ام زوجي الظالمة (حماتي المستبدة)

البارت التاسع

#حماتي_المستبدة
البارت التاسع

بقلمي
#همسات_الليل(ام آيه)

مساء السعاده لارقى متابعين...
هذا البارت طويل قريب 4000 كلمه...
والتمس منكم العذر غوالي احتمال باجر ما اكدر انشر...لان صارت عندي ظرف واتمنى تعذروني

تارة....
دق ناقوس الفرح بابي بعد عذاب ومعاناة سنين طويله......
وحلم جنت اشوفه صعب المنال عموري يكون الي.

فات عموري للغرفة وطبك الباب..

بقى واكف يم الباب ...
واني مدنكه...
حسيته راح ياكلني بنظراته......

رفعت راسي وشفته واكف يباوعلي ومجتف ايده...
وعيونه تلمع وابتسامته اه يا ابتسامته...
سحرتني سحر ....

فتح ايده واشرلي اروح عليه.....

رحت بخطوات بطيئه ....
واحلى خطوات الي راح ارتمي بحضن حلم عمري...

وصلت يمه وحظني حظنه مال واحد مشتاق وبلهفة كأنها اعصار ....
اشتياق يتعدى ويعبر كل الحدود....

بقينا على هذا الوضع يمكن دقيقتين ...
متحملت الموقف وراسا نزلت دموعي...
وبجيت بهدوء ما اريد اضيع هاي اللحظه ...
واحرمه واحرم نفسي نعيش تفاصيلها....

حس بيه ابجي ...
بعدني عنه وبقى لازم جتوفي ويباوع بعيوني....

حبيبي ليش هالبجي...
هياني بين ايدج ...
وحلمنا تحققق ...

راحت ذيج الايام الي بجتج وزعلتني...
لازم ننساها وتروح وابد مترجع...
احنه ولد اليوم ...اليوم بده عمرنا ...

خلي نسهر ليلنه لحد الصبح بحب وسعاده...
يااغلى حب واغلى ما املك بكل الوجود...

تاره....
هاي دموع فرحتي بقربك حبيب كلبي..
يا ما حلمت تمر عليه هالساعه...
جتني ايام تعذبت بيها...
وحسيت راح تبقى هاللحظه حلم بالنسبه الي...
بس الحمد لله صارت حقيقه ...
وممصدكه اني بين ايدك ...

راسا حظنته ودفنت جسمي بروحه ...

باسني من راسي وكلي اوعدج طول عمري ما انزل دمعتج...

واذا نزلت لتصدكين الي ايد بيها...
و الله ينطيني عمر واسعدج ياروحي...

تاره....
شالني وحطني على الجربايه....

عمار....
همزين طلعتي خفيفه ...
ههههههه

لعب بخشمي وباسني من خدي....

شفتي القصاصات هذه.....
حظنته وبسته...

هاي شاهد حبنا ...
حتى تشوفين شكد غاليه انتي على كلبي...
وبده كل شويه يجر قصاصه ويقراها الي...
ويذكرني ليش كتبناها...

بيها فرحنا وبيها من حزنا ...

اووووو هذا عمر وكلام مال سنين عذاب وشوق ولهفة.....

هاي القصاصات صارت بمساعده زيدون...
ياااا شكد عيب...
لا حبيبتي ...
حبنا عظيم واريد الكل يشهد بي...

مرت نص ساعة...

بعدنه بملابسنه كاعدين على الجربايه...
نسترجع كل ذكريات حبنا الجميله...

تاره....
ومن بين كل هالرومانسيه واجواء الحب....

استرقت  مسامعنه صرخة قويه...
هزت الغرفه بينا هز ...

تاره...

عمار بقى فاتح عيونه وكمز للباب يركض فتحه وصاح....

عمار.....
شكو شنو هالصياح...
شبيها امي..

جاوبني حسن من جوه...

حسن....
ماكو شي عموري اخذ راحتك عريسنا...

عمار....
نزلت اركض سمعت عياط امي...

فتت للمطبخ لكيتها كاعده مثل الخربانه...
واخوتي ونسوانهم فوك راسها ...

ها شكو شصار ...
شبيج ماما...

سعاد...
عموري اتكهربت ...

شمدريني يا ابني جنت واكفة على السنك اغسل ايدي...
وشمرتني الكهرباء لطختني كبل بالكاع..

شلون وليش ...
شنو القضيه...

كاعد يمها ولازم جف ايدها وافرك بي...
و

هي حاطه راسها على جتفي..

احمد...
هسه اشوف شنو القصه...

ندى...
هاي اول مرة تصير بينه هالحاله....

عمار...
احمد اخذ درنفيس الفحص ...
و راح للسنك يفحصه خاف بي كهرباء ...
طلع مابي شي...

هذا السنك فحصته وطلع مابي كهرباء يمه...

سعاد...
مو اكلكم اتكهربت ...
شنو قابل اجذب عليكم...

لاحشاج حبيبه....

عمار...
طلع احمد يفحص السخان وماطور المي ورجع....

احمد....
وهم ذولي فحصتهم وكلشي تمام لا طبك ولاتهريب بالكهرباء......

سعاد....
لعد منين جتني هالكهرباء...
ردت اموت واحس كلبي واكف ميدك من الهبطه...

عمار....
اسم الله عليج يمه..
راسا افتهمت السالفه ..طخت عندي...
ا

صلا استغربت شلون عدت الزفه بدونمتسويلنا هوسه...

بقيت لازم ايدها افرك بيها واحجي وياها...
مصار شي حبيبه ...
الحمد لله على سلامتج....

كلما اسحب ايدي تضغط عليها....

عمار....
يوم مابيج شي حبيبه...
اريد اروح ؟؟؟
لا ابقى يمي شويه شعندك مستعجل....

مرت نص ساعه واني يمها متخليني اصعد......
اسحب بايدي وهي كامشتها قوي....

يله حبيبيه كومي لغرفتج ارتاحي....

متكلي شبيك خبصتني ..
اني هنا مرتاحه...

ماما البنيه فوك ترى....

عيب منها ...عايفها وحدها ...
هسه ظل بالها...

ليش يظل بالها ...
هسه وصلولها الخبر رية وسكينة....

بس صدك متستحي من سمعت عياطي ...
غير تنزل تشوفني ميته لو عدله...

ماما اني كتلها لتنزل..
يله حبيبتي اروح...
اي روح شخبصتنا...

غمزولي الولد وصعدت...

صعدت الدرج كوة..
هبطتني والله ...
وتالي سالفتها كلها جذب....

فتت للمشتمل وقفلته...
طبيت للغرفه...

تاره..
نزل على صياح امه وبقى قريب نص ساعه جوه...
اني ضجت وملت روحي...

لهيت نفسي اقره بالقصاصات...
داقره بيها وفات عموري...
اجه حضني وباسني من خدي...

عمار...
ها حبيبي خو مضجتي...

لاعادي عموري...

صدك شبيها خاله...

لازمه السنك ومتكهربه ...
يا خطيه...

شلون صارت هسه...
لا زينه مابيها شي....

يعني هسه حتى المي مالتنه يكهرب...
لا يابه...
كلشي ماكو..
احمد فحص الكهرباء ...
و جيك الماطور والسخان وكال مابيها شي....

تاره...
عمار يسولف...
وكال هذا فن سعوده وضحك....
ع

جبه عدتلنه الزفه سلامات....

مرت الدقايق واللحظات بينه ...
نزعت بدلتي وبدلت لبست سيت ابيض
وهو لبس كلابيه بيضه...
فدوه لله طلع يجنن بيها....

عمار..
جوعانه حبيبي ...
اصيحهم يجبونه العشى...

لا حبيبي...
شبعانه بيك و ما احس بجوع...

كزكز عليه وبقى حاضني و يشاقيني....

وسمعنه خاله تبجي بصوت عالي وتنوح ....

عمار....
استغفر الله شلون بالله بهالليله...
ش

راح يخلصها.

اطلع عموري شوفها...

عمار...
طلعت لكيت امي كاعده وتبجي ...
واسمع اخوتي من جوه يصيحوها يريدوها تنزل.....
وهي ناطيتهم الاذن الطرشه...

ها ماما شبيج تبجين ...
وشمكعدج هنا على الدرج ياعيني....

سعاد....
هئ هئ ...
ابجي على ابوك ...
بيوم جبتك للدنيا كال...
هم يجي يوم واشوفه عموري عريس وافرح بي...
والمسكين مات ومشاف هاليوم..

عمار...
الله يرحمه يمه ...
شنسوي لا اعتراض على حكم الله...

يله حبيبتي امشي اوديج لغرفتج ...
و اكليلج لكمه ونامي...
انتي تعبتي هوايه اليوم..

ساكته متجاوبني اباوع عليها ...
تبجي بدموع وحركه...

خرب عرضها شمكاره....

تاره...
طلعت من سمعت صوت خاله تبجي وتزيد بالبجي...
شبيج خاله سلامتج...
مابيه شي بنيتي تعبانه...

ياعيني..
كومي خاله لتبقين كاعده هنا ...
تعالي يمنا...

احجي ....وعمار يخزر بيه بعيونه....
يريدها تنزل ...
ميريدها تطب يمنه...

سعاد....
اي بنيتي هاج ايدي كوميني وسنديني...

تاره...
ساعدتها وكامت...
شو هاي طبت تركض قبلنه راحت كعدت على التخم بالصاله....

تاره...
حسيت عمار ضاج ...

عمار...
ها ماما هسه ارتاحيتي...

اي والله ماما الحمد لله ارتاحيت ..
مكانكم يشرح الكلب وحسيت يمكم بالراحه...

حتى حسيت بالجوع ...

كوم صيح ندى تصعدلكم العشى...
شو عاجبني اتعشى وياكم...

اي يوم تدلليلن ...
نتبارك بيج حبيبه....

عمار...
كمت وامري لله..
هاي خوش كبوس تكبست بي اليوم...

ندى...
صاحني عموري يريد العشى..
هو جاهز بس حميته و رتبته و صعدته الهم....

ندى...
ها عمه مصرتي احسن...
اي الحمد لله...

يله كومي عيني ويايه ننزل نتعشى الجهال والولد منتظريج...

لا اني اتعشى هنا ...
تاره ملزمه بيه..
متقبل تاكل الا اني وياهم...

تاره...
يااا شلون جذابه....بكلبي اكول....
هو اني لا حجيت ولا فكيت حلكي...

تارة...
اي ندى خليها تتعشى ويانه ...
تزيد بركة الاكل وتحلة لمتنه بوجودها...

سعاد...
روحي جيبيلنه لبن نشرب...

ندى...
ماعدنه لبن شنينه عمه...

روحي سويلنه بالخلاط لبن شايط...
مال اربيل...

عمار...
لا يمه يالبن بشرفج....
تريدين تسطريني ....هسه راسا انعس وانام...

ندى...
نزلت جبت لبن وصعدت هاي اوامر...
ومجبورين نفذها....

عمار...
امي ماخذه راحتها على الاخر...
كلما امد ايدي اريد احط لكمه لتاره ...
راسا تنزلها...
وامي كاعده تسويلي لكمات وتحط بحلكي
وتزقني بهاللبن...

كافي ماما انتخمت معدتي ...

لا وليدي اكل واتغذه انت عريس...

بكلبي احجي...
انتي خليتي بيها عريس ...
خليتي واحد يفرح بعرسه ويعرف يتصرف بهاليوم...
اذا مكابلة و كاعده...
وكل شويه مهبطتني....

اتعشينه وكملنا ...
وسوالف سعوده متخلص...
سالفه تجر سالفه والوكت يمر وهي مستمره...

دزيت رساله لاحمد....
يمعود لخاطر ربك تعال اخذ امي راح تصير ساعه 12
وهي مكابلتنه...
بيانها تريد تنام يمنه...

دقايق واندكت الباب...
صاح احمد...

ماما ...ماما...
عمار....تعال احمد فوت...

تاره...
من سمعت صوت احمد ...
استحيت من لبسي وفتت للغرفه...

عمار...
كوة اقتنعت تنزل تكول رجلي متشنجه ...
كدتها اني واحمد ونزلناها...
نيمناها بجربايتها...

10 دقايق مجلبه باايدي ...
كوة فلتت روحي وصعدت لهاي المكروده ...

عمار...
صعدت متخوم من الاكل ومسطور من اللبن ...
عيوني كوه افتحها...
جريتها لحضني ورحت بسابع نومه....
مالي حيل لكلشي...

عمار...
كعدت وره ساعتين ...
اباوع عليها شلون الطفل نايم بحضن امه...
اشم بشعرها...
لعبت بخشمها ودغدغتها ...
وسحبتها الي قوي لعالمي ...
غمرتها بااحلى المشاعر والاحاسيس...
وعشت وياها احلى لحظات العمر....

عمار...
كعدت ساعه 10 سبحت ونزلت...

تلكوني البنات هلاهل واخوتي باركولي ..

امي جتي يمي ...
صباح الخير عموري شلون صبحت...

هلو ماما صباح النور...
مسطور دماغي من اللبن مالج...
تخمتيني تخم صعدت منا اريد اتنفس ما اكدر...

وشسويت...
شسويت قابل...
ذبيت زرك على فراشي ونمت ومحسيت الا هسه...

اها ...خوش لعد...

عمار...
ماما تاره فوك عود اصعديلها رايدتج بشغله....

اي عيني هسه اصعدلها...

تاره...سبحت ولبست كلابيه ورتبت شعري ونفسي...
اندكت عليه الباب وطبت خاله...

صباح الخير بنتي...
صباح النور خاله...
شرايده مني ...

تاره استحيت ودنكت...

عمار وصاني اشوفها النيشان...

رحت للغرفه واجيت انطيتهيا...

شو هاي انصدمت بقت فاكه حلكها و عيونها...
مكالت مبروك لو شي...
ب

س اسمعها تحاجي نفسها....

سعاد.....
لعد يكولي نمت وعفتها....
هيا لوتي ....

شنو خاله ...
لا هيج...

حضنتني وباستني بغل بس مال واحد مغيوض.....
بالمبارك بنتي منه المال ومنج العيال...

اشكرج خاله ...
من جابت طاري الاطفال انقهرت وعبرتها...

صعد عمار ...
حضنته وباركتله ...

جابوا الريوك فوك....
بقت يمنه تريكنه سوه...
استحي انزل جوه من الولد....

بقت كاعده يمنه  ومشغله التلفزيون وماخذه راحتها..
وصعدوا الغده وتغدت ونامت الظهريه يمنه بالصاله....
يعني ورانا ورانا ابد متعتقنا....

اهله كلش حبابين ...
البنات ورده...

العصر نزلنا جوه جانت جايه مره جوارينهم ...
وصاحوني اسلم عليها و نزلت ....

ندى...
تاره هاي جيرانه ام مشتاق...
ترى فضوليه وتطلع الروح با اسألتها ....
لا عادي...

مرت الايام رغم فضول خالتي..
وتدخلها بحياتنه...
بس احساسي بحضن عموري يخبل...
اشبه بالجنه من كثر ميغمرني بالحب ويسعدني بتصرفاته...

اسبوع عمار مطلع من البيت ..
بس البارحه طلعت اني ويا ...
اجرت بدله للحنه وحجزت  بصالون يمهم بالمنطقه....

واليوم جان يوم السبعه...
فزيت ساعه 9 ماكو عمار يمي...
كمت سبحت ورتبت الغرفه ولملمت بيتي...
واريد انزل جوه يمهم وصعد عمار...

عمار....
كعدت الصبح وجانت توته نايمه...
ن

زلت لكيت امي محضره الريوك...
اكلتلي لكمه وشربت استكان جاي وطلعت...

رحت للسوك اتسوكت..
ورجعت للبيت شفت ندى وعلياء جانن كاعدات...
سلمت عليهم ....

يا بنات ....
ترى اهل تاره راح يجون على الغده...

سعاد...
وشعدهم جايين مو السبعه العصر ...
هي عصريه كيك وببسي وفضت راحت....

عمار...
لا ماما عيب ميصير...
اني كتلها لعمتي تجي على الغده...

اي يالحنين ...
منو راح يجي وياها...
هي و خالات تاره اثنين ومرت مروان...
والباقين يجون العصر...

سعاد....
والله انت ابو الدكايك متجوز من سوالفك...
ماادري ليش مطلعت على اخوتك...
دومك تصرف بكيفك...

هسه شصار قابل يا ماما...
لا يابو مصار شي...
شوكت نلحك نطبخ ...

يمه ترى ساعه 9 ...
بعد كدامكم 4 ساعات بالقليل....

يا بنات فدوه بيضوا وجهي ...
عيب اول مره يطبون علينا....

هاي جبتلكم سمجتين اشووها بالفرن...
و سووا برياني وحطوا عليه هاي 3 دجاجات...
وهذا لحم سووا باميا وتمن...
كلشي جبتلكم حتى الخضرة و شغلات الزلايط والطرشي...

سعاد....
شصار يمعود متكولي جايك رئيس الجمهوريه...
هاهي يمه ...
مو يوميه جايين...
واحد يسوي شي يفتح الوجه....

اي بس هوايه الاكل ...
نسوي باميه وتمن بس..

لا سعوده خلي يسوون الاكل كله...
واليزود نظمه وناكله غير مره...

ندى...
عاشت ايدك عموري...
ادلل منقصر ان شاءالله...
عفيه ام ليوثي الورده كفو....

اني اروح اكعد تاره ..
حتى تنزل تتريك ...
وتساعدكم...

سعاد....
لا يمعود لتكلف نفسك خاف تتكسر اظافرها...
وويخرب نقش الحنه البديها....

صارلها اسبوع مدلله ...
مشبعت دلال خلي تنزل ويه البنات....

شنو احسن منهن ..
شو المسكينات نزلن وحدهن بالصباحيه مالتهن...
بلا ما اصيحهن حتى...
اشتغلوا شغل ما صار...

عمار...
اباوع على ندى وعلياء ونضحك...

يمه خلي يولن ...
احنه طابخينها سوه...
هن نزلنه من كيفهن صحيح...

يله اروح اكعد توتو...
عمه بعينك انت وتوتو...
عيب يمعوده لتسمعج....

ندى...
كمت الم الغراض اني وعلياء...
طلعت السمج اريد اغسله ...
هو منظف بس ينغسل ويتبل....

سعاد...
وخروا عوفوا المسواك ...
كلشي متسوون ...

كطعوا الدجاج وسووا تشريب...
ونسوي ثريد وشعريه وبحاويشه...

علياء....شنو عمه تشريب....
عمار يتخبل والله ...
ميقبل...
اني بكيف عمار...
يله وخرن خلي اضمه...

علياء...
رايحه اشوف وسوفي خاف كعد...

سعاد...
عليان الفتانه...تعالي ولج ...
تريدين تصعدين تفتنين لعمار وتتحججين بيوسف....

لا عمه...
ولمة ...
يله روحي نظفي الصاله...

فتت للصاله...
استغليت الفرصه...ودكيت على عمار....

ها علياء شتريدين..
عمار تعال ترى خاله ضمت المسواك...
متقبل تطبخ ...
تكول زايد عليهم تشريب دجاج...

لا بربج ...
هاي شبيها يالكعبه...
هسه جاي...

لتخلي تاره تنزل هسه...
لتسمعها حجايه وتقهرها...
وعليك الله لتعرفها اني كتلك...

سعاد...
مضروبة الجلوة ...
ويامن كاعده تحجين...
عمه هاي امي ...
يله ماما ننتظركم العصر مو متجون...

عمار....
انصادت علياء المسكينه والله...

عمار...
تاره حبيبي هسه اجي ...
5 دقايق واجي حتى ننزل تتركين وتساعديهم....

ماعندي شي هسه انزل وياك...
لا حبيبتي اروح اشوف سعودة شدتخبص...

اوك...
افتهمت تريد تسوي مشكله ..
من اتصال علياء...
مسألته ...
لان ما احب اللغاوي...

عمار....
ندى وينج...
هياتني عموري بالمطبخ....

سويتي السمج...
شفت ندى تباوع على امي...

جيبيليا ندى اني اسوي عندي طريقه طيبه ...

سعاد...
روحي جيبي...
بس معاجبها....

عمار...
هاي شنو شو السمج بارد ...

سعاد....
اي حطينا بالمجمده كلنا بعد وكت منا للغده...

خليت ندى تسوي صلصه وتدهن وجها وحطته بالصواني...

عمار...
صعدت على تاره ...
نزلنا سوة
وتريكنه اني وياها خفايف...

وكفت تاره  ويه البنات تساعدهم بتحضير الغده....

تاره...
اجوي امي وخالاتي وسمر ...
واتغدوا ويانا...

اني ساعه 2 رحت للصالون عندي موعد...
كملت وخابرت واجه عليه عموري اخذني...

وصلت لكيت كرايبي وكرايبه كلهم موجودين...

طبيعة اهل عمار ..
ميسوون حفلة مهر ...

يسوون سبعه جبيره ويعزمون كرايبهم ...
يعني مو مثل طبيعتنا ..
احنه نسوي السبعه بس لاهل العروسه...

الولد احمد وحسن طلعوا من البيت ..
حتى البنات والنسوان ياخذون راحتهم...

عموري بقى موجود...
ساعه يكعد بالمطبخ لو بالحديقه...لو يصعد فوك....
خاف نحتاج شي...
لابس بنطلون بيج وتيشيرت زيتوني ...
و شيلبس يطلع يجنن حبيبي الاسمر...

انتبهت على اهل ابو لعمار من الحنه...
كلش متحررين بلبسهم...
عكس اهل امه...

جانت بنت عمه اسمها رونق ...
موجوده...
ابد مرتاحيتلها من يوم الحنه....

بدت الحفله ...
امي لبستني سوار عريض وزنه 11 مثقال ...
وخالاتي كل وحده لبستني محبس...
وسمر لبستني سوار فرفشه....

وهدايا هوايه اجتني ...
وخاله ام عمار لبستني محبس...
فرحت كلش بهديتها ...
رغم موديله قديم بس حسيته يعنيلي...

البنات صاحوا عمار ..
كعد شويه ويانا وكطعنا الكيك  وكلني و اكلته..

تضايقت كلش من وجود رونق...
تتقصد توكف قريبه من عمار...

كعد شويه عمار يمنه ...
وبعدين كام طلع...
انتبهت على رونق وره دقايق سحبت روحها وطلعت وراه...

اشرت لعلياء...
واجتي...
ها تاره شتريدين حبيبتي...

حبي علياء كولي لعمار يصعد يجيبلي العطر مالتي ...
احس عطري خف...

راحت علياء..
الظاهر كلتله وصعد لان رونق راسا رجعت دخلت للاستقبال يمنه...

اني كمت اغلي ...
وبلا شعور كمت ...

ام مروان...
ها تاره وين كايمه....
هسه اجي ادخل حمام وارجع...

صعدت للمشتمل مالي بسرعه..
و من دادخل صار بوجهي عمار ...

ها توتو شصعدج...
دفعته جوه..
وسديت الباب...

وحطيت اصبعي بوجهة وحمرت عيوني...
اذا اشوفك تحجي ويه بنيه غيري ...
لو تضحك....
متلوم الا نفسك...

جر اصبعي وعضه...
يمه بزونتي صايره تخربش ...
خوفتيني...ههههه

يمه فدوه للغيره...
شنو صار ..خلاج تصعديلي مكبرته تكبرت وصايره نار...

تاره.....
كمت احجي وانفعلت...
هاي شنو رونق ابد مرتاحيتلها ..
انتبهت عليها تتلزك بيك ...
والمكان الي انت بي تركض عليه...
والله اخر شي راح اسحلها بنص البيت...
واخلي الي ميشتري يتفرج عليها...

عمار...
صايره نار وتحجي اشكال الوان...
ظليت مصدوم هالبزونه شلون طالع صوتها...
بصراحة حبيت غيرتها...

اريدها تسكت ماكو...
امتصيت غضبها بوسه وراسا سكتت....

ها هديتي هسه...
مجنونتي....

واخيرا طفيتج ....
جنج خلاط كهربائي مال طماطه....
دو دو دو مستمره بدون توقف...

تاره...
هاي شسويت ..والله صخنت ...
تستاهلين ...
تعال  نزلني...

بالاول طبي عدلي حمرتج ..
وبعدين انزلج....
خجلت منه...

عدلت نفسي ونزلت....
وهو خليته ينزلني ...
وكتله ممنوع تنزل جوه بعد...

سمع كلامي و بقى كاعد فوك..

نزلت ...
انتبهت على رونق حايصه ...
رايحه جايه من الصاله للمطبخ...
وعيونها تدور شي ..
اكيد تدور على  عمار...

كملت الحفله وجانت حلوه كلش...
لو مو رونق الشر...

وراها كلمن راح لبيته...
بدلت بسرعه ونزلت  ....
وساعدت البنات ورتبنا البيت...

كاعدين كلنا مجموعين ...
جنت واكفه اشرب مي من البراد ....
و حجه ويايه عموري....

بزونتي والله مشتهي كاستر...
سويلنه من ايدج الحلوه وحطي عليه مبروش خشن..
اي حبيبي ادلل هسه اسوي...

سعاد....
شو النوبة بزونتي ...
من كلنا فاره زعلتوا ومعجبكم ....

يمه شجاب الفاره على البزون....
حبيبتي تخبل جنها بزونه واهم شي تخرمش....

تاره....
ضحكت على سوالفه وبسماره ...

سعاد....
اني اسويلك الكاستر مو فد نمونه ترى..

عمار...
لا يمه لتعبين نفسج...
توتو تسوي كاستر غير شكل ...

يعني شنو غير شكل بالله علمني...
هي تسوي باللحم واحنه ناشف...

من انخلقنا للدنيا...
الكاستر مي وشكر ونشا وحليب...

عمار...
هسه تسويلجياه على طريقتها واحكمي عليه...

تاره..
كامت ندى جهزتلي المواد واني سويت الكاستر...
اول شي قدمت لعمتي...
اكلت وكملت الماعون مالتها كله ...

كلهم عجبهم ...

علياء...
عاشت ايدج والله غير شكل ...
عبالك طعمه موطا على كريم ...
شوفي حتى الجهال شلون حبوا...

عوافي حبيبتي هاي القشطه تنطي نكهة وقوام طيب...

جنت منتظره خاله تنطيني رأيها...
اكلت وسكتت ...

عمار...
ها سعوده بشرفج شلونه مو يخبل...
شخبصتنه اليكول طابخة باجه....
ترى عادي كلش ..
حتى حسيته يريد حلاة وثخن...

هاي عادي وطيرتي الماعون ...
لو طيب شلون ...

ولك تحسب عليه اللكمه ارعن...
لا يمه هني ومري حبيبه...

ثاني يوم...
صاحتني خاله لغرفتها...

نعم خاله...
عيني تاره...
كلج عمار اني اشتريتلكم كاونتر السنك والكاونتر التعليك فوك...

اي خاله كلي وعاشت ايدج عليه....

وايدج عيني...
جانت هاي هدية عرسكم مني...

تسلمين خاله....
والبارحه من انطوج الذهب والهدايا ....
نزعتلج المحبس مالتي ولبسته الج....
وهذا محبس امي الله يرحمها...
الله يرحمها خاله....

اي خاله...
شنو اي خاله ...مفهمتي قصدي...

تاره...
بقيت ساكته...
يعني انزعي المحبس ورجعي الي...

نزعتا وانطيتهيا واني مصدومه...

سعاد...
هاهي رد الحك لا صحابه ...
روحي انتي ....

كتله بوقتها لعمار....
وكلي...
هاي سعوده ...
وياما راح تشوفين العجب من سوالفها....

سافرنا للشمال ويه كروب....
مقبل عمار نروح بسيارتنه...
حتى ليتقيد بالسياقه..
احلى اوقات وايام قضيناها هناك..
لو مو خاله يمكن 70 مره تخابر ...
وينكم وشدتسوون وشوكت تجون...

رجعنا...واشترينالهم هدايه للكل...
خاله جابلها عمار محبس ابو الليره...

فتنا سلمنه وفرحوا بشوفتنا.
بس خاله ماكوا...
كالوا بغرفتها....

اخذني عموري ورحنا نسلم عليها....

هلا يمه شلونج حبيبه مشتاقين...
هلا بيكم نورتوا البيت..

تاره...
استغربت شنو هالاخلاق....

انطيتها المحبس وطار عقلها...
خاله عدها طمع ومصلحجيه...
حضنتني وباستني ...

حتى عمار بقى مصدوم...

عمار...
ها يوم مبين مشتريه شاشه ومحوله كعدتج هنا...

شسوي تعبانه وعاجبني اتفرج واني مدده..

تستاهلين حبيبه بالعافيه..

هسه اشوف بيش صارت على الولد حتى اشارك وياهم.....

لا عموري هاي بلاش...
منيلج بلاش...
مالتكم جبتها من الصاله فوك...

كلت عدكم اثنين شدعوه...اخذ ما الصالة ...
و زايده عليكم مال الغرفه..

تاره....
كمت اغلي ...تندمت لو ادري مناطيها المحبس..

اترخصت وصعدت...
لحكني عمار...

تاره اني اعتذر عن تصرف امي...
والله اني هم اتفاجأت مثلج...

كمت ابجي ...
كتله عموري مو عازتها عليها والله...
بس هاي هدية بابا ...

شافني انقهرت...
وكلي راح انزللها شاشة الغرفه واني بعدين اخذلنه وحده....

عمار....
نزلت على امي....اوف منها ومن دكايكها....

بدلتلها الشاشه ....
معجبها لان هاي اصغر....
ظلت تدردم وتسمم بالحجي....
بقت مطنكره يومين وبعدين فكت.....

مرت ايام وعدت ...
جانت كلها عزايم ...
اول عزيمه جانت عزيمة اهلي....
رحنه اني وعموري وخاله والولد والبنات...
لان اهلي عزموهم....

وبعدين بدوا خوالهم وخالاتهم وعمام عمار....
واخر عزيمه...
عزمونه  بيت عمه ابو رونق....

تارة...
عموري اني ما اروح لبيت عمك...
ما احب بنتهم وما اطيقها احسها ابد مو راحه...

عيب حبيبتي والله زحمه منروح ...
احنه شعلينا بيها احنه رايحين لخاطر عمي...

اي وهي مو راح تكون موجوده...
توتو حبيبي شيلي هالتكهنات من دماغج...

حتى لو هي عدها شي اتجاهي...
لازم انتي تكونين واثقة من حبي الج ..

لج الكمر بين ايدي واباوع على النجوم...
قشمرني بلسانك ابو لسان...

راح اروح وياكم بس حتى ما احرجك...
عفيه حبيبتي ...التسمع كلامي...

تعالي ...
ما ما..... ما اجي...
تعالي بزونه...
شتريد ...
تعالي العبي بشعري ونيميني....
عبالي....

لبست اني وعموري اثنينه نفس اللون...
اني لبست تنوره ميدي بيج وقميص ماروني قصير ...
وشعري رتبته...

وعمورتي لبس بنطلون بيج وتيشيرت ماروني وياخته بيج يخبل طالع...

وصلنه لبيت عمه وجنت على اعصابي...
استقبلونه عمه ومرت عمه كلش حبابين...
همه عدهم بس رونق و ولد مثنى و متزوج...

علا مرت مثنى مبينه حبابه  وتجامل...

كاعدين و وره شويه اجتي رونق ...
سلمت علينا وكعدت ...

انتبهت على عموري ملتهي بالحجي ويه عمه...
وابد ميدير وجهه على جهتها...
حتى ما اضوج...

ام مثنى...
رونوقه جتها مشيه ونطيناها...

تاره...
اوف حسيت مي بارد نزل على صدري...

سعاد....
يااا بيها الخير...
شو محد سمع ...
مو المفروض ولد عمها عدهم علم...

ام مثنى...
والله صارت بسرعه...
على عيني وراسي ولد عمها...
بس كلهم متزوجين ...
لو بيهم احد بعده ولد جان انطيناكم خبر .....

سعاد....
اخ اخ بحسره...

ولاتهونين ام احمد....

سعاد....
شنسوي ما النا بالطيب نصيب....

تاره...
انقهرت من سالفة خالتي العوجه...

ندى...
لتضوجين تاره ...عمتي مقصدتج انتي ...
ذبت السالفه تقصد الكل بيها...

علياء...
نصيحه حبيبتي حتى تعيشين مرتاحه ويه رجلج....
سمعي وطنشي...
لان عمتي يرادلها كلب شكبره..

عادي بدي اتعود...

ام مثنى....
الولد اخو صديقتها وشافها وخطبها....
همه خوش ناس....

انتي وجناينج معزومين الخميس الجاي على المهر ....
راح يسووا بقاعه...

سعاد....
اي بيها الخير وبالتمام ان شاءالله...

تاره...
كلنا باركنالها...

بس عليها عين صلفه ...
عيونها متنزل من عمار...
مصدكت طلعنا منهم...
ورحنا للبيت مفتحت حجي ويه عمار حتى لا اشغل باله بيها من اذكرها....

وره كم يوم...
عموري اني ضايجه وعاجبني نتعشى بره....

اي حبيبي عادي...
اليوم ارجع من المحل بوكت ونروح....

بيش ساعه تجي...
ساعه 7 الكاج متحضره بس اخذ دوش سريع ونطلع....

تاره...
راح عمار للشغل ...
واني نظفت بيتي ونزلت...

ما اطبخ كلشي فوك...
لان عمار ميقبل ...يكول ميحلالي الاكل الا ويه لمة اهلي...

بس فوك اسوي جاي او نسكافه ...
مرات يشتهيها بالليل عموري...

اني صار عليه المواعين والاخشاب ومرات اسويلهم حلويات...
وندى عليها الطبخ ....
وعلياء عليها التنظيف والطرمه....

خاله كاعدتلنه بالمطبخ...
مراقب عمل ...

ترزل هوايه بندى وعلياء ...
وتغلط وتسب بجهالهم...
بس اني لا وبالذات كدام عمار لان يخجلها....

تغدينه وصعدت لغرفتي ...
نمت شويه ومن كعدت بديت اتحضر ...
قبل 7 طب عموري ...

هلو توتو...
هلو حبيبي ...
تعالي نامي بحضني وانسي الطلعه...

لا حباب والله عاجبني كلش اتعشى وياك....
ديله حبيبتي اسبح واطلع ...

اوك...

كملنا ونزلنا ...
عمار...
لتسوون عشى بنات ...
راح اجيبلكم عشى من بره ويانه...

سعاد....
وين العزم ان شاءالله...
ماما طالعين نتعشى بره ...
محتاجه شي...
لا ...شكرا...

يله تاره طلعي ...مع السلامه...

تاره...
طلعنه باب المطبخ من بره وصاحت خاله على عمار...

عمار...عمار.
اي يوم....
روحي توته اصعدي بالسياره...

تاره...
بقيت واكفه انتظره مصعدت...

سعاد...
مستحيت على طولك ..
مشيها لمرتك مفرعه هيج...
ناقص غيره انت...

شبيج يوم مو لبسها مستور...
وشنو الفايده ...شعرها منثور...

تاره...
سمعت الحجي وتقدمت بالمشي....
طلع عمار وركبنا بالسياره وطلعنا...

عموري نزلني على محل ملابس نسائيه...
ليش تاره مو اتفقنا نروح نتعشى...
اي حبيبي ...
بس عجبني اخذ هدايه لخاله والبنات...

نزلنه طبيت بمحل شالات ...
اختاريت شال وعطر لخاله...
وعلياء وندى كلمن شال....

واني اختاريت مجموعه شالات...
هاي المن تاره...
الي عموري راح اتحجب...

عمار...
سمعتي كلام امي لازم...
اسف حبيبتي خاف غثج...

لا عموري خاله كلامها صحيح...
واصلا هالموضوع صار فتره ...
اكلب بي بدماغي...
وهسه صار وقته...

عمار....
عفيه عليج والله تملكين عقل وكلب ماكو منه اثنين...

تاره...
راح الوقت وضاع العشى...
اخذنه عشى سفري ورحنه تعشينا سوه بالبيت...

من سمعت خاله ...فرحت
وهذا الشي فرحني..

صار موعد ولادة علياء...
البيت كله دخل انذار ...

جابت بنوته تشبه الملاك ...
سموها مريم ...
تعجبت على خاله شلون تداري الجنه من تجيب...
وتهتم بااكلها ومتقبل الاتوكلها معلاك ...
تكول المره يخلص دمها بالولاده ولازم يتعوض...
علياء اسبوع وهي تنام بغرفه خاله....

بالمختصر انسانه ثانيه..
الله يهديها تبقى هيج طول الوقت....

مرت فتره على زواجنا اكثر من سنه...
مريت بهوايه مواقف محرجه ...
وبدت تساؤلات الناس...
وبالذات خاله ...
اشو محبلتي ليش تأخرتي لسه ...

دائما كنت اتهرب من الجواب...
لو عمار يجاوب عني...
ويكوللهم بعدنا عرسان ...خلي نتونس...
لاحكين على شلعان الكلب....

فد يوم كاعدين اني وخاله والبنات ...
عمار جان بالمحل....

سعاد....
كومي بدلي تاره حجزتلج يم الدكتوره...
حتى اخذج تفحصج...

يتبع....
للحكايه بقيه...
اوقات ممتعه وتصبحون على خير

#الكاتبه
#همسات_الليل(ام آيه)