نهوه عباس(عشقي نهوتي)

الأخير

#نهوه-عباس(عشقي نهوتي)
#اماني-ياسر

غنيلي اشتهيــــِت #الاه
احضني خذتنــــٌي#اشاه
شمني اليحب شمه حبيبه#دواه
المانام بحضن ولفه شيخلصه#اشتاه
وفكلي شكومضموم لوجاسه الهوى#يخدر
فكلـٰـــي الزيج اريد#اسكر
شكرآ مرة شمخي😁

باوعت سابحه بدمي صحت يمااااا وهيه اجتني تركض
من شافت الدم لطمت صدره وگالت ولچ غززل شني
هلدم؟؟

يمة مادري ...مادري گعدت ولگيت دم ...يمه
لزمتني ...ولج بس لا طفل وسقطي
من گالت هيچ صفنت بوجه وجمدت ماگدرت اتحرك
...لا لا
-شنهو الا انتي فايتچ ؟؟؟
مادري ...ماعرف ؟؟

اخذتني للحمام غسلتلي وجابتلي ملابس جديدة وانه ارجف
رجعت لمكاني لفتني وگالت تمددي ورفعي رجليج نمت
بلگاع وخليت رجليه علهةى الچربايه هيه راحت جابت
القرأن وگعدت تقرا على بطني وانه دموعي تصب والوجع
ذابحني غفيت شويه

گعدتني وره ساعتين
-گومي يمه اكليلچ لگمه نروح للدكتورة
ماريد يمه بس اخذيني للدكتوره الوجع موتني
-غزل مو وكت عنادچ گومي خلي لگمه بحلگچ وراها
نروح
گمت والنزف مستمر اجت فطم اختي تروح ويانه
دكتورته تفتح عيادتها الصبح اخذنه حسين ورحنه طول
الطريق مخليه اديه علهةى بطني..
معقوله حامل يعني ابن عباس هنا ؟؟

وصلنه وهمزين محد موجود دخلنه بسرعة شافتني
وگالت هاي الحلوه منو؟
فطم گالتله اختي وشرحت وضعي ..
خلت ايدها على چتفي
-صعدي على السرير ماما خلينه نشوف
تمددت وطلعت بطني خلت جهاز السونار وبقت تباوع
شويه گالت ايي هذه كيس حمل..
جريت نفس ارتاحيت انوب طبگت حواجبه باوعتلي..
بس مع الاسف انتي مسقطته..
هنا خلت سچينه بگلبي شافتني صافنه بوجهه
-ابتسمت...لا تخافين ماما ولا تنقهرين بعدچ زغيره
ولاحگه صدگيني..

رجعت سألت امي شگد عمري وشوكت تزوجت وانه
هناا راح بالي بعيد موتت ابن عباس اذا سمع شراح يگول
اكيد راح يكرهني اكثر گومتني فطم باستني ..
شلقصه غزل وين سرحتي؟
عادي حبيبتي كلنه سقطنه وصارو بعدين عدنه وداعتچ
تملينهم..

هزيت راسي كتبتلي علاج الدكتوره وطلعنه
حسين-عباس خابر علي رايح للبيت ومالاگيچن گتله
بلدكتورة وراح يجي
-لا يمه المن جاي خابره وگله رادين احنى

رجع خابره ورجعنه الطريق كله مدنگه شلون راح
اواجهه يمكن هذه الطفل صحاني على زماني ماسيطرت
وگعدت ابچي بس بحرگه گلب اخر شي تعبت وراسي صار
شكبره خليت ايدي على عيوني وانتچيت على الجامه حسيت
بلسيارة توقفت

فتحت فطم الباب ونزلت بس مالي خلگ اتحرك
واحد لزمني
فتحت عيني باوعت عباس لازمني ابتسم بوجهي
وگال هاا بويه الحمدلله على سلامتچ..
ماعرفت شحچي لزمت ايده ونزلت دخلت جوه تلگتني
جدتي حضنتها وبچيت استغرب عباس وسال امي شصاير ؟؟

ماتحملت اشوف رده فعله عفتهم ودخلت لغرفه امي
وكملت بچي وره شويه فتح الباب ودخل سده وراه شفته
دنگت راسي اجه وگعد بلگاع يم رجليه باوع بعيني
-اذا ماترفعيلي راسچ انه انزلچ

سكت شويه وگال ليش ماگتيلي حامل؟
مااچنت ادري
-انمرد گلبي يغزالي والله ....اخخخ ياربي
عيونه حمرررر تنگط دم ....
شبيهن عيونك ؟؟
-هذه حال اليفارگ حبيبه ....شلونچ حبيبه گلبي؟
هزيت راسي موزينه اسفه خليت اديه على وجهي
كام على حيله وگعد يمي حضني وگال اشش لا تبچين
اروح فدوة لدموعچ اسفه عليش بوويه
؟؟ هذه مكتوب علينه ...مثل ماصار هذه يصير غيره ..
رفع راسي بأيده وباسني بشفتي

-غزالي والله محتاجج يمي شوكت تجين
ماگدر عباس تعبانه... ماريد ارجع
-لا ترجعين ابقي ارتاحي هناا بس لا تگطعين بيه تدرين
بلياچ اموت..
ماجاوبته خله ايده على بطني ...هناا چاان وليدي ؟؟
ذب حسره شكبرها

انوب طلع عرفته ضاج حيل بقيت النهار كله نايمه وبس
ابچي وبليل امي صاحتني للاستقبال ..
دخلت لگيت عباس واخوتي وابوي..

ابوي-تعاي بويه يمي ...
رحت گعدت يمه وگال عباس عنده سالفه
-سولف بويه عباس
-عمي اول شي هاي السالفة ماريدها تطلع وماريد عمامي
يعرفون بيها
ابوي-لا توصيني بويه
-رحم الله والديك عمي ..
اول ماخذت غزل عرفت امي ماراح تسكت..
وراح تسويلها سوالف بس ماچنت اضن راح يوصل بيه
الأمر تسويلي سحر ودمرني ودمر غزل عرفت بيها لاعبه
لعبه بس اتجاهلتها من غبائي طبعاً مادريت غزل تنفر مني
بسبب السحر حسبالي چي تكرهني مره گاعدين بليل انه
وغزل دگت علي الباب..
ومن رحتلها گالت ستار يريد نوال تطيه اله گتله لا..
بقت تحچي وتقنعني عرفت اكو بينهم سالفه سحبتها بلحچي
وطلع بينهم علاقه ستار واعرفه واحد ساقط وملعب مو وجه
زواج تركت السالفه وگتلها خليني افكر بس من سوه سوايته
هاي حكم علهى روحه اعدام
ابوي - وليش اخذت نسرين ؟؟
-عمي من لگينه ستار ودخلته عليها وكتله راح ياخذچ امه
صاحتلي سكت شويه ورجع گال طلعتلي محادثات وصور
لنوال الله ياخذها وي واحد محادثات مال وحده بت شارع
مو اختي نفسه وگالت اذا ماعقدت عليه افضح اختك ضحكت
عليه وطلعت وره شويه سمعت ستار شارد من رجعتله گالت
هاي اول خطوه اذا ماعقدت عليه شوف شراح يصيروطلعتلي
فديو ويه ستار لنوال ياريت محد يلومني ويگلي اكو غير حل
بساعتها انعميت وعقدت عليه ماردت واحد بيكم يعرف بسالفه
نوال بس ماتحملت ورحت كتلتها وگلت بس الگه ستار اخلي
يتزوجه حتى لو فتره ويطلگها مادريت جبت الحيه ابيتي وراح تهدمه على راسي حسبالي فقيره ونضلمت گلت استرعليه چم يوم وتروح بحال سبيلها كل يوم ادخل للبيت انسطر مدري شمالني وادوخ وحتى غزل ماشوفه وبليوم الانه زين غزل تتسودن علي
لحد ماصار الصار..
لبارحه من رحت للشيخ صاحني على صفحه وسولفلي سوالف
تصخم الوجه وگال روح شوف فراشك وكنتورك
ووصدگ لگيت اعمال بفراشي وبمخدتي وبملابسي وحتى
بملابس غزل..
نزلت جوه لگيتهن ٣ گاعدات  امي وياهن جريت السلاح
وگتلهن هسه كلچن اسفطچن هناا اذا ماحچيتن..
وياريتهن ماحاچيات مسويات حتى لمحمد ونسرين مسويه
علاقه وياا او وي ستار خاطر توصلني وضاحكه على
نوال هاي الثوله ودازه ستار يسوي علاقه وياها عود يحبها
ويريد يتزوجها ومصورها المفروض اموت هاي العار بساعتها
بس مدري شبيه چنت بارد بعد التفاصيل الباقيه هاي احتفظ بيها لروحي.. وتعرفون الباقي
الله وكيلك حتى امي طردتها بس انتم رجعتوها..

گتله يعني انت ماچنت تعرف نسرين قبل ؟؟
ضحك وباوع بعيني..
- غزالي انتي مصدگه احب غيرچ لچ انه مرتي
ماحبيته وماخليتها تاخذ مكانچ بگلبي اروح لهاي الدايحة

ابوي-بويه عباس ستار لازم تلگاه وتزوجه نوال وامك
مهما يكن ومهما تسوي تبقى امك بس غزل ماترجع بعد
لبيتك ..
عباس-لا عمي انه مارجعها بعد بس چم يوم ابيع هذه البيت
واشتري واحد جديد بعيد عن امي واخلص عااد ،،
احمد-غزل وانتي شدگولين ؟؟
باوعتله ودنگت راسي مالي خلگ احچي شي
حسين-خليها هسه وعود بعدين يصير خير
ابوي-اذا سألوك عمامك على نوال شدگوول ؟؟
عمي سبق وگتلهم لگيت سوالف بتلفونها مو زينه

ابوي هزراسه وگام بقو الولد شويه وطلعوا
رفعت راسي شفته يباوعلي مبتسم گمت ردت اطلع..
وگف وصار گدامي ..وين رايحه ؟؟
تعبانه
-بنيتي ادري بيچ تعبانه بس انه هم تعبان باوعيلي اشوف
عيونچ..
دفعته وطلعت احس روحي اختنگ وانه يمه

بقيت يم اهلي سبوع ويومية امي تبخرني وتسبحني وتشربني
مي ماخذته من الشيخ..
وسوتلي حجاب وتصلي يمي وتقرا على راسي احس صرت
زينة وكمت اشتاق لعباس بس هوه ماگام يجي اجه مرتين يمكن
وبسخلص الاسبوع وامي راحت سوت غير حجابات يم الشيخ
ورجعت خلتهن الي ومناك عباس هم يسوي هوه وفرح
بس احلامي اووضعي ماجان طبيعي انه نفسي استغربت
وضعي احس بيه شي...

سمعت من ابوي نوال بيت عمتي مديحه ماخذتها يمها وعمتي مريضه ويوميا واگعه..
وهادي حالته حاله يعني الوضع يمهم كلش متوتر نقهرت
عليهم حيل..
واكيد عباس هسه تعبان اخذت تلفوني وخابرته
اول ماجاوب ...غزالي
نسيت روحي وگتله حبيبي وينك
-حبيبچ ...موجود شلونچ
الحمدلله ...وانت
-موزين... موزين بنيتي ...
مشتاقتلك حيل
-هااا ؟؟ صدگ ....هسه جايچ
وين جاي خليك ....لگيت بيت
-لا بعدني
زين خلينه نگعد بيتك
-تردين ترجعين غزالي ؟؟
ليش لازم ماناوي ترجعني
-اخخخخ الله اليوم العصرجاي حضري روحچ
واذا ابوي مارضى
-مالچ شغل انه اقنعه
خووش

سديته منه وگلت لامي وحضرت روحي سبحت ونضفت
جسمي وحفيت صح خايفه وبعدني تعبانه بس اذا بقيت هيچ
بعد سنة مااطيب لازم اروح اجه العصرعباس بلبداية ابوي
ماقبل بس بعدين وافق سلمت عليهم وطلعت صعدت وياا

گرصني من خدي ورحنه دخلت للبيت واني گلبي مقبوض
سميت بسم الله وفتت لكيت فرح ونوره سلمت عليهن وعباس
واكف انوب دخلت لعمتي نايمه بغرفتها أشرلي صعدي
صعدت فووگ اووف اشتاقيت لغرفتي ..

دخل هوه حط الجنط واجه حضني وعض اذاني
ايييي شبيچ
-اريد اكلچ
ههههه عفيه هاي الحچايه
-شسوي ماكو كلام يعبر عن الهنا...ويأشر على گلبه
انداريت وحضنته حييل وهوه هم نزل على رگبتي وباسني
-لچ والله راح اموت مشتاااق
حتى انه مشتاقه موووت
-اسم الله عليچ ...يعني بعد ماتشردين وماريدك واكرهك
كام يقلدني
ضربته ودفعته ...اهووو بدت الخباثه
گرصني حيييل من خدودي خلاني اگمزز
-بدلي خلينه نطلع
من گال هيچ صفنت بوجه وگتله هااااا
-ههه حقچ متفاجأه بس من فرحتي ماعرف شسوي
يلا بساعچ لااغير رأيي..

باوعت لروحي اني مكياجي يخبل وشبدل لابسه عبايه
لزم ايدي وطلعنه اخذني للسوگ اشترالي كومة غراض
ومكياج وملابس نوم وبيت اخذني لمحله اختاريت خاتم
بيه شذره زرگه ومداليه وسوار سيت بيهن ورده سوده تخبل
متت عليهن..
طبعاى هاي اول واخر طلعه وي عباس اصلاً
هاي الطلعه المفروض تتسجل بلتاريخ ....
طول الطريق وهوه يخزر برايح والراجع
وتعاي منا وامشي مناا بس لازم ايدي ومن يشوف محد
موجود يغمزلي لو يبوس ايدي

رجعنه بليل اخذ عش وياا تعشينا وي البنات وعمتي اخذتلها
فرح بغرفتها عفتهن وصعدت ضل هوه يمها سبحت وبدلت
ومكيجت اليوم عروس مشتاقتله حييل وكلشي بيه يريده
بعد لا نسرين ولا نوال ..كافي خلي نبدي حياتنا عاد احبه
ويحبني بس كافي من الفراگ والقهر..

دزلي رسالة هاا اصعد لو اصل جوى؟؟؟
جاوبته تعاااااااال ...
ثواني وندگ الباب فتحته ومديت بس راسي ..ننعم
الله ينعم عليچ بس بلا زحمه ممكن تصيحين بنيتي من
جوى
ماعدنه بنات هناا
-چااا شعدكم
بس نسوان متزوجات يلا روح الله وياك..
ردت اسد الباب دفعه
-زيين ممكن نتعرف ؟؟؟
ضحكت ....گال هااا
عباس ابد ميلوگ عليك دور الخفيف ..بس الهيبه تلوگلك
حبيبي حچيتها هالكلمة بهمس وانه مركزه بعيونه..

دخل وسد الباب وجرني ولزم راسي بثنين اديه
-اليوم تردين تخبليني ...اووف اموت عليچ والله
حتى انه امووت عليك
شالني وحطني على الچربايه وتمدد يمي يباوع بعيوني
ههه هااا
-احبچ واحبچ واحبچ
بس تحبني ؟؟؟؟؟
- واعشگچ واتنفس هواچ واحس بدونچ انه ضايع
شسوي اذا گتلك انه ماحبك !!
-ماسوي شي بس اموتج وادفنچ هناا واكتل روحي وراچ
هاااا صدگ تسويها
-چاا جذب كون صدگ بعد كل التعب والانتضار ماتحبيني

تقربت منه حييل وخليت راسي برگبته عضيته حيل
صاح اخخخ بت الاوادم تعضيني مووو دتعاي عضني
شلع وصله من رگبتي ومن صدري ومن رجلي خلاني
اصرخ من الوجع زعلت ودرت وجهي..

رجع باس اماكن عضاته وبخشمه يدغدغ رگبتي ..
استسلمت وهوه يتقرب مني ويبوس بيه وينزعني ملابسي
شويه شويه

احس شي يراقبني شعور مزعج..
ضجت حيل ومامرتاحه كلما احاول ابتعد عنه يسحبني
اله شفته بعالم ثاني..
ماردت اضوجه وامنعه وحاولت اسايره بس ماگدرت
وره شويه نزلن دموعي

وكمت ادفع بيه عباس..عباس
من شافني ادفع بيه ضااج حيل وگال
مادگليلي شبيج والله موتيني؟؟
بجيت بصوت عالي ماسيطرت على نفسي شلون اشرحله
شعوري
-غزل شبيج ليش تبجين ؟؟ ماتردين اتقربلج ماتقرب
والله بس لا تبجين

يحجي وانه مخليه اديه على وجهي وابچي
هزني وگال غزل مو احجي ويااج ردي لخاط الحسن شبيچ ؟؟
شلون احجي واشرحلك وانه نفسي ماعرف شبيه
-يعني شنو شتحجين انتي ؟؟
عباس مدري شنو ياكل بيه عباس الغرفه خانگتني احجي
واشهك بصوت عالي
-غزل لا تجذبين گولي ماريدك يمي
والله مامجذبه عباس احس عيون لازگه بجسمي مامرتاحه
عباس الله يخليك طلعني مناا

شفته انخطف لونه وبقى صافن وره شويه
وگال من شوكت هيج انتي ؟؟
من ذيج المره بس گلت چيف مامتعوده على البيت وعليك
بس هاي المره زاد عباس ابوس ايدك اشتريني..

من شافني منهاره كمز من الجربايه وركض لتلفونه ماشفته
خابر منو بس اسمعه..
كال احمد اطيني جدتي بسرعة احمد اطيني جدتي اكلك

يحجي وياها وانه ماسمعت حرف مخنوكه مدري شنهو
يكرص بيه احس الدنيا كله خانگتني سده منها..
صرخت بصوت عالي عباااس غطيني
عبااس غطيني راح ياكلوني اكل
بسرعه جر الحاف ولفني بيه جرني لحضنه
وبده يقره ايات قرأن وادعية مافهمت منه شي
وره ساعة او اكثر صدعت من البجي وغفيت بحضنه
كعدني الفجر واسمع الاذان يأذن

-غزل ،،،غزل
هاااا
-گومي وياي
وين
-كوومي اروحلج فدوه
سحبني وكال كومي سبحي امشينه نروح
وين عباس
-بدون ليش يروحلج فدوة عباس

فتحت لباب ردت اطلع التفت عليه كتله عباس والله اخااف
اجه اخذني من ايدي دخلني للحمام وسبحني بيده
نسيت المستحه ونسيت حتى روحيً اتراجف من الخووف
طلعني ولبسني ملابسي لبست عباتي ونزلنه امي واحمد
جووه
-وج يمه مادگليلي شمالچ
يمه مدري شكوو بغرفتي يريد ياكلني احسه يگرص بلحمي
احمد-عباس خابرته الشيخ ودلاني على مكان السيد
عباس-عمه صعدي يم احمد بلصدر واني يمها

نزلت امي يم احمد وصعد هوه يمي وخلاني بحضنه
يبوس براسي غفيت بحضنه گعدت الشمس شعلوها
باوعت گتله احنى وين گال
-بلكووت ...
شجابنه هنا؟؟
-هناا سيد مضبوط شغله يفك الاعمال اريد اشوفه تاليها
شلوون دخلنه منطقه شعبيه والفرع البيه بيت السيد زغير
نزلنه دگ عباس الباب طلع ولد زغير گله صيح ابومصطفى ركض الولد ثواني وطلع رجال لابس دشداشة بيضه بعده مو
كلش جبير سلم على الولد ودخلنه جوه كعدنه بالاستقبال جابو
چاي يحچونزعادي ولا عبالك جاين علمود شغله وره شويه سكتو باوعلي
-وگالهم هاي البنيه جاوبه عباس ايي مرتي
-شلونچ خويه
الحمدلله
ضل يباوعلي وصراحه حيييل خفت وضجت اول شي طلب
من عباس يتقرب منه كعد عباس يمه فتح القرأن قره شويه
قرب وجه من عباس ومادري شسولف ويااا واشوف عباس
لونه انخطف تقريباً نص ساعةهوه يقره يم عباس بعدين أشرلي
بأيده گمت وانه اتراجف گعدت بينه وبين عباس خله ايده على
راسي قرا قرأن ابتسم وگال لا تخافين ماكوو شي ان شاء الله

(حبايبي هذه الجزء جددددآ صعب عليه احچي بيه صراحة
ماعرف شلون احچي لان مالگيت كلمات مناسبه اوصف
الوضع من سولفتلي غزل ماصدگته الي شافته والي طلعه
منهاالسيد شي مرعب جدااا صار فتره محتاره شلون اسرد الكم
هذه الجزء بس فشلت للأسف وحتى عباس السحر ضاربجسمه
مو بس غززل  فراح اسرد جزء بسيط ومختصر الله يحفظنه
بحفضه وعينه التي لاتنام )

احس روحي بدت تطلع واني استفرغ الي مزوع ابطني
٣مرات استفرغت اخر شي فقدت ماشفت شي وره شويه
صحيت واسمع السيد يگلهم خلوه براحته لتجبرونه تعبت
حيل والله يساعدها شلوون عايشه لهسه من گعدت دخلني
جوه يمه العلاوي سلمت عليهن واخذني سبحني وشربني
مي مقري عليه وامهم سوتلي گطع بعدين رجعنه اله گال
مسويلكم عملين الاول تفريق وهذه العمل..
من شخص جدا قريب عرفته عمتي والعمل صارله سنين
والعمل الثاني اسمه ٢١عقده يخلي المتزوجين ٢١سنه بخلاف
ومرض ومشاكل دائميه ويسبب عقم لمدة ٢١ وضعف جنسي
للرجل

هوه يسولف وانه ارجف وطلب من عباس يغير
مكاني يعني السكن انه وياا حتى لو فتره مؤقته ولازم نرجعله
بعد ٣ايام طلعنه من عنده عباس لازمني صعدني وصعد يمي 
سحبني لحضنه
-تمددي حبيبتي وخلي راسچ على رجلي نامي

وصدك تمددت وغفيت وره شويه گعدت وهمه يسولفون
گمت وخليت راسي على چتفه ولزمت ايده باس راسي ولزم
ايدي المغرب دخلنه البيت طبعا لبيت اهلي ماقبلت امي ارجع
ويه عباس صرت مثل ام البزازين يوميه مكان مليت والله

٣ايام واني مصخنه ونايمه لااشيل ايد ولا رجل رابع يوم
رجعنه للسيد وعاد نفس الشي بس هلمره الوجع اخف من ذيچ
المرةرسوالنه حجابات نشيلهن وحجابات بمخادنه نخليهن
وماي نسبح بي كل يوم ونشرب وحتى علمنه نقرا ونسوي
شغلات قبل لا يتقربلي عباس وگال روحو وان شاء الله
مايحتاج ترجعولي..

من رجعنه بلطريق عباس خابره هادي من سدته گتله شكووو
ماكوو شي بس خليت هادي ينقل غرفتنه للبيت الثاني ..
يعني ننتقل بيه
-چااا نبقه طول عمرنه هيچ مهجرين
وندى؟؟
-خلينه نرجع ويصير خيرر

رجعنه وثاني يوم اجاني العصر اخذني من دخلت ضجت
وتذكرت ندى صعدت للغرفه ارتب بيه صعدلي..
شهاااا حبيبتي محتاجه شي
لا حبيبي روح الله وياك
-هسه تجيج فرح وديت عليه اذا رايده شي خابريني
راد يطلع گتله اوگف باوعلي ...هاا ؟؟
ركضت عليه وحضنته رفعتله راسي هالايام صاير مو
رومانسي؟
خله ايده علىچتفي وباس راسي
-تعبت غزل والله تعبت مدري من حبچ
البهذل حالي مدري من امي الماجاي تطيب مدري
من وضعنه هذه..

نقهرت حييل ودمعت عيوني ابتعدت عنه
يعني انه متعبتك ؟؟
دنگ وصار وجهه گدام وجهي ابتسم وگال
انتي دمرتيني مو بس تعبتيني بس كلشي يهون لجل عيونچ ذن

درت وجهي ورجعت اكمل ترتيب ماحاچيته هوه
هم بعد ماحچه طلع عفت كلشي وگعدت ابچي كسرخاطري
بكلامة

انه شبيدي شنو ذنبي اذا مسويلنه سحر حتى قبل لا
نتزوج احس صارت غصه بگلبي عباس مو نفسه تغير
حيل وحقه مالومه لان تعب هواي بس انه هم تعبت وعانيت
ونذليت..

اجتني فرح وبقينه انضف ونرتب سويت عشا اجه هوه
جايب مسواگ وفواكه وحلويات فرح ماقبلت تبقا وراحت
خليت العشا اثنينه  سكته محد بينه حچه كلمة خلصت شلت
الصينية هوة صعد سبح بدل وطلع قفلت الباب وصعدت
سبحت وتمددت تعبانه غفيت بسرعة

فزيت على صوت التلفون باوعت عباس
اكيد اجه نزلت بسرعه فتحت الباب صاح بيه ويييين چنتي ؟
نايمة
-نوميش هذه صارلي ساعة افلش الباب
هسه شكوو تصيح گتلك مخموده تعبانه مادري
-لا تعلين صوتچ بوجهي لچ
اي اي ارجع عباس القديم بس تصيح وتضرب
عفته وصعدت وانه ابچي لحگني ولزمني من ايد ي
-انوب ليش تبچين
باوعتله بطرف عيني اسأل روحك ؟؟
راد يحضني دفعته ورحت للحمام قفلت الباب دگه حيل
وصاح فتحيي
مجاوبته دگه اقوى..
-غززل والله اذا مافتحتي اكسره هسه
انت شتريد مني مو متعبتك انه شتريد روح عوفني
سكت شويه ورجع گال غزالي فتحي الباب خلينه نحچي
ماريد احچي وياك ومن باچرر ترجعني لاهلي
-انچببيي لچ بعد لو مدري شيصير ماخليچ تروحين طلعه
منا ماكوو..
ليش هاا شتريد مني حتى بوجهي ماتباوع المن باقيه يمك
ضحك ...دفتحي يابويه اروحلچ فدوة
ماااا
-لا تشلعين گلبي غزالي يله ؟؟

غسلت وجهي وفتحت الباب ركز بوجهي وگال
بويه شصاير بيچ؟؟
عفته ومشيت دخلت للغرفه دخل وراي جرني گعدني
على الچربايه
-ليش تبچين
اسأل روحك
-شمسويلچ انه؟
ليش هيچ تعاملني بارد وياي
-بارد من برى بس جواي بركان والله
ليش
-ماريد اوصل يمچ وتضوجين مني وتنفرين شلعتي گلبي
ومرمرتي حالي
ليش هوه بيدي؟؟
-ادررري مو بيدچ بس تعبت وبعدماعندي طاقة
يعني راح تبقى هيچ بعيد
-انتي بس أشرلي تلگيني اقرب الچ من روحچ

گمت وحضنته حييل هوه دفعني للچربايه ووو...
اليله كله ماخلاني انام دقيقة..
كلما احط راسي على المخده يجرني ويگعدني ..
ويگول بعد وگت ليش نايمة؟
طلع الفجر يله غفيت..
احلى ليله بعمرري كله عرفت عباس شگد يحبني
وعرفت شگد احبه..

ساعه بــ٩ گعدني بعضه خلاني اصرخ يگلي جوعان
گومي كافي نوم..
باوعتله بطرف عيني وغطيت راسي ماحسه اله يرفع
الغطه ويشينلي على چتفه مثل الجاهل ساعة اتوسل بيه حتى
ينزلني رحت للحمام اجه وراي..

اهوووو شترررريد
-اريد اسبح
انت مو سبحت
-ميخالف اسبح مرة ثانية
هههههه دروح خليني اخلص مو تريد ريوگ
-لا ماريد اريدچ انتي سديت الباب دفعه ودخل
عباس بعد منو يگدرله..
ساعة شاتلني بلحمام احم احم 💏

طلعنه بسرعه لفيت روحي ونزلت اسويله ريوگ
واگفه اخدر چاي بدل ونزل حضني من وره مشيت
للثلاجة هوه حاضني رجعت طگيت بيض نفس الشي
لاطش بيه من گعدنه نتريگ ماقبل اگعد اله بحضنه
خلصنه ريوگ طلع للمحل رجعت لفيت راسي ونمت

اجه الضهر جايب وياا غده اروح فدوة لطوله محسب حسابي
جايب سمچ گومني من الفراش غسل وجهي ونزلني جوه يسويلي لفات
ضحكت گال هاا شبيچ ؟؟
عبالك بتك تجيبني منا تحطني هنا
-چاا انتي بتي نسيتي
حضنته وبست خده لا مانسيت
-هاا لا تتحارشين
العفوو نزلت ايدي منه هوه ضحك

خلصنه الغده جرني للمغسله غسل ايدي وشالني فوگ نمنه
للعصر سبحت ورحنه على عمتي سلمت عليها وگعدت ساكته ماتحچي شي ومدنگه ..

وره اسبوعين سمعت بنين حامل حيل فرحت الهم يستاهلون
بنونه وحمودي
من رجعت من اهلي ضايجه عباس عرفني
وگف السياره وراح جابلي مصاص وچكليت خلاهن
بحضني..

باوعتله هاي شنوو
اشوفه گوه كاتم الضحكه هايي الچ بتي ..
شمرتهن عليه وبزعل گتله عبااااس تضحك عليه
هوه مات من الضحك.... مو شفتچ ضايجه ..
وصلنه نزلت رحت نمت بسرعه اجه بدل وتمدد يمي
تحارش ماجاوبته  يگرص ويعض عفته وحده اخر شي
اخذني لحضنه..

يبوس براسي ..
-ادري بيچ ضايجه علمود سالفه الحمل بس شيليها
من راسچ باباتي شوكت مالله كاتبلنه يصير لا تضوجين
روحچ..
دفنت وجهي بصدره ..
عباس خاف لان سقطت بعد ميصيرعندي
-لادگولين هيچ خلي املچ بالله چبيروبعدين لاحگه عل
شلاع الگلب خلينه هيچ متونسين بوحدنه
ماجاوبته خله ايده على عيونه ..هوه انتي جاهل مدري شلون
صابر عليچ لهسه ادور تردين جاهل

رفعت راسي شفته مبتسم يتحارش بيه عضيته من زنده
حيييل خليته يصرخ وكمت جرني ورجع عضني ههههه

وره ماطابت نوال عمتي خطبته لستار عباس مارضى
يسوون عرس بس عقدو انقهرت عليها حيل برغم كل
السوته تبقى بنيه وحلمها تتزوج وتلبس بدله..

هواي عباس راح لندى يرجعها بس هيه ماقبل وبقت رايده
الطلاگ اطاهه كل حقوقها وطلگه ومن رجع منه شفته
وبچيت عبالك راجع من دفنه ابوي حضني ويگلي شلون
بگلبچ يم گلب..

بعد ٣اشهر الصبح نزلت اسويله ريوگ
اووف عباس اله بيض اكل جبن
-يلا حبيبتي متعاجزه من طگه البيضه انه رجال متعود
على الاكل الدسم
لاحبيبي مو متعاجزه والله بس تتلعب روحي من ريحته
-هاا ليش خاف عندچ التهاب بلمعده
خليت الصينيه يمه وگتله مادري

جرني گعدني بحضنه سوالي لگمه فتحت حلگي وكلني
گلبت معدتي وگامت تفور دفعته بسرعه وركضت حتى الچاي
گلبته عليه رحت فرغت حتى العشاهوه وگف فوگ راسي يفرك بضهري..

احس روحي طلعت صعدني وگال نامي وانه اخابر
وحده تجي يمچ..
وره شويه طلع اجتي امي يمي
-شجاچ يمه
مادري يمه معدتي صارله چم يوم هيچ ابد مارتاحيت منه
-اگلچ فايتچ ؟؟
صفنت بوجه حسبت گتله ايي خمس ايام
غمتني ..تبقين هيچ ثوله گومي وياي گومي
ويييين؟؟
سحولتني بدلت ورحت وياهه للتحليل ولا فكرت بيها
صدگ حامل ؟عباس يطير من الفرح ماخليت امام مانخيته
ربع ساعه وصاحو اسمي..

رحت الولد اطاني ورقه التحليل وگال مبروك حامل
هنااا الفرحه ماوسعتني امي باستني وگالت الف مبروك
يمه جعنه للبيت ركض اريد بس اوصل واخابر عباس
امي راحت خابرته وگتله هسه تجي بسرعه هسسسسه
وسديته بوجه هوه دقايق فوگ راسي من جوه يصيح
غززل شبيج غززل..
دخل اجه يركض گعد يمي يباوعلي شبيچ
باوعتله بدلع وگتله ابنك يريدك موتني
هوه صفن بوجهي ...هاااا
گوه لزمت روحي شبيك ابنك يريدك ماسمعت

غزل شبيچ بويه مصخنه امشي گومي اخذچ للدكتور
لزم ايدي وگام جريته گعدته وخليت ايده على بطني..
ابنك يريدك عباس انه حامل
من الصدمة عافني وگام غزل والله ميصيرهيچ
موجاهل انه تجيبني مناك لهنا هيچ
گمزت وراه حضنته باوعت بوجهه حبيبي والله ابنك يريدك
-يعني صدگ حامل ؟؟

والله العظيم امي اخذتني سويت تحليل وگلولي حامل
-اللهم صل علىً محمد وال محمد غزالي تحچين صدگ
واني اشوف الفرحه بعيونه هزيت راسي أي
حضني حيل وباسني وگال اروحلج فدوة انتي وابني

اول اسابيع كله يجيب اكل من بره وميخليني اسوي شي
لو يدز على فرح لو من يجي هوه ينضف البيت وماضوجني
ابد او غثني بس اني اتزعل هواي بسبب الحمل واغلط بحقه
ويرجع هوه يصالحني..
اروح فدوة لطوله يعاملني مثل اب لبنته دوم ينصحني
ويعلمني من عرف بيه ولد ذبح طلي وزعه للناس الفقيره
وطار بيه طير..

من دخلت بشهري اليل كله ماينامه يخاف عليه لو من
صارت عندي ولادة عبالك هوة الراح يجيب هههههه
ولادتي كلشش سهله چانت..
من شفت فضل نسيت كل الوجع اول ماطلعواعباس ماخذه
ومامخلي احد يشيله من رجعنه للبيت بسياره احمد وهوه
ورى گاعد يمي يبوس بيه ماستحه منهم ..

وره اسبوعين رجعت لبيتي..
لگيت عباس مغيركل اثاث البيت مسويه مفاجأه

عمتي اروحله مرات يگلي ماريدچ تعتبين البيت ذاك بس
فروحه يومية تجي
نوال بعد ماشفتها من تجي لاهله حتى عباس مايروح
محمد رغم تعالج من السحربس علاقتي بيه بقت جافه اصلاً
هوه من زمان وياي بارد ابوي اشتراله بيت وطلع هوه وجهاله

بليل من يگعد فضل يبچي ابچي ويا زغير وماعرفله
عباس يگوم يشيله ويحطه بحضني ارضعه ويگعدني
بحضنه ويگول انه عندي ثنين جهال مواحد ..

حبيبي وروحي ابويه واخويه وسندي وكلشي بحياتي هوه
شگد چنت اكرها واموت منه صار هوه النفس هسه بلنسبه
اليه بدون عباس اختنگ ..
شگد اغلط يسامحني يحبني كل يوم اكثر وانه احبه اكثر
—————-///—————-///——————
لهنا وصلنه نهايه قصتنة 💔 شفت ماعدكم صبرگلت اختصرالاحداث..
مادري شلون راح اختم والله گلبي يوجعني ماريد افارگكم
بس لكل بدايه نهايةوالحمدلله نهايتنه سعيدة..
توفقت وگدرت اكمل القصه تعرفت على غزل صدگ حبابه
وطيبه وگلبه ابيض وعباس انسان محترم واعي الله يخليه خيم
فوگ راس عائله ....شكرآ الكم بنات ع تعليقاتكم الحلوه
وتفاعلكم المميز بلقصه حيييييل فرحتوني انتظروني بقصه
جديده ان شاء الله ماطول عليكم اختكم اماني ياسر

ملاحضه الصوره لفوگ صوره شبيه عباس نسخه منه
همه دزوهه اليه اما غزل مالگيت صوره اله بس هيه بيضه
ملامحه طفوليه عيونه واسعه وعسليه طوله ١٥٩
حاليا عمر عباس ٣٩ وغزل ٢٢  من سكنه محافضه ذي قار