حين يزهر الحجر

٣٤

مساء الخير

حين يزهر الحجر
الجزء ٣٤

من حجه عليه عاطف قلبي وجعني..
شكد اذاني وذلني بس ماينطيني بلبي يحجي عليه...
بقيت ابجي واني كاتمة صوتي ..
عاطف يمي يتهدد ويحجي ويسب...
دك فوني طلعته شفت رحاب تتصل...
سويته صامت ورجعته..
حتى منها مقهورة لان تعرف وماحجتلي...

كعد زين وضل يبجي..
بقيت اهز بي ميقبل يسكت...
زاد بجيي وانقهرت اكثر...
بقيت مخليته ع كتفي وادك ع ظهره شويه هدأ...
وصلنا وعاطف نزل اغراضي وفتت..
لكيت امي بالمطبخ بس شافتني شهكت..
واجت عليه تركض..يومه بنيتي ..
اخذت زين من ايدي وحضنتني لصدرها...
بقيت ابجي وهي تكلي اسم الله عليج عين ماصلت ع النبي كافي سكتي...

اخذتني لغرفتها وزين بجه..
كعدت ارضعه وهي طلعت كالت هسه اجيج...
ارضعه ودموعي تصب شكد مقهورة مامتوقعتها منك شجاع ...
اجت امي وانطتني كلاص ماي..
شربت وخليته ع جهة...
كعدت يمي وكالت..
بسج بجي مو زين على وليدج..
مصارين البطن تتعارك وتردين البشر مايتعارك...

كامت جابت الكلينكس خلته يمي..
مسحي وجهج مهرة كافي عفا عليج هاي انت العاقلة...
اخذته ومسحت وجهي وخليت زين ع المندر...
غطيته وكعدت ومصفنة..
هي يم ع جهة..كالت ..
شنو الصار بينكم وتطلعين مزوركة وبلا مايدري رجلج يما...
صبت دموعي بقهر وكتلها...
مدري شبي يما تخبل فجأة ابد مو طبيعي...

عيب تكولين عن رجلج هالحجي...
مهرة بنيتي رجلج تعرفينه عصبي...
لو ما دايسة ببطنه ماسوا بيج هيج...
ماسويتله شي بس سالته وهو كلب الدنيا فوك راسي...
احجيلي بلة حتى اعرف اتفهم وي اخوج ..
تدرين يريد يطلكج منه وتوه راد يدخل يحاجيج كتله عوفها ترتاح...

حجيتلها الصار وماضميت عنها شي ماعدا اغتصابه ماجبت سيرة عنه..
بس كتلها كتله ماريدك وتلعب نفسي منك...
اخذتلي رزالة صغيرة وبعدها كالت ارتاحي هسه وخلي اعصابج تهدا وبعدين نحجي....
عافتني وطلعت ..

جريت الفون فتحته ..
مكالمات كومة من رحاب ..دازة مسجات..
اريد اقرا واباوع لزين تقيء بس من خشمه ومن حلكه..
شلته واضرب ع ظهره وهو يشهك ..
بقيت اصرخ ولج يماااا لحكي ..
اخذته وركضت وابجي وصيح يماا زيوني مدري شبي ..
تصادمت وي امي بالباب اخذته من ايدي وشمرت الفون من ايدها...
طبطبت ع ظهره وغسلت وجهه..
بقى يبجي حيل ..
اني شفته بجه واغمى عليه...

ماحسيت الا اني بحضن عاطف وصبا وامي بحضنها زين ..
فتحت عيوني وابجي ..
ابن وينه يماا..دفعت عاطف وكعدت...
كال هذا ابنج بيد امي لا تخافين مابي شي...
اخذته حطيته بحضني وبقيت ابجي...
اباوع لامي فركت وجهها بشيلتها وصبا بقت تبجي وكعدت يمي...
عاطف استغفر وكام...

كومتني صبا ودخلتني لغرفة امي...
كعدت يمي وبقت تسولف وياي..
كالت عادي تصير لا تخافين وهذا الطفل كل يوم شكل ..
لا تبجين ترى يحترك حليبج ويضره خطية...

دخلت امي بيدها صينية..
كعدت وحطتها كالت لصبا اخذي الفرخ يمه...
اخذت زين من حضني وامي كومتني...
اخذتني للحمام غسلتلي ورجعت للغرفة...
كالت يلا اكلي ابنج يحتاج حليب منج ولا تقهرين روحج..

لا اول ولا اخر وحدة يطكها رجلها...
هاي كدامج مرت اخوج شايفة اشكال والوان من وز تماضر باخوج...
يصعد يمها ينزل متخبل ..
لا يوم طلعت ولا يوم وصلت لاهلها..
اخوها بين يوم ويوم هنا وماتجيبله سيرة ولا تنطق ..
تعرفين ليش؟
حتى تحافظ ع بيتها وحتى لا احد يشمت بيها...

اني عفت الكلام وركزت باخوها يجي..
معناها براق راجع وراجعة العلاقات قوية..
يلا هي من تلتم بعد فد مرة..
كالت صبا يما هي هم حقها..
صعبة طلعة المرة من بيتها بس مو يسويها جنازة..
هم لازم تحطله حد وهي مهرة عاقلة وشجاع خوش زلمة وانشالله يرجعون...
مدي ايدج سويلها واهس بالاكل ..
اني احضرلكم الجاي ع ماتخلصون....

كامت صبا وامي كالت..
لا تحسبين ثكيلة كعدتج عندي لو ما متحملتج....
بس اريد مصلحتج ..شجاع رجال وبهذا وكتنا الزلم قليلة...
ساعة شيطان وطكج والرجال كايلج لا تصيرين يمي بساعة العصبي...

لا عبالج متساهلة ويا وامشيها اله..
بس يما رجلج سترج وغطاج وطلعتج من بيتج غلط واكبر غلط...
خليها ببالج لو تتمالخون..
خلي هو يطلع وانت ابقي...
اذا استسهل طلعتج يتعود ع فراگج...
ولو تعود ع فراكج معناها خسرتي سعادتج يما...

وهي تحجي دكت الباب صبا ودخلت...
خالة ابو زيوني بالباب عاطف طلعله...
اني رجفت من سمعته اجه ..
امي بسرعة كامت طلعت..
وصبا وراها...
شوية وسمعت صوته بالصالة..
ماعرف شنو احس كلشي بيه مخربط واحساسي معقد...

سمعته يكلهم شلون صار خو ما ذب من راسه بعد..
استغربت شعرفه بزين!
كلتله امي عادي يما كل طفل هيج لا تحاتي...
هسه اجيبه الك وشوفه...
دخلت امي اخذته كالت اودي لابوه..
مالحكت اسالها شلون عرف ..
طلعته واسمعها تسولف ويا..
كلها ها ماتجي ام زين حتى نتوكل قبل الليل...

كله عاطف لا ماتجي...
وكتلك من الباب مرة مالك يمنا...
ابو فؤاد مرتي وامرها وشورها بيدي
بشرع الله ماتطلع بلا علمي...
وكل رجال ومرة تصير بينهم مشكلة مو اول ناس احنا...

سمعت عاطف ارتفع صوته كله...
يا مشاكل تحجي عنها والبنية اجت وجهها ماينشاف من الزراك...
صوج مني انطيت عمارة وشيعة بعد...
كله شجاع بهدوء واستغربت شجاع هادئ وواحد يكله هيج غريبة...
ابو فؤاد ترى الشيعة ربهم ربك ونبيهم نبيك..
لا نحج بلبنان ولا نطوف الفلكة..
ترى نحج مكة ونطوف الكعبة...
والعمارة صيتهم سابقهم خاف ناسي ترى اذكرك...

عاط عاطف كله شنو تعيرنا انت؟؟؟
امي كلتله يما عاطف تهدى ...
كله شجاع ابو فؤاد زحمة تعلي صوتك وامك حاضرة...
والمايحشم امه مايحشم احد...
من رخصتج حجية صيحي لمهرة...
ماتطلع مهرة اليوم لو تنكلب الدنيا...
هي جبيرة وهي تقرر ماحاجة تحجي بلسانها...
هي كالت بعد ماريده وماريد ارجعله....
بسيطة صيحلها اسمع منها...

اجاني عاطف كال كومي وياي..
لفيت الشال وطلعت...
اول ماجت عينه بعيني قلبي رجف..
اخ منه وماضيعني غيره..
حسيت تفاجأ يمكن من العلامات الحلوة المخليها بوجهي هه...
كال يلا مهرة ماتسوى السالفة نرجع ومايكون خاطرج الا طيب...
لا اعذرني مارجع وياك...
حجيتها واني مدنكة لان...اخاف اي اخاف اباوع بوجهه...

راد يحجي امي كلتله...
وليدي خليها يمي..نفسيتها تعبانة ترتاح واخذها...
امي تباوعله واحس بينهم فد اتفاق...
هو كلها تدللين يما..
حضن زيوني وباسه وعينه عليه..
اني فتت للغرفة..
مقهورة ميته قهر ..ليش وصلتنا لهذا الحال يا شجاع اووف...

ورا شوية وامي جابت زين ..خلته بالفراش وكالت..
رجلج باجر يسافر..
اخذي وكتج وفكري عدل..
الرجال ندمان وغلطان..مو حلوة بحقه تصغرينه كدام اخوج...
نامي هسه وارتاحي...
طلعت وسدت وراها الباب..

اني ذبيت نفسي يم زيوني وبقيت ابجي...
مخنوكة متضايقة احس نفسي بقبر من كد الخنكة...
ليش يا شجاع لييييش...
الكل تحسدني ع حبك الي واهتمامك بيه..
هيجي تاذيني وتخليني للشماتة...
الفون جان يمي اباوعله ضواه مفتوح...
شجاع جاي يتصل...
بقيت لازمته بيدي...
يدك مرة ورا مرة ورا مرة..
بس ماريد اجاوب...
يدز بالرسائل وماريد افتح...

خليت الفون جوا المخدة وغمضت...
غفيت شوية وكعدني زيوني...
رضعته وكمت للحمام...
امي متمددة كالت ها شلونج هسه...
هزيتلها راسي..احسن...
طلعت ورجعت...

لكيت زيوني ملابسه كلها مبللة ومتلف بالقيء مالته...
ركضت عليه..هاا يماا رجع ذب؟
ع كيفج روحي جيبيله هدوم مابي شي جنه العافية ...
جبتله ملابس وطاسه ماي ونظفناه..
كالت هذا حليبج اذاه شفتي يما شلون اذيتي وليدج...
عزا العزاني شسوي هسه يما شلون بيه ناخذه للمستشفى...
لا اسم الله مايحتاج...
هسه اصيح لصبا واخليها ترضعه...
وانت كل مايدر عصري كله خل ينزل ويصير جديد...

راحت صاحت لصبا...
اخذته بحضنها بس خلته بقى يرضع بنهم..
سودة عليه يما الله ياخذني جوعان وماكدر اشبعك...
هي ترضعه واني دموعي تصب...
غفى عدها واخذته...
كتلها اذا عندج حليب قواطي انطيني...
جابتلي ممه وقوطي حليب وترمز ماي...
اني عندي كلشي بالبيت بس شجاع منعني انطي ممه بس مرتين اخذ...
واصلا حليبي هواي والكل نصحني اترك الممه...
سويتله ممه بالليل وكل مايبجي انطي...

صار يوم ثاني وجربت انطي حليبي وهم ذبه...
كالت امي امشي للدكتورة...
بيا وجه اطلع يما استحي..
دكومي يما تستحين اهم لو وليدج اهم..
شوفي صدرج خرز وورم عليج لا تتمرضين...
صدك يولي وجهي ..
بدلت ورحنا...
فحصته كالت لازم هذا كله يصفى ويتولد جديد..
كل اربع ساعات فوتي للحمام..وصبي ماي دافي وعصري...
وانطتني علاج ورجعت...

وصلنا  للبيت شفت سيارة ارفد برة ...
امي كالت اخذي زيوني ودخلي خل اشوف ...
دخلت وشفت زهرة وصبا بالصالة...
سلمت عليه زهرة وعيونها ناطة من شكلي...
اخذت زيوني وكالت تعاي...
وامي راحت االاستقبال...

كعدت يمي زهرة وبقت تحجي عليه...
حقيرة من البارحة لليوم اخابر وتالي تغلقي!ليش ولج حركتي اعصابي...
دولي مالي خلك احجي...
حتى وياي ولج ماتحجين؟
باوعتلي بقهر..دمعت كتلها شفتيشسوا بيه؟؟
استغفر الله الله يساعدج ويساعده...
حجييت بقهر..يساعده ع شنو؟؟؟؟
انفتح الباب ودخلت رحاب...

اني درت وجهي عنها وهي اجتلي تركض شبكتني...
يا حقودة ماتصورتج هيج قلبج اسود...
اني ساكته ولا شبكتها...
ضربتني براسي وكالت من يومج گوية وشورة...
دفعتني وكعدت بصفي...

ها صايرة عميرجية اصل..حجيتها وابتسمت صفح...
وهو اكو احلى من اهل العمارة اووف...
حضري شورطك وي اهل العمارة..ذولة مسودنين وطيحو طيارة...
وانت شعليج قابل طيار؟حجيتها واني مستهزأة...
لا اني نجمة وطيحوني يابه مو بس طيارات يطيحون نجوم...
هه...

ليش نخابرج وماتجاوبين من البارحة...
لان متستاهلين واحد يجاوبج..خاينة وحقيرة...
لا ماخاينة بس العرفتي مالازم يطلع مني...
مو خبر حلو ولا ذكرى حلوة وانقلها الج...
مصيره يحجيها الج رجلج ترى..
واني حلفني رجلي وكلي الحجاية ما تطلع وحلفني بابني...

اي ومن اسالج تكليلي موضوع مو مهم ولا تكبريها..
ع الاقل شرحيلي فهميني...
شنو اشرحلج مهرة قابل حنت ويا بالسجن اني؟
اني العرفته من غفران سولف فد مرة..
وسالت ميسون ماحجتلي بس كالت صحيح ...
سالت ارفد لطني ع حلكي وكال تدورين ورا اخوي وشعندج ولعب بيه لعب...

كالت زهرة ..مهرة امبين الموضوع يقهر شجاع ..
ليش اخوانه محذرين نسوانهم يعني؟؟
وليش هو اشتعل نار من سالتي...
يعني لو منتظرة بس يهدا وسائلته شتخسرين...

اخسر؟؟؟اخسر دوري كزوجة..كل مااسال عن ماضي يكلي ميخصج...
اسال عن زواجه السابق ينجن...
اجيب سيرة امه يكلي اذا تحبيني سدي الموضوع ...
وهسه عرفت بي مسجون شنو الي اريد اعرفه بعد؟؟؟؟
عشر اشهر ويا صارلي متحمله كلشي منه...
لا تطبين لا تطلعين لا تلبسين...
اطيعه واكول من حبه الي وغيرته عليه...
شكم مرة يزعل ع اقل كلمة احجيها...
بس ساعة ويرجع عبالك مصاير شي ويحجي يحسسني مخبلة...

كالت رحاب..مهرة ترى كلهم هيجي...
واذا انت شجاع طول هالفترة مامد ايده عليج والتزم بوعده...
ابشرج ارفد وعد الف مرة وخلف...
ترى شابعين كفخات بس نعرف ناخذ حقنا...
ولج انت العاقلة التنصيحن بينا...
عشيرتهم كلها تكول مهرة مخبلة شجاع وعامية عيونه بدلالها ولبسها وبجسمها ...
هسه خليتي الشامت يتحنى ليش ولج...

باوعي لوجهي ولجسمي وتعرفين ليش...
ولج صارلي ٣٥ يوم من جبت يروح يتقربلي وبلا رحمة...
ذلني ذلة بنات الليل مشايفاتها ..
كله لان كتله تلعب نفسي منك ومن اسلوبك...
كالت زهرة..هو غلطان ونص ..بس ضيعتي حقج بحجايتج...
ولج سيد حسين فد مرة لكيت بت خاله مراسلته ع الواتساب...
واني اعرف بيها تتلزكله من قبل...
رغم شفت بعيني شلون مرزلها بس عطت بي وانقهرت...
وكتله لا تلمسني بعد ما متاكدة من طهارتك...
لزكني راشدي خله راسه صحن دوار ...
واخذ اليريده بس حتى يثبتلي حجايتي مااثرت بي...

بس بالعكس جرحته بحجايتي مثل ماجرحتي رجلج...
كلنا وياج ونكول غلطان..بس انت هم غلطانة....
ومدام ماحجالج عن السجن معناها شي كبير ويقهره...

كالت رحاب..وغلاتج مهرة وشكد اختي انت...
بس منظر شجاع كسر قلبي...
من رجع من عدكم عبالك طفل وامه عافته وراحت...
صعدله ارفد يكول كسر قلبي حاضن دشداشتج ومخدة زيوني...
حاجاه ارفد يكله شلون انام اليوم ماعرف...
مهرة يتمتني وراحت...
اني حيوان وكلب ومخبل وحقها تعوفني...
بس لا تعوفني ماكدر...
ارفد نزل منه والدمعه بعينه...

واليوم قبل لا يسافر اجه وكلي خابريها وشكد خابرتج وانت ماكو...
مهرة شجاع انكسر وغلط...
سامحي عاد وع الاقل جاوبي مكالماته...
يعني سافر؟
اي سافر واحتمال يطول هالمرة...
اي احسن حتى نبدي باجراءات الطلاك...
صخااام !!ياطلاك ولج تخبلتي؟؟؟؟
كاات زهرة...مهرة ترى هذا شجاع حب عمرج لو نسيتي؟؟؟؟؟؟
لا بس مانصلح لبعض بعد...
حجيت وبجيت...
صح احبه بس ماكدر اكمل وياه ....

كامت رحاب كالت الظاهر اعصابج تعبانة...
طلعت وراها زهرة...
واني تمددت بمكاني...
ورا شوية رجعت زهرة كتلها ابقي يم زيوني ...
رحت للحمام نزلت الحليب...
بس صدري موتني وورم...

وي المغرب زهرة راحت...
واني بلشت عندي صخونة...
جسمي باد كلش...
رحت سبحت وزيوني يم امي...
طلعت من الحمام...
شفت براق كاعد بالصالة ...

للحكاية بقية
بقلم شقراء(قمر كانون)