ابو عدوان

الثاني والعشرون

الثاني والعشرون

#ابو_عدوان

#مذاق _العشق

#بقلمي_نشوى_السلطان.

_ الله شاهد ماضگت حرمه بگفاچ
العارية بحلمي اردها مگبعه. 🖤

طلعت امشي الدنيا مغوربه... طبكت سياره ابو قصي ... صعدت سلمت عليهم وعيني على سيارتو بعدها طابكة يم زينه.... اهجس

نار بصدري ... شبت... ليش يربي شمسويه وهيج يعاملني... خليك يروكان مصيرك تتندم وتعرف الحقيقه..

شغل السياره وعبرت من جدام بابهم....بقيت ادحگ عالبيت
تمنيت المحة اشوفه... مشت السياره .. وطلعنا على عربنا

الطريق كله قصي بحضني.. تحاجيني نجمة..
بس بالي شااااارد بغير دنيا... صافنه واتذكر

شلوون جان ويايه وشلون صار..
اتذكر كل لحظة .. من شالني .. من اخذني بين اديه

من كال والله ماشفت الحب ولا عشته الا وياج...
اووويلي گلبي .. اوويلي عجل وينه ذاك الكلام

وينه .. طلع بس حجي.. الدنيا صارت ليل .. وصلت بيت اهلي
نزلت وبيدي علاكتي... وكفولي بسد الباب نزلت

وراحو لبيتهم... وكفت يم الباب... سحبت نفس يمه والله اهجس
صدري ثكيل.. شطلعني اني.. شلون عفته يمها...

دفعت الباب البره وفتت.. دحكت عالسمه وكلت يارب افرجها عليه
النوب عيوني مليانه دموع ماريد اهلي ينتبهون عليه... كطيت

العلاكة بالكاع ومسحت دموعي... وشلت علاكتي وطبيت
وصلت الطرمه البرده مفتوحة .. دحكت عالهول كاعدين اهلي

ملتمين عالصينيه... الله شكثر مشتاكة هالجمعه.. دكيت الباب ماسمعو رجعت دكيت شباج الهول.. جان تصيح امي ... منو

عالباب .. گوم يجابر شوف منهو عالباب
كتلها اني يمه اني العنود...

العنود.. شجابج هالحزة كومي يولي كومي افتحي الباب
تكلطت بسد الباب وجان تفتحة ضي...
كالت اي يمه العنود جايه بس وحدها .. تلكتني واخذت العلاكة مني

طبيت للهول.. امي كامت وكفت بوجهي كالت خير يالعنود ليش
جايه هالحزه خمو اكو شي..

ابتمست الها كتله شبيكم مصدومين جيت ويا نجمة وابو قصي
كال جابر هااا اي صحيح همه اليوم بتكريت لازم مرو عليج

كتلو اي جوي على تكريت وابو عدوان عدهم انذار
كتله اروح الأهلي احسن ماابقى وحدي.. وجيت
شبيكم جن محد فرحان بجيتي...

_ لا يبعد امج البيت نور كل الهلا بس والله خفت كلبي عصرني
شفت وجهج تعبان وزلمتج مو وياج كلت خاف صار شي لا سامح الله .. تعاي تكلطي تعشي تراج على اولها...

ماريد يمه الف عافية.. خل افوت اخلي غراضي وانزع عباتي
اخذت العلاكة من ضي اريد افوت ..

جان يصيح جابر.. العنود...

صديت عليه كتلو هلا خويه...

كال متأكده ابو عدوان عندو انذار...

صفنت عليه كتلو اي بدوامه... عفته وطبيت الغرفتي
ماردتهم ينتبهون على تفاصيل وجهي... ويحسون بيه

كطيت العلاكة بالكاع وتمددت بمكاني اريد انزع عباتي ماكدر
خليت راسي عالمخده... وتمدتت بعباتي حتى الشال مانزعته اهجس

جسمي كله يون..طبت ضي... كالت ها يالعنود يعني باقيه يمنه
جم يوم وتروحين..

دحكت عليها يربي مالي حيل اجامل.. كتلها الله كريم ماعرف شوكت ارجع... خل ينزل من دوامه واروح ...

_ يولي شهالعجز كومي كطي عباتج انزعي الشال اكو واحد ينام بيهن شبيج

عوفيني يولي تعبانه وراسي يوجعني من الطريق.. ابو قصي فول بانزيل ومن شتميت ريحتو راسي اهجس انتهى ... الوجع موتني كومي على امي جيبلي مسكن شي... كامت راحت صاحت امي وجني اثنينهن... كعدت الحيلي من طبت امي..
وكفت بسد الباب كالت ها يالعنود شبي راسج

كتلها يمه تدرين بيه ماتحمل البانزين وجيت بالدرب شو اهجس
مالي خلك اذا عندج مسكن علواه تنطيني...

كالت اي عندي بس اول فال تعشي ..

ماريد يمه والا الي نفس اكل انطيني حبايه واذا منوم بعد احسن

كالت اي بس يمه خما بيج شي شو شكلج مخطوف..
وشاحب يايمه خمو اكو شي...

رفعت راسي كتله لا يمه شبيكم هاي عبن جيت هين
غير رجلي بالدوام هههه شسالفتكم

لا يايمه هلا بيج والله زين جيتي ضوجة بس خفت كلت خاف لا سامح الله متجاتله انتي وابو عدوان.. خل اجيبلج الحبايه اكوفي
يولي ضي اركضي جيبي الاخيتج اكلاص ماي..

العنود.. إهلي بأول يوم حسو .. عجل شلون راح ابقى يمهم
لابد يعرفون السالفه.. وجابر بس يسمع بسالفه الصور يذبحني
بمكاني وامي راح ترفض ترجعني هناك... لازم اخفي السالفه..
اني هم تسرعت وجيت .. لكن كلشي يهون الأجل كرامتي

خل تفيدو زينه .. اليابسه ام المشاكل ..خل بشوف منهو هي العنود
مر الليل ... وصبحت الدنيا.. كعدت لكيت امي دتعجن طبيت غسلت

وكعدت بسدها..كالت كعدي اختج خل تسويلج ريوك خاف ماتكدرين
كتلها لا يمه هسه اني اسوي.. عوفيها نايمه كمت الحيلي

خليت القوري عالنار...دحكت الجو بره حلو...
صبيت كوب الجاي.. كتلها يمه راح اطلع بره عالمشراكة

اليوم الجو حلوو... عبرت عتبت الباب... تذكرت التلفون.. يمكن خابرني.. يمه فز گلبي جوز خابرني اي..رجعت اركض..

طبيت للغرفه ... ضي بسابع حلم..نايمه هنيالها لا حب ولا زلمه يشغل گلبها

رفعت المخده... شلت التلفون
ضغطت عليه... واني كلي آمل متصل يسأل يدور عليه..

مر الليل وصبحت الصبح وهو ماكوو...ولا كلف نفسه يتصل..
شلت التلفون بيدي وطلعت... اخذت كوب الجاي..

وكعدت بالطرمة...خليت الكوب بسدي وطلعت اتمشى..
فتحت الباب البره.. دحكت الكاع تذكرت لمن عبرت ورحت

البيت نجمة .. الله لمن جان يمر عدهم سيدي...
لمن رشكت عليه سطل الماي... الله يذيج الايام... طبكت الباب

وطبيت امي تسوي بالغده وجابر كاعد يتريك...طبيت للغرفه
كطيت التلفون عالشحن... مرت ايام بس جنهن اسنين
مشتاكة الكلشي بي مشتاكة السوالفة العطره الصوته
العصبيته الطيبتة اوووف يروكان شسويت بيه 
جم يوم بس انگلب حالي لا اكدر اكل لا الي واهس اطلع ولا حتى اغير الهدوم العليه   كل مااسمع الهورن گلبي اهجسه يطير من مكانو ليل نهار 
وعيني عالتلفوون بزعت واني ادحك عليه وكل مايدگ گلبي
يدك وياه.. اكوم واكعد صورته كبالي.. اموت قهر واني اتخيل

زينه بحظنه.. وكاعد يتغزل بيها مثلي.. دحگ الكل ملتهين
يدحگًون عالتلفزيون.. شلت التلفون على كيفي وطلعت من باب المطبخ وكفت وره البيت طلعت رقم وضحى... اخابرها
زين شگول الها... التلفون بيدي متردده اتصل لو لا
اخاف اتصل وهو يمها...
لا مويمها اكيد يم اليابسة... خل اتصل ول يصير خل يصير
ضغطت عالرقم... كام يدك... عيني على البيت خاف
اهلي يحسوون... جاوبت
الووو...

الووو هلا خالتي.. شلونج...

هلا يمه العنود انتي مو

اي خاله شلونكم اخباركم شلون صحتج

الحمدلله يمه بس البيت اضلم بلياج وين رحتي يايمه

بعد عمري خاله .. شسوي اني ماتحمل لو باقيه يمكن جان صارت
مصايب خليني بعيده احسن... بعدج مو مجربه خبالي هههه

_ ميخالف يمه تعاي ردي الييتج تره تخسرين كلشي لا تتصرفين
بطيش .. عوفي كلشي وارجعي..

_ خاله الله كريم هسه ... زين انتي وين بالييت... روكان وين بالدوام
لو يمها...

لا يمه قفلت الباب ورجعت للبيت.. وروكان موهين جة اليوم
ودور عليج .. كتلو اهلها اخذوها

_ صدگ خاله وشگال...

والله يايمه كتلج لا تروحين بدون علمه ماسمعتي كلامي

_ليش لازم حجة عليه مو...

عوفج من عنده وتركي الراح .. أرجعي لبيتج يايمه

شلون ارجع خاله واني متهووومة... شفتي شلوون مصدك وكام يعاملني.. مامتعوده اشوف منه قساوه.. بيوم وليله نكلب كلشي بي
صار موطايق كلشي مني...

ادري يايمه بس إنتي بروحتج خربتي ماعمرتي... مالها داعي روحتج المفروض تبقين هين وادافعين عن نفسج..

_ زين هسه هو وينه ...!

هاا يالعنود گلبج يطك عليه

لا بس...

لاتكولين لا ادري تحبي وادري الصار عليج كله تهم .. شوكت ترجعين

مادري خاله مدي ارجع ومامدي... شو هو حتى ماشال التلفون وخابر...

شيخابر مو كتلج راح تخسرين جثير بطلعتج وبعدين هو ملتهي بسالفتج وبالدوام..

شلون يعني ملتهي.. كشف اللي وره السالفه.. زينه موو

مادري يمه تعالي وانتي تفتهمين .. مو مال تلفون...

مارجع بالجذب ماكلف نفسه وخابرني... بالجذب ماسأل

يمه تذكرين كلج كالج اركدي واليطلع اكسر رجلو وتدرين بي
مايحب احد يكسر كلامه واي زلمه مايصير المره تطلع دون علمه 
وابو عدوان كال هي طلعت محد كال الها اطلعي ماروح واجيبها
خل تبقى عد اهلها لا تصدكين بيوم يحي ويجيبج

شوفي خاله يعني متونس بروحتي  يقهرني ويروح يمها .. ليش يعني فوك الي بيه لو هو ديطلع حجج حتى يروح يم الليابسة

ههههه والله عليج سوالف عوفي اليابسه وارجعي البيتج ..

شسوي ارجع خاله وهو عايفني...

_ هسه درجعي جوز اختلفت الأموررر

_ خاله اكو شي صاير مادري بي دكوليلي فرحي گلبي

_ إذا تريدين تفرحين تعاي لبيتج وراح تعرفين...

لا خاله دكوليلي وبردي گلبي...

_ اكفي يمي هاي واء تريد تسلم عليج... خبصتني خبص

وينها البذاته انطينياهه ولا تسال

رواء.. الووو عنووودة شلونج

هلا بيج يولي شو ماتسألين بذاته

_ اي ماسأل عجل تعوفين ابو عدوان وحدو وتحدرين غادي ليش عفتي هيج كسر گلبي يولي

هاااا ينكسر گلبج عليه وماينكسر عليه.. شبي خاطر ينكسر گلبج عليه  شو مرتاح يم اليابسه

يااااا عجل ماكالتلج خالتي وضحى...

لااااا ولج شكووو لا تخوووفيني ...

دتعالي ولج وانتي تعرفين انكشفت حقائق ماتدرين عنها

صددددك بربج احجيلي.. شصاير  راح اموت يولي احجلي

لوووتموتين ماححيلج عقاااااب عجل تعوفين الزلمه وتروحين
ليش يووولي ليش ماخفتي ربج تعاي

اهووو والتالي تحجين لو لا  تره والقران اجيج

عجل خل اكطعها الج من الاخير حتى ماتلحين وداعة امي ماحجي الاتجين وتشوفين التطورات بعينج...

انطيني خالتي وضحى شلون بيه مو راح اطلع هسه للعلم ..
وينه خلف يوديني.. امشي وياهه واخذني الواهس طلعت الباب البره

ادور على احد يوديني مدري شبيه هيج شعور بداخلي حلووو.. كتلها بربج عوفي السوالف ونطيني خالتي وضحى...

دتصلي يولي... تعاي كبل مايفوت الوكت ..،

روكان وينه .. بالدوام

لا بس  خطيه النقل ماله جة ...

هي نقل ولج وين...

ناقلي على جبل حمرين ...

لااااا بربج شو هناك ليش

هو هيج الدوام عجل خمو تريدي كبل بالعلم.. مكابلج

مكابلنيييي وين يحسرة شو مكابل ام المصايب مدري شايف بيه  اكلج صدك يعني ناقلي وشوكت يداوووم

مادري خطيه مريض تعبان صارلو يومين.. يتحسن ويروح غادي
ولمكان خطر ولج شنو من گلب عليج مريض وراح يداوم بمكان اخطر شي وانتي كاعده هناك اتعززين ...

ولج شلون عوفي كلشي صددك مريض شبي .. لا تشاقين خبلة 

ياااا خالتي وضحى هم ماحجتلج ولج  صخونه نار عساف يودي بي ويجيب محد عرف علته تعاي خطيه ينكسر كلبج عليه...

يايمه صدددددك ولج شلوو وينه هسه يمج

لاااا بالطرارء هسه هو راح يطلعوو بعد شويه

يايمه بعد عمري اسم الله عليه رووووحي خل الحك اجي ليش محد كلي شنو انتي بس كوليلي روحي    الحك على جابر خلف واحد منهم يجيبني... كطعت التلفون وطبيت على البيت اركض فتحت الكنتور سحلت عباتي .. وطبيت اركض للهول كتلها يمه جابر وين

كامت الحيلها وكالت بسم الله شبيج وجهج اصفر شكوو

يمه روكان مريض فد مره صايرر

اسم الله شلون مريض وين هسه هو بعده بالدوام

لا يمه اكلج مريض يادوام ماخذي للطوارء

ياااايمه بعيد البلا ان شاءالله شبي يولي ولج جابر طلع انطيني التلفون اخابرو

_ اكفي يمه خل اخابر خلف.. كعدت بالكاع اريد اكف الحيلي ماكدر
جسمي كله يرجف .. طلعت رقم خلف كتله لا تخابرين يمه هيان ديدك.. كالت لا راح اخابر حجيه وضحى افتهم منها.. اخذت التلفون وطلعت بره... الووو خلف...

خلف ... هااااا يولي شكو .. احجي مالي خلگ مداهرج

ولك يامداهررر روكان مريض

هااا شمرضه ابو خشم العالي

_ ولك انبلا خشمك اني وين وانت وين ولك مااشاقه
تعال بسرررعه سيارتك وين

روكان مريض زين اني شعليه ولج والسياره شبيها

اني يم اهلي بديارنه اريدك توديني غادي للعلم..

هاا بعدج هين لافيه عبالي رحتي خرب جان جيت داهرتج

ولج كلبي يوجعنيييي شتححي انته تعال عليك الله

يايمه كلبها يوجعها الله يرحم ماريدوووو خشمووو
عالي مغرورر... هههه جاي يالشيخة جاي ...

بسرعه عليك الله... راح اكلفك عالباب سديت الخط .. كتلها
انطيني ماي ولج حلكي يبس...

راحت تركض ضي جابلتي الماي كتلها امي وين .. كالت لا تخافين سالتها تكول الها مابي شي زين هسه

صدك المن سألت ..

خابرت حماتج وكلتلها هاج اشربي.. راح تموتين شجرالج

اخذت الماي شربته وكمت الحيلي.. كتلها علاكتي هدومي الحمي جيبلياهن راح اطلع جدامج...

_ ماشي راح المهن واجي وراج

_ طلعت للطرمة دحكت امي عالدچة كاعده تحجي هي وضحى طبيعي ولا جن صاير شي تضحك بعلو حسها...
اوف اني وين وهنه وين .. صحت وينج ضي راح يصل خلف

_ جايه شبيج مخفوگة يمعوده مايطير روكان

انحبي ولج مريض وناقلي لجبل حمرين...

اي ميخالف شبيج خايفه خمو اول مره يداوم غير هذا منصبه
ولازم يداوم لا تخافين ماكو شي دحگي اديج اتراجف

مادري من كالتلي رواء واني جمدت بدمي .. يمه سوده عليه
يبعد عمري مريض ومادري بي اكول ليش ماخابرني طلع مريض

_ دمشي هاي سيارة خلف طبكت...

انطيني العلاكة... صحت يمه اني اروح... اشرتلها بيدي وطلعت اركض عالباب.. فتحت باب السياره الوره وصعدت.. كتلها سلميلي على نجمة وكولي الامي خل تدعيله جان يصد عليه خلف كال
بلجي خبال... الباب هجمتي شجرالج هيج طبكتي السياره
جديده يولي..

ولك ماتسكت ياسياره اني مستعجله شغل ولا تبقى تقلد

كال ماعندي مشكله هسه اشغل بس ماكتيلي بعدو خشمو عالي
يحجي وميت ضحك هو وضي

كتله والقران اذا مامشيت ااجر سيارة واطلع للعلم

ضحك وكال هلا بالشيخة ذيبه ماينخاف عليج .. لا يابه
طالعين ادري بيج خبله وتسويها
... شغل وطلع
نص الطريق وجان اكول اني ليش ماخابرت عليه خل اخابر
اشوف شلونه وين هو هسه... كتله خلف طفي المسجل يمعود
اريد اخابر...

دحك عليه بالمرايه كال عوفيني منطلق يولي

ولك بس نصي خل افتهم ... ديدك والله ..
نصاه كال يابه نصيناه وامرنا الله..

بقى يدك لحد مافصل.. كتلو يول مايجاوب...

كال الف رحمة على والديه ..

ولك ليششششششش

خل اسمع تره وروح عمشه هسه انزلج هينه عوفيني منطلق

ههههه ولك لا تضحكني واني مقهروه عمشه اشعليه تحلف بيها

صد عليه وكال لا صدك جديات بعده خشمو عالي ... ؟

من كال هيج ضحكت غصب عني شلت علاكتي كتله راح اللبسها براسك ...

كام يضحك كال مخبله الله وكيل... موصاحيه وصلنا العلم
الله هيج اهجس روحي طير وترفرف فتحت جام السياره
وادحك على البيوت .. اليوم اشوفه .. اليوم اكحل عيني بشوفته
طبينا بالفرع.. من يم بيت زينه دحكت على بابه مطبوك
اعوذ بالله بيت الحية هجامه البيوت مسدود شعجب مامده راسها وتركب... كتلو هين نزلني

مد راسو وكال يولي شنو ماندل اندل تره بس شجرالج
على كيفج يمصكوعه ماراح يطير تره ...

ولك عبالي ماتندل شكد مضوح هالزلمه... فتحت باب السياره ونزلت بيدي العلاكة .. طبكت الباب كتله مشكور اخليف ماقصرت

مد راسو مو الجام كال لا تحلفين ماكدر انزل وراي شغل

هههه لا يول ولك نسيت اكلك انزل تعال عليك الله

ضحك وكال اليوم ياخلف يا دنيا نسيتي حتى عمشه روحي يابه
اني اروح جديات ورايه شغل لو مو انتي مااجي هين
لو عمشى تموت... كال هيج وشغل وطلع...

شلون واحد هذا الميت ابو يضحكة... سحبت الباب وطبيت
االبيت هدوووء ماكو احد الحديقه فايضه بالماي...

طبيت للجوه ساديت الكاك... وطبيت للبيت امشي..
وصلت باب المطبخ وجان اتذكر المفتاح شلون.. عد وضحى

شلت التلفوون اريد اخابر... دحكت باب الربعه مفتوح شويه
كلت اي هم زين بس شعجب مفتوح لازم ناسي... شلت العلاكة

وطبيت امشي .. ذبيت الغراض نزعت الشال وعباتي...
طلعت رقم روكان خل اخابر اشوف وينه شلون صار امشي

واحاجي روحي... طبيت للهول مرتب وكلشي بمكانه
الصوبه مشعوله ... بالهول يبو زين ماحترك لبيت ناسيات كلشي

صعدت الغرفتي ... وعيني عالتلفون..ضغطت اتصال... واني عالدرج وبده يدگ... نزلت التلفون من اذاني وكفت بأخر الدرج

حس التلفون بالبيت.. كمت افتر يمنه ويسرى... صوت النغمة قريب
الصوت عبالك بغرفتي.. مشيت سريع.. فتحت الباب .. وطبيت برجلي اليمن.. دحكت لين روكان كبالي واكف لابس دشداشتو
لون نيلي ويمشط على المرايه...من شافني حسبتو انبهت
واني بقيت بس صافنه بوجهه.. كط المشط من ايده وصد عليه
يدحگ عليه بنظرة غريبه... 
مشيت خطوة وكفت .. ادحگ عليه وجهه يخبل مابي شي
وهالعرض جتافو هي طوارء هاي شبيها رواء ...

كال ياهلا ياهلا... شعجب يابه ...

كتلو الحمدلله عالسلامه ...

كال الله يسلمج بس على ياسلامه تقصدين...

كتلو سمعت بيك مريض وبالطوارء .. وجيت اشوفك

ضحك كال منين سمعتي ول يابه... 

دنجت راسي فشلت.. كتلو والله سمعت هيج شبيك

كال .. ها يعني الطوارء جابتج

رواء كالت ناقليك من دوامك .. جتف اديه الاثنين لوره وكف كبالي
كال اي وبعد...

رفعت راسي عليه وكلي خجل كتلو كالو عساف يودي ويجيب بيك
من دكتور لدكتور

كال اي يودون ويحيبون والعلة بالرچاب..

كتلو يعني شنوو

كال وينها رواء .. شوكت كالتلج

كتلو والله مادحجي جذب اليوم كالتلي وكلت الخلف وجابني

احاجي وهو صافن بوجهي كتلو شبيك

كال اعتقد انتي الي يحتاجلج طوارء.. هاي شصاير بيج !

كتلو شبيه مابية شي... 

كال لا واضح حيل... عالعمووم اخذي راحتج ... اني طالع

مشه.. ومشيت وراه..كتله دقيقه وين راح تروح

كال ليش تسألين

يعني ليش اسال اريد اعرف وين راح تروح يمها موو

صد علية كال يم منو ابويه إنتي...

كتلو اليااااااابسه....

شنووو يولي ...!

يعني ماتعرفها اقصد زينه...

كال مو وكت هالحجي عندي شغل ولازم اطلع ..،
تريدين ادزلج على وضحى على رواء ..!

هااااا ليش لازم ماتبات هين اليوم..!

صفن عليه ودحك بنظره حاقده كال شطلعج من البيت

كتلو احسن عفتلك زينه تشبع بيها...

يولي ماتسكتين انتي ليش عقلج صغيرر... انتي تتسرعين دوم
ليش ماتفهمين اول ... وبعدين تحكمين

يعني شفهم وانت كبل لازك يمها... مدام تحبها ليش اخذتني

اهوووو رجعنا هاللسالفه... يولي شبيج...خل اطلع احسن

اكف ليش تتهرب.. يعني هاي الايام كلها ماشبعت منهاا...

هسه انتي شتريدين اروح اجي بكيفي.. اشبع مااشبع
حرر اني...

تخوصرتله وكفت كباله كتله هسه انتو ليش جبتوني هين مدام هيج تحاجيني

منهو الجابج ابويه ... شنو انتي طلعتي من بيتج وانتي برجلج رجعتي... واني حذرتج وكتلج لا تطلعين... بس كسرتي كلامي وطلعتي ... وال يكسر كلامي.. خل يتلقى شر اعمالوو..

اني طلعت لان انت ماتفهمني احجيلك ماتصدك ورجعت كالولي مريض وجيت

_ هااا لازم قشمرنج الربع...

يعني جانو يضحكون عليه موو..!

اي طبعا... مابية شي جدامج السبع ياكل بيه يومين...
بس اويلي على المتتهيييين..،

منو تقصد هاا..
طبطب على جتافي وكال الحليم تكفي الاشاره
المهم بعدج تاخذين صور...

كتله هااا رجعنا... مو حلفتلك ماااالي ذنب.. ليش تعيد بالسالفه

ادري ابويه ادري... وعرفت السالفه كلها...

رفعت راسي كتلو صدددك والله...شعرفت فهمني...

صفن عليه كال ادري مالج ذنب بس لا تسالين اكثر

دقيييييقه لا تروح.. اني هم من حقي اعرف منو وره السالفه

كضب اليده مال الباب وصد عليه كال..عوفج من سالفه الصور
عقابج بعدين....

يتبع...