عدنا معاكم بخبالات جديدة 😂😂
صوتوا بسرعة 😡😡تره ما يصير خير😼😼
....
هشام :
اخذت والدي واقاربي وكم صديق مشترك بين العائلتين وتقدمت لاهلها كنت خايف كلش من شروطهم وهمه معروفين ما ينطون لغريب وان انطوه راح يدوسون ببطنه ويطلعون روحه يلا يحصل منهم مره واذا ما راح يردون النا الرفض مثل ما سوينا راح يطلبون كصه بكصه واذا بأهون الحالات راح يطلبون شي تعجيزي حتى يطفروني
كعدنا وابوها وعمامها كاعدين ابو اسعد ما يحجي وزعلان منا بس كان حاضر وقضى كل الوقت ساكت ابوها هو الاكبر بين اخوانه بس ما يحجي بشي هم عبالك ماخذ على خاطره ..... عمامها الصغار واخوها ابو منتصر يحجون وهمه اللي اخذوا دور اولياء امرها وقصدهم بهاي يصغروني ويقللون شأني يلا سهلة
كنت كاعد فشلان منهم اني مرجعهم اكثر من مره وجاي اليوم اريد منهم ...بعد السلام وكلام هوايه طلبها والدي منهم وابوها تداخل بالكلام
ابو عمار:جيتكم على راسنا واحنا نتشرف بهشام خوش رجال ولو عندي عتب عليه شلون يردنا واحنا داكين بابه ..ولو هو كل شي قسمه ونصيب والزواج ما بيه غصب ومن حقه يحتفظ باخته ويدور الها الاحسن مثل ما بنتنا عزيزة ونريد الها الاحسن
سكت شويه واني قلبي يريد يطلع هسه شنو هاي موافقة لو رفض ضليت بحيرة هو اني ترزلت بادب مثل ما رديتهم بادب بطلبهم
ابو هشام:يا ابو عمار انت كلتها الزواج قسمة ونصيب ورفضنا كان لان الولد مطلك بنت عمه وتصير مشاكل بزواجهم وهسه اليوم ابني اختاركم واختار كريمتكم تكون راعية بيته ونتمنى ما يأثر هذاك الموضوع اليوم
ابو عمار :هشام مثل ولدنا واحنا نعزه وولدنا يحبوه وكافي اليوم من الحضور ٣ من شبابنا جايين خطابه وياه يخطبوله بنت عمهم وهاي ما صارت بالعربان المفروض ولد عمها يطردوه وينهون مو يجون وياه ودامهم جايين ما اردهم ولا ارده ههههه
ضحكت وياهم وفعلا كانوا اصدقائي ولد عمها ولد عم ابوها حاضرين بالمشية حتى يقنعوهم كل السبل حضرتها وشفعولي عند ابوها ووافق ويا فرحتي اريد اسد حلكي مو كادر ابويه كال سلم على عمك وتشكر واني شويه واشيله على راسي واكمز من فرحتي صح فشلان منه بس موقفه خلاه يكبر بخاطري اكثر واحبهم اكثر ...مو معقول اسلوبه وتفهمه للامور وهاي اول خطبة عدهم بنية تطلع لغريب وكنت اني هالغريب
اتفقنا عالمقدم والمؤخر اللي كان ضمن المعقول وهم شي مو حاسب حسابه وعلى قول ابوها تسجيل على ورق اذا الرجال ومرته ما توافقوا لو نسجل خزائن العالم كلها ما يغنون بسعادة بنتنا شي
عكس الوصف متواضعين شفتهم ومتساهلين كلش فشلوني كلش ورجعت لبيتنا تعبان اكثر ودايخ بكرمهم
امي تهلهل ولمى تكمز فرحانات بزواجي اللي منتظراته صار مدة
الايام اللي بعدها كان عقد محكمة وتجهيزات العرس لان ابوها شرطه ما افوت واطلع ببيتهم واذا اريدها اخذها بسرعة صح تضايقت بس اللي مهون عليه عندي رقمها واتواصل وياها لحبيبتي وبالدوام اشوفها وكل مجالي مستعجل اخذها اخاف يرجعون برأيهم لو تصير مشاكل مو مصدك بهالسهولة صارت
صرت اخذ امي ونروح مثلا نريد نجهز لو نشتري شي الحجي يكعدني كباله بالبيت ويدزها هي وامها وامي للسوق ويه واحد من اخوانها ما يقبل اطلع وياها ابد رغم قبل هي كانت كل يوم اخذها واردها للدوام بلا ما يسألون لما عقدنا صاروا اخوانها يوصلوها
طلعوا روحي وخلوني اقدم العرس باقرب وقت حتى اخذها يمكن هي هاي عقوبتي على مواقفي القديمة وياهم هههه
مع هالتعامل الخشن حسيت الحجي فعلا معتبرني ابنه لان من افوت لبيتهم يضل يسولف ويسالني عن اهلي وشلونهم وكل تفاصيل حياتي و يسألني اذا محتاج شي بزواجي ويحلفني بكل غالي ما اكلف نفسي فوك طاقتي ولا اضايق نفسي ولو بيده اصلا هو يزوجنا بس ما ترهم هو يجهز بنته وكأنه ناطيها عطوة لو فصلية هههه
فاتن:
مرت ايام وكدرت اكمل كل شي وتقرب عرسنا وروحي طايرة بحببي كنت اتحضر للعرس وخطوة خطوة نحجي بيها بس لحد الان اني وهشام ما تقربنا واستحي منه اهلي مسوين علينا حصار حاول شكم مره نطلع من الدوام ونروح لمكانات واني بعدنا نسولف تجيني خوفة تخليني ارتعش ابويه ما يرضى بهالسوالف ولامي يدوخ راسها لما وحدة من بناتها تنخطب والا تروح لبيت رجلها يلا يرتاح ويسكت وعنده كره للنسيب بس الحمد لله ويه هشام كان حباب يمكن لان اني اصغر بناته ويحبني ولمحبتي حب خطيبي ما اعرف بصراحة الاسباب بس بقى شي بخاطري على تساهلهم الزايد وياه شنو مو عزيزة عدهم لو يريدون يخلصون مني
بقيت اتهرب من هشام مو اتعزز يا ريت والله واحصل منه بوسه عضه هههه بس اخاف من اهلي واريده يستعجل لان امشي بمبدأ احصل كل شي لو ماكو شي ههه
بس هشام ابد مو فقير مثل ما يوحي شكله ههه كان بالشغل ما يكدر يسوي شي وبالطلعة اخواني يجون ياخذوني تالي فاضت بي كان بعد النا اسبوع لزواجنا وبنهاية الدوام تقريبا يفرغ الممر ماكو مراجعين والموظفين كلهم بغرفهم
وكف يقفل الباب واني ويه طكة قفلها رجليه سااااحت وكفت ركض رحت يمه احاول افتحها
-هشام افتح
-ماافتح لو يجي ابوج يدك الباب هسه هههه
اجيت اخذ منه المفتاح رفع ايده اللي بيها المفتاح عالي واني لاحكتها بايدي ولف ايده الثانية حوالين خصري وجرني لصدره
تفاجأت ومااعرف شلون اتصرف وهو مثل صياد مستمتع بصيده
-هشام عيب
-اي عيب ههه
-هشام لا تضحك وافتح الباب فشلة احد يفوت ويشوفنا قافليها
-الدوام انتهى واحنا على اعتبار طالعين
ختم هالكلام بقبلات متعددة ما تغني عن جوع ولا تسد رمق بس تعذبنا وتزيد اشتياقنا اكثر ما خجلت منه ولا انسحبت ..تفاعلت واندمجت وما وعيت الا لما ايديه تمادت بجسمي عاد ننا وكفته مجبورة
-هشام كافي
-اشش خليني براحتي
-هشام ابعد عني عفيه الله يخليك
دفعته عني بقوةورحت لمكاني واني منزعجة من نفسي اكثر منه ونزلت دموعي وهو شافني واجا كعد يمي يستفسر
-شبيج حبيبي
-هشام انت شنو تشوفني
-شنو يعني
-اني رخيصة وخفيفة وما عندي كرامة وضليت اتوسل بيك حتى تخطبني هوايه لحيت عليك واشتكيت حتى لاختك منك... واهلي انطوني الك بلا عناء ولا تعب ...تشوفني حاجة معروضة برخص وانت اخذتها
عصب ووكف وجهه مجمر
-اششش شنو هاللغوة واختي اصلا ما كالت ولا شي وهاي بينكم ومحد اثر عليه من خطبت لو ما تعرفيني انت
-اي لان اني لزكت وبقيت اتوسل بيك تخطبني كل الفترة الفاتت وانتت كنت معاند وهسه صرت الك والمصيبة اهلي حتى مهر ما طلبوا منك مثل ما طلبوا على اخواتي شتشوفني هشام؟؟
-زينة البنات واحسن وحدة ولا تنسين اهلج خجلوني بكرمهم ليش تحجين عليهم وبعدين تعالي هنا ما اعرفج تهتمين للماديات... و كولي اذا قصرت بمهرج اني لو هسه تندمتي لان مو مثل اخواتج ولو اني ما اعرف شجابوا ازواج اخواتج
-ما اهتم ولا بعمري اهتميت بس ما اعرف ضايجة ما كان هذا مهري بالبداية وما كان اتفاقهم هيج
-شنووو؟؟؟ما افتهمت اي اتفاق
-كان مهري تنطيهم انت هم
عصب واجا جرني من ايدي وعصرها قوي
-وانت متفقه وياهم
-لا بس من بطلوا من طلبهم ما كالوها خلي نغلي بنتنا وابويه نطاني عبالك ناطي هدية
-وقصرت بشي وياج ذهب حسب علمي انت تكولين ما اريد هواي وكانت الميزانية مفتوحة وكلت اللي تريده تاخذه وبعدنا بيها امشي نشتري.. وبالعقد سجلت مبالغ تكسر ركبتي كل هذا مو كافي وبعدين انت شعليج بأختي
-مو قضية فلوس ولا يمك السالفة اهلي بطلوا من شروطهم كلها
-وانت كنت موافقة على شروطهم اللي يحطوها عليه ..هاي بنظرج الزواج لازم يكون بي مغالاة بالمهور حتى تحدد قيمة البشر لو تكمشوني من ايدي اللي توجعني
-لا ابد بس انت ما قبلت اختك تجي يمنا
-واختي شجابها هسه
-اي وصلني انت تكول عن اهلي ما يستاهلون ننطيهم
-اي كلت لان كنت اشوفهم غير شكل وبعدين هي حرة وما تريد تاخذه نغصبها
-لا كولها كول انت ما تحبهم وما قبلت باجر عكبة حتى اني توكف الي وتمنعني منهم
-لج فاتن خبالج بطليه وخليني افتهم... اهلج من متفقين ليش ما بقوا باتفاقهم كنت اني هم مثل ما رجعتهم ارجع
-هاااا شوووف انت كلتها اختك عزيزة وتبطل اذا صارت مقابييل زواجنا
-انت مخبلة؟؟؟
-اي تخبلت ليش هي ما تاخذ سراج وليش معاند عليه صدك الكلام اللي سمعته انت شايف اهلي وعمامي وحوش وهمج وما يصلحون عيال لاختك؟؟؟وحتى كلت لامك انت ما تحبني ومانعها تخطبني وهي جابرتك
-اي فاتن ارتاحي اهلج همج وانت مثلهم كنت اظن انت مختلفة بس ما خاب ظني الاول بيج
-ظنك الاول .....يعني صدك انت ما تحبني ؟؟
اخذ مفاتيح الباب وفتحها وركع الباب وراه واني بقيت ابجي اعرف اني انفجرت بوجهه بس مو بيدي صار ايام واني اسمع من امي وخالتي اشكال الكلام على همه ما نطونا وما قدرونا عليش ننطيهم وبعنا بنتنا برخص
كانت امي تبع لخالتي وخالتي ما راضية لان ببالها تاخذ لمى لسراج مقابيل زواجنا بس اللي صار سراج تعارك وياهم وكال انطوا بنت عمي ولا تربطون ناس بناس ما نريدها كصه بكصه ولا اقبل اتزوجها هيج احنا وحد وهمه وحد
كره سراج لهشام صار اضعاف مضاعفة بعد رفضه الاخير وبقى يتوعد اله وابويه وعمي يسكتوه بالقوة وتالي سكت لهشام بس متحلف اله يسجنه لحد ما اني توسلت بي وفهمته كل شي واول واحد عرف بهشام يريدني كان سراج لان موضوعنا مرتبط سويه ولان خفت على هشام اعرف سراج اذا راد يأذيه راح يأذيه قلبه ميت ولا يخاف ولا يسأل عن احد عسى ما يحتركون اهلنا كدامه
تذكرت لما رحت اله لبيتهم رحت وكلت اله راح يتقدم هشام الي واني موافقة طبعا مدري منين جبت الشجاعة بس بعد لازم احجي واكول لسراج حتى لو يكسر راسي ولو اعرفه ما يأذيني
علاقتنا بسراج حلوة احنا البنات بالعائلة صح اهلنا يريدون يزوجوه لوحدة من عدنا بنات عمة وبنات خالته بس احنا مانقتنع بي نشوفه اخونا حاله حال اخواني واني بحكم علاقتي ببنات سعاد اخته اللي يصغروني باربع سنوات شويه واناديه خالو وياهم هههه
المهم رزلني وبهذلني لان كلت اله اريده بعدين سكت
-اي وانت موافقة عليه هالغبي
-اي ماكو شي يمنع خوش ولد ..خجلت واني ارد عليه وابتسمت ..تره هو مو غبي عفيه سراج واخته صديقتي ركزت على اخر كلام حتى اذكره اخو منو هو هههه
-وهاي من شوكت واخته صديقتج
-من تعينت وصرنا نروح ونجي سويه
باوع الي بطرف عينه معصب
-اي وهسه المطلوب مني
-الله عليك بداعة غواليك ما تأذيه ابد
-اذا اهلج نطوه ما الي شغل بي بعد يصير كرايبي ما اطخه هههه بس اذا ما صار سبع وقنعهم ما راح يشفع اله شي يمي بعد
-لا عفيه الله عليك لا تأذيه ابد حتى لو ماقبلوه عفيه واني اجيتك لان اعرفك اذا نويت تأذيه ما راح ترجعك قرابته
-انت اجيتي وكلتي راح يتقدم الي واني اكدر اخرب كل شي بكلمة بس راح اسكت وانطيه فرصة واذا ما استغلها فالغبي كلمة قليلة عليه ولا توكفين بعد وتبجين عليه
-لا والله راح يستغلها هههه
-بس مع هذا يبقى غبي
-يلا غبي ولا صاير اله شي من وراك ههه فار عايش ولا اسد ميت
-وروحه لجدي مجيد الا اخبله شوفي انت ...وانت ام خشم والله لو ما عزيزة الا اسحلج سحل على هالوكاحة ابن عمج كاعد كبالج لو صديقة الطفولة كومي انعل حظكم عائلة بناتهم كلهن عاشكات هذيج ماتت عالخوال وهاي جايه تتوسل تاخذ الغريب عاد غفران راحت عالاقارب ما طلعت بره الا انت خوش والله كون هسه اشيل تليفوني واحط السالفة بأذن عمار واخبله اخليه يذبح اهله كلهم ههههه
-لا مو اعرفك حباب ما تسويها ولو انت كلش تعزه لابو منتصر هههه
-غير نسيبي
-لا انت حباب ما تأذيني
-هاااا..اخاف تشوفيني براسي كرون ستيل وجايه تتوسطين مال الذبح والله على هالسالفة حاس روحي صرت مكرن
-لا والله احسن ولد عمنا انت
-اي اصبغي بعدما صخمتيها
-لا والله ابقى شايلة معروفك طول العمر بس اسكت وخلي الخطوبة تتم
-عمي ساكتين ليكون عبالج انهي عليج ام الكمل
-والله ما غيرك ابو الكمل
-هاا ولج مو اخرب غزلكم
-لا حباب والله هاي هي اني ام الكمل وحتى بريعصيات براسي هم هههه
-اي اعترفي تونا تره ما ناسين
-عووذة منك سراج الا تذكرني والله جنت صغيره ما افتهم وانعديت من صديقتي
-هههه ..يلا راح اسكت وما افضحج كدام الخطابة بس تتعهدين الي مثل ما ساعدتج تساعديني
-عيوني الك ابن عمي
-ما اريد لا عيون ولا سنون اريدج عين واذن ووسواس براسها
-هعهه والله تدلل اخبلها بابن عمي الغالي
-مو عاجبج ولج تصنفين عبالك
-اداري خبزتي شسوي
-لج اشو انت مصختيها كلش ....لج عييييب صاح بوجهي
صاير عصبي ويحجي لو بيده يكتلني بس شسويله اني المهم يعرف
-هسه قابل كلت الك راح اشرد وياه كلت الك جايين يخطبوني هههه
كان كاعد ويمه باكيت جكايره شالها وضربني بيها واني طلعت طلقة اركض واضحك من بيتهم
سراج شكد ما عصبي بس الواحد يعرف يتفاهم وياه ومن يشوف السالفة توكف يمه يحلها بطريقة حلوة ما يأذي بس اللي يأذيه وخايفة على هشام منه بس هسه بعد ما طول انطاني كلمة امنت