 😂💔عمي التاج قال لي سمح انا بعدين بتصل عليهو وبكلمو لو وافق تقعدي لو حسيت كلامو فيهو رفض بكرة بدري ترجعي،هنا انا خفته قلت يمكن صهيب يستغل الحته دي ويقول ليهو ترجع💔
ونحن جاتنا هبه بالفطور،قعدنا نفطر جات عمتي فتحيه لقتها بالصدفه قاعدة قالت ليها وليييه م بتكلميني دامك جايه؟هبه قالت ليها والله ي عمتي سعد نزلني وكان مستعجل،عمتي فتحيه قالت ليها سعد انا لقيتو حتى شال مني كريم قال بمشي بيهو مشوار وبجي،قالت ليها النبي صح؟عمتي فتحيه قالت ليها عندي الفطور جاهز في البيت امشي بس ختيهو وجيبيهو،قولته ليها عمتي فتحيه ماف داعي الفطور هنا في اقعدي اكلي معانا بس،قالت لي لا والله عامله لي ملاح روب ابيض بعصيدة سمحه خلاص خلي التمشي تجيبهم،حبوبه قالت ليها تقوم من الاكل شان تمشي تجيبهم بالغتي ي فتحيه،عمتي فتحيه قالت لينا خلاص انا بمشي اجيبو،هبه طلعت يدها من الاكل قالت ليها خلاص انا بمشي بجيبو ي عمتي خليك،قولته ليها هبه،قالت لي بمشي سريع وبجي راجعه وطلعت مستعجله بعد م طلعت حبوبه قالت ليها والله م كان في داعي تقومي بت الناس من اكلها ي فتحيهه،عمتي فتحيهه قالت ليها ئهه خليها تقوم ساااي العااقر دي كمان،انا بقيت اعاين ليها ،حبوبه قالت ليها عيب منك الكلام دة ي فتحيه البت لسه جاهله وصغيرة وبعدين الولادة دي قسمه م معروف يمكن ربنا مأخرها بس البت م فيها قول ،قالت ليها ئهه ياخ تلدي شنو تلاته سنه ونص م ولدت عويقر سااااي ولدنا زاتو بنكوس ليهو في بنيهه تجيب ليهو وليد اسي شهد دي جات بعدها ولدت الاخلاق نافعاهو بي شنووو مالنا ومال العاقر دي،طبعا انا كلمتها دي ضايقتني شديد يعني اللفظ في حد زاتو مقزز شديد إذا الحاجه م نزلت من عند ربنا بأي حق نحن ك بشير نعتبرها مقياس لشخص الزول او نستخدمها كإساءة ليهو؟حتى نفسي إتسدت من الأكل غير كدة هبه زوله مسكينه وطيبانهه وعفويهه شديد يعني الكلام البتقولو عمتي بضهرها دة م حبابو وم برضي زول💔قمته من الاكل حبوبه قالت لي ي بت اكلي قولته ليها شبعته والله ي حبوبه،عمتي فتحيه قالو عصيدتي م اكلتيها ي بتي ،قولته ليها م مشكله ي عمتي خلو لي منها باكلها بعدين اسي بطني إتملت،ضحكت قالت لي إتعودتي على اكل ناس الخرطوم شكلك لكن الخرطوم دي تاني ماف ليك،قعدنا نضحكك جات هبه داخله قالت ليهم معليش إتاخرته عليكم،هاك ي عمتي جبته ليك معي الدواء بتاعكك عشان تبلعيهو على طول بعد الفطور،بقيت اعاين لي هبه واقول سبحان الله شوف هي عفويه وبتفكر كيف وعمتي بتفكر كيف،
خالي التاج بتكلم مع صهيب قال ليهو "إتصلته عليك بدور اقولك البت دي طبعا جات وحسب شوقها لينا وكدة قعدتها طولت خلاص معانا لكن نسوي شنو كل م نقول ليها ارجعي البت مكنكشهه وحالفه تحضر عرسي اها انا ضربته اشوفك عشان لو قلت نرجعها نرجعها ليك باكر طوالي،صهيب سكتت مسااافهه و قال ليهو شهد قالت ليك كدة؟قال ليهو اي،صهيب قال ليهو م عندي مشكله انا خليها تحضر العرس بعدين نشوف البحصل شنو،خالي التاج قال ليهو متأكد ي ولدي؟صهيب قال ليهو اي ي خال بدل م ترجع وتاني ترجع عندكم هناك وتبقى ليها سفرتين خليها تحضرو بالمرة احسن،خالي التاج قال ليهو ايواااا اسمع ي ولدي انتو بينكم ماف اي مشاكل ولا حاجه صح؟صهيب قال ليهو ابدا ي خال ،خالي التاج قال ليهو الحمدلله ي ولدي اها العرس نحن حددناهو ي ريت تكلم الوالد وتجو كلكم معزومين يوم 24في الشهر دة كويس،قال ليهو ابشر ربنا يتم على خير إن شاءالله سلامي لي حبوبه وباقي العمات،خالي التاج قال ليهو يصل إن شاءالله...
اليوم التاني ونحن بنرتب في شيله خالي كنا ملمومين كتار والونسه جابت الونسه وهبه تلعب مع كريم وتتجارى معاهو وتمسكو وكدة،عمتي فتحيه قالت ليها م تجري معاهو كدة الولد دة م بستحمل اسي بقع،وكريم ولدي لايوق هو البجرها وبقومها من محلها،قولته ليها اللياقه حقت ولدي قام وقع والوقعه دي إتضرب في راسو وقام يبكي في اللحظه دي قامت عمتي فتحيه وبي نهرة قدام الناس قلعت كريم منها وقالت ليها م قولته ليك م تشيليهو الولد دة اسي ياهو انضرب بسببك جاريه بيهو جاي وجاي التقول غنمايه انتي شن عرفك بلعب العيال كمان 💔هبه قالت ليها عمتي انا م قصدي والله هو البجرني شان اللعبو،شلته كريم قولته ليها م حصل شي هو اصلا بقع كدة راسو الكبير دة،قالت لي شوفي الولد دة ببكي كيف وتقولي لي م حصل شي ،كيف م حصل شي انتي الولادة دي شي هين لمن مستهينه بيها كدة خليها هي شن عرفها بالولادة كمان،هبه دي ملامح وشها لمن إتغيرت بس اخدت الموضوع عادي وقعدت مع الناس،وكريم سكت والناس رجعت تتونس عادي،واحدة من جيرانا قالت لي شهد ارجعي اتحسبي اليومين دي وإتدخني مش راجلك جاي العرس،قولته ليها والله م معروف لغايه اسي،واحدة قالت لي الخرطوم بقتك سميحهه والجسم إتملى حبه ناقصاك الحنه والدخان بس،ضحكتهه قولته ليها صحي،التانيه قالت ليها من يومها سميحهه مرت سعد ربنا يرحمو كان قبيل ناس شيخ الطيب ديل بفكرو م كان ودروها من يديهم وعقلوها لي واحد من اولادهم ،عمتي فتحيهه قالت ليها ايا والله كان قبيل فكرنا كان عقلناها لي سامي ولدي منها يربي ولد اخوهو ومنها تبقالو ام الوليدات،انا طبعا قلعتهه عيوني وهبه نفس الشعور والجو إتكهرب،عمتي رحمه قالت ليهم اجي تعقلوها لي راجل صاحبتها م بالغتو فيها دي؟عمتي فتحيهه قالت ليها مالو صحبات ويعيشن في بيت واحد دي احلى حاجه كمان الفي شنو والماف شنووو؟انا الموضوع م عجبني طوالي دخلته الاوضه حقتي ورسلته ايات اختي نادت هبه،قولته ليها تعالي نقعد هنا مالنا ومال ونسه المخرفات ديل،قالت لي سمعته كتير وبلعتو ي شهد في اي مكان بتعمل لي حركاتها دي وإسلوبها دة ،جنى انا ربنا م اداني ليهو اعمل اجيبو من وين يعني اخلقو؟قولته ليها م تركزي يااااخ عمتي عواطف دي م عندها موضوع حتى انا وسعد الله يرحمو برضو كانت بتعمل معانا كدة في النهايه خلتنا،قالت لي انا والله بسببها مكان التجمعات بقيت م بمشي او المكان الهي بتمشيهو انا م بمشي ي شهد عشان بتسمعني كلام م في محلو وبدون مناسبه،قولته ليها هبه خلاص م تبكي عليك الله ياخي انتي مش عندك سامي؟م عليك بالباقي طالما هو متمسك وم داير غيرك،قالت لي انا سامعه وعارفه تحت تحت دايرين يعرسو ليهو وبفتشو ليهو في عروس وانتي عارفاها كلامها ماشي على اولادها واكيد حتقول ليهو كان م عرسته م عافيه ليك وهتخليهو يعرس فيني وبقت تبكي وانا بهدي فيها😭
بالليل وانا ماسكه تلفوني ومتضايقهه من الموقف وفي بالي بقول لو سعد كان في كان حسم امو من البتعمل فيهو دة😭💔 طبعا عندي واتساب بس م شغاله بيهو كتير قمته فتحتو ودخلته محلات الحاله وكتبتهه فيها "
والله من يوم الرحيل لاشوفتك السحمه اتلقت ولا شوفنا من بعدك حنان الشوق يزيد يزيد يزيد و النار تقيد ...💔"
شويه كدة رسلت لي إمتثال وقالت لي "هو كمان نفس الشي وعلى اسوأ كمان بس ليس كل من سمع كمن رأى للأسف💔"
طبعا انا استغربته من رسالتها لاني م قاصدة بيها صهيب انا قاصدة بيها سعد😢💔
شويه كدة رسل جاتني رسالهه من احمد فتحتها لقيتو مرسل لي صورتين واحدة لصهيب ومعاهو كريم قال لي شوفي الفرق بين الصورتين ديل فارق الزمن بينهم شهر بس اتحول من زول مبتهج ومستكين زي م في الصورة الاولى مع كريم لي اله بتاعه شغل بس حتى ملامحو بهتت حرفيا ي شهد صهيب إتغير شديد مفروض انبسط واقول ليك إتغير للاحسن لانو بقى زول شغل ومسؤل بس انا عارف الفيهو عشان كدة م عندي قلب انبسط بيهو💔رديت ليهو بضحكه قولته ليهو مالو اسي في شنو؟إختلاف ازمان بس هنا هو كان عاطل وهناك زول شغل واكيد الزول الشغال م زي الزول العاطل م تعملو من الحبه قبه سااي😂💔
على طول دخلته عدلته الحاله وكتبته عليها "والله من يوم الرحيل لاشوفتك السحمه اتلقت ولا شوفنا من بعدك حنان الشوق يزيد، يزيد يزيد و النار تقيد،ربنا يرحمك ويجعل مثواك الجنهه سعدي...💔
كريم ولدي كان في بيت ناس جدو والزمن إتاخر قولته لي حبوبه بكون نام بالليل لو صحى م لقاني جمبو ببكي حامشي اجيبو واجي،قالت لي سمح امشي طلعته مشيت على بيت ناس عمتي لقيت باب الشارع فاتح دخلته ،هم عملو فاصل في النص يعني بقو بإعتبارهم زي الكأنهم حوشين مفصولات نفس حركه بيت ناس حبوبه الجزؤ الجمب الباب حق الرجال والبهناك حق النسوان،لما وصلته جمب الحيطه سمعته صوت عمتي فتحيهه بتقول"الولد دة تاني م بنديها ترجع بيهو الخرطوم ديك ولد ولدي يتربى في ابوهو هنا بس الحمدلله بيتنا م ناقصو شي،عمي الطيب قال ليها ي مرة هوي قولي كلام معقول نشيل الولد من امو كيف الكلام دة؟قالت ليهو م عشان كدة قولته ليك البت دي احسن نعقلها لي سامي ،قال ليها ي مرة إنتي جنيتي البت مرت راجل تعقليها لي ولدك كيف،قالت ليهو تحت تحت انا حاسه إنو في مشاكل بينها وبين راجلها والا كيفن يخليها الوقت دة كلو عند أهلها وانت زاتك م شايفها جات كيف لا حنه لا دخان اظنهم م اتفقو هناك اها كان الكلام دة طلع صح وفي بينهم مشاكل حدها الطلاق طوالي نعقلها لي سامي طوالي في النهايه اهل راجلها ديل م ببقو احن عليهو مننا،وسامي زاتو روحو ونفسو في الاولاد م شايفو بعمل في ولد اخوهو دة كيف؟ اها دي م اخير ليهو من العاقر العندو دي،رجعتهه البيت وانا قلبي مقبووووض شدييييد من الخبث بتاع تفكير عمتي دي معقوله الانانيهه الهي فيها دي؟معقوله طريقه التفكير العقيمه العندها دب،لقيت تلفوني شبه منور فتحتو لقيت مكالمه من صهيب،إستغربته طبعا لأنو من رجعتو مننا م حصل بالغلط إتصل علي،لاحظته لي إنو في رساله واتساب معلقه ،فتحته الواتساب لقيتوو مرسل هو ،فتحته الرساله لقيت كاتب رد للحاله بتاعتي قايل فيهو "إتصلتهه عشان اقول ليك ربنا يرحمهه ويطيب ثراه إن شاءالله ي رب ...💔
#نتلاقى®