ام زوجي الظالمة (حماتي المستبدة)

البارت الثالث

#حماتي_المستبدة
البارت الثالث

#بقلمي
#همسات_الليل(ام آيه)

ونرجع لاول مشهد....

يمه رحميني وامشي خطبيلياها ...

ترى البنيه متعذبه بيت اهلها وشايفه الويل من ورايه...
ناس شكد تجيها وترفضهم علمودي...

سعاد.....كبر الك عود مصدك سوالفها...
هاي هم واحد يكلبها...

يوم شبيج مو دالغي...

وهسه متقدملها ضابط يشتغل عند ابوها واهلها مقتنعين بي....

وهي لان رافضته صايرتلها مشكله بالبيت ومأذيها اخوها كاتلها...

سعاد....حيل والله بعد ايدي....
و بالعافيه عليهم الضابط يتهنون بي ....

يمعوده كافي مداهر راح تموتيني والله....

والله مو مداهر....
بس هي هم باينها ثوله مثلك ...

تاخذلها ضابط بالقليل عنده راتب ...
شتسوي بيك وانت ماعندك وظيفه...

واذا ماعندي وظيفه شلاكيتنه فكر لو ما عندي شغل ...
ترى خير من الله عدنا بيت وسيارات وعقارات مأجريها...
هو بس انتي نايمه على كومه فلوس...

سعاد...
قل اعوذ برب الفلق على عيونك المتصلي على النبي...
طلعت انت حاسدنه ياحافظ...

هسه شكلتي ياعيني....

كلت كافي سد هالموضوع وخلصني يوميه عايد هالموال وساطر دماغي...

انا كلتلك روحه ما اروح ولا انت راح تروح ......

ليش يا يمه شبيج ...

والله ما اعرف مبرر لكل هذا رفضج ..

ميعجبني تختار انت...لان اختيارك فاشل...

اني ازوجك مثل ما زوجت اخوتك بنيه على مرامي ...

مو انت  تختارها وتجيبها ما ادري من يا مصيبة ...

اوف اوف ملت روحي تره من هذا  عنادج ...

طز بيك ...و ملتهم...
اني طالع ...

وين رايح ...
لجهنم الحمره اروح حتى ترتاحين...

عمار تعال هنا ولك تعال مو دصيحك ...
ما اجي رايح ...
عوفيني مولي للكبور بلكت ارتاح....

سعاد....مضعوفة البخت شمسويتله وعاميه عيونه....
خبلني بيها ما ادري وين ساحرتله ...
لو اعرف جان رحت وخربت هالسحر الاكشر الي معصي عليه...

ندى....عمه شبيج تسولفين ويه نفسج...
ولمه تلمج فززتيني..
غير تسوين صوت من تفوتين ...

اسفه عمه ...سمعتج تحجين بصوت فعبالي ويه احد ....
وتالي طلعتي ويه روحج...

اي مخبله اني...
حشاج عمه...

لعد وين الشفيه رجلج...
نايم...

و هاي من اجه من دوامه لسه نايم الافندي...
كومي كعدي راح يأذن العشى ..

عمه ترى مصار ساعه من نام وحتى بالخمسه بعد مصارت....
وقبل شويه اذن العصر...
ياعشى هذا التحجين عليه....

لترادديني بنت بلقيس ترى راسج اكسره...

عمة لا ارددج ولاتكسرين راسي....
كايمه اروح اكعده..

اي روحي كلعه ان شاءالله....
وهجم على هالبيت مابيهم واحد يريح كلبي....

ندى....احمد اكعد خاله تريدك بشغله...

شبيج ندى هم باجيه...

والله احمد مليت ترى من امك...
الجهال و حبك الي بس هم الي مصبرني ..

لتزعل من كلامي  بس والله امك متنحمل وساعاتها مو سوه...

احمد....

يعني شنو با ايدي ياندى ...
هاي امي وهاي تكوينتها قابل اتبره منها...
ترضيها انتي يا بنت خالي يابنت الاصول...

ياندى امي كلكم عرفولها طبع ...
من تضوج لتحتكون بيها لان تطلع كل ضوجتها وحركتها بالمقابل...

وتشوفيها من بالها صافي شمحلاها وياكم ومداريتكم..

ها نسيتي لو اذكرج شلون تفرح وتداريكم بولادتكم ...

ندى.... لا مناسيه اني هم احبها وما اكدر اكرهها...
بس اضوج من مزاجها المتقلب وتصرفاتها التقهر...
و لسانها المنشار ...

متحترمنا بس ترزل وتغلط علينا وعليكم ليل ونهار ...
ح

تى الجهال احسهم ميخافون مني بعد وميحترموني...

لا حبيبتي يحترموج ويحبوج...

اتحملي لخاطري ام ليوثي الذهب....

ندى....طيب خاطري بكلمتين و باسني وطلع....
طيبته وحنيته هي الي خالتني متحمله ضيم عمتي ...
ومشيه  سفينة حياتي ...

سعاد....
علياء .....ياعلياء الشر وينج...
نعم عمه جايه هياتني جايه...

تعالي شوفي يوسف شمصخم بروحه ...
فالحه بس بالتزوك وملفلفه برجلج ليل ونهار عبالك راح يطير......

حسن....
نزلت من غرفتي وامي تدردم على علياء ...
طبيت للمطبخ وسلمت عليها...

هله يمه شلونج...
هله حسوني...

بربك ترضاها طفل عمره سنتين ينطوا هالخريط مالكم الي تسموا كاكاو  ما ادري لعبان نفس ...
شلون تاكلوا ما ادري حرام يشبه الطين ...

علياء....اجيت واسمع عمتي تدردم وتحشي براس حسن عليه...

علياء.....
يااا .....هاي شنو يوسف ماما شمسوي بنفسك...

سعاد....عود تغشم روحها المسعده ...
مو انتي ذبيتي يمي وانطيتي هالعلبه وسبح بيها ودمر نفسه.....

علياء....عمه وين انطيته اني ...
ذبيته يمج وحطيت القوري على النار كتلج اروح اكعد حسن واجي حتى نشرب جاي...

يعني شنو تجذبيني ...
لاعمه حشاج بس مو اني نطيته ...
يجوز انتي نطيتي العلبه وناسيه ....

اي عفيه بنت رجاء هالدوره تتبلين عليه لو تطلعيني خرفانه...

حسن....كافي يمه حقج عليه امسحيها بيه...

وانتي علياء اخذي يوسف بدليله ومصار شي سدوا السالفة...

علياء...اخذت ابني مغثوثه من تصرفاتها...
شفت ندى طالعه من غرفتها...

ندى...يا وج هذا شمصخم بجهرته وسوفي......

غير من وره عمتج تسوي المصيبه وتذبها براسي..

ناطيته النوتيلا وتكله لحسن هاي علياء نطتهيا...
و

كاعده تحركه عليه....

ندى....يله يمعوده عديها عمار غثها وطلع العصر.... و بلشت بيه بالاول وبعدين اجه دورج...

علياء...حضنا المصخم الله بلانا بعمتي وقهرها...
بس اوف الله ميلام بيها ....
محد يكدرلها غير عمار هو دواها..

عمار... امي شيبت كلبي وطلعت العصر بوجهي على الحداد وجبته للبيت...

عمار..... فتت المغربيه للبيت وامي كاعده جنها الاسد بالمطبخ على الكرويته ...

احنه كعدتنه اغلب الوقت بالمطبخ ....

بس بالليل احنه الولد نروح نكعد بالهول نتفرج طوبه...
وامي ونسوان اخوتي بالمطبخ متابعين مسلسل...

عمار...
السلام عليكم ...
كلهم ردوا السلام بس امي دايره وجها ومنفوخه مسويه نفسها ممنتبها ...
عود مندمجه بالتلفزيون...

عمار....
علياء فدوه فتحي باب الكليدور وسووا طريق ...
وخاف اكو ملابس على المحجر شيليها اريد اصعد للسطح جايب الحداد ويايه...

وانتي نداوي حضرينه استكانين جاي ورمشيلي حتى اجي اخذهم...

ادلل عموري...

سعاد....
ولك ياحداد هذا شدصخم انت...

عمار....
ها سعوده هاي سمعتيها بس السلام ثولتي...
تسمعين على الي يصرفلج...

عمار...يمه بعدين نحجي بالموضوع الولد واكف بالباب....

احمد ...ياحداد عمار ...
عمار اصعد انت وحسن فوك واني افهمك...

عمار ....
صعد الحداد اخذ قياسات بالسطح..
اريد اسويلي هول ومطبخ صغير وصحيات ويه غرفتي...
من السندويش بنل لان بيتنا بناء الثمانينات وميتحمل بنيان والسندويش اخف عليه...

حسن...عمار متكولي شدسوي لخاطر ربك راح تفتح ابواب جهنم علينا...

عمار...اكلكم هي بيها بلياها مفتوحه جهنهم ولاسعتنا نارها ...

اريد اتزوج كافي صار  سنين انتظرها تحن عليه وتقتنع بس قافله الا على نمارق ...
شنو هالحب الي طلع على تالي وقت ...

عمار...بربكم كولولي منو تقبل تعيش ويه امكم ودكايكها...

ترى والله ندى و علياء اعتبرهم مجاهدات لان عايشين يم امي...

وصدكوا لو غريبات جان من زمان عافوكم بس حاسبين حساب الكربه...

عمار....كمل الحداد واتفقنا بعد يومين يبلش شغل...

وصلته للباب ورجعت...
طبيت للمطبخ ...

عريف شلتاغ مجتف و واكفه تنفخ ...
ياستار...

سعاد....اكولك شنو انت ماعندك جبير ...
لا العفو يمه البركه بيج والعين متعلى على الحاجب...

ها مازالك تعرف اني موجوده بعدني شكاعد تخربط لعد...

يمه اريد اتزوج والبنيه غريبه ...
اي والمسعده السفيره عزيزه لو الاميره ديانا متكعد الا بيت وحدها...

لا هاي ولا هاي بس كل ما بالامر البنيه غريبه وتستحي عندي اخوة بالبيت وتريد تاخذ راحتها...

اي خايب ومنو كلك اني قابله بيها حتى اقبل تبنيلها....

تقبلين وداعتج...لان انتي حبابه....

لا بهيج سوالف انت متعرفني لعد ...
اطلع كل الحقاره العندي من تصير الشغله غصب وتحدي...

لا يمه مو بالغصب ...
بس اني احبها وحالف ما اخذ غيرها ...
واحسن ما اخذها بدون رضاكم و اطلع أاجر بيت بره ....

كلت ابقى يمكم بس اسويلي مشتمل صغير فوك....

سعاد....
شوف واسمع زين اني هاي البنيه متطب ولا تعتب بيتي الا وره موتي...

يوم حرام عليج تحركين كلبي وتعذبيني بعنادج...

دا اكلج البنيه رفضت هوايه قسم من ورايه...

وهسه اهله قافلين عليها الا يزوجوها...

غمه تغمك يا ابن سعاد وانت صدكتها ..
عود جاييها خطابه..
لك باب هذا فن ودروب انت متعرف بيها ...

تقشمرك بكم كلمه وتشوفك كم دمعة وتسمعك موال اجاني واحد وبابا راح يزوجني ...

حتى انت الاثول تصدكها وتروح تركض تبجيلها ولا وما لا.... متصيرين لغيري...

سعاد....امداك دومك الثول راكبك...

روح ولتترجه مني شي ...

وشوكت متحط عقلك براسك تعال اخطبلك رونق تاج راس ام السحوره...

واني كلت لو رونق لو ماكو ...

عمار....
هذا اخر كلام عندج ...
اي ...
عمار....هاهي لعد ...
زين كلتيلي قبل لا ابلش شغل ...

عمار....
عفتهم ومشيت...
لان النقاش ويه امي عقيم ومتعب جدا...

صعدت لميتلي كم غرض بجنطه صغيره ونزلت...

احمد و حسن....
وين رايح عمار ..

رايح للكبور ..
احمد....ارعن جاوب عدل مو دنسألك...

عمار...اروح وين ما اروح تعبت ...
كافي عاد امكم خبلتني ومدالكة سبب لرفضها وعنادها...

بنيه بنت اصول و اخلاقها عاليه و تحبني و مستعده تعيش ويايه على الحصيره...

عليش امكم رافضة ما اعرف السبب....

سعاد....اني واكفه دايره وجهي واباوع على التلفزيون بس اسمع سوالفه وصلافته ...

اخذ جنطته وطلع واني كلبي محترك حرك عليه بس سويت نفسي مو مهتمه و ابد معبرته....

علياء وندى.....
عمه خطيه والله عموري ورده وحباب وديكولج راحته يلكاها عدها يجوز تطلع حبابة وبنت اوادم .. ...

شنو راحته عدها ( يامن تعب يامن شكى و يامن على الحاضر لكه )....

اني اربي و اسهر وانطي جاهز مجهز بخت الجنه...

واني محد معبرني....

وصدكوا  لو بيدكم  جان من زمان شمرتوني بره البيت  بس محسبين حساب لحجي الناس...

احمد....يمه شنو هالحجي بله الي يسمعج شيكول علينه....
ميكول احنه مو خوش ولد ...
مقصرين بشي وياج احنه يا امي ...

حسن...قنابل  امي متنجرع صارت عصبية و كامت تشمر بالحجي شروي بروي...

اشرت لندى وعلياء بحاجبي ياخذون الجهال ويطلعون من المطبخ ......

حسن .....يمه ميصير هيج تحجين ...
ترى البنات يتمنولج الرضى ديرضوج ....
ويشتغلن ويسمعن اهانات وشتم منج ويبقن  ساكتات لان يحترموج ....

سعاد....اي عفيه بالسبع....
اذا ابن بطني هيج يحجي ومشتغل محامي دفاع لمرته لاعتب على الجنه لو رادت تمد لسانها ..

سعاد....كوموا اثنينكم لتدوخون راسي روحوا راضوا السفيره عزيزه والاميره ديانا خاف انقهروا خطيه...
ويحرموكم تعتبون باب الغرفه...

والا اكوللكم صيحوهم يجون يسون العش اني راح اولي لغرفتي ولحد يجي يدك بابي ديربالكم....

عمار....ركبت سيارتي وما ادري وين اروح ....
الدنيا ظلمت بعيني و امي سدت كل البيبان بوجهي بعنادها..

دكيت على تاره و فتحت عليه خط و اني ساكت ما احجي ...

تاره....الووو ..الووو...حبيبي ...عموري ..

تاره ....
فتحت خط على عمار جان ساكت بس اسمع انفاسه وتنهيدته..

حبيبي انت وين ...

تعبان تاره و روحي حاسها راح تطلع...
اسم الله عليك ياروح روحي ...

محتاجج واتمنى اضيع بحضنج و تنسيني كل همومي ...

مشتاق و خايف ليجي اليوم الي اموت و انتي مو يمي...

عموري ما اتحمل هذا حجيك والله اني دموت الف مره و متعذبة بفاركك...

ومنا مروان ضاغط عليه حيل من وره العريس الجديد....

طمني عنك ياعمري و لتخوفني بحجيك هذا ...
و الله رجلي كلها ترجف و حيلي انهد من وره نبرة صوتك...

اريد اشوفج اليوم.... وج والله تعبان...

تاره....
والله صعبه....
مروان طبطبني البارحه ...
واليوم ما اجه علينه ...
خاف اجي والدوره يجي وتتصعب كل اموري.....

عمار....
تاره والله محتاجج حاس روحي راح اموت ....

اسم الله عموري...
ما اعرف هسه احاول اقنع امي بلكت تقبل اروح على ندى ...

دشوفيها رحمه للنبي و رحميني...

عمار.....
اصعب شعور من تحب وروحك تتعلك با انسان وراحتك تلكها بس ويه هالانسان....
و فجأة تجيك طعنه من اقرب ناسك  ويسلبك سعادتك و حبك الي يعتبر اوكسجين حياتك..

تارة....
ماما اريد اروح لندى فدوة و وديني عليها...

ام مروان....لج تاره ستري علينا ...
البارحه بيتنا محترك...
واليوم تدوريلي تخامه ببيوت الناس...

ماما والله  ضايجه ومختنكه....

ها تاره لازم الافندي يمهم ...
لا مو هناك...

بس  مشتاقه العب ويه ملوكه و قمورة بنات رؤى....

ام مروان....

تاره بنتي اني عندي ثقه بيج وبا اختيارج ...
واتمنى متزعزين هالثقه يابنتي ...
لان اذا غلطتي لا سامح الله راح نتأذه اني وانتي...
وابوج واخوتج ذيابة و ميرحمون...

لاماما اطمني حبيبتي اني تربيتج....

عمار....

دقايق ودكت تاره...

عموري حبيبي راح اروح لندى...
هسه امي راح توصلني يمها ...

اوكي حبيبتي ياراحتي النفسيه ...انتظرج...

عمار....
ندى اتزوجت وسكنت بنفس منطقة اهلها واهل تاره وتعرف بمعاناتنا...
ورجلها صار صديقي ....
ويعرف شكد احب تاره والصعوبات الي دتعثر دروبنا...

وهو هم صار شريكي بمحل الموبايلات....

تارة....
مرت اقل من ساعه ودكيت على نبضي...

عموري حبيبي اني يم ندى ...

اوكي هسه دقايق واجي ....
اني واكف براس الفرع بس انتظر امج تبتعد شويه...

اكلك عموري ترى صلاح مو بالبيت بعد نص ويرجع....

اوف اوف من تنسد كل البيبان بوجهي ...
شنو اسوي هسه وين أولي راسي راح ينفجر ...

اسم الله حبيبي كافي راح يصير بيك شي ...
لعد اطلعيلي خلي احجي وياج بالسياره بين ميجي صلاح...

اوكي....

تاره....ندى اني رايحه ويه عمار ميكدر ينتظر صلاح..
والكآبه واصله حدها ويا...

رؤى ...ياعيني ياعمار والله ميلوكله القهر ...
بس شنسوي لامه منكول غير الله يهديها...

رؤى.....
زواجكم صار حلم واصعب من قضية فلسطين...

ادعيلها تروح لجوار ربها وتنحل قضيتج...

تاره...
هههههه نزول عليج...
لا يولي عمار يحبها خطيه ...
بس هي امرأه تكوينتها عجيبه غريبه...

الله يهديها عليكم  لعد ويحنن كلبها...
آمين ربي يسمع منج...

عمار....
طلعت تاره وصعدت يمي ...

بهمس...هلو عموري...
عمار....

اكثر شخص اضعف كدامه تاره احس روحي تفرح مثل طفل ضايع ولاكي امي ...

بذيج اللحظه دست على رجولتي وفقدت ...
ولزمت ايدها وابوس بجفوفها وابجي...

لج تاره راح اموت ...
امي حطمتني بس كوليلي شنو اسوي ...
حرت شلون ارضيها وشلون اقنعها وهي قافله متريدج ...

تاره....لازم ايدي واسمع حسراته وتنهيداته ودموعه غركت جفوف ايدي ....
ودموعي كامت تجري عليه بدون وعي....

عمار....

شنو اسوي مخليت طريقه حتى اقنعها وماكو قافله ..
لو ينزل الله متقبل خبلتني وراح اموت من وراها....

هي خسرتني با ايدها ولو شيصير بعد ما خليها تشوف وجهي...

مبقه براسي عقل ...
هاهي راح اجي ادك بابكم واشرح لاهلج ظروفي وبقت يمهم ...

لافدوة عموري لتجي ...
والله يرفضوك و مينطوني الا بموافقه وحضور اهلك ...

ترى امي لو متشوفك حبك الي وتعبان  دتموت جان متعاطفت وياك ...

بس ابويه واخوتي يسولي مصيبه شكبرها....

عمار ...اسمعها وتخبلت بالزايد...

كمت اصيح...
متكولولي شنو اسوي ...
وين اولي والمن التفت ...
اريد راحتي ياناس راح انفجر واموت...

امي مدلغمه طول الوقت ...
عبالك قنبله تريد تنفجر ...
عبالك مو ابنها هم لو واحد جايبته من  الشارع ومربيته  جان انكسر كلبها عليه...

مخليت شي مسويته شلون اقنعها يالهي ...

وانتي الي اشوف بيج راحتي ...
تصديني وتطلعين خايفه من اهلج...

عمار ارجوك لتصعب الامور عليه ترى اني حالي مو احسن من حالك ....
صار كم  سنه رابطة نفسي بيك ..
وروحي تعلكت بروحك وماشوف غيرك وميملي عيني بس انت...
شلون هيج تظلمني بتفكيرك وتعذبني بحجيك..

بس مو راهمة من تجي تدك بابي ...
اهلي مراح يسألوك وين اهلك...

شنو راح تكوللهم مكطم  ....وانت عندك ام واخوه وخوال وعمام......

عمار....مو امج تعرف بوضعي يعني تكدر تفهم ابوج وتقنعه وهو يقنع اخوتج......

عمار انت شدتحجي ترى امي لاتحل ولا تربط افقر منها ماكو ....

ابويه حياته كلها كضاها يذبح بيها على البطيء.... بخياناته ونزواته وهي حبيبتي لاتصد ولاترد ...

مشيه حياتها طبيعيه كدامنه ...

مظلومه وتدوس على جروحها ومتحمله وجعها....
بس دموعها تجري لخاطر عيونه وسعادتنه...

يله تاره نزلي ...

هاي شبيك عمار..

ما بيه شي ...

نزلي اريد اروح ...

حبيبي كافي تعذبني شنو بيدي عليك ...

انت لو تريد روحي انطيها الك واني مغمضه  وابد
ما اتردد والله العظيم....

بس مابيدي شي اسوي ...

لا بيدج ...بيدج تقنعين اهلج بيه وتشرحيلهم ظروفي ...

هم رجعنه لنقطه راس السطر ...

حبيبي وغلاتك يدمروني ويعذبوني طول حياتي....

تاره.....
بقينه اثنينا ساكتين و اني عيوني تصب دمع ...

وعمار داير وجهة و صافن على الجامه يجر حسرات و يتنهد ...

ويدخن جكاره وره جكاره يمكن شرب نص باكيت...

تاره....قطعت هذا الصمت والسكوت المخيف...وكلتله....

عمار اتزوجني بالسر...

عمار....حسبات تاخذني وصفنات توديني بزماني القاسي ...

وتاره صدمتني من كسرت حاجز الصمت وحجت ....

شكلتي بابا عيدي اذني مسدوده وما اسمع زين ...
كلت الي سمعته...

تاره حبيبتي نزلي لخاطر ربج ...

تعبان والدنيا كلها كاعده فوك ضلوعي وخانكتني....

و جيت ادور راحتي يمج تاليتها تكوليلي اتزوجني بالسر ...
انتي وحدي متقبلين ادك بابج ...تكولين اهلي يعارضون...
النوبه بالسر...

تعرفين شنو بالسر ...
معناها حياتنه متشوف النور حالنا حال اهل الكهوف....
واهلج واهلي يتبرون من عدنا ...
لان لابد يجي يوم و لازم ننكشف....

تاره....يعني شسويلك والله اني هم تايهة وضايعة مثلك....

لا عبالك هالخطوة هي حل بالنسبه الي بس شفتك مذبوح وردت اداويك...

شكرا احسن دوه انطيتيني ...
نزلي تاره خل اروح...

ماكو روحه لاي مكان وانت مقهور ...
نزلي تاره...

ما انزل ...
نزلي لخاطر الله...

عمار لخاطري لتنقهر ولتروح وانت مهموم وضايج مني ....

لا مضايج وحتى لو ضايج مو انتي السبب...
اطمأني ...
بس نزلي لخاطر الله خل اولي لجهنم....

تاره....فتحت الباب وروحي باقيه يمه و ميهلي اعوفه بهاي حالته...
داسد الباب جان يصيحني...

عمار....ديري بالج على روحج تاره...

تاره...عمار لتخوفني عليك الله يخليك...

سدي الباب يا بنت كلبي...

تاره ...نزلت وطبيت يم رؤى وشبعت بجي بعد ما اتحمل...
اتعب كلش واضعف من اشوف عمار متحطم بهالشكل و منهار...

عمار.....
مشيت با اقصى سرعتي و بايع الدنيا كلها و رخصانه روحي عليه و ميهمني بعد احد...
تعبان و اريد ارتاح....

رؤى...دكي عليه خطيه وكوليله كلمة بيها حبيات و هسه راسا يهدة و يبرد ...
كلبه طيب وينسى بسرعه......

تاره ...دكيت عليه و بقى يدك الما نكطع ...
دكيت ثاني مره و هم  نفس الحاله...
دكيت وراها كام ينطيني رفض ...
وراها ادك كام يطلع كله مغلق...

تاره...رؤى اني تعبانه  مو بس هو تعبان ....
شكد كلبه طيب وحنون ويملك مشاعر ما الها وصف ...

بس عنده هاي الحاله من يقفل يشلع كلبي بيها ....
الا يهدء وحده وبعدين هو من كيفه يرجع يحجي ويايه...

رؤى...يله حبيبتي عادي كلهم الزلم طنكوره و من تجيهم الخمس دقايق بعد ميعرفون احد بخبالاتهم....

عمار .....
ماعندي مكان اروحله  كلت اكضي الليله يم زيدون و باجر ادبر حالي وارتب وضعي ....

تارة.....
رجعت للبيت وكلبي محترك على عمار وما بيدي شي اسويلهيا ...

احنة بمجتمع شرقي مكبل المره بقيوده وعاداته وتقاليده ....
وما مسوحلها تتخذ قرارات مصيريه  ...

هاهي البنيه عدنا حياتها مسيرة وليست مخيره...

وهذا المتعارف عليه عند اغلب العوائل بالمجتمع...

تارة.....

دك عليه عمار واني بقمة حطامي وانهياري...
رفعت التليفون بدون ما اجاوب...وسمعته...

عمار...
حبيبتي سامحيني...

تاره...مسمعت بس هالكلمتين ..
وراها سد الخط وكلبي وجعني من هالكلمتين ودموعي وكلبي ينزف ....

اريد بس اسمع صوته ...
بس عمار صعب مزاجه من يضوج ميحب يحجي ويه احد حتى ويايه...

الى ان الحرب الي بداخله تطفه نارها... ويخمد رمادها...
ساعتها يرجع لوضعه الطبيعي ويحس بندمه....

عمار.....
حملت تاره همومي  ادري جنت قاسي وياها مو بيدي احسها نصي الثاني وتكملني ...
واحس روحي ضعيف من انهار وهي الي تقويني ..

دكيت عليها اعتذرت وسديته...

ما اعرف هربان من نفسي او مستحي من تصرفاتي الي رجعتني ليوره ...
المهم حسيت لازم اعتذر...

سديته و دكيت على زيدون...

هلو زيدون شلونك...
هلو عموري ...

زيدون راح اجي ابات يمك اليوم...
اي هله بيك تنور والله....
لازم سعوده اليوم حاركه الجو...

اوف اوف اكو غيرها...

يله تعال اليوم اخسرك بالورق وهالمره خسارتك راح تكون جبيره...

ههههه اوف الله كريم يا فطير ...

يله حبيبي انتظرك تتعشه ويايه بعدني متعشيت ...

لا زيدون لتكلف خاله ...
بالعافيه انت تعشى اني ما اشتتهي والله...

لتظل تحجي هو عشى وصاير قابل علمودك ...
واذا ماكو نقلي طاوة طماطه وراسين بصل وياها ويصير احلى عشه...

اي والله عاشت ايدك...

وايدك عموري....وين وصلت...

هياتني بمنطقتكم على الشارع ...
بس اريد اطبك حتى اجيب جكاير واجي ...
تريد اجيب شي ويايه ...

لا سلامتك ...
لعد راح اجيب كرزات وببسي...
اوكي براحتك... انتظرك....

ندى ....
روح احمد صيح عمه والله كتلنه الجوع والاكل برد اريد انيم الجهال صارت ساعه 11 واحنه ممتعشين......

احمد....شسويلها كل شويه اروحلها ومتقبل ...
صبيلنه خل نتعشى ورايه دوام...

حسن....اي صبولنا مو حاله هاي...

ندى....دكوم لخاطري هالمره بس...

اوف شراح يخلصنه اليوم منها ...
اكوم اروح و امري لله ...

احمد...فتت بغرفته امي شفتها نايمه ...

يوم حبيبة اكعدي تعشي ...

ما اريد اتبوزع ...
مو زين عليج يايمه تنامين جوعانه و انتي وراج علاج...

طبني طوب خل اموت و ارتاح....

اسم الله يوم شنو هالحجي...

ندى....دك تلفون احمد جان بالمطبخ على الشحن ...

فتت لغرفة عمتي ...

هاك احمد تلفونك يدك...

احمد....هذا زيدون صديق عمار ...

سعاد....
اذا عمار لتكله تعال عوفه يجرب البهذله وشلون  يديح من يتحدة اهله...

احمد ....يمه خل اجاوب وافتهم شنو السالفه...

احمد.....الو هلو زيدون ...

هله ابوليث شلونك....
ابوليث تعال لمستشفى اليرموك....

ليش شنو صاير ؟؟؟؟
و عمار  وينه؟؟؟؟

زيدون.....(...............)
احمد.....شنو لا بربك !!!!!!

سعاد ....
شفت احمد اصفر وضرب على راسه ..
عرفت عمار بي شي....
وصحت با اعلى صوتي...

وليدي عماااااار...

يتبع....
للحكاية بقية...

مساء السعاده لأغلى المتابعين ...
تفاعلكم يسعدني ويحفزني اقدم الافضل ...
اريد ترفعولي المنشور فضلا وليس امرا....
لان حسابي بالفيس وبالواتباد عليه ابلاغات...

لاتنسوا التعليق والضغط على علامة النجمه لرفع المنشور....

ملتقانى غدا مع حلقه جديده وفي نفس الموعد.
اتمنالكم قراءه ممتعه...وحسن الاستمتاع...

تصبحون على خير⚘

#الكاتبه

#همسات_الليل(ام آيه)