مساء الخير
حين يزهر الحجر
الجزء ٢٢
استغربت طلعة وسام وارفد ثنينهم ..
ارفد اذا شجاع مسافر مستحيل يطلع..
ووسام اذا هم ماموجودين هو يكون متكفل كلشي...
بقى قلب يلعب...
سالت الولد كالو مانعرف منين الاتصال ..بس شي ضروري وراحو...
خابرني حيدر كالت وصلت...
طلعت واني القلق ماكلني..
شجاع اخابر عليه مغلق!!!
رحاب اي رحاب ...خل اخابرها بلكي تعرف شي...
خابرت ..مرتين ماجاوبت...
ناوين تخبلوني اليوم شصاير دخيلك ربي...
وصلت للبيت وتلكتني امي من شافتني مخبوصة...
حجيتلها كالت ذكري ربج انشالله خير....
صبا جابتلي ماي وكعدت يمي تسولف ...
بس اني ماعرف شصاير بحالي ..
هالشعور اعرفة كلش زين...
من قلبي ينعصر واحس برودة ببطني وغصة بحنجرتي..
اتأكد ورا هالاحساس شي مو طبيعي...
بقيت الوب لا اكدر اكل ولا اكدر اكعد...
وكل الاخابره ميجاوب وشجاع مغلق...
قبل صلاة المغرب خابرتني رحاب...
ايدي ترجف بس اريد اجاوب كوة جاوبت...
ولج وينج من الصبح لهسه اني ادك متي خو مامتي؟؟؟حجيتها بعيطه وقهر...
شبيج ولج اهدي كولي ياالله...
والنعم بالله..بس ليش متجاوبين رجلج وينه يمج انطينياه...
بالاول خليني افهم منج مهرة كافي صياح هدي نفسج يمعودة رح تموتين...
هديت بس انطيني ارفد احاجي عن شجاع ترى دمي نشف...حجيتها بتعب...
شجاع ميجاوب رحاب من طلع لهسه ماكو...
مهرة لزمي اعصابج بس...
شجاع من رجع من الشركة حتى ياخذ اغراضه من البيت..
اييي شبيي حجيت بعبرة مخنوكة...
يمنا صايرة عركة وبنزلته من السيارة اجتله طلقة بصدره..حجتها بصوت مختنك...
لطمت خدي ونزلت دموعي...
احلفج بالله احجي عايش مو عااايش!!!
اي اي سووله العملية بس وضعه صعب شوية..حجتها وبجت...
ولج وينه هسه بيا مستشفى وليش ماكتيلي لييييش....بقيت ابجي بصوت عالي واناشغ...
ع صوتي اجو امي وصبا يركضون...
اخذت صبا الفون مني وحاجت رحاب وسدته...
امي تحاجيني تريد تفهم مني..
بس اني فقدت ذبيت نفسي بحضنها وابجي واكلها شجاع راح...
صبا حضنتني واني بحضن امي ..
قو روحج مهرة لا تفاولين ع الرجال..
وامي دموعها تصب وتكلها شبي صبا يمه احجي شبي شجاع...
مصوب بطلقة طايشة وهسه بالمستشفى...
راحت فتحت كنتوري وتطلعلي عباية...
امي تحاجيها شلونه يما شكالت عنه رحاب..
يمه زين زين بس خل نحضرها حتى ياخذها عاطف للمستشفى...
جابتلي العباية امي ساعدتني البس وهي راحت صاحت لعاطف...
اجاني يهدي بيه ويصبرني..
اخذني هو وامي..رحنا للمستشفى...
طول الطريق عيوني تصب وادعي...
وصلنا وماقبلو نفوت..
عاطف خابر ارفد من فوني ونزل...
اول ماشفته من بعد ما سلم ع امي وعاطف...
كتله من بين دموعي وصوتي كوة يطلع..
فدوة شلونه ارفد شلونه شجاع...
لا تخافين انشالله زين ادعيله بس...
اريد اشوفه الله يخليك..
ممنوع الزيارة ابد مايصير...
ميخالف خليني اجرب عفية...
صعدنا وشفت اخوانه مؤيد وساجد موجودين ..
واني بس دموعي تصب بحيث احس راسي صار شكبره...
راح ارفد حاجه الدكتور وبالكوة قبلو..
اجه ويا وكال دقيقة وحده مو اكثر...
بس انفتح الباب وشفته...
انفجعت بمنظره صفنت ودموعي تصب...
حبيبي..شجاع ..اكعد اجتك مهرتك...
صفنت عليه وانهاريت بالبجي...
تذكرت من عذبته وشكد اعتذرلي وشكد حاول وياي واني راكبة واسي....
تذكرت بيوم الاجه فيصل خطبني....
****************************************
واكفة واسمع عاطف وفيصل شلون منسجمين ويولفون...
هنا حسين اقتربت من بداية خسارتي لشجاع ونهائياً...
من بعد ماطلع فيصل صاحلي عاطف وحاجاني...
كال ..
مهرة الرجال شايفج بالشركة وعاجبته اخلاقج وكلش امبين شاريج...
عايش بدبي وعنده خير من الله ومن هسه كال فيلا باسمج..
ويعادل وزنج ذهب لو طلبتي...
وها ترى اني كتله مديرها خطبها وماقبلنا...
حتى لا نتباهى كدامه احنا نسبنا زين ومو بس هو الزنكين وخطبج وحتى ما يتعزز علينا...
بقيت مصفنة بوجه عاطف ..شجاوبه هسه!
شكله ؟اكله لا..يريد تبرير...اكله اي؟؟لا طبعا مستحيل....
قبل لا انطق كال..
ابد لا تجاوبين شي...
فكري كلش زين...
هيج قسمة لو تنامين وتحلمين ماتجي...
صح هو جبير بس قسمة تسوى...
فكري عدل وماريد رفض بوية ترى هالمرة نضطر نجبرج...
لان احنا اعرف بمصلحتج....
كام واني بقيت بحيرتي...
هسه شسوي؟اكول لشجاع كلشي احسن...
انتظرت هدا الوضع وخابرت شجاع...
بلا مااسلم او ابدي كتله ..
شجاع فيصل اجه خطبني اليوم...
شنو؟؟؟؟فيصيل فيصل؟؟؟
اي هو...
لا يا عار يا ابن ال**** ..
شجاع عوف العصبية ع جهة واسمعني عدل اي تصرف منك بعصبية..
يمكن تخسرني ...
ترى عاطف كلش انعجب بي وكال اذا اضطر اجبرج لان اني اعرف منج بمصلحتج....
زين زين يصير خير...
لا تردين لاخوج خبر هسه فاهمة؟؟؟
اي اوك ...
سديته منه وحايرة شراح يسوي....
يوم ثاني من داوت هو مموجود...
للظهر يلا اجه ...
ومن اجه دز عليه...
رحت للمكتب كال كعدي ...
خلينا نتفاهم وسمعي مني كل حرف احجي....
بس عكس ماضايج مستشبر واحسه متحمس للموضوع..
استغربت ردة فعله...
كعدت وبلش يحجي...
باوعي مهرة اليوم خابرني فيصل...
كال خطبت الموظفه العدكم الي اسمها فضة...
واخوها كال انت خاطبها قبلي...
وبصراحة ترددت وكلت اسالك من تذكرت رد فعلك من دخلت علينا...
ومن جبت سيرتها وضوجتك...
انتو بينكم شي ؟لو مجرد خطبة حتى مااتراجع....
كتله هذا موضوع معقد وينك انت اجيك....
رحتله للفندق وسولفتله عن كم مرة خطبتج واخوج رفض...
كتله بينا علاقة ورايدها...
ولو مااعرفه مااحجي بيج كدامه بس واثق وهم مجبور...
وهو كال راح اساعدكم ...حجاها وابتسم...
شلون يساعدنا؟يعني يحاجي عاطف ويكله ينطيني الك؟
اي كلش عاطف راح يقدمج ع طبق من ذهب الي...
هو عاطف ناطيج اله ومخلص!!
شلون يعني!!!!
كايلة مبداياً موافقين بس نشاور البنية فد يومين و
حتى نحدد الخطبة ...
صخااام تحجي صدك!!!
لا مو وضعي مال شقا...
باعي انت هسه مطلوب منج من يسالج اخوج كليله موافقة...
لطمت صدري وحجيت..شلون؟
مثل ماكتلج...
اخوج يرادله لوية اذن وجية فيصل صارت بصالحنا...
كال فيصل خلال هالاسبوع اخذ منه الجواب واحدد العقد...
وبيوم العقد يخربها...
ساعتها اخوج ينحط كدام الامر الوافع واني اعقد عليج بداله...
فاهمة؟؟
زين شلونزتجي انت بيومها؟
غير هو ماعنده احد هنا واحنا نوكفله...
بس هذا مو حل يعني شنو موقفي يتركني بيوم العقد!
باوعلي باستهزاء...
ها ست تردي يكمل عقد عليج؟اخاف نسيتي عاقد عليج سيد اني...
مو هيج بس كدام اقاربي ويشوفوه تركني بيومها..
لا لا لا اقاربج شنو ...
هو راح يتفق وي اخوج ..
مجرد عقد شيخ بحضورنا وحضور اخوج وعمامج...
ويوم ثاني يسوي حفلة بقاعة حتى اهاليكم كلها تعرف...
واذا صارت عشاير ومشاكل؟
عشايريش هو يسافر بعد وين يلكو...
وهسه كلش عشيرتكم مشرمتها دسكتي وسمعي ونفذي خلينا نرتاح...
زين واذا براق كال اني اعقد عليها من يشوفه دك الناقصة بية؟
مستحيل يعقد اصلا...
كلها كم يوم ويسافر....
شمدريك؟
صدفة عرفت...
كومي روحي هسه...
واليوم تردين الخبر لاخوج....
طلعت ومخي مشوش..امشي ًاحاجي نفسي....
شنو هالمغامرة الي حاطني بيها انت شجاع...
يعني خطة تخوف ومجازفة ومااعرف شنو العواقب...
صح اعرف شجاع مايتثرف شي اذا ماوازنه بعقله وضامن نتيجته...
بس هيج شي مجازفة ولعب بالنار....
يوم ثاني عاطف سالني ورديتله الجواب...
امي سالتني واكثر من مرة ..
كتلها ماجبرني بس فكرت بمصلحتي...
كالت اذا مجبورة احجي واخليها يلغي كلشي ..
صح ماانطاج للمدير بس مو معناها يجبرج....
نمت بحضنها وكتلها لا حبيبة بس ادعيلي يصير مثل مااريد.....
خابرني شجاع وحجيتله بالتطورات...
كال خلي الباقي علينا وخليج طبيعية لا يحس عليج...
زهرة ورحاب يشجعن بيه وكالن احسن حل تسوو...
بس اني ماعرف ليش مستثقلتها...
احسها شي صعب عليه...
خصوصا اني زعلانه من شجاع...
واريد اقسي عليه وابينله غلطه...
اجي انوب اشارك بهاي المسرحية..!
ولو اكذب ع نفسي اذا كلت اكدر ابتعد عنه...
بس اريده يعرف غلطه ومايلغي شخصيتي.....
بقى كل ميخابرني احجي كلمتين واسده...
قبل العقد بيوم...
عاطف خبر عمامي وكللهم يجون للعقد باجر...
وفيصل انطاه خبر...
حيجون ويا شجاع وارفد ووسام وساجد...
باعتبار اهله مو هنا....
بيومها بليل شجاع خابرني...
متمدد ع السريربس ع النص وملابس فانيلة..
بس ثوبي فارشه ع صدره....
باوعلي والجكارة بحلكه...
شلونها العروسه يحجي بلهجة حلوة ...
لان الجكارة بحلكه ومواضح كلامه بس ماعرف شبيه عجبني...
غلست ع سؤاله مجاوبت...
ذب الجكارة بالنفاضة وشم الثوب حيل...
يااابه شكد طيبة ريحته...
تذكرني بريحة فد وحدة بذات...
ع فكرة اريده ترى ياريت ترجعه..حجيت بجديه عود...
شبيج ماعدج هدوم وتردي...
بسيطة اختاري من ذني وباجر اجيب شكد متردين...
كام وفتح الكنتور وسفت مرتب الملابس الجابهم الي من سافر...
عزا قرب الكاميرا عليهن...
ثوب نوم وردي خفيف كلش طويل ..
جره كال اجيبلج هذا..
شجاع ممحتاجة ترى وعندي فلوس واشتري...
اها ماعجبج هذا مستور زيادة...
فتح الخانة وطلع تعلاكه بيها ثوب نوب ابيض بس قصير كلش ومشلتح يخزي يخزي....
كافي ماريد شي..اصلا ذوله مو الي...
لان اصلا مراح اتزوجك اني...
رجع كعد ورفع حاجب ...
جديدة هاي ما تتزوجيني انوب؟
لا مو جديدة...
كتلك قبل احنا منتراهم...
ممستعدة اشبع ذلة منك...
تلوي اذني مثل الجهال وتكفخ بيه ...
لان تدوسين بالبطن..
الشي الاحذرج منه تسوينه بعنادي...
وهذا الشي ينطيك الحق تذلني؟؟؟تمسح كرامتي بالارض؟
استغفر الله ولج شلون اذلج...
راح تخبليني ترى...
ماكو شي بين المرة ورجلها اسمه كرامة...
كرامتج من كرامتي...
مهرة تعرفيني من اتعصب افقد....
وانت ماتعترفين بغلطج....
لا لا لا صدك؟منو ميعترف بغلطه بله؟
شجاع من عرفتك لليوم...
ولا مرة معترف بغلطك وتكول صدك اني الغلطان....
لان دومج انت الغلطانة مو بس اني...
شفت ؟فريتها عليه...
وسويتني غلطانة...
اصلا انت متحبني..وكل الهامك جسمي...
كعد عدل وعقد حواجبه..
لا تخربطين مهرة لهنا وكافي فاهمة؟؟؟؟
مو كل متحجين وكلتي هامك جسمي...
اني لان احبج اريد راحتي منج ...
ومدام احبج معناها احب كلشي بيج ومنهم جسمج...
اني عمري مواصل للحرام ولو اريد اوصل واشبع نفسي...
وماكو رجال مايضعف بلحظة شيطان...
اني رجال ومجرب وعيشتي هسه تعتبر جهاد....
وهو فعلا جهاد..
لان ضبط النفس عن المصية جهاد هذا....
وجاي تشوفين وياج شلون اتفاعل واطلب..
بس ماطلبت اكثر ولا عبرت حدي....
مهرة احنا عاقدين وعقدنا صحيح وانت حلالي...
ومن جسيت نبضج بموضوع الفون وشفت نفورج كلت ميخالف...
مااجبرها وماريد..
بقيت ع صوتج ع انفاسج ارتاح واخلص نفسي من حاجتها...
وماريد احسسج بشي...
لعد والصار قبل فترة والسويته رغم عني شنو؟
حتى اعودج من هسه...
هذا الشي اريده..واريد كلشي وياج لان احبج...
مهرة اني اشوفج كنز واريد اتمتع بي براحتي...
بس انت تنظرين للامور بطريقة سطحية...
بقيت ساكته مجاوبته...
ورا شوي كال..
روحي نامي وراج كعدة باجر...
تصبحين ع خير....
يوم ثاني اجت زهرة وحسين وورد وزوجها وعمامي ورا الغدا اجو....
بس براق ماجاي وياهم...
البنات حضرو ضيافة واني متحضرة ..
جابتلي زهرة منها دراعة بيضة وشعري لفلفته من الاطراف ومكياج خفيف...
للساعة اربعة ونص...
اجو اهل شجاع وفيصل والشيخ وياهم...
وبدا الحجي الزين والمجاملات...
ورا شوية خابرو فيصل وترخص
طلع برا يجاوب...
ومن طلع بقو ينتظرو حتى يتم العقد...
وساعة ومارجع ..
يخابرو ميجاوب...
ععاطف يروح ويرجع...
لحد المغرب خابره عاطف جاوبه...
كله زوجتي حامل وصايرة عدها ولادة مبكرة...
هسه خابروني من دبي ومتخبل ..
لعد مو كلت مامتزوج !!!
اي حتى توافقون واعذرني هسه عائلتي اهم...
مشغول ورايح للسفارة اعذرني...
رحع عاطف مسطول....
شنو صاير يابة ابو فؤاد احجي كول....
حجالهم السالفة وشي صفنت بوجه شي....
اخر شي قطع الصمت شجاع وكال...
مدام الكل متجمع والشيخ حاضر...
اني طالب مهرة منكم ورايدها حلالي ...
وللحكاية بقية
بقلم شقراء(قمر كانون)