مرت الايام واحنا على هذا الوضع بس امل تغيرت فدمره ويايه يعني ماتحجي ويايه ومن اسئلها جاوب من وره خشمها هذا الشي صدك زعجني وبالاكثر من صار ت صحبه هي ورغد وكل ماسئلها شبيج جاوبني مابيه وتعوفني وتروح
ظلت هيج جم يوم حتى خالد حس على تصرفات امل وكلي بس اني كلتله لا ماكو شي حتى ليسوي سالفه وياها
مره جنت كاعده يم خالتي ونسولف فاتت امل ورغد وكعدو على صفحه وحده شاور اللخ مثل الي يتفقن على شي صراحه اني ماهتميت الهم لان اعرف امل تحبني مستحيل سوي شي تضرني او تقهرني
فثاني يوم جانت خالتي ماخذا ايه عدها مراجعه يم دكتوره فبقينا بس اني وامل ورغد فجنت غاسله هدوم فصعدت بسطح اشرهن صح خالد ميقبل نشر بسطح بس شتاء جان الهدوم ماتنشف الا عالشمس فرجعت دانزل الباب مقفول من جوه ظليت ادفع بالباب اسوي وماكو الباب مقفول قوي ظليت ادك الباب وماكو اي احد يسمعني نوب بارده رحت اباع عالشارع بالكي اشوف احد بالكراج شي اكله يفتحلي الباب
وماكو اي احد ظليت واني محبوسه بسطح بس كلسع اروح ادك الباب وماكو فتعبت من الوكفه رحت كعدت جان اكو دجه عالسطح الثاني فرحت كعدت عليها
مادري شكد مر وقت بس هواي ظليت بسطح ونوب شمس بدت تغيب رجعت ادك بالباب ماكو اي احد
فسمعت صوت باب الكراج دينفتح ركضت اشوف منو فوت سياره بسرعه مالحكت اصيحه جان خالد رجعت دكيت الباب واصيح امل خالد ماكو رحت كعدت عالدجه وره نص ساعه هيج سمعت خالد يصيح حيااة بكل قوته اني طفرت ركض كلت اي واخير نفتحت الباب شفته واكف باب سطح
خالد: رجعت للبيت المغرب ماشفت حياة بالمطبخ فكلت يجوز بالغرفه دخلت للغرفه مالكيتها المهم نزعت وبدلت وطلعت لكيت امل بالهول يم رغد كتلهم لعد حياة وين
رغد : بسطح صعدت من العصر لحد الان منازله
خالد: باوعت على امل ماصعدتي شفتيها
امل: بابا صعدت بس ماقبلت تنزل بقيت يمها شويه بس بعدين شفت عمال على سطح جوارينا فعفتها ونزلت
خالد: اني صدك عصبت من حياة شعدها بسطح اكثر من مره حظرتها منه صعدت للسطح صحت عليها جتي ركض عليه
حياة: خالد همزين فتحتلي الباب
خالد: شعدج بسطح ولج
حياة: صعدت اشر الهدوم بس مدري منو قفل الباب
خالد: ولج منو القافلها جانت مفتوحه
حياة: والله جانت مقفوله شعدي بسطح لعد ظاله بهذا البرد
خالد: دنزلي يله
حياة: احنا ننزل الدرج وخالد بس يحجي عليه على ميت مره محظرج لحد مدخلت للغرفه هذا ستلمني
ليش صاعده ومن شفتي زلم ليش بقيتي كاعده تردين يتفرجون عليج اني هنا حجيت كتله يازلم داكلك صعدت اشر اهدومي الباب نقفلت عليه هجمت الباب بالدك وماكو اي احد يسمع عاجبني مثلا اظل فوك بالبرد
خالد: فتحت الباب وصحت امل تعالي هنا
امل: ها بابا
خالد: منو قافل الباب على حياة
امل: محد قافلها ليش من صعدت شفتها مقفوله
خالد: لا جانت مفتوحه بس حياة دكول مقفوله
امل: بابا ممقفوله هي رادت تبقى بسطح
حياة: ظليت اباع على امل .. منو راد يبقى بسطح
امل: اني مصعدت عليج وكتيلي مانزل اريد ابقى كاعده وكتلج اكو عمال بسطح بيت ام ياسر كتيلي شسويلهم
حياة: ظليت اباع على امل ممصدكه الي داسمعه هاي امل
.. امل شدتحجين
خالد: روحي بره يله سديت الباب ورجعت على حياة .. ها شعدج بسطح احجي
حياة: انت حصدك باامل وجذبني خالد
خالد: ولج شعدها وياج امل حتى جذب ولج تحبج دكولين اختها شعدها جذب
حياة: خلص لعد اني الجذابه اني الصعدت فوك اتونس هذا تريد تسمعه
خالد: عفتها وطلعت صراحه ماعرف شبيها حياة هاي تصرفاتها من صدك كمت اضوج منها اي شي اضوج منه كامت تسوي حتخبلني بتصرفاتها
حياة: ظليت كاعده بالغرفه وماطلعت جتي خالتي عليه شوفني كتلها مابيه حيل وتعبانه وهيج بالكوه قنعتها وطلعت فبهذه الليله جان خالد المفروض يبات يمي صارت ب 2 وخالد ماكو فعرفت راح يبات يمها اكيد فكلش انقهرت وكمت ابجي من صدك قهرني لان مصدكني
نمت صبح كعدت طلعت بره صبحت على خالتي وكعدت اتريك وياها
فصارت ب 10 نزلت رغد
فخالتي كلتلها ها يمه شو بطيتي بالكعده كلتلها اي والله خاله البارحه اني وخالد ظلينا سهرانيين نتفرج تلفزيون وسوالف وضحك محسينا عالوقت وظلت تحجي هيج حتى تقهرني وضوجني اني سويت ممهتمه ظليت اسوي نفسي اثرم حتى امل جانت كاعده ظلت مدنجه ماحجت كلمه وكل مصير عيني بعينها تتهرب مني
كملت شغلي ورحت لغرفتي سبحت وكعدت اقره قران فشويه وجتني ايه كلتلي غده اني كتلها ماشتهي
ظليت كاعده اقره قران
خالد: بعد ماطلعت من حياة جان دمي ديفور منها بس مو معناها مجذبها بس ليش امل جذب هي تحبها لحياة حتى مارجعت للحياة صعدت لارغد اول ماصعدت نمت حتى ماحجيت كلمه ويه رغد
كعدت من صبح طلعت حتى رغد من ابات يمها لاتكعد ويايه صبح ولاجهزلي ملابسي ولا اكلي حتى بيوم الي ابات يمها انزل اشوف حياة مجهزتلي كلشي
نزلت مالكيت حياة ظليت اريد افوت لغرفتها واتراجع فتحت الباب لكيتها نايمه ومكشفه رحت غطيتها وشغلت التدفئ لان غرفه ثلج
وطلعت للشغل رجعت ظهر فجانت حياة بغرفتها ماشفتها كعدنا ناكل جتي ايه كالت حياة ماتشتهي
اني ظليت كاعد على اعصابي بس اريد اكوم اشوفها لان اكيد مقهوره مني من البارحه ماتحملت كمت غسلت ودخلت لغرفتها لكيتها تقره قران وتبجي بهاي اللحظه كلبي نمرد عليها وحسيت نفسي شكد ظالم رحت كعدت يمها بالكاعد هي ظلت تمسح بدموعها وتقره قران بس ظلن دموعها تنزل بالاخير صدقت وكعدت تسبح بس ابد مشالت راسها عليه
اني ماتحملت مديت ايدي امسح دموعها
حياة: داقره قران وذكرت ابويه وشون اشتاقيتله وشون من اضوج اخابره وذكرت تصرف خالد ويايه وكمت اقره وابجي لان بس بهاي طريقه ممكن ارتاح فجاه باب نفتحت واجه خالد كعد يمي بالكاع اني ظليت اقاوم ماريد ابجي كدامه بس دموعي هنا ينزلن بالاخير صدقت لان مداكدر اقره من وره دموعي ظليت منزله راسي مد خالد ايده مسح دموعي
وكلي
خالد: ليش هالدموع
حياة: اشتاقيت لابويه
خالد: الله يرحمه ادعيله بدال هاي دموع
حياة: البارحه اول مره احس ابويه ماكو من احتاجيته ومالكيته
خالد: حياة لا تحجين هيج ادري نقهرتي مني
حياة: تعرف لو ابويه عايش وخابرته حجيتله الصار حان شكلي
خالد: جان شكلج
حياة: جان كلي تردين هسه اجي اخذج تجين يمي تغيرين جو بس شوف هسه ماعدي احد اخابره اشكيله لاام ولا اب ماعندي بس الله الي هو احسن الكل
خالد: مسحت دموعها كافي ياعيني بست ايدها اسف قهرتج والله موبيدي احبج وماتحملت صعدتج للسطح اني امج واني ابوج واني اخوج حتى ابنج اصير بس لاتبجين متعرفين اني شكد اغار عليج ياعمري
حياة: بس اني كلتلك صعدت اشر ملابسي ونقفلت الباب عليه
خالد: بس اني صعدت لكيتها مفتوحه والله
حياة: بعدك ممصدكني
خالد: لا مصدكج بس اريد افتهم منو قفل الباب عليج
حياة: ماعرف والله
وراها كلي روحي بدلي خل روح نتغدا بره صراحه اني كلش فرحت كمت بدلت وجنت اريد اطلع بس حتى اضوج رغد مثل مضوجتني
فطلعنا جانو كاعدين بالمطبخ كلهم فخالتي كلتله
خالة: هايمه وين رايحين
حياة: اني بسرعه جاوبت لان اعرف خالد محيكول روح نتغده فكلتلها خاله حنطلع نتغده اني وخالد يريد يصالحني لان بارحه زعلني .. هنا رغد كامت تنطي اللوان فسلمنا عليهم وطلعنا بسياره خالد كلي
خالد: ولج ليش هيج كتيلهم حنطلع نتغده هسه امي تكعد دكلي اخذ رغد هم غديها
حياة: حتى اموتك والله بعدين اني ردت اضوجها مثل ماهي كل يوميا ضوجني بكلامها ونقهرت منها صبح نزلت دكلها لخالتي البارحه اني وخالد ظلينا سهرانين وسوالف محسينا عالوقت ظليت اعوج بحلكي اقلد رغد
خالد: هههههههه خرب ببليسج ولج منو السهران يولي اول ماصعدت نمت حتى ماحجيت وياها
حياة: حتى تعرف شسوي حتى ضوجني
خالد: اويلي منكم النسوان عدكم سوالف والله ماتجي براس اكبر زلمه
حياة: احسن مثل ماهي سوي اني اسوي
خالد: يعني سويلي مثل ماهي سويلي بالغرفه 😉
حياة: خاااااااالد كافي لتحجي ويايه هيج
خالد: مخبله والله بس ترى اذا ماتنطيني حقوقي اروح ادورها يم مرتي الثانيه
حياة: نداريت عالشباك كتله : عساس انت مدتاخذها منها
خالد: ولج والله ماواصل يمها مخبله ظلين صدكين اي شي يحجو
حياة: وصلنا للمطعم فطلبنا الغده وظلينا نسولف وصدك غيرت جو صالي هواي مطالعين اني وخالد وراها مرجعنا للبيت رحنا للكورنيش كعدنا هناك وراها رجعنا بس رجعني للسواق خلني اجيب كلشي اريده وهو اخذ لامل ورغد كلي هسه يموتوني هم مطلعج وحدج وهم جايبه علاكه هالكد بس الج خلي استر على روحي
رجعنا للبيت طبينا جان خالتي كاعده فسلمت عليها ورحت لغرفتي نزعت وطلعت فرحت للمطبخ جانت ايه واكفه فظليت اسولف وياها فجتي رغد كالت لايه عفيه عدج حبه مال لعبان نفس حموت صالي يومين هيج
فاايه كلتلها والله ماعدي بس حب كتبتلياه دكتورتي مال لعبان نفس تريديه فكلتلها اي حموت من وره هاللعبان نفس ودوخه ايه كلتلها يولي خاف حامل فكلتلها والله يجوز كلشي يصير فاخذت الحبايه وراحت اني ظليت اباع عليها واكول معقوله حامل لعد شون خالد يكلي مواصل يمها اكيد يجذب عليه حتى ليقهرني فتت للغرفه ومن صدك كمت ابجي كلت شمنتظره مثلا اكيد تحبل وجيبله جهال قابل ظل هيج غير هي هم مرته
خالد: رجعت اني وحياة للبيت فرحت كعدت يم امي ظلت تحجي ويايه علمود علي يرجع للبيت واني وياه اخوه وميصير هيج والظفر عمره مايطلع من اللحم بس اني ماجنت راضي يرجع ابد لان سوايته الي جبيره ماظن اكدر اسامحه
ثاني يوم دخلت للبيت شفت امي ماكو سئلت حياة كالت اخذت رغد وطلعو فاني استغربت وين راحو كلت يجوز للسوك
دخلت امدد وحياة وجهه ثكيل ويايه حاولت اعرف شبيها بس ماتقبل تحجي
فنمت كعدت سبحت وبدلت وطلعت رحت شفت امي جايه وكاعده يمها رغد فكتلها ها يمه وين جنتو فكلتلي
خاله: اخذت رغد رحت حللتلها لان صارلها مده تشكي لعبان نفس عدها ودوخه كلت يجوز حامل
خالد: اني باوعت على رغد وخزرتها لان اني ماوصللها فوك الشهرين او اكثر شنو حامل فهي رستا كلتلي
رغد : كتلها لخاله مو حامل بس هي ماقبلت الا احلل
خالد: نداريت على امي سويت سالفه عاديه كتلها اي وشتبين
خالة: كالو ماكو حبل
خالد: الله كريم فسلمت وطلعت فجانت واكفه حياه دتغسل ااماعين رحت وكفت يمها كتلها شبيج انتي كالبه عليه مو صالحنا البارحه
حياة: باوعت عليه كتله مابيه بس راسي يوجعني شويه
خالد: لعبالج ماعرف شبيج بس من ارجع احاسبج لان ماصدكتي بكلامي
حياة: بهذا اليوم عود كلت يله وعادي وعادي بس صبح جتي خوات خالد ونوب رغد وهنا حبايب وكلسع يكلولها لتشيلين شي ثكيل خاف حامل وظلت هيج لحد ماراحن اني مجنت مقهوره حامل لان هي هم مرته وخل تحبل بس ماكدر ماضوج ماكدر
تفاجئت من خالد لان عرف اني جنت ضايجه لان عبالي رغد حامل
بس صراحه تفاجئت من تصرفات رغد يعني شبسرعه تفكر شبسرعه تنفذ يعني شافتني اني وخالد مزاعلين كامت سوي المستحيل حتى تقهرني ومن صالحنا وشافتنا صالحنا هم بسرعه فكرت بسالفه الحمل ونفذتها ماكو هيج عقليه واني كاظيتها خطيه وخاف الله يحاسبني لان داظلمها واظل اكول خطيه وهي بس تريد تقهر بيه وضوجني
متعرف اني اذا طك براسي والله املخها
بس الي معجبني امل ساكته وماتحجي ابد وحتى جنت داطلع من المطبخ وهي دتفوت صارت كبالي دنجت راسها متكدر تباع عليه ادري يجوز تندمت وتستحي تخلي عينها بعيني على عملتها ويايه بس ليش هيج سوت هذا الي حيخبلني
بالليل ماتحملت بعد هاي امل هيج سوي بيه صعدت فوك لغرفتها فتحت الباب هي نصدمت بيه اني فتت وكعدت يمها كتلها هسه تفهميني ليش هيجي حجيتي لابوج
امل: لان مقهوره منج حجيت هيج
حياة : وليش مقهوره مني اني شمسويتلج
امل: لان كايله لرغد على علاقتي بااحمد ورغد جتي كلتلي
حياة: ولج انتي صدكتي اني اكللها
ولج اني سلام ماسلم على رغد اجي احجيلها اسرارج
امل: محد يدري بعلاقتي بااحمد غيرج
حياة: امل صدكتيها لج اني ابوج اذا حجه كلمه عليج بشقه اظل احجي عليه لان حجه هيج عليج
ترديني اجي احجي هيج عليج
امل: اذا مو انتي كايلتلها منين عرفت
حياة: شمدريني منين عرفت يجوز سمعتج تحجين وياه كلشي توقعي من رغد اسوي حتى توكع بين اي اثنين
امل: اني كلش نقهرت من كلتلي حياة كايلتلي
حياة: انتي ليش ماجيتي كتيلي والله جان فركت حلكه ولج انتي اختي معقوله هيج اسوي
امل: حياة اسفه والله لان هيج سويت وياج والله اني احبج بكد حبي لابويه
حياة: والله اني نقهرت لان تعامليني هيج بس عادي مازعلت منج لان احبج
زين كليلي انت قفلتي باب سطح عليه
امل : لا والله مو اني هاي رغد قفلتها عليج وكلتلي حتى يجي ابويه يشوفج بسطح ويرزلج والله اني ماقبلت اكثر من مره اريد اصعد افتحلج الباب وهي متخليني وظل دكلي هي تفضحج وانتي تخافين عليها وحتى هي كلتلي كولي لابوج هيج اذا سئلج
حياة: معقوله اكو هيج بشر يعني يوم بعد يوم دتصدمني هالبنيه اكثر بتصرفاتها
زين شون من خالد صعد لكه الباب مفتوحه
امل: مو هي صعدت ركض فتحتها ونزلت بس كلتلي فتحتها على كيفي حتى انتي لتحسين وتنزلين
حياة: شون حقيره هالبنيه والله اني اعلمها الا اخليها تتندم لان هيج سوت بيه بس خل توكفلي هالكلبه واني الي انقهر عليها بس خل شوف شحسوي بيها اليوم
امل: حياة اني خايفه منها لدكول لابويه على احمد والله يذبحني
حياة: والله كلشي سوي هاي اكلج هو مو كال حدز امي عليكم مره ثانيه شو مدزها
امل: يخاف لابويه هم ميقبل
حياة: كليله خل يدزها مره ثانيه وباعي انتي شكو رساله مكاله مسحيها لتبقيها اي شي افتهمتي حتى رقمه مسحي من تليفون هاي شيطان كلشي سوي يجوز تاخذ التليفون تشمره بيد ابوج
امل: عزه واني حتى صوره عدي بتليفون خل امسحن كلهن
حياة : عفت امل تمسح الرسايل والمكالمات واني نزلت جوه لغرفتي ظليت اروح واجي اريد اقهرها مثل مقهرتني كل هالايام على امل وسوايتها الي بقفلت الباب
فجان اليوم مالتها ينام يمها خالد اني دخلت سبحت وطلعت سشورت شعري وخليت كحله وماسكاره وحمره خفيفه وعطر مليت نفسي ولان اني صالي هواي مخاله مكياج فبين رستا عليه التغيير ورحت لابست دشداشه مجسمه على جسمي سوده وطلعت حتى حجاب ملبست لان اعرف هذا الوكت حسين وايه فوك فطلعت كعدت بالهول فخالد جان راجع كاعد يم خالتي من دخلت ظل يباع عليه ومصدوم بتغير مكياج ومسشوره شعري يعني تطور واني خاصه وره وفاه ابويه هملت نفسي فدخلت كعدت كباله كعدت رجل على رجل ومسويه نفسي اباع عالتلفزيون جانت رغد كاعده ظلت تباع عليه ونظراتها حاقده عليه بس اني ظليت العب بشعري واسوي نفسي مندمجه نداريت شفت خالد كاعد يدخن فجر نفس ومن اني نداريت طلع الدخان باتجاهي
اني ابتسمت وغمزتله 😉
خالد: طلعت رحت لجماعتي سوالف وضحك رجعت شفت امي ورغد كاعدين يتفرجون تلفزيون فكعدت يم الحجيه ظليت اسولف واحجي شميت عطر حياة نفسه الي تخلي الي الاحبه الي يسطرني سطر نداريت شفتها دخلت للهول بس تخبل طالعه نوب لابسه ثوب ضيك عليها ماكدر ظليت صافن عليها صارلها هواي ممسويه هيج نوب كاعده تتدلع وتلعب بشعرها وتعض بشفتها اني امي تحجي ويايه واني مادري شتحجي ويايه نوب ندارت عليه غمزتلي بت الاوادم اني هنا ردت اكوم اشيلها وروح للغرفه واطلع قهر دنيا كله بيها
نوب تعرف اليوم انام يم رغد وسوت هيج الا اليوم من خرب اهله الي ميبات يمج واني ماصدكت ترجعلي حبيبتي مثل قبل
حياة: ظليت الكعده كلها بس العب بشعري واني لابسه كلاده كصيره عالركبه ظليت العب بزنجيلها الي هو نقطعه ضعفه ركبتي واني اتقصد الزم ركبتي كدامه لان هو يموت على هالحركه
خالد: ظليت اباع على حياة الكعده كلها نوب كلسع تندار عليها وخرب اهلها كلسع لازمه ركبتها كدامي واني احترك من يمي ندارت عليه اشرتلها براسي للغرفه بس هي ضحكت وهزت جتفه بمعنى ما وضحكت وندارت اني ظليت متحلفلها على هاي عمايلها نوب امي كالت حروح انام فبقيت بس اني وهي ورغد
حياة: طبعا اني اسوي هالحركات واني بس اريد اضحك لان خالد احسه بعد شويه يكوم يهجم عليه وماعدا رغد الي عيونها بس عليه وعلى خالد ونوب خالد كلسع ياشرلي تعالي للغرفه واني ماقبل ظاله هنا بس حتى اشوفها لرغد الي يوميه تحير شسوي بنفسها بس حتى تجذب خالد وميعبرها يعني صراحه اني هم جنت مشتاقه لخالد كلش بس حبيت العب قبل ماطفي هذا الاشتياق ......... يتبع ❤️