حين يزهر الحجر

٢٣

مساء الخير

حين يزهر الحجر
الجزء ٢٣

جاوبه عمي ..مامجبور بوية تتحمل وتشيل اغلاط غيرك...
حجه شجاع بهدوء..
لا عمي لا مامجبور..اصلا اني خطبت كريمتكم قبل واكثر من مرة..
بس انرفضت...
اكطع جوابك بالخير وليدي ..
بس بوية عاطف...
ترفض هالزلمة الخير..وتنطي هالغريب الدك الناقصة بينا...
بلة كلي انت وين سائل عنه وسويته النا نبي ؟؟
عمي كلفت براق يسال وكال خوش انسان ومامتزوج...
هسه صدمني من يكلي خابروني ومرتي خطرة وحامل...
راح انجلط عمي من دكته الناقصة..
واني المعطل مهرة وماانطيتها وقنعتها تاخذه..
تالي يستصغرنا بهالطريقة ياحيف بس...

ماعاش اليصغركم ابو فؤاد..
بس انكشف كدامكم هسه ولا تتورطون بي ويسوي الاكبر منها...
استاذ شجاع وجهي اسود منك اني...
ماتعرف شكد مستحي منك..يمكن حوبتك هاي وحطت فيصل بدربنا...
لا ابو فؤاد احنا اهل انشالله ومابيناتنا هالحجي...
انشالله اهل والنعم منكم ونتشرف...
بس اخذ راي البنية واجي..
تعرف بعد مو هينة عليها الصار ...
اخذ راحتك ابو فؤاد...

اجاني عاطف واني كاعدة بين امي واخواتي ورحاب وصبا ومحتارات وشكلهم مقهور...
ورحاب كل شوية تكلهم يولي يروحلها فدوة..
الله خلصها منه مدامه متزوجة...
زهرة الفطيرة كوة ساكته...
كال عاطف...
مهرة استاذ شجاع كال اذا تقبلون هسه اعقد عليها...
تقبلين؟؟؟
قبل لا اجاوب امي وكفت..
موافقة هو المثل شجاع ينرفض غير انت الشيطان نايم براسك جان...
كومن نحضرها حتى تعقد كومن...
اباوع للبنات انخبصو والوجوه فرحانة...

اما اني قلبي يدك حيل حيل حيل....
شنو من شعور بداخلي صار..انطوني مفتاح فرحتي..
وكلولي فتحي الباب ..
طايرة طايرة ماعرف شسوي من الفرحة...
بقى الشيخ يردد وجاوبته نعم..
بوقتها تذكرت عقدنا بالمكتب..
ماعرف هسه شنو الحكم من عقدلي مرة ثانية...
بس اكيد شجاع متفوته هالامور...

ورا شوية كال عاطف سوو طريق راح يدخل شجاع...
البنات وامي فاتو واني كاعدة واحساس مختلط...
زعلانة منه وفرحانة هواي...
ماريده يشوف فرحتي ويتوقع مسامحته...
من دخل للصالة واني واكفة..
كال استريحي...
عاطف كله تفضل اخذ راحتك...
راح عاطف ياخذ الضيافة للزلم وهو كعد يمي والباب مفتوح...
مد ايده بجيب سترته وطلعلي حلقة تون المحبس مالتها بي ازرق شذر..
والحلقة عريضة والالماسة مالتها شفافة تبرق...
شوفي عجبتج لو ابدلها ..؟
حجاها بصوت ناصي...

اني بقيت اتلفت..
اخاف احد يجي ويشوفها شيكول متفقين ...
شجاع شنو هذا ضمها لا ننفضح...
هسه شجايبلج حشيش وننفضح كولي حلوة؟؟؟
اييي تخبل ..
ماشي حبيبي بالعافية..
رجعها بالعلبة وشمرها بحضني...
وباوعلي وعض شفته...
اني درت وجهي هو كام....
اني كمت ولازمتها بيدي اخاف احد يشوفها....
يلا راح ارجع يم الزلم بعدين نتخابر ماشي؟
اي ...

راح واني رجعت للغرفة وضامة العلبة بملابسي...
ورا شوية راحو..
وعمامي هم وراهم بشوية راحو...
بس عاطف ضايج من الموقف الصار ..
وكلشي ماحجه بس فات لغرفته وماطلع...
اجيت اسال عاطف شلون مكلف براق يسال..
استغربت ودخت بالسالفة...
وهم براق مادح فيصل كدامه يعني شالني من راسه...
ماعرف اكو لغز ورا هالسالفة...

امي باركتلي وحضنتني...
اني حضنتها وبقيت ابجي...
من اتذكر تصرفها شلون كامت وكالت لعاطف خل تعقد...
احسها رادتها فرصة وخافت من عاطف يغير رايه لو يتحجج....
بس الحمدلله من تمت الامور بخير...
اخواتي رجعو لبيوتهم..
واني رحت للغرفة ..
اجيت لفراشي ورا شوية خابرني...

جاوبته وبقى يباركلي ويتغزل..
كتله نعسانة وتعبانة...
من شوكت تكولين تعبانة وانت قبل تغفين ويوكع الفون من ايدج وتحاجيني...
شجاع الافضل مانحجي لان كلش مااضمن نفسي يجوز انهي كلشي....
اكلج باوعيلي شوي ..انت كل ماحجيتي وكلتي ننهي...
يعني هذا طيحان الحظ السويته كله..
من موقف صغير تكتلين فرحتنا الجبيرة ليش؟؟؟؟
انت سويت لمصلحتك مو الي...
اها لمصلحتي ؟؟
لج مصلحتي ومصلحتج واحد..ومايهمني شنو صار او شنو الطريقة...
المهم ضمنتج الي كدام الناس وخصوصا كدام اهلج...

مهرة محد يحبج بكدي..تشوفين اخوج مو هو رباج..
دز المخنث يسال حتى ماكلف نفسه وسال...
ومن فيصل غدرهم وخابره حتى ماكلف نفسه يهد ولو بالجذب...
البرود العنده يدل ع انه يريد يزوجح ويخلص من مسؤوليتج...
وعمامج مثل الاغراب وحاضرين خطبة عادية مو بت اخوهم...
يعني لو غيرهم واحد ماكلبها للكاع وجاب فيصل...
هم اكتفو بصار عنده ظرف وبين معدنه...
وبحجة غريب ومايتحصله قرار وخلي هو وربه ويتجازى...
هي صح تمثيلية وكلها لصالحي..،
بس اني احترك گلبي وانغثيت...
واذا جنت رايدج قبل مرة ..
هسه اريدج الف مرة بس حتى تصيرين مسؤوليتي وبلا منية احد...

هو يحجي واني صافنة بكلامه كله صح...
بس ماريد اكله صح اريد اعذبه اريده يمل من تجاهلي اله....
ورثله جكارة وسحب نفس...
تبقين ساكتة؟؟
شوكت تحنين بلة ؟
شجاع نعسانة رح انام....
اخذي راحتج....سد الخط واني هم نمت ...
ماريد افكر بشي بعد تعبت تعبببببت....

اتفقنا هالاسبوع مااداوم...
لان تحضيرات لحفلة الخطوبة ..
اني ورحاب وامي وزهرة كل يوم نطلع ع مود التجهيز والحجوزات...
طلب مني اسوي شعري احمر...
لان اني قبل صابغته احمر بعرس زهرة بس راح ...
سويته احمر وكتله اصلا مقررة قبل لتكول يعني مو ع مودك ....
كلش جافيته بهالايام الي المفروض تكون فرحتنا غير...
بس اني جنت قافلة كلش...
حتى من يخابرني احجي ويا كلمتين ومن ورا خشمي...
وبالليل اكله تعبانة تريد ابقي الخط مفتوح وانام؟
يكلي لا سدي ماله داعي بعد....

ورا ١٢ يوم صارت حفلة خطوبتنا...
شكد مافرحانة والدنيا ماواسعتني..
بس بنفس الوقت ضايجة ومقهورة...
هو ميحاول يبين غلطه او يعترف بي...
واني اريد اتوبه من ارغامي ع الامور ومعاملتي مثل الطفل ...
بس هذا ميمنع الفرحة البداخلي ...
احس حتى قلبي مبتسم...
كملتلي ام الصالون وساعدوني رحاب وزهرة بالبدلة....
لبستها واخر شي باوعت لنفسي بالمراية واضحك بداخلي...
اكيد هسه شجاع يبجي من الاغراء ههه....
ورا شوية خابر حسين واخذنا للقاعة...
فتت والبنات زهرة ورحاب شايلات البدلة وراي....
وصوت الهلاهل يرن باذني....

*****************************************

واني اباوعله شلون نايم وحاجبه معقود واشهك بالبجي...
اكعد شجاع اكعد ..جاي تشوف الهلاهل النا ...
فرحانين بينا ويهلهلون ..شلون تنام اكعد....
طحت بالارض وبقيت ابجي بحرگة ووجع...
شالوني بالكوة وعلكولي مغذي وشوي مهدأ وسكنت...
بعدها كال عاطف امشي ارتاحي وباجر اني اجيبج اله بس ترتاحين.،..

رجعنا للبيت بعد ماكلت لارفد طمني عنه شنو يصير كلي احلفك بداعة جعفر...
اباوعله وجهه تعبان والخوف ماخذ منه مأخذ....
زاد خوفي ع شجاع من شفته..
بس مالي غير الصبر والدعاء...
رجعنا وكبل نمت لان نعسانة ودايخة ...
فزيت بالاربعة مرعوبة...
فتحت الفون وابجي..
لكيت مكالمات من ارفد ورحاب وزهرة وورد...
خابرت ع ارفد بسرعة...
دك هواي يلا جاوب..

امبين كان نايم...
هلا ابو جعفر اعذرني كعدتك..
حجيتها بعبرة مخنوكة...
لا لا خيتي هو اني كلساع انام واكعد...
الله يساعدك..شخباره طمني فدوة ...
تنهد وكال..
الحمدلله على كل حال..
نفس وضعه ماكو تغيير...
بجيت وكوة كاتمة بجيتي بس بينت شهكاتي...
كولي يالله وادعيله...
اني گلبي بارد وادري بي راح يكوم منها...
وعيونج شجاع قوي واكيد من يكعد يضحك علينا لان خايفين...
انشالله يكعد انشالله..حجيتها واني امسح بدموعي..
اعذرني فززتك بس امانة امنتك اقل شي يصير كلي لا تحرگ قلبي...
انشالله مايصير الا الخير.....

سديته منه وكمت توضيت وكعدت ادعي واسبح واقرا....
طلع الصبح واني ع نفس كعدتي ...
تمددت ع السجادة وبقيت اسبح وادعي...
دعيت الانبياء والائمة وطلبت منهم الشفاعة...
اول مرة اطلب منهم هالكد بحيث استحيت كد مادعيت..
وكلت بس يطيب اخلي ياخذني وازور....
بقيت لحد الساعة بتسعة واني ع نفس وضعي متحركت...
غفيت ثواني يعني شبه غفوة..
حسيت قطرات ماي طاحت عليه..
فزيت اتلمس وجهي ناشف...
تعوذت من الشيطان وكمت...

امي طالعه تجيب مسواك وعاطف بالدوام...
صبا بالمطبخ كالت هسه نيتي اجي اتطمن عليج...
شلون صرتي...
هزيت راسي..الحمدلله....
جابت الصينية وكعدت كوة اكلت لكمتين...
واخذت الجاي شربته...
كاعدة وبس اصفن...
تحاجيني صبا واني ولا يمها...
فانت امي حجت وياي وتطمن بية...
تمددت وخليت راسي بحضنها...
وهي تمسح بشعري وتدعي وتسولف...
غفيت بحضنها...

كعدت وي صلاة الظهر ..
لكيت امي مخلية مخدة جوا راسي..
وهي متمددة يمي...
كمت صليت ودعيت...
خابرتني رحاب شوية حجت وياي..
لحد العصر طلعت للطارمة ...
نزلت دعاء من الكوكل وكعدت اقرا ...
دك فوني ارفد...
اريد اجاوب ماكدر...
بقى يدك يدك ..
قبل ليفصل جاوبت...
اجاني صوته...

مهرة قرت عينج خوية رجلج كعد ووضعه زين...
ياااارب لك الحمد ..بقيت احمد ربي واضحك وابجي بصوت عالي....
كتله هسه اخلي عاطف يجيبني...
وسديته منه وفتت ركض...
امي لاكتني تركض لان سمعت صوتي...
شبكتها وابوس بيها...
كعد كعد يمه الغالي كعد...
نزلت دموعها وتدعي بفرح..
الله يحفظه الج يمه ويبعد عنكم شر بني ادم..
روحي لبسي روحي بسرعة...
اني رايحة اكل لاخوج ياخذنا...

ركضت للغرفة لبست وطلعت...
لكيت امي تلبس بجواريبها..
هايمه كتيله وينه؟
اي يمه صبري بس يسبح بسرعة ويجي...
استغفر الله وكته هسه خليها من يرجع ،.
قلبي طك اريد اتطمن عليه بس...
ولج مهرة ام دميعة شهرتينا ركدي...
ضحكت ورحت للغرفة اباوع بالمراية...
عيوني منفخات كلش شكلي يضحك...
شوي وصاحت عليه امي...

اخذنا عاطف واني طول الطريق بس اريد اوصل...
احس الطريق صار طوييييل...
دك فوني فزيت..
باوعت لكيتها صبا..
ها صبا ..
اكلج عاطف ناسي فونة بالبيت...
وهسه خابره اخو تماضر مرتين...
ومرة الثالثة دز رسالة...
يكول ثريا مريضة خل يجي ابوها...
ها هسه اكله اوكي..
الله وياج....

سديته منها وكلت لعاطف..
انخبص وبقى يسوق حيل...
كال اذبكم يمهم وارجع..
امي كلتله روح يما احنا نرجع بس دربالك من الذريق...

واخيراً وصلنا للمستشفى يااابه متت ...
خابرت ارفد واجه اخذنا...
واحنا بالمصعد يسولف ويضحك...
من علاماته تطمنت شجاع بخير...
وصلنا والغرفة بيها رياجيل...
اني وامي وكفنا ع جهة...
كال ارفد اسويلكم طريق واجي...
ورا شوية كال يلا تعالو...
امي كالت روحي واني اجي وراج...
حسيتها تريدني اخذ راحتي فدوة لعمرها ...
فتحلي ارفد الباب وكال اني باقي يم الحجية...

دخلت واني اباوعله نايم ع السرير ومرفوع من جهة الراس...
صدره ملفوف ووجهه تعبان ...
دموعي سبقت خطواتي وهي تنزل للارض وتركضله...
هاي طيحته بينتلي شكد غالي عندي وماكدر افرط بي....
اباوعله صافن عليه وعقد حاجبه...
تقربت ولزمت ايده اليمنى ...
حبيب عمري الحمدلله ع سلامتك..
باوع بوجهي كال معرفتج انت منو...؟

للحكاية بقية
بقلم شقراء(قمر كانون)