حين يزهر الحجر

٣٧

مساء الخير

حين يزهر الحجر
الجزء ٣٧

بقيت انتظر وتذكرت اول مرة من بقينا ننتظر اني وشجاع..
ابتسمت لحماسه بوقتها وشكد كان متلهف...
تقربت وشلته من شفت النتيجة ارتاحيت...
صح هو رزق ومحد مايتمنى يصير عنده اطفال..
بس مو وقته هسه هم ابني صغير وهم مشاكل ..
اذا اجه الطفل بهالوكت انشغل وساعتها يمكن تسوء علاقتنا اكثر...
شلت الاختبار وركزت بي عدل..
تأكدت بس خط واحد يعني ماكو حمل...
ذبيته وغسلت ايديه وطلعت...

شفت شجاع ع السرير وزيوني بحضنه ..
لبست الشال ونزلت..
شفت رحاب مكملة الغدا كالت يلا تغدو وروحو تعاتبو...
ههه اي يلا خل نحضر...
شلونه النونو خو ماتعبانة؟
لا ثاني حمل كلش مو مثل الاول...
بالاول كلشي متعب..
هسه الحمدلله احسن..

صدك ولج سويت الاختبار طلع ماكو حمل..
ياا لعد كاطعتج لان ترضعين..
صحيح عفية امي اتذكر حجت فد مرة هيجي...
اي اكيد بس روحي راجعي وتاكدي احسنلج...
اي انشالله اروح...

تغدينا وخلصنا شغل اني ورحاب...
صعدت للغرفة لكيته يهزز بزيوني بحضنه..
بس دخلت كال..زين اجيتي خطية جاع ونعس..
اي هو اذا جوعان مينام..

رحت اخذته منه وهو مسبل عيونه وحركاته مفضوحة..
كعدت ع الكرسي وخليته بحضني وخليته يرضع...
هو كاعد كدامي وفونه بيده..
كل شوي يدير عينه عليه ويرجع يباوع بالفون..
بسيطة الا احرمسك واطلع كتلتي من عينك..

نام زيوني وحطيته بسريرة...
اخذتلي ثوب قصير وربع ردن وردي..
رحت للحمام غسلت وبدلت اجيت تمددت...
هو ذب الفون واندار عليه...
بقى يباوع واني ساكته ..هالحجي عو كاعد واني متمددة...
تالي كال بعدج زعلانة؟
تمطيت وكتله بعدين نحجي نعسانة...
هو اعرفه مايتنازل ..
نفخ كال براحتج...

انطيته ظهر وغمضت ..ماكنت نعسانة غمضت هيج حتى اريح عيوني...
بقى كل شويه يتحرك ويطخني...
وكل ميطخني انز...اخر شي طخني بس متحركت ...
هو عباله غفيت...
جرني وصرت بحظنه كلش...
اشتاقيت لقربه هواي صارلي محرومه من حضنه...
بس ماريد اضعف لازم اتحمل...

حط شفته بركبتي ويبوس خفيف حتى لا يفززني عود...
صرت بحضنه اكثر وحسيته انتهى واني انتهيت بس لازم اقاوم...
سويت نفسي فزيت من النوم...
جريت نفسي من حضنه وكعدت لحيلي...
هو بقى ينفخ ..
عافني وكام...

بقيت بمكاني ..ورا شوية طلع من الحمام...
حضريلي دشداشة عندي اليوم روحة للعمارة...
شلون شعندك!حجيتها بلا ماحس...
واكف يجفف بشعره ويحجي...
جدة فليحة رايحة لخالي هناك لان جانت مريضة...
واريد اجيبها يمنا...
كل الهلا بيها...

كمت طلعت دشداشته وخليتها ع السرير وغيارات بصفها...
وكف كدامي وذب الخاولي ويلبس...
دنكت عنه وهو يصفر ويلبس...
كشخ وترتب وتعطر ..باوعتله قلبي رجف..
شكد صومالي ومعطب بس شايل وسامة تفر اكبر وحدة...

شفته طلع العلاج وشرب..
بالاول ماردت اسأله بس قلبي مانطاني...
كتله شنو هذا العلاج؟
التهاب صار عندي بدبي وتحسنت لا تهمين...
كلت الا ابوك جكايره...
يعني صدره ويكح ويدخن...
احتاريت سشوي هن ع ميز بعده ماخذهن...
حاولت الكى فرصة مكدرت...
كلت خل يرجع بسيطة...

راح لسرير زيوني باسه..
وتقرب يمي كال وداعة الله...
بلا ماباوع كتله الله وياك...
جر راسي وباسني بين عيوني وطلع...

ادعي بس كون اقاوم ومااضعف...
لان احبه وشكد ماكنت ناوية اعذبه ماكدر...
بس لازم يكونله درس حتى يبطل وحشية ...

ساعة بالتسعة بالليل وصلو...
استقبلناها خطية تعبانة ..
صبينا اكل واكلو..كالت خلني انام جدة ...
متت من الطريق صارت بية سهبة...
اخذتها للغرفة تمددت وغطيتها:.
ردت اطلع كالت..

جدة مهرة عليش متعبة زلمتج...
خايبة من جاني هناك عيونهن تشوهر علي..
وحدتهم عايز تمطله وتحبه ...
اني من كالت هيج خفت..
كتلها شعندي غيره بيبي لا تفكرين بينا ارتاحي،..

طفيتلها الضوا وطلعت...
الحجي والحجية راحو لغرفتهم وبيت ارفد هم...
بس شجاع بالصالة كاعد يلعب زيوني...
شافني اجيت كال..
ها خلصتي؟
اي ليش؟حجيتها بخوف لان قبل اول سؤال يساله هذا من احسه محتاجني...
كال حتى تاخذين زيوني لان اني نعسان وتعبان من الطريق...
اي جيبه...
لا صعدي اني اصعده...

صعدت ركض كدامه حتى اخلص من شره...
اخذت زيوني وكعدت بالارض وفتحت الفون لان متابعة قصة..،
لكيت برنامج بس قصص وبلشت اتابع هوايه حلوات...
هو تمدد ع السرير ورا شوي انتبهتله نام...

اني بقيت لحد مانام زيوني سديت الفون ونمت..
بس كل شوي احس بي يكح..
يعني نومته متقطعة صارت..
وكل ميفز يكح ويرجع ينام يجرني لحضنه واني مكيفة بحجة نايمة...

يوم ثاني كعدت سويتله ريوك وراح بس اسلوبنا رسمي يعني ثنينا نتصرف غصب عنا...
انتظرته يجي واتغدا ويا لان بيبي فليحة تغدت وياهم...
وهم مالها حيل بقت متمددة تعبانة كلش...
اجه تغدا واخذ زيوني وكعد يم بيبي فليحة...

اني كملت المواعين واخذت الجاي شرب وي بيبي...
بعدها ترخص منها وصعد..
صعدت لكيته متمدد وزيوني ع صدره...
من دخلت اشرلي اوشش..
عرفت زيوني نايم..
تقربت اخذت وحطيته بسريره...
كال بصوت ناصي...
اذا خلصتي تعاي...
اي هسه...

رحت غسلت ولبست برمودا مخططه وبدي احمر ربع ردن...
اجيت كعدت ع السرير وهو كعد...
انتبهت بصفحة علبة بيضه مالت ذهب..
جرها وفتحها..طلعلي محبس فضي وبي لؤلؤة بيضة...
جر اصبعي ولبسني..
شوي كبير..
جر الوسطاني ولبسني صار تمام..
باوع لايدي كال حتى محبسج مو راحة...

اني باوعتله بنظرات عود صاير لوتي..
هو ابتسم كال عجبج؟
كل مميز وحلو..حجيتها بثكل..
تستاهلين اكثر..بس مكانه ماعجبني ..
اخذه لصايغ يصغره الج حتى يصير بالبنصر...
ليش صايغ شنو هو ذهب ابيض ؟
لا الماس هذا والدانة البي اصلية واصيلة مثلج...

اني درت وجهي..داره عليه وكال..
ليمتى تبقين هيج مجافيتني؟
حجيتها بحزن..ماعرف بس اذيتني هواي...
اعرف اذيتج بس ثنينا اذينا بعض...
اني تعرفيني افقد اعصابي وراد تيني بوكتها جنت اعصابي تلفانة..
تجمعت كلشي عليه بيومها...
ورغم هذا تحملتج بس من كتيلي تلعب نفسي حرگتي كلبي واعصابي...

مو قصدي تعرف بيه..
بساعة العصبية افكر بقصد لو مو قصد..
تخيلي اني اكلج تلعب نفسي منج؟تقبليها؟
ماقبلها بس ما اهجم عليك مثل مهجمت عليه...
شجاع انت تخوف وكلتها الك قبل...
انت قاسي ومن تلزم البشر ماترحمه...
مهرتي اني اعترف واول مرة احجيها...
بس اني اذا تعصبت ماحس بروحي...
مو من هسه من صغري...

زين هذا كله تركه..ليش تخليني اعرف عنك وعن ماضيك من الغريب...
حبيبي اني ميهمني اذا حنت مسجون يوم لو عشر سنوات...
عادي الحياة مشاكل والدنيا غداره ..
بس اليهضمني غفران تحجي بالموضوع بشماته لان تعرف اني مادري....
لو بوقتها منت ادري...
اعرف شلون اردها وافشلتا واطيح حظها...

شفته كام وفرك وجهه بيده حيل...
طلع جكارة وحطها بحلكه...
تقربت حريتها منه...
ماتدخن وانت مريض...
بالليل كوة تنام وتجب تدخن شنو هذا انتحار ؟
مد ايده لايدي..جيبي ولج ماكدر...
جريتها وحطيتها بصدري...
مانطيتها وعوف الجكاير...
حسيت حركتي دوخته شويه التهى...

جريته من ايده وكتله تعال..
كعدني بالارض نفس مكان يوم العرس..
هو احسه متوتر ومتضايق حيل...
اخذت ابده وفركتها...
شجاع اسمعني...
حجه وهو صافن..كولي...
تتذكر هالمكان؟
ابتسم نصف ابتسامة...
اي اتذكره هنا اول طعم للراحة ضكته..

واني مثل ماضوكتك الراحة وانطيتك كلشي بهالمكان...
اريد تريحني وتحجيلي عنك كلشي هنا...
رفع ايده وخر شعري من يم عيني...
صايرة تساومين صدك محاسبة ولج...
ومنكم نستفيد ابو العقود...

خليت راسي ع رجله وتمددت..
هسه احجيلي واريد اسمع...وان كان ذكرى سيئة اريد اشاركك بيها...
عدل حواجبي بيديه واني اباوعله ..
كال...

انسجنت من جنت عمري ٢٣ سنة..
سنة ٩٨ او بداية ٩٩...
جان عندي نشاط ديني...
حسيته يريد ينفجر كوة يسولف...
كمت كعدت بحضنه...
اريد انسيه وابره باي شكل..
لان سامعه عن هيج حالات وشكد يعانون...
كعدت ع رجله وخليت راسي ع صدره...
كمل يروحي اسمعك ..اصلا هذا وسام شرف سبب سجنك...

عصرني لصدره وكال...
بقيت لحد ٢٠٠٢ يلا طلعت...
جانن ثلث سنوات ونص بس شفت المررررر....
وتعرفين منو الذبني؟؟؟؟!
ذبني خالي اخو امي...
جان رفيق جبير ويطير ركاب ..
الي من صارت تصفية الحزبيين اجه لبد يمنا ..
وصارت كتلته ع ايد نسيبه...

حضنته اكثر كتله..عجيبه ليش خالك؟
لان اضر مصلحته..
جنا نصلي ونزوروعدنا اتجاه ديني من ايام الجامعة..
وهالشي مايصرفله ويهدد منصبه...

اخذوني بنص الليل وامي لهسه كعدتها بين عيوني...
شكت زيجها وصرخت شجااااااع ع ع ع ع ع...صداها باذني واني يسحلوني للسيارة...
وهو يحجي حسيته اختنك بعبرته بس مابينلي...
بقى يكح...
بقيت ادلكله صدره...كال...

اخذوني اني وجماعتي خمسة...
شفنا تعذيب حتى بافلام الرعب ما مار علينا...
كتل نتل حرك حتى جلاب هدو علينا...
ضكنا الويل والعذاب بس ماعترفنا بشي...
تالي سجنونه...
اني عود جانو شبه زينين وياي..
بس بقية جماعتي لا قضو عليهم...
ورا السجن بشهرين جماعتي انعدمو...
بس اني بقيت...

السجن جان بؤرة وكلشي بي...
بي الشاب والشايب والتقي والعايب...
سكت عن كلامه كال...
تعرفين سبب هجمويتي وانفعالي...
الفترة الي كضيتها بالسجن مو التعذيب ...
جنت انام بنص عين...
اول ايام كلساع افز ومحتاظ مثل النايم بساحة حرب...
تعرفين ليش؟؟؟؟؟؟؟
لان هناك الرخي والرچيچ يروح بالرجلين...
انت مريتي وماريد اقلل منج من احجي كدامج هالسوالف...

بس الضكناه مر علگم وما ظنيت ورا بعد اضوك الصبر مو بعد العسل ...
جانو اكو شكم واحد مسكطين..
يعتدون ع المساجين خصوصا الشباب...
نشوف بعينا ونفسنا تلعب تالي الليل ...
مناضر  يشيب منها المكمط....

فد مرة واحد يسمو عمران بطل...
هذا مدكدك ومحفحف واكرع...
ماخذ ع السجن كله...
بيوم بليل اجه وبده يذب حجي ...عباله اني خنيثة لو اخاف...
ذبله كم كلمة ..
اخر شي كال يحلو الليلة نزورك...
اني كلبي محبل منه من كال هالكلمة طكيته بوكسي عوجت وجهه...
بقى يذب دم وسنون...
مطلته وكعدت ع ركبته وشبعته بوكسيات لحد مانتهى بيدي...

من وكتها كف مني وخاف وماندك بيه بعد..
بس ضل يدز زبانيته يتعاركون وياي حتى اسوي شغب واتعاقب...
وكل ماواحد يندك بيه اكتله كتلة موت...
ضل الكل يخاف مني ويخاف يوصلي...
وجنت عناد بالضباط والحراس وبكل واحد مسؤول بالمكان...
اوكف اصلي بصوت عالي...
وشكو دعاء حافظة اقراه...
تعبت اعصابهم ودمرتهم بس بداخلي متدمر...

ممنوع الزيارة ومحد يوصل لو نشوف احد...
سنتين ماعرف خبر عن اهلي وبالي كله بامي...
شكد حاولت وردت بس ماكو حيلة...
الى ان فد يوم المغرب...
جنت نايم وكعدني رجال جبير جان خير واني رافگته...

كلي الحارس يريدك....
كمت مفزو ع وصدري ضيك...
طببني ع الضابط...
جان شاب اكبر مني بشوية...
شكله متعاطف وياي ووجهه مكسور...
بعد ما مهدلي وسولف واني نص كلامه لابسه ومامنتبه...
بس النبهني من كال...
والدتك توفت...

للحكاية بقية
بقلم شقراء(قمر كانون)

طبعا هذا البارت كوة كتبته وجع قلبي كلش احس احداثه تعبت نفسيتي