مساء الانوار عليكم احبتي
طبعاً بارت البارحة كامل. وما كدرت انزله بسبب النت
وانشغالي باولادي الي جانو طالعين بتايم سكوير بالبصرة
ومن رجعوا كانوا متأذين من غاز مسيل للدموع
الي حصل بالمظاهرات البارحة واكيد هناك الكثير منكم من ابناء البصرة
وعارفين الي صار احب اكولكم اني انسانة مثلكم مو مخلوق فضائي
تصير عندي مشاكل اني اتمرض اولادي يتمرضون ممكن تصير عندي مشكلة بالبيت
ممكن النت مثلكم والله النت عدنا ينكطع
المهم
طبعا هسة نزلتلكم بارت البارحة
لان اصلا هو كان كامل
وانتظروني بالليل انزل بارت اليوم
بس قبل لا انزل البارت احب اشكر المتابعين
الي اتفهموا تأخري. والي سالوا عني.. اني اختهم نهى
اما الي ديعلقون تعليقات سلبية يتهجمون بيها علية
بسبب التأخير بالبارت
اريد اكولكم ان كاتبه احب كتابة القصص واحب اشاركم بقصصي
احب شوقكم لقراءة قصتي وهذا الشي يدفعني
حتى اطور من نفسي واقدملكم الافضل
بس مو معناه تتجازون بالكلام
اعتقد التزامي الزايد عن حده وياكم خلاكم تتهجمون بهذا الشكل
ليش تحاولون تثبطون من عزيمة الناس الملتزمة وتخلوهم يصيرون عكس هذا
اني من اشوفكم تجحفون حقي وتذموني باشياء مو صحيحه اكيد ماراح التزم وياكم
لان انتوا دتجبروني على هذا الشي بس من اشوفكم قلة قليلة امشي ليكدام واخليكم وراية وما التفت لتعليقاتكم
ولان متابعيني مالهم ذنب بتهجمكم
فيستحقون ابقى معهم للاخير والتزم وياهم
#اساور_الفضة_ج٢
#نهى_الحسون
هدى
بدت حياتي تتغير
وصرت اكثر تعلق بقاسم
جان من يطلع للشغل. ابقى اعد الساعات
الى ان يرجع احس صار كل حياتي
ومن يرجع ابقى اتبعه وين ميروح مثل الطفلة
الي تفتر ورة ابوها هيج حالي يكون بقرب قاسم
بس وكاحة قاسم بعيدة الكل البعد بتعامله وياية
كطفلة.
وفعلا مثل مكال طلع عيني بوكاحته
وصرت اشطر من استاذي بالوكاحة
سحبت نقالي من عالكاونتر. وانطيته
ضربة .. ضربتين .. حتى يصحى من النوم
حتى يشتغل صاير مرات يغفي.
اتصلت عليه حتى اشوفه شوكت يوصل حتى احميله العشا
قاسم بي طبيعة هواي يتأخر بالشغل
كلي انتظريني لا تتعشين ما راح اتأخر
من جنت زعلانة منه وقررت اسحب نفسي منه
وحتى بالاكل صرت ابتعد عنه جان حيل يضوج
بس هسة رجعت ما اكل الا وياه
جانت هاي وحدة من اللحظات الي احب استغلها
وية قاسم لان اوقات الخصوصية. بيني وبين قاسم
كلش قليلة وتنعد بالاصابع
شغله واهله يادوب يلحك يتواصل وياهم
لذلك اني استغل اي فرصة يكون بيها متاح
حسب كلام هشام من سمعته يحجي وية خالة
يكللها احنا مشغولين لان هسة موسم الشغل مالتنة
ولازم نتواجد على طول
جنت انظف بالمطبخ ودخلت هالة معصبة وتحجي وتدردم بينها وبين نفسها
باوعت عليها جانت تتحرك بالمطبخ وتطلع الخلاط
وراحت عالفواكه وصارت تقطع منهم وتحجي بغيض
.. ها خير ست هالة شبيج منو وياج
جنت واكفة عالسنك اغسل صحون وهالة تحوم علية
هالة.. هاي العوبة هديل
.. شبيها
.. جنت منتظرة زيوني ابن منى بالمطبخ اباوع للكامرة شوكت يجي وصيته على حلويات وجبس
وبس شفته وصل رحت فتحتله الباب
واخذت العلاكة من زيوني وكلتله اوكف لا تروح خلي اشوف خاف صار غش وتخمطلك كم وحدة
وفتحتها وكعدت اعد الغراض
وبهاي الاثناء وصلت السعلوة هديل جانت جاية من بيت عمو محمد انتبهت لهشام اجة من وراها
الظاهر هو جايبها من بيت عمو
هي بس شافت بيدي علاكة الحلويات كامت تحجي علية
هديل .. هاي شبيج هالة هيج موكفة الولد المسكين علمود بطنج
عبالك رئيس عصابة الاطفال
خاف ماخذ شوية من الجبس والحلويات
جانت تحجي وهي بعدها واكفة بالباب
خزرتها وكلتلها.. عوبة وانتي شكو
.. يا اختي كافي من ورة الحلويات راح تصيرين
بكد البقرة
جاوبتها .. انتي البقرة ياحقي ..........
وقطعت كلامي وشهكت متفاجئة وعيوني تريد تطلع من مكانها
.. عزة بعينج ياعوبة هذني ملابسي الجديدات
شلون تتجرئين تلبسيهم
لج اذا ما سويت شعرج مكناسة ما اكون هالة
رفعت حاجبها بخباثة
وفتحت الباب على وسعه وفاتت من يمي
ودخل هشام وجان يدخل ورة هشام عزام
صاحبه
وكفت متصنمة
بمكاني وعلاكتي بيدي وعيوني متعسة
احس من كد الصدمة انشليت وفقدت السيطرة
على الحركة واجتي عيوني بعيون عزام
باوع علية وخزرني
وفات هو وهشام من يمي ودخلوا للاستقبال
لج هدى بلحظتها اتمنيت الكاع تنشك وتبلعني
من ورة الفشلة
بس والله على هذا الموقف اذا ما شلعت اذاناتها ونتفت شعرها ما اكون هالة
الحيوانة اتعمدت تحرجني
ولا تبطل هاي سوالفها دائما تحرجني
.. خااب اسمع منو يحجي بالعنف
على كيفك ويانة هلال لا ينكسغ ظفغك (لا ينكسر ظفرك )
.. شنو حضرتج تصنفين علية
.. لا بس ادغي (ادري) بيج بوخة مغاح تسوين(ما راح ) شي
ولا غاح (راح ) تحطين حد لتجاوزات اختج وياج
كان المفروض من الاول اختج تحتغمج (تحترمج)
لان انتي اكبغ (اكبر) منها
بس حضغتج (حضرتج ) ثولة وفاهية
وصايغة (وصايرة ) ملطشة ما بيج خيغ (خير)
بس تصغحين (تصرحين ) بدون تنفيذ
.. خلي تصبرلي منا ورايح انا الها
.. اكول ست هالة عوفج من هديل
وكليلي شنو سالفة. الصدمة والاحغاج (الاحراج)
احس غضبج مو بس بخصوص هديل
اكو سبب ثاني وغة (ورة) هالغضب والعصبية
.. اوووف ياهدى اني سالفتي سالفة
.. شنو كولي.
.. كلبي هو سبب غضبي
عزام صديق اخوتي وبنفس الوقت يصير حمى كوثر
اختى
جان دائماًعدنا
متعودة عليه عادي بس من بديت اكبر
وبدة كلبي يدك بابه مشاعر الحب.
لكيت نفسي واكعة بحب عزام بدون ما اعرف
شلون وشوكت ما ادري بس كل الي اعرفه
اني من اشوف هذا الرجال
كلبي يكوم يخفق بين ظلوعي.
وتدرين بية اني من النوع الخجول
استحي ابادر او المح اخاف هو يفشلني
لان اخت صديقه
بس مع الاسف بالفترة الاخير صارت بية مواقف هو
الله سلطه علية بيها واخذ عني فكرة مو حلوة
اباوع لوجهها تحجي ووجها احمر
.. اي وشنو هاي المواقف
.. تتذكرين بيوم رحنا ببيت عمو فرزدق ابو صهيب
لسنوية ابوه من اجيتلج وجهي مخطوف لونه وسألتيني
شبية كلتلج بعدين اكلج
.. اي اتذكغ (اتذكر) بس وغاها (وراها) التهيت بسالفة ضحى
اي صدك شبيج
احنا مو رحنا كلنا لبيت عمو فرزدق
وخواتي الله يحفظهن بوكتها جهالهم كلش وكحين وحركو البيت حرك
وامي شاورتني. وكالت روحي صيحي بجهال خواتج خليهم يكعدون عقال
واني المعروف عني همة يخافون مني لان
ما اقبل انظف وهمة يهوسون
.. اي انتي بهاي مشهودتلج
اذا زين بكبغه (بكبره) يخاف منج.
.. هو شنو عم علية غير زين واخوانه
رحت ادور عليهم لكيتهم بالحديقة كالبين الدنيا بخبصتهم
الصياح والهوسة مااكولج عليها شنو
وباقي الجهال كاعدين صافنين عليهم مستغربين من يا كوكب هذولة جايين
يعني الحقيقة اولاد خواتي الوحيدين يكمزون بالنص
رحت هديت عليهم لكيت الزعيم زين لازم حبل مال هدوم
ومسويله مرجوحة بحديقة العالم بكل صلافة
وصاير يركب الجهال يلعبهم هي مو هنا المصيبة
الكارثة والفشلة الجبيرة
اسمعه يكللهم الركبة. بربع
واحفاد عمو فرزدق كلهم متجمهرين عليه وينطونه فلوس حتى يركبون
يعني اكثر من هيج وكاحة وصلافة مشايفة
كاعد ببيت العالم. وياخذ من جهالهم فلوس
المهم لا تكليلي ولا اكلج
اني شفته هيج يسوي رحت عليه بكل غضب
ولزمته من اذنه ولويتها له حيل
وكعدت ارزل بي طيحت حظه
هو وباقي الشلة اولاد خواتي اترزلوا رزالة معتبرة
بس زيوني وكح ما يرتد
مشيت من يمه اسمعه يحجي وية البقية كللهم بصوت ناصي
عادي بس تدخل للبيت ارجع اسويها من جديد
بس سمعته كال هيج رجعت عليه
ولزمت الحبل وربطته. هو والاد خواتي البقية
ولفيت الحبل بالشجرة.
.. يالله بعد اريد اشوف شلون راح تسويلك مرجوحة
وهاي اني ربطتك مثل الخروف. راويني شسوي
هو يباوع بغضب ويكلي فتحي الحبل لا اكول لبابا عليج
وجواد ابن كوثر نفس الشي هم مطنكر وعاكد حواجبه وكال
.. عفية خالة هالة فتحي الحبل محصور اريد اروح للحمام
باوعت عليه ادري بي هاي حجة حتى افكه وينهزم
كلتله .. سويها على روحك
جنت اتأكد من عقدة. الحبل
وما حسيت الا على صوت غاضب
زمخ بية التفتت من مكاني
وجان اشوف عزام عم جواد واكف وراي
وعيونه شرارة عبالك يريد يثرمني باسنانه
كال بصوت كله تهديد
.. انتي بأي حق تربطين الجهال بالحبل
شنو هذا التعامل السادي وية الجهال
بالله شو فتحيهم
احس وجهي صار نار من ورة الفشلة
جاوبته.. اولاد خواتي واني حرة بيهم همة
اتوكحوا اني بمثابة امهم وعاقبتهم
شكو هذا التهجم
اقترب مني وسحب الحبل من بين ايدية وبدة يفتحه وهو يحجي بغضب
.. يعني اولادج بالمستقبل ناوية تتعاملين وياهم
هيج
.. اكيد اذا كانوا وكحين ويستحقون العقاب ليش لا
ولو اني اطفالي مستحيل يصيرون وكحين لان اني امهم
باوع علية وكال.. الله يساعد جهالج وابوهم عليج
ولو انا متأكد اذا صاروا جهالج عقال
فأكيد لان ابوهم مطفي وطابك وماعنده شخصية
يمة هو حجة هيج واني اتخبلت
لميت ايدي بغضب ورصيت على اسناني بغيض
.. رجاءاً. ما اسمحلك تتجاوز وتحجي على زوجي وجهالي انت اتعديت حدودك.
انتبهت على زلة الساني وباوعت لروحي اني شسويت
معقولة اني حجيت هيج
فتح الاولاد وجواد بقة واكف بمكانه
يباوع علية ميتحرك
عزام.. جواد روح للحمام بسرعة
جواد مجاوبه وسألني
.. خالة عادي اروح للحمام ؟؟؟
باوعت عليه واني كلي غيض
يلعن ابو شكلك يا جواد هاي من شوكت نزل
عليك الادب وصرت تستأذن مني
حجيت من بين اسناني
.. روح حبيب خالتك ذاك الحمام
لو تريدني اني اوديك
جواد.. لا خالتو ميحتاج انا جببر
راح الملعون بعد ما طير جبهتي
باوعت لعزام الي مكتف ايديه
وكال .. معقولة لهاي الدرجة مخوفتهم
.. لا همة ميخافون مني همة يحترموني
اكو فرق ترة
.. خلاص منا ورايح ااكد على كوثر
متاخذ جهالها وياها لبيت اهلها
لان الظاهر عندهم خالة فاصلة
وانا كلشي ولا جواد ابن اخوي
هذا روحي من الدنيا
كمل كلامه ودار وجهه وراح
واني بقيت واكفة العن بحظي المشخبط
على هاي الصدفة المو سعيدة
اباوع عليها تحجي بغضب
.. واليوم هماتين هاي العوبة هديل كملت السبحة
وكل مرة يشوفني بصورة مو حلوة.
جاوبتها واني اضحك
.. بالحقيقة حقج تنقهغين (تنقهرين)
اني اعتبره هذا اكبغ (اكبر) ظلم بحقج
لان اتهمج بالسادية والعدوانية والتسلط
والمشكلة هاي الصفات بعيدات كل البعد عنج
صحيح جهال خواتج يخافون منج
لان تصيحين هواي عليهم علمود يهوسون البيت
لكن ولا مغة (مرة) شفتج مديتي ايدج على واحد واذيتيه
.. اي منو يروح يكول هذا الكلام
للغبي عزام وينظف صورتي المشوهة كدامه
لج هدى احبه تعرفين شنو احبه
دخلت خالتي. ام قاسم
ام قاسم .. منو هذا الي تحبينه
اباوع لهالة كمزت من مكانها
واتبدلت معالم وجهة من الولهانة الى المتوترة من الخوف
.. احب جبس ليز ابو الملح وهذا زيوني الخبيث
ما اشتراه الي
ام قاسم .. لج انتي ما تبطلين تصرفين مصرفج على هاي السوالف
هالة غمزتلي وكالت
.. يمة غصب عني احبه مو بيدي
.. الحمدلله على نعمة العقل ربي يهديج
بعدها كالت
.. اي صدك بنات اني باجر اروح قبلكم لبيت
ام فرزدق وانتوا خلي الولد ياخذوكم للقاعة
واني مناك اروح وياهم
هالة.. لا عفية يمة والله نستحي ندخل للقاعة
وانتي مو ويانة
والله احس بروحي
عبالك طفل مضيع امه بالسوك من ادخل
جنت اباوع للساعة وخالة وهالة يحجون
وبديت احضر بالعشا هسة قاسم على وصول
ام قاسم .. منى وكوثر وياكم لا تكعدين تبجين
ما اوصيكم بنات اريدكم مرتبات
جنا نحجي
ودخلت هديل تضحك ومتونسة
شكلها سامعة خبر حلو
تباوع علية وتكلب بعيونها
والله ولا ارتاحلها هاي البنية كلها سم
دخل هشام للمطبخ وحط كدامي علاكة بيها حلويات
.. هدهد جنت بالسوبر ماركت وشفت الحلويات
واتنغصتلج كلت خطية قاسم ماعنده مجال
خلي اكسب بيها ثواب واشتريلها
هالة .. بدت رحمة الله اشم ريحة لواكة بالموضوع
عيني شمعنا هدى تشتريلها حلويات
واني ليش مغلس علية هاي الايام
لو هاي هي خلصت مصلحتك يمي
وبعد متحتاجني
هشام.. بابا انتي خلص دورج بعد ما تفيديني
لازم انتقل للمرحلة الثانية
همة يحجون واني ما اعرف وين اودي وجهي من الخجل
عبالك ديخطبوني مو يخطبون اختي
خطية هشام من يوم الي حجت وياية
خالة بموضوع مريم وهوكل يوم مشتريلي شي
لو حلويات لو ساعة لو عطر ماركة
خرب
اسمعه يحجي وية خالة بصوت ناصي
.. اكول يمة شنو هدى شوكت تحجي وية خواتها
.. من تروح لبيت اختها كالت افاتحهم بالموضوع
.. زين ليش متتصل عليهم وتحجي وياهم
.. لا ماما هيج مواضيع ما تنحجي بالنقال
لازم تكعد وية خواتها الكبار وتفهمهم وتاخذ رأي مريم
مسح على وجهه بكف ايده حركته هاي تشبه
حركة قاسم
وكال .. اكول هدهد انتي ما اشتاقيتي لاخواتج
ترحين تشوفيهم. انتبهت عليج صارلج شكد ما رايحة
ابتسمت واحجي بكلبي هو غير بالاول اخوك هرقل يعتقني حتى اروح لخواتي.
اشو كلما اكله اريد اروح لخواتي
يكلي ميخالف وان شاء الله وبعدين تصفى
والبعدين هي الاكي روحي نايمة بين احضانه
وناسية الموضوع كله من اساسه
.. ان شاء الله بس يجي قاسم اكله
حتى ياخذني اروح اشوف اخواتي
هشام بعجلة.. انا اوديج اذا تردين لان قاسم مشغول
لان اذا بقت السالفة على فرغة قاسم
وداعتج هاي ظلتي اعنس وما اتزوج
اااااااقصد هاي ظلتج ما تشوفين اخواتج
ضحكت ياربي والله مفضوح هشام
دار وجهه على امه
.. يمة جوعان العشا وين صار
ام قاسم.. شنو عزام راح
.. اي راح لبيتهم
.. ليش ما لزمته عالعشا عيب يطلع بهيج وكت
هشام .. انا شحته كلتله
ادري انت شنو ما عندكم بيت. انا امك ولازك بية
.. ياعيني شكد عيب شلون تحجي وياه هشكل
.. لاتخافين عليه هذا جلده خشن يتحمل شقانا
مو حساس كيكي
وداعتج باجر تلكينه مزروع ببيتنا
ويسألني بكل صلافة شنو عشاكم
.. اي يمة بالعافية عليه غير ابنا
ويتدلل علينا
هالة تحجي يمي ولهانة وعيونها
.. يمة الله يسمع منج ويصير
نسيبكم كولي امين
ضحكت.. امين
اكلج هذا عزومي شنو سالفته. شكد متناقض
من باب يكولج
بعد ما اخلي كوثغ (كوثر) تاخذ جواد وياها
لبيتكم
ومن باب هو كل يوم مزغوع (مزروع) هنا
شنو ما خايف على نفسه
تهدين عليه هالة شقاوة وتعلمين على وجهه بالسكين
حضرنا العشاء وبدينا نصب وجان يندك الحرس
رفعت راسي اباوع للشاشة
وجان اشوف بيت عمهم محمد جايين وست رهف بالمقدمة
وهديل طفرت من مكانها راحت تفتح الباب
يمة واني النار كامت تلسع بظلوعي احس اتفرهدت
هالة .. ادري هاي مو ذاك اليوم كالو شربت سم الفار وحاولت الانتحار
شتسوي هنا جاية شكله هذا السم مغشوش
جاوبتها واني افور.. لا احتمال ماكلة ضغوك الفاغ (ضروك الفار)
مو سم الفاغ (الفار)
دخلوا علينا. واحنا ستونا صابين عشا
اباوع لام قاسم كامت من مكانها واتلكتهم
ام قاسم .. هلا ابو ايمن تعالوا تفضلوا اتعشوا ويانة
بوجهكم
وراحت سلمت على زوجة عمهم ورهف واخت رهف
محمد .. والله حجية. ما اردج تدرين بية نقطة ضعفي
طبخج
همة يحجون واني عين عالشاشة وعين على رهف
كلبي كام يوجعني راح يوصل قاسم
ويشوفها
جانت كاشخة على اخر حباية عبالك مطلعينها
لحفلة صرت احوم مثل البزونة المحروك ذيلها
اباوع عليهم شلون كعدوا عالميز
واني وهالة كمنا من ميز الطعام حتى نسوي مجال
ام قاسم.. ها ليش كمتوا روحوا جيبوا كراسي من غرفة الطعام
.. لا خالة اني ما اتعشى قسومي كلي انتظريني
نتعشا سوية
يمة هو اني حجيت هشكل وهي عيونها جدحت نار
وخزرتني
هالة.. انني اشم رائحة شعواط في الجو
.. وان شاء الله ناغها (نارها) تاكل حطبها
واتدفى بي على عنادها العوبة تخزغني (تخزرني)
عود هو ملكها واني مالي حق بي
سمعتها حجت بصوت تنعوص
.. هديييييل قسومي وين
يمة كلبي بلعت ريكي وغصيت بي
.. لج هالة لزميني. بعد ما اتحمل غاح (راح) اكوم
اسحلها الصخلة لج هاي صلفة
سمعت صوت نقالي جان عالكاونتر اخذته وجان المتصل قاسم
رديت عليه وعوجت حلكي اقلد صوتها بدلع هداوي
.. الوووو هلووووو حبيبي قسومي
قاسم.. احتركت عشيرتج على هالصوت
ولج انتي وين بغرفتنا
.. لا ليش اني بالمطبخ حبيبي ييييييييي
صرت الح عالكلمة
.. لا تخليني اسب حبيبج لج هذا الصوت
استخدمي بغرفتنا كعدي اتنعوصي يمي
مو بالمطبخ
بلعت ريكي وعدلت صوتي
.. اممم
.. سمعيني زين انا واصل للبيت حضريلي العشا لان ميت من الجوع
.. صاغ (صار) من عيوني. يخسة الجوع
.. تسلم عيونج جنيتي اي هذا الصوت الزين
شلج بخطيتي وتحركين بكلبي
.. يالله حبيبي انتظرك. جيب وياك عصير برتقال
الي احبه
.. ان شاء الله
رحت دخلت للمطبخ الحار وبديت احظر العشا لقاسم
وكلبي بين الخايف وبين المتردد
شنو راح تكون ردة فعله اذا شاف رهف
سمعت صوت هورن سيارة قاسم
وشفت هشاام كام من مكانه
وراح يفتحله باب الكراج حتى يدخل السيارة
كبل رحت وكفت بباب المطبخ الحار
اريد الحك اشوف وجه قاسم اذا دخل وشاف رهف
باوعت عليه دخل والقى السلام وبعدها صافح
عمه وابن عمه ايمن
اباوع لعيونه صارت تدورعلى شخص
وبعدها استقرت نظراته علية
وخزرني. كلبي كمز من مكانه
سأل عمه
.. صارلكم هواي من جايين ؟؟؟
كله .. لا صارلنا نص ساعة من وصلنا تقريباً
رجع باوع علية وكال
.. لو ادري جان اجيت من وكت
هسة ما اعرف افرح
لان ما عبر رهف ولا كأنها موجودة
لو اخاف لان كل شوية يخزرني
اترخص منهم وكال انا صاعد ابدل ملابسي
طلع من المطبخ وصاحني
..هدى تعالي
يمةةةةةةة
رحت صعدت وراه بس دخلت للغرفة
كبل انركع الباب وصار وراي التفتت وباوعت عليه
مكتف ايديه وعيونه نار
سألني بهدوء
..قبل شوية بالنقال جنتي تنعوصين كدام
ايمن وعمي وهشام
بلعت ريكي وجاوبته
.. والله ما انتبهت عليهم من حجيت وياك نسيت نفسي
تدغي (تدري) بية من اسمع صوتك اضيع ومااعغف (مااعرف) اني وين
اصلا صوتي من الفرحة يكوم ينعوص وحده
انت كله منك.. صوجك علمتني على الوكاحة
عض ايده يتوعد
.. ولج. جنية بختج بالخطار جان سحلتج
واعلمج شلون تنتبهين
ابتسمت بدلع واقتربت منه ورفعت نفسي على اطراف اصابيعي
اريد اوصله بس ما وصلت وهمست بدلع
.. امممم عاااادي اسحلنيييييييي
اصلا سحل الحبيب زبيب
جان مدنك راسه قريب علية ويكابر
مثل الوحش الزعلان
ما انطيته مجال رفعت ايديه وحوطت ركبته
وقربت راسه علية وبسته بشفايفه
وصرت اتفنن بتعذيبه
وجان يتبخر زعله خلال لحظات
وولمني لحضنه مرحب
وما قصر كان جدا
متعاون وانفاسنا الحارة تشهد علنا انه ذايب
جنا غايبين بعالمنا الخاص
واندك الباب وسمعنا صوت هديل
من ورة الباب
.. قاسم ماما تكول وين صار قاسم
رفع راسه وجلى صوته وجاوبها
.. احم هسة انزل
رجعت قربت راسه علية
بقيت متعلقة بحضنه ما اريده يروح ينزل يمهم اخاف
رجعت انطيته بوسة مرة ثانية
وايده محوطتني وتتلمس براحتها
وكال وانفاسه متسارعة
.. انتي شنو سالفتج اليوم ناوية علية
.. قسومي .. قاسم .. قسمتي
حبيبي عفيااااا ابقى هنا والله مشتاقتلك
نزل ايدية من على ركبته
ومسح شفتي بأبهامه وكال
.. ميصير زحمة عمي جايني خطار لبيتي
وانا نايم معلك فوك بغرفتي وين كاعدين
مو من الاصول
نفخت ولميت شفايفي
اتمنى اسأله عن رهف واخاف من جوابه
اباوع عليه بدة ينزع قميصه
ورحت للكنتور وطلعتله تراك منزلي
التفتت ولكيته وراي اخذ مني التراك
وكال.. خير اشو كلبتيها عالصامت
هادي مو من طبع الهدوء
جان يحجي ويبدل
ما اريد افتح موضوع رهف هسة وهو يريد ينزل يمهم
بعدين احجي وياه
.. حبيبي اني كلي هدوء بس انت ظالمني
طلعنا من الغرفة وونزلنا جوة
دخلنا للمطبخ
لكيناهم مندمجين يسولفون وجان موضوعهم
قصة كاظم وصفاء
وهشام عاكد حواجبه معصب ويحجي وية عمه
وام قاسم تأكد على كلام هشام وتكول لمحمد
.. يعني احلفك بالله ابو ايمن تقبلها يتجاوزن على اهل بيتك وانت مموجود
.. لا والله ما ارضاها بروح المروحوم
لاعبالج انا راضي عليه بليلتها انا رحتلهم للبيت
ولعبت بيهم طوبة هو وابنه
بس هم ما يصير قاسم يطرده ويكله تاخذ عائلتك
وتطلع من البيت زحمة وهو عمه
اباوع لقاسم سحب كرسي من ميز الطعام وكعد. وكال
بكل ثقة
قاسم .. والله ياعمي اخوك هو بيده خسر احترامه لنفسه
وانا تعرفني كلش زين اليتجاوز على اهل بيتي
ما ارحمه حتى لو كان عمي
هذا ما ينطيه الحق. يتعدة على امي ببيتها
.. يعني مو حلوة كدام العالم
عم وابن اخوه يتعاركون ومشاكل
همة يحجون واني عيني على رهف
من اول ما دخلنا للمطبخ لحد هسة عيونها مشالتهم من على قاسم
عمة بعينها اكلته اكل بالنظرات
واني من الغيرة احس بسنوني راح تتكسر
من كد ما رصيت عليهم حيل
اقتربت عليه وسألته بصوت ناصي عكس العاصفة الي بكلبي
.. قاسم اصبلك عشا
كلي اي ورجع يكمل كلامه وية
عمه
حضرت العشا بسرعة طلقة وهالة وهديل بدوا
يرفعون الصحون من عالميز لان همة كملوا عشاهم
حطيت الجاي عالنار واخذت صينية العشا لقاسم
وكفت بصفه
وكعدت احطله الاكل عالميز
جنت اتعمد من احط الصحون كدامه اطخه
بأيدي اما بكتفه او بزنده. هيج لمسات خاطفة
اريده يحس بية اني موجودة.
وهو حضرته جان مندمج يحجي وية عمه
شلت الخبز وعدت نفس الحركة
وما احس الا واجتني كرصة بزري
شهكت بصوت مكتوم ودنكت اباوع
وجان اشوف قاسم ماد ايده وديكرصني
بفخذي بغيض
والاقوى من هذا كله
ان قاسم لازال مستمر بالحجي وية عمه
ولا عبالك ديسوي شي
لا والاحلى من هذا كله
يكرص ويرجع يتحسس مكان الكرصة
مثل الي يضرب ابرة لازم يمسد المكان الابرة
حتى لا يترك اثر
هذا كله واني واكفة متصنمة احس وجهي صار نار
من الحر جليت صوتي وسألته
.. احم قاسم بعد تغيد (تريد) شي
جنت شايلة الصينية
نزل ايده وكال وهو داير على عمه
.. لا ما اريد شي ما قصرتي
بعدها ابتعدت من يمه ورحت للمطبخ الحار
لكيت هالة تغسل بالصحون وترزل بهديل
لان لابسة ملابسها الجديدات
هديل .. اهووو شخبصتينا بملابسج
هذنيج همة حطيتهم الج بالسلة مالت الغسيل
حتى تغسليهم
لان وكع عليهم عصير رمان بالخطاء
وها اي صدك اتذكرت وكعت دكمة من القميص
جانت تحجي بخباثة صدك اني من يمي انفتيت
اباوع لهالة كامت تكمز
دارت عليها تريد تكمل تحجي وجان تدخل ام قاسم
وتحجي وياهن بصوت ناصي
..شكو شنو هذا الصوت مو عيب متستحون منا بيت عمكم وانتوا اصواتكم تلعلع
هالة بغيض .. يمة شفتي بنتج هديل اليوم لبست ملابسي الجديدات حتى بعدني ملابستهم
وكلبي كام يحوم على فهاوت هالة
كملت اذكرها بخباثة
.. اكول هالة صلي على النبي تغة (ترة) ما تسوى تعصبين
يعني واذا وكعت عليهم عصيغ غمان (عصير رمان )
وشلعت دكمة القميص فدوة الها
اباوع لهديل بلعت ريكها
ام قاسم بغضب ..لامو فدوة الها
ملابس جدد اخذتهم من اختها ولبستهم وتالي هيج تعاملهم بكل اهمال
لعد ما دام هشكل سوت
باوعت لهديل
هذا هو ماما هديل
ما دام عجبوج ملابس هالة. ولبستيهم خلاص
الملابس صارن حصتج
معناها سقط حقج بعد ما اشتريلج
وهالة تشوفلها اي يوم يعجبها اخذها للمول واشتريلها ملابس جديدات
هديل سمعت القرار وكامت تكمز من الغيض
.. والله حرام عليكم هذا اكبر ظلم
ماما انتي هواي تفرقين
ام قاسم .. يالله الموضوع انتهى وغير قابل للنقاش
وما اسمع بعد اي كلمة
طلعت ام قاسم من المطبخ
وهديل كامت تغلط على هالة بصوت ناصي
حتى متسمع
اني صبيت الجاي واخذته الهم للهول
لكيت الكل كاعدين قاسم شافني
كال .. هشام
هشام بس شاف اتجاه نظرة قاسم علية
كبل كام واخذ الصينية
من عندي وهو قدملهم
رحت كعدت يم خالة لكيتهم يسولفون عن السياسة
وشكالت الاوضاع
اما خالة ام قاسم وام ايمن كانوا يحجون
عن عرس صهيب اما هديل.
فعيونها ما وكعت عن ايمن
وايمن الظاهر مو بحالها. هو دكتور اتخرج قبل سنتين
طبعا كلما يجون اباوع لهديل تسحل روحها
في سبيل تلفت انتباهه
خطية اما رهف فهاي في وادي اخر
خالة ام قاسم سألتها
.. وانتي رهف خالة شلون صارت صحتج
رهف بصوت عالي مقصود تريد تسمع قاسم
.. والله خالة اني موزينة صحتي اريد اموت
انتبهت لقاسم. قطع كلامه وباوع عليها
والتقت عيونهم للحظة وبعدها قاسم دار وجهه
وكمل كلامه وية عمه
هي صحيح جانت مجرد نظرات.
بس ما فاتتني لمحة الاهتمام الي شفتها بنظرات قاسم
صحيح بعدها اتحولت نظرته لبرود. قاسي
ودار وجهه عنها وكأنما ما يعرفها
حسيت بلحظتها مثل النار تلهب بين ظلوعي
صار كلبي تنور يفور من الغيرة والغيض
اجتي هالة وكعدنا اني وياها نسولف
ونضحك
بس جنت اضحك متعمدة اخت رهف الصغيرة
سألتني
.. اكول هدى شنو تحطين لشعرج. من زيوت
وهيج صار طويل وحلو اريد شعري مثل شعري
ام قاسم .. خالة كولي ما شاء الله
رند .. ما شاء الله.
رددت ورة خالتي ورجعت عادت سؤالها
ابتسمت وجاوبتها
.. حبيبتي اني استخدم زيت الزيتون الاسباني
لشعغي ( لشعري)
رند .. ايمن اخوية يحب الشعر الطويل
ودائما يكول لماما اذا اريد اتزوج كون اخذلي وحدة
شعرها طويل اتذكرت شعرج وكلتله
هدى زوجة قاسم شعرها كلش طويل بطولها وسرح
عبالك شعر هندية
ام قاسم .. ياعيني خطية غير ذاك اليوم شعرها
اتشعوط من كدام من انتوا جنتوا موجودين عدنا
وكعدت خالة تطرد عيون وبعدها غيرت الموضوع
وكامت تسأل ام ايمن بغير امور
جان نقالي بحضني لحظات واجتني رسالة
قريت اسم حبيبي هيج كاتبته على نقالي
ورفعت راسي لكيت قاسم يسولف ويكلب بالنقال
فتحت النقال ولكيته مراسلني عالواتساب
كاتب.. كومي صعدي فوك للغرفة لا اكوم اسحلج
كدامهم.
رفعت راسي وعيوني اجتي بعيونه جانت عيونه
نار
رصيت على اسناني وكتبتله
وكمت من مكاني واني افور بغيض معقولة اكوم واتركه لوحده
جنت بين الخايفة منه ولازم انفذ وبين معاندة ما اقبل
بعدها قررت ابقى مستحيل اعوفه ورهف هنا
منتظرة تترصد الفرصة حتى تحجي وياه
لحد هسة نظرة عيونه حركتها دتحرك بكلبي
سديت النقال ولاكأني قريت ولاوجهتله نظرة
لان اخاف اضعف كدام غضبه وانسحب
لذلك بقيت كاعدة وساكتة ما احجي اي شي
بعدها وصلت رسالة ثانية
عرفتها من قاسم لذلك فضلت اغلس عليها واسوي نفسي
مندمجة بالحجي وية خالة وام ايمن وممنتبهة عالنقال
وورة نص ساعة استأذنوا بيت عمهم محمد
وطلعوا وعمهم محمد قبل لا يطلع
كال لقاسم راح اسوي عزيمة واعزم الكل
حتى تتصالح انت وعمك
قاسم.. عمي والله ما تسوى تتعب حالك
عمي كاظم. هو نفسه ما راح يتغير
ويبقى يتجاوز وما يتعض
فخليني هالمرة انا اريد احطله حد
و لاتحرجني. بالعزيمة كدام الناس
محمد.. مو حلوة بحقي اشوفكم تتعاركون
وابقى اباوع عليكم. لازم احلها بالتي هي احسن
.. خلاص موسى بدين وعيسى بدين
كل واحد عليه بنفسه لتخاف علينا
بعدها اسأذنوا وطلعوا ورهف الي تريد تموت
لان ما كدرت تنفرد بقاسم مثل كل مرة
رحت وية هالة كعدت ارتب الهول وشلت الاستكاين
والنفاضات واخذتهم للمطبخ الحار
سمعت صوت قاسم يصيحني كال انا صاعد فوك صعديلي جاي
.. صاغ (صار)
غسلت الاستكانات وخلصت المطبخ
واخذتله الجاي فوك
دخلت وحطيت الجاي عالميز
باوع علية
.. انا شنو كلت
..انت كلت صعدي فوك بدون ما اعغف (مااعرف) ليش اصعد
.. يعني ترديني اكعد اسمعهم يتغزلون بطول شعرج وجماله
و يوصفون بي كدام الرياجيل وانتي حضرتج كاعده مو يمج
رمشت بعيوني استغربت يعني جان سبب غضبه
كلام رند عن شعري
سحبت نفس عميق .. صحيح كلامك وحقك فعلا بنت عمك داست بالكلام
بس تصدك اني بالي جان كله مو يمها
.. لعد بشنو حضرتج جنتي مشغولة
سحبت نفس عميق وسألته بتردد
.. مشغولة افكغ بغهف (افكر برهف ) شنو موقعها بحياتنا
طبعا المفغوض (المفروض) كان لازم اسأل هذا السؤال قبل
ما ابدي وياك ونتمم زواجنا
اني ما انكغ (ماانكر) انت كلتلي عن تنفيذ وعدك بالزواج منها
واني انطيتك بوكتها غدي بالغفض (ردي بالرفض )
وانسحبت من حياتك لان اغفض (ارفض) وحدة ثانية
تشاغكني (تشاركني) بزوجي وبوكتها انت عغفت غدي (عرفت ردي)
وبديت تتعصب مني وضجت من بغودي (برودي)
لكن الصاغ (الصار) بعد عغكة (عركة) عمك كاظم
انقلبت الموازين
واتخذت القغاغات (القرارات) بلحظة. ضعف. احتلتني المشاعغ (المشاعر)
وكلامك كان كله ووعود شجعني
وحسستني ان اني الوحيدة الي غاح (راح) اكون زوجتك وبحياتك
وضعفي بين ايديك سلب عقلي ونساني اهم موضوع بزواجي الي هو غهف (رهف)
نسيت كلشي واني بحضنك
بس هسة بعد ما شفت رهف
وانتبهت لنظغتك (نظرتك ) لها اتذكغت بشنو وعدتها
قاسم اغيد اعغف (اريد اعرف ) انت بعدك عالوعد وياها ؟؟؟
سحب نفس عميق وكال
.. شوفي هدى الشي الما تعرفيه
انا كسرت وعدي وية رهف قبل لا ابدي وياج
واتمم زواجنا بشكل فعلي. فاتطمني ما راح اتزوج رهف
.. اكدر اعرف ليش كسغت (كسرت) الوعد
حنت اتمنى يحجيلي عن الصار وياها
.. صار شي خلاني احط حد لعلاقتنا واكسر وعدي وياها
وما راح اتزوجها لو تبقى اخر مرية بالعالم
.. صحيح انت غافض (رافض) تتزوجها.
بس انت بعدك تحبها
.. هسة احبها او ما احبها
انتي ليش ضايجة اشو انتي الكل بالكل
االج الصافي انتي زوجتي و ام بيتي
واريدج تكونين انتي ام جهالي
قربني منه وكمل
بالله شو تعالي شلون تتحارشين بية. عالعشا
يتبع
احبكم كومة احبكم هواي
اختكم نهى الحسون