ثار العشگ

البارت 11

البارت11
#ثار_العشگ
ملاك الصمت

شالني .. جنت متعلگه اديه برگبته ونظرات عيوني متعلگه بعيونه ابد مفارگني .. قريت بنظراته رغبه واشتياق ..

طرحني ع الفراش وماقاومت شغف اشتياقي اله
.. باسني من شفايفي واعتبر تجاوبي وياه بالبوسه اشارة خضراء لاعلان موافقتي ..

الي صار بعدها خارج نطاق ارادتي مثل موجه بحر عاليه جرفتني وياهه بس ماغرگت لان لواء اخذ بيدي لبر الامان ..

ابد مامنعته .. عيشني ليله بأحلا احلامي مشايفتهه .. مفارگ حضني .. طول الليل كلما التفت عنه او اغير وضعيه نومتي ميقبل يجرني ويرجعني لحضنه غصب عني  ..
هاي مو حيونه ولا اني انسانه تحكمني شهواتي بس هذ حبيبي مفارگته اكثر من اسبوعين .. عشگه وشوگي اله تفجر عاطفه اجتاحتني بكل جوارحي .. جنت بين اديه وباقصى حالات تفاعلي وياه ودموعي نزلت .. مو من الم .. من وجع بگلبي .. من جرح نزف من اغلى ناسي ..

جنة ثنينه نحس هاي وداعيه .. تمنيت الصبح مايطلع ابد .. بس جنت شبه متأكده من راح يصبح الصبح راح يتركني لحال سبيلي .. يمكن اقتنع اني ماارهم ويه ضرة ومترهم يطلگ وسن ..
نمت بأمان بحضنه ..

الساعه سبعه گعدني ..
جان يمشي لحيته الي توهه باديه تطلع ع خدودي لان هو مزينهه مترهم يبقيهه لان عسكري بس هالتوهن طالعات خلن وجهي احمر يجكجن بيه ضوجني حيل اخير شي كمت معصبه ..

سبحت ورحت سويت ريوك وهو هم سبح واجاني للمطبخ ..

تريكنه سوة .. جان هادئ .. ومانطق بولا كلمه غير صباح الخير عبالك حرفيا مطبق مقولة كلام الليل يمحيه النهار ..

كملت ريوكي ورحت بدلت .. وهو هم بدل .. عينه ع ملابسي .. راضي عنهن .. وصاني ..

امانه لاتضوجيني بلبسج .. ديري بالج ع نفسج ..
هزيت راسي بالموافقه .. اخذت جنطتي ورحت سبقته گعدت بالسيارة ..

اجه ورايه من بعد ماقفل باب المطبخ وفتح الباب الخارجي صعد ساق ووصلني للمستشفى .. جان بملابسه العسكريه ..

جانت الساعه عابرة الثمانيه وربع .. نزلت ودخلت للمستشفى بصمت بالاستعلامات ..
هو هم نزل وياي ودخل .. المستشفى وگفت ع تك رجل لان عبالهم الضابط عنده مريض هنا ..

هاي المستشفى نفسهه الي غفران تسوي عمليتهه بيهه اليوم المفروض ..

ظليت ادور عليهه بعيوني .. تقرب مني لواء ..
ع منو تدورين ؟
غفران ..
هاج اتصلي عليهه ..

اخذت التلفون منه تفاجأت بي هذا تلفوني ..
باوعتله وبداخلي تأكدت هو عافني براحتي .. يمكن اقتنع .. بس ليش مفرحانه اني. .. يمكن احب اشوفه متمسك بيه ويحاول يرضيني ويتوسل بيه ..

مشاعري متضاربه احس بعواصف تعصف بگلبي .. صراع بين گلبي وعقلي ..

اخذت جانب واتصلت ع غفران .. گالت دننتظر بغرفتج الطبيبه دخلتنه ..

تجي وياي لغرفتي ؟
ينتظروج هناك ؟
هزيت راسي .. اي ..
مشينه سوة لغرفتي فتحت الباب وسلمت .. السلام عليكم ..
ولواء نفس الشي هم سلم .. السلام عليكم ..
الي جانوا موجودين غفران وجاي وياهه زوجهه محمد وامي ومرة عمي جايه بالطريق ..

سلمت ع محمد  وبوست امي وغفران .. نظرات امي كولهه تساؤل عن الوضع بيني وبين لواء ..
بس غفران تدري شنو الوضع ..

وگف لواء يم محمد وظلوا يسولفون .. غفران كالت عمليتهه ب 11وشوفتني تحاليلهه والسونر كولشي كامل بقت بس الطبله شغلتهه سهله هسه اخذهه نسويهه ..

استأذن لواء منهم يريد يروح لدوامه وصاحني رحت وراه ..
طلعت وراه من الغرفه وسديت الباب ..
رايح للدوام ؟
اي .. ارجعلج من اخلص ؟
هزيت راسي .. لا ..ارجع لاهلي ..
ظل يباوع لعيوني بعدين دنگ ثواني ورفع راسه ..
تمام .. ماوصيج بعد ع لبسج .. وتديرين بالج ع نفسج وع الطفل ..
شو صار الطفل .. مو علساس تريد بنيه ..
مو انتي تريدين سند ..
قهرتني حجايته .. لان بوكتهه من حجينه بهالموضوع گالي انجبي اني سندج .. الظاهر هايهيه تنازل عني ..

يله يابه .. اني رايح ..
ظل يباوع بعيوني واني هم .. ماردت الدمعه تخوني بس هي تعلگت برموشي ..

گتله .. الله وياك ..
عافني وراح ..
ظليت اباوعله من نطاني ظهره ومشى  ولا التفت عليه بعد ..

انتبهت ع روحي واكفه لوحدي بالباب صارلي دقايق وحدي وصوت غفران صحاني ..

الي صار بعدهه انو بذاك اليوم جابت غفران بنيه سموهه ملاك وصاروا مصطفى ومريم وملاك ..

اختي والطفله بخير الحمدلله .. غفران ظلت يومين بالمستشفى وباليوم الثالث طلعوهه ..

وبهالليلتين اني بتت يم غفران بس كولش تعبت لان بالنهار دوام وبالليل سهر ويه غفران لان متأذيه من عمليتهه وكومتهه وكعدتهه حيل صعبه هاي من غير الم العمليه الي مينطاق  وبالليله الثانيه باتت وياي حماة اختي اسمهه فاطمة وهي بنت عمي اخت محمد ..

باليوم الثالث طلعناهه واني لان تعبانه اخذت اجازة ثاني يوم ..
رجعت لبيت اهلي گبل لغرفتي سبحت ولفراشي .. نمت حته بدون اكل ..

والنومه نومه من الظهر لثاني يوم الصبح ..
گعدت من كيفي شبعانه نوم بس بطني موتتني من الجوع ..

جريت المبايل من جوة المخده .. ماكو لامسج ولا اتصال

تكمله البارت 11

ضجت اكثر ..
تالي عنت نفسي وگمت .. نزلت سويت ريوگ .. جانت الساعه سته الصبح ..

ع صوت طگطگتي اجاني جمال .. شو عبالك مجان نايم بغرفته ..

صباح الخير .. شمكعدج من الصبح ..
صباح النور .. مو نايمه من البارحه الظهر .. كعدت شبعانه نوم ..
هااا ..
شو جنك طلعت من الاستقبال .. شنو ماجنت نايم بغرفتك ..
اي والله المرة شاحتتني ..
هههههه صدوك .. ؟
هز راسه اي ..
شمسوي ؟
گتلهه اريد اتزوج .. شحتتني برة الغرفه وقفلت الباب .. يمعوده نتشاقه عدلي بدلي ماكو قفلت .. تالي نمت بالاستقبال ..
تستاهل .. اكو واحد يتشاقه بهيج موضوع ..
امممم .. سويلي وياج ريوك ..
هو سويت ريوك للكل .. خطيه اكيد امي سهرت ويه غفران وبتهه ..
لعد صبيلي جاي وياج ..
صبيتله جاي حار وحميت حليب اليه ..
گعدنه نتريك ..
شخبار لواء ؟
شخباره ..ماعرف عنه شي .. من يوم عمليه غفران ..
ع شنو اتفقتوا من اخذج للبيت ؟
حجينه هواي وحاولنه نتفق .. اني ظليت مصرة ع الطلاگ وهو ماقبل بي وحاول يغير رأيي بس اني قافله ومقتنعه بقراري ..

وليش رجعج لهنا ؟
اني ماقبلت ارجع وياه وبعدين التهيت ويه غفران وعمليتهه وهو ماصدگ .. بعد لا اجه ولا سأل ..
احسن .. خفة وراحه .. انتي مرتاحه ؟
اي الحمدلله ..
شوكت جلسة المحكمه ؟
الاحد الجاي ..
هذا الاحد ؟
اي ..

تريدين اوصلج ؟

لا عندك دوام لتكلف روحك .. يمكن احتاجك غير يوم بعدين خطي موجود الرجال ميكول يوصلني ..
ماشي تمام ..

منو راح يروح وياج ؟
محد بس المحاميه وهم وجودهه بدون داعي لان جلسات الباحثه الاجتماعيه متحتاج محامي بس الطرفين المتزوجين ..

كملنه ريوگنه .. هو گام غسل ودخل لغرفته يبدل حته يروح لدوامه واني صعدت لغرفتي رجعت لفراشي .. الجو صاير بي گرصة بروده نهايه الصيف بدايه الخريف والجو كسر ع بروده ومال نوم ودفو ..

مرت ايامي عاديه .. بداخلي جنت انتظر اتصال من لواء او حتى مسج بس ماصار .. ليش .. استسلم بسرعه .. استاهل يحاول وياي بعد .. رغم اريد اخلص منه بس ماعرف ليش هالموضوع زاعجني ..

احس روحي صرت مخبله ماعرف شريد .. كرهت جفاءة وكرهت اهماله .. هو بعيد واني افكر يمكن من حجيت وياه اقتنع يجيب وسن للبيت ويخلصهه من امه وخواته .. ياريتني ماحجيت وياه ..

الغيرة تاكل بيه اكل .. شكد عصبت وضجت منه .. اتبع وياي اسلوب الاهمال واني اقتلني ولا تهملني او تحگرني .. اتخبل ..

جنت حرفيا اكل بروحي .. التفكير صار يشغل كل وقتي .. اكلي صاير قليل .. معدتي متخربطه من الحمل .. شآكل اذبه فآكلي صاير قليل ..

دوامي بالمستشفى مستمر بس طول الوكت تعبانه .. رغم ماكملت 3اشهر من حملي ..

صار يوم. الاحد ورحت للمحكمه ويه محاميتي .. اسمهه رفل .. ام مهيمن .. مرة بيضه ناعمه عمرهه يجي بنهايه الاربعينات بس شكلهه مبينه اصغر ممتعوبه يعني ومحاميه كولش شاطرة وزوجهه هم محامي ..

هاي الرهبه مال مكان مثل المحكمه سرت بجسمي لان هاي اول مرة ادخل محكمه ..

وصلتني المحاميه لغرفة الباحثه الاجتماعيه ودخلت هي حجت وياهه وطلعت ..

المفروض ما ادخل وحدي الا يجي المدعي عليه .. لواء .. ندخل سوة .. حته نحجي وتسألنه الباحثه وتحاول تخلينه نحجي ونوكع ع العله والمشاكل الي مسببه طلب الطلاق بلكي نكدر نلكالهه حل .. هذا الي المفروض يصير ..

لواء اتأخر .. موعدنه بالتسعه بس هو ما اجه للساعه عشرة وهو ماكو واني واکفه ع رجليه ..

تخربطت حسيت بروحي بعد ماكدر ابقى واكفه ع رجليه خاصة اني جايه بريوك خفيف ..

حاطه بجنطتي بطل لبن لان دوم ضغطي ينزل وشربت منه وگعدت ومحاميتي كل شويه تجي تشوف اجه لواء لو لا ..

صلبني للساعه دعش ونص ياله اجه ...

للحكايه بقيه ..
شاركوني توقعاتكم ..
البارت قصير ، مابي احداث ،سويتيهه قصه .. هالتعليقات تعودت عليهه واي حبي هي قصه .. المتفاعل ويعتب ع عيني وراسي بس بدون تجريح بالتعليق والي يحاول بتعليقه يخليني اترك القصه او استعجل بيهه فأكوله لاعيني كلامك مراح يخليني استعجل اني اصلا بطيئه بالكتابه ودتشوفون البارت الواحد بي كم مشاعر متناقضه .. احتاج وقت حته اجسد كل هذه التفاصيل لذلك اكو صعوبه بكتابه البارتات حتلو الواهس موجود شغله ثانيه طلباتكم بالتعليقات عن رغبتكم بمعرفه ظروف وسن والقصه من جانب لواء واسباب زواجه كل هذا ناويه اخذهه بعين الاعتبار ماحب اهمل رغبه متابعيني .. ادري بروحي حجيت هواي .. حبكككم ..
ها وباجر عندي طلعه .. احاول اكتب بس ماوعدكم انزل ماعرف بقت ورة تسهيل رب العالمين ..