ثراء النفوس

غريم الروح

بارت الليل اسفة لان بات للصبح بس اجتني حالة الاغماء المفاجئ 😂😂😂اكيد تجيكم انتو هم 

شغلوا الاغنية ويه البارت😘😘وغلسوا اذا لكيتوا سحكة🐱🐱

🌺🌺🌺🌺🌺🌺🌺🌺

لمى:

عند اهلي مثل شعبي يكول "الما رضى بجزة رضى بجزة وخروف " واني ما رضيت اهله يكولون عني خادمتنا القديمة صارت زوجة ابنا...هسه راح ارضى يكولون فصلية ابنا همه مطلعين الها غير اسماء بس تبقى الفكرة نفسها فصلية مو اكثر واني مجبورة وشئت او لا راح اخذه لهذا المخبل 

..اووف القهر اللي اني بي ما ينوصف شلون يا ربي اسممه واخلص منه لهذا الحقير والله حتى السم هم حرامات وزايد عليه

انجبرت اقبل وسواها وحقق مراده ووعده باجباري وما استبعد عنه يكون مسؤول عن مشاكل فاتن وهشام يكولون لازم نصفي النية ونحسن الظن بالبشر واني اصفي نيتي ويا ابليس اللعين وما اصفيها ويه سراج 

بقيت حايرة يعني معقولة اكو بشر يحب التملك بهيج طريقة يدري ما اطيقه ويدري ما راح يرتاح وياي ومصمم على امتلاكي وكأنه طفل وبسوك شاف لعبة حلوة وعاند يريدها واهله حتى يسكتوه يشتروها اله باي طريقة

هشام طلع من السجن وفرحنا بطلعته هوايه يعني صدقوا بكلامهم وتنازلوا وهسه اني شنو يعني لازم اتزوج هذا الاملح المخبل ولفرين عزا بعينه وعين اهله 

طلع هشام يجيب عشانا وتأخر ووره ساعات خبرونا متطالب وبنص بيوتهم متضارب ويه اخوان زوجته وماخذينهم للسجن ورحنا بالليل اني وامي للمركز ركض وهناك تلكونه عمامهم ملتمين يطلعون ولدهم والضباط واكفين وياهم سوالف وعمار واسعد جايين اثنينهم بملابس العسكرية اي ليش لا ضابط المركز المسؤول هم وياهم واحنا من النا زين اذا طلع هشام من هالمشكلة طبعا الدنيا للقوي تمشي عدل 

شافنا عمار وانكلب وجهه ويكول لامي حجية ما كان لازم تجين بهاليل احنا نجيبلج هشام ليمج وتره ميصير بنات بليل يفوتون مراكز شرطة ويباوع الي بطارف عينه واسعد يضحك ويتشاقى كعادته اسلوبه ولا يتغير شقى وضحك يكول اله اليوم اللي بالسجن يحرك اهلنا على جيتها 

امي كعدت عالرصيف من خذلتها تبجي كوموها واسعد يبوس براسها وابو منتصر يواسي بيها واني شفت الي دنكة اختل وراها من عيون شرطة المركز لان صدك ما ضل حيا عند البشر عوذه عبالك ما شايفين نسوان 

طلعوهم للشباب من التوقيف واستبشرنا خير بطلعتهم بس هشام طلع بغير شكل العين وارمة والقميص مشكوك وماكو ولا دكمة تلكيناه واني لا اراديا كمت ابجي وركضت اله
-هشام هاي شصاير بيك سودة عليه ريت ايديه الكسر الهيج ضربك
مديت ايدي اريد اشوف عينه افتحها اشو هذا دفع ايدي وحجه بصوت اقرب لفحيح الافاعي ناصي بس كله موت
-امشي ولي بره انتظرينا شجابج لهنا يا غضب الله انت
خفت منه لان كان معصب تراجعت ختلت وره امي هسه اني شجابني وشورطني بالله هاي فوك خوفي عليه والحال اللي وصلنا الها هو وتونا افندي  يرزل بيه

طلعنا بالباب سيارة ما عدنا اجينا مشي المسافة ممكن تنمشي ..بطلعتنا شفت العتوي يضحكون ويا اسعد وابو منتصر راسه مشدود بقميصه بس بالفانيلا اذا هشام مستور هذا كل شي ماكو وحتى فانيلته مملوخة من صفحة واخوان فاتن اضرار بسيطة الظاهر العركة بين هالاثنين صايره

لمحني بين اهلي وخزرني واني جلبت ببقايا قميص هشام من وره اخاف صرت والله منه مريض نفسي مهووس مدري شبي حتى خزرته ونظراته مو طبيعية هالنوب هو عيونه مو سود ولا خضر هيج مدرمكات ما بيهن لون براسه خير وشريرات صدك ...من يباوع الي اعرف معنى كلمة العين الوكحة هو عينه وكحه والدليل بين اهلي وخلاني ما اعرف امشي 

عرض اسعد يوصلنا للبيت وهشام ما رد عليه بس كملنا مشيتنا خطيه اسعد رغم متعاركين اخوه وهشام يمد ايده ويسلم يا ربي شلون اخلاق وخلقة والله جكليت هسه اخوك الاغم على منو طلع اشو انت كنافة وابوكم دمه عسل وامكم طيبة وهو عبالك عتوي ماطرة عليه الدنيا 

رجعنا للبيت وكبت عركة بين اهلي وهشام لان تعبوا من مشاكله وكل يومين مسجون ومستمر بعداواته وتهديداته بضرب اهل زوجته فردا فردا يا ساعة البيضا يوم شفناهم وعرفناهم ابتلينا

تالي امي وابوي ضلوا يبجون كدامه وابوي يهدده يتبرأ منه اذا ضل بهالحال وبالموت يلا قنعوه يسد الموضوع وكل شويه يندار عليه ابويه ويسالني بويه موافقة على سراج واني اكد موافقتي بس نريد هشام يبطل من هالمشاكل لا نبتلي

.....

امي كانت راضيه عن زواجي من سراج رغم امتعاضي ومعرفتها انه اني ما اتحمله دقايق.. بس كل شويه وتذكرني بشغلة وتبقى تقنعني وتنصح بيه ارضى بقسمتي ..

"مكره يا صاح لا مختار" هالمقولة ترن براسي وتذكرني بوضعي اريد اقنع نفسي بكلمات اخذ اللي يحبك ولا تاخذ اللي تحبه ...والحب يأتي بعد الزواج وهوايه خرابيط بس اتذكر اني منو اتزوج الافكار السلبية تتربع وتاخذلها صفنة بمخي... افصل عن اللي حواليه كلهم شايله هم ..اهلي انتبهوا الي وابوي يحاول يخفف من همي وخوفي يشاقيني ويغنيلي اغاني حلوة من اكوم واكعد ويشاقيني الوحيد اللي يخفف الهم بحياتي هو 

اليوم كعدت من الصبح متفقين نطلع نسوي فحوصات الزواج وبعدها للمحكمة نعقد اني وامي ونسوان منهم ما ركزت منو واكيد هو راح يجي هسه ميصير الواحد يبدله باي شخص مو شرط احبه اي شخص المهم مو هو يا ربي ما اكدر اوكف مقابيله واكولها زوجتك نفسي اشو احس روحي مثل طير كان طاير وغفلة يحطوه بقفص وتعال كابل صاحب القفص 

اهله كانوا مستعجلين يريدون العرس باقرب وقت واجتي امه وخالته واتفقوا ويه اهلي والذهب لان اني ما قبلت اطلع وياهم جابوه لاهلي وياهم وكان شي راقي ونازك واللي عرفته سراج ماخذه عود هم طلعت العتاوي تعرف تختار يلا الحمد لله هم اكو شي مشترك بذوقنا عالاقل 

حضرت الريوك الي ولامي وابويه وهشام اصلا ما كعد ولا تريك زيانا وطلع مبدل وركع الباب وراه مو راضي على زواجي ولحد قبل بيوم من عقدي ضل يكول ارفضي واني بضهرج بس كلنا تعبنا من المشاكل وياهم واذا عاندت معناها هو يطلك فاتن واني ادري اجني عليهم هيج لان اثنينهم ضايعين ... خابرتني قبل ايام تبجي باركت الي عالزواج واللي افتهمته اهلها حابسيها بغرفتها لحد يوم زواجنا اني وسراج يلا ترجع لهنا صوتها تعبان ولا كأنها فاتن اللي اعرفها تتعذر وتبجي ندمانه وتبجي على هشام اللي مو راضي يجاوب اتصالاتها واني ما اكدر اصير سبب بفراقهم

كعدت عالسفرة مقابيل امي وابوي ودمعتي مجلبة برمشي لا راضية توكع ولا ترجع واقتنع وكافي خوف وحسبات وتفكير تعبت والله 

ابوي اقرب الناس الي ويعرف باحساسي ومشاعري بلا ما احجي مد ايده بالخبز مبتسم الي اكل
-اخذي يابه مدي ايدج يلا اكلي تره ما اقبل تضعفين صار سنين اجمع خدودج نص عمري قضيته من اباوع الهن اكول خيرات ربنا كلها هنا 

-ابتسمت وعيني دمعت ...اضحك على تعبيره من كنت صغيرة لحد ما كبرت كان يغنيلي اغنية اموت عليها تمنيت يغنيها هسه ويخفف همي وحقق مطلبي وكأنه كاعد بين افكاري وبده يغنيها تكول:
-صغيرة ...ومولدنه وخدودها خير السنه يا من قطف يا من جني
..صغيرة ..ومزينة وعيون بتقول اسكني فيني وطيري يا ديني
...يا حلوة كل الهوى ذبل عينيك الهوى اللي بيجي لحيكم قلبوا عشق واستوى
..يا حلوة كل السهر هدهد حلاها السهر طال الحكي عالحكي وضوا عليك القمر

ضحكت من قلبي ورديت عليه
-شعنده وديع الصافي من الصبح ههههه ....طبعا والدي بالضبط يشبه وديع الصافي صوت وشكل بس والدي دبدوب ووجهه ضحوك اكثر واحلى وابيض منه واني وهشام نسخ منه😁😁 مرات حتى اني وهشام وامي من نريد نتشاقى وياه نسميه مراد الصافي 😂

-هههه هاي شلون اكعد بيوم وما اشوف هالضحكة وهالوجه الحلو ببيتي والله هذا سراج محظوظ وحظه من السما راح ياخذج من عدنا هههه

دنكت لان ذكرني بغريم الروح اي سراج صار غريم روحي وعهد عاهدت نفسي اقلب حياته 

شافني ابويه غيم وجهي وغابت ضحكتي وامي كامت تبجي بصفحة عود راح اتزوج
-شبيج يا بنتي تره الزواج سنة الحياة وسراج خوش سراج

-لا ابد

-ليش بنتي اني صح ساكت وما تدخلت قبل بس احنا شايفيه خوش ولد وما اعرف ولا تكولين لان مطلك مرته لان انت شفتيها شلون تعامل اهله ... ليش انت معانده عليه صار بينكم شي اذاج من جنتي تشتغلين عدهم كولي تره اني ابوج واكدر اوكفه عند حده وابعده واحميج لا تشوفيني هيج تره مو عاجز ولا ضعيف بس لان اني اشوف شي وانت يمكن شايفه غير شي يجوز ما اعرفه اني اشوف زواجكم من هالعائلة انت واخوج قوة مو انكسار وزواجكم باختيارهم ورضاهم لا وحبهم وهالشي ما صاير قبل اهلهم حبوا بس ما اخذوا اللي يحبوهم ابد ومعليج بكلام الناس على متكبرين هاي انت فايتة بيوتهم وشفتي بينهم شلون المحنة والتواصل الناس تحسدهم على جمعتهم تره ما يطيح احد منهم الا الكل تركض اله 

حتى كلامي تره اني بعيد مو منهم ولا حبيتهم حالي حال الناس بالمنطقة بس تره اللي يصير بنصهم ومنهم ما يوكع ابد واني علمتني الدنيا البشر لازم عنده عزوة وناس يشد روحه بيهم عليش بعد خايفة وانت سراج شاريج وراح يكون سند وقوه لحياتج الجاية انت واخوج 

..اهله ما رادوا مشاكل وياكم رغم انت تعرفين اذا رادوا يأذون ايدهم طايلة واخوج يكدرون يخلونا بعد ما نشوفه بعيونا ومثل ما طلعوه بالاولى والثانية يكدرون يضيعوه 

بردت اعصابي وهدأت بتسكين ابوي جراحي بكلامه اكو شغلات تشفع لاهل سراج يمي بس هو ما اله شفيع ولا محامي. 

......

مقابيله واكفة بعقد المحكمة وعقدنا كنت على اعصابي ورددت بعد القاضي بصوت مخنوك وبس كملنا العقد امه واخته هلهلوا وغطوا على دموعي اللي جرت 

بعدني امسح بعيوني ايده حاوطت خصري وسحبني بجواره ويضحك ويتلقى تبريكات الحاضرين وسحبني بنفس الطريقة ايده محاوطتني بامتلاك مره يحطها على كتفي مره يجرني من خصري مره يحط ايده الاثنين على خصري ويدفعني واني كارهه لمساته مقرف بكل شي لمسته ما بيها براءة ابد 

لما وصلني لسيارته كنا نمشي وره اهلنا خلاهم يصعدون بسيارة ابو منتصر اللي كان حاظر بعقدنا وشاهد عالعقد كلهم صعدوا ويه ابو منتصر وويه اسعد وامي اخذوها وياهم طبعا شويه وعشيرته كلها تحضر العقد واحنا جايين بس اني وامي حتى حسيت بضعف اووف ابوي كا يكدر يحضر لان محكمة وفره وهو تعبان وهشام اصلا بغير عالم وخفنا نكول اله يحضر لا نتخازى بالمحكمة ونكوم نفاكك عركه 

اجيت اتبع امي حسيت ايده واصابعه انغرست بخاصرتي موقفني يمه
-اخطي خطوة وشوفي شيصير
تبسمرت بمكاني وعيوني غوشت والله خايفة منه اني قوية صح بس سراج يخوفني بكل مره من تقابلنا لحد هسه
بقيت بمكاني اشوفهم وهمه يأشرون النا بايدهم بتحية رايحين لبيت ابو اسعد واحنا نتبعهم
كانوا محضرين النا عزيمة عدهم تقاليد بعد عقد المحكمة اهل العروس واللي وياها بالعقد يتغدون ببيتهم
فتح بابا سيارته اللي وصعدني للحظه حسيت بفرح ولمعت ببالي فكرة اول مره واحد يفتح الي الباب ويسدها حسيت بغرور واني ابد ما حاسه بهالشي قبل 

صعد وشغل السيارة ودنك عالمسجل وصار قريب مني واني ابتعدت بسرعة بس بقيت اباوع عليه وهو يشغله وحط اغنية لماجد المهندس تكول 

انا بلياك ...اذا ارمش الك تنزل الف دمعة ..واذا اتنفس بدونك احس ويه النفس وجعه 

ورفع راسه وباوعلي وغنا ويا ماجد
- هذا انا حالي صار من انت مو يمي ...وحق ربج احبج بزونتي ليش ما تحبين عتويج😉😉

.........

عابتلك سراج خليتني انزل الاغنية مرتين 😒

وانت عيني لماوي بعد شتريدين الاب يغني وديع والرجال يغني ماجد بنفس اليوم 🤩

واني من يريد يتغزل  يغنيلي ..... يا زارعين البزرنكوش ازرعوا حنه ...هي هي خوش بنيه عمي والله ادري خوش بنيه😭😭