البارت 5
#ثأر_العشگ
بقلمي ملاك الصمت
عقد زواج بأسم لواء ووسن ..
گعدت ع الجربايه ..
احس بأيدي لازمه المبايل وترجف .. عيوني رمشت هواي .. الدنيا افترت بيه .. شنو. من احساس حسيت ماعرف اوصفه .. غدر ؟؟ خيانه ؟؟ لايمكن ماصدگت ماستوعبت ..
عقلي فصل وظل يعيد ..لواء ووسن ..لواء ووسن .. ياوسن ؟ هي مو مزوجه وزوجهه شامرهه ع بيت عمهه وعدهه جومانه ..
لحظات وتذكرت من ردنه نروح جومانه گامت تبجي ع لواء ..
كزبر جلدي .. غمضت عيوني بقوة .. بلكي افتح ويطلع كابوس ..
رجعت تذكرت كل المواقف وكل الاشياء الي المفروض تخليني اشك بس اني اخذتهه بشكل طبيعي ..
فتحت عيوني الجهازلسه بيدي الشاشه طافيه فتحت قفل جهازي بلهفه نفس الصورة طلعتلي ..عقد زواج لواء ووسن .. يعني لاحلم ولا كابوس ..
بلاوعي گمت للحمام لزمت اختبار الحمل .. باوعتله بس فاصله مو بعقلي ماعرف شداسوي ..
ماكو شي منطقي بأفعالي ..
سويت الاختبار .. دقايق وطلعت النتيجه .. خطين ورديين .. عقلي ماستوعب .. يعني حامل ؟؟؟ ..
ظليت صافنه ع الخطين .. يتهيألي اللون لو هو وردي لو عيوني بيهن شي ..
طلعت من الحمام بخطوات بطيئه متردده .. الاختبار بعده بيدي فكرت اعيده .. ليش اعيده .. شنو ناقصني عن كل أمراة تزوجت وتمتعت بحق الامومه ..
يمكن لدقايق عقلي نسى العقد ولواء ووسن او اختار ينسى ...
بداخلي فرحه مخنوگه .. هالخبر هالحمل انتظرة من 6سنين ..
الحمدلله والشكر ياربي .. الف الحمدلله ..
ضحكت من خاطري .. حضنت بطني بأديه .. اكو روح داخلي .. هالشي فرحني ..
ضحكتي صارت بهستيريا من دگ مبايلي اشعارات رسائل فايبر ..
لزمته ..
هالمرة صدوك لواء دازلي مسجات ..
صبااحو حبيبي .. گاعد الحلو لو. نايم ؟
ضحكتي تحولت بجي .. حبيبي صارت ملح ع جرحي ..
بجيت وبجيت لحد ماختنكت .. صرت اشاهگ وگوة اجر النفس ..
صرخت صرخات من روحي .. محد سمع صوتهه بس الحيطان ..
لسان حالي يسأل ليش .. كل هذا الحب وتتزوج عليه لواء ..
رجع راسلني ..
هااا لازم بعدج بالفراش .. تشوفين ومتردين ..
بعد الضحك وبعد البجي وهستيريا المشاعر الله ذب عليه برود ..
مسحت دموعي وگمت غسلت وجهي ..
رجعت لمكاني وسويت اعادة توجيه لصورة العقد واندزت اله ..
اجزاء من الثانيه واتصل ..
ظليت صافنه ع الجهاز وهو ديدوگ ..
مكتوب عشگي يتصل ..
خلصت الدگه ودگ مرة ثانيه وثالثه ورابعه ..
مسجات .. جاوبي .. وينج .. دااتصل جاوبي ..
اتصل .. رديت ..
سمعت صوته گال الو ..
ماحجيت شي .. منتظرة يبررلي ويكسرلي گلبي بعد اكثر بأعذارة الواهيه ..
منين هذا الرقم .. منو دزلج الرساله ؟
لومبررلي ومجذب عليه ولا كلامه هذا ..
جاوبته ..
منو دزلي الرساله .. هذا الهامك ؟
لا اكيد مو هذا الهامني ..
العقد صحيح ؟؟ انت متزوج وسن ؟
نيران ..
جااوب .. اي لو لا ؟ اني لسه ممصدگه وهاي فرصتك تنكر ..
نيران اسمعيني الاول ..
صار بيهه اسمعيني يعني الجواب اي لان لو الموضوع مو صحيح جان رأسا نفيته علمود تثبتلي براءتك ..
نيران حبيبتي ..
كون نيران تشعل گلبك شعل مثل ماهسه شعلت گلبي بنار ضرة ..
ليش اتزوجت ؟
....
جان ساكت بس يسمع ويجر انفاس قويه وحسرات ..
علمود الاطفال ؟مو ؟ وجومانه بنتك ؟ ميحتاج تجاوب .. اي بنتك .. تشبهك ومتعلقه بيك ..
شگد صارلك مزوج ؟ سنه ثنين ؟ لو من اول ما طلعتني من بيت اهلك ..
اسمعه يجر حسرات ..
الله يكثرهن ..
جاوبني ..
شنو هنه ؟
حسراتك .. تحلم تشوف وجهي بعد ..
نيران اني جاي متطلعين من البيت ..
ابشرك .. اني حامل ..
شنووووو ..
شبيك ممصدگ ؟ لو مو مثل النسوان وحقي اصير حامل ويصير عندي طفل يصيحلي ماما ..
انتي دتحجين صدوك .. صدوك حامل ؟
مع السلامه لواء ..
تعاي وين رايحه ..
مالي گعده ببيت الي غدرني ..
متطلعين من البيت نيران .. اني بالطريق جاي ونتفاهم ..
ع شنو. نتفاهم .. فات الاوان ع التفاهم ..
نيران لاتتحركين من مكانج اني جاي ..
ماهمني كلامه صراحه .. سديت الخط بوجهه .. فتحت كنتوري جريت جنطه سفر حجمهه وسط ..
خليت بيهه ملابس بشكل عشوائي ..
اي شي اجه كدامي حطيته بالجنطه اكثرهن جانن معلگات وجريتهن ..
سديت الجنطه ولبست فوگ تراكي عبايه كتف ولفيت الشال ماعرف شلون اخذت مبايلي وطلعت من البيت اسحب بالجنطه ..
وصلت لراس الشارع اخذت تكسي لبيت اهلي .. دقايق ووصلت ..
نزلت والسايق نزل جنطتي لان جان مخليهه بجنطة السيارة ..
ظليت واگفه بالباب ..
جنت بارده ماعرف شنو من شعور انتابني .. اكو قوة بداخلي .. صح هو شعور بالقوة بس احسهه خانگتني حاصرتني ..
احس داانترس بداخلي حقد .. اتذكر مواقف .. احقد .. اضعف .. تحصرني البجيه .. استخطي نفسي وارجع احبس الدموع .. ابد ماريد الدمعه تنزل ..
دگيت الباب .. محد فتحلي .. تذكرت اليوم صباحيه عرس جوان .. ع الاكثر امي ووحده من خالاتي رايحات يودن ريوك لعيال جوان واكيد واحد من اخواني ماخذهن ..
عندي المفتاح .. فتحت ..
تكمله بارت 5
ثار العشگ
بقلمي ملاك الصمت
فتحت الباب وطبيت ..
قفلته وراي متوقعه لواء يجي لهنا من يوصل وميلگاني بالبيت ..
گبل صعدت لغرفتي .. ذبيت نفسي ع جربايتي القديمه ولميت رجليه لبطني وسرحت ..
كل شويه اتذكر شي وتدمع عيني وتطفر دمعه وامسحهه .. جنت كل شويه يغلفني برود ممزوج بقوة عجيبه يخليني افكر تفكيرات مابيهه رحمه ..
البجي والدموع تخلي الگلب يرق وينسى الاذيه بس اني ماريد انسى اريد احاسب وانتقم .. حساب عسيير .
يمكن ورة ساعه او اقل اندگت الباب .. توقعته هو .. ويه دگه الباب جهازي دگ لواء .. تأكدت الي ديدوگ الباب هو ..
قفلت باب المطبخ وسديت البرده وكعدت ..
ماحركت ساكن .. الى ان مل وراح ..
رجعت لغرفتي .. جهازي مابطل اتصال الا غلقته ياله ارتاحيت منه ..
رجعت لغرفتي .. ذبيت جسمي ع فراشي ونمت .. مادري شكد نمت ..گعدت امي يم راسي ..
هلو حبيبتي ..
هلو ماما ..
شبيج ماما شنو هالنوم هذا ..
ماعرف تعبانه ونعسانه .. بيش الساعه هسه ..
راح يصير المغرب ..
حيييل .. شوكت اجيتو ...
عوفج مني انتي شبيج ..شو جايبه جنطه ملابس جبيرة شنوزعلانه ؟
مارديت عليهه ..
احجيلي يوم شصاير زوجج جوة كاعد ويه اخوج ..
ليش دخلتوه للبيت ..
هاي شنو .. شنو هالحجي يمه ..
سكتت ماعرف شگول ..
گومي بدلي ملابسج وارجعي ويه زوجج وحلوا مشكلتكم بينكم .. لاتكبريهه يمه ولاتطلعين من بيتج ..
ماما هي المشكله جبيرة مو اني مكبرتهه ..
شنو صار شمسوي لواء ؟
تجرعت الم هذه العبارة وگلتهه ..
متزوج عليه وحته عنده طفله ..
امي صفنت عليه .. ممستوعبه الموضوع ..
لواء تزوج عليج ؟
اي ..
نزل دمعه مسحتهه بسرعه ..
خلي يروح يوم مامستعده اشوفه ولا اواجهه ..
زين شلون عرفتي الموضوع شلون تأكدتي ؟
رقم غريب دزلي العقد مالته .. متزوج بنت عمه وسن واجهته بالعقد مانكر ..
رقمن هذا الرقم الغريب ..
ماعرف ومايهمني اعرف .. قابل اعوف موضوع زواجه عليه واگعود ادور منو هاي الي دزتلي صورة للعقد ..
اكيد مو لسواد عيوني دزن صورة العقد واكيد وحده من حمواتي هيج سوت ..
شو متأكده ..
لان البارحه تعارك وياهن لواء وطلعنه نص الليل لبغداد رجعنه لبيتنه ..
امي سكتت بس ظلت تباوعلي ماعرف بشنو تفكر ..
شلون عرفتي عنده طفله ؟
شفتهه لوسن بالعرس .. عدهه جومانه والطفله اكثر من مرة شفتهه تبجي ع لواء متعلقه بي ..وهم من سألته مانكر ..
يمه حقه 6سنين ومصار اطفال والرجال دگ عمره ال 35 ..
التفتت ع امي مكسورة خاطر .. اني شبيدي .. هو رزق رب العالمين .. وهو مانتظر ..
ماردت احجي لامي ع الحمل الا اروح لمختبر واسوي تحليل واتأكد .. كلامهه من كالت حقه وجعني كفايه وزايد ..
التفتت بجربايتي نطيتهه ظهري ..
ردتهه تگوم تطلع تعوفني لحالي ..
يعني مراح تگومين تطلعيله ؟
گتلج ممستعده اواجهه هسه ..
عافتني وطلعت .. گمت قفلت الباب وراهه بالمفتاح خاف الهم نيه يدخلونه عليه ..
نزلت دموعي .. كلام امي اذاني .. ماطيبت خاطري بكلمه بالعكس گالت حقه .. حجايه خلت سجين بگلبي من اقرب انسانه اليه المفروض هي امي وتفهمني ..
ليش من تطلع مشكله الحمل من الرجال والمرة تعوفه لان تريد تصير ام تريد حقهه بالامومه تصير مو خوش ادميه وماوگفت بظهر زوجهه بس المرة من تصير مشكله الحمل منهه والرجال ميصبر عليهه ويروح يتزوج يگولون حقه ميگولون مو ابن اوادم باع العشرة علمود طفل ..
والله لو اظل افكر بالناس شلون تفكر وشلون تحكم ع البشر بظلم يشيب راسي ..
دقايق وسمعت صوت لواء ورة الباب ..
دگ الباب وتحركت اليده مال الباب مانفتحت عندة لان اني قافلتهه ..
نيران افتحي الباب خلي نتفاهم ..
ضحكت بأستهزاء ع كلمة نتفاهم ..
نييييران .. اعرف انتي بالداخل .. فتحي الباب دنحجي ..
گمت من فراشي ووگفت ورة الباب ..
ماكو بيناتنه حجي بعد ..
لا اكو .. فتحي الباب دنحجي ..
مامستعده اسمعك ..
يعني شنو ؟
يعني روح منا ..
ماروح الا تفتحين الباب ونگعود ونتفاهم ..
عن شنو نتفاهم .. اني حتى وجهك مو طايقه اشوفه .. خاين وغدار ..
انتبهي ع كلامج ..
غثك كلامي بس ما غثتك سوايتك بيه .. غدرتني واستغفلتني وانت شكد صارلك مزوج ؟ من عمر جمانه اقل شي صارلك سنه ونص سنتين متزوج .. سنتين وانت تباوع بعيني وتكذب عليه .. سنتين وانت مستغفلني ..
افتحي خلي نحجي ..
رووح مامستعده اسمع كذبك بعد ولا اريد اسمع صوتك اصلا .. صرت اشمئز منك ..
هدر بيه بصوت غضب مكتوم ..
نييييران احترمي نفسج ولتختبرين صبري ..
ولي منا ..
يمكن اول مرة بحياتي اغلط هيج ..
ضرب الباب بقبضة ايده گمزني من الخرعه ..
اني اعلمج ع هالتجاوز هذا ..
نجوم السما اقربلك .. انت انتهيت بالنسبه الي ..
وانتي مانتهيتي بالنسبه الي .. وحامل بطفلي ..
سكتت نزلن دموعي .. اذا صدوك حامل شلون توقيت غلط لحملي وشنو ذنب الطفل ..
تقرب صوته من الباب وصار يحجي بصوت ناصي ..
صدوك انتي حامل بطفلي نيران ؟
...
مارديت
تكمله بارت 5
ثار العشگ
ملاك الصمت
لو گتيلي هيج بس تريدين تحرگين گلبي ..
وانت هم عندك گلب علمود يحترگ کلبك ؟
ليش تحجين هيج .. اي صح تزوجت علمود الاطفال بس اسألج بالله .. هم حسستج بشي ؟ هم قصرت وياج بشي ؟
لو محسسني لو مقصر اهون عليه من غدرك ..
ليش تحسبيهه غدر ؟ ليش متگولين حقي اريدلي طفل يشيل اسمي تعرفيني شكد احب الاطفال .. تعرفيني ميت ع ريحه طفل يترس حضني .. 6 سنين ابد محسستج بشي لان اعرف هالموضوع يجرحج .. داريتج ودللتج مو لان اشوف بيج نقص بس لان احبج ..
هه تحبني وتتزوج عليه ..
ماكفرت نيران ردت طفل ..
خلص .. حقك هذا واني اعترف بي .. لهنا وحياتي وياك انتهت ..
يعني شنو ؟
يعني طلگني وروح كمل حياتك ويه زوجتك وبنتك ..
ماطلگ .. اني اگولج نجوم السما اقربلج ..
بيناتنه المحاكم .. خلص روح .. ماعندي بعد كلام وياك ..
واني عندي .. طلعي نتفاهم ..
شتتفاهم اكثر من هالكلام .. شتريد تحجي بعد ؟
اخذج لطبيبه تحللين ونتأكد ..
معليك انت بحملي ..
طفلي هذا شنو معليه ..
روح بعد ماريد اسمعلك .. كافي الي سمعته ..
ولج شو تطرديني ..
هذا مستواك .. اطردك مو بس من بيتي اطردك من حياتي .. يله .. وسبع حجارات وراك ..
گام يصيح و يضرب ع الباب بقوة خرعني ..
ولج نيران اني اعلمج ..
لميت رجليه لبطني وگعدت بالگاع ورة الجربايه بعيد عن الباب مكان مثل الختله بين الجربايه والكنتور ..
صميت اذاناتي ..
وصرت اصيح .. جمال وخرة من الباب راح يكسرهه .. جمال وخرة ..
شويه وسمعت صوت امي وجمال يحجون ويه لواء ويهدؤون بي ويبعدوه من يم الباب ..
دقايق وسمعت صوت امي تتطمن عليه .. رادت تدخل الباب مقفول .. طمنتهه اني بخير بس عوفوني بحالي اريد ارتاح وحدي وماريد احد يمي ولا اريد احجي ويه احد ..
عافتني وراحت ..
للحكايه بقيه ..
قراءة ممتعه .. القصه من الخيال صح بس احداثهه من واقعنه المر ..ولاتکلولي البارت قصير البارت مركزة بي ع المشاعر لان ضروري نعرف شنو شعور الزوجه الي تنحرم من نعمه الامومه وضروري نعرف مشاعر الزوجه من يتزوج عليهه زوجهه ...
شاركوني توقعاتكم لان تفيدني اني مثلكم هم ماعرف شراح يصير .. احداث البارت الجاي راح يصير وليد اللحظه يعني من توقعاتكم بس كون شي منطقي يعني ...