،عمتي جرت على الجنازة وقالت الليله وووووب دي جلابيه عبدالله
قولته ليها ابوي وجريت على إتجاهو وبقيت اصرخ واقول ليهم ابوي الحاصل عليهو شنو ،وااااي ابوووي ،ابوووي م مات م مات م تقولو لي ابوي مات ،والنسوان بقو يكوركو والرجال نصهم ببكو ونصهم بحاولو يدخلونا البيت ،والبيت اتملا كواريك وبكى وانا خلاص دخلته في حاله هستريا وحسيت انو الدنيا دي ضاقت بي وبقيت شايفه طشاش طشاش بعدها م حسيت بي شي تاني الا والناس بتصحيني وبقولو لي امشي شيلي العفو من ابوك واقري ليهو قرءان،قمته على حيلي وجريت على إتجاه الرجال بالجلباب بس الا جات بت الجيران لبستني التوب،دخلته لقيت جنازتو في وشي وعماتي واخواتي حوالينو وببكو ،بقيت مترددة وواقفه في محلي وابكي وابكي وقعته جمب رجولو وبقيت اصرخ باعلى صوتي ،خالي التاج جا رفعني وبقى يهدي فيني وانا اصرخ بأعلى صوت عندي واقول ليهو م فضل لي زول ي خالي م فضل لي زول خلاص امي وابوي ماتو وخلوني براي ي خالي خلوني براااي😭😭😭😭😭حبوبه جات حضنتني وبقت تبكي وخالي التاج زاد بكى من كلامي،جدي جا داخل بقى يتكلم ويمسح في دموعو قال لي التاج طلعهم برة بعد كدة خلاص عشان نطلع الدفن،اول م سمعنا قوله دفن دي بقينا نصرخ ،طلعونا برة الغرفه بالقوة وخلاص جات لحظه طلوع الجنازة،الحله دي كانت كانو فيها مكبرات صوت من شدة الصراخ رجال على نسوان كانو ببكو بأعلى صوتهم ،ونحن نتمردغ في التراب ونكورك لغااايه م ركبو العربات ومشو ،بعدها حالتنا بقت تحنن الكافر وانا الدنيا دي حسيتها مسخت علي كل شي في الدنيا بيتاخد مني قدام عيوني،حياتي كلها كانت عبارة عن امي وابوي واسي انا فقدتهم الإتنين في سنه واحدة في اصعب إمتحان من كدة؟طيب انا بعد كدة هعيش كيف؟كل الحوالي ديل م بساووو ضفر من ضفور امي وابوي وهعيش عشان منو وانا اساسا كنت عايشه بيهم؟فقد الأم والأب هو باب لفقدانك لنفسك عمري م اتخيلت انو وجودهم نعمه ويمكن تزول في يوم الأيام،عمري م اتخيلت انو انا هفقدهم ورا بعض بالطريقه دي،عمري م تخيلت انو حيجي يوم وهفقدهم اساسا😭😭💔
ونحن قاعدين فجأهه جات عمتي الصغيرة طبعا ساكنه بعيد مننا،جات داخله وتصرخ وجادعه التوب وسط الرجال وشغاله تقول اسي كان معي،اسي طلع مني،فات وين خلاني،خلاني لمنو ي اخواني خلاني لمنو مات وقطع قلبي قطع قلبي ي اخوانا لا إله الا الله ،الناس بقت تقول ليها إستغفري وتهدي فيها وانا شايفاها طشاش طشاش وسامعه صوت نسوان وراي بقولو الله ينعلها الما بتخجل قليله الحياء راجلها ميت وهي جايه تتجدع قدام الرجال كدة بلبسها دة ام سمعه فايحه
انا بقيت كل م اقوم امشي خطوتين ادوخ واقع كل م اسمع صراخ الناس بدخل في حاله تانيه،كل م يجي زول من اهلنا يعزيني ويبكي بلقى نفسي دوخت،ساقوني ودوني بيت ناس حبوبه وقالو ماف زول يمشي عليها عشان حالتها تعبانه وجات قعدت معي فاااطمه اختي وشوق بقينا راقدين في السراير ودموعنا جاريه وعيونا في عيون بعض،فجأهه سمعنا صوت زغااريد عااالي ولمسافه طويله من الخلعه طلعنا جرينا بيتنا ومن بيتنا لقينا الناس كلها واقفه في باب الشارع رجال على نسوان،طلعنا فجأهه اسمع صوت زغراد متواصل وصوت بقول"دة حقنا ي احمد دة حق ولدي ربنا بياخدو منكم شايف ولا م شايف؟حلفتو قسم عشان تطلعو ولدكم بريئ من ميته ولدي وياهو ربنا بياخد لي في حقي،انتو قايلين القسم دة ساهل؟قايلن اسم الله دة م بقطع ي احمد؟انا ام وحشاااي إتحرق واليوم البتك وراجل بتك وانت حلفتو قسم في المحكمه وقولتو ولدكم م كتل ولدي ولا كان هنا اساسا انا رفعته يدي للمولى عز وجل ودعيت ربنا يوريك ليهو في عيالك ويحرق كبدتك زي م حرقتهه كبدتي على جناي ي احمد وربنا اصلا م بظلم زول بتك جنت قبل م تموت وياهو راجلها لحقها بالميته الكعبهه دي وانت ميتك حتكون اسوأ ي احمد يمهل ولا يهمك ي احمد اسم الله دة م ساهل وانت عشان تحمي ولدك من حكم الدنيا خليت بتك وراجلها يحلفو اسم الله وم قدرته تحميهم من حكم ربنا الف حمد وشكر ليك ي ربنا انا كدة ي دوب حشاااي برد على ميته ولدي الإنصاف الما أنصفتنا ليهو المحكمه انصفني ليهو ربي،مشيت عليها ولزيتها بكل قوتي وقولته ليها دة شنو البتقولي فيهو دة انتي؟وانتي منو اساسا؟انتي بني ادم انتي؟مبسوطه على موت ناس؟
قالت لي انتي بتهم القالو جنت مش؟زغردت تاني ايووووويووي وقالت ليهو ولسسسسه ي احمد القسم دة حيقطعك اكتر واكتر زي م اسي قطع راجل بتك في الحادث دة،شايف ولا م شايف حادث حصل براهو عربيه اتقلبت من غير م يكون اي شي ماشي في طريقها اها دي عداله ربنا ي احمد دي عداله ربنا ي احمد،لزيتها بي يدي قولته ليهم دي منو المجنونه دي وقسم شنو الله لا جاب باقيك امشي من هنا يلا امشي،وانتو ساكتين ليها ليييه؟ابوي لسسسه قبرو م جفى وتجي واحدة زي دي وتتكلم فارغ وانتو بتعاينو ليها؟فاطمه قالت لي شهد دي مرة مجنونه سااي تعالي مسكتني واعمامي بقو يقولو لينا ادخلو جوة،والمرة لسسه بتزغرد وفي نص الشارع وبتقول احمد بتو جنت وماتت،وراجل بتو اسي مات ،وبت بتو الحلفت قسم جنت،ربنا اخد بحق ولدي ي ناس دم ولدي اصلا م راح ساااي إتحمل نتيجه اعمالك ي احمد،إتفكيت من فاطمه قولته ليها مجنونه لنفسها م تجي تتجنن فينا هنا وربي م اخليها مشيت عليها جو اعمامي مسكوني وواحد منهم ضربني كف ودخلوني البيت وانا لسسسه بصرخ وبقول ليهم م سامعنها بتقول في شنو؟دي بتزغرد في نص فراش ابوي الما تم ليهو كم ساعه في قبرو،
بعد صراع وبكى وصراخ وجوطه دخلوني الغرفه وقالو م تخلوها تطلع ..
المساء جدي وقع بصدمه ضغط ودهو المستشفى قالو ضغطو مرتفع شديييد،طبعا جدي ماف مرة من نسوان بيتو وجوة بيتو إتكلمت معاهو بالنبرة دي لما يطلع الشارع الكبار والصغار بحترموهو،ودوهو مستشفى كبير في المدينه مسافه ساعتين مننا بعد الفحوصات وكدة قالو الضغط عمل جلطه في الرجل وبكدة فضل ملازم المستشفى والناس بقت متقسمه نصين نص في العزاء ونص مع جدي ونحن روحنا بقت مشحتفه م عارفين نلقاها من وين ولا من وين فجأهه الهدؤ الكنا عايشين فيهو زمان إتحول لحياة باهته وكلها مصايب
عدت الأيام وجدي طلع من المستشفى وانا حالي من سيئ لي اسوا وانا خلاص الفيني كملت لا باكل ولا بشرب ولا واعيه بالبحصل حوالي الدنيا م ليها اي طعم بقت بالنسبه لي،في يوم وانا قاعدة جا خالي التاج دخل لي في غرفتي،قال لي الحياة دي لا بد من انها تستمر ونحن اصلا فيها ضيوف والحي ابغى من الميت وانا وجدك وحبوبتك قاعدين اصلا م بتجيك عوجه م تفتكري نفسك براك ابداا،دموعي جات جاريه،
قال لي طبعا الليله كانت محكمه الطلاق،نحن م مشينا لكن المحامي إتكفل بالموضوع وشرح للقاضي ظروفك وكدة والقاضي طلقكك غيابيا ودي ورقه الطلاق حقتكك،
مفروض انبسط صح؟مفروض ابدي اي ردة فعل توحي بي انو الخبر فرحني لأنو اخيرا ربنا حلاني من عذاب كنت هتجبر عليه العمر كلو بس م حسيت بأي شي،فضلته سااكته وانا بعاين ليهو ودموعي في عيني،
طلع وخلاني وانا اتفقعته بكى وبقيت اقول ليييه ي ربي م كاتب لي غير الحظ السيئ في كل شي ليييه ي ربي بس،
يوم الأربعين ونحن قاعدين بنعوس في كسرة الغداء فجأهه جات مرت ابوي الصغيرة رحاب ومعاها خالي التاج نادانا واحد ورا التاني اخواتي كلهم وحبوبه وعماتي ودونا بيت ناس حبوبه الضيافه ،حبوبه قالت ليهو خير ي التاج في شنو؟قال ليها والله ي امي عبدالله دة الله يرحمو بالجنه والخلاهو وراهو دة ياهو من نصيب نسوانو واولادو واهلو وعشان م نخلي المواضيع تطول وجزؤ منهم يتظلمو اسي حار حار قلنا نوزع ال...
حبوبه قاطعتو قالت ليهو بنهرة التاح لا إله الا الله؟
قال ليها محمد رسول الله،قالت ليهو دة كلامك انت ولا كلا ناس تانين؟
قال ليها دة الصح ي امي،
قالت ليهو م بتخجلو؟متين مات لمن جارين ورا قروشو وممتلكاتو تفوو عليكم،
عمتي رحاب قالت ليها دة حق ي عمتي وعشان ماف زول يتظلم ،
قالت ليها البظلم منو؟والفاضي لقروش وممتلكات منو؟نحن الحمدلله ضراعنا اخخخخدر زي كلامي دة لا هينين لا لينين لا بنفتش ورثات الناس...
خالي التاج قال ليها ي امي
قالت ليهو اسكت هسسس،
قمته طالعه قال لي انتظري،قولته ليهم الشايفنو انتو اعملوهو انا م بتفرق معي ابوي تحت التراب قروشو فايدتها شنو؟
طلعته وخليتهم بتناقشو،بعدها جو اعمامي وقالو تتقسم بس واي زول ياخد نصيبو وبالفعل دة الحصل في اليوم دة،
اليوم التاني عمتي رحمه اصبحت زعلانه وتتكلم وبتقول عمري دة كلو عايشتو بي وضعو الكعب عايشتو كسرة بي مويه اكلتها معاهو لا كليت ولا مليت ولا في يوم كشرته في وشو وفي النهايه عمل شنو؟الخزنه ختاها في بيت رحاب الصغيرة الجات بي قفاي ،واوراق البيوت ومخازن المخاصيل والإستثمارات العاملها كلها مديها ليها وممسكها مفاتيحها والبهايم والبقر الفي الخلا م بقلو عن 5الف راس ،والله العظيم والله العظيم ي جماعه صدقوني التركه الوزعوها دي ولا ربع التركه حقت عبداله كلها شالتها مرتو واخوانو نحن طلعنا بقد القفه ولا شي م طلعنا بيهو دهب زي الناس ساي م لبسناهو زيها هي الجات ورانا لابساهو من ساسها لي راسها
حبوبه قالت ليها ي رحمه هي اهدي كدة واقعدي في الأرض سمح ناقصاك حاجه انتي؟
قالت ليها الزمن م معروف ي عمتي لي قدام م معروف اليحصل شنو وانا عندي بتين صغار قدامي دايرات ياكلن سمح ويلبسن سمح ويتعلمن واي شي في الدنيا دي انا كان انقطعته اجيب من وين م من حق ابوهن الخلاهو ليهن دة،
قالت ليها قدر الجاهم دة إحتفظي بيهو وجدهم دة ياهو قاعد م بقصر منهم في شي لمن ينسترن في بيوتهن ،
بالفعل كل اخواتي وعماتي م كانو راضين بالتقسيم لانو ابوي ورثتو الخلاها كتيرة شديد بس المشكله انو كان كلها حاصرها وخاتي قروشو واوراقو في بيت مرتو الصغيرة المسكنها بعيد مننا وهي ابدا م اعترضت على التقسيم لأنو ضامنه انها عندها شي وشويات،انا شخصيا م كان فارق معي ابدا...
بعد يومين خالي ياسر جا طبعا كان في إندهاش غريب في جيتو حسيت انو كل ناس البيت مخلوعين منها وحالتو زاتها م كانت حاله زول جاي من السعوديه ،قال لينا اول م سمعته الخبر جيت طوالي م إنتظرته زاتي،في يوم وانا شايله الغداء مودياهو ليهو سمعته حبوبه بتقول ليهو الجابك شنو انت م كان ترجع،وهو بقول ليها يمه اختي وراجلها يموتو وم اجي ؟وابوي عيان كمان كيف م اجي ؟لما جيت داخله سكتو ،خالي ياسر قال لي قالو عندك مشاكل مع راجلك مالو هو كمان الخايب التاني،
حبوبه قالت ليهو اسكت ساي من عمايل راجلها البطاله الما بتتحكي، طلعته وانا ساكته بقت في إستفهامات كتيرة في راسي بعد سماعي لكلام حبوبه معاهو
عدت اربعه شهور من وفاة ابوي وجدي كان م بين صحتو مرة تتحسن ومرة تتدهور واحيانا نشيلو ونختو عشان م بقدر يتحرك كتير ،وعشان هو بحب يقعد قدام باب الشارع كتير بطلع ليهو الكرسي وبسوقو يقعد شويه وبرجعو،في يوم وانا بطلع في الكرسي لاقيت سعد ود خالتو فتحيه،سلم علي كيفك تمام،قولته ليهو الحمدلله وانت كيفك؟قال لي تمام والله عمي احمد كيفو؟قولته ليهو والله صحتو في تحسن شويه اسي مطلعه ليهو الكرسي دة عشان اقعدو فيهو،قال لي بتحرك كويس؟قولته ليهو يعني ،قال لي طيب خليني اساعدك واحركو معاك ،قولته ليهو لالا ماف داعي قال لي لا والله ،
قولته ليهو طيب دخلته البيت طبعا صالون الضيافه بتاع جدي البقعد فيهو جمب الباب قولته ليهو إتفضل،
دخل وقال السلام عليكم،قولته ليهو خيلاني الاتنين مافي وحبوبه دي في العريشه بهناك بتعوس في الكسرة،قال لي ايواا دخل الديوان وسلم على جدي،جدي قال لي جيبي ليهو مويه مشيت اجيب المويه لقيتو ساقو مشى بيهو برة وهو زاتو جاب ليهو كرسي وقعد معاهو،جبته ليهم المويه ومشيت عملته ليهم شاي وجيت لقيتهم بتونسو و يضحكو سااي إستغربته طبعا لانو طولته م شوفته جدي بضحكك،
وإتكرر الموقف في يوم جات مطرة غزيرة والشمس فتحت شديد والأرض شبه جفت والمقشاشه بقت عليها احلى لأنو رملتنا بيضاء ،كنسته بيت ناس حبوبه كلو ،وسوقته اخواني الصغار وطلعته بيهم عشان نكنس الشارع ،انا كنت بكنس وهم بشخبطو لي وانا بكره الحركه دي ، بقيت اكورك فيهم واجري وراهم عشان اضربهم وادخلهم البيت بس فجأهه إتزلقته ووقعته في الأرض واخواتي بقو يضحكو علي وانا رجلي وجعتني،فجأهه احس بي زول برفعني من الأرض إتلفته عاينته ليهو لقيتو سعد وهو داير يضحك وم داير،والتوب نصو مرفوع ونص واقع،وشعري فاتح،م قدرته افتح خشمي قولته ليهم الليله اصبرو لي وجريت وراهم دخلته البيت وانا محرجه،
يلا الفترة دي انا بقيت م بقعد في البيت بطلع امشي الحواشه واحيانا امشي البحر اغسل فيهو وارجع ،وبعد مرات بقعد في الشارع مزاج بس،وبمشي السوق اجيب إحتياجاتنا وكدة،
في يوم وانا راجعه من الحواشه إتلاقيت مع سعد هو سايق حمار وشايل فيهو قش،سلم علي قال لي اركبي اوصلك،قولته ليهو لالا بمشي برجولي براي امشي انت،والدنيا كانت مغارب ،قال لي الزمن اتأخر م بخليك براك نزل من حمارو وبقى ماشي معي وهو بتكلم معي وانا بجاوب على حسب كلامو لغايه م دخلنا الحله ووصلنا البيت لقيت خالي ياسر واقف برة،شافنا وهو صاري وشو،سعد سلم عليهو بحرارة بس خالي ياسر كان عكس وقال لي بنهرة خششي جوة سرعه دخلته جا لاحقني قال لي مشيتي وين؟قولته ليهو مشيت الحواشات!!قال لي مشيتي الحواشات لشنو عندك فيها ابوك هناك؟ووقع فيني ضرب بالسوط ،حبوبه مسكتو وقالت لي اجري خشي جوة ،انا اصلا م اتحركته من محلي ولا الضرب اثر علي إتفك من حبوبه وبقى يضرب زيادة وقال ليها م تمسكيني ي امي بنقدر على سمعه العزبات نحن بنقدر؟كيف هي بت مطلقه وتخليها تعتب عتبه الباب دة وتطلع؟وكمان جايه مع سعد جاين من وين كنتو وين اتكلمي وبقى يضرب زيادة وحبوبه بقت تكورك عماتي جو جاريات وبقو يحاولو يمسكو فيهو ويدخلوني منو جوة،حبوبه قالت لي ي بت اسمعي الكلام الله يرضى عليك دة مغضوب دة بتموتي في يدو،قولته ليها حبوبه م عملته شي غلط انا وانا استاذنتك واستاذنته جدي وسعد دة انا لقيتو في تقاطع الحفيرة بس وجا معي وين الغلط يعني؟قال لي وكمان بتردي انا لسانك دة الا اقطعو ليك جدي نهرو قال ليهو ي ولد
حبوبه قالت ليهو صحيت ابوك من النوم اسكت لسسه م اتعافى كويس داير تمرضو تاني الله يمرضكك..
من صوت صراخو الحله كلها عرفت انو ضربني،بعد العشاء جات خالتو فتحيه ام سعد سلمت على حبوبه،قالت ليها ي عششه الليله ولدك ياسر تصرفو ابدا م سليم اسي الحله كلها تتكلم قالت ياسر قبض شهد وسعد سوا وانا الكلام دة م برضاهو في ولدي ولا دي اخلاق ولدي وزاتها شينه في حق بتكم كان عزبه برضو شينه ي عشه ي اختي نحن ناس بنعرف الأصول كويس خلي ولدك دة يفتح عينو كويس ويشوف الأرض انا سمعه اولادي فوق كل شي مربياهم على الاخلاق والأصول ومحترمين بين الناس دي كلها ولدي لما سمع بالكلام دة م رضاهو م عشان نفسو لا والله عشان بتكم م رضاهو وحكى لي قال لي يمه انا البت دي لاقيتها في الشارع جايه من الحواشه والدنيا مغارب م قدرته اخليها تجي براها الدنيا م معروفه جبتها معي يقوم خالها يضربها؟
حبوبه قالت ليها معليش ي فتحيه اختي حقكك علينا والله نحن عارفين اخلاق اولادك والله م بتورينا ليها انتي اتربو وسط اولادنا وهم زاتهم زي اولادنا واحد م شفنا منهم الا كل خير لكن انتي م عارفه ياسر ولدي دة جهلو غبي ي اختي؟
قالت ليها انا بس جيت قلت النحدثكك والله يهديهو إن شاءالله،
حبوبه قالت ليها والله م بتمشي الا تشربي الشاي معي،بالفعل قعدت شربت الشاي ومشت،
اليوم التاني حبوبه قالت لي انا ماشه لي فتحيه دي اودي ليها الفطور دة واجي عشان حركه خالك العملها امس مع ولدها دي م ظريفه،وهي طالعه لاقوها نسوان في الباب جاينها بالجبنه جات راجعه معاهن بعد م ضيفناهم وكدة قالت لي امشي ودي الصحن دة لخالتك فتحيه وتعالي جري قبل خالك م يلقاك سمح،قولته ليها كويس شلته الصحن وطلعته،طبعا ناس خالتو فتحيه ديل هم على قدر حالهم وباب شارعهم م زي بابنا يعني م عينه الابواب البتندق والزول يجي يفتح بابهم معمول بالقش عادي ممكن تلز الباب وتدخل ،دخلته قولته السلام عليكم؟سلمته كتير بعدها مرت اخوهو قالت لي شهد وعليكم السلام إتفضلي إستقبلتني وسلمت علي بحرارة هي قدري كدة وبت حلتنا زاتها المعرسها اخوهو دي،قولته ليها خالتو فتحيه مافي؟قالت لي بتكون في اللدايه بهناك بتعوس تعالي قعدته وإتونسته معاها مسافه قالت لي م بتطلعي ولا بتجي لي زول و...لغايه م خالتو فتحيه جات سلمت علي اديتها الصحن،قالت لي عشه مالها تعبت نفسها كدة،قولته ليها ماف تعب انا ماشه،قالت لي معليش ي بتي على العملو خالك امس الله ينعلو،قولته ليها لا م مشكله يلا مع السلامه انا ماشه حبوبه منتظراني،وانا طالعه سعد جا داخل البيت لما شوفتو لمن شعر جسمي غزة من الخجل،سلم علي قولته ليهو اهلا وطلعته مشيت بإستعجال،
بعد اسبوع جاتني هبه مرت اخوهو وبقت تجيني طوالي وتتونس معي وكدة يعني شبه صاحبتني،وانا م قاعدة امشي ليها نهائي،عندهم مرت اخوهم الكبير ولدت حبوبه قالت لي نمشي ليهم بالفطور،مشيت معاها لانها غصبتني على كدة ،ونحن داخلين لقينا سعد طالع وقف سلم على حبوبه قال ليها استاذنك انا ماشي على الزراعه كدة اليومين دي الحصاد عشان كدة،حبوبه قالت ليهو سمح امشي ي ولدي ربنا يسهل طريقك ،فطرنا في بيتهم وشربنا القهوة واثناء م بنتونس هبه قالت كويس ي حبوبه عشه الجبتي لينا شهد دي والله بحنس فيها تحنيس م بتجي التقول بيتنا دة فيهو شوك بطعن،حبوبه ضحكت قالت ليها إتلومت لكن لالا تجيكم طوالي والله ي بتي،قامت واحدة من حمواتها قالت ليها الصحبه الحفت عليكم جديدة شنو إن شاءالله خير،هبه قالت ليها كل الخير فيها انتي بس عايني بعينك وخليك سااكتهه،
في يوم هبه كانت معانا والونسه جرت لي بعد العشاء قام راجلها رسل ليها ولد اخوهو الصغير قال ليهو ناديها،هبه قالت الليله ووووب خلاص جا لقاني مافي حيقوم الدنيا وم يقعدها يلا انا ماشه،حبوبه قالت لي امشي وراها قولي ليهو حبوبه عشه هي الاخرتها عشان كانت بتسرح ليها في شعرها،مشيت وراها وهبه خايفه وتترجف لغايه م دخلنا البيت،سلمنا عليهم كلهم كانو قاعدين في حوشهم الكبير ومفرشين سرايرهم وبتونسو،قولته ليهم حبوبه قالت ليكم انو هبه كانت بتسرح ليها في شعرها شان كدة اتأخرت قالت ليكم م تسألوها،خالتو فتحيه قعدت تضحكك قالت اجي ي بتي عشه قايله ولادنا زي ياسر ولدها ولا كيف؟والله زول سائلها مافي كان قعدت للصباح م بنسألها لكن سامي دة قال عندو عراقي وسروال اظنو لقاهن م مكويات ودايرها تكويهن ليهو عشان بكره ماشي بيهن الشغل،قولته ليها طيب مع السلامه تصبحو على خير،قالت لي تلاقي الخير ي بتي،طبعا الدنيا ضلام وهم زاتهم م عندهم كهربه ،كان في الحله الموصلين كهرباء ناس بيتنا وبيوت بالعدد بس،طلعته من البيت بس احس بزول بقول لي شهد،قول شهد دي انا صرخته قال لي اسكتي انا سعد اسكتي ،قولته ليهو في شنو انا ماشه خالي ياسر كان جا لقاني مافي بشاكلني،قال لي داير اتكلم معاكي،قولته ليهو لالا انا م بقدر اقيف وجريت دخلته بيتنا لمن برجف من الخوف،
كنت بحاول على قدر م اقدر إني اتجنب المشيه لبيتهم لأنو ناس الحله تحت تحت بدو يتكلمو ويقولو حجات م تمام المشكله انو انا م سمعته الكلام دة من زول غريب سمعته عماتي الإتنين بتكلمو وبقولو بقت ماشه سااي وكل الوقت في بيت ناس فتحيه الفيهو اولاد م معرسين وهي عزبه،وعمتي رحمه قالت ليها الحله كلها ماسكه في سيرتها اسي ،عماتي بدل م يجو وينصحوني ويحزروني بقطعو من وراي
قلت لنفسي الكلام دة طالما ناس البيت قالوهو معناها ناس الحله م مقصرين،بقيت اتجنب هبه وعلاقتي معاها عشان م ادخل نفسي في متاهات لغايه م هبه زاتها جاتني في يوم وبتتونس معي قالت لي سعد رايك فيهو شنو؟قولته ليها راي فيهو في شنوو يعني مالو؟بقت تتبسم،قولته ليها مالك ها؟قالت لي سعد دة قال دايركك،قولته ليها شنوو؟قالت لي اها انتي قولك شنووو؟؟قولته ليها ي بت ها انتي مجنونه دة شنو البتقولي فيهو دة؟
قالت لي هو كلمني وقال لي اشوف رايك انتي اول عشان م داير يستعجل ويكلم اهلك من غير م يتأكد من موافقتك،وبعدين تعالي هنا يختي سعد مالو؟ي يمه بنات الحله كلهن جاريات وراهو وهو م شغال بيهن السماحه حقتو يختي انا زاتي لو كان اتقدم لي هو قبل اخوهو المعولق دة كنت وافقته بيهو والله،قولته ليها ي زوله اتهدي،قالت لي قولي عاجبكك بس وم دايرة تتكلمي ياخي سعد دة منو الماعجبها في الحله؟بمشن الحواشات عشانو ،والقوام حقو واي شي عندو م فاضي لي سونيل شطه زاتو،قولته ليها سونيل شطه دة منو كمان؟قالت لي ممثل هندي بوريك صورتو بكرة ملصقاها في دولابنا اها قولي لي موافقه؟
قولته ليها اوافق شنو ي زوله م موافقه ولا اي شي،قولي ليهو هي قالت ليك م موافقه...
...
ي امي انا دايرها قولته ليك،
ي حاج الطيب فهم ولدك دة البت عزباء يتزوج عزباء كيف وهو شاب صغير لسه اول عرسه ليهو الكلام دة م بجي ي ولدي م بجي
ي امي انا عارفها متزوجه قبل كدة وبرضو دايره المشكله وين يعني؟م كتار من اهلنا اسي بعقلو نسوان اخوانهم بعد رجالهم يموتو،
ي ولدي افهم ديلك نسوان اخوانهم يعني مجبورين عليهم انت م مجبور عليها بت الناس دي ونحن شبك ناس حاج احمد دي ماااادايرنها ي ولدي
ي امي انا م عندي شغله بي حاج احمد ولا عندي شغله بي زواجها داك انا دايرها ي امي افهمي ي ابوي عليك الله اتكلم معاها والله ي ناس البت دي انا غيرها م بدور
سعد في بيتهم وبتناقش مع ابوهو وامو واخوانو وبشرح ليهم انو دايرني وكدة
خالتو فتحيه ي ولدي اسمع الكلام عليك الله اسمع الكلام والله هي كان نافعه م كان طلقوها من 5شهور وعملت مشاكل مع راجلها💔
ي امي قولي هي الإتطلقت بالمحكمه كان الراجل دة نافع كان قعدت معاهو،قالت ليهو ي ولدي بكرة تعمل فيك نفس العمله وتبقيك فرجه بكرة الحله كلها تقول سعد ود شيخ الطيب مرتو طلقتو م تشيل يدك وتتبظ بيها عينك ي ولدي
سامي ولدها قال ليها ي امي خليهو الراي رايو والعرس عرسو والعيشه عيشتو هو البعيشها انتي م تدخلي في حاجه زي دي ولا شنو ي يابا؟
ي ولدي لو إختار اي بت انا م عندي إعتراض اليأشر على اي واحدة من بنات الحلهه ديل وانا اجيبها ليهو لكن دي..
سعد قال ليها يلا ي امي دي الانتي قولتيها دي بس م داير غيرها انا وقام طلع
وهو طالع في الباب إتلاقى مع هبه،قالت ليهو اسمع النحدثك،قال ليها اها؟قالت ليهو شهد قالت موافقه وم عندها اي مانع قالت لي خليهو يكلم اهلي لو ادوهو انا م عندي مانع،الفرحه إترسمت في وش سعد ونسى نقاش امو معاهو وطلع،
شيخ الطيب بتكلم مع خالتو فتحيه بالليل وهم راقدين براهم قالت ليهو البت دي م دايرنها ي الطيب فهم ولدك الحاجه دي م بنعرس لي ولدي عزباء،
قال ليها كدة ي فتحيه احسبيها معي بالراحه كدة،الناس ديل واسطاتهم قويه شديد اسي الشركه بتاعه الحكومه لما جات تشيل اراضي الفلاحين حاج احمد دة لقى حل وسط وخلى الحكومه تشتريهم منهم بدل تقلعها منهم قلع
قالت ليهو ودة علاقتو شنو بالموضوع ي الطيب؟
قال ليها خليني اكمل كلامي الشركه خلت الفلاحين كلهم يبيعو اراضيهم بس لسه بزرعو فيها والمحصول نص ليهم ونص للحكومه صح ولا م صح؟قالت ليهو ايااا صح،اها حاج احمد دة انتي قايلاهو باع اراضيهو ولا شالتها منو الحكومه؟قالت ليهو م باع؟قال ليها ولا متر م باعو نحن زاتنا دي حاجه كويسه معانا ممكن نخليهو يتوسط لينا ويرجع لينا ارضنا دي لو ناسبناهو وبعدين عبدالله الله يرحمو كان يدو اليمين بس كان مفتح شديد وطلع منو بقروش جد واولادو ياسر والتاج ديل سفهاء ساي لا بطقعو ولا بجيبو الحجار ياكلو في قروش ابوهم ولافين ساااي اها سعد ولدنا دة زول بحب الشغل ومجتهد شديد ممكن حاج احمد دة يمسكو كل شغلو ومشاريعو ويطلع بي شي وشويات منو والله بكرة يمسكو اكبر المشاريع العندو رايك شنو؟شيخ احمد كبر وخرف وبقى م بعرف للحساب شي انا دة شوف عيني العمال بجيبو ليهو القروش الا بالشوالات يعني العرس دة ممكن يكون مكسب لي ولدنا ي فتحيه فكري بعقل،
سكتت،
اليوم التاني في صلاة الجمعه في الجامع اول م الناس صلو شيخ ابطيب وقف على حيلو وقال"ي جماعه استنو شويه وم تطلعو كد،وقفو قالو ليهو خير ي شيخ الطيب،قال ليهم ي جماعه انتو كلكم اهلنا وناسنا وكلنا حاجه واحدة في الحله دي،يلا انا اليوم واقف هنا دة وداير اطلب قدامكم كدة إيد بت عبدالله الله يرحمو حفيدة حاج احمد لي ولدي سعد وكلكم عارفين ولدي سعد م محتاج اشكرو ليكم وانا والله ي حاج احمد جاي وقاصدك في الخير وبتك دي زي بتنا اخلاق وادب وإحترام قلنا م بنفتش غيرها طالما عندنا جوهرة قدام عيونا،
جدي احمد قال ليهو والله م عارف اقول ليك شنو ي شيخ الطيب لكن انتو ناس م فيكم قول والله وولدكم سعد دة بالذات انا م شوفته بادبو واخلاقو عشان كدة اصلي م بأباهو والله ابشششر اديناهو ليها تب،خالي ياسر قال ليهو طلبته مننا الطلب دة قدام الحله كلها ونحن زاتنا م بنخجلكم ولا بنأجل الموضوع دة حررررم نعقد ليهو عليها اسي ولا بنستنى زاتو...
ونحن قاعدين وانا بعمل في الجبنه سامعين صوت سلاح إنضرب في الجامع،قولته ليها الليله عرس منو في الحله ي حبوبه؟عمتي رحمه قالت لي بري م عارفين ،حبوبه قالت لي اظنو من حله ورا،قلته ليهم العجين خلاص خمر انا ماشه اعوس الكسرة،حبوبه قالت لي الشمس ي بتي م تعوسي اسي،قولته ليها جدي بجي من الجامع جعان اسي امشي اعوس بسرعه احسن،مشيت شلته القش جهزته لدايتي وولعته الناس اول م بديت اعوس اسمع صوت زغاريد في بيت ناس خالتو فتحيه،فجأهه اسمع صوت خالي ياسر بقول "ابشري ي امي ابشري،"قالت ليهو في شنو ي ولدي خير إن شاءالله البشارة لي شنووو؟قال ليها بت بتك عقدنا ليها اسي...💜
#نتلاقى®