حين يزهر الحجر

١٩

مساء الخير
حين يزهر الحجر
الجزء التاسع عشر

من سمعت كلام عاطف خابت امالي..
يعني هو يعرف براق شنو من شخص تافه ومو كفو...
ليش جاي يقنعني بي...
حتى يتسهل طريقه وي صبا...
يعني يريد يعيش وي حبه ومتجاهل عائلتهواطفاله..
الي لحد هسه مشايفهم...
ومتجاهل احساسي تجاه هالزواج الي رفضته للمرة المئة....
سكتت شوي وكتله...
ابو فؤاد براق لو يبقىاخر ركال مااقبل بي...
الحمدلله ماعجزت وتكرمت حتى اذب روحي هالذبة...حجيت بهالصيغة حتى لا يشوفني متهاونة او بية مجال...
مو انت ابوي وتكول انتو بنياتي...
شلون تقبلها ع بنتك...
يعني تقبلها يخطب ثريا واحد مثل براق...
تنهد ورجع ظهره ع الحايط...

مهرة كلنا بينا عيوب والولد يعترف غلطان...
زين انت تكول يريدني هو من قبل...
اي اني اتذكر من انت صغيرة يكول مهرة الي ..
لعد ليش من كبرنا خطب زهرة؟؟؟
ماعرف شكلج يابوية ..سكت واني كتله...
ريح راسك من موضوعي..
بس اني احاجيك كأب واخ وسند...
اذا تهمك مصلحتي انطيني لليسندني...مو باقل مشكلة يعوفني زيشة بوسط ريح....
يعني كلش ماكو مجال؟؟
اي بالنسبة لبراق هاي نظرتي ومستحيل اغيرها...
بلا ميجاوب كام طلع...

خلي مصر ع هالموضوع بس لا ممكن اقبل..
شخص مثل براق مينعاش ويا مطلقاً قليل مروءة...
كمت صليت وسويت العشا وكملنا ودخلت لغرفتي انام...
كعدت احاجي شجاع كال شبيج ...
مابية شي بس دايخة حيل...فعلا اني صارت عندي دوخة اعتقد تخربط ضغطي...
سلامات ليش اخاف ضغطج؟
لا حبيبي يمكن تعب او نعس...
معناها تعبتي لان عدكم خطار اليوم..
شفت سيارة ببابكم...
صدك منو جان عدكم؟
درت وجهي وكتله ابن عمي لان توبني الفظ اسمه ميقبل...
شلون شلون؟؟؟مو تخاربو هو وعاطف؟؟؟
يرجعون مدام المصالح سوا...

مهرة دوري وجهج وباوعلي...
درت وجهي عليه بيأس...
تعبج وضوجتج بسببه؟؟؟حجه شي؟؟؟
اجه يخطبني..
خررررب شي اهله المخنث يعني مايتووووب مو...
ع كيفك ترى رفضت وكلت لعاطف مستحيل اقبل..
واقتنع برايج؟؟؟
اي الحمدلله ..ولو جنت متوقع يرجع هذا..
لا اني ابد متوقعت يرجع او اصلا عاطف يرجع يحاجي...
مهرة احجي شنو الصار..
خليني اعرف منج احسن...
باوعتله بتعب..
هز راسه اسمعج..
حجيتله الصار كله ..بس راد يطلع من ورا الكاميرا الا شوية...
كال مع السلامة اخذي راحتج..
حجاها بزعل ..
كلت يهدا واحاجي اذا ارجع احاجي هسه نكب ثنينا...

عفت الفون ونمت...
يوم ثاني داومت هو مموجود...
حطيت ايدي ع قلبي..لان حتى من دزيتله صباحية ماجاوب...
بلشت اشتغل ول١٢ ونص رحت لارفد..
ها شلونها رحاب وجوجو...
طبعا رحاب جابت قبل فترة قليلة وسمت ابنها جعفر...
يابة رجال شكبر صماخة تسمينه جوجو..
فدوة لعينه ههه ربي يحظفه...
ويحفظج خيتي..زين الحمدلله بس خطية مجاي تنام...
اي الله يساعدها حقها...
بس هالاشهر من يكبر شوية يصير مثل الورد...
انشالله يارب...
اكول اليوم ماكو؟حجيتها واني اتلفت بنظراتي...
سافر اليوم ..
سافر؟؟؟؟؟
اي كال عندي شغل كلش ضروري ..
عبالي تدرين!
لا ماكال..

رجعت للغرفة واني افكر شجاع يسافر حتى بلا ميكلي الله وياج!!!!
ليش هيج يتصرف يعني فوك قهري يقهرني...
بسيطة ولا اراسله ولا احاجي...
كملت شغلي وطلعت...
رجعت للبيت ولكيت امي بالمطبخ...
باوعتلي كالت الله يساعدج بس نبرتها مختلفة عن يومية...
بستها براسها كتلها..
شبيج يما؟
مابيه طبي حللي وارتاحي اكليلج لكمة..!اسلوب امي غريب...
فتت بدلت وصليت واجيت لكيتها محضرة الاكل...
كعدنا ناكل كالت..
تدرين اخوج وين؟
تركت الخاشوكة بخوف..وين؟
بالمستشفى وين ابن عمه ..
ليش شبي؟
مدعومة سيارته...
ورامين عليه من رايد يصعدلها بس ممتصوب يعني خلب!!!!

شنو منو وليش !حجيتها باستغراب وخوف من الافكار الي نسجها بالي ىياريت اكون غلطانة...
محد يعرف ليش بس متاذي بالدعمة..
شبي يعني؟
يكول اخوج من خابرته راسه متعور وظهره...
يا الله يشافي ...
انشالله يشافي..بس الي عتبة عليج ليش كلتي لشجاع ؟؟وخليتي يتصرف هيج؟؟
شلون يتصرف وشنو حجيت يما...
قصدج شجاع سوا بي هيجي؟؟؟
لا ابوي...
لا يما صدك عود..ترى شجاع اصلا مو بالعراق مسافر...
متاكدة مهرة؟
طبعا متاكدة ..ارفد كال سافر شجاع يعني من يصير شي مهم بالشغل ..
تعالي الي لان شجاع هالفترة مسافر ومشغول..
شفت امي شوي فكت اففف يعني مو بس اني متوقعة شجاع ورا هالسالفة....

لحد الليل كلش..
اجه عاطف بس حجه شويه عنه كال مستقر وضعه بس ظهره متاذي...
امبينة مقصودة..
لان رامين عليه تخويف ومن شارد داعمي ...
اخ ياشجاع اذا صدك هو ورا السالفة هالمرة هاهيه ويا..
يعني معقولة يستخف بروح بشر هيجي...
هسه اني اكرهه واتمنى اخلق منه..
بس مو بهالطريقة..يعني هذا دم انسان يصير بذمته قتل نفس....
الله يستر من الجاي...
رحت للغرفة لكيته مخابر...
جاوبته واشوف متمدد ع سرير ابو نفر...
والغرفة اجواها غامقة وهو يدخن مسوي كدامه مثل القطار الخربان....

انت وين؟
سافرت لاربيل...
مو جنه بعد وكت لان كتلي؟
جنت متضايق وماردت اضوجج لو نتعاوك...
شجاع شمسوي لبراق؟؟
كل خير مهرتي...
يعني طلعت انت صدك؟
اي اني سويتله لوية اذن...لو عادها بعد..
هالمرة اشلع اذنه من اصلها...
تعرف ماجاي اصدك؟؟
شجاع هذا روح يعني دمه بركبتك يصير...متخاف ع نفسك انت؟؟؟؟؟
لتكبريها وسدي السيرة ...
شايفتني قاتل لو مجرم كدامج...
مجرد خليتهم يخوف بلسلاح شرد..
هسه يطلع مثل المطي يكمز لا تحسبين...
هو منو محسب بي طززز..
بس انت اخاف عليك من عذاب الله ومن المشاكل...
ريحي راسج حبببتي....

سديته منه واني متفاجئة بشجاع وقابلية ع الضرب ..
يعني لو يضرب لو يدز جماعته يضربو هسه هذا هم تصرف...
انوب اخاف الح عليه باللوم وعباله ادافعله..
ساعته شيخلصني...
مرت ثلث ايام وتحسن براق..
كنت شايلة هم لو صار بي شي وشجاع يتحمل ذنبه...
لو عليه اكرهه ومالي علاقة بي بس مااتمنى الاذية لاحد...
من عرف شجاع كال..
كتلج خفيفة وتاديبة خبصتي الدنيا...
غير اخاف عليك حبيبي..
خافي غليه من واحد يسوا ..مو هالخرگة هذا...

مشت الايام وشجاع المجرم رجع ..
وايامنا نفسها ..
واحد يصبر بثاني بس ثنينا تعبنا...
من بعد ماطلع براق من المستشفى وتحسن ..
بس مشيته مو عدلة يحتاجله وقت...
وافق ع خطوبة صبا وعاطف ..
استغربنا بس مانعرف شنو السبب...
عاطف يكول لان وكفتله بطيحته...
صار العقد مالتهم ورحنا اني وزهرة الي عليها تقريبا سبع اشهر ...وورد وابنها الجيير والثاني الي صار قبل شهور...
وزوجها هم اجه وحسين بطلب من عاطف والح عليه....
وهناك اللواكة الزينة من باسمة ومن الاقارب ...
بس خلصناها اني واخواتي نكص بيهم وونسنا نفسنا...
رجعنا وشجاع بس يحلف بيه ويسال...
كون شافج المخنث..كون انعجبو بيج لو خطبوج ..
مااقتنع الا بالوييييل....

ورا اسبوع تزوجو عاطف وصبا...
جان يوم جمعة..
يوم ثاني اني بالدوام ومن رجعت لكيت تماضر عدنا !
فكيت حلكي ..
شرجعها!! شذكرها!!!
احت وسلمت عليه وهي تكلب بنظراتها ع ملابسي..
هالحجي كاعدة امي يمها بالصالة...
اني اسلم عليها وتلفت مدري شنو الوضع ..امي تباوعلي وضامة ضحكتها..
لعد الجهال وين..
جوا يم ابوهم فاتو مشتاقيله..تحجي وبس تريد تثبت نفسها..
امبينة مقهورة من سواية عاطف...
كامت كالت..
اروح اشوفهم ..ومشت وتفر بوحها...

كلت لامي شنو الفلم؟؟
مادري يما ..اخوها جابها الصبح هي وغراضها...
ودخلت هلهلت ..
وتدك بباب الغرفة وفتحته طلع مقفول...
تالي طلع عاطف وباركتله...
هو بقى مصفصف بوجهها ...
وهالكعدت تسولف تكول رجعت لبيتي وابو جهالي...
ومايسوى الزعل ومن هالامور...
يما صدمتنا كلنا بس كسرت خاطري...
الضرة مرة ولو كانت درة....
ماعرف شكلج يما ...الله يصلحها...

يوم ثاني داومت وجان عدنا لود بالشغل...
وشجاع مجتمع وي شركة خليجية...
وهم الجماعة جانو تقريبا سبع اشخاص...
بلشو من ٩ خلصو بالوحدة...
من خلصو راد شجاع ملف مال نفس الشركة بس قديم...
خابرني وسام كال خلصو اجتماع...
نريد الملف رقم كذا بس دزي بيد حسن...
اني كلت لان شافني اشتغلت هواي ميريد يكومني...
و عبالي خلصو وطلعو يعني....
كمت طلعت الملف واخذته ورحت بالاول للحمام..
رتبت نفسي وخليت حمرة ورشيت عطر...
واخذت الملف ورحت ..
وسام مموجود ..
اني كلت اكيد وسام هم تعب وراح للكافتريا يشربله شي....
فتحت الباب وفتت...
واباوع الميز الجانبي متروس رياجيل ..عززاااا...

باوعلي شجاع مثل المضروب براسه...
تداركت الموقف كتلهم السلام عليكم...
ردو السلام كلهم واني عيني لنظرات شجاع...
كال...هاي حضرتج  كنت تدكين بالباب واني عبالي متوهم ...
عود يريد يجملها لان دخلت بلا استذان..
كتله اي دكيت هواي تالي فتت...
مد ايده ...الملف اذا تسمحين...
رحت مشيت وانطيته الملف ...
سمعت واحد كال..
موظفة عندك استاذ شجاع ؟؟ماعرفتنا..
هو كح وكال احم..
ست فضة موظفة بشركتنا ...
وجه كلامه الي اني احتاريت التفتت عليه لو احاجي واني واكفه صفح بس عيب...

ست فضة حضرتج متخرجة من اي جامعة..؟
درت مثل المسويلة عملة...
اباوعله يطلع بكد شجاع..
لابس دشداشة بيضا تلمع والغترة ملفوفة بعناية...
بس ماركزت بوجهه ..
يعني لمحت شوفته يشبه بشكل كبير الفنان وليد الشامي...
جاوبته بتحفظ...
جامعة البصرة -كلية الادارة والاقتصاد-قسم محاسبة...
حلووو كلية عالية ومنتجة..
بس وين موقعها..انا مرة رحت للكرمة...
جاوبه شجاع...
لا مو هناك هاي يسموها باب الزبير...
مهرة وصي بطريقج علوان يجيب ٨ كابتشينو...
حجه نفسه هذا ..مهرة منو يبا..
مو توك تكول فضة..؟
بقى شجاع يمتمت لان جفص باسمي ..
كتلهم اني اترخص..هو كال احرجتها شكلها خجلت ههه....

طلعت ركض وماخايفة بس من ردة فعل شجاع الله يستررر...
وصيت علوان ع كابتشينو وكعدت الوب...
صارت ثنتين الا ربع وطلعو يتغدون برا وياهم شجاع...
اجاني مسج...
حسابج بعدين مرتي......

للحكاية بقية
بقلم شقراء(قمر كانون)