أساور الفضة

البارت الخمسون

مساء الخير عليكم والسرور
احبتي اعتذر عن التأخير
بس البارت كان جدا طويل
وبي احداث كلش هواي لذلك اتأخرات عليكم
كلت انزللكم بارت طويل حتى
اعوضكم عن يوم الخميس

☺️☺️☺️☺️☺️☺️☺️☺️☺️☺️☺️

#اساور_الفضة
#نهى_الحسون

هدى
جنا كاعدين اني والبنات دنشرب جاي من بعدما
خلصنا الغدة وضحى انطت اوراقها لمروة حتى تقراهم لان مروة من طلبت من عند ضحى تجي تراجع عندها كلتلها ضحى عمتي ام سيف وسيف دائما ياخذوني لدكتورة اختصاص نسائية وهي تصير دكتورة
خواته وامه ونسوان خوانه كلهم يراجعون عندها

لذلك مروة طلبت منها تجيب اوراق التحاليل
واخذتهم من ضحى وبدت تسألها كم سؤال وكالت
وهي مستغربة

.. حبيبتي ضحى التحاليل والسونارات الي كدامي كلها تكول رحمج نظيف والمبايض سليمة
والبيضة عندج بالتاريخ الي انتي مسوية بي السونار
نسبتها 20
يعني انتي ماعندج اي شي يمنعج عن الحمل بصورة طبيعية. كل شي سليم

انتبهت لضحى ضلت مصفصفة
تباوع بالوجوه مثل الضايعة والدموع لمعت بعيونها
وفجاءة انفجرت تبجي بحركة وبغصة مهضومة حالها جان
مثل واحد ميت ويكلوله ان هو بعده على قيد الحياة

وكالت .. مروة يعني شنو اني كلشي مبية يعني اني مو عقيمة
تباوع لمروة بأمل والعيون غركانة بالدموع

.. مروة صدك دتحجين يعني اني عندي امل اصير ام
ويصير عندي اطفال ويصيحوني ماما
معقولة اني اني طول هاي المدة جنت مخدوعة
وجنت اعاني لوحدي

وبعدها مكدرت تكمل كلامها دنكت وضمت وجهة بكفوف ايديها وصارت تبجي فاقدة

كامت شيماء من مكانها وحضنتها
وتطبطب على ظهرها
.. لج كااافي مو مردتي كلبي
من الله لا يرضى عليهم

حجيت وياها مكسور كلبي عليها
.. يعني جنتي ضامه وكاتمة كل هذا الالم بكلبج
ومتحملة وصابرة
ضحى تحجي وتبجي
.. انتوا متعرفون اني شنو كاعد احس بهاللحظة
تعرفون واحد فاقد الامل بالحياة وديصارع علمود
يكمل طريقه الاظلم

حياتي كلها وية سيف عبارة حفرة واني مطمورة بيها
مالي حق اطلع ولا الي حق اشوف العالم
ولا الي حق التقى باحد ومالي حق اتصرف بأي شي بالبيت نهائياً و
حتى لو كان هذا الشي يخصني الي هم مالي حق اتصرف بي

بس رغم هذا كله جان عندي ومضة امل
اضوي بيها ظلام الحفرة الي اني عايشة داخله اكول عسى لعل من الله يرزقني بأطفال ينصلح حاله وحياتي
تتغير وياه

ياما سمعت بأزواج ببداية حياتهم يشلعون كلب زوجاتهم
وتالي من يصير عندهم اطفال ومسؤلية وعائلة يبدون يتغيرون بتعاملهم وية زوجاتهم ويصيرون اكثر اهتمام وحرص عليهم

بس مع الاسف بيت سيف سلبو مني شمعة الامل الي جنت اتعشم بيها

وكلولي انت عقيم ميصير عندج اطفال
شنو تتوقعون يكون احساسي واني عايشة طول هاي السنين
اعرف بنفسي ميصير عندي اطفال وكلة مني السبب
والخلل بية

جنت اموت باليوم الف مرة
من يكعدون عمي وعمتي يعيروني
شنو تتوقعون من اشوف نفسي عايشة ببيتهم
واحس بألامتنان
لان اني عاقر وزين ومنهم لحد هسة ساكتين علية

شكد ما احجيلكم عن الي بكلبي مراح يشفي او
يعبر عن كمية المعاناة الي جنت اتجرعها

مروة .. يعني همة صارلهم كم سنة واهمينج ؟

.. صارلي ٣ سنوات من عرفت السبب مني

لان اول سنة من زواجي جنا نكول بعد وكت بس
من طالت المدة وبديت المح لعمتي ان لازم نراجع اني وسيف علمود الحمل
حتى تشوف شنو المانع الي لحد هسة ماعدنا جهال

بعدها عمتي وسيف اخذوني للدكتورة وطلبت عدة تحاليل مني ومن سيف واتذكر سوينا كل التحاليل الي طلبتهم من عندنا

واخذناها الهة وبوكتها من بدت تقرة اوراق التحاليل
كالت تحاليل سيف كلها سليمة ونسبته عال العال
وما عنده اي خلل

وبعدها بدت تقرة بأوراق التحاليل مالتي وسوناري
عقدت وجهة وكالت عندج ضعف بالمبايض
وحجم البيضة جدا صغير

ومن عندها اتذكر كتبتلي مجموعة ادوية وعلاجات
ومنشطات حتى تكبر حجم البيضة وكامت تعلمني شلون اخذ العلاج والخطوات

والتزمت بالعلاج بحذافيره
وتكررت زيارتي للدكتورة سنة ورة سنة
متعرفون شكد جنت اتأذة من اخذ العلاج
واصير اتكطع من الالم احس رحمي يريد ينفجر من كد الوجع

اسأل الدكتورة تكول هذا موعد التفقيس وعادي
ورغم هذا اتحملت هاي من غير الحالة النفسية صارت الصفر
من ورة سيف وعيالي

اتذكر جنت اتوسل لسيف يعزلي بمشتمل حالي حال الجنانين البقية
وهو بالبداية جان يكلي ميخالف اعزل بيج
بس صبري علية

بيت عيالي كلش جبير
ومسوين بصف البيت شقق لاولادهم وكل واحد عازل بمرته بشقة وجهالهم همة وهوستهم كل يوم ببيت جدهم وامهاتهم معلكات بشققهم
وهاي من غير خواته همة وجهالهم يجون لبيت اهلهن بالايام

واني احس انكسر ظهري ومو بس هشكل
فوكاها سيف محتم علية البس الحجاب بالبيت اربعة وعشرين ساعة لطالما اني جوة بالبيت وحمويني الله يحفظهم همة وجهالهم

كاظيها كلة عندنا غدا عشا ريوك يعني ما اعرف المن عازلين بالشقق عبالك بس ينامون بيها

واني لازم اكون على اهبة الاستعداد كون حجابي على راسي وجواريبي برجلية ومعاصمي بأيدية والدشداشة
اربعة وعشرين ساعة تسحل وراي وعريضة
الي يشوفها يكول محرم مال صلاة

جنت كلما اصعد لغرفتي اكون هلكانة من التعب
بحيث من يجي يطالبني بحقوقه. ولازم اكون مرتبة نفسي ومستعدة الة واسويله اجواء

مرات الحك اسويله الي يريده ومرات الكة روحي
نايمة على وجهي من التعب
وهو يظل يتشكى ويحجي علية ويتهمني بالتقصير
وياه بالفراش.
واني اكعد اتوسله حتى يعزل بية حتى اكدر اتفرغله
واعتني بي واخذ راحتي باللبس واهتم بنفسي

والله حتى مرات اكعد اسويله اغراءات واكله شكد حلو لو بيتنا لوحدنا جان اسويلك هشكل شعري
والبس لك هيج فستان واطبخلك الي يحبه كلبك
وهو يكلي صبري علية والله هانت مضل شي بس اكمل هاي الشغلة الي بيدي حتى اتفرغ للشقة واثثها على ذوقج
واني اصبر نفسي بكلامه وصارت شغلة تجر شغلة
وهو كل يوم يكلي مبقى شي واعزل بيج لشقة لوحدنا

لحد ما بديت اراجع الدكتورة وكالت
الخلل بية والسبب مني اني الي ميصير عندي حمل
وهو من عندها صار كلما اطلب منه ان يعزل بية
يكوم يعيرني بالحمل ويكلي مو زين ومني راضي
بيج وممتزوج عليج لحد هسة لا ونوب بعد كاعدة تتشرطين وتردين اعزل بيج
بالله على شنو احطلج بيت لوحدج اشو خلفة وماكو

ومن عندها حرمت افتح حلكي واطلب منه يعزلي ببيت فعلا كمت احس بالنقص. مالي حق اطالب
بأي شي. اكول مو زين ومنه صابر وممتزوج

حتى مرات توصل من نتعارك ويضربني
ويهددني يتزوج علية.
اضل ابجي واصيح بوجهه اكله شنو تنتظر متروح تتزوج وترحمني بدال هاي المنية
محسسني مسوي براسي فضل لان متحمل ماعندك اطفال وصابر علية

جنت من احجي وياه هشكل يكوم يزيد بضربي
ويهيني لحد ما اوكع من الالم
وبعدها من يجي الليل ويبدي يراضيني
يكون كلامه كله مختلف

يكلي ما يهون علية اتزوج عليج
شسوي بالجهال اذا مو انتي امهم
اريدج انتي ام جهالي
يكلي احبج واموت عليج متشوفيني صابر ومتحمل
وكل فترة اخذج للدكتورة تراجعين حتى بلكي تتعالجين
واتأمل كل شهر اكول كون هالمرة تصيب
وينجح وياها العلاج. بس ماكو

واني اصدكه بكل غباء واكول مومهم خلي نكلب صفحة جديدة وابدي وياه من جديد

بس مع الاسف الكة روحي راجعة وياه لنقطة البداية
من جدة وجديد لحدما خلص دفتري
وصار يتكرر نفس الضرب ونفس الاهانات بس الاسباب تختلف اما يضربني علمود
عركة وية ابوه ويطلع حركته بية
لو من يشوفني ما على راسي حجاب ويعبر اخوه بالصدفة

لو مرات من يطفح بية الكيل واتعارك وية امه او وحدة من خواته يعني ابقى انسان اني مو ملاك وتصير هيج
امور ومشاكل يعني سوالف العمة والحموات
وهو مثل كل مرة يجي محمل علية ويبدي يجنزني من الضرب

ولحد اخر شي هسة مصارله كم يوم من اتعارك
وية اخوه ومرت اخوه وصار هو واخوه مكاتل. وصلت بي حتى مد ايده على مرت اخوه وضربها
علمود دخلت نفسها بالعركة وكامت تلاسنه

زين اني شلي دخل يجي يطلع حركة العركة كلها بية
وانضرب بدون اي سبب
هيج لان حضرته معصب واذا عصب يكوم يدور وياي الزلات يعني اذا طلب مني كلاص ماي
واتأخرت عليه
يكوم يضرني وبعدها من يضربني يجي يصالحني
وهسة هاي جيتي الج تعتبر عربون صلح

مروة.. وليش عيني ميقبل تجين لبيتي عايز فوك هذا الضيم ويعترض.
.. مو كلتلج مصارله كم يوم من اتعارك وية اخوه ومرت اخوه واجواء البيت مشحونة. ميتحاجون
فبعدما ضربني كلي امشي اخذج لبيت اختج
يعني عود هيج ديراضيني

تدرون بنات مرات افكر انتحر وبعدين ارتد واكعد اذكر نفسي واصبرها واكول
لا ضحى حرمات انتي خسرتي الدنيا ومشفتي بيها يوم راحة. كافي سيف معيشج بجحيم
فلا تفلسين من الدنيا والاخرة بسببه

شيماء بحزن وهي تشوف وحدة من وردات امها
دتعاني ودتذبل كدام عيونها

جرت حسرة و حجت بصوت واهن
.. ما اعرف يا ضحى بعد الكلام الي سمعته من عندج
خليتيني اكره روحي الف مرة حسيت بروحي شكد ضعيفة لان مكدرت اجنبج هذا الضيم

ضحى.. لا شيماء انتي مالج دخل بالعكس انتي ياما حاولتي تنصحيني وتبعديني عن هذا الزواج
فهسة الكاعد يصير بية. كلة من ايدي
الصار وعد مكتوب علية ولازم اتقبله واتحمله
خلاص اني انتهيت

مروة.. وليش انتهيتي
حبيبتي ترة اول شي انتي بعدج صغيرة والحياة بعدها كدامج واني وراج
راح ادعمج واساندج
اذا كنتي قبل ما تملكين حق الاختيار بالابتعاد عن سيف
بس هسة انت انتي حرة والقرار راجعلج
انتي بنفسج تقررين
تردين تكملين حياتج وية سيف لو تنهين ارتباطج بي
وتبدين حياتج من جديد ؟؟؟

ضحى.. ما اعرف شنو اكول صعبة
ما اكدر ارجع لبيت سليمة

مروة.. ومنو كلج ترجعين لبيت سليمة
واني بيتي وين راح

ضحى.. مروة خلينا نكون صريحين
ترة انتي ذاك اليوم اتعاركتي وية زوجج علمود اهله يعيرون بخواتج لان كاعدين عندج بالبيت
فلا تتوقعين مني اعيش على حساب سعادتج انتي وعائلج

وخلي ببالج اذا وافقت اتطلك من سيف معناها راح اسلم حبل المشنقة بيد اثير ابقى تحت رحمته واكعد انتظره شوكت ينفذ بية قرار الاعدام

.. انتي ليش هشكل تصعبين الامور
اوعدج اذا اتطلكتي اثير ما يتدخل بحياتج

.. اكلج مروة شلون ماله دخل واني داشوف سوالف اثير بعيني
يريد يزوج شيماء الممتزوجة. لشاكر المجرم بكل كلب بارد
عود هاي
وهي دتصرف عالبيت والمسؤلة عن كلشي
ومستفاد منها وهيج يفكر يسوي بيها
وشوفت عينج هذاك هو شاكر كل يوم والثاني
ديهدد بشيماء. محد ديكدر يحميها وبعده عنها

يعني اذا شيماء هيج ديسوي بيها
لعد اني المطلقة والما مني فايدة شراح يسويلي من اكعد جوة ايده

اخاف شيماء راد يزوجها لمجرم مثل شاكر
فاني ما استغرب اذا يزوجني لرئيس عصابة مدكدك

مروة.. ومنو كلج راح اخلي اثير يتدخل بحياتج ولتتصورين انتي تأثرين على حياتي
ترة اني دائما اتعارك وية عيالي بيكم من غيركم
المشاكل متواجدة على طول

رفعت راسها وباوعت لمروة
.. لا مروة اني مرة من قبل اتصرفت بانانية واتندمت وخسرت كلشي فما مستعدة ارجع مرة اللخ
اصير انانية واخلي غيري يعاني علمودي
حتى انقذ نفسي

باوعت لشيماء وكالت
وجربت مرة اخلص نفسي من حفرة اثير وسليمة واتسلقتها على اكتاف شيماء ونفذت بجلدي
وربج ووكعني بحفرة سيف وجانت هالمرة اعمق واكثر
ظلام من القبلها
فمستحيل هالمرة ارجع اتسلق على اكتاف وحدة
منكم

هذا زرعي الزرعته ولازم اتحمل اجنيه
صار لازم انهض بروحي واوكف بوجه سيف واطالبه بحقوقي

سألتها واني كلبي ممرود عليها
.. يعني برأيج شلون راح تواجهينه وشنو راح تسوين
علمود تكملين حياتج وياه

.. اول شي اسويه اواجهه هو وامه بالحقيقة الي اكتشفتها
وبعدها اطلب منه ان يعزلي بشقة لوحدنا على الاقل
ابقى اتحمل بس ضيم سيف وظلمه
احسن ما ابقى واتحمل ضيم عيالي وظلمهم وكرابهم
مبقيني عندهم مثل الخدامة بس اكرب

اباوع لضحى ومحاولتها بالتحلي بالقوة والشجاعة
تريد تنقذ ما تبقى من حياتها الزوجية

طبعا كان كلام ضحى كله صحيح فعلا الطلاق مو سهل
وخصوصا للمثل وضع ضحى

اتخاذ القرارات جداً سهل لكن تنفيذها على ارض الواقع راح يكون مهمة صعبة بحد ذاتها

ضحى مسحت دموعها
.. وباوعت علينا وحدة وحدة.
وجان تشوف وجهي وتشهك على منظر حواجبي
اي لان اني من طلعت اليوم خططتهم بقلم ومكياج فما مبينات بس هسة من صليت الظهر وغسلت وجهي
بينوا شكلهم غريب

ضحى.. لج هدى هاي شنو شبيهم رموشج وحاواجبج شنو صابغتهم اشقر لو محتركات

هي حجت هي والانظار كلها التفتت علية
ونزلت علية اسألتهم من كل صوب
وصرت احجيلهم عن الحادث والصار ساعة ينهبطون وساعة يضحكون علية

جنا مندمجات نسولف وجان نسمع صوت طقطقة
كعب التفتنا
وجان نشوف مشمش لابسة خذائي الكعب العالي
وتمشي بي وحاطة شالي على راسها وتفتر كدامنا بالصالة

شيماء ضحكت على شكلها وكالت
.. عزة هذا الحذاء ابو الطابقين لمنو

باوعت الهة واني اضحك
.. قصدج التختة العالية هذا الي
مريم تصنف.. هههههه عبالك عمارة ام طابقين
هاي شلون لبستي

مروة.. هدى بلا شقى هاي الاحذية مو طبية
ما انصحج بيها تأذي العمود الفقري وضيفي فوكاها الخطورة اذا التوت رجلج وعثرتي شراح يصير بيج

برطمت حلكي واني اتذكر محاولاتي العقيمة
بلفت انتباه قاسم
طبعاً اليوم نفذت احد نصائح ابو العريف هالة شوز

نصحتني اجرب البس حذاء كعب عالي
كالت سمعت بالصدفة منى اختي وكوثر ديحجون عن الاحذية وانواعها والموديلات. فتعرفين اني اتخبل عالاحذية

واسمعهن يكولن اغلب الرياجيل يدوخون اذا شافوا وحدة لابسة حذاء كعب عالي

شلون وليش ما اعرف ولا افتهمت
بس لكفت هاي الكلمتين وكلت خلي اروح افيد هدى بيهم بالله جربي
بلكي قاسم اخوي يطلع نقطة ضعفه الحذاء العالي
ويغمى عليه اول ميشوفج لابسته
وتطكطين بي كدامه

شيماء تضحك .. زين انتي مو من عوايدج تلبسين
حذا كعب عالي شنو غير رأيج

جاوبتها لا اردايا
.. ياعني لبسته حتى احاول الفت انتباه
زوجي العزيز يعني اغريه حتى ينعجب بية

شيماء عقدت حواجبها وحجت بجدية
.. هاي شنو هدى من شوكت هذا الحجي
شنو افهم من كلامج ان انتي غيرتي رأيج
ونويتي تستمرين بزواجج وية قاسم لو هي محاولة ارضاء غرور

جنا اني وشيماء نحجي وناسين اكو اذان تسمعنا وتحلل بكلامنا
مروة عاقدة حواجبها بستغراب وكالت

.. اوكفوا.. انتظروا لحظة اني كلشي ما افتهمت
شيماء شنو تقصدين
هدى نوت تستمر بحياتها وية قاسم
ليش هي شنو جانت تسوي كل هاي الفترة

باوعت لشيماء وانتبهت لهفوة الساني ودنكت مرتبكة

شيماء حجت تريد تغير الموضوع
بس اني قاطعتها وكلتلها
.. لحظة شيماء ميحتاج اضم على خواتي

باوعت لمروة
.. مروة اكيد انتي عرفتي شنو سبب زواجي
والظروف الي صارت بيها
مروة .. اي اعرف بس رغم الي صار الي افتهمته
او الصورة العامة عبالي اتقبلتي الوضع واخذتي الامور على ما هي عليه

.. بالحقيقة اني صحيح اتقبلت الوضع
لكن مكدرت اتعامل وية الامور على ما هي عليه

ووبعدها بديت احجي لمروة عن كلشي يخص زواجي
بقاسم وشلون عشت وياه

مروة بغضب .. يعني هسة افتهم من هذا كلامج ان
حضرتج هسة عايشة وية قاسم
بس مجرد صورة

هزيت راسي بموافقة
.. زين انتي من شفتي روحج تخافين منه ومن غضبه وعرفتي بي يحب بنت عمه ويريد يتزوجها وعرفتي بروحج ان انتي متكدرين تستمرين وياه وتدرين بروحج ان مو هي هاي الحياة الترديها لنفسج

ليش مطلبتي منه الطلاق من البداية وخصمتي
الامور

دنكت راسي وحجيت
.. مكدرت اطلب الطلاق لان جنت بوكتها خايفة من اثير يبطش بية والناس مراح يرحمموني
ولتنسين انتي جنتي ستوج راجعة لحياتنا
يعني مجنت مخلية ببالي اطلب منج المساعدة

.. زين انتي شلون ترضيها على نفسج تعيشين وية رجال
ما تملكين عليه اي حقوق
وتخليه يصرف عليج ويوفرلج الحماية
وتعيشين تحت سقفه. لحد ميتزوج بنت عمه
وتطلعين من حياته يعني حضرتج دتستغلين كرمه
وعطفه عليج

حجيت بقهر .. مروة حقي اسوي هشكل
ترة الغركان يتعلق بقشة غصب عني
من شفت حمايته وحرصه على امه وخواته
طمعت واتمنيت اعيش بظله
انتي مشفتي اثير شلون
ذلني وعذبني وسود عيشتي

بعد كل هذا الضيم الي شفته على ايد اثير
وفجاءة لكيت نفسي اتنعم بدفوا وحنان
اهل قاسم

جنت ممستعدة اترك حماية قاسم
وارجع لظلم اثير
فكرت وكلت اطلع من حياته على الاقل لحدما اكدر
اوكف على رجلي واعتمد على نفسي
يعني منا علما يتزوج بنت عمه اكون اني
قوية ومستعدة لحتى ابدي حياتي الجديدة
وحتى يكون عندي عذري كدام الناس ان
اني اتطلقت من قاسم لان اتزوج علية
وخلاص بعد محد يكدر يمسني بحجاية

مروة.. حتى لو كانت عندج اسبابج بس هذا الشي
ميسمحلج تسوين هشكل

.. مروة. لاتفكرين ان تطلبين من وحدة شافت اللوعة والحرمان والظلم بكل انواعه
ان تتنازل عن مأواها بكل سهولة
انا هذا حالي جان من لكيت الامان ببيت
قاسم كان مثل الملاذ بذيج الفترة
واني بشر مو ملاك

مروة.. على العموم. الي صار صار
وهسة بما ان الوضع اتغير
واني موجودة بعد ما عندج عذر تبقين
عايشة عالة عليه
وبما ان مكانج وياه غلط فأحسن لج
تطلبين منه الطلاق
وتتنازلين عن المؤخر الي حاطه ابوج حتى يكسر ظهر الولد بي
اني اشوف هذا التنازل راح يكون ابسط شي تقدمينه
لكرم قاسم واهله وياج

ما اعرف شصار بية من جابت سيرة الطلاق
احس كلبي اجة يطلع من صدري

رفعت راسي وغصب عني دموعي نزلت
وحجيت
.. تدرين مروة لو جايتني ببداية زواجي من قاسم وطالبة مني هذا الطلب جان وافقت اتطلق بلحظتها بدون ما يرفلي اي جفن

بس هسة بعدما عشت وياه وجربت حنانه وحرصه علية
لكيت روحي غصب عني احبه
صرت اعشق كل صفاته الحلوة والمرة
احبه بكل حالاته وهو معصب وهو زعلان وهو راضي
ومقهور وهو مريض وفرحان بكلشي
اصلا مدا اتخيل حياتي بدونه راح تصير مالهة طعم

شيماء تباوع علية وكالت.. يعني انتي وكعتي بحب قاسم
بالرغم تعرفين بي كلبه يحب وحدة غيرج

.. اني مالي سلطة على كلبي ما اكدر اتحكم بي
والحب مثل الحرامي من يريد يبوك بيت
ما يستأذن يستغل سهوة وانشغال اهل البيت
ويدخل على غفلة يسرقهم
هذا حال الحب ميحتاج اذن
حتى يدخل كبل يتوغل للكلب ويتربع بي

واني هذا حالي وية قاسم ما وعيت على روحي الا واني غركانة بحب قاسم بدون ما احس
لذلك اني قررت اتمسك بزواجي ومستحيل اتنازل عنه

مروة.. ما اعرف شنو اكلج يا هدى على العموم
هاذي حياتج وانتي كبيرة وتعرفين مصلحتج وين

اتمنى تكونين متأكدة من قرارج
حتى متتأذين

ابتسمت .. مروة لتخافين علية اني كلي امل
ان قاسم يكون الي

جنت احجي واني اتذكر انفصاله عن بنت عمه هذا
اكبر امل الي يخليني اجازف واتقدم بحياتي وية قاسم

شيماء .. الله يوفقج حبيبتي

اجتي مريم وشايلة بيدها صينية كيك وعصير
وراها مشمش تطفر منا ومنا

لزمتها وحطيتها بحضني
.. لج تعاي لزمتج وين ترحين مني اليوم الا اكل خدودج
وصرت ادغدغها وهي تضحك

مريم.. هدى هاج اخذي العصير مالتج ومالت مشمش وانتبهي لايومع

كعدت مشمش بصفي. وانطيتها عصيرها وكيكة
واني اخذت حصتي وصرت اشربها وهي تاكل

مشمش.. لا هدى اني اشغب عصيغ وحدي
مروة .. انتبهي لا تلفين ملابسج بالعصير

باوعت عليها لابسة نفنوف ابيض حفر من منطقة الايدين وبي شريط احمر على الخصر وفيونكة حمرة قريبة على الكتف

.. مشمش خليني اني اشربج عصير
حرامات بدلتج كلش حلوة لا تتوسخ

مشمش .. حتى خالة فاتن اليوم من شافتني كالت بدلتج كلش حلوة

انتبهت لمروة عقدت حواجبها مستغربة
سألتها حتى تتأكد
.. ماما مشمش حبيبتي قصدج بذاك اليوم خالة فاتن كالت على فستانح حلو مو اليوم

مشمش .. لا ماما خالة فاتن اليوم كلتلي فستانج حلو

اباوع لمروة تحجي وية نفسها بصوت عالي وكالت
وهي عاقدة حواجبها مستغربة
.. عجيب لعد ليش اليوم من اتصلت عليها حتى اجيها
كالت لتجين اني مسافرة

انتبهت عليها نفضت راسها من الافكار
ورجعت تحجي ويانا

شيماء.. اي صدك مروة اتذكرت قبل لا اروح
من اتصلتي عليه البارحة كلتي عندي موضوع مهم
اريدج بي شنو هو الموضوع

مروة.. عفية عليج ذكرتيني
بالحقيقة الموضوع الردتج بي يخص عيادتي
.. شنو شبيها عيادتج

.. طبعا بالصدفة جنت كاعدة وية صديقتي الدكتورة
سولاف شي اكيد تعرفيها لان هي تداوم بنفس المستشفى الي انتي تداومين بيها

.. اي شلون ما اعرفها الدكتورة سولاف وردة مال الله
جانت هي الي توصلي اخبارج وتطمني عليج

.. هو احنا بذاك اليوم حجينا بيج
صدفة شافتني اتعاركت وية مديرة المركز
وصار اشكال ادراي بيني وبينها
كانت غير منظمة بأخذ المواعيد
وانتبهت عليها من تتعامل وية المراجعين
ما عندها اسلوب بالكلام وياهم
وهذا الشي دائما يخليني بمواقف محرجة وية مراجعاتي
فسولاف اقترحت علية وكالت
انتي ليش متطلبين من شيماء تجي تستلم مكانها وتدير
عيادتج

طبعا اني احجي عن تجربة مو لان اختج اقترحتها
عليج. بس بالحقيقة فعلا شيماء
شخصيتها قوية وتفيدج بهيج امور وحتى منظمة وعندها خبرة بالعيادات النسائية وحتى تكدر تساعدج

شيماءابتسمت وكالت
.. اي خطية جانت دائما تكولي انتي الممرضة المفضلة عندي مسألة انسجام بالعمل الثنائي

.. طبعا انا اشكرها لان لفتت انتباهي على هاي الفقرة
صدك شيماء انتي ليش ما تبطلين من شغلج بالمستشفى
وتجين وياي بالمركز

تساعديني بعيادتي هم تسويلي فضل وهم انتي ترتاحين من شلعان الكلب من دوام المستشفيات ومشاكلها

شيماء
صار كلبي ينتفض معترض
يعني اذا بطلت من المستشفى معناها حيدر يطلع من حياتي وبعد ما اكدر اشوفه

مجرد التفكير بهذا الشي
احس بروحي تاهت صحيح ما بينا شي
وصحيح حبي اله من طرف واحد
بس يكفيني اشوفه واكحل عيوني بشوفته

يمكن لو اكول لخواتي عن سبب رفضي لمقترح مروة
راح يتهموني بالجنون

لان ماكو وحدة عاقلة ترفض هيج فرصة ذهبية
علمود سبب واهن وضعيف مثل حبي لحيدر

بس مو بيدي اني بكل مواقف حياتي كنت قوية
الا هاي المرة من صار بيها كلبي الحاكم صرت اضعف مني ماكو وصرت اتصرف بغباء

جليت صوتي وباوعت لمروة
.. طبعاً بالحقيقة اقتراحج فاجئني واني جداً ممنونة الج
بس انطيني فرصة افكر فد كم يوم وانطيج رأئي

ما ردت اجرحها واردها بسرعة خلي
بلكي تشوفلها وحدة جديدة بديل عن ذيج وما تحتاجني

شيماء.. اي بنات صدك اتذكرت خالة ام فرزدق البارحة اتصلت علية وكالت تعاي انتي والبنات
باجر سنوية المرحوم ابو فرزدق
ومسوين ثواب
ياربي والله مستحية من خالة ام فرزدق
احس بروحي هواي مقصرة وياها
عفية بنات حالو باجر تجون خطية هواي عتبت علينا

.. اي والله حتى خالة ام قاسم كالت نروح للسنوية اني
عني اروح وية ام قاسم والبنات

مروة.. والله يا شومة اني عني تعذريني ما اكدر اروح
لان مثلما تعرفين ما عندي مديرة للمركز والشغل
صاير هوسة وكله علية حتى ما الحك احك راسي

ضحى.. واني عني مستحيل يخليني استاذ سيف اروح وياكم. هو الكم وبالشافعات يالله خلاني اجي الله ينطي
الكتلة الي اكلتها جابتني الكم

جانت تحجي والعيون ذبلانة وسارحة بغير عالم
اصلا طول ما احنا كاعدين نحجي هي ضحى فاصلة عنا بعالم لوحدها وخلصتها كلة صفنات
وكأنما دتفكر

دك نقال ضحى وجان المتصل سيف منتظرها بالباب
سلمت علينا وبعيونها دمعة معلكة
شيماء.. ضحى مو تنسين انتظر منج اتصال
مروة.. اي عفية حاولي تتصلين علية وتكليلي شنو سويتي بموضوعج

لبست عبايتها ونزلت على وجها النقاب
وطلعت

وراها صرنا وحدة تطلع ورة اللخ
واني هامتين قاسم اتصل علية
يمة مجرد اشوف اسمه على شاشة نقالي كلبي يطرب
كلي جهزي روحج انا قريب عليج بس ادكلج هورن
انتي تطلعين
.. صاغ انتظرك
بس سديت النقال كبل
رحت طكيتها ركضة لغرفة مشمش حتى الحك اعدل روحي واحط ميك اب لوجهي
والبنات يباوعون علية مستغربات

اسمع شيماء.. عمة والله وكعتي كلبي عبالي بيج شي
ولج وتاليتها وياج شوكت تكبرين بس تطفرين

اجوي مريم ومشمش وراي
واني طلعت جنطة صغيرة خاصة للميك اب اكدر اخدها وياي وين ما اروح اسميها جنطة الحالات الطارئة

صرت احط ومريم واكفة تباوع علية فاتحة حلكه
مريم.. هدى من تصيرلج فرصة ثانية علميني شلون اخط العين مثلج

.. صاغ تدللين
مشمش.. حتى اني اغيد احط حمغة مثلج
مو بس انتوا تحطون متياج

.. عمي تعاي احطلج حمرة بدال ما جنج عجوز تدردمين فوك راسي
بعدما عدلت نفسي وكعدت اتصارع وية الحذاء حتى البس وبعدما خلصت

كمت من مكاني ووكفت حتى اجربه
لان اتذكر من لبسته الصبح جنت كوة على اعصابي
كدرت امشي بي عدل بدون ما اوكع

دخلت شيماء وشافتني وابتسمت وكالت
.. يابة والله ميحتاج تلبسين كعب عالي
انتي بس جمالج كلش كافي
ونوب حطيتي ميك اب كملت السبحة

.. هههههههه لا مو المشكلة قاسم طويل
واني قصير فحتى لو حلوة ماراح ينتبه علية
لان اختج دتمشي بين رجليه

مريم.. لا عاد مو لهاي الدرجة انتي قصيرة

.. ههههه وداعتج اني واكفة كدامه وانتبهت اوصل
لتحت كتفه بشبر
بأختصار اوصل لصرته هههههههههه

دخلت مروة وبيدها ملابس لمشمش تريد تبدللها
مروة.. عزة لج مشمش هاي شنو حاطة حمرة

باوعنا على مشمش
جانت لامة شفايفها بوضع البوسة وما جاوبت امها
عبالها اذا تحجي تروح الحمرة
ومريم نصبت عليها كل شوية
تكللها بوسيني وهاي مشمش تعصب متقبل تبوس احد
خايفة عالحمرة

مروة.. لج شحرورة الله يستر منج من هسة تدورين حمرة

مريم .. هههه لج مروة لو سامعتها شنو تكول قبل شوية تكول حطولي متياج مو بس انتوا

مروة.. انا الج بسيطة مشمش حسابي وياج بعدين
مشمش دارت وجها وباقية مثل التمثال لامة الحلك
الله يلعن بليسها خربتنا ضحك

شيماء اخذتها لحضنها
.. مروة شحدج تحجين وية حبيبت خالتها
اموتج

مشمش تباوع علينا بغرور بنت اللذين

لحظات وجان يوصل قاسم وطلعتله بسرعة بعدما سلمت على البنات
طلعت بسرعة لقاسم حتى مينتظرني هواي

اباوع عليه جان كاعد بالسيارة
ولابس نضارات شمسية
ولابس تيشرت ابيض نص ردن حاضن زنده
عبالك ديكول باوعوا عندي عضلة بهذا المكان

جان يباوع كدام ومتجي كوع ايده على شباك السيارة النازل
وانتبهت على لحيته وبشرته صاير تناقض وية التيشرت لان هو اسمراني

ما اعرف اشو كلما اشوفه ديحلة بعيني
مدري هو حلو واني ممنتبهة عليه
مدري هو الحب اعمى ويخليني اشوفه بعيني
هشكل حلو

الهم كل الطرق تؤدي الى روما
جانوا خواتي واكفات يم الباب يسلمون علية
واني مشيت للسيارة وهو انتبه علية
نزل من السيارة

وراح سلم على مروة وشيماء ومريم جانت واكفة ورة الباب
انتبهت لقاسم بشغلة
هواي يحترم شيماء ومروة

مروة.. تعال خوية اتفضل خلينا نضيفك
قاسم .. لا خوية تسلمين خليها غير مرة
والله جاي مستعجل وعندي كومة شغل

هو يحجي واني رافعة راسي اباوع عليه وعيوني
مفضوحة بالحب

.. يالله خوية اخذوا راحتكم انا اترخص
باوع علية ويالله هاااا
وبدل هدى
دار وجهه ومشة للسيارة واني
اتبعته وصعدت بالسيارة

اباوع عليه يضحك
حجة.. خرب يومك هادي
زين ما فلتتها كدام البنات هههههههههه الله يلعن بليسج
شحطيتي بحلكي صرت حتى بالشغل اصيح خوية
هادي

برطمت شفايفي وحجيت وباوعت عليه
.. ترة ميصير هيج يعني ياخي حس على دمك
وعاملني لو مرة بحياتك كأنثى يعني معقولة اني
شكلي لهاي الدرجة. يوحي بالرجولة

دار وجهه وباوع علية وكأنما اخذ كلامي على محمل الجد نزع نضارته وضيك عيونه بشك

.. هاي شنو شمسوية بروحج
شنو حضرتج جنتي طالعة بعرس لو ببيت اختج
.. ترة عادي اني كل مرة احط هيج ميك اب لوجهي
مو جديدة شنو معقولة هاي اول مرة تنتبه
علية

عقد حواجبه ورص اسنانه
يمة دخليك كام علينا الثور الهائج

.. شوفي ولج خليني مرة اللخ اشوفج حاطة هيج مكياج
لوجهج صدكني
كبل اغطج بالماي واخربط خلقتج

ابتسمت .. عااادي غطني بالماي اصلا الميك اب
مالتي ضد الماء

.. من احتركت عشيرتج
لعد اقري على مكياجج سورة الفاتحة لان كله راح يتكسر

شهكت وسحبت كلامي عزة هذا ابد ما يتشاقة
وكبل بدلت اقوالي وصرت اقلد صوت امه

.. اكووووول يمة قسااااااام شبيك عصبت ترة اني داشاقة وياك يروحلك فدة المكياج وابو المكياج اهم شي انت لا تعصب

باوع كاتم ضحكته
.. قسماً بالله انتي مو طبيعية
يعني مجرد دقايق كلبتي مزاجي من الاعصاب للضحكة
ومن الضحك للتعجب
بس كليلي شنو فلمج هذا السانج منين مستوردته

رمشت بعيوني مثل مشمش
.. اني الساني من الله هسج
حتى اسأل بيبي سليمة جانت دائما تمدح لساني
وتكلي لسانج ينكط عسل

.. قصدج كلبيها بكرك ينكط تيزاب
لان لسانج بالذات حارك عشيرتي

اي صدك ما كلتيلي خواتج شلونهم
.. الحمدلله بخير ونعمة
.. يارب دوم

جنا مندمجين دنحجي وهو يسولفلي عن يومه بالشغل
وجان يقطع علينا جو الالفة صوت النقال

وكان المتصل هشام
وبعدها التهة يحجي وية هشام بامور الشغل ونساني
واني صرت انافخ مثل الطفلة الماعندها صبر

اريده من يكون وياي بهاي اللحظات القليلة
يستمع بس الي وميحجي وية غيري

مثل الجوعان من يتعدون على ماعونه
هيج حالي يصير بي
من احد غيري يلفت انتباههه واني يمه
احس اتعدوا على حقوقي

درت وجهي عالشباك اباوع عالسيارات
جنت مندمجة بأفكاري

انتبهت للسيارة خففت سرعتها
يم التقاطع ووكفت اشارة المرور
وصادف موكب عرس وكف ويانا بالتقاطع

انتبهت على سيارة صفت يم سيارتنا من جهتي
جان كاعد بيها ثلاث
شباب ومشغلين مسجل السيارة وصوته عالي
واباوع على حركاتهم شلون يركصون
واحد منهم نزل من السيارة وكعد يركص بالشارع واخذله هزة كتف واصوات الشباب جانت الاجواء كلها
مشحونة بالفرح
الظاهر الجماعة من اهل العريس

ابتسمت من اتذكرت نفسي من جنت اركص بأي عرس
انعزم بي وشيماء تحجي علية
هههههه

فجاءة انتبهت لواحد من هذولي الولد حجة وية البصفه
وباوعوا علية وكاموا يسون حركات
ويضحكون

بسرعة درت وجهي عن الشباك
عمة حتى عمة. شكد حيوانات
وجان اسمع واحد منهم صاح بصوت عالي

.. لك علاوي الله ينطي سيارة جارجر للماعنده
عيون يسوقوها

واللاخ جاوبه .. لك اكو واحد يمه نعمة الله ويكعد
يتصل
.. ثوررر والله ثوررر

جانوا همة يحجون واني كلبي كام يرجف من الخوف
صرت اباوع للتقاطع شوكت يتحرك
مدري هو طال الوقوف مدري اني من الخوف
شفت الوقت طال

همة حجو هيج
وما اشوف الا و قاسم هدر بيهم بصوت عالي
.. لك ابن العاااار هاي ويامن
لو انت زلمة انزل

حجاها وهو ينزل من السيارة بكل سرعته
انتبهت على نقاله وكع منه عالكشن
الخط بعده مفتوح
اسمع صوت هشام يصيح الو الو
الو كبل اخذت النقال وجاوبت

هشام واني ارجف
.. الو عفية هشام الحك لاخوك هرقل
راح يتعارك
هشام .. بس كليلي انتوا وين هسة بيا مكان
وصفتله المكان وسد النقال بوجهي
جنت احجي وياه وعيوني على قاسم
اباوع عليه
شلون استدار حول السيارة وهد عليهم

صرت الطم على خدودي ومن الخوف

.. يمة .. يمة عزة بعيني راح يتعارك
انتبهت عليه دنك فتحت باب سياراتهم عبالك راح يخلعه
وسحل الولد وطلعه من السيارة
صار الولد يم قاسم عبالك ميدالية سيارة

خطية الولد صار يشبه
ماجد لعبة خشبية

شهكت بصوت عالي من شفت جماعة الولد هدوا عليه وداروا كلهم على قاسم
وهو منا عرس لا واحد ولا اثنين

يمة اجة كلبي يوكف من شفت واحد منهم اتعلك على ظهر قاسم جنه برص معلك على حايط

وطوق ركبة قاسم بذراعه
احس بيهم اتولوا على قاسم
وصار الضرب ينزل عليه من صوب
وبنفس الوقت جان قاسم الي يصير كدامه يخبزه خبز
العباس بس همة هواي

جنت افرك بيدية بخوف بعد والله ما عندي صبر رجلي راح يروح مني

عزززززززة هذا شنو
انتبهت على واحد منهم ركض على لافتة لانتخابات الموجودة بالتقاطعات
وشلع منها حديدة تصير مثل المسطرة الطويلة
وهد بيها على قاسم

يمة هو اني شفته هد بيها على قاسم
واني عقلي فصل عن المعقول
وما احس الا والجني الهداوي اتربع براسي

نزلت من السيارة مثل المخبلة
بدون شعور
صرت ادور بعيوني على شي اشفي بي غليلي
واضربهم بي وجان الجح كم حجارة بصف الرصيف

ما اشوف روحي الا واني اشمر بالحجار
عليهم جني مشاعل المخبل

هسة عرفت شعور مشاعر من يضرب بالحجار
المصيبة مو هنا
المصيبة الحجار صار غالي
غالية ما يتحصل بعد ما نفذ عندي العتاد
رفعت راسي وجان
اشوف وجه قاسم ينزل دم من يم حاجبه
يمة سودة علية. والله كلبي اجة يوكف

دورت ما لكيت شي اشمره عليهم
ومن حركة كلبي نزعت فردة حذائي
وشمرته على راس واحد من الشباب الملتمين
عليه

المشكلة اني ضاعت علية
منو الويانة ومنو العلينة

ادري وين صار هشام اشو ما بين
صرت احوم مثل الطير المذبوح على قاسم
هي المشكلة حتى لو وصل هشام اني وين اشوفه
من ورة هاي الهوسة

جنت اروح وارجع عالرصيف المقابل الهم
هذا الحجي شرطي المرور اتدخل
وبعدها كم واحد من الخيرين
صاروا يهدون العركة

وشوية شوية بدت الهوسة تخف وكم واحد من اهل العرس صار يصعد بولدهم
بالسيارات ويحركم شكله جبيرهم واحد متهدي
ميحب المشاكل
بدت اترابة العركة تنجلي وبدت الرؤية توضح
عندي

وجان اشوف قاسم ديعبر الشارع بتجاهي وبصفه
هشام. وبصف هشام ولد ثالث ما اعرفه
جانوا ثلاثتهم. شكلهم معلوب بي طوبة

الوجوه صايرة خريطة. والملابس مكطعة
وقسومي حبيبي التشيرت مفتوك
وحالته حالة رفع ايده. يتلمس حاجبه المصروب

رفع راسي وجان يعقد حواجبه
مثل الي ممصدك عيونه
رص اسنانه ومشة بتجاهي عالسريع واقترب مني وكال

.. من احتركت عشيرتج ولج غضب انتي شنزلج
من السيارة
جنت واكفة قريب عالسيارة بيني وبينها مسافة ثلاث مترات

لزمني من كوعي بكل غيض وسحبني وراه
واني امشي وراه واتعثر

بس لاحظت نفسي
باثناء المشي اصعد وانزل مثل الاعرج
دنكت وشهكت متفاجئة عزة اني باقية بس بفر
وحدة

دار علية بكل غضب وعاط. بية
.. ليش متمشين عدل لو عاجبج تنسحلين بالشارع

حجيت بصوت ناصي.. اااااا قاسم حذائي
نزل عيونه وباوع على رجلية
وجان عيونه تنط من مكانها

يمة صار وجهه احمر من الغضب
والله راح ينفجر بية
فتحلي باب وهو يسب ويلعن
مشيت من كدامه اصعد وانزل .. اصعد .. وانزل
اسمعه يكول بصوت ناصي
ياربي الهمني الصبر

صعدت بالسيارة وسد الباب وراي
خرب حظي يلعن اليوم الي فكرت بي البس كعب عالي
هسة وكته

وهو دار حول السيارة وصعد بالسيارة

باوعت لهشام وصديقه اجوي ووكفوا يم السيارة
وقاسم نزل الجامة وهشام جان هو هماتين وجهه صاير فلم
ضحك وهو يباوع علية والولد الي واكف يمه هم جان يضحك
هشام التفت على الولد وسأله
.. ها عزام هي لو مو هي

عزام جاوبه وهو خربان ضحك كله اي هي
.. اي والله هي شبيك متصدكني

قاسم عقد حواجبه وسألهم.. هشام شكو شنو
هي لو مو هي

هشام رفع فردة الحذاء مالتي وانطاها لقاسم وهو خربان من الضحك

.. هاك خوية هاي فردة حذاء مريتك
اجتي بالغلط براس عزام
يبوووووووووووو عزة وين اودي وجهي

قاسم.. التفت علية. وعيونه تريد تطلع من مكانها
عبالك دباوع لكائن فضائي غريب عليه

عزام حجة وياي
.. خوية منا ورايح من تردين تشمرين حجار او حذاء
رجاءاً. نيشني وصوبي عالعدوا

مبين الولد صديق هشام وقاسم والظاهر علاقتهم قوية وبينهم ميانة

قاسم .. لا تكولين انتي جنتي نازلة تفزعيلي
بالحجار

دنكت راسي ما اعرف وين اضمه
وجاوبت
.. مو شفتهم داروا عليك. ومكدرت. اتحمل
اباوع عليهم يأذونك وابقى كاعدة مكاني وما اسوي
شي

غمض عيونه ومسح وجهه بكف ايده
وباوع علية وهو مبتسم للحظة شفت بعيونه
نظرة فخر وهمس وكال

.. مرة الثانية من اكول هادي لا تكعد
تتمزعل وتكلي جرحت الانثى البداخلي

عزام بضحكة .. بس تريد الصدك
عمي والله اخت رجال
اباوع عليها تروح وترجع على العركة
عبالك ام ومضيعة ابنها

كمل كلامه وية قاسم يحجي بصوت ناصي

.. اكول ابو الشباب امي تدورلي على. مرة
بالله ما تشوفلنا اختها لمرتك

انتبهت على هشام ضربها على راسه من ورة

وكال .. اكلك ما تاكل تبن واثق من نفسه
يشوفله اخت المرة
مو على الاساس هي كاعدتلك
بالله شو اتحرك امشي كدامي
انت ما تنطي وجه.
كبل تكوم تخبص

اباوع عليه اكل الولد. بكشوره

شيماء
بالمستشفى
كالعادة ملتهية اكمل واجباتي ومستعجلة
اريد اخلص بسرعة لان وراي طلعة من وكت
علمود اليوم نروح لبيت ام فرزدق

باوعت للساعة ورحت اتصلت على مريم واكدت عليها حتى تحضر نفسها بين ما اخلص شغلي
وامر عليها ونروح لبيت خالة ام فرزدق

رجعت النقال بالجنطة
اجيت اطلع وجان يرجع يدك نقالي طلعته من الجنطة
ورحعتها لمكانها. وطلعت برة واني احجي بالنقال

وجان المتصل مروة
تسألني عن ضحى
مروة.. هلو شومة اكول البارحة اتصلتي على ضحى؟؟

.. اي اتصلت عليها البارحة بالليل كلش
وحجت وياي
.. اي وشنو شسوت وية عيالها وسيف كلتلهم لو بعدها؟؟

.. تكول اول ما فاتحت عمتي بالموضوع وكلتلها
اخذت سوناراتكم والتحاليل السويتوها الي
وانطيتها لمروة حتى تقراهم الي
ومروة شافتهم وكالت انتي ما بيج اي خلل
وماعندج اي شي يمنعج عن الحمل
تكول لو تشوفين وجه عمتي شلون انخطف لونه

وبعدها .. يا صلوات على النبي راية الله بيضة
لعد اذا انتي مبيج شي وسيف هم مابي شي
لعد ليش لحد الان ميصير حمل

يا عزة بس لا مسويلكم عمل
لو ملزومين
وضحى كلتلها .. خالة اريدج تاخذيني لهاي الدكتورة
اريد اعرف ليش جذبت علية وكلتلي انت عندج ضعف وميصير عندج حمل اريد كون اضربها على حلكها
على هاي الدكة

ام سيف كامت تبلعم
.. يا خالة ضحى متسوى تروحيلها
والله طبعا صديقاتي كالو عليها هاي الدكتورة فاشلة
وغبية بس اني ما صدكتهم وطبعا هسة انتي من
كلتيلي ثبت كلامهم عنها صحيح وهي كلشي متفتهم
بعد هاي خلاص منروح الهة خلي تولي

مروة.. شكد حية وقذرة بنت بليس
شلون حاكتها للسالفة عبالها. تعبر على ضحى
يابة كون كدامي والله ما ارحمها كون امسح بيها الكاع

وزين وسيف مكلتلج شنو كال
.. اما سيف تكول سكت ومن سمع كلام امه اشو هذا
كال خلي تصبرلي هاي الحيوانه
جان يقصد الدكتورة. اذا ما باجر اروحلها
واحرك عيادتها عليها شلون هيج تغلط غلطة
وتوهمنا

وتكول عاف البيت وطلع
.. والله اكص ايدي اذا مطلعوا الثنين حايكين السالفة سوية وهذا فلم من يمهم ما اطلع اسمي مروة

على العموم خلينا نبقى وياها على تواصل
حتى نعرف لوين تصفى تاليها هذولي ما ينحزرون
يالله اني لازم انهي المكالمة عندي مراجعين
يالله مع السلامة
.. الله وياج حبيبتي

سديت النقال من عندها وحطيته بجيب الصدرية
ورحت على شغلي وبين ما جنت اشتغل واخذتلي
ما يقارب الساعتين شغل متواصل اريد بس اكمل
خلصت شغلي بأطلاع الروح
الحمدلله باجر عندي عطلة على الاقل شوية ارتاح
رحت لغرفة استراحة الممرضات طلعت نقالي من جيب الصدرية
ونزعت صدريتي واخذت جنطتي وطلعت
جان تجيني رباب تركض مبين من وجها عندها خبر

رباب بأنفاس متقطعة .. لج شيماء ستوني شفت شاكر
ديتعارك وية الحرس يم البوابة مالت المستشفى

شهكت بخوف مو منه
خفت لا يجيبلي حاجية
تايهة واني مناقصة
.. عززة وليش ديتعارك وياهم

.. سمعت ان الحرس جايتهم اوامر تقتضي
بعدم دخول شاكر للمستشفى
شلون وليش هاي الي ما اعرفها

سألتها متعجبة .. اخاف مسوين حملة يمنعون بيها دخول المشبوهين

.. لا حبيبي المصدر يكول منعوا
شاكر بالاسم. يعني مو صدفة

ما اعرف افرح مدري اخاف
بس الحمدلله ربي يدفع عني كيد شاكر
ويخلصني منه

باوعت للساعة
وحجيت .. اهووو اشكد عيب راح اتأخر على بيت
ام فرزدق هم يالله اروح

رباب .. لعد يالله روحي شنو تنتظرين
.. يالله حبيبتي باي
رحت وعفتها وراي

وبسرعة رحت عالشارع العلم واجرت هالمرة تكسي علمود اسرع من الباصات
صعدت بالسيارة

ومن وصلت لراس الفرع
واتصلت على مريم حتى تطلع لي لراس الفرع علمود نفسه التكسي يودينا لبيت خالة ام فرزدق

اجتي جانت لابسة ملابس غامقة
كلش حلوة عليها والله مو لان اختي
بس الغامق بارز بياض بشرتها
بحيث تلفت الانتباه
خطية صعدت يمي
وسلمت علية
وسألتها .. اكول مريومة غديتي سليمة

.. اي غديتها وانطيتها دواها
دك نقالي وجان المتصل هدى واول ما رديت كالت
.. شومة شنو وينكم ترة عيب من خالة ام فرزدق كل شوية تسألني عنكم

شيماء.. يالله هياتني بالطريق مابقة شي واوصللكم
سديته من عندها
وحجيت وية مريم
.. خطية هاي هد......
وهم رجع نقالي يدك مرة اللخ
وهالمرة جان رقم غريب.

كبل رديت عالمتصل
وجان اسمع صوت وحدة تحجي بكل غضب وبصوت عالي مستعجل

.. شيماء اني مرت حمى ضحى اختج
عفية تعالي لحكي عليها بالعجل سيف راح يموتها
المخبل لازم بيده مسدس ويهدد بيها

يتبع

احبكم هواي احبكم كومة
اختكم نهى