مساء المحبة
حين يزهر الحجر
الجزء السابع عشر
سدت الفون امي وبقت تنحب..سودة علية يما مافرحت بوليدك..
عسى عمري راح ولا عمره..
شبكتها واني ابجي..اسم الله عليج يما
منو النا غيرج نور دربي ..
حضنتها وبقيت ابجي ..
انقهرت ع الطفل وع عاطف الي وضعه كلش تخربط ...
امي كالت خابريلي حسين ..
دكيت من فونها عليه وحاجته يجيب زهرة يمي لان امي رح تروح...
فد شوية واجو امي اخذها حسين يوصلها..
وزهرة بقت يمي ...
كعدنا نحجي كالت رحت للدكتورة..
يا صدك شكالت ..
الحمدلله ماكو شي بس ..
بس شنو؟
ابتسمت بخجل وحطت ايدها ع حلكها..
حامل...
ماشاء الله صلوااات ..حضنتها واني ابوسها...
مو جنه السيد مستعجل؟ههه...
لا هم السادة بسرعة يسجلون اهداف ههه...
بقينا نسولف الى ان اجه حسين..
بقى يمنا بات ..
زهرة راحت يمه واني خابرت شجاع...
حجيتله عن ابن عاطف واني مقهورة..
كال خطية الله يساعده الطفل عزيز ومنا مرته تعبانة ..
الله يقوي ويفك شدته..
حسيته انقهر ع قهرتي..
شجاع الحلو بي ماعنده حقد قلبه نظيف..
جربته باكثر من موقف..
صح بوقت العصبي يحجي بس اعرف مو من قلبه..
وعاطف شكد رفضه وفشله ..
بس ماحاقد عليه..
كتله..حسين حيبقى يمنا لحد متجي امي..
اي احسن ..دربالج مو يجي ذاك الساقط وتطلعين كدامه..
لا بعد وين يجي غير تخاربو هو وعاطف..
حجيتها واني احس بنفسي جفصت..
كعد ع حيله وكال..لا بربج؟؟؟؟
ها اي مو هو ذاك ماله صاحب وتلاغو..
يعني بعد ميجي لببتكم؟
لا عاطف منعه...
هنا لاحظته ماعبرت عليه السالفة...ماعرف لان ممتعودة اكذب عليه..
او لان يعتبر زوجي والله كشفني اله...
جر الباكيت طلعله جكارة..
ورثها وعقد حواجبه..مهرتي شنو صاير؟
احجي السالفة ولا تعتعتين جنج سيارة مخلصة بنزين..
هاي شبيك حبيبي ..ماكو ماكو شي ابد...
مسح وجهه بيده الثانية ويحجي بجدية..
مهرة جاي تشوفين هاي؟؟
اشر بيده لشيبة خفيفه بشعره..كال ..
ترى ماشيبت ع الفارغ..
لا هالوكت صقلني ودرسني درس اصعب من درس..
يعني ارتباكج ووجهج الي بهت من حجيتي ونظراتج البقت مثل الحرامي تتهرب منا ومنا..
هذا دليل..
والدلييل الثاني..اخوج عاطف وابن عمج حبايب..
يتعاركون بهالوكت الحرج؟؟الي عاطف مأمنه عليكم؟؟
ولو يخسي..
وينه وين الامانة هذا..
مهرة صاير شي او متصرف تصرف مأذيج بي واخوج شايفة؟؟
عزا اني هنا احس بطني انخبطت خبط وجسمي كله يرجف..
عبالك مجرم ويحققون وياه..
لا اكول اي ولا اكول لا...
شجاع شبيك يعني هو وياه تلاغو ..و وعاطف نفسيته تعبانة كلش..
وتعاركو عادي يعني...
هاااا..اي يصير خير...
حجاها بس مثل شخص يتحلف..
ماعرف شصار بيه من خوف انرعبت...
احس الم صار ولعبان نفس كلش..
عفت الفون وكمت للحمام ..
رجعت هو كاعد بترقب بس شافني كال..
ها شنو مو كلتي صرتي زينة؟؟لو ماخذتني ع كد عقلي..
لا حبيبي شبيك متعودة هيج اني ..
نفخ وكال...
الله يساعدج حبيبتي شنو هالعذاب...
همزين غيرنا الموضوع والتهى ..بس مابقيت ويا شوي ونمت...
يوم ثاني داومت عادي ..
شفت شجاع شوية يم الريسبشن وما رحتله بعد...
لان اخاف يحقق وياي واكتهن كلهن...
بيومها العصر اجتلي رحاب ..
شكد مشتاقتلها صار هواي ممتشاوفين..
بقينا نسولف وزهرة يمنا...
كتلها شجاع شاك اكو سالفة وخايفة احجي...
ثنينهم نصحوني احجيله ..
بس اني اخاف من شجاع لان عصبي واخاف يسوي بلبلة هسه وعاطف وضعه مو تمام ..
اول وتالي احجيله بس من يفوت عليها وقت..
يصير وقعها عليه اقل...
ورا المغرب اجه ارفد اخذها وسلم علي وراح...
تعشينا وحسين خطية بالاستقبال ولا طلع حتى لا يحرجني...
وراها اجت امي...
حضرتلها ملابسها سبحت ومشطت شعرها لان تعبانة ومقهورة...
كعدت اعصرها وزهرة جابتلها لبن ..
كلتلها شربي حتى تنامين بسرعة ...
كالت تماضر كاعدة ومتحسنة..
وسألت ع ابنها كلولها بالخدج بعده...
بس اهلها لهسه مايعرفون الصار ماحجت شي..
همزين طلع بيها خير وماانطت برجلها..
وهو خطية تعبان وحيله مهدود..
بقت تبجي وتكول سودة عليه يما ..تعبت وتمرمرت ...
وبقت تدعيله...
بقينا نحاجيها وشوي غيرنا مزاجها بحمل زهرة...
ارتاحت شوي ونامت...
تقريبا مر اسبوع ..وتماضر طلعت من المستشفى..
بس عرفت ابنها مات..
حجت لاهلها عن مشكلتهم هي وعاطف...
وكلتله مارجع بعد طلكني...
راحتلها امي وحجت وياها ابد ولا عبرتها..
ودكت رجل الا اتطلك وتحلم تشوف اطفالك...
طبعا اطفالها بقو كم يوم يمنا من نامت مستشفى...
بس بعدين امها كالت لامي انت جبيرة مابيج حيلهم..
ومهرة دوام ومتلحك..
ناخذهم يمنا اني واخواتها ونتعاون عليهم...
اخذوهم الصبح بيوم الي صارت مشكلتي وي براق ...
عاطف ضغطه يرتفع وصحته تعبت...
احسه مضغوط ومحتار بين امرين...
اكيد مشكلته وي براق وترت علاقته بصبا..
ومنا تماضر راكبة راسها تتطلك ومترجع...
حملته مسؤولية كلشي..
رغم هو صح جرها من ورا وضربها...
بس هي جرت نفسها وطاحت ..بس يبقى هو المذنب او...ثنينهم مذنبين...
مرت ثلث اشهر...
وخلال هالفترة علاقتي بشجاع كما هي..
بس ماتخلى من بعض الختلات الي نرضي نفسنا ثنينا بيها ونعبر عن اشتياقنا...
هذا الاسبوع صار عنده سفر..كال رح اسافر ومن اجي..
ارجع احاول وي اخوج..
هالمرة اجيب مشية وشيوخ وانشالله يقبل...
وافقته بهالشي وكتله الله كريم...
اما عاطف فاجئنا بقراره..
من اجه حاجه امي...
يريد يخطب صبا..امي كلتله..
يما تعرف بيهم يفشلوني وماينطون المن رايحة...
لا حجية حاجيت عمي وكال كبع واخذ ..مالج علاقة بباسمة بعد...
راحت امي وخطبت صبا..
وكالت وافقو واصلا فرحانين...
يمكن لان منفصلة مايتشرطون بخطبتها او هي ضغطت عليهم...
اتفقو هالخميس يعقدون وخلال هالاسبوع يتزوجون بلا مراسيم..
ورا يومين من الاتفاق..
صبا خابرت عاطف وكلتله..
براق عرف بالخطبة وحلف مينطيها لعاطف لو يموت..
هنا عاطف تخبل وراح لبيت عمي...
كلمة من براق وكلمة من عاطف...
توصلو للشرط الي حطه براق...
وهو زواج كصة بكصة...
هنا عاطف انحط بين نارين...
من اجه حاجاني..كتله تقبلها اتزوج مجبورة؟؟
ولو شخص كفو ميخالف انجبر عليه وبعدين اتعود من اشوف محاسنه..
بس هذا عبارة عن كتلة مساوىء...
يعني صح اتمنى سعادتك..
بس انت الربيتني وتهمك سعادتي اكثر مني..
تتوقع رح اكون سعيدة ويا؟؟
لا يابوية..همي سعادتجن اني وانتن بناتي...
انسي السالفة وعوفيها لا تفكرين...
ولو مكتوبين لبعض نصير شما طالت وعرضت تنحل...
باس راسي وراح...
شكد انقهرت عليه وقلبي انعصر..
يحبها وميكدر ياخذها..
حسيت بنار شجاع الي هي نفس ناره....
بس هو مو حاس بهالنار..
حتى لو طخت عنده بينا حب..
بس رجولته تخلي يغالط نفسه ويكول لا ماكو هيج شي....
بعد ثلث اسابيع رجع شجاع...
جانت سفرته لدبي هالمرة...
اشتاقيتله كلش واحسبله شوكت يرجع..
بيومها ماكلي اني اجيت..
رحت للشغل ومن دخلت شفته كاعد...
يمكن فرحتي فضحتني بوقتها...
رفعلي نظره بابتسامة مخفية ودنك...
رحت للغرفة وشوية واجه حسن...
بلشنا نشتغل واجت هنادي يمنا...
خابرني وسام كال وانطاني اسماء ملفات...
كال جيبيها وتعالي...
طبعا شجاع بعد كل سفرة هيج...
لام يجيك كلشي بايده...
وهم متخذها حجة لشوفتي....
كمت طلعت الاضبارات ورتبتها..
اخذتها وطلعت...
رحت للمكتب دكيت الباب..
سمعته صوته قريب كال تفضلي..
فتحت الباب ولكيته يم الباب..
بسرعة طك القفل واخذ الاضبارات من ايدي وذبها ع طبلة..
وهو يهمس بغزل مشتاااقتلك يحلووو...
حضني بين ضلوعة بلهفة محب محتاج حضن حبيبة...
وحضنته بشوق وحسرة ..
ااااه شكد مشتاقتله وقلبي ولهان عليه...
لزم وجهي بيديه ثنينهم ويباوع بعيوني...
مريتي ..شريان گلبي ..مشتاگلج يبعد روحي وراحتي...
باوعتله وحجيت بهيام...
مو بگد اشتياقي الك رجل عمري..
حط كصته ع كصتي كال...
لعد بينيلي هالشوگ ..اليوم اريد ارتوي...
لمست شفته باصابعي وهو يحجي...
احس نظراته تغيرت وانفاسه وكلشي بي...
قربت شفتي حطيتها ع شفته...
غمضت عيوني بهدوء وضعت من اخذ شفتي وبقى يتفنن بتعبير اشتياقه الي..
نسينا نفسنا ونسينا كلشي...
مانتذكر بس احنا واحد ملهوف ع الثاني ومشتاقله ويريد يرتوي بعد هالبعد ...
وعيت عليه من دفعني وكام ..
واني العباية منزوعة والبدي رداناته نازلة...
حيل شوكت صار هيج...
شنو هالاندماج الي نساني نفسي....
كمت واني اترنح لبست العباية..
والشال بس انتظره يطلع من الحمام..
حتى اغسل واصحصح لان طفيت كلش..
طلع من الحمام والخاولي بيديه ينشف...
شلونها مهرتي؟ يحجي ويغمز..وكعد يمي...
ههه باحسن حال..حجبيتها بثمالة وابتسامة...
اويلي شنو الخدر اخ يابة..
طفرت بسرعة..ههه كافي كافي..
كمت للحمام وغسلت وكفت ارتب نفسي ع المراية..
عزا مخلي اثر برقبتي وبنصها كلش سنتر..
يعني لا تتغطى بلبس ولا غيره..
اباوع صدري مزخرف ..وشفايفي مثل الماكل شي مثلج..
خدرانات ومنفوخات...
رتبت الشال وطلعتله..
كاعد ويمه الملفات...
باوعلي بحب...هلا بريح الشمال..
اجيت كدامه كعدت واني مبرطمة..
شمسوي بيه حبيبي ليش مخلي اثار..
خايبة سكتي ..
هو غير لزمت نفسي كوة كون مااطلع...
بس شسوي من حرگة گلبي..
لو تعرفين البية جان عذرتيني..احبج وراغبج ولازم اصوم عنج..
لحد مااستاذ عاطف يحن عليه...
الله يسهل عمري خلي املنا بالله..
ونعم بالله....
بلشنا نشتغل ..وشجاع احتاج ملف هم..
حسن جابه النا..
وكال الله يساعدكم ..تردون شي تشربون اجيبلكم...
كناله لا توه شربنا جاي...
طلع من يمنا واحنا كملنا شغل ونسولف ونتغزل ببعض...
ول١٢ خلصنا...
طلعت وبرجعتي للغرفة..سمعت هنادي تحاجي حسن...
مهرة شنو نامت يم المدير..حجتها عود باستغراب..
اني وكفت اريد اشوف شنو قصدها...
جاوبها حسن..
ليش تحتاجيها..؟
لا ماحتاجها بس هواي بقت يمه..
اول مرة اشوفه يدز ع وحدة ويخليها هالكد يمه استغفر الله...
ماريد احط بذمتي بس هو يفضلها بكلشي ...
ردها حسن..
حقه لو فضلها ..مهرة بالشغل ذهب وسريعة ونشطة متشلع القلب وتخربط..
واصلا هي صديقة جنتهم طبعا يداريها اكراما لصديقتها ..
ولو هي ثابته جدارتها من اول...
حسن ماكلت هي متعرف تشتغل..
بس مو طولت يمه ؟؟
عادي لان ملفاتهم هواي..
ومن قبل شوي رحت انطيته ملف احتاجه..
وهم كاعدين كلمن بمكانة ويشتغلون...
ارجوج..هالكلام هذا مو حلو وانت بنية واكيد تعرفين تشويه السمعة مردود...
قبل ليكمل كلامه فتت للغرفة...
هي شافتني صفرت...كالت الله يساعدج ههه ...
حجيت وياها تبسمر...
صدك الله يساعدني..دخت من الملفات والحجي...حجيتها بتموع حتى تنغث...
كال حسن..
زين يمعوده قبلج جنت اسويها خمس ساعات ..
هسه انت اختصرتيها بشطارتج...
يا ههه اكول بقيت تدزني لهاي المهمة..حجيتها واني متجاهلة هنادي...
بقت شوي وطلعت ..
لان ثنينا تجاهلناها ...
مرت ثلث ايام وقرر شجاع يجي يخطبني من جديد...
صادف يوم احد...
اني ع نار منتظرة..
امي خبرتها رح يجون...
صار العصر واجو زلم اشكال الوان..
الشيخ والسيد والرتبة ..
عالم كومة اجت...
سوينا الجاي واخذه الهم عاطف..
بعد مافتح باب الصالة ع الاستقبال..
لان هم هواي وصالتنا صغيرة ماكفتهم....
احنا بقينا اني وامي بالمطبخ نسمع....
بلش شيخهم يحجي عن اليقطع قسمة ويوكف بيها ..
والموجودين نسمع اصواتهم...
كل واحد يزيد كلمة وموقف من جهة...
الى ان كال ..
احنا اجيناك بهالطلب ..
ونريد نطلع راضين...
ومهرتكم نريدها لخيالنا...
للحكاية بقية
بقلم شقراء(قمر كانون)