ذات انتفاضة

٢

في يوم وانا قاعدة في البيت سمعته الباب بدق،وهو عندو مفتاح يعني م بحتاج انو يدق الباب،طلعته مشيت على الباب لما قربتهه قولته منو في الباب؟سمعته صوت زول صغير بقول لي انا افتحي الباب،فتحته الباب لقيتو شافع،قال لي س س سلام عليكم ،قولته ليهو اهلين ازيك،قال لي ا ا امي قالت ليك هاك دة ومدة لي صحن كدة،قولته ليهو شكرا بس انتو ساكنين وين؟اشر لي بي اصبعو وقال لي هنااااااااك كانو مقاصدننا بس بعاااد عاينته بإتجاه م اشر شايفه واحدة رفعت لي يدها رفعته ليها يدي قولته ليهو قول لي امك قالت ليك شكرا،قال لي عفوا ،قام ماشي وبصرخ ي امي قالت ليك شكرا ،ي امي قالت ليك شكرا،اتلفت علي قال لي إسمك منو انتي؟قولته ليهو اسمي شههد...

لمن حسيت بي إنو شويه ردت فيني الروح بي جيه الولد وشوفه امو دي كنت كاني مسجونه والحله زاتها التقول منفى م ساكنينها ناس كتار،فتحته الصحن لقيت فيهو زلابيه دخلتها المطبخ ورجعته مشيت شلته المقشاشه وقعدته اكنس في الحوش وانضف تحت الشجر من الصفق الفيهو ،اثناء م بلم في الوساخه اتلفتهه فجأهه لقيتو داخل البيت براحه زي الحرامي انا زاتي لمن اتخلعته قولته ليهو بسم الله مالك ماشي كدة؟سكتت وطوالي مشى دخل البيت وانا فضلته اكمل باقي مكشاشتي،فجأهه اسمعو بقول لي مشيتي وين الليله؟اتلفته عليهو لقيتو شايل صحن الزلابيه وملامح وشو م بتتفسر،قولته ليهو م مشيت مكان،قال لي م تكذبي قولي مشيتي وين وقعدتي مع منو والطلعك من البيت دة شنووو؟قولته ليهو والله م طلعته ي ود الناس ،جدعني بي صحن القزاز بي زلابيتو اتحركته كدة بس ضربني في رجلي واتكسر لمن إتجرحته،قولته ليهو م طلعته انا جابو لي ولد صغير قال رسلتو امو يجيبو لي،قال لي جابو ليك ولد صغير ولا جابتو ليك امو وقعدتي معاها وحكيتي ليها عني مش؟قولتي ليها شنو عني؟قولته ليهو ي ود الناس انت مجنون في راسك.دة،بس قوله انت مجنون في راسك دة فار وجاني وبقى يضربني ،ضربني بطريقه كدة م بتقدرو تتخيلوها بضربني وبقول لي انا مجنون مش انا مجنون صح خليني اوريك الجنون دة الليله ضربني بي حجمو وضخامه يدو وكل شي انا كنت جمبو ولا شي،كان غضبان بطريقه كدة خياليه وغضبو داك كلو فضى فيني بالضرب ،ياخ شدة م دقاني وقلع لي شعري دخلتهه تحت السرير رفع السرير وقلبو ومسكني وكمل ضربو لمن اغمى علي،لما وعيت لقيت نفسي مرميه في الأرض وجسمي دة كلو رضوخ ومورم وعلامات بكيت كدااا بعدها قمته دخلته الحمام لقيت شعري مقصوص من بدايه حدو والحاجه دي وجعتني وجعهه بكييييييت قدرتي شلته الليل كلو بكى ،وبقيت اتكلم مع نفسي حتى اهلي م بسالو مني معقوله امي واخواتي وابوي م هااين عليهم يسالو مني الفترة دي كلها؟3شهور انا قاعدة في العذاب دة وماف زول منهم جاب خبري،كل الناس دي خلوها امي معقوله م بتسال؟💔عدت الايام وبقيت انا بخاف اتلاقى معاهو حتى وهو كل يوم بزيد سؤ وكل يوم لازم يكورك ويصرخ على اي حاجه والحاجه لو شايفها بعمل روحو م شايفها عشان يخليني اجيبها ويشلتني برجلو،

يوم قولته ليهو شوف انا ماشه اهلي م توديني ليهم والله اهرب وبمشي ليهم،قال لي جربي اهربي عشان اكسرك واجيب اجلك وفي نفس اليوم مشى جاب طبله كبيرة وبقى يقفل بيهم باب الشارع لما يقوم طالع اساسا بيتو كلو مسورو بي سلك شايك،اليوم التاني قولته اصلي م بقعد بعد م خليتو طلع الشغل مشيت افتش لي طريقه اطلع بيها من البيت دهه لقيت ماف اااي طريقه ،شلته لي جردل وحاولته اطلع طرف الحيطه عشان اقلع السلك الشايك بس م قدرته،رجعته ،وانا قاعدة طول اليوم وبفكر فجأهه احس بي حاجه تضربني في راسي إتلفته مخلوعه لقيتو هو وضاربني بالجردل وجا وقع فيني ضرب بطريقهه م طبيعيهه وبقى يقول لي خاته الجردل جمب الحيطه دايرة تهربي مش؟وبقى خانقني وواقع بفوق لي بكل حجمو داك وخانقني بيديهو بكل قوتو ،بتعرفو خراج الروح؟بس انا عشتو اللحظه ديك،خلاص تعبته وعيوني وقعت وهو لسسسه بكفت فيني بعدها قام طلع وانا دي كل الحاساهو انو جسمي خدران من الضرب،بقيت ازحف عشان اقدر اقوم اول م بديت اتحرك جا داخل شايل جنزير في يدو جراني دخلني الغرفه رماني جمب السرير وربطني،انا مخلوعه من البحصل دة طبعا بقيت اعاين ليهو وانا بستغفر ،بعد م ربطني قال لي خليني اشوفك تاني تطلعي كيف من هنا وكفتني كدااا وطلع وقفل الباب،ياخي انا لما دوخته وانا بحاول استوعب الحاصل دة وإتأكدته انو انا اهلي عرسو لي مريض نفسي عشان كدة إستعجلو للعرس ليييه عملو فيني كدة،لييييييهه بس😭😭😭💔
بعدها بقيت اسمع صوتو وهو بتكلم براهو والله بتكلم براهو عديل للمرة التانيه إتأكدته انو مجنون..
كل يوم بجي بفكني بخليني ادخل الحمام وبجيب لي مويه واكل اكلهم بعدها برجع يربطني وكان حكم معاهو بقيف وبنبزني وبقول لي "ي وسخهه ي حيوانه شوفي انا اعمل فيك شنو،انتي تحاولي تهربي مني انا؟تخليني انا؟تفوتيني تمشي وين ي عفنهه والله بيتي دة قبرك تموتي هنا بس "كلو كوم وملامح وشو وهو بقول كلامو دة كوم تاني خالص واحيانا بدون مناسبه بجي بكشح فيني مويه حاره من راسي لي باقس جسمي تحت وانا مربوطه م بقدر اتحرك بس اصرخ واتلولو لغايه م يمشي واحيانا المويه الحارة دي يشربني ليها بكون إستيل بكون حار شديييد خشمي كلو اتجرح بسبب الحاجه دي وغصبا عني اشربها واحيانا بجيب السكين وهو بكون خاتيها في النار فترة طويله لونها احمررر بجيبها بمررها في حدود شعري الفضل عشان يتقص كدة،قال لي فاكراني بخليهو يطول ليك كدة تاني؟يقعد بحالتو دي بس كل م يطول اقصو ليك،لما ابدأ اتحرك لقول لي اخت ليك السكين دي في رقبتك؟اختها؟ اثبتي يلااا،بتجبر اثبت عشان م يحرقني بيها في جسمي،مرة اثناء م هو بعمل في الحركه دي إتحركته وهو محزرني قبلها فقام ختاها لي في ضهري اول حاجه لغايهوم الفستان اتأكل وإتطبعت في ضهري،بعدها بقى كل مرة يختها لي في مكان مرة في ساقي،ومرة في كتفي،ومرة في رقبتي،علم على جسمي كلو كنت بس بصرخ وكل م اصرخ بزيد الضغطه بتاعه السكين على جسمي زيادة
💔
عديت على الحاله دي تلاته اسابيع ودخلته في الشهر الرابع واهلي خبري م جايبنو،معقوله ديل بتسمو اهل؟معقوله انا حيه ولا ميته م بفرق معاهم ؟رموني لي زول غريب وم فكرو يفتشوني حتى لييييهه بس دة كلوو؟

اليوم التاني قولته لنفسي ي شهد لو قعدتي وقولتي تنتظري يومك هنا الزول دة بموتك بموتك لكن موتك بكون بالعذاب بس لأنو هو م زول عادي مريض نفسي والمريض النفسي دة اي شي م بعيد عليهو عشان كدة افضل شي تعمليهو تهربي بسسس بأي طريقه كانت تهربي بقيت احاول افك الجنزير،والجنزير م كان زي اي جنزير ابدا كان النوع الكبار ديلك قدر م حاولت م قدرت وماف جمبي حاجه ممكن تساعدني اتفك ،قاعدة في غرفه الليل من النهار م بعرفو ،وانا قاعدة فجأهه جا داخل قرب مني انا خلاص قلبي وقع قولت الليله خلاص داير يعمل فيني حاجه مسك الجنزير وفكاني قال لي ادخلي الحمام واجهزي سرعه ماشين بيتكم،طبعا انا م صدقته ،دة موديني بيتنا؟اهلي؟بقيت اعاين ليهو بخلعه قال لي لكن قسما بالله اي شي حصل في البيت دة القاك حكيتيهو برة إلا اموتكك وخنقني قال لي وانتي عارفه م محتاجه توصيه،يلا طيري سرعه فكاني ،م حسيت برجولي إلا وهي في الحمام ،شدة م مصدقه كل حاجه عملتها بإستعجال متخيلين معي5شهور عذاب،ضرب،وجع،5شهور م اتكلمته مع زول بصورة طبيعيه،

طلعته من الحمام لبسته ملابسي بسرعه شي م شلتو معي طلعته ،قال لي مستعجله مش مستعجله؟ضربني في ضهري وفرصني فرصهه شديييدة وقال لي 5دقايق بس في بيتكم والقاك قدامي فاهمه ولا لأ؟الضربه لما خلتني امشي متعوجه،وبقى يتشرط علي م القاك قاعدة مع زول براك تقعدي في المكان الانا فيهو لغايه م نقوم طالعين فاهمه؟فاهمهه؟قولته ليهو كويس،قال لي يلا غوري قدامي،طلعته جا وراي ركبته العربيه ورا طبعا عشان لو ركبته قدام بشبعني ضرب لمن نصل،طول م نحن ماشين هو يشيل ويحمر لي ويتكلم براهو وطول م هو ماشي انا بدعي ي رب م يتراجع ي رب يكمل ي رب تتلطف بي ياارب👐لغاايه م دخلنا شارع حلتنا انا كنته م مصدقه م مصدقه عدييييل بقيت اتلفت يمين وشمال واعاين للناس ،قال لي بنهرة بتعاين لشنوو انتي من اسي بديتي ؟بديتي من اسي؟قولته ليهو لالا خلاص خلاص،قال لي كلامي القولتو ليك م اعيدو فاهمه ولا لأ؟هزيت ليهو راسي،قال لي افتحي بوذك دة ردي،قولته ليهو فاهمه،وصلنا قدام بيتنا كانو في رجال قاعدين في فرشهه قدام البيت ،بقيت اقول جواي،دة بيتنا،ناس بيتنا،فجاهه عيني وقعت على جدي بقيت مقلعه عيوني ،نزل من العربيه وفتح لي الباب ،نزلته اول م نزلته جريت قدام الرجال قولته ليهو جدي،جدي انا جيت ومخلوعه طبعا،وقف على حيلو قال لي اهلا اهلا ي بتي كيفك سلم علي بالحضن وضماني وبقى يقول لي مشيتي مشيه واحدة لا حس لا خبر ،بعدها عيني وقعت على ابوي سرحان بعييد قولته ليهو ابووووووي،قام على حيلي وبقى يسلم علي،قولته ليهو تجدعني فت جدعه وم بتتسال مني ولا بتفتش على بتك ي ابوي،سككت،عاينته لي عباس لقيتو بحمر لي وهو بسلم على الرجال سكتته ،فجأهه اخواتي الصغار بثينه وبهجهه جو طالعين من البيت شافوني جو جارين اتلمو فيني وبقو يسلمو علي وجرو وبكو يكوركو ويقولو شهد جات شهد جات،ابوي قال لينا اتفضلو،اتفضلو،جدي قال ليهو دخلهم على البيت جوة،ونحن ماشين جا بي جمبي وقلع لي عيونو وصرة لي وشو،لغاايه م دخلنا البيت لقيت عماتي كلهم ملمومات ومعاهم نسوان الجيران،بقو يقولو شهد شهد،جريت عليهم وبقيت اسلم عليهو بالأحضان وكل م اسلم على واحدة فيهم تمسكني وتبكي ،وانا بعاتب فيهم وبقول ليهم يغسي عليكم لا بتسألو مني ولا بتفتشوني ولا بتزوروني لييه،ومرت الجيران مسكتني وبقت تبكي شديييييد دي الحاجه الحيرتني هم ببكو لشنو؟فجأهه مريم وشوق وفاطمه اختي طلعو من المطبخ وجوني جاريات ووقعو فيني بقى كدة بطريقه م عادي انا زاتي بقيت ابكي معاهم،قولته ليهم امي وحبوبه وين؟دقيقه انا ماشه لي حبوبه وامي بي غادي مش؟جريت مششيت بيت ناس حبوبه بقيت اكورك امي،حبوبه ،ي حبوبه،فاطمه جات لاحقاني قالت لي حبوبه في راكوبتها تكون بتصلي،مشيت عليها لقيتها قاعدة في المصلايه وبتسلم،قولته ليها حبوبه ،قامت من مصلايتها قال لي بي نفس ميييت شههد بتي،حضنتها بقيت اقول ليها حبوبه وحات الخلقني مشتاقين ،بقت اسلم علي،قولته ليها يغسي عليكم ي حبوبه لا انتي لا امي زول فيكم بسال مني ماف خلي الباقي ديل كلهم كعبين انتو م بتسالو مني معقوله كنت تقيله عليكم كدة؟قولتو بلا وإنجلا مش؟،بقت تبكي شديييد وبحرقه،قولته ليها صوتك رايح مالك عيانه ولا شنو؟وامي وين ؟مشت الزريبه تجيب اللبن ولا شنووو الليله؟لسسه هي بتمشي الزريبه؟حبوبه زادت في البكى زيادة،قولته ليها حبوبه اي عارفاك مشتاقه لي واي حاجه لكن انا جيت ،بقت تبكي اكتر واكتر لغاايه م انا زاتي بقيت ابكي معاها وفاطمه اختي تبكي،قولته ليهم ي جماعه انتو في شنو بتبكو كدة؟انا كويسه الحمدلله م حاصله علي عوجههه،حبوبه مسكتني وبقت حاضناني وتبكي من مسكتها دي عرفته انو في حاجه،قولته ليها فاطمه في شنو؟امي وين ي فاطمه؟فجأهه حبوبه بقت تقول ي حليلها امك ي بتي ي حليلها الطيبه الهديه الرضيه ي بتي😭😭😭طبعا م استوعبته من كلامها شي،بقيت اقول ليهم امي وين ليه بتقولو ي حليلها مشت وين؟؟فاطمه بقت تبكي بزيادة،قمته على حيلي حبوبه مسكتني قالت لي اقعدي ي بتي اقعدي،قولته ليها ماشه اشوف امي ،قالت لي ي بتي امك بقت في رحمه الله،
للحظه حسيت بنفسي م سامعه حاجه غير البكى والصوت حاساهو بعيد،وصوت حبوبه بتردد لي وكانت بتقول"بقت في رحمه الله ي بتي،"قولته ليها كيف يعني في رحمه الله؟كيف يعني؟بقيت اتكلم وارجف كلي،
امي مااتت؟ماتت امي انا ماتت؟
بقو يبكو بصوت عالي وانا اصرخ واقول لااا،امي م ماتت،امي م بتخليني وراها،انا امي م بتفوتني، وااااااي ي امي ،وااااي،وبقيت اصرخ بطريقه هستيريه لغااايه م اغمى علي م حسيت بنفسي الا وانا برشو علي مويه،فتحته عيوني لقيتهم كلهم قاعدين حارسني بقيت ابكي من اول وجديد واقول ليهم ماتت متين ليييه م كلمتوني،ليييه ماف زول كلمني،انا امي تموت وماف زول يكلمني،م اخدته رضاها انا م اخدتو ليييه م كلمتوني واااااي ي امييي،وااااااي ي اميييي 😭😭😭فاطمه قعدت جمبي وبقت تهدي فيني قالت لي إتصبري ي شهد ي اختي اتصبري كلنا حرقت حشانا بي ميتتها دي لكن نقول شنو الموت حق ، علينا بالدعوات بس،قولته ليها سمح ليه انا م كلمتوني انا بتها ي ناس انا بتها الوحيدة م عندها زول غيري،فاطمه يلا قولي لي امي مرضت؟تعبت ؟ابوي جا داخل،قولته ليهو ابوي انت ليييه م كلمتني؟امي مااتت حتى دي م فكرتو تكلموني بيها ليييه😭قال لي ي بتي إترحمي على امك وادعي ليها البكاء م بجيب نتيجه الليله اليوم دة امك تامه40يوم في قبرها بكاك م برجعها ليك،
بقيت اعاين ليهم بخلعه قولته ليهو40يوم؟امي انا ماتت ليها 40يوم وماف زول كلمني؟40يوم وانا م عارفه شي عن امي انتو قلوبكم دي قلوب شنو ي ناس 😭💔ابوي قال لي إتصلنا بس راجلك شريحتو العندنا مقفوله،قولته ليهو م فتشتوني لييه؟م سالتو اهلو مني لييبه،وبقيت ابكي بي اعلى صوتي واصرخ الحله كلها لمت ،انا تقريبا 3ساعات متواصله دي قضيتها بكى كل م اسكت شويه ارجع ابكي وحبوبه تشيل وتهدي فيني وهي قاعدة جمبي في السرير لغااايه م خلاص حيلي إتهد رقدته في رجولها وبقيت ابكي وانا ساكته دموعي جاريه بس،بقيت اسال فيها امي مالها ي حبوبه الحاصل عليها شنو ماتت كيف عليك الله جاوبيني،قالت لي والله ي بتي نحن كلنا كنا ماف مشينا عرس في الجزيرة جينا لقيناها بقت في رحمه الله،قولته ليها كيف يعني كانت عيانه يعني؟قالت لي قالو اظنها جاتها كوليرا لأنو اليومين ديك كانت منتشرة نحن زاتنا الجنازة م حضرناها ستروها بالليل ونحن جينا صباح اليوم التاني انا القدامك دي بتي م رضيت عليها وسترتها م براك ي بتي القلبك محروق ،💔بقيت ابكي وانا ساكتهه،فجأهه سمعته صوت عباس وهو بقول السلام عليكم،حبوبه قامت قالت لي راجلك بنادي قومي عليهو،سكتته،قالت ليهو إتفضل ي ولدي،جا داخل سلم عليها وقعد،قال ليها بعد كدة دايرين نمشي ي حبوبه،حبوبه قالت ليهو هي ي ولدي متين جات البت دي خليها تقعد شويه تقضي ليها ايام ،قال ليها لا والله ي حبوبه ماف طريقه انا زاتي م كان عندي علم بموضوع العزاء دة كلموني امس بس وجيت قولته اجيبها تعمل الواجب ونرجع لانو المسافه بعيدة وانا جدولي ملان الاسبوع كلو م بقدر ارجع هنا تاني ،حبوبه قالت ليهو الله يدي العافيه ي ولدي عديله،قولته ليهو اسمع انا بيتك دة كان بقى قبله م بمشيهو وم ماشه معاك ولا شي امي تحت التراب في اسوأ من كدة؟ ،قعد يعاين لي بخلعه وتحميرهه،حبوبه قالت لي في شنو ي بتي كدي قولي بسم الله،قولته ليها بس م ماشه مع الراجل دة،قال لي كدة قومي تعالي نتكلم برة،قولته ليهو م عندي معاك اي كلام ،طلع مشى نادى ابوي وجى راجع قال ليهو قولته ليها ارح قالت م ماشهه،
ابوي قال لي شهد ي بت في شنو؟قومي امشي مع راجلك يلا بيتك، امك تحت التراب قعدتك دي بترجعها تاني يعني؟
سكتتته،
قال لي بي نهرة قومي يلاااااا مش انا بتكلم معاك،قولته ليهو م ماشه ي ابوي وم بمشي معاهو،قال لي مالك في شنو م دايرة تمشي؟سكتته وبقيت ابكي ،ابوي قال ليهو خلاص الليله بيتو يومكم دة هنا بكرة الصباح امشو،سكتت ورقدته رقادي وقضيت الليل كلو وابكي وانا بتزكر في امي قمته صليت لي ركعتين وبقيت سااااجدة وببكي،اليوم التاني الصباح حبوبه لقتني قاعدة في نص راسي وخاته يديني في راسي المربوط بي طرحه،قالت لي ي بتي نزلي يدك دي من راسك واستغفري كفاك دموعك دي جفت من البكى،قولته ليها اعمل شنو ي حبوبه اعمل شنو اغيب ارجع القى امي ماف 😭قالت لي قضاء الله وقدرو ي بتي الله ي يرضى عليك م تبكي م تعزبيها في القبر بالبكى،ونحن قاعدين جا خالي التاج داخل قال لي شهد قومي راجلك دة واقف برة اجهزي عشان تمشو،قولته ليهو م ماشه انا ي خالي،قال لي دة كلام شنو دة ي بت راجلك عندو اشغال في المستشفى م بقدر يضيعها اجهزي امشي،قعدته ابكي قولته ليهو م ماشه ي خالي انا م ماشه والله😭😭😭حبوبه قالت ليهو خلاص خلوها تعدي اليومين دي هنا بعدين انت توصلها بيتها ي ياسر ي ولدي خلوها تقعد ليهو كم يوم هنا،قال ليها عديله انا م عندي مشكله الكلمه كلمه راجلها لو ،قالت ليهو كدة كلمو،

خالي التاج طلع مشى مكان الرجال قال ليهو ي عباس كدة تعال،جاهو قال ليهو شهد دي انت عارف انو إتفاجات بميتته امها وكدة عشان كدة م راضيه تمش،اسي انت خليها تقعد يومين هنا،قبل م يكمل كلامو قاطعو وقال. ليهو"لالا ماف كلام زي دة امها ماتت وجينا عملنا الواجب وبتنا وخلاص ماف ليها اي قعدة ،خالي التاج قال ليهو اسمع كلامي للنهايه انا دة بجيبها بي يدي بعد يومين م بخليها تقعد اكتر من يومين عشان نطيب خاطرها،عباس قال ليه. رجلي مع رجلها م بخليها ولا ثانيه وراي طلعها لي هي وينها وبقى يتكلم بصوت عالي،خالي التاج قال ليهو اسي انت بتجوط مالك كدة ؟في شنو؟قال ليهو مرتي وداير اسوقها م اجوط كيف؟ابوي قال ليهم في شنو؟جدي قال ليهم إن شاءالله خير ي اخوانا؟عباس قال ليهم ماف شي بس سلموني مرتي،خالي التاج قال ليهو ي ابوي شهد دي تعبانه شويه قلنا تمشي قالت م ماشه قولته ليهو خليها يومين انا بوصلها ليك لحدي بيتك بقى يكورك،جدي قال ليهو وينها شهد دي نادوها لي هنا،خالي التاج قال ليهو ي ابوي،جدي قال ليهو قولته ليك امشي جيبها ي ولد...

خالي التاج جا قال لي ابوي بناديك قومي تعالي،حبوبه قالت لي الله يرضى عليك ي بتي اسمعي الكلام وامشي مع راجلك،لبسته توبي وطلعته مشيت وراهو،وصلته مكانهم جدي قال لي بنهرة من غير اي نقاش ولا كلام كتير امشي البسي ملابسك وامشي مع راجلك يلا سرعهه،وقفته مكاني وم اتحركته جدعني بالعكاز ضربني في رجلي لمن إتعوجتهه قال لي م بتسمعي الكلام انتي؟بقيت اعاين ليهم وانا ساكته ابوي جا من هناك وكفتني قال لي م بتسمعي الكلام انتي وكمان تعايني لجدك كدة وهو بتكلم معاك دي قله ادب جديدة قايله نفسك عرستي خلاص م عندنا عليك حق وبقى يكفت فيني الا خالي التاج مسكو وبقى يقول ليهم في شنو اسي في شنو ي ناس انتو ؟ ابوي قال ليهو التاج فكني،خالي قال ليهو عبدالله اسمع الكلام،جدي قال ليهو التاج انت م تدخل ،خالي التاج قال لي امشي انتي اسمعي الكلام ،م اتحركته وانا ساكته،لزاني قولته ليهو بصرخه م ماشه انا م ماشه قولته ليكم،بتعرفو عني شنو انتو؟بعتوني بالقروش عشان دكتور وم فتشتو عني حتى،جدعتوني زي الكلبه وحتى الكلاب زاتها بتفتش على عيالها انتو اهل انتو؟عارفين عني شنو انتو في ال5شهور دي؟حيه ولا ميته ولا الحاصل علي شنو زول فيكم فكر يسال مني؟ داك م بيت داك قبر،امي40يوم ميته وانتو م فكرتو حتى تسألو من بتها الوحيدة 5شهوور انا مقفوله في البيت داك ومربطه بالجنازير وبنضرب ليل ونهار وبتشوي بالسكين وانتو م فكرتو حتى تفتشوني،؟عرستو لي واحد مريض نفسي مريض شنو مجنون عديل كل يوم ضرب وإهانه قرب يجنني م مصدقين صح؟رميت التوب قولته ليهم شوفو شعري مقصوص من وين؟من حدو صح؟طيب دقيقه رفعته ليهم الجلباب قولته ليهم دي شنو؟دي اثار ربطه الجنزير فكاني منو امس بس وشوفو دي حرقه نار في رقبتي ودي حرقه السكين الخنه في ساقي وعاينو لي خشمي دة شايفين الجروح دي؟من شراب المويه المغليه،افتح ليكم ضهري تشوفو برضو؟دقيقه طيب عايزة ارفع الجلباب خالي التاج مسكني،قولته ليهو خليني اوريهم عشان يقتنعو،انتو اهل؟الله لا بارك فيكم إذا الاهل كدة يااخي وبقيت ابكي،
قال لي التاج قال ليهو الكلام دة صح؟انت رابط بتنا نحن بالجنزير؟سكتت،جدي وابوي ملامح وشهم إتغيرت،جدي قال ليهو الحاصل شنو وليييه عملته كدة ي ولدي؟كدة تعال اقعد لو في مشكله نحلها بتنا لقيت فيها عيب كلمنا ونحن نكسر ليك رقبتها من حدها اسي قدامك،
متخيلين معي جدي بقول في شنو؟قولته ليهو طبعا كالعادة حتطلعني انا غلط زي م كنت بتطلع امي غلط في اي حاجه،ابوي عايز يضربني خالي التاج مسكو ونهرني قال لي اقفلي خشمك دة انتي وبطلي قله ادب،
عباس إستغل الموقف و قال ليهو م بتسمع الكلام اي شي بقولو ليها م بتعملو وجنها حوامه عشان كدة بقيت اربطها واقفل عليها البيت واطلع،
طبعا انا مصدومه من كلامو،قولته ليهو حوامه؟بكرة بتموت والله بسألك..
خالي التاج قال ليهو لنفترض انها حوامه بتتصرف معاها بالإسلوب دة؟جيت شكيتها لي اهلها وم حزروها ليك؟جايبها من الشارع انت؟قص شعر وجنازير وتقفيل بيبان وحرق بالسكين وشراب مويه حارة بالمنطق كدة انت اليوم لو واحد عمل كدة مع اختك بترضى؟
عباس وقف على حيلو وقال ليهو مالك انت ي زول حااشر مناخرك،مرتي وانا حررر فيها اعمل فيها العايزو ،خالي التاج قال ليهو مرتك دي بت اختي ي كلب انتي،جدي قال ليهو التاج احترم نفسكك
وي عباس ولدي كدة اقعد وقول بسم الله ،،خالي التاج قال ليهو ي ابوي دة معذب بتك ولحمك دمك عذان نحن الرجال الليله اليوم دة م بنستحملو وانت لسسسه عايز تتناقش معاهو؟عباس قال ليهو م قاعد انا وم فاااضي عندي اشغال بتكم وجبتها سلمت عليكم واسي سلموني ليها "الرد كان بنبرة عاليهه وكلها نرفزة وجدي كرهتو في الدنيا زول يتكلم معاهو بنفس حار م برضى الحقارة ابدا"
جدي قال ليهو دة كلامك؟ يعني نحن الفاضين وم عندنا شغلهه؟سمح امشي قضي شغلتك نحن زاتنا م عندنا ليك اي بت بتمشي معاك تاني

عباس قال ليهو بتكم دي مرتي يعني م على كيفكم ،
جدي قال ليهو حرررم على كيفنا وكيف اي زول عندو راي غير كدة،قاعدين معاك بنحنس فيك عشان فاكرين انو نحن بنتناقش مع راجل م احترمته كلامنا ولا قعدتنا ورافع صوتك على شنو؟بناتنا م هاملات اديناك ليها إفتكرناك زول واعي ومتعلم واكرمناك بس إتضح لينا إنك غير كدة مدام دي اخلاقك م بتشرفنا واسي بتنا رجعناها وصحي عمرو القلم م بزيد بلم...
عباس قال ليهو انا كلامي مع ابوها وبسس!!
بنفس المنطق قال لي جدي كدة
ابوي قال ليهو البتتكلم معاهو دة ابوها الكبير وانت إذا م احترمته كلمتو حتحترم كلامي انا يعني؟الله يسهل عليك ورسل لينا ورقه بتنا في اقرب فرصه ممكنه
قال ليهم انا طلاق م بطلق الا السماء الاحمر دة يبقى ليها قريب...
خالي التاج قال ليهو بقولو م بنبح في فراشو الا الكلب ونحن اخلاقنا م بتسمح لينا نعمل كدة لكن حررررم كان ابلعك لسانك دة ي الفاقد التربوي وشال عكاز جدي وضربو بيهو...

#نتلاقى®