အခန်း(၆၇) ချီရှိုးကျဲ့ဘဝ
သူ့ခမည်းတော်စစ်မှုထမ်းဆောင်ရမယ့်သတင်းကြောင့် လီရွှီယန်း ဟာအလွန်တရာဂုဏ်ယူနေသည်။ တာ့ယန်ကောကြီးမှာ ဘယ်အိမ်ထောင်ရှိ'ကော'ကများ အိမ်အပြင်အလွယ်တကူထွက်လို့ ရလို့လဲ။ စစ်မြေပြင်မှာတာဝန်ထမ်းဆောင်ဖို့ကအဝေးကြီး။ ဖခမည်းတော်ဘုရားရဲ့ခမည်းတော်အပေါ်ထားတဲ့အချစ်ဟာ အရမ်းကိုနက်ရှိုင်းကြီးကျယ်လွန်းသည်။
ဒါကိုတွေးရင်း လီရွှီယန်း မျက်နှာအမူအရာပြောင်းသွားပြန်၏။ ချီကွေ့ကျွင်းဟာကိုယ့်ကိုယ်ကိုယ်သတ်သေရမှာ ဖခမည်းတော်ဘုရားဟာအချိန်မှီကယ်ဆယ်ပြီး ကာကွယ်ပေးခဲ့တယ်။ ဖခမည်းတော်ဘုရား ၊ ချီကွေ့ကျွင်းကိုရောဘယ်လိုသဘောထားတာလဲ။ ပထမတစ်မိသားစုလုံးဖျက်ဆီးတယ်။နောက်တော့ ဇီချန်နန်းဆောင်မှာထပ်မံပစားပေးပြန်တယ်။ ဒါကသိပ်ကိုအပြောင်းအလဲမမြန်လွန်ဘူးလား။ ခု ချီကွေ့ကျွင်းက ဆဋ္ဌမမင်းသားကိုမွေးစားထားတာ သူနဲ့ခမည်းတော်ကိုမထိခိုက်နိုင်ဘူးလို့သေချာရဲ့လား။
လီရွှီယန်း ပူပန်စိတ်နဲ့မျက်မှောင်ကြုတ်လိုက်မိ၏။ ထို့နောက် စာအုပ်ထည့်သည့်သားရည်လွယ်အိတ်အသစ်၊အဖိုးတန်မင်ရည်များနှင့်စာရွက်များအား စားပွဲပေါ်တစ်ခုချင်းချနေသည့် လီရွှီသုန်းကိုကြည့်လိုက်သည်။
လီရွှီယန်းက လီရွှီသုန်းနားလျှောက်သွားပြီးမျက်နှာပေါ်ကလက်ချောင်းရာများကိုကြည့်ရင်းအံ့အားသင့်လေသံဖြင့်မေးလိုက်သည်။ ''ညီတော်ခြောက် ဒါဘယ်သူလုပ်တာလဲ''
လီရွှီသုန်း အစေခံလေးယောက်ကိုသတ်လိုက်တဲ့သတင်းဟာ နန်းတော်တစ်ခုလုံးမသိသူမရှိ။ အားလုံးကသူ့ကိုသူရဲဘောကြောင်သူထင်ထားသော်လည်း ခုခါမှာတော့အစွယ်မြှုပ်ထားမှန်းသိလိုက်ကြသည်။
ချီကွေ့ကျွင်း ဟာ လီရွှီသုန်းစရိုက်မှန်ကိုသိရင်ပိုတောင်တန်ဖိုးထားလိမ်မည်ဟု လီရွှီယန်း ထင်မိသေးသည်။ခုကြည့်ရတာတော့ ချီကွေ့ကျွင်းဟာသူ့ကိုသဘောမကျဘူးထင်ပါရဲ့။
ဒါကောင်းတာပဲ ။
ခမည်းတော်သူ့ကိုအမြဲသင်ပြပေးသည့်စကားတစ်ခုရှိသည်။ အင်အားကြီးသူကိုတွေ့ရတဲ့အခါ ရန်ပြိုင်တိုက်ခိုက်ပြီးမရှင်းပစ်ရ။ အကူညီကောင်းကိုလက်လွှတ်လိုက်သလိုဖြစ်သွားလိမ့်မည်။ အကောင်းဆုံးခြေလှမ်းကသူတို့ကို အယုံသွင်းအမြတ်ထုတ်ပြီးမှ ဖြည်းဖြည်းချင်းသုတ်သင်လိုက်သည့်နည်းပင်။ မင်းသားခြောက်ကခုတန်ဖိုးရှိနေပြီ။ဒါကြောင့်သူသိမ်းသွင်းရမည်။ သူဟာဘာမှမဟုတ်တဲ့ကောင်ဖြစ်နေပေမယ့်လည်း ချီကွေ့ကျွင်းသားဆိုတဲ့တစ်ချက်ထဲနဲ့တင် မင်းကြီးရဲ့နှစ်သက်ယုံကြည်မှုကိုလည်းရနှင့်ထားပြီးပြီ။ ဒါက လီရွှီယန်းအတွက်တော့ တကယ်ကိုအနှောင့်အယှက်ပင်။
လီရွှီသုန်း မေးကိုလက်နှင့်ကာလိုက်ပြီးခေါင်းရမ်းလိုက်သည်။ ''ဘာမှမဖြစ်ပါဘူး အစေခံတစ်ချိူ့ရဲ့လုပ်ကြံခံရတာပါ''
"ဘယ်အစေခံကမင်းသားတစ်ပါးရဲ့မျက်နှာကိုထိခိုက်ရဲလောက်အောင် အတင့်ရဲရတာလဲ'' လီရွှီယန်း က လုံးဝမယုံသက်ပြင်းအသာချပြီး ''နောက်အခက်အခဲရှိရင် ညီတော် အစ်ကိုတော်နဲ့ခမည်းတော်ကိုလာရှာချေ။ အစ်ကိုတော်တို့မင်းကိုပစ်မထားပါဘူး''
ပစ်မထားဘူး? အရင်ကငါလိုအပ်နေတုန်းကမင်းကဘယ်ချောင်သေနေတာလဲ။ ဘယ်ကိုယ်လုပ်တော်သားသမီးကများမင်းနဲ့မင်းအဖေကိုလွန်ဆန်ရဲမှာလဲ။ ဒီနည်းနဲ့ ငါ့ကိုသိမ်းသွင်းချင်တယ်ပေါ့။ တစ်လောကလုံးကသူတို့သားအဖရဲ့ ဂုဏ်ကျက်သရေ၊ ကြီးမြတ်မှုတွေ၊အောင်မြင်တွေချီးမွှမ်းနေကြပေမယ့် သူ့မျက်လုံးထဲမှာတော့ ခမည်းတော်ရဲ့ဖယောင်းတိုင်မီးတောင်ကိုင်ဖို့မတန်ဘူး။
လီရွှီသုန်းကြည်နူးဝမ်းမြှောက်ဟန်ဆောင်နေပေမယ့် စိတ်ထဲကတော့အကြီးအကျယ်ဟားတိုက်နေသည်။ မင်းသားငါးနဲ့သူနောက်ပါးတွေ သူ့ကိုလာအရောဝင်လေ ကြောင်သူတော်ကြွက်သူခိုးစရိုက်ကိုရွံမိလေပဲ။ အရင်ကသူ့ကိုဖုတ်လေတဲ့ငါးပိရှိတယ်တောင်မထင်တဲ့လူတွေကခု တကူးတကနှုတ်ဆက်နေကြသတဲ့။ ဒါတွေအားလုံးဟာ ပစားပေးခံရတဲ့ချီကွေ့ကျွင်းသားဖြစ်နေတာကြောင့်ပဲ။သူဘာမှမလုပ်ဘဲနဲ့တောင်အနာဂတ်ကမြဲနေပြီ။
သူအစေခံတွေကိုအပြစ်ဒဏ်ပေးခဲ့ပေမယ့် မင်းကြီးကိုယ်တိုင်လည်းအခုမှအခြားမင်းသားငယ်တွေရဲ့ အဆောင်တွင်းကိစ္စကိုသိရသည်မို့ အားလုံးကိုစိတ်သက်သာရာရသွားစေတာတော့အမှန်။ဒါကြောင့် သူဟာစာသင်ခန်းမှာနံမည်ကြီးတစ်ဦးဖြစ်နေသည်။
လီရွှီယန်းဟာနံမည်ကြီးပေမယ့် တကယ်တမ်းအတုအယောင်ဖားနေခြင်းကပိုများသည်။ ဘာကြောင့်ဆို သူတို့သားအဖဟာအရမ်းကိုမျက်နှာသာပေးခံရတာကြောင့် သူ့ခြေသလုံးမှမဖက်ရင်ဘယ်သူခြေသလုံးဖက်မလဲ။ ဒါကြောင့်ကြိတ်မုန်းနေရာက ကပ်ဖားရပ်ဖားလုပ်နေကြရသည်။
ချီကွေ့ကျွင်း မိသားစုဟာပျက်စီးပြီး သူ့အခြေအနေကဆိုးဝါးပေမယ့် မင်းကြီးရဲ့အာရုံစိုက်မှုခံရတာဟာ ကောင်းမင်းနဲ့လီရွှီယန်းတို့ထက်မလျော့ဘူး။
.လီရွှီသုန်း ကိုယ့်အဆင့်အတန်းနေရာပြောင်းသွားသလိုခံစားရပေမယ့် ဘာပျော်ရွှင်မှုဂုဏ်ယူမှုမှမခံစားရပေ။ အခြားလူတွေသူ့ကိုဘာထင်သလဲကအရေးမကြီး ခမည်းတော်သူ့ကိုစိတ်မပျက်သွားစေဖို့ကသာအရေးကြီးသည်။ ဒါကြောင့်အတန်းကိုမှန်အောင်တက်ပြီး စာကိုသေချာလုပ်သလို နေ့လယ်စာမဆိုင်ခင်အထိ လက်ထဲကစုတ်တံကိုမချဘဲကြိုးစားနေရသည်။
အစေခံတွေသက်ဆိုင်ရာနေ့လည်စာကိုယူဆောင်လာကြတဲ့အချိန် ဇီချန်အဆောင်ကအစေခံယူလာတဲ့စထမင်းဗူးကတော့အကြီးဆုံးမို့ အာရုံစိုက်စရာဖြစ်နေသည်။
"ဘာလို့အများကြီးလဲ'' လီရွှီသုန်း ငါးလွှာထမင်းဗူးကိုကြည့်ရင်အံ့အားသင့်နေတော့သည်။
"ဒါတွေအားလုံးအရှင်ကိုယ်တိုင်ပြင်ဆင်ပေးထားတာပါ။ သူက အရှင်
့သားဟာအစားကြီးသူမို့သာမန်လူထက်ပိုစားဖို့လိုကြောင်းပြောပါတယ်၊ ဒါကြောင့်မဝမှာစိုးတာနဲ့ဒီလိုထည့်ပေးလိုက်တာပါ'' အစေခံကပြုံးရင်း ထမင်းဗူးလွှာတစ်ခုစီကိုသေသပ်သွာခင်းကျင်းလိုက်သည်။ မွှေးကြိုင်ဆွဲဆောင်မှုပြင်းတဲ့ဟင်းလျာရနံ့တို့က အခန်းတွင်းပြန့်လွင့်သွားပြီး အားလုံးကိုလာကြည့်စေရလောက်အထိဖြစ်စေသွားသည်။
"ခမည်းတော်ကိုယ်တိုင်ချက်တယ်?'' လီရွှီသုန်းလုံးဝ အံ့အားသင့်စွာ မျက်လုံးပြူးနေမိတော့သည်။ ခမည်းတော်ဟာအားနွဲ့ပုံပေါက်ပေမယ့်တကယ်တမ်းအရမ်းသန်မာသည်။ သူ့ကိုရိုက်တုန်းကတောင် အတတ်နိုင်ဆုံးအားကိုလျော့သုံးရိုက်ခဲ့ခြင်းဖြစ်သည်။ ဒီလိုခွန်အားရှိလူတစ်ယောက်က အိမ်အလုပ်တွေတစ်ခါမှမလုပ်ပါဘဲ သူ့အတွက်ထမင်းချက်ပေးတယ်....
လီရွှီသုန်း ပျော်သလိုနည်းနည်းလည်းရှက်မိသည်။ အမှန်ပင်သူသည်အစားကြီးသည်။ အစေခံတွေသူ့ထမင်းကိုခိုးစားတဲ့အခါ သူ့မှာမဝမလင်ဖြစ်ခဲ့ရသည်။ ဇီချန်နန်းဆောင်ကိုပြောင်းလာတော့ ခမည်းတော်ငြိုငြင်မှာစိုးလို့ထိန်းခဲ့ပေမယ့်တကယ်တမ်း ခမည်းတော်ဟာသတိထားမိနေခဲ့တာပဲ။
ချီကွေ့ကျွင်းစိတ်ထဲကသူ့ရဲ့ဖြစ်တည်မှုက ထင်ထားတာထက်ပိုကြီးတာပဲ။ ဒါကိုတွေးရင်လီရွှီသုန်းမစားဘဲနဲ့တောင်အပျော်လုံးဆို့နေပြီ။ ဖြည်းဖြည်းချင်း အစားအသောက်အားလုံးကိုစားပြီးနောက်မှ သူသက်ပြင်းချလိုက်မိပြန်သည်။ အရင်ကဆို အမြဲဆာလောင်နေတာကြောင့်ခြေလက်တွေဟာပျော့ဖက်နေခဲ့ပြီး မြင်းစီး၊လေးပစ်အတတ်ကိုသင်ကြားဖို့ခက်ခဲခဲ့သည်။ယ အခုအခါမှာတော့ သူဟာအဆုံးမဲ့ခွန်အားနဲ့ဖွံ့ဖြိုးစကျားတစ်ကောင်လိုဖြစ်နေပြီ။
ကျောင်းဆင်းတာနဲ့ဇီချန်နန်းဆောင်ကိုတန်းပြန်ပြီး အပြင်ဖက်တစ်နေရာမှာထိုင်လျက်အပ်များဖြင့်အလုပ်ရှုပ်နေသော ခမည်းတော်ဆီခြေလှမ်းခပ်သွက်သွက်ချည်းကပ်လိုက်သည်။
ထိုအမျိူသားကညနေဆည်းဆာရောင်အောက်တွင် အသားအရည်ကဖြူစင်ဝင်းမွတ်နေပြီး ထိကိုင်လိုက်သည်နှင့်ပျောက်ပြယ်သွားမယ့်မြူခိုးများအလာထင်မှတ်ရသည်။ လီရွှီသုန်း မိမိ၏ရုတ်တရက်အတွေးကိုလှန့်သွားပြီး ကြောက်ရွံ့ခြင်းများအစားထိုးဝင်လာခဲ့လေသည်။
"ခမည်းတော်'' စိတ်ကယောင်ခြောက်ခြားမို့အသံကအလျင်စလိုဆန်သွားသော်လည်း ကျိူးယွင်ရှန့်ကမော့မကြည့်။
"ဘာလဲ'' ဟုပြန်ထူးကာ အေးဆေးတည်ညိမ်စွာဖြင့်အဝတ်ကိုဆပ်ချူပ်နေသည်။
"သား...ဆရာကအိမ်စာပေးလိုက်တာ။ သားတော်နားမလည်တာတစ်ချိူ့ရှိလို့ ခမည်းတော်ကြည့်ပေးလို့ရမလား'' လီရွှီသုန်း ထိတ်လန့်သွားသည့်စိတ်ကိုဆင်ခြေတစ်ခုပေးထိန်းချူပ်လိုက်ရသည်။
"ကြည့်ရအောင်'' ကျိူးယွင်ရှန့် က အပ်နဲ့အဝတ်ကိုချပြီးစားပွဲကိုရှင်းလိုက်သည်။
လီရွှီသုန်းကစားပွဲနေရာအလွတ်တွင်စာအုပ်ကိုဖြန့်ချလိုက်ပြီး ဒေါင်လိုက်စာကြောင်းတစ်ချိူ့ကိုထောက်ပြလိုက်သည်။ ကျိူးယွင်ရှန့် က ထိုစာကြောင်းများကိုတစ်ချက်မျှကြည့်ပြီးနောက်ပြုံးလိုက်သည်။ ''မင်းတကယ်ဒါကိုနားမလည်တာလား''
လီရွှီသုန်း က မဆုတ်မကြာခေါင်းညိမ့်လိုက်သည်။
"နို့ဖြင့် ဒီစာကြောင်းအတွက်မင်းရေးထားတဲ့မနေ့ညကစာကဘာလဲ။ ငါ့အမြင်တော့မင်းအတွေးအမြင်တွေကသိပ်ထူးခြားပါတယ်''
လီရွှီသုန်း ကြောင်အသွားရတော့သည်။ မနေ့ကညကသူစာရေးနေတာကိုခမည်းတော်တစ်ချက်သာလာကြည့်ခဲ့သည်။ ဒါတောင်မှ အကုန်လုံးကိုမှတ်မိနေတယ်။ ခမည်းတော်ကဘယ်လောက်တောင်ထက်မြတ်တာလဲ။ ဖခမည်းတော်ဘုရား သာ သူ့ကိုနှိပ်ကွပ်မထားခဲ့ရင် ဘယ်အထိပျံတက်မယ့်ဇာမဏီတစ်ကောင်ဖြစ်နေမှာလဲ။ လူတိုင်းက ကောင်းကွေ့ကျွင်းကို ဇမ္ဗူမှာတစ်လူရှားပါးတဲ့ထူးချွန်လူသားလို့ဆိုကြပေမယ့် သူ့အမြင်မှာတော့ ခမည်းတော်နဲ့ယှဉ်ရင်သာမညလေးသာ။
ခမည်းတော်ဘုရားဘာကြောင့် ခမည်းတော်ကိုလျစ်လျူရှုပြီး ကောင်းကွေ့ကျွင်းကို ဤမျှမြတ်နိုးနေရသလဲလီရွှီသုန်းနားမလည်ပါ။ ခမည်းတော်ဟာကမ္ဘာပေါ်မှအဖိုးထိုက်ဆုံးအရာဖြစ်ပါလျက်နဲ့။ ဒါပေမယ့်လည်း ဖခမည်းတော်မင်းကြီး ၊ ခမည်းတော်ရဲ့အရည်အချင်းကိုမသိလည်းကိစ္စမရှိ။ သူတစ်ယောက်သိရင်လုံလောက်ပြီမို့ လူမသိလေပိုကောင်းလေပဲ။
ကျိူးယွင်ရှန့် ကတော့ ဝံပုလွေပေါက်လေးသူ့အပေါ်စုံလုံးကန်းကိုးကွယ်ယုံကြည်နေပြီဆိုတာကိုမသိရှာ။ အကောင်ပေါက်၏နားရွက်ကိုဖျက်ခနဲလှမ်းဆွဲလိုက်ကာ ဒေါသမပါသည့်လေသံဖြင့်မေးလိုက်သည် ''တော်ဝင်စာသင်ဆောင်မှာဆရာမေးတိုင်းနားမလည်ပါဘူးလို့ဖြေနေတာမလား''
လီရွှီသုန်း မညာရဲ ခေါင်းအသာညိမ့်ဝန်ခံလိုက်သည်။ အနိုင်ကျင့်ခံရသည့်နှစ်များအောက်တွင် ကိုယ့်ကိုယ်ကိုယ်ချိူးနှိမ်ထားပြီးအရည်အချင်းကိုဖွက်ထားခဲ့သည်။ထုတ်ပြလိုက်ရင် အခြားကိုယ်လုပ်တော်များကသူ့အသက်ကိုရန်ရှာလာမည်မဟုတ်လား။ သူအသုံးချခံလက်နက်တစ်ခုမဖြစ်လိုပါ။
ဒါပေမယ့်ချီကွေ့ကျွင်းကတော့ သူဟာဘာတန်ဖိုးမှမရှိတဲ့အချိန်မှာသူ့ကိုရွေးချယ်ခဲ့ပြီး ကာကွယ်မည်ဟုကတိပေးခဲ့သည်။ ချီကွေ့ကျွင်း သူ့ကိုချစ်ချင်ယောင်နေရင်တောင်မှ၊အသုံးချဖို့တွေးထားတယ်ဆိုရင်တောင်မှ လီရွှီသုန်းအနေဖြင့်ခမည်းတော်အတွက်သာဘာမဆိုလုပ်ဝံ့သည်။ သူစိတ်ပူတာက အသုံးမကျသေးတဲ့သူ့ကိုခမည်းတော်ပစ်သွားမည်ကိုသာ။
ကျိူးယွင်ရှန့် အကောင်ပေါက်၏နားကိုလွှတ်လိုက်ပြီး ''အရှိကိုအရှိတိုင်းနေ။ ငါ့မှာကျောထောက်နောက်ခံမရှိတော့ပေမယ့် ငါမင်းတစ်ယောက်တော့ကာကွယ်နိုင်တာမို့ဘယ်သူမှမင်းကိုမထိခိုက်စေရဘူး။ မှတ်ထား ငါ့သားဟာနတ်ဆိုးလည်းဖြစ်လို့ရသလို နတ်မြတ်လည်းဖြစ်လို့ရတယ်။ ဒါပေမယ့် အထုထောင်းခံတော့မဖြစ်ရဘူး။ မင်းထွန်းတောက်လာလို့ လီရွှီယန်းနဲ့ကောင်းမင်တိုက်ခိုက်လာရင်တောင် ငါ့မှာသူတို့ကိုရှင်းပစ်ဖို့နည်းလမ်းရှိပြီသား။
ခမည်းတော်ရဲ့အသံကြည်လင်သာယာလွန်းပေမယ့်လို့ ကြီးမားတဲ့အားအင်တစ်ခုပါဝင်နေသည်ကိုလီရွှီသုန်းခံစားရသည်။ ထိုလေသံကမည်သူတစ်ဦးတစ်ယောက်မှသူရှေ့ပိတ်နေလို့မရသလို ထိုအင်အားကသူ့(လီရွှီသုန်း)ကိုကာကွယ်ဖို့သက်သက်ရည်ရွယ်ထားသလိုလည်းခံစားရသည်။ လီရွှီသုန်း အပျော်လုံးဆို့ပြီး ကျိူးယွင်ရှန့်ဝတ်ရုံစကိုဆွဲကိုင်ကာခေါင်းညိမ့်လိုက်သည်။
"အဲ့လိုအသုံးမကျတဲ့လူမျက်နှာပေးမျိူးမလုပ်နဲ့ ခုချက်အဲ့စာကြောင်းကိုအကြိမ်တစ်ရာကူးချေ။မပြီးမချင်းမအိပ်ရဘူး။နောက်ဆိုတကယ်နားမလည်မှမေး။ မဟန်ဆောင်နဲ့'' ကျိူးယွင်ရှန့်ဟာ လီရွှီသုန်းကိုအနာဂတ်မင်းလောင်းအဖြစ်လျာထားတာမို့ပဲ့ပြင်ဆုံးမသည့်အခါလည်းညှာနေလို့မဖြစ်ပေ။
လီရွှီသုန်း က မရှက်မရွံချက်ချင်းကိုစာရွက်နှင့်မင်တံ၊မင်ခွက်များကိုဖြန့်လိုက်သည်။ ''သားတော်ကူးပါ့မယ်။ သားတော်အကြိမ်သုံးရာတိတိကူးမှာမို့ခမည်းတော်စစ်ဆေးပေးပါ''
"ကောင်းပြီ'' ကျိူးယွင်ရှန့်ကလီရွှီသုန်းရဲ့နာခံမှုကိုကျေနပ်စွာသဘောတူလိုက်ပြီး ခေါင်းကိုအသာပွတ်လိုက်သည်။ ထို့နောက်အဝတ်ကိုဆက်ချူပ်လေ၏။
လီရွှီသုန်း ကတော့စာရေးရင် ကျိူးယွင်ရှန့် ကိုခိုးခိုးကြည့်နေသည်။ စိတ်ထဲမှာလည်းခမည်းတော်ဟာဘယ်လိုမှကြည့်မဝပေ။ အခါငါးဆယ်မြောက်ကူးအပြီးမှာတော့ စုတ်တံကိုချပြီးခေတ္တအနားယူကာ ကျိူးယွင်ရှန့်ချူပ်နေသည့်အဝတ်ကိုကြည့်ရင်မေးလိုက်သည်။
"ခမည်းတော်အဝတ်ချူပ်နေတာလား။ ဖခမည်းတော်ဘုရား အတွက်လား'' မေးသာမေးလိုက်ရ၏ ထိုဖခမည်းတော်ဘုရားဆိုသည့်လူကိုစိတ်ထဲတွင်တော့ မနှစ်မြို့ခြင်းများကအလုံးအရင်းပြည့်သိပ်နေသည်။
"သူလား။ သူကငါ့အချိန်ပေးဖို့တန်တယ်ထင်လို့လား'' ကျိူးယွင်ရှန့် ကခပ်မဲ့မဲ့ပြုံးလိုက်ပြီး အကောင်ပေါက်၏နဖူးကိုတောက်လိုက်သည်။ ''ဒါမင်းအတွက် ခုမကြည့်သေးနဲ့အုန်း ။ မပြီးသေးဘူး ''
လက်ထပ်ပြီးသားကောတစ်ယောက်အနေနဲ့ ချီရှိုးကျဲ့ဟာအချူပ်အလုပ်ကျွမ်းကျင်ပြီးသားမို့ ကျိူးယွင်ရှန့်ကထိုအရည်အချင်းကိုလက်ဆင့်ကမ်းရထားသည်။ ဒီဝံပုလွေကိုမွေးမယ်ဆိုမှတော့ သူတို့ကြားတဲ့ခိုင်မာလေးနက်တဲ့ သံယောဇဉ်ရှိရမယ်မလား။ သူဒီကလေးကိုဂရုစိုက်ရမယ်လေ။
လီရွှီသုန်း ရင်ထဲခံစားသွားရပြီးစိုလာသည့်မျက်ရည်များကိုအမြန်မျက်တောင်ဖြင့်ပုတ်ခပ်လိုက်သည်။ထို့နောက် ကျိူးယွင်ရှန့် လက်မောင်းကိုဖက်ပြီးခွေးကလေးတစ်ကောင်လိုအနားမှာကွေးနေတော့သည်။
ကျိူးယွင်ရှန့် ရယ်မောလိုက်သည်။ ဒီကလေးဟာအတော်ချစ်ဖို့ကောင်းသည်ဟုသူထင်သည်။ သူ့ကိုပျိူးထောင်ပေးတာတကယ်ဆုံးဖြတ်ချက်ကောင်းပဲ။
13-3-19